Jechurë Na̧rȩrërea̧ Ma̧ȩ 14 - Biblia Pume

Oveja pëi̧ chjamȩmi̧ da üdë ëbadejȩrȩ jibëa̧ pumȩ ji̧ri̧

¹ Ja̧dëa ji̧ daea̧reconȩ Oveja pëi̧ chjamȩmi̧ da pio ju̧i̧. Chio̧ quȩmȩ ya̧mi̧räpȩ cjiamȩ oa daea̧reconȩ. Ado pio ju̧i̧ ja̧ yuroro cjiaji̧ri̧ oa daea̧requedejȩrȩ pumȩ ji̧ra̧ tjamo̧ oa, 144 mil pumȩ oa. Ado pio jibë nö̧ta ëba cjiamȩ pio ju̧i̧ ja̧ quȩ oa go̧ȩpea̧ oa goa mareji̧ri̧dirȩ jibëa̧ daitoro. Ado jibë nö̧ta cjiamȩ pio ju̧i̧ ja̧ Ama̧i̧ ja̧ quȩbo go̧ȩpea̧ oa goareji̧ri̧diro̧jo̧ȩ daitoro.

² Ja̧dëa ji̧ buba oa ta̧rëa̧requedejȩrȩ gürë ea cjiari̧ ni̧bäji̧ri̧ oa, a̧dëri pio judiri gürë ea cjiari̧ ni̧bäji̧ri̧ oa. Jabechji̧ dürü uirë curë uë tjamo̧ri pio judiri ca̧mi̧ ta̧rëri̧ ni̧bäji̧ri̧ oa, ti̧ma baämi̧ ta̧rëri̧ ni̧bäji̧ri̧ oa ta̧rëa̧requedejȩrȩ. Jabechji̧ pumȩ judiro̧ no̧i̧dërë care care guarea̧ oa care care guaji̧ri̧ oa ta̧rëa̧requedejȩrȩ goae tarari̧ ea cjiaji̧ri̧ oa. Aja̧, ja̧di ta̧rëri̧ ni̧bäji̧ri̧ oa ta̧rëa̧requedejȩrȩ.

³ Ado cüdë ta̧rëa̧ pio jiro pumȩ judiro̧ no̧i̧dëreji̧ri̧dirȩ. Aja̧, 144 mil pumȩreji̧ri̧dirȩ. Ado Ütë ja̧ charea̧ ba chia dëbëräpȩ cjiareji̧ri̧dirȩ. Aja̧, Ütë ja̧ dëbëräpȩ ju̧ri̧, jibëa̧ icjara nö̧ta oa dacho chiaji̧ri̧ pio ji̧ri̧ ja̧ dëbëräpȩ ju̧ri̧, tjamo̧ yo̧ji̧ri̧ pio ji̧ri̧ ja̧ dëbëräpȩ ju̧ri̧ cjiareji̧ri̧dirȩ. Ado jënȩro̧ dabapea̧ pio ju̧i̧ go̧a̧reji̧ri̧dirȩ go̧a̧rea̧ peaja̧ oa, o judiro̧ dabaparea̧mi̧dëri̧ go̧a̧rea̧ oa. Jabechji̧ pio judiro̧ gatëa̧ oa cjia tara, dai chirirä ja̧ jo̧rȩta̧ chja̧oeri pio go̧dü tänȩa̧ oa cjia tara, jabechji̧ pio judiro̧mo̧rȩ go̧a̧rea̧ daea̧diro̧jo̧ȩ.

⁴ Ado pio judiro̧dirȩ ivi pio ji̧ri̧iä oëra̧diädëa̧ judiro̧. Aja̧, Ütë tjamo̧ ja̧ maea oa cjo̧ro̧pea̧ oa china̧chjari̧ tutia̧ oa cjiami̧ dari̧ cjo̧ro̧reji̧ri̧ pio judiro̧dirȩ. Oveja pëi̧ chjamȩmi̧ da pio ju̧i̧ ji̧dë ma cho̧rë jämi̧ dari̧ japareji̧ri̧ pio judiro̧dirȩ. Jabechji̧ yodëro̧je chiriräpȩti̧ oa cjo̧ro̧rërea̧ ji̧, jabechji̧ gatëa̧ oa cjiami̧ dari̧ cjiadiäa̧dirȩ yaba̧. Gatëa̧ oa cjiami̧ dari̧ cjiadiäa̧dirȩ Ütë tjamo̧ ja̧ mape bagari̧, Oveja pëi̧ chjamȩmi̧ da pio ju̧i̧ ja̧ mape bagari̧. Jabechji̧ tjado ana̧mȩ judi yabo joechjapea̧mȩ jurarea̧ oa mitëmi̧ dari̧ mitëa̧dejȩrȩ pio jiro pumȩ ji̧ri̧ Ütë tjamo̧ judi, Oveja pëi̧ chjamȩmi̧ da pio judiborë.

⁵ Jabechji̧ ma̧ȩ chjádë yürüji̧ri̧rȩ cjo̧ro̧reji̧ri̧dirȩ o judiro̧ pio ji̧ri̧iäpȩmo̧ aechide yo̧rea̧mi̧dëri̧.

A̧dëräpȩ cjiamȩ ja mu̧i̧tjoi̧ judiro̧ tjarari̧rȩ ma̧ȩ yürera̧pea̧dirȩ

⁶ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa, a̧dërämȩ ja̧ mu̧i̧tjoi̧ oa. Uë tjamo̧ oa puarë pjo̧a̧ baämi̧ dari̧ baämȩ oa daea̧reconȩ. Ütë tjamo̧ ja̧ ma̧ȩ chjadëi̧ pio ju̧i̧ goa jana̧remȩde, bucho ana̧mȩ ma̧ȩ oa. Ado pio jiro ma̧ȩ üdë pumȩ ütëbodärä ja̧de. Pumȩ ütëbodärä oa a̧ra̧ano̧pea̧de. Chiri nö̧tai̧ oa cjo̧ro̧ji̧ri̧ pumȩ pio ji̧ri̧iäpȩmo̧, ado cja̧rȩmo̧ jo̧rȩtarea̧ chiaji̧ri̧ pio ji̧ri̧iäpȩmo̧, ado cja̧rȩmo̧ ma̧ȩ oa ni̧bäji̧ri̧ pio ji̧ri̧iäpȩmo̧, ado cja̧rȩmo̧ taruri ja̧ pumȩ pio ji̧ri̧iäpȩmo̧bo a̧ra̧ano̧pea̧de pio jiro ma̧ȩ üdë.

⁷ Ado to̧bari̧ ni̧bämȩ oa ta̧rëa̧reconȩ. Ja̧di ta̧rëri̧ yo̧a̧de: —Ütë tjamo̧ pio ju̧i̧ uapaji̧ri̧rȩ ba chia jo̧rȩtachji̧jo̧ȩ, pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ —yo̧a̧de—. Jabechji̧ ütara̧ do üdë, pumȩ ütëbodärä oa bape chjaopea̧ do üdë ma̧na̧na̧ra̧diibe. Ja̧di tara chacjiamȩri̧ ni̧bächji̧jo̧ȩ a̧dë chjäte jauëchjamȩ pio ju̧i̧iäpȩmo̧. Jabechji̧ a̧dë oa Pareapamȩ pio judide. Dabu oa Pareapamȩ pio judide. Ui ana̧ oa, dürü oa, tja oa, bea oa Pareapamȩ pio judide. Pio ju̧i̧iä yo̧requededibe. Chacjiamȩri̧ jo̧rȩtachji̧jo̧ȩ. Aja̧, ja̧di ta̧rëri̧ yo̧a̧de pio jiro mu̧i̧tjoi̧ üdë.

⁸ Ado pio jiro mu̧i̧tjoi̧ üdë coa a̧dë cjarapea̧rä, daea̧reconȩ ado cja̧rȩmo̧ oa. Ado ja̧di ta̧rëri̧ yo̧mȩ oa ta̧rëa̧reconȩ: —Aja̧, Babironia quȩmȩ bë ma̧ri̧ ba chia üdë, jabechji̧ jiro decjiapea̧de yaba̧. Boadäräa̧ oa cjiade. Jabechji̧ iei̧ oeadëyi̧mi̧ darë chjai̧dëri̧ jape chjaoa̧dejȩrȩ davä chiriräpȩti̧ oa cjo̧ro̧ji̧ri̧ pumȩ pio ji̧ri̧. Aja̧, yu̧i̧mi̧ dari̧ cjiadiäa̧ maeadirȩ pio jini̧ baë ëba mo̧a̧mi̧ dari̧ jape chjaoa̧ oaiä. Jabechji̧ ërü goara tjamo̧mi̧ dari̧ cjiadiäa̧dirȩ ji̧dë ma idi̧ dari̧ baë ëba mo̧a̧tämi̧ cjiaji̧ri̧rȩ. Ërürë boami̧ dari̧ boa̧dejȩrȩ ja̧di dari̧ japapea̧ üdë. Aja̧, ja̧di ta̧rëri̧ yo̧mȩ oa ta̧rëa̧reconȩ mu̧i̧tjoi̧ oa, Babironia quȩmȩ bë ma̧ri̧ pio ju̧i̧ chjiari ni̧bämȩ oa. Ado judiri yo̧dëa̧de.

^9-10 Ado coa ni̧bäremȩ mu̧i̧tjoi̧ judi coa a̧dë cjarapea̧rä, ado cja̧rȩmo̧ oa daea̧reconȩ. Ado to̧bari̧ yo̧mȩ oa ta̧rëa̧reconȩ peaja̧di. Ja̧di ta̧rëri̧ yo̧a̧dique: —Chjadëri̧ ta̧rëcoe —yo̧a̧dique—. Eami̧ pumȩ üdë oëra̧ jo̧rȩtarä judi, conȩda̧ oa cjiapade. Tjamo̧ davä. Eami̧ pumȩ üdë chirirä cjo̧ro̧mȩmi̧ da ju̧i̧iäpȩmo̧ chjacjiamȩri̧ jo̧rȩtarä judi, uirimȩ pio ju̧i̧iäpȩmo̧ chjacjiamȩri̧ jo̧rȩtarä judi, pio judimi̧ dari̧ jëdano̧a̧ ütë pio ju̧i̧iäpȩmo̧ chjacjiamȩri̧ jo̧rȩtarä judi, jabechji̧ a̧dë chjäte conȩda̧ oa cjiapade. Ado eami̧ pumȩ üdë jibëa̧ ichirä, jabo jibëa̧ daitoro cji̧däa̧ oa cjiarä judi, uirimȩ pio ju̧i̧ ja̧ go̧ȩra̧ cji̧däa̧ oa cjiarä judi, jabechji̧ Ütë ja̧ ërecjia̧ üdë pio ju̧i̧iäpȩmo̧ acji cjatäpadejȩ uapai̧ da tjamo̧ri̧, popë chiquimi̧ dari̧. Ado Ütë ja̧ ërecjia̧ üdë, jabechji̧ uira̧ mirea̧ oa cjiami̧ dari̧ cjiadëpade. Danȩrȩ, bino quȩmȩ ërü üdë uira̧ pio ju̧ri̧ra̧ mirea̧ oa cjiami̧ dari̧ cjiadëde. Uirë boa̧ oa cjiami̧ dari̧ cjiadëde. Ado peaja̧dimi̧ dari̧ cjiapade Ütë ja̧ ërecjia̧ üdë. Uirë boa̧ oa cjiami̧ dari̧ cjiadëpade, jabo a̧dë chjäte uapai̧ dari̧ acji cjatäpadejȩrȩ pumȩ ji̧ri̧, a̧dë chjäte gitoi̧ dari̧ cjo̧ro̧ tänȩpea̧ oa. Ado pio ju̧i̧iä jabechji̧, cjüëtü tjamo̧ra̧ pio ju̧ri̧ra̧ conȩda̧ oa cjo̧ro̧padirȩ cjo̧dë oaiä, a̧dë chjäte cjüëtüri̧ tümȩ achjupjere quȩmȩ pio ju̧i̧iä. Oveja pëi̧ chjamȩmi̧ da pio ju̧i̧ ja̧ dachoro conȩda̧ oa cjo̧ro̧padirȩ, Ütë tjamo̧ ja̧ mu̧i̧tjoi̧ ja̧ dachorobo, a̧dëriji̧ri̧ mu̧i̧tjoi̧ pio ji̧ri̧ ja̧ dachorobo.

¹¹ Ado judiro̧ cjo̧dëra̧ conȩdari pio judiri ji̧dë ma cjitëpade chjä üdë, cjitëdëpe bagarea̧ decjiari̧. Aja̧, ji̧dë ma tüea̧ oaiä, jabechji̧ bucho ana̧ cjitëpade. Ado cjatäcjiarea̧ dadëpadirȩ ju̧ri̧pȩ. Jabechji̧ doro cjatäcjia datärea̧ ji̧, cjäri̧ madirȩ, cjatäcjiarea̧ dadëpadirȩ. Ado gȩnȩrä cjatäcjiarea̧ datärea̧ ji̧, peaja̧di cjatäcjiarea̧ dadëpadirȩ. Jabechji̧ cjatäcjiarea̧ decjiaräpȩ cjiadiäpadirȩ bucho ana̧. Aja̧, judiro̧ uirimȩ pio ju̧i̧iäpȩmo̧ chjacjiamȩri̧ jo̧rȩta̧ oaiä, ado pio judimi̧ dari̧ jëdano̧a̧ ütë pio ju̧i̧iäpȩmo̧ chjacjiamȩri̧ jo̧rȩta̧ oaiä, jabechji̧ ja̧di dari̧ cjiadiäpadirȩ. Tjamo̧ davä. Judiro̧ jibëa̧ irä chiaji̧ri̧pea̧ oaiä, pio ju̧i̧ ja̧ quȩ oa ütararea̧ go̧ȩ chiaji̧ri̧pea̧ oaiä, jabechji̧ ja̧di dari̧ cjiadiäpadirȩ bucho ana̧. Aja̧, ja̧di ta̧rëri̧ yo̧mȩrȩ yo̧a̧dique a̧dërimȩ mu̧i̧tjoi̧ üdë.

¹² Pio ju̧i̧iä a̧ro̧rȩ, Ütë tjamo̧ ja̧ oa tutia̧ oa cjiaji̧ri̧ pumȩ pio judiro̧ goae tjamo̧dë oa chjätäräbo, jabechji̧ ji̧dë ma ta̧rëdiätäreji̧ri̧rea̧ro̧jo̧ȩ Ütë judi yo̧a̧ pio ju̧i̧. Aja̧, jaepeparea̧ decjiari̧ ji̧dë ma ta̧rëdiätäreji̧ri̧rea̧rȩ, Jechu pio ju̧i̧ chjuari̧ quëna̧ji̧ri̧rȩ. Aja̧, ja̧di ta̧rëri̧ yo̧mȩrȩ ni̧bä chjaoa̧dique mu̧i̧tjoi̧ üdë.

¹³ Ja̧dëa ji̧ ta̧rëa̧reconȩ ado cja̧rȩmo̧ oa, a̧dëri pio judiri ni̧bämȩ oa. Ja̧di ta̧rëri̧ yo̧a̧dique: —Pio yoa ma̧ȩ oa go̧ȩpatä earequedemȩ cüdë mȩa yo̧pea̧ ma̧ȩ oa —yo̧a̧dique—. Aja̧, pio yoa ma̧ȩ oa go̧ȩpavä: "Pio yaba̧ domȩri ja̧ eami̧ pumȩ üdë Ano̧mȩ Jechu pio judiri ja̧mȩrȩ ja̧borä judi, a̧dë chjäte ma̧ chiadëri̧ cjiamȩrȩ cjo̧ro̧pade." Aja̧, pio ju̧i̧mo̧i̧ go̧ȩpavä. Aja̧, ja̧di ta̧rëri̧ yo̧mȩrȩ yo̧a̧dique ma̧ȩ go̧a̧ti̧dë oa. Jabo ja̧dëa ji̧ peaja̧di dari̧ jo̧rȩtamȩ pio judi a̧de yo̧a̧diqueTjo tjamo̧ pio judi: —Aja̧, tjamo̧ri̧ yo̧de mu̧i̧tjoi̧ üdë —yo̧a̧dique—. Ma̧ chiadëri̧ cjiapadirȩ. Goae tarari̧ cjatäcjiarea̧ dapadirȩ ana̧ri̧ ja̧beparërea̧ ji̧. Ado judiro̧ ja̧bepea̧ üdë, jabechji̧ badëri̧ cjiadiädëpade, jabo chjadëri̧ ba ano̧padejȩrȩ Ütë tjamo̧ judi a̧dëräpȩ ju̧ri̧. Aja̧, ja̧di ta̧rëri̧ yo̧mȩrȩ a̧de yo̧a̧dique Ütë ja̧ tjo pio judi.

Tjadoro ja̧ oa mitëmi̧ dari̧ mitëa̧ oa cjiadiäa̧dirȩ chiriräpȩti̧ oa cjo̧ro̧ji̧ri̧ judiro̧ orë

¹⁴ Ja̧dëa ji̧ daea̧reconȩ go̧a̧ra̧ ë bërebërea oa. Ado pio jiro go̧a̧ra̧ ërä chamȩ oa daea̧reconȩ cja̧rȩmȩ oa, Pumȩrȩ Ara̧ Tjamo̧ pio judimi̧ da oa. Orora̧ japea̧ oa cjiamȩ yuarea̧ oa, ütërë ba chia oa yuami̧ dari̧ yuamȩ oa daea̧reconȩ. Ado tjapënȩmi̧ da oa daea̧reconȩ. Jurarea̧ mitërea̧ tjapënȩmi̧ da oa, tjapënȩ chjadë oa aramȩ oa daea̧reconȩ, gaipa tjamo̧ oa.

¹⁵ Ja̧dëa ji̧ mu̧i̧tjoi̧ üdë cja̧rȩmȩrȩ a̧dëräpȩ cjiamȩ ja̧ bëri pio judiri go̧düa̧de, Ütë tjamo̧ ja̧ bëri pio judiri. Ado to̧bari̧ ëna̧diämȩrȩ yo̧a̧dejȩ go̧a̧ra̧ ërä chamȩ pio ju̧i̧iäpȩmo̧: —Jaevä —yo̧a̧dejȩ—. Na̧ tjapȩnȩra̧ pio ju̧ri̧ra̧ tarupavä. Mitëvä joechjapea̧mȩ jurarea̧mi̧ da pio ji̧ri̧. Jabechji̧ mitëpea̧ dode. Mo̧ëpea̧mi̧ dari̧ cjiadirȩ chiriräpȩti̧ oa cjo̧ro̧ji̧ri̧ judiro̧, jurarea̧mi̧ da pio judiro̧. Aja̧, tjadoräpȩti̧ oa mitërea̧mi̧ dapea̧de. Jaevä. Mitëvä —yo̧a̧dejȩ.

¹⁶ Ado pio ju̧i̧ ta̧rëa̧ oaiä, go̧a̧ra̧ ërä chamȩ pio judi jibëa̧ tjapȩnȩmi̧ dara̧ tuti gu̧na̧pea̧ ji̧ tarupea̧de jurarea̧mi̧ da pio ji̧ri̧ mitëpea̧ ji̧ chiriräpȩti̧ oa cjo̧ro̧ji̧ri̧ oa. Ado chjaodëri̧ tuti gu̧na̧däräa̧de. Chjaodëri̧ mitëdäräa̧ oa cjiaremȩde chiriräpȩti̧ oa cjiaji̧ri̧ jurarea̧mi̧ da pio judiro̧.

¹⁷ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa. Peaja̧di Ütë tjamo̧ ja̧ bëri pio judiri go̧dümȩ oa daea̧reconȩ, a̧dëräpȩ cjiamȩ ja̧ bëri pio judiri. Ado peaja̧di araremȩde tjapënȩ gaipa oa, jurarea̧ mitërea̧ tjapënȩmi̧ da oa.

¹⁸ Ja̧dëa ji̧ daea̧reconȩ ado cja̧rȩmo̧ mu̧i̧tjoi̧ oa, a̧dërimȩ oa. Goaeri̧ pjȩa̧mȩ cäarea̧ mechjari pio judiri jana̧mȩ oa daea̧reconȩ. Pio judiremȩde tjamo̧ cäamȩ judi, goaeri̧ pjȩa̧mȩ cäarea̧ pio ju̧i̧ tjamo̧ cäamȩ judi. Ado pio judi to̧bari̧ ëna̧diämȩrȩ yo̧a̧dejȩ ado cja̧rȩmo̧ mu̧i̧tjoi̧ oa, tjapënȩmi̧ da oa aramȩ ju̧i̧iäpȩmo̧, duri oa go̧düa̧mȩ pio ju̧i̧iäpȩmo̧. Ado ja̧di ta̧rëri̧ yo̧a̧dejȩ: —Jabechji̧ tarupavä —yo̧a̧dejȩ—. Uva quȩmȩ jurarea̧ pio ju̧i̧ mitëpea̧ ji̧ tarupavä. Mo̧ëpea̧ maeade. Uva chiamȩ tjadoräpȩti̧ oa mitëvä chiriräpȩti̧ oa —yo̧a̧dejȩ.

¹⁹ Ado pio ju̧i̧ ta̧rë ëte, tarupea̧de jibëa̧ tjapȩnȩmi̧ dara̧ pio ju̧ri̧ra̧ uva cho pio ju̧i̧ mitëpea̧ ji̧. Chiriräpȩti̧ oa mitëa̧dejȩ. Ado chjö̧na̧i̧ oa mitë ëte, aeno̧a̧dejȩ boa boa cjaeärea̧ boi̧dëräpȩ, Ütërë jibëa̧ ërecjiarea̧ra̧ pio ju̧ri̧ra̧ boa boa cjaeärea̧räpȩ. Ja̧di dari̧ acji cjatäpade jibëa̧ ërecjiarea̧ üdë, a̧dë chjäte ërecjiarea̧ üdë. Boa boa cjaeämi̧ dari̧ acji cjatäpade uapai̧ da tjamo̧ri̧.

²⁰ Jabechji̧ bë ma̧ri̧ dairäpȩ ju̧ri̧ boa boa cjaeäa̧ oa cjiaremȩde uva cho üdë. Ado daea̧reconȩ goe ji̧ra̧ tjamo̧ oa. Uva ui maea oa datärea̧ ji̧, goe maea oa daea̧reconȩ. Boa boa cjaeärea̧ boi̧dëri pio judiri go̧dümȩ oa daea̧reconȩ. Goae tarari̧ ca̧remȩde beami̧ dari̧. Jabechji̧ jachi tjamo̧ oa ca̧remȩde, 300 kilometros jachi oa. Ado cjücjürüri̧ ca̧remȩde peaja̧di. Yae ja̧ putu jurëmi̧ cjiari̧ cjücjürüremȩde. Aja̧, ja̧di dari̧ ca̧remȩde goe üdë Ütë ja̧ ërecjia̧ pio ju̧i̧iä.