Jechurë Na̧rȩrërea̧ Ma̧ȩ 13 - Biblia Pume

Yo̧a̧ri̧dirȩ ma̧i̧ dari̧ japaji̧ri̧ judiro̧

¹ Ja̧dëa ji̧ daea̧reconȩ chirirä cjo̧ro̧mȩmi̧ da oa, ui ana̧ri pio judiri go̧dümȩ oa. Uapai̧ da oa daea̧reconȩ yatë ji̧ra̧ri̧ chiamȩ oa, ichi chjö̧na̧i̧ yatë chiamȩ oa. Ado yatë nö̧tai̧ oa yuarea̧ ba chiara̧ mu̧i̧ idäa̧ oa cjiaremȩde, ütërë yuarea̧ ba chiami̧ dara̧. Ado tjübë ji̧ra̧ oa chiaremȩde peaja̧di. Cja̧ȩta̧ra̧ ichiri yo̧a̧ri̧ tjübë oa chiaremȩde quȩ chia maea oa. Tjamo̧ davä. Tjübë nö̧tai̧rȩ quȩ chiaremȩde. Quȩ china̧chja oa, Ütë tjamo̧ ja̧ quȩmi̧ da maea oa, pio ju̧i̧ ja̧ quȩdë oa chiaremȩde, pio ju̧i̧iäpȩmo̧ ya̧mȩmi̧ dari̧. Ado goae tjamo̧dëremȩde davä Ütë tjamo̧ pio ju̧i̧iä.

² Aja̧, chirirä cjo̧ro̧mȩmi̧ da pio ju̧i̧ daea̧reconȩ pa̧rȩmȩ ca̧ra̧ca̧ra̧mi̧ da oa, boi̧dë oa. Ado jibëa̧ ta bori̧dë oa chiaremȩde jibëa̧ ta cö̧ ji̧ra̧ oa chiamȩrȩ, ivë go̧a̧ti̧ chiamȩrȩ. Ochjo quȩmȩ ja̧ tami̧ da oa chiaremȩde. Ado ju̧i̧ ja̧ ya üdë pa̧rȩmȩ coë ja̧ yami̧ daremȩde. Ado chö̧ri̧mi̧ damȩ pio judi jibëa̧ jauëchja oa yürüa̧dejȩ. Uiri judiri uapai̧ damȩ ju̧i̧iäpȩmo̧, chirirä cjo̧ro̧mȩmi̧ da pio ju̧i̧iäpȩmo̧ yürüa̧dejȩ. Ado tjamo̧ yo̧rea̧ pio ju̧i̧bo yürüa̧dejȩ. Pumȩ judiro̧ pio ju̧i̧ ja̧ chja̧oerä cjo̧ro̧pea̧ oa ja̧di dari̧ yürüa̧dejȩ. Ado jënȩ charea̧mi̧ daräpȩ yürüa̧dejȩ peaja̧di, ba chia tjamo̧mi̧ daräpȩ cjo̧ro̧pea̧ oa.

³ Ado uirimȩ pio ju̧i̧ ja̧ tjübë üdë cja̧rȩmȩrȩ co chiaremȩde. Gito ana̧ tjamo̧ri̧ tararemȩde ja̧bopai̧ dari̧. Jabo chjaparȩrea̧mi̧dëmȩrȩ chjaodëri̧ chjapea̧ oa cjiadiäa̧de. Ado pio ju̧i̧iä ana̧ri̧ jo̧rȩtaji̧ri̧pea̧dirȩ chiriräpȩti̧ oa cjo̧ro̧ji̧ri̧ judiro̧. Dacho bëremi̧ cjiaji̧ri̧rȩ ba chia jo̧rȩtaji̧ri̧pea̧diro̧jo̧ȩ. Ado pio ju̧i̧iäji̧ri̧rȩ tarupea̧dirȩ pio ju̧i̧ cho̧rë jäpea̧ ji̧.

⁴ Ado ütëbodärärë chjacjiamȩri̧ jo̧rȩtareji̧ri̧diro̧jo̧ȩ chjö̧ri̧mi̧ damȩ pio ju̧i̧. Jabechji̧ jibëa̧ jauëchja oa uiri judiri uapai̧ damȩ pio ju̧i̧iäpȩmo̧ yürüa̧ oaiä, tjamo̧ yo̧rea̧ ji̧ra̧ oa pio ju̧i̧iäpȩmo̧ yürüa̧ oaiä, chjacjiamȩri̧ jo̧rȩtareji̧ri̧diro̧jo̧ȩ. Ado uirimȩ pio ju̧i̧iäpȩmo̧bo chjacjiamȩri̧ jo̧rȩtareji̧ri̧diro̧jo̧ȩ. Ado ja̧di ta̧rëri̧ yo̧a̧dirȩ pio ju̧i̧ chjiari: —Aja̧, chirirä cjo̧ro̧mȩmi̧ da pio judi ba chia tjamo̧de —yo̧a̧dirȩ—. Ado cja̧rȩmo̧rȩ nö̧tadë madejȩ. Pio judimo̧de. Ado cja̧rȩmo̧rȩ pio ju̧i̧iäpȩmo̧ dëbëparea̧mi̧dëde. Pio ju̧i̧iäpȩmo̧ acji jana̧rea̧mi̧dëde. Aja̧, ja̧di ta̧rëri̧ yo̧reji̧ri̧dirȩ uirimȩ pio ju̧i̧ chjiari.

⁵ Ado cja̧rȩmȩrȩ yürüa̧ oa, chirirä cjo̧ro̧mȩmi̧ da pio judi chjai̧dë tjamo̧ri̧ ni̧bärea̧ daea̧de. Jibëa̧ chji̧rämo̧ jo̧rȩtatamȩrȩ goaeri̧ ni̧bäremȩde, Ütë tjamo̧ pio ju̧i̧iäpȩmo̧ ya̧mi̧ tarari̧. Ütë tjamo̧cji̧ quëna̧ ni̧bäremȩde, Ütë pio ju̧i̧iäpȩmo̧ badë jo̧rȩtamȩrȩ. Jabechji̧ cja̧rȩmȩrȩ yürüa̧ oa, chiri nö̧tai̧ oa tjamo̧ yo̧mȩmi̧ dari̧ cjo̧ro̧remȩde 42 gupënȩ nö̧ta, tjarari̧ ui tjomo̧mi̧.

⁶ Aja̧, ja̧di dari̧ cjo̧ro̧remȩde, Ütë tjamo̧ pio ju̧i̧iäpȩmo̧ ma̧i̧ dari̧ ya̧mȩrȩ. Ütëmi̧ dari̧ chjaocjia chjaocjia ni̧bäremȩde, Ütë ja̧ quȩ oa yo̧mȩrȩ. Jabechji̧ Ütërë cjiamȩräpȩ pio ju̧i̧ badë jo̧rȩtamȩrȩ ma̧ȩ chjádë ni̧bäremȩde a̧dë pio ju̧i̧ chjiari. Ado a̧dëräpȩ cjo̧ro̧ji̧ri̧ pio ji̧ri̧iäpȩmo̧bo goae tarari̧ ya̧ea̧dejȩrȩ. A̧dë chjäte ma̧i̧ dari̧ yo̧remȩde, Ütë tjamo̧ pio ju̧i̧ badë jo̧rȩtamȩrȩ.

⁷ Ado cja̧rȩmȩrȩ yürüa̧ oa, Ütë tjamo̧ ja̧ pumȩ pio ji̧ri̧ acji jäa̧dejȩrȩ pio ji̧ri̧ boadäräpea̧ oa. Ado cja̧rȩmȩrȩ yürüa̧ oa, chiri nö̧tai̧ oa cjo̧ro̧ji̧ri̧ judiro̧ pio ju̧i̧ ja̧ chja̧oerä cjo̧ro̧ji̧ri̧pea̧dirȩ. Tjamo̧ davä. Ado cja̧rȩmo̧ jo̧rȩtarea̧ chiaji̧ri̧ pumȩ pio judiro̧, ado cja̧rȩmo̧ ma̧ȩ oa ni̧bäji̧ri̧ pio judiro̧, ado cja̧rȩmo̧ taruri pumȩ pio judiro̧, uirimȩ pio ju̧i̧ ja̧ chja̧oerämo̧ cjo̧ro̧ji̧ri̧pea̧dirȩ.

⁸ Ado chiri nö̧tai̧ oa cjo̧ro̧ji̧ri̧ pio judiro̧ chjacjiamȩri̧ jo̧rȩtaji̧ri̧pea̧diro̧jo̧ȩ, o judiro̧mo̧rȩ cjiadiäri̧. Aja̧, o judiro̧mo̧rȩ chjacjiamȩri̧ jo̧rȩtadëdëa̧diro̧jo̧ȩ. Jabechji̧ jabërä go̧ȩpea̧ oa cjiaji̧ri̧ pio judiro̧dirȩ. Jabechji̧ jibëa̧ quȩ oa bucho ana̧ cjo̧ro̧rea̧ joërä go̧ȩpea̧ oa cjiareji̧ri̧ judiro̧, jabë dabu oa pareapadëa̧rä go̧ȩpea̧ oa cjiareji̧ri̧ pio judiro̧ chirirä cjo̧ro̧mȩmi̧ da pio ju̧i̧iäpȩmo̧ chjacjiamȩri̧ jo̧rȩtadëa̧diro̧jo̧ȩ. Danȩrȩ, bucho ana̧ cjo̧ro̧rea̧ joë üdë, ja̧bo tänȩa̧ oa cjiamȩ Oveja pëi̧ chjamȩmi̧ da pio ju̧i̧ ja̧de. Ado pio jiro joërä go̧ȩpea̧ oa cjiaji̧ri̧ pio judiro̧ chjacjiamȩri̧ jo̧rȩtadëa̧diro̧jo̧ȩ.

⁹ Pio ju̧i̧iä ta̧rë puë chiaji̧ri̧ pio judiro̧ chjadëri̧ ta̧rëdiätäreji̧ri̧dirȩ.

¹⁰ Danȩrȩ, Ütë tjamo̧ judi tänȩa̧ oa dami̧ti̧ oa chjätäpai̧ dadirȩ quëna̧ji̧ri̧ judiro̧. Jabechji̧ Ütë judi jo̧rȩtarä judi, ‘Aja̧, pio jiro pumȩ judiro̧ chaärea̧ bëräpȩ chaäa̧ oa cjiapadiro̧da’ quëna̧ jo̧rȩtarä judi, peaja̧di chaäa̧ oa cjiapadirȩ. Ado judi jo̧rȩtarä judi, ‘Aja̧, pio jiro pumȩ judiro̧ dëbëribo jo̧dë chiamȩ tjapënȩ jujuai̧ra̧ pio ju̧ri̧ra̧ guë ja̧bo tänȩa̧ oa cjiapadiro̧da’ quëna̧ jo̧rȩtarä judi, peaja̧di dari̧ ja̧bopadirȩ. Aja̧, pio judide, a̧ro̧rȩdë. Ado pio ju̧i̧iä Ütë tjamo̧ ja̧ pumȩ judiro̧ ji̧dë ma chjuari̧ quëna̧pea̧ chiadiro̧jo̧ȩ jëreearea̧ decjiari̧, järidëpe bagarea̧ decjiari̧. Jabechji̧ goae tjamo̧dëräbo chjuari̧ quëna̧pea̧ chiadiro̧jo̧ȩ.

¹¹ Ja̧dëa ji̧ daea̧reconȩ ado cja̧rȩmo̧ oa, ma̧i̧ da oa. Peaja̧di uapai̧ da oa daea̧reconȩ. Jabo uiri pio judiri go̧dümȩ oa dadëa̧reconȩ, jabo jabechji̧ daburi pio judiri go̧dümȩ oa daea̧reconȩ daburimȩ oa. Yo̧a̧ri̧ yatë chiaremȩde ovejami̧ darë. Ado chjö̧ri̧mi̧ damȩ pio judimi̧ dari̧ ni̧bäremȩde.

¹² Ado uirimȩ pio judi jibëa̧ jauëchja oa yürüa̧ oaiä, jënȩ tjamo̧ yo̧rea̧ oa yürüa̧ oaiä, jabechji̧ tjamo̧ yo̧mȩrȩ ja̧beparemȩde pio jȩaiäpȩmo̧ yürüa̧mȩ ja̧ oa. Ado pio ju̧i̧iämȩrȩ uirimȩ pio ju̧i̧iäpȩmo̧ chjacjiamȩri̧ jo̧rȩta tänȩa̧dejȩrȩ chiriräpȩti̧ oa cjo̧ro̧ji̧ri̧ pio ji̧ri̧. Tjamo̧ davä. Ma̧i̧ da co chiaremȩ pio ju̧i̧iäpȩmo̧, chjapea̧ oa cjiaremȩ pio ju̧i̧iäpȩmo̧ chjacjiamȩri̧ jo̧rȩta tänȩa̧dejȩrȩ pumȩ ütëbo oa daburimȩ pio judi.

¹³ Ado dami̧ti̧ jauëchja oa, japarea̧mi̧dë pio ju̧i̧ japamȩrȩ na̧rȩremȩde, pumȩ judiro̧ dacho bëremi̧ cjiari̧. Jabechji̧ a̧dëri pio judiri gu̧ro tänȩremȩdejȩ cjo̧dë oa, pumȩ ütëborë irä darea̧mi̧ dari̧.

¹⁴ Jabechji̧ cja̧rȩmȩrȩ yürüa̧ oaiä uirimȩ pio ju̧i̧ ja̧ dachoro na̧rȩ chjaoremȩde, dami̧ti̧ jauëchja cjiari̧ na̧rȩmȩrȩ. Ado ja̧di dari̧ japea̧ oaiä chiriräpȩti̧ oa cjo̧ro̧ji̧ri̧ pio judiro̧ ana̧ri̧ u̧i̧pea̧ oa cjiadiäa̧dirȩ. Ado pio ju̧i̧iä teracabari̧ jo̧rȩtaji̧ri̧pea̧dirȩ. ‘Aja̧, chirirä cjo̧ro̧mȩmi̧ da üdë, uirimȩ pio judi ba chia tjamo̧dida, ado pio judimi̧ da oa jëdano̧täreji̧ri̧a̧ro̧da, ana̧ tjamo̧ oa jëdano̧täreji̧ri̧a̧ro̧da, ja̧bo tänȩrea̧mi̧ dari̧ gu̧na̧ oa cjiaremȩ pio judimi̧ da oa jëdano̧täreji̧ri̧a̧ro̧da, dëbëribo jo̧dë chiamȩ tjapënȩ jujuai̧ra̧ pio ju̧ri̧ra̧ ja̧bo tänȩrea̧mi̧ dari̧ gu̧na̧ oa cjiaremȩ pio judimi̧ da oa jëdano̧täreji̧ri̧a̧ro̧da’ quëna̧ jo̧rȩtaji̧ri̧rȩ jo̧rȩtaji̧ri̧pea̧dirȩ u̧i̧pea̧ oa cjia̧ oaiä.

¹⁵ Ado ja̧dëa ji̧ pumȩ judiro̧ jëdano̧a̧ oa goa̧rä, uirimȩ pio judimi̧ da oa jëdano̧a̧ oa goa̧rä, jabechji̧ daburimȩ pio judi pumȩrea̧ yürüa̧dejȩ. Tjamo̧ davä. Daburimȩ pio judi cjo̧ro̧rea̧ yürüa̧dejȩ pjura̧ oaiä. Tjamo̧ davä. Cjo̧ro̧ tänȩrea̧mi̧dë pio ju̧i̧ cjo̧ro̧rea̧ yürüa̧dejȩ. Ni̧bärea̧ yürüa̧dejȩ. Aja̧, cja̧rȩmȩrȩ japarea̧ yürüa̧ oa ja̧di dari̧ japarea̧ daea̧dejȩ. Ado ja̧dëa ji̧ jëdano̧a̧ judi, ni̧bärea̧ chiamȩpea̧ pio judi, ja̧di ta̧rëri̧ ni̧bämȩpea̧de: "Aja̧, eami̧ pumȩ üdë pio coaiäpȩmo̧ chjacjiamȩri̧ jo̧rȩtadëri̧ cjiarä judi, jabechji̧ ja̧bo tänȩa̧ oa cjiatäde" yo̧rëremȩde.

¹⁶ Ado ja̧dëa ji̧ daburimȩ pio judi pumȩ ütëbodärä oa go̧ȩra̧ pio ju̧ri̧ra̧ cji̧däa̧ oa cjia tänȩa̧dejȩrȩ jibëa̧ irä. Tjamo̧ davä. Jibëa̧ daitoro cjiari̧, jabo jibëa̧ mu̧i̧ chjuari cjiari̧ cji̧däa̧ oa cjia tänȩa̧dejȩrȩ jiadarea̧ decjiari̧. Aja̧, tjamo̧ yo̧ji̧ri̧ pio ji̧ri̧, mu̧i̧tjoi̧ pio ji̧ri̧, chëre ji̧ra̧ri̧ goaji̧ri̧ pio ji̧ri̧, cjäri̧ ja̧boji̧ri̧ pio ji̧ri̧ cji̧däa̧ oa cjia tänȩa̧dejȩrȩ ütëbo oa jibëa̧ go̧ȩra̧ pio ju̧ri̧ra̧.

¹⁷ Ado jiro go̧ȩ oa cji̧däa̧ oa cjiadëmȩ judi, jabechji̧ gatërea̧ dadëa̧de. Ado peaja̧di gatë tänȩrea̧ dadëa̧de. Jabechji̧ go̧ȩ oa cji̧däa̧rämo̧ chjadëri̧ cjo̧ro̧rea̧ daea̧dirȩ pumȩ judiro̧. Ado pio jiro go̧ȩ üdë, jabechji̧ chirirä cjo̧ro̧mȩmi̧ da pio ju̧i̧ ja̧ quȩde. Ado pio ju̧i̧ ja̧ quȩ üdë peaja̧di ütararea̧ maeara̧ yo̧rea̧mi̧ dade.

¹⁸ Jabo chjaode jabo. Pio jiro ütararea̧ üdë, ‘Aja̧, pio ju̧i̧ yo̧ jirodiibëda, pio jiro quȩ jirodida’ quëna̧ dabapapea̧ üdë chjao tjamo̧de. Jabo dëdë, a̧dë chjäte urëdi oa jo̧rȩtamȩ pio judi chjadëri̧ dabapai̧ dadejȩ. Aja̧, pio jiro ütararea̧ üdë, ‘pio jiro quȩ pio ju̧i̧ chjiari ütararea̧ tjamo̧dida, pumȩ quȩdida’ quëna̧ dabapai̧ dadejȩ. Ado ütararea̧ üdë, 666 ütararea̧de. Aja̧, pio judide jibëa̧ quȩ yo̧mȩ ütararea̧ üdë.