Jechurë Na̧rȩrërea̧ Ma̧ȩ 17 - Biblia Pume

Bë ma̧ri̧ pio ju̧i̧ chjiari, üi̧ goarayi̧mi̧ da pio ju̧i̧ chjiari ma̧ȩde pio yodë ma̧ȩ üdë

¹ Ja̧dëa ji̧ mu̧i̧tjoi̧ üdë, jibëa̧ tachja oa goaremȩ mu̧i̧tjoi̧ pio judi cja̧rȩmȩrȩ yo̧a̧dique: —Jana̧vä —yo̧dique—. Danȩ, Babironia quȩmȩ bë ma̧ri̧ üdë, üi̧ goarayi̧ iei̧mi̧ dade. Ado pio judi bape chjaoa̧ oa cjiapade. Pio ju̧i̧ chjadëri̧ na̧rȩparequedemȩ yaba̧. Danȩ, bea ji̧ra̧ chjareräpȩ cjiamȩ bë ma̧ri̧ pio ju̧i̧ chjiari yo̧requedemȩ, Babironia quȩmȩ bë ma̧ri̧ pio ju̧i̧ chjiari. Pio judide üi̧ goarayi̧ iei̧mi̧ da judi.

² Danȩ, chiriräpȩti̧ oa tjamo̧ cjo̧ro̧ji̧ri̧ ütëti̧ judiro̧ pio ju̧i̧ nö̧ta baë ëba mo̧a̧mi̧ dari̧ jape chjaorëreji̧ri̧diro̧jo̧ȩ china̧chja pio ju̧i̧. Ado pio jiro bë ma̧ri̧ üdë chiri nö̧ta oa cjo̧ro̧ji̧ri̧ pio ji̧ri̧ nö̧ta ërü gito oa ëba jara chjaomi̧ dari̧ japea̧ oaiä, yu̧i̧ tjamo̧pe bagami̧ dari̧ cjiadiäa̧dirȩ, china̧chja pio ju̧i̧mo̧i̧ baë ëba mo̧a̧ji̧ri̧rȩ, dami̧ti̧ idi̧ da oa japaji̧ri̧rȩ. Aja̧, ja̧di ta̧rëri̧ yo̧a̧dique mu̧i̧tjoi̧ üdë.

³ Ja̧dëa ji̧ mu̧i̧tjoi̧ üdë ëba jäa̧dique Tjo tjamo̧ ja̧ chja̧oerämȩ oa dabu nȩgȩ maearäpȩ, chiri maearäpȩ. Ado ju̧ri̧pȩ daea̧requedejȩ iei̧ ji̧. Chirirä cjo̧ro̧mȩ coëcoëami̧ damȩrä buë chayi̧ oa daea̧requedejȩ. Ado chirirä cjo̧ro̧mȩmi̧ da ja̧ icjara üdë quȩ ji̧ra̧ra̧ go̧ȩpea̧ oa cjiaremȩde jibëa̧ icjara nö̧ta oa. Ütë tjamo̧ pio ju̧i̧iäpȩmo̧ ya̧rea̧ quȩmi̧ da maea oa chiaremȩde. Ado cja̧ȩta̧ra̧ ichiri yo̧a̧ri̧ tjübë oa chiaremȩde. Ado ichi chjö̧na̧i̧ yatë oa chiaremȩde peaja̧di.

⁴ Ado iei̧ jini̧ chjibo coëcoëara̧ ina̧ oa cjiareyi̧nȩ. Ado dami̧ti̧ chjacjiamȩparȩpea̧ oa i̧a̧reyi̧nȩ tjärichji oa, ichi chaärea̧ oa, ta̧ra̧ mö̧rö̧rea̧ oa, ji̧ra̧ tjamo̧ oa. Oro maeara̧ japea̧ oa cjiamȩ oa chiareyi̧nȩ, ta̧dë ba chia tjamo̧ oa. Ado ju̧i̧ uëri pera quȩmȩ tjärichji oa i̧a̧reyi̧nȩ peaja̧di. Ado jibëa̧ ichirä goareyi̧nȩ ae jararea̧ ba chia oa, peaja̧di orora̧ japea̧ oa cjiamȩ oa. Ado ërü oa chiareyi̧nȩ. Ado pio jiro jararea̧ üdë, jabechji̧ jënȩ a̧dë chjäte chjai̧dëri̧ japea̧ pio judimi̧ dade. Aja̧, jini̧ a̧dë chjäte chjai̧dëri̧ baë ëba mo̧a̧ chjaoa̧ pio judimi̧ dade.

⁵ Ado jibëa̧ daitoro go̧ȩpea̧ oa cjiaremȩde quȩ üdë, goadia̧ quȩmi̧ da quȩ üdë. Jabechji̧ pio jiro quȩ üdë, ‘Aja̧, pio ju̧i̧ yo̧ jirodida’ quëna̧rea̧mi̧dëde. Ado ja̧di ta̧rëri̧ go̧ȩpea̧ oa cjiarëremȩde: “Babironia bë ma̧ri̧ ana̧requede." Aja̧, ja̧di ta̧rëri̧ go̧ȩpea̧ oa cjiaremȩde ji̧ ja̧ quȩ üdë. Ado pio ju̧i̧ uëri ado cja̧rȩmo̧ quȩ a̧de chiareyi̧nȩ peaja̧di, quȩ go̧a̧ti̧ tjamo̧ oa. Aja̧, ja̧di quȩreyi̧nȩ peaja̧di: “Ado pio jiro bë ma̧ri̧ri pio judiri ma̧na̧diibe dami̧ti̧ chjai̧dë üdë. Pio judiri ma̧na̧diibe üi̧ goarayi̧ iei̧ ja̧ jo̧rȩtarea̧ üdë, a̧dë chjäte idi̧ dari̧ baë ëba mo̧a̧rea̧ üdë, a̧dë oëadëri̧ cjiarea̧ üdë.” Aja̧, ji̧ ja̧ quȩde. Quȩ go̧a̧ti̧ tjamo̧de. Ado ja̧di ta̧rëri̧ go̧ȩpea̧ oa cjiaremȩde jibëa̧ daitoro.

⁶ Ado cüdë iei̧ ji̧ ütarë daea̧ ji̧, ‘Chia chia, yu̧i̧mi̧ dari̧ cjiani̧da’ quëna̧ jo̧rȩtamȩrȩ daea̧requedejȩ. Tjamo̧ davä. Yu̧i̧yi̧mi̧ dari̧ cjiareyi̧nȩ davä. Ütë ja̧ pumȩ pio ji̧ri̧ ja̧bo tänȩa̧ oaiä, ji̧ri̧ ja̧ goe oa jarami̧ dari̧ japea̧ oaiä, Jechu pio ju̧i̧iäpȩmo̧ quëna̧ ano̧dëri̧ cjiareji̧ri̧ pio ji̧ri̧ ja̧ goe oa jarami̧ dari̧ japea̧ oaiä, 'jabechji̧ yu̧i̧yi̧mi̧ dari̧ cjiani̧da’ quëna̧ jo̧rȩtamȩrȩ daea̧requedejȩ. Ado cüdë pio jiro iei̧ ji̧ daea̧ oaiä, jabechji̧ ana̧ tjamo̧ri̧ jo̧rȩtamȩrȩ daea̧requedejȩ, ya yabëcjiamȩrȩ, dacho bëremi̧ cjiamȩrȩ.

⁷ Ado ja̧dëa ji̧ mu̧i̧tjoi̧ üdë iëno̧ë ta̧rëa̧dique: —¿Tjana̧ ju̧i̧iä ya yabë cjiarenȩ iei̧ pio ji̧ chjiari? —yo̧a̧dique—. Danȩ, mȩnȩ dabadëchea oa, iei̧ pio ji̧ chjiari goadia̧ oa cjiarëremȩ ma̧ȩ pio ju̧i̧ chjiari chjadëri̧ are ia̧ oa cjiami̧ dari̧ daba tänȩparequedemȩ. Ado chirirä cjo̧ro̧mȩmi̧ da pio ju̧i̧ chjiari goadia̧ oa cjiarëremȩ ma̧ȩ pio ju̧i̧ chjiaribo chjadëri̧ daba tänȩparequedemȩ. Tjamo̧ davä. Iei̧ pio ji̧ i̧a̧ baämȩ pio ju̧i̧ chjiari, cja̧ȩta̧ra̧ ichiri yo̧a̧ri̧ tjübë chiamȩ pio ju̧i̧ chiari̧, ichi chjö̧na̧i̧ yatë oa chiamȩ pio ju̧i̧ chjiari chjadëri̧ daba tänȩparequedemȩ peaja̧di —yo̧a̧dique—.

⁸ Danȩ, mȩnȩ daea̧ üdë, chirirä cjo̧ro̧mȩmi̧ da pio judi, jabechji̧ cjo̧ro̧rëremȩrȩ cjo̧ro̧dëde yaba̧. Jabechji̧ cjo̧ro̧dëmȩpea̧de. Jabo cjo̧ro̧dëmȩpea̧mȩborë, jabechji̧ a̧dë chjäte urëdi cjiamȩ puëri pio judiri cjitëpade. Tjamo̧ davä. Ütara̧ doro pio judiri cjitëpade. Jabo cjitëa̧mi̧ cjitëdëpade, jabo boadäräa̧ oa cjiapade. Aenoa̧ oa cjiapade dëbëpe chjaorea̧ decjiari̧, goarijädäräri̧. Ado chiriräpȩti̧ oa cjo̧ro̧ji̧ri̧ judiro pio ju̧i̧ daea̧ oaiä, jabechji̧ dacho bëremi̧ cjiami̧ dari̧ jo̧rȩtaji̧ri̧rȩ dapadiro̧jo̧ȩ, ana̧ri̧ jo̧rȩtaji̧ri̧rȩ. Tjamo̧ davä. Jibëa̧ quȩ üdë bucho ana̧ cjo̧ro̧rea̧ joërä go̧ȩpea̧ oa cjiadëji̧ri̧ judiro̧, dabu üdë jabë pareapea̧ oa cjiadërä go̧ȩpea̧ oa cjiadëji̧ri̧ pio judiro̧, jabechji̧ dacho bëremi̧ cjiami̧ dari̧ jo̧rȩtaji̧ri̧rȩ dapadiro̧jo̧ȩ chirirä cjo̧ro̧mȩmi̧ da pio ju̧i̧. Aja̧, cjo̧ro̧remȩrȩ ja̧boa̧mȩ pio judi ado chjereno̧ bëdüa̧mȩ pio ju̧i̧ darä, jabechji̧ dacho bëremi̧ cjiami̧ dari̧ jo̧rȩtaji̧ri̧rȩ dapadiro̧jo̧ȩ, ana̧ri̧ jo̧rȩtaji̧ri̧rȩ.

⁹ Ja̧dëa ji̧ mu̧i̧tjoi̧ üdë ji̧dë u̧i̧ ni̧bä chjaomȩrȩ a̧de yo̧a̧dique: —A̧dë chjäte urëdi oa jo̧rȩtarea̧ chiamȩ judi, pio yoa ma̧ȩ pio ju̧i̧ chjiari chjadëri̧ dabarea̧ yürüpai̧ dade —yo̧a̧dique—. Ado pio cüdë daba tara, jabechji̧ chjadëri̧ yo̧parequedemȩ. Danȩ, chirirä cjo̧ro̧mȩmi̧ damȩ judi, cja̧ȩta̧ra̧ ichiri yo̧a̧ri̧ tjübë chiade. Pio ju̧i̧ ta̧rëa̧renȩ peadë. Aja̧, ado pio jiro tjübë no̧i̧dërë, cja̧ȩta̧ra̧ ichiri yo̧a̧ri̧ ya̧mi̧ pio ju̧i̧ chjiari yo̧rea̧de. Ado pio jiro ya̧mi̧rä chanȩ iei̧ jini̧. Ado tjübë no̧i̧dërë cja̧ȩta̧ra̧ ichiri yo̧a̧ri̧ ütë yo̧rea̧de.

¹⁰ Jabo pio jiro ütë judiro̧ orë, cjäri̧ madirȩ, jiro decjiapea̧dirȩ. Cja̧rȩichimo̧ ütë decjiapea̧dirȩ. Jabechji̧ dabadëpea̧ maeadirȩ. Yoa̧ri̧mo̧rȩ cjiadiäa̧dirȩ. Ado cjiadiäa̧mȩ üdë cja̧rȩmȩrȩ, jabechji̧ ütëmȩrȩ cjo̧ro̧de. Jabo ado cja̧rȩmo̧ ütë üdë, jabëde. Jabë tarupadëa̧de ütëmȩrȩ cjo̧ro̧pea̧ ji̧. Jabo ütëmȩrȩ cjo̧ro̧pea̧ ji̧ taruparä, japamitë ana̧ri̧ ütëmȩrȩ cjo̧ro̧dëpade. Jabomo̧ japamitë boi̧chji̧ ütëmȩrȩ cjo̧ro̧pade.

¹¹ Ado chirirä cjo̧ro̧mȩmi̧ da üdë, pearä cjo̧ro̧rëremȩ üdë, jabo cjo̧ro̧dëmȩpea̧mȩ üdë, jabechji̧ peaja̧di ütëde. Cja̧ȩta̧ra̧ ichiri yo̧a̧ri̧ ütë pio ji̧ri̧di ütëde. Ado Ütë tjamo̧ judi boadäräpadejȩ goarijädäräri̧. Jabechji̧ jiro decjiapapade.

¹² Ado mu̧i̧tjoi̧ üdë pio coaiäpȩmo̧ ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧a̧dique: —Ado mȩnȩ daea̧ yatë üdë, ichi chjö̧na̧i̧ yatë üdë, peaja̧di ütëti̧ yo̧rea̧de —yo̧a̧dique—. Ichi chjö̧na̧i̧ ütë yo̧rea̧de. Jabo jabëdirȩ jabo. Jabë tarupadëa̧dirȩ ütëji̧ri̧rȩ cjo̧ro̧pea̧ ji̧. Jabo cja̧rȩmȩrȩ yürüa̧ oa ütëji̧ri̧rȩ cjo̧ro̧padirȩ jabo. Chiri ütëji̧ri̧rȩ cjo̧ro̧padirȩ chirirä cjo̧ro̧mȩmi̧ da pio ju̧i̧ nö̧ta. Jabo japamitë ana̧ri̧ ütëdëpadirȩ. Jabomo̧ japamitë boi̧chji̧ mai̧ ütëji̧ri̧rȩ cjo̧ro̧padirȩ, cja̧rȩmȩ ora maea nö̧ta.

¹³ Ado pio jiro chiri ütëti̧ judiro̧ cjo̧ro̧padirȩ chirirä cjo̧ro̧mȩmi̧ da pio ju̧i̧ ja̧ chja̧oerä. Ado pio ju̧i̧iä cja̧rȩmȩ jo̧rȩtarea̧ chiaji̧ri̧rȩ chirirä cjo̧ro̧mȩmi̧ da pio ju̧i̧iäpȩmo̧ ano̧ mire ütëmȩrȩ cjo̧ro̧ tänȩpadiro̧jo̧ȩ. Aja̧, pio judiro̧ ütëji̧ri̧rȩ cjo̧ro̧tärea̧ ji̧, chirirä cjo̧ro̧mȩmi̧ da pio ju̧i̧ ano̧ mire ütë tänȩpadiro̧jo̧ȩ. Jabechji̧ jënȩro̧ tjamo̧ yo̧rea̧ pio ju̧i̧ yürü ëte, pio ju̧i̧ ja̧ chja̧oerä ano̧ mire cjo̧ro̧padirȩ.

¹⁴ Ado pio judiro̧ ütëborë Oveja pëi̧ chjamȩmi̧ da pio ju̧i̧iäpȩmo̧ dëbëpe chjaotapadiro̧jo̧ȩ. Tjamo̧ davä. chirirä cjo̧ro̧mȩmi̧ da pio judi, ado pio jȩadi ütëreji̧ri̧ pio judiro̧borë dëbëpe chjaotapadiro̧jo̧ȩ. Jabo cjäri̧ madiro̧jo̧ȩ, japarea̧ dadëpadiro̧jo̧ȩ. Oveja pëi̧ chjamȩmi̧ da pio judi boadäräpadiro̧jȩrȩ. Tjamo̧ davä. Oveja pëi̧ chjamȩmi̧ da pio judi, jënȩ mitëa̧ pio ji̧ri̧ nö̧ta, pio jȩaiäpȩmo̧ chjadëri̧ ta̧rëdiäa̧ji̧ri̧ pio ji̧ri̧ nö̧ta boadäräpadiro̧jȩrȩ. Jabechji̧ Oveja pëi̧ chjamȩmi̧ da pio judi a̧dë chjäte Ano̧mȩ pio judide. Ado cja̧rȩmo̧rȩ nö̧tadë madejȩ. Ado pio judide chiri tjamo̧ cjo̧ro̧mȩ Ütë üdë. Ado cja̧rȩmo̧rȩ pio ju̧i̧iäpȩmo̧ boadärärea̧mi̧dëde. Aja̧, ja̧di ta̧rëri̧ yo̧mȩrȩ yo̧a̧dique mu̧i̧tjoi̧ üdë.

¹⁵ Jabo cjiadiädëmȩrȩ ja̧di ta̧rëri̧ a̧de yo̧a̧dique: —Danȩ, mȩnȩ daea̧ ui üdë, üi̧ goarayi̧ iei̧ jini̧ chamȩräpȩ a̧rȩmȩ ui üdë, jabechji̧ pumȩ pio ji̧ri̧ chjiari na̧rȩrea̧de —yo̧a̧dique—. Pumȩ ji̧ra̧ tjamo̧ pio ji̧ri̧ chjiari na̧rȩrea̧de. Chiri nö̧tai̧ oa cjo̧ro̧ji̧ri̧ pumȩ pio ji̧ri̧ chjiari na̧rȩrea̧de. Ado cja̧rȩmo̧ jo̧rȩtarea̧ chiaji̧ri̧ pumȩ pio ji̧ri̧ chjiari, ado cja̧rȩmo̧ ma̧ȩ oa ni̧bäji̧ri̧ pumȩ pio ji̧ri̧ chjiari, ado cja̧rȩmo̧ taruri ja̧ pumȩ pio ji̧ri̧ chjiari na̧rȩrea̧de ui üdë. Tjamo̧ davä. Pio jiro iei̧ jini̧ chamȩräpȩ a̧rȩmȩ ui üdë, jabechji̧ pumȩ ji̧ra̧ pio ji̧ri̧ chjiari na̧rȩrea̧de.

¹⁶ Ado danȩ, yo̧requedemȩ. Mȩnȩ daea̧ ichi chjö̧na̧i̧ yatëmi̧ da judiro̧, jabechji̧ chiri ütëti̧ pio judiro̧dirȩ. Aja̧, pio judiro̧ ea tjamo̧dëpadiro̧jȩ üi̧ goarayi̧ iei̧ pio ji̧, jabo goëdëri̧ cjia tjamo̧padiro̧jȩ. Ado chirirä cjo̧ro̧mȩmi̧ da pio judiborë goëdëri̧ cjia tjamo̧padejȩ. Ado to̧bari̧ dëbëpe chjaopadiro̧jȩ. Jibëa̧ oa, chjö̧na̧i̧ oa baë mitëpadiro̧jȩ, chjibobo. Ado pio ju̧i̧iä jabechji̧ chäteyi̧rȩ cjiadiäpanȩ. Ado pio ji̧ ja̧ go̧a̧ pio ju̧i̧ jurapadiro̧jo̧ȩ. Ado ja̧dëa ji̧ cjo̧dëra̧ pio ju̧ri̧ra̧ acjürüpadiro̧jȩ tüe baärea̧mi̧ dari̧. Aja̧, ja̧di dari̧ japapadiro̧jȩ.

¹⁷ Jabechji̧ Ütë tjamo̧ pio judi jo̧rȩta tänȩa̧ oa pio jiro chiri ütëti̧ judiro̧ ichi chjö̧na̧i̧rȩ yürüpadiro̧jo̧ȩ chirirä cjo̧ro̧mȩmi̧ da pio ju̧i̧iäpȩmo̧. Aja̧, jënȩro̧ tjamo̧ yo̧rea̧ pio ju̧i̧ yürüpadiro̧jo̧ȩ pio judi tjamo̧ cjo̧ro̧mȩmi̧ dari̧ ano̧ mire cjo̧ro̧pea̧ oa, judi chiriräpȩti̧ oa ütëmȩrȩ cjo̧ro̧mȩmi̧ dari̧ ano̧ mire cjo̧ro̧pea̧ oa. Aja̧, Ütë tjamo̧ ja̧ ma̧ȩ üdë chjadëri̧ japadäräa̧ oa cjiapea̧ oa, jënȩ pearä ütarë jo̧rȩtarërea̧ ma̧ȩ pio judi nö̧tadäräri̧ japadäräa̧ oa cjiapea̧ oa, ja̧di dari̧ japapadirȩ ütëti̧ judiro̧, Ütë tjamo̧ pio judi jo̧rȩta tänȩa̧ oaiä. Aja̧, ja̧di ta̧rëri̧ yo̧mȩrȩ yo̧a̧dique mu̧i̧tjoi̧ üdë.

¹⁸ Ado ji̧dë u̧i̧ yo̧mȩrȩ ja̧di ta̧rëri̧ yo̧a̧dique. —Ado danȩ, üi̧ goarayi̧ iei̧ jini̧, mȩnȩ pio yabo daea̧ pio jini̧, jabechji̧ bë ma̧ri̧ pio ju̧i̧ chjiari na̧rȩrea̧nȩ. Aja̧, bë ma̧ri̧ ana̧ tjamo̧ pio ju̧i̧ chjiari na̧rȩrea̧nȩ. Ado chiriräpȩti̧ oa cjo̧ro̧ji̧ri̧ ütëti̧ pio judiro̧ pio jiro bë ma̧ri̧ ja̧ chja̧oerä cjo̧ro̧ maeadirȩ. —Aja̧, ja̧di ta̧rëri̧ yo̧a̧dique.