Jechurë Na̧rȩrërea̧ Ma̧ȩ 15 - Biblia Pume

Cja̧ȩta̧ra̧ ichiri yo̧a̧ri̧ mu̧i̧tjoi̧ judiro̧ chiareji̧ri̧diro̧jo̧ȩ conȩdarea̧ oa

¹ Ja̧dëa ji̧ daea̧reconȩ ado cja̧rȩmo̧ na̧rȩrea̧ oa, quëna̧rea̧mi̧dë na̧rȩrea̧ oa. Dacho bëremi̧ cjiari̧ jo̧rȩtamȩrȩ daea̧reconȩ uapamȩrȩ. Cja̧ȩta̧ra̧ ichiri yo̧a̧ri̧ mu̧i̧tjoi̧ ji̧ri̧ daea̧requedejȩrȩ cja̧ȩta̧ra̧ ichiri yo̧a̧ri̧ conȩdarea̧ chiaji̧ri̧ oa. Pumȩ pio ji̧ri̧iäpȩmo̧ conȩdapea̧ oa chiareji̧ri̧dirȩ. Ado pio jiro conȩdarea̧ üdë, jabechji̧ cjiadiäa̧mȩ conȩdarea̧de. Ado judiri decjiade. Jabechji̧ pio jiro conȩdarea̧ra̧ pio ju̧ri̧ra̧ jibëa̧ ërecjia̧ pio ju̧i̧ nö̧tadäräri̧ japadäräpade Ütë tjamo̧ judi, ado chjereno̧ na̧rȩdëpea̧ oa. Jabechji̧ pio yoamo̧ japadärä ëte cjiadiäpade.

² Ja̧dëa ji̧ daea̧reconȩ ui ana̧mi̧ da oa, dacho darea̧ ana̧mi̧ da oa. Cjo̧dëra̧ pio ju̧ri̧ra̧ mirea̧ oa cjiamȩmi̧ da oa daea̧reconȩ tatari̧ cjiamȩ oa. Peaja̧di daea̧requedejȩrȩ pumȩ ji̧ri̧, chirirä cjo̧ro̧mȩmi̧ da pio ju̧i̧ boadäräa̧ji̧ri̧ pio ji̧ri̧. Tjamo̧ davä. Chirirä cjo̧ro̧mȩmi̧ damȩ oa jëdano̧a̧ ütë pio ju̧i̧ boadäräa̧ji̧ri̧ pio ji̧ri̧ daea̧requedejȩrȩ. Aja̧, pio ji̧ri̧ daea̧requedejȩrȩ jibëa̧ irä ütararea̧ go̧ȩ chiadëji̧ri̧ oa, chirirä cjo̧ro̧mȩmi̧ da pio ju̧i̧ ja̧ quȩ oa ütararea̧ go̧ȩ chiadëji̧ri̧ oa. Ui ana̧ yuroti̧ oa tatari̧ a̧rȩmȩ yuroro cjiaji̧ri̧ oa daea̧requedejȩrȩ, Ütërë yürüa̧ carecare guarea̧ oa araji̧ri̧ oa.

³ Ado Moicherë go̧a̧rërea̧ duri pio ju̧i̧ go̧a̧reji̧ri̧dirȩ, Oveja pëi̧ chjamȩmi̧ darë go̧a̧rërea̧ duri pio ju̧i̧. Tjamo̧ davä, pio judiro̧ go̧a̧rërea̧ duri pio ju̧i̧ go̧a̧reji̧ri̧dirȩ. Ja̧di ta̧rëri̧ go̧a̧reji̧ri̧dirȩ: “Ano̧mȩ Ütë, a̧dë chjäte ju chiamȩrenȩ. A̧dë chjäte chjadëri̧ japamȩrenȩ a̧ro̧rȩ dabarea̧mi̧dë pio ju̧i̧. Dacho bëremi̧ cjiari̧ jo̧rȩtaji̧ri̧rȩ darea̧rȩ davä mȩnȩ japea̧ pio ju̧i̧. Aja̧, chiriräpȩti̧ oa cjo̧ro̧ji̧ri̧ pumȩ pio ji̧ri̧ ja̧ Ano̧mȩrenȩ. Ado coëma cjiari̧ japamȩrenȩ tjamo̧i̧ cjiari̧.

⁴ Ado ütëbodärärë uapaji̧ri̧rȩ ba chia dapadiro̧mȩ Ano̧mȩ. ¿Jabechji̧ chjiadirȩ pio mȩa jiadaji̧ri̧ judiro̧? Cjäri̧ madirȩ, chiriräpȩti̧ oa cjo̧ro̧ji̧ri̧ judiro̧ jiadarea̧mi̧dëdirȩ. 'Jabechji̧ a̧dë chjäte ba chiadida, a̧dë chjäte jauëchjadida’ quëna̧ jo̧rȩtaji̧ri̧rȩ yo̧padirȩ jibëa̧ yara̧. Ado chiriräpȩti̧ oa cjo̧ro̧ji̧ri̧ judiro̧ pio mȩaiäpȩmo̧ chjacjiamȩri̧ jo̧rȩtapea̧ oa go̧düdäräpadirȩ. Jabechji̧ mȩnȩ coëma cjiari̧ jape chjaoa̧ üdë goadia̧ oa cjiadëde, jabo ütëborë dabarea̧mi̧ dari̧ na̧rȩa̧ oa cjiade.” Aja̧, ja̧di ta̧rëri̧ go̧a̧ji̧ri̧ oa ta̧rëa̧requedejȩrȩ pumȩ ji̧ri̧.

⁵ Ado ja̧dëa ji̧ daea̧reconȩ Ütë tjamo̧ ja̧ bë oa, a̧dëräpȩmȩ oa. Ado jo̧ tjo oa daea̧reconȩ a̧dë chjäte china̧chja jo̧ tjo pio ju̧i̧. Areië cjiamȩ oa daea̧reconȩ, tutia̧ oa cjiadëmȩ oa.

⁶ Ja̧dëa̧ ji̧ daea̧requedejȩrȩ a̧dërämȩ ja̧ mu̧i̧tjoi̧ ji̧ri̧. Cja̧ȩta̧ra̧ ichiri yo̧a̧ri̧ oa daea̧requedejȩrȩ, cja̧ȩta̧ra̧ ichiri yo̧a̧ri̧ conȩda̧rea̧ chiaji̧ri̧ oa. Ütë tjamo̧ ja̧ bëri pio judiri go̧düji̧ri̧ oa daea̧requedejȩrȩ a̧dë chjäte bërebërea oa ina̧ji̧ri̧ oa, ta cararä yuro barari̧ ina̧ji̧ri̧ oa. Tjamo̧ davä. Tata cjiari̧ ina̧ji̧ri̧ oa, dino quȩmȩ chjibo coto maeara̧ ina̧ji̧ri̧ oa daea̧requedejȩrȩ. Ado jibëa̧ maito üdë cada abürea̧mi̧ dara̧ pio ju̧ri̧ra̧ cjae mu̧i̧a̧ oa cjiaremȩde. Orora̧ japea̧ oa cjiaremȩde cada abürea̧mi̧ da üdë.

⁷ Ja̧dëa ji̧ jibëa̧ icjara nö̧tai̧ oa dacho chiaji̧ri̧ judiro̧ cja̧rȩmȩrȩ goë yürüa̧dejȩrȩ cja̧ȩta̧ra̧ ichiri yo̧a̧ri̧ tachja oa. Cjarȩmȩ tachja oa yürüa̧dejȩ mu̧i̧tjoi̧ nö̧ta oa. Bucho ana̧ cjiamȩ Ütë pio ju̧i̧ ja̧ ërecjiarea̧ chia maea oa yürüa̧dejȩrȩ tachja oa, tjuri cjia oa. Orora̧ japea̧ oa cjiamȩ tachja maea oa yürüa̧dejȩrȩ.

⁸ Ado Ütë tjamo̧ ja̧ bërä chjä mapea̧de. Jabechji̧ Ütë tjamo̧ ja̧ jauëchja oaiä, pio ju̧i̧ ja̧ tatarea̧ oaiä, jabechji̧ chjä mapea̧de. Ado pio ju̧i̧iä eami̧rȩ Ütë ja̧ bëräpȩ yu̧a̧tärea̧ ji̧, yu̧a̧rea̧ dadëa̧de. Jabechji̧ dairäpȩ cjiadiäpea̧ maremȩde. Dairäpȩ cjiadiäpea̧ chiareji̧ri̧dirȩ mu̧i̧tjoi̧ judiro̧ jibëa̧ conȩda̧rea̧ pio ju̧i̧ japadäräa̧rä yuro. Aja̧, Juan quȩmȩrequede. Ado ja̧di dari̧ daea̧requede uapai̧ dari̧.