Jechurë Na̧rȩrërea̧ Ma̧ȩ 16 - Biblia Pume

Cja̧ȩta̧ra̧ ichiri yo̧a̧ri̧ tachja üdë Ütë tjamo̧ ja̧ ërecjia̧ pio ju̧i̧ chiade

¹ Ja̧dëa ji̧ ta̧rëa̧reconȩ ni̧bämȩ ju̧i̧. Ütë tjamo̧ ja̧ bëri pio judiri ni̧bämȩ ju̧i̧ ta̧rëa̧reconȩ, to̧bari̧ ni̧bämȩ oa. Ja̧di ta̧rëri̧ yo̧mȩrȩ yo̧a̧dejȩrȩ cja̧ȩta̧ra̧ ichiri yo̧a̧ri̧ mu̧i̧tjoi̧ ji̧ri̧, jibëa̧ tachjarä conȩdarea̧ goaji̧ri̧ pio ji̧ri̧: —Jächji̧vä —yo̧a̧dejȩrȩ—. Arë cjare jächji̧vä tachjarä chamȩ pio ju̧i̧, Ütë tjamo̧ ja̧ ërecjiarea̧ pio ju̧i̧. Daburäpȩmo̧ arë cjarächji̧vä. Aja̧, ja̧di ta̧rëri̧ yo̧a̧mȩ oa ta̧rëa̧reconȩ.

² Ja̧dëa ji̧ yabo tai̧mȩ mu̧i̧tjoi̧ üdë jäa̧de daburäpȩmo̧ arë cjaräpea̧ oa. Ado jibëa̧ tachjaräremȩ pio ju̧i̧ arë cjaräa̧dejȩ daburopȩmo̧. Ado chjaodëri̧ ma̧i̧ da co üdë idëpea̧de pumȩ ja̧ icjararä. Go̧ȩ chiaji̧ri̧ pio ji̧ri̧ ja̧ icjararä, chirirä cjo̧ro̧mȩmi̧ da pio ju̧i̧ chjiari ütararea̧ go̧ȩ chiaji̧ri̧ pio ji̧ri̧ ja̧ icjararä idëpea̧dejȩrȩ. Chirirä cjo̧ro̧mȩmi̧ damȩ pio judimi̧ dari̧ jëdano̧a̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧ pio ji̧ri̧ ja̧ icjararä idëpea̧dejȩrȩ. Tjamo̧ davä. Co ma̧i̧ darë, a̧dë chjäte gitori̧ tararea̧ co üdë idëpea̧dejȩrȩ, cjatäcjiarea̧ decjiari̧.

³ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa. Ado pio judiborë jäa̧de jibëa̧ tachjaräremȩ oa arë cjaräpea̧ oa. Ado chiriräpȩmo̧ arë cjarätärea̧ ji̧, ui ana̧räpȩmo̧ arë cjaräa̧dejȩ. Ado chjaodëri̧ uiremȩ üdë goe mapea̧de. Pea ja̧boa̧mȩ pio ju̧i̧ ja̧ goemi̧ dapea̧de. Ado ui ana̧rä cjo̧ro̧ji̧ri̧ chjö̧na̧i̧rȩ ja̧boa̧ maeadirȩ cjiadiädëri̧.

⁴ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa. Yo̧a̧ri̧rȩ arë cjarärërea̧ ji̧, ado cja̧rȩmo̧ oa daea̧reconȩ. Ado jäa̧de jibëa̧ tachjaräremȩ pio ju̧i̧ arë cjaräpea̧ oa bearäpȩmo̧, dürüräpȩmo̧bo. Jabechji̧ chirirä a̧rȩmȩ uiräpȩmo̧bo arë cjaräa̧dejȩ. Ado chjaodëri̧ goe mapea̧de uiremȩ üdë.

⁵ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa, ui tjamo̧ jidamȩ mu̧i̧tjoi̧ pio ju̧i̧. Ado Ütë tjamo̧ pio ju̧i̧iäpȩmo̧ ni̧bämȩ oa ta̧rëa̧reconȩ. “A̧dë chjäte tatari̧ cjiamȩ Ütërenȩ” yo̧mȩ oa ta̧rëreconȩ. “Aja̧, bucho ana̧ cjiamȩ Ütërenȩ. Tarupadëa̧ oa cjiamȩ Ütërenȩ. Ado mȩnȩ pumȩ pio ji̧ri̧iäpȩmo̧ bape chjaoa̧ üdë, jabechji̧ chjadëde. Oëra̧ japadëa̧renȩ jabo coëma cjiari̧ japea̧renȩ.

⁶ Jabechji̧ chiriräpȩti̧ oa cjo̧ro̧ji̧ri̧ pio judiro̧ na̧ pumȩ pio ji̧ri̧ ma̧i̧ dari̧ japea̧ oaiä, jabechji̧ bape chjaoremȩrenȩjȩrȩ, coëma cjiari̧ japamȩrȩ. Tjamo̧ davä. Pio judiro̧dirȩ na̧ pumȩ pio ji̧ri̧ ja̧bo tänȩa̧ji̧ri̧ judiro̧. Pio judiro̧dirȩ mȩnȩ ea jana̧ chjadüa̧ oa ni̧bäji̧ri̧ pio ji̧ri̧ goe chiari̧ ja̧bo tänȩa̧ji̧ri̧ judiro̧. Pio ju̧i̧iä jabechji̧ chjadëde davä mȩnȩ japea̧ üdë. Chja jabechji̧, chjadëri̧ bape yürüa̧renȩjȩrȩ. Jabechji̧ judiro̧ pumȩ ji̧ri goe chiari̧ ja̧bo tänȩa̧ ba oa, goe mape baga tänȩa̧renȩ ui oa judiro̧ pio ju̧i̧ ano̧ mire jarapea̧ oa. Aja̧, pio ju̧i̧iä yo̧requedemȩ, Ütë tjamo̧renȩ." Jadi ta̧rëri̧ ni̧bämȩ oa ta̧rëa̧reconȩ ui tjamo̧ jidamȩ mu̧i̧tjoi̧ pio ju̧i̧, Ütë tjamo̧ pio ju̧i̧iäpȩmo̧ ni̧bäa̧mȩ oa.

⁷ Ja̧dëa ji̧ ta̧rëa̧reconȩ ma̧ȩ oa. Yürürea̧ mechjari pio judiri ma̧na̧mȩ ma̧ȩ oa ta̧rëa̧reconȩ. Ja̧di ta̧rëri̧ yo̧a̧mȩ oa ta̧rëa̧reconȩ: —Ano̧mȩ Ütë, a̧dë chjäte ju chiamȩrenȩ. Coëma cjiari̧ ütaramȩrȩ chjadüa̧renȩ conȩdarea̧ oa. Pumȩ judiro̧ chjai̧dëri̧ japea̧ ba oa bape chjaorenȩjȩrȩ chjadëri̧. Aja̧, jadi ta̧rëri̧ ni̧bämȩ oa ta̧rëa̧reconȩ ma̧ȩ oa.

⁸ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa. Tjarari̧rȩ arë cjarärërea̧ ji̧, daea̧reconȩ ado cja̧rȩmo̧ oa. Ado jibëa̧ tachjaräremȩ pio ju̧i̧ arë cjaräa̧dejȩ doräpȩmo̧. Ado do üdë chjaodëri̧ ji̧dë u̧i̧ cjüëtü tjamo̧pe baga̧de. Cja̧rȩmȩrȩ tänȩa̧ oa a̧dë chjäte cjüëtüpe baga̧de pumȩ ji̧ri̧ ana̧ri̧ tüe baäri̧.

⁹ Aja̧, gitoi̧ dari̧ tüea̧ oa cjiadiäa̧dirȩ pumȩ judiro̧ do pio oaiä. Ado judiro̧ ano̧ mire jo̧rȩtatärea̧ ji̧, cjäri madirȩ, Ütë tjamo̧ pio ju̧i̧iäpȩmo̧ ërecjiaji̧ri̧rȩ ma̧ȩ goaedëra̧ ya̧ea̧diro̧jo̧ȩ. Jabechji̧ pio ju̧i̧ ja̧ quȩ oa chjaoriä ni̧bäa̧diro̧jo̧ȩ conȩdarea̧ chjadüa̧mȩ pio ju̧i̧iäpȩmo̧. Tjamo̧ davä, judiro̧ chjere jo̧rȩtatärea̧ ji̧, ‘A̧ja̧, Ütë tjamo̧ judi a̧dë chjäte jauëchjamȩdida’ quëna̧tärea̧ ji̧, ‘a̧dë chjäte uapai̧ da tjamo̧dida’ quëna̧tärea̧ ji̧, cjäri̧ madirȩ, ja̧di dari̧ quëna̧dëa̧diro̧jo̧ȩ. Jabechji̧ chjuari̧ jiada̧diro̧jo̧ȩ.

¹⁰ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa. Jadüchiami̧rȩ arë cjarärërea̧ ji̧, daea̧reconȩ ado cja̧rȩmo̧ oa jibëa̧ tachja oa jämȩ oa. Ado tachjaräremȩ pio ju̧i̧ arë cjaräa̧dejȩ chirirä cjo̧ro̧mȩmi̧ darë chamȩräpȩ, judi tjamo̧ yo̧mȩrȩ chamȩräpȩ. Ado chjaodëri̧ acji cjatäa̧dejȩ uapai̧ da bagönȩrea̧ üdë, da mirerea̧ decjiape bagari̧. Ju̧i̧ ja̧ chja̧oerä cjo̧ro̧ji̧ri̧ pio ji̧ri̧iäpȩmo̧, ju̧i̧ ja̧ oa ja̧bepaji̧ri̧ pio ji̧ri̧iäpȩmo̧ acji cjatäa̧dejȩrȩ. Ado pumȩ judiro̧ a̧dë chjäte uapa tjamo̧ji̧ri̧rȩ tuti juia̧diro̧jo̧ȩ jibëa̧ tjopono̧ oa, ma̧i̧ dari̧ conȩda̧ oa cjiaji̧ri̧rȩ.

¹¹ Jabo pumȩ judiro̧ ano̧ mire jo̧rȩtatärea̧ ji̧, judiro̧ chjai̧dëri̧ japea̧ pio ju̧i̧ chjiari ano̧ mire jo̧rȩtatärea̧ ji̧, ano̧ mire jo̧rȩtadëa̧dirȩ. Jabechji̧ gitoi̧ dari̧ cjiadiäa̧ oaiä, co pio oaiä a̧dë chjäte gitoi̧ dari̧ cjiadiäa̧ oaiä, ji̧dë ma ya̧e chjaoa̧diro̧jo̧ȩ Ütë tjamo̧ pio ju̧i̧iäpȩmo̧, chjere jo̧rȩtadëri̧ cjiaji̧ri̧rȩ.

¹² Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa. Cja̧rȩichimo̧ mu̧i̧tjoi̧rȩ arë cjarärërea̧ ju̧i̧, ado cja̧rȩmo̧ oa daea̧reconȩ. Ado jibëa̧ tachjaräremȩ pio ju̧i̧ arë cjaräa̧dejȩ bea ana̧ tjamo̧ro, eupjarate quȩmȩ bearä. Ado chjaodëri̧ gaüpea̧de uiremȩ üdë no̧ gaüpe bagari̧. Chiri tjamo̧ cjo̧ro̧ji̧ri̧ ütëti̧ pio judiro̧ dorë cjitëmȩri pio judiri chjadëri̧ ma̧na̧bëmi̧, no̧pe bagari̧ gaüpea̧de.

¹³ Ja̧dëa ji̧ tjarari̧ oa daea̧requedejȩrȩ yaröca ji̧ri̧, a̧dë chjäte chjai̧dë oa. Chjö̧ri̧mi̧ damȩ pio ju̧i̧ ja̧ yari pio judiri go̧dümȩ oa daea̧reconȩ cja̧rȩmȩ oa. Ado chirirä cjo̧ro̧mȩmi̧ da pio ju̧i̧ ja̧ yari go̧dümȩ oa daea̧reconȩ ado cja̧rȩmo̧ oa. Ado daburimȩ ja̧ yari pio judiri, Ütërë ea jana̧ chjadüa̧ oa ni̧bämȩcji̧ quëna̧ ni̧bämȩ pio ju̧i̧ ja̧ yari pio judiri go̧dümȩ oa daea̧reconȩ ado cja̧rȩmo̧ oa. Aja̧, codocodo cja̧ri̧dati̧mi̧ da oa daea̧requedejȩrȩ, yari go̧düji̧ri̧ pio ji̧ri̧.

¹⁴ Pio jiro yaröca judiro̧ jauëchja cjiari̧ na̧rȩrea̧ chiadirȩ. Ado chiriräpȩti̧ oa tai̧mi̧ dari̧ jäpadirȩ. Chiriräpȩti̧ oa tai̧mi̧ dari̧ jäpadirȩ tjamo̧ cjo̧ro̧ji̧ri̧ ütëti̧ pio judiro̧ ütëborë cja̧rȩmȩräpȩ a̧dopapea̧ oa, jibëa̧ guadia pio ji̧ri̧ nö̧ta. Tjamo̧ davä, ütëbodärä oa a̧dopa tänȩpadiro̧jȩrȩ a̧dë chjäte ju chiamȩ Ütë pio ju̧i̧ dëbëpe chjaopea̧ oa. Ütërë ütara̧ do üdë, a̧dë chjäte uapai̧ da do üdë ma̧na̧na̧ra̧rä, ütëbodärärë dëbëpe chjaopadiro̧jo̧ȩ.

¹⁵ Ado pio jiro do pio ju̧i̧ chjiari ja̧di ta̧rëri̧ ni̧bädiibe ibëa̧ Ano̧mȩ judi: —Aja̧, ta̧rëchji̧vä —yo̧diibe—. Na̧ȩ chiachji̧vä. Garümȩmi̧ dari̧ goadi acji go̧düdäräparequede pumȩ judiro̧ daba quëna̧dërä. Pio ju̧i̧iä yo̧requededibe. Jabechji̧ chjadëri̧ jëdano̧a̧ oa goachji̧vä baäpea̧ ji̧. Ado bëdüa̧ oa cjiami̧ dari̧ cjo̧ro̧mȩ pio judi ma̧ chiadëri̧ cjiamȩrȩ cjiadiäpade. Ado jibëa̧ chjibo oa chjadëri̧ ina̧mi̧ dari̧ cjo̧ro̧mȩ pio judi peaja̧di ma̧ chiadëri̧ cjiamȩrȩ cjiadiäpade. Jabechji̧ chätemi̧ dari̧ cjiadiädëpade. Ütëborë dari̧ idëri̧ cjiami̧ dari̧ cjiadiädëpade, jabo chjadëri cjiadiäpade. Pio ju̧i̧iä yo̧requededibe, na̧ȩ chiachji̧vä. Chjadëri̧ jëdano̧chji̧vä. Aja̧, ja̧di ta̧rëri̧ yo̧remȩdique ibëa̧ Ano̧mȩ judi jënȩ go̧düdäräpea̧ pio ju̧i̧ chjiari.

¹⁶ Ja̧dëa ji̧ yaröca judiro̧ tjarari̧rȩ tänȩa̧ oaiä, cja̧rȩmȩräpȩ a̧dopaji̧ri̧pea̧dirȩ chiriräpȩti̧ oa cjo̧ro̧ji̧ri̧ ütëti̧ judiro̧, jibëa̧ guadia buba pio ji̧ri̧ nö̧ta. Ütë tjamo̧ pio ju̧i̧ dëbëpe chjaopea̧ oa a̧dopareji̧ri̧dirȩ. Ado judiro̧ a̧doparea̧räpȩ üdë, Aramagedo̧ quȩmȩde ebereo ma̧ȩra̧ yo̧a̧ ji̧.

¹⁷ Ja̧dëa ji̧ daea̧reconȩ cjiadiäa̧mȩ mu̧i̧tjoi̧ pio ju̧i̧. Cja̧ȩta̧ra̧ ichiri cja̧rȩmȩrȩ arë cjarärërea̧ ji̧, cjiadiäa̧mȩ pio ju̧i̧ daea̧reconȩ. Ado jibëa̧ tachjaräremȩ pio ju̧i̧ arë cjaräa̧dejȩ a̧dë i ëteräpȩmo̧. Ado ja̧dëa ji̧ chjaodëri̧ ta̧rëa̧reconȩ ma̧ȩ oa. Ütërë chamȩri pio judiri, Ütë tjamo̧ ja̧ bëri pio judiri ma̧na̧mȩ ma̧ȩ oa ta̧rëa̧reconȩ. To̧bari̧ ni̧bämȩ oa ta̧rëa̧reconȩ ja̧di ta̧rëri̧ yo̧mȩ oa: —Jabechji̧ japadäräa̧ oa cjiade yaba̧. Aja̧, pio ju̧i̧mo̧i̧ yo̧a̧mȩ oa ta̧rëa̧reconȩ Ütë tjamo̧ ju̧i̧.

¹⁸ Ado pio ju̧i̧ ta̧rëa̧ duri oa, chjaodëri̧ tarupea̧de ma̧i̧ dari̧ bërepe chjaopea̧ ji̧, ti̧ma baäri̧. Ado ja̧dëa̧ ji̧ uapai̧ da tjamo̧ri̧ jö̧nö̧jö̧nö̧pai̧ cjiari̧ cjiaremȩde dabu üdë. Ütërë pumȩ ji̧ri̧ pareapea̧ pio judiri yurori ja̧di dari̧ cja̧rȩmȩ co cjiadërërea̧ ji̧, a̧dë chjäte ana̧ri̧ jö̧nö̧jö̧nö̧pai̧ ma̧ri̧ cjiaremȩde, ma̧i̧ dari̧ mȩmȩrȩpami̧ dari̧.

¹⁹ Ado pio ju̧i̧iä Babironia quȩmȩ bë ma̧ri̧ üdë cja̧rȩmȩ codë ana̧rërea̧ ji̧, tjarari̧ pënȩpe bagari̧ cjacjarë chia̧de, ma̧i̧ da curëpe bagari̧. Ado chiriräpȩti̧ oa cjiamȩ bë ma̧ri̧ üdë peaja̧di gu̧roa̧ oa cjiadiäa̧ maeade, cja̧rȩmȩ cjiadiädëri̧. Ja̧di dari̧ japamȩrȩ bape chjaoa̧dejȩrȩ Babironia bë ma̧ri̧räpȩ cjo̧ro̧ji̧ri̧ pio ji̧ri̧ Ütë tjamo̧ judi. Jabechji̧ judiro̧ pio jȩaiäpȩmo̧ chjai̧dëri̧ japea̧ oaiä, jabechji̧ tachjaräremȩ ërecjia̧ pio ju̧i̧ jara tänȩmi̧ dari̧ japea̧dejȩrȩ, jibëa̧ jauëchjara̧ pio ju̧ri̧ra̧ ana̧ri̧ bape chjaomȩrȩ.

²⁰ Ado ma̧i̧ dari̧ jö̧no̧jö̧nö̧pai̧ cjiari̧ japea̧ oaiä, jabechji̧ ui ana̧ tjoro charemȩ chiri üdë, cjäri̧ made, jiro decjiapea̧de. Jabechji̧ cjiarea̧mi̧dëri̧ japea̧ oaiä, cjücjürü tjamo̧räpȩmo̧ chamia̧de darea̧mi̧dëpe bagari̧. Ado ya̧mi̧remȩ üdë chjö̧na̧i̧rȩ, peaja̧di jiro decjiapea̧de. Jënȩ chamȩräpȩ charërea̧ ji̧, jiro decjiapea̧de. Ado charea̧mi̧dë oaiä, jabechji̧ gu̧roa̧ maeade pjatë mape bagari̧.

²¹ Ado a̧dë chjäte boi̧dëri̧ cjiamȩ ui choco üdë a̧dë iri pio judiri acji cjatädäräpea̧ ji̧ tarupea̧de pumȩ pio ji̧ri̧iäpȩmo̧. Pumȩmi̧ da chacharë acji cjatäa̧dejȩrȩ. Ado pumȩ judiro̧ chjadëri̧ ano̧ mire jo̧rȩtatärea̧ ji̧, jabechji̧ ya̧ea̧diro̧jo̧ȩ Ütë tjamo̧ ju̧i̧. Ui choco chacha oaiä, goae tarari̧ ya̧ea̧diro̧jo̧ȩ ma̧i̧ dari̧ conȩda̧ oaiä, a̧dë chjäte uapai̧ dari̧ cjia̧ oaiä.