Jechurë Na̧rȩrërea̧ Ma̧ȩ 18 - Biblia Pume

Babironia quȩmȩ bë ma̧ri̧ üdë yuropea̧ oa cjiade

¹ Ado ja̧dëa ji̧ cüdë iei̧ ji̧ daea̧ duri oa, chirirä cjo̧ro̧mȩ coëcoëami̧ damȩ pio ju̧i̧iä buë chayi̧ ji̧ daea̧ duri oa, ado cja̧rȩmo̧ mu̧i̧tjoi̧ oa daea̧requede a̧dërämȩ ja̧ mu̧i̧tjoi̧ oa. A̧dëri pio judiri biramȩ oa daea̧reconȩ ju chia tjamo̧mȩ oa, tjamo̧ yo̧mȩ oa. A̧dë chjäte tata cjiari̧ bira̧de chiriräpȩti̧ oa tatarea̧mi̧ dari̧.

² Ado to̧bari̧ yo̧mȩrȩ ëna̧diäa̧de: —Danȩrȩ, Ütë tjamo̧ pio judi goarijä tänȩrëremȩdejȩ Babironia quȩmȩ bë ma̧ri̧ oa, bë ma̧ri̧ chjadëdë oa. Pio jiro bë ma̧ri̧ üdë ba chia tjamo̧rëremȩde dai chirirä ja̧ jo̧rȩtarea̧ra̧ jo̧rȩtaji̧ri̧ pio ji̧ri̧iä. Ado chiriräpȩti̧ oa cjo̧ro̧ji̧ri̧ judiro̧ dae ja̧bo dae ja̧bo dae chjaomi̧ dari̧ jo̧rȩtarëreji̧ri̧diro̧jo̧ȩ. Jabo yuropea̧ oa cjiade —yo̧a̧de—. Jabechji̧ jiro decjiapea̧de. Ado pumȩ decjiapea̧dirȩ ju̧ri̧pȩ. Jabechji̧ yaröca maearë cjo̧ro̧rea̧ bëpea̧de yaba̧. Aja̧, dami̧ti̧ yaröca chjai̧dëti̧rȩ cjo̧ro̧rea̧ bëpea̧de. Ado pua cjari̧da maearë cjo̧ro̧rea̧ bëpea̧de peaja̧di.

³ Jabechji̧ pio jiro bë ma̧ri̧ oaiä, chiriräpȩti̧ oa cjo̧ro̧ji̧ri̧ pumȩ pio judiro̧ chjai̧dëri̧ cjiadiäa̧dirȩ. Tjamo̧ davä. Ji̧dë ma china̧chja pio ji̧ri̧ baë ëba mo̧a̧rea̧ eataji̧ri̧rȩ cjo̧ro̧a̧ oaiä, pio ji̧ ja̧ ërü gito oa jaraji̧ri̧mi̧ dari̧ japea̧dirȩ, chjai̧dë maeara̧ mirea̧ oa cjiami̧ dari̧ cjiaji̧ri̧rȩ. Jabechji̧ dami̧ti̧ idi̧ da oa japarëreji̧ri̧dirȩ pio ju̧ri̧pȩ. Ado chiri ütëti̧ cjo̧ro̧ji̧ri̧ pio judiro̧borë a̧dë chjäte ma̧i̧ da oa japarëreji̧ri̧dirȩ. Ado gatë tänȩji̧ri̧ judiro̧, jabechji̧ pio ji̧ri̧iä chëre ji̧ra̧ tjamo̧ oa boarëreji̧ri̧dirȩ. Tjamo̧ davä. Pio ju̧ri̧pȩ cjo̧ro̧ji̧ri̧ judiro̧ ji̧dë ma dae ja̧bo dae ja̧bo gatë chjaoa̧ oaiä, chiriräpȩti̧ oa gatë tänȩriä tai̧ji̧ri̧ pio judiro̧ a̧dë chjäte ji̧ra̧ oa boarëreji̧ri̧dirȩ. Ja̧di ta̧rëri̧ yo̧mȩrȩ ni̧bä chjaoa̧dique mu̧i̧tjoi̧ üdë.

⁴ Ja̧dëa ji̧ ta̧rëa̧reconȩ Ütë tjamo̧ ju̧i̧, a̧dëri pio judiri ni̧bämȩ oa. Ja̧di ta̧rëri̧ yo̧a̧de: —Go̧düchji̧vä ca̧ pumȩ —yo̧a̧de—. Pio jiro bë ma̧ri̧ri pio judiri go̧düchji̧vä pio ju̧i̧iä chjai̧dëri̧ japachea oa, pio ju̧i̧ nö̧ta conȩda̧ oa cjiachea oa. Go̧düchji̧vä.

⁵ Danȩrȩ, üi̧ goarayi̧ iei̧mi̧ da pio judi chjai̧dëri̧ japea̧ üdë, a̧dë chjäte ji̧ra̧ tjamo̧de, cja̧rȩmȩrämo̧ uë tjamo̧ cjiari̧ a̧dopë chi̧däa̧mi̧ dari̧. Ado pio cüdë, Ütë tjamo̧ pio judimȩrȩ, jo̧rȩtarequede davä judi chjai̧dëri̧ japea̧ pio ju̧i̧. Ado pio ju̧i̧iä bape chjaopareconȩ.

⁶ Pio ju̧i̧iä yo̧tarequededibe go̧dütä. Jabo go̧dübea yaboi̧, jabechji̧ bape chjaochji̧jo̧ȩ. Pio dibëiäpȩmo̧ chjai̧dëri̧ japea̧ ba oa bape chjaochji̧jo̧ȩ, ba uëri̧ bape chjaomi̧ dari̧. Tjamo̧ davä. Pio dibë japea̧mi̧ bape chjaodëpea̧de, jabo ji̧dë u̧i̧ bape chjaopea̧de. Jabechji̧ pio dibëiäpȩmo̧ cja̧rȩichimo̧ co bide cjaeäa̧rä judi, jabechji̧ ichi chjö̧na̧i̧ co bape bide cjaeätäreji̧ri̧renȩro̧jo̧ȩ, ba uëri bape chjaomi̧ dari̧. Jabechji̧ uira̧ mirea̧ oa cjiadëmȩ ërü gito tjamo̧ oa yürümi̧ dari̧ bape yürütäreji̧ri̧renȩro̧jo̧ȩ, ma̧i̧ da bape chjaorea̧ra̧.

⁷ Jabechji̧ pio jiro iei̧mi̧ da judi, a̧dë chjäte ma̧i̧ dari̧ japea̧ ba oa bape chjaochji̧jo̧ȩ conȩdarea̧ra̧, ana̧ri̧ ejaro cjiami̧ dari̧ cjiapea̧ oa. Danȩrȩ, pio jiro iei̧mi̧ darë jibëa̧ chji̧rämo̧ jo̧rȩtatade. ‘Aja̧, a̧dë chjäte ba chiaquëda, tjamo̧ cjo̧ro̧yi̧ ütë pio jini̧quëda’ quëna̧ jo̧rȩtade. ‘Üi̧ decjiayi̧mi̧ dari̧ cjo̧ro̧dëquëda, jabo üi̧ chiayi̧mi̧ dari̧ cjo̧ro̧quëda, ca̧ea̧ma̧i̧ cjiadëquëda, ado pio ju̧i̧iä jabechji̧ gitoi̧ dari̧ jo̧rȩtayi̧rȩ cjo̧ro̧dëpaquëda, jabechji̧ ji̧dë ma jäbediärea̧ decjiari̧ cjo̧ro̧paquëda’ quëna̧ jo̧rȩtade. Aja̧, ja̧di dari̧ jo̧rȩtatade iei̧mi̧ darë. Ado ja̧di dari̧ jo̧rȩta̧ oaiä, pio jȩa chjiari a̧dë chjäte goaeri̧ yo̧de. Pio ju̧i̧iä a̧dë chjäte ji̧ra̧ oa mitëde, jënȩ dae ja̧bo dae ja̧bo daea̧ pio ju̧i̧. Jabo cjäri̧ made, ja̧di dari̧ cjo̧ro̧a̧ oaiä, peaja̧di conȩda̧ oa cjiapade, ma̧i̧ da bape chjaorea̧ra̧ pio ju̧ri̧ra̧.

⁸ Tjamo̧ davä. Babironia bë ma̧ri̧ üdë pio jȩa chjiari ji̧dë ma goaeri̧ yo̧mi̧ dari̧ japea̧ oaiä, jabechji̧ chjaodëri̧ acji cjatäpadejȩ ma̧i̧ da conȩdarea̧ üdë. Tjamo̧ davä. Üi̧ goarayi̧ iei̧mi̧ da pio judi ana̧ri̧ tarapade gito pio ju̧i̧, ja̧borea̧ pio ju̧i̧bo. Odai̧ tarari̧ jo̧rȩtami̧ dari̧ cjiapade jibëa̧ pumȩ ji̧ri̧ ëbarërea̧ ji̧. Jabechji̧, cjo̧dëra̧ pio ju̧ri̧ra̧ yuroparea̧mi̧ dari̧ bape chjaopareconȩ. Jabechji̧ Ano̧mȩ Ütë pio judirequede, a̧dë chjäte ju chiamȩrȩ. Aja̧, ja̧di ta̧rëri̧ yo̧a̧de Ütë tjamo̧ judi üi̧ goarayi̧ iei̧mi̧ da pio ju̧i̧ chjiari.

⁹ Ado chiriräpȩti̧ oa cjo̧ro̧ji̧ri̧ ütëti̧ judiro̧, jabechji̧, ejaro cjiapadirȩ. Tjamo̧ davä. Pio jiro iei̧mi̧ da bë ma̧ri̧ pio ju̧i̧ nö̧ta ëba mo̧a̧mi̧ dari̧ japea̧ji̧ri̧ pio judiro̧ ejaro cjiapadirȩ. Pio ju̧i̧ daea̧ oaiä, cjo̧dërë tüea̧ oa cjiamȩ oa daea̧ oaiä, pio jiro bë ma̧ri̧ri pio judiri gäri cjitëmȩ chjä oa daea̧ oaiä, gito ana̧ri̧ jo̧rȩtaji̧ri̧rȩ ejaro cjiapadirȩ.

¹⁰ Jabo pio judiro̧borë tüea̧ oa cjiachea oa, jachi chja dae cjiapadiro̧jo̧ȩ, uapai̧ dadëräpȩ. Jabo jachiji̧ri̧borë uapaji̧ri̧rȩ dae cjiapadiro̧jo̧ȩ. Ado ana̧ri̧ jo̧rȩtaji̧ri̧rȩ ja̧di ta̧rëri̧ yo̧padirȩ: —Aea, aea —yo̧padirȩ—. A̧dë chjäte chjai̧dë oa chjätäa̧de pio jiro bë ma̧ri̧ üdë. A̧dë chjäte chjai̧dëri̧ cjiadiäa̧de. Babironia quȩmȩ bë ma̧ri̧remȩ üdë, bë ma̧ri̧ ba chia tjamo̧remȩ üdë, cjäri̧ made, chjaodëri̧ bape chjaoa̧ oa cjiadiäa̧de japamitë boi̧chji̧rä. Aja̧, ja̧di ta̧rëri̧ yo̧padirȩ.

¹¹ Ado chiriräpȩti̧ oa gatë tänȩriä ta̧i̧ji̧ri̧ pio judiro̧borë gito ana̧ri̧ jo̧rȩtapadirȩ bë ma̧ri̧remȩ pio ju̧i̧ chjiari. Tjamo̧ davä. Pio ju̧ri̧pȩ cjo̧ro̧reji̧ri̧ judiro̧ pio ji̧ri̧iä ji̧dë ma gatë chjaorërea̧ ji̧, pio ji̧ri̧iä dami̧ti̧ oa gatë chjaorërea̧ ji̧, cjäri̧ madirȩ, gatëdëji̧ri̧pea̧dirȩ. Jiro decjiapea̧dirȩ. Ja̧boa̧ maeadirȩ.

¹² Jibëa̧ oro oa, jibëa̧ parata oa gatërërea̧ ji̧, jibëa̧ ta̧dë ba chia oa gatërërea̧ ji̧, jibëa̧ törichji ba chia oa, pera quȩmȩ tjärichji oa gatërërea̧ ji̧, gatëdë mapea̧dirȩ. Chjibo coto ba chia tjamo̧ oa, dino quȩmȩ chjibo coto oa, cheda quȩmȩ chjibo coto oa gatërërea̧ ji̧, chjibo coto coëcoëa oa gatërërea̧ ji̧, gatëdë mapea̧dirȩ. Pio jiro decjiapea̧dirȩ. Ado goaeri̧ pjȩa̧mȩ to oa gatërërea̧ ji̧, ado cja̧rȩmo̧ oa, erepja̧te ja̧ jo̧dë ana̧remȩ pio ju̧i̧ chjacjiamȩri̧ jëdano̧a̧ pio ju̧i̧ gatërërea̧ ji̧, gatëdëji̧ri̧pea̧dirȩ. Ado boro̧che quȩmȩ chjipararira̧ japea̧ oa cjiamȩ pio ju̧i̧ gatërërea̧ ji̧, maropji quȩmȩ ta̧dëra̧ pio ju̧ri̧ra̧ ja̧bepapea̧ oa gatërërea̧ ji̧, gatëdëji̧ri̧pea̧dirȩ pumȩ decjiapea̧ tara.

¹³ Ado dami̧ti̧ jurarea̧ mirerea̧ oa gatërërea̧ ji̧, goaeri̧ pjȩa̧mȩ joarea̧ oa gatërërea̧ ji̧, gatëdëji̧ri̧pea̧dirȩ. Ado goaeri̧ pjȩa̧mȩ gi̧därea̧ oa gatërërea̧ ji̧, goaeri̧ pjȩa̧mȩ cäarea̧ oa gatërërea̧ ji̧, gatëdë mapea̧diro̧jo̧ȩ. Jabechji̧, gi̧därea̧ ba chia pio ju̧i̧bo gatëdë mapea̧dirȩ. Ado bino quȩmȩ ërü oa gatërërea̧ ji̧, ado ano̧pea̧ yo̧ oa, jadea̧ oa cjiamȩ tirigo oa, baca oa, oveja oa, yae oa gatërërea̧ ji̧, jadüchiami̧ ta chiamȩ yae chara oa gatërërea̧ ji̧, gatëa̧ mu̧i̧tjoi̧ pio ji̧ri̧, pumȩ pio ji̧ri̧ gatërërea̧ ji̧, gatëdë mapea̧dirȩ. Jabechji̧, pumȩ decjiapea̧ oaiä, cjo̧dë maeara̧ tüea̧ oa cjia̧ oaiä, gatërea̧mi̧dëpea̧dirȩ.

¹⁴ Ado gatë tänȩriä tai̧ji̧ri̧ judiro̧ ana̧ri̧ jo̧rȩtaji̧ri̧rȩ yo̧padiro̧jo̧ȩ Babironia bë ma̧ri̧ pio ju̧i̧iäpȩmo̧, ta̧rërea̧ chiamȩmi̧ da pio ju̧i̧iäpȩmo̧: —Cjäri̧ marenȩ, dami̧ti̧ oa dae ja̧bo dae ja̧bo dae chjaoremȩrenȩ —yo̧padiro̧jo̧ȩ—. Jabo cjäri̧ marenȩ, gatërea̧mi̧dëpea̧renȩ yaba̧. Mitërea̧ dadëparenȩ. Mȩnȩ a̧dë chjäte ji̧ra̧ri̧ goarërea̧ ji̧, dami̧ti̧ ba chia oa goarërea̧ ji̧, jiro decjiapea̧de yaba̧. Na̧ chëre decjiapea̧de. Mȩnȩ chjacjiamȩ tjamo̧mi̧ dari̧ cjiarërea̧ ji̧, cjäri̧ marenȩ. Goadëyi̧ tjamo̧mi̧ dari̧ cjiadiäa̧renȩ bucho ana̧, ado chjereno̧ mitërea̧mi̧dëri̧. Aja̧, ja̧di ta̧rëri̧ yo̧ji̧ri̧rȩ yo̧padirȩ gatë tänȩriä tai̧ji̧ri̧ judiro̧ bë ma̧ri̧remȩ pio ju̧i̧iäpȩmo̧.

¹⁵ Gatë tänȩriä tai̧ji̧ri̧ judiro̧ chëre ji̧ra̧ tjamo̧ oa boarëreji̧ri̧dirȩ Babironia quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧iä Ado pio ju̧i̧iä ana̧ri̧ jo̧rȩtaji̧ri̧rȩ ejaro cjiapadirȩ. Jabo pio judiro̧borë conȩda̧ oa cjiachea oa, jachi chja dae cjiapadiro̧jo̧ȩ, uapai̧ dadëräpȩ. Jabo jachiräpȩborë, uapaji̧ri̧rȩ dae cjiapadirȩ pio jiro bë ma̧ri̧ oa.

¹⁶ Ado gitori̧ jo̧rȩtaji̧ri̧rȩ ja̧di ta̧rëri̧ yo̧padirȩ: —Aea, aea —yo̧padirȩ—. A̧dë chjäte chjai̧dë oa chjätäa̧de bë ma̧ri̧ üdë. A̧dë chjäte chjai̧dëri̧ cjiadiäa̧de. Chjacjiayi̧ tjamo̧mi̧ dari̧ cjiarërea̧ ji̧, dami̧ti̧ ba chiara̧ pio ju̧ri̧ra̧ ina̧ oa cjiami̧ dari̧ cjiarërea̧ ji̧, dino quȩmȩ chjibora̧ ina̧ oa cjiami̧ dari̧ cjiarërea̧ ji̧, coëcoëara̧ ina̧ oa cjiami̧ dari̧ cjiarërea̧ ji̧, dami̧ti̧ tjärichji ba chia oa i̧a̧mi̧ dari̧ cjiarërea̧ ji̧, ja̧dimi̧ dari̧ cjiadëde yaba̧. Tjamo̧ davä. Ta̧ra̧ märärea̧ ba chia oa cji̧däa̧ oa cjiami̧ dari̧ cjiarërea̧ ji̧, orora̧ japea̧ oa cjiamȩ ba chia oa chaä oa cjiami̧ dari̧ cjiarërea̧ ji̧, ta̧dë ba chiara̧bo i̧a̧ oa cjiami̧ dari̧ cjiarërea̧ ji̧, ado pera quȩmȩ tjärichji oa i̧a̧ oa cjiami̧ dari̧ cjiarerea̧ ji̧, cjäri̧ made, goadë mapea̧de yaba̧.

¹⁷ Jabechji̧, japamitë boi̧chji̧rä, chjaodëri̧ mö̧na̧mi̧ dari̧ cjiadiäa̧de a̧dë chjäte ji̧ra̧ri̧ goarërea̧ ji̧. Aja̧, ja̧di ta̧rëri̧ yo̧padirȩ gatë tänȩriä tai̧ji̧ri̧ judiro̧ bë ma̧ri̧ pio ju̧i̧ chjiari, gito ana̧ri̧ jo̧rȩtaji̧ri̧rȩ. Ado peaja̧di ana̧ri̧ jo̧rȩtaji̧ri̧rȩ dapadiro̧jo̧ȩ o judiro̧. Danȩrȩ, uimo̧mȩ chara ana̧ra̧ ja̧bepaji̧ri̧ pio judiro̧ peaja̧di ana̧ri̧ jo̧rȩtapadirȩ. Pio jiro bë ma̧ri̧rä gatë tänȩ chjaoreji̧ri̧ judiro̧ ütëbodärärë ana̧ri̧ jo̧rȩtapadirȩ, jachi chja dae cjiaji̧ri̧rȩ. Uimo̧mȩ chara ana̧ra̧ tjamo̧ tai̧ji̧ri̧ pio judiro̧, pio ji̧ri̧ nö̧ta ja̧bepaji̧ri̧ pio judiro̧, ado pio ji̧ri̧ nö̧ta tai̧ cjiaji̧ri̧ judiro̧ dae cjia mapadiro̧jo̧ȩ.

¹⁸ Gito ana̧ri̧ jo̧rȩtaji̧ri̧rȩ dae cjiapadiro̧jo̧ȩ bë ma̧ri̧remȩ pio ju̧i̧, goae tarari̧ chjä cjiari̧ gärimȩ oa. Ado yo̧padirȩ: —Cjäri̧ made, jiro decjiapea̧de. Pio yodë bë ma̧ri̧remȩ üdë a̧dë chjäte ba chiarërea̧ ji̧, ado cja̧rȩmo̧ bë ma̧ri̧ üdë nö̧tadërëa̧ ji̧, jiro decjiapea̧de yaba̧. Aja̧, ja̧di ta̧rëri̧ yo̧padirȩ gito ana̧ri̧ jo̧rȩtaji̧ri̧rȩ.

¹⁹ Ado dabu pjo̧no̧i̧ pio ju̧i̧ mitë ëte, a̧dëräpȩmo̧ quibë aea̧diro̧jo̧ȩ jibëa̧ tjübërä gu̧rorea̧mi̧ dari̧. Ja̧di dari̧ japea̧dirȩ ejaro cjiaji̧ri̧rȩ, gitori̧ ana̧ri̧ jo̧rȩtaji̧ri̧rȩ. Ado yo̧a̧dirȩ: —Aea, aea —yo̧a̧dirȩ—. A̧dë chjäte chjai̧dë oa chjätäa̧de bë ma̧ri̧ ba chiaremȩ üdë. A̧dë chjäte chjai̧dëri̧ cjiadiäa̧de. Aja̧, pio jiro bë ma̧ri̧remȩ pio ju̧i̧iä, chëre ji̧ra̧ri̧ boaji̧ri̧pea̧dirȩ uimo̧mȩ chara ana̧ oa ana̧ji̧ri̧ judiro̧. Jibëa̧ chara ana̧ra̧ pio ju̧ri̧ra̧ chachari̧ chia go̧düdärä ëte, Babironiaräpȩ cjo̧ro̧ji̧ri̧ pio ji̧ri̧iäpȩmo̧ gatë tänȩ chjaorëreji̧ri̧diro̧jȩrȩ dami̧ti̧ oa, chëre ji̧ra̧ tjamo̧ oa boarea̧mi̧ dari̧. Jabo cjäri̧ made yaba̧, japamitë boi̧chji̧rä, chjaodëri̧ yuropea̧dȩ, mö̧na̧ maearë cjiadiärea̧mi̧ dari̧ —yo̧a̧dirȩ.

²⁰ Jabo ado cja̧rȩmo̧rȩ ja̧di ta̧rëri̧ yo̧a̧de: —Ma̧ chiadëri̧ cjiaji̧ri̧rȩ jo̧rȩtachji̧vä —yo̧a̧de—. Mȩnȩro̧, a̧dëräpȩ cjo̧ro̧ji̧ri̧ pio judiro̧ ma̧ chiadëri̧ cjiachji̧vä. Jabechji̧, chjadëri̧ yuropea̧ oa cjiade yaba̧ pio jiro bë ma̧ri̧ üdë. Pio ju̧i̧iä yo̧requededibe mȩnȩro̧ ma̧ chiadëri̧ cjiatä. Tjamo̧ davä. Ütë tjamo̧ ja̧ pumȩ pio ji̧ri̧iäpȩmo̧, Ütërë ea jana̧ chjadüa̧ oa ni̧bäji̧ri̧ pio ji̧ri̧iäpȩmo̧, ado Jechurë chjadüa̧ pio ji̧ri̧iäpȩmo̧ yo̧requededibe ütëbodärä oa, mȩnȩro̧ ma̧ chiadëri̧ cjiaji̧ri̧rȩ cjo̧ro̧tä. Jabechji̧, pio dibëiäpȩmo̧ conȩda̧ ba oa bape chjaoa̧dejȩ yaba̧ Ütë tjamo̧ judi —yo̧a̧de.

²¹ Ja̧dëa ji̧ a̧dërimȩ mu̧i̧tjoi̧ üdë, jauëchja tjamo̧mȩ üdë mitëa̧dejȩ ta̧dë boi̧dë oa. Ado goae tarari̧ aeno̧a̧dejȩ ui ana̧räpȩ. Ado to̧bari̧ yo̧mȩrȩ ja̧di ta̧rëri̧ yo̧a̧de: —Peaja̧dimi̧ dari̧ aeno̧a̧ oa cjiapade Babironia quȩmȩ bë ma̧ri̧ üdë uapai̧ da tjamo̧ri̧ —yo̧a̧de—. Jiro decjiape bagari̧ cjiadiäpade bucho ana̧.

²² Ado pio jiro bë ma̧ri̧rä carecare guaji̧ri̧ judiro̧ goeari̧ care care guarërea̧ ji̧, pumȩ judiro̧ chjadëri̧ go̧a̧rërea̧ ji̧, mau maearë cjiadiäpade bucho ana̧, pumȩ judiro̧ yuropea̧ oa cjia̧ oaiä. Pjurarea̧ pio ju̧i̧ pjuraji̧ri̧ judiro̧ goaeri̧ pjurarërea̧ ji̧, cjäri̧ madirȩ, ado judiri japadëpadirȩ bucho ana̧. Tjamo̧ davä. Ja̧di dari̧ cjiadiäpade pio jiro bë ma̧ri̧remȩ üdë. Ado ja̧bepaji̧ri̧ judiro̧ no̧i̧dërë pio ju̧ri̧pȩ, jibëa̧ ja̧beparea̧ pio ju̧i̧ chjadëri̧ ja̧beparërea̧ ji̧, cjäri̧ madirȩ, cja̧rȩmȩrȩ cjiadiädëpade. Ado jurarea̧ cho pio ju̧i̧ jadeji̧ri̧ judiro̧ jibëa̧ ta̧dë ana̧ra̧ pio ju̧ri̧ra̧ jaderërea̧ ji̧, jiro decjiapade bucho ana̧, pumȩ judiro̧ goarijäa̧ oa cjia̧ oaiä.

²³ Ado gȩnȩrä tataparea̧ ji̧ra̧rërea̧ ji̧, bagönȩ maearë cjiadiäpade bucho ana̧ pumȩ decjiapea̧ tara. Ado pumȩ judiro̧ airi̧ cjia airi̧ cjia a̧dope chjaorërea̧ ji̧, oari judiro̧ jibëa̧ iei̧ pio ji̧ ëba̧ doro airi̧ cjia airi̧ cjia a̧dope chjaorërea̧ ji̧, cjäri̧ made, mau maearë cjiadiäpadȩ pumȩ decjiapea̧ tara. Ado tjamo̧ gatë tänȩji̧ri̧ pio judiro̧, gatë tänȩji̧ri̧ ba chia tjamo̧ pio judiro̧, chiri oëra̧ti̧ oa cjo̧ro̧ji̧ri̧ judiro̧ goë goë ta̧rëa̧ pio judiro̧ peaja̧di cjiadiädëa̧dirȩ. Pio ju̧ri̧pȩ cjo̧ro̧rërea̧ ji̧, pio ju̧ri̧pȩ gatë tänȩ chjaorërea̧ ji̧, chëre ji̧ra̧ tjamo̧ oa boarea̧mi̧ dari̧ gatë tänȩ chjaorërea̧ ji̧, jabechji̧ cjiadiädëa̧dirȩ. Ado pio jiro bë ma̧ri̧räji̧ri̧ judiro̧ orë chiriräpȩti̧ oa cjo̧ro̧ji̧ri̧ pio ji̧ri̧ daeeaji̧ri̧rȩ u̧i̧pe chjaorërea̧ ji̧, yo̧to̧ra̧ daeeaji̧ri̧rȩ u̧i̧parërea̧ ji̧, cjäri̧ madirȩ, jiro decjiapea̧dirȩ. Ja̧di ta̧rëri̧ yo̧mȩrȩ yo̧a̧de a̧dërimȩ mu̧i̧tjoi̧ üdë bë ma̧ri̧ pio ju̧i̧ chjiari.

²⁴ Ado ji̧dë u̧i̧ yo̧mȩrȩ ja̧di ta̧rëri̧ yo̧a̧de: —Jabechji̧, Babironia bë ma̧ri̧ üdë bape chjaoa̧ oa cjiadiäa̧de, a̧dë chjäte ma̧i̧ dari̧ japea̧ oaiä. Danȩrȩ, pio ju̧ri̧pȩ cjo̧ro̧ji̧ri̧ judiro̧ Ütërë ea jana̧ chjadüa̧ oa ni̧bäreji̧ri̧ pio ji̧ri̧ ja̧bo tänȩa̧diro̧jȩrȩ. Goe gu̧rori̧ ja̧bo tänȩa̧diro̧jȩrȩ. Ado o pio ji̧ri̧bo ja̧bo tänȩa̧diro̧jȩrȩ, Ütë tjamo̧ ja̧ pumȩ pio ji̧ri̧. Jabechji̧, Babironia chiri üdë pio ji̧ri̧ ja̧ goe oaiä yu̧i̧a̧ oa cjiaremȩde. Pio ju̧ri̧pȩ gu̧roa̧ oa cjiaremȩde ji̧ri̧ ja̧ goe üdë. Pio ju̧ri̧pȩ cjo̧ro̧ji̧ri̧ judiro̧ tänȩa̧ oa, no̧i̧dëti̧rȩ ja̧boa̧dirȩ chiri oëra̧ti̧ oa. Ado pio ju̧i̧iä bape chjaoa̧ oa cjiade yaba̧. Ado pio ju̧i̧ yo̧mȩrȩ cjiadiäa̧de mu̧i̧tjoi̧ judi.