Jechurë Na̧rȩrërea̧ Ma̧ȩ 12 - Biblia Pume

Chjö̧ri̧mi̧ damȩ pio judi cho̧rë jätea̧dejȩ iei̧ ji̧

¹ Ado chjaodëri̧ na̧rȩa̧ oa cjiaremȩde a̧dë iräpȩ ju̧ri̧ na̧rȩrea̧ üdë. Dacho bëremi̧ cjiari̧ jo̧rȩtamȩrȩ daea̧reconȩ, ya yabë cjiamȩrȩ. Daea̧requede iei̧ ji̧, dora̧ ina̧ oa cjiayi̧ ji̧. Gupënȩ oa boë cjaeäyi̧ oa daea̧requedejȩ. Ado yuarea̧ ba chia tjamo̧ oa yuayi̧ oa daea̧requedejȩ, ichi chjö̧na̧i̧ yo̧a̧ri̧ büë chiamȩ yuarea̧ oa.

² Ado bo maireyi̧nȩ. Boi̧chji̧ ju̧i̧ arapea̧ ji̧ querediä tjamo̧reyi̧nȩ. Ado bo üdë gito oaiä, a a ma järeyi̧nȩ.

³ Ja̧dëa ji̧ ado cja̧rȩmo̧ na̧rȩrea̧ üdë na̧rȩa̧ oa cjiadiäa̧de a̧dëräpȩ ju̧ri̧. Uapai̧ dari̧ daea̧reconȩ. A̧dë chjäte ana̧ oa daea̧reconȩ chjö̧ri̧mi̧ da oa, coëcoëa oa. Cja̧ȩta̧ra̧ ichiri yo̧a̧ri̧ tjübë chiamȩ oa daea̧reconȩ, ichi chjö̧na̧i̧ yatë chiamȩ oa. Ado yuaremȩde yuarea̧ ba chia oa tjübë nö̧ta oa.

⁴ Ja̧dëa ji̧ chjö̧ri̧mi̧ da üdë jibëa̧ chjiara̧ pio ju̧ri̧ra̧ mitëa̧de büë no̧i̧dë tjamo̧ oa. No̧i̧dë tjamo̧ oa mitëa̧de jabo ütëbodë oa, jabo oamo̧ oa. Ado daburäpȩmo̧ arë cürëmi̧ dari̧ aeno̧a̧dejȩ. Ado ja̧dëa ji̧ chjö̧ri̧mi̧ damȩ pio ju̧i̧ daea̧reconȩ iei̧ ja̧ dëbëräpȩ cjiamȩ oa. Iei̧ jini̧ pea ara̧rä boi̧chji̧ pio ju̧i̧ jurapea̧ oa jidatamȩ oa daea̧reconȩ.

⁵ Ado japamitë boi̧chji̧ chjätä ëte, iei̧ jini̧ ara̧nȩjȩ üi̧ boi̧ oa. Chiri tjamo̧ cjo̧ro̧pamȩ pio ju̧i̧ ara̧nȩjȩ. Chiri nö̧tai̧ oa cjo̧ro̧ji̧ri̧ pio ji̧ri̧ ja̧ ütëpamȩ pio ju̧i̧ ara̧nȩjȩ, jȩa eadëji̧ri̧ pio ji̧ri̧ boadäräpamȩ ütë pio ju̧i̧. Ado chjö̧ri̧mi̧ damȩ üdë boi̧chji̧ pio ju̧i̧ baë juratärea̧ ji̧, chjaodëri̧ mitëa̧ oa cjiamȩrȩ goa baäa̧ oa cjiaremȩde Ütë tjamo̧ pio ju̧i̧iäpȩ, Ütë ja̧ charea̧ ba chiaräpȩ.

⁶ Ado iei̧ jini̧ bagureno̧a̧nȩ chiri maearäpȩ, dabu nȩgȩ maearäpȩ. Ütë tjamo̧ judi jabërä jëdano̧a̧ oaiä, bagureno̧a̧nȩ judi atara̧räpȩ. Ado ju̧ri̧pȩ chjadëri̧ jida̧ oa cjiareyi̧nȩ 1260 do nö̧ta, tjarari̧ ui tjomo̧mi̧.

⁷ Ado chjaodëri̧ idëpea̧de dëbëpe chjaorea̧ üdë a̧dëräpȩ ju̧ri̧. Mi̧guë quȩmȩ mu̧i̧tjoi̧ ba chia tjamo̧mȩ judi, a̧dërämȩ ja̧ mu̧i̧tjoi̧ pio ji̧ri̧ nö̧ta acji jäji̧ri̧rȩ, dëbëpe chjaoa̧diro̧jo̧ȩ chjö̧ri̧mi̧ damȩ pio ju̧i̧. Ado ba dëbëpe chjaoa̧dejȩrȩ jibëa̧ mu̧i̧tjoi̧ pio ji̧ri̧ nö̧ta. Tjamo̧ davä. Pio ju̧i̧ ja̧ mu̧i̧tjoi̧ pio ji̧ri̧ nö̧ta ba dëbë jape chjaoa̧dejȩrȩ.

⁸ Jabo chö̧ri̧mi̧ damȩ pio judi boadäräa̧ oa cjiadiäa̧de. Ado a̧dëräpȩ ju̧ri̧ cjiadiärea̧ yürüdëa̧diro̧jo̧ȩ. Jibëa̧ mu̧i̧tjoi̧ pio ji̧ri̧bo cjiadiärea̧ yürüdëa̧diro̧jo̧ȩ.

⁹ Ado pio ju̧i̧iä aeno̧a̧diro̧jo̧ȩ daburäpȩmo̧, jibëa̧ mu̧i̧tjoi̧ pio ji̧ri̧bo. Aja̧, chö̧ri̧mi̧ damȩ pio ju̧i̧, no̧mȩ tjamo̧ri ja̧ cjo̧ro̧mȩ po ana̧ pio ju̧i̧ aeno̧a̧diro̧jo̧ȩ. Tjamo̧ aechide ni̧bämȩ pio judide. Ichiae pio judide. Chiriräpȩti̧ oa cjo̧ro̧ji̧ri̧ pio ji̧ri̧ ma̧ȩ chjádë yürümȩ pio judide. Ado pio judi a̧dëri pio judiri aeno̧a̧ oa cjiadiäa̧de jibëa̧ mu̧i̧tjoi̧ pio ji̧ri̧ nö̧ta.

¹⁰ Ja̧dëa̧ ji̧ a̧dëräpȩmȩ ju̧i̧ ta̧rëa̧reconȩ to̧bari̧ ni̧bämȩ oa. Ja̧di ta̧rëri̧ yo̧mȩ oa ta̧rëa̧reconȩ: —Ütë tjamo̧ ja̧ chjätärea̧ üdë ma̧na̧na̧ra̧diibe yaba̧ —yo̧a̧dique—. Jabechji̧ jibëa̧ jauëchja pio oaiä chjätärea̧ yürüa̧diibe jibëa̧ pumȩ pio ji̧ri̧. Ado yaba̧ Ütë tjamo̧ judi mitëa̧ Chjätä Tänȩmȩ pio ju̧i̧ ja̧ chja̧oerä ano̧ mire cjo̧ro̧parea̧rȩ. Jabechji̧ pio ju̧i̧iäpȩmo̧ a̧dë chjäte tjamo̧ yo̧rea̧ yürüa̧dejȩ Ütë tjamo̧ judi. Ado pio ju̧i̧iä pio ju̧i̧ ja̧ chja̧oerä ano̧ mire cjo̧ro̧parea̧rȩ. Jabechji̧ quëna̧ji̧ri̧ pio ji̧ri̧iäpȩmo̧ ji̧dë ma poë aechideremȩ pio judi a̧dëri pio judiri aeno̧a̧ oa cjiade yaba̧. Aja̧, ibëa̧ oti̧ pio ji̧ri̧iäpȩmo̧ Ütë tjamo̧ ja̧ dëbëräpȩ ji̧dë ma poë aechideremȩ pio judi aeno̧a̧ oa cjiade. Do yoa, gȩnȩ yoa ji̧dë ma poë aechiderërea̧ ji̧, jabechji̧ aeno̧a̧ oa cjiade yaba̧ chö̧rimi̧ damȩ pio judi. Ado pio ju̧i̧iä yo̧requedemȩ. Ütë tjamo̧ ja̧ chjätärea̧ üdë ma̧na̧na̧ra̧diibe yaba̧.

¹¹ Jabechji̧ ibëa̧ oti̧ judiro̧ pio ju̧i̧ boadäräa̧diro̧jo̧ȩ. Tjamo̧ davä. Boadäräa̧diro̧jo̧ȩ Ichiae pio ju̧i̧. Oveja pëi̧ chjamȩmi̧ da pio ju̧i̧ ja̧ goera̧ pio ju̧ri̧ra̧ joa̧ oa cjiami̧ dari̧ cjia̧ oaiä, ado tjamo̧i̧ cjiari̧ baämȩ ma̧ȩ pio ju̧i̧ ji̧dë ma a̧ra̧ano̧a̧ oaiä, jabechji̧ boadärärea̧ daea̧diro̧jo̧ȩ. Jabechji̧ ja̧bopai̧ daräbo a̧ra̧ano̧rëreji̧ri̧dirȩ uapadëji̧ri̧rȩ.

¹² Ado pio ju̧i̧iä jabechji̧, airi̧ cjia airi̧ cjia a̧dopapea̧de yaba̧. Tjamo̧ davä. A̧dëräpȩ cjo̧ro̧ji̧ri̧ pio judiro̧ ütëborë ma̧ chiadëri̧ cjiari̧ a̧dopapea̧de Ichiae pio judi boadäräa̧ oa cjia tara, judi daburäpȩmo̧ aeno̧a̧ oa cjia tara. Jabo cjäri̧ madejȩrȩ jabo, goae tjamo̧dëpadejȩrȩ daburäpȩ cjo̧ro̧ji̧ri̧ pio ji̧ri̧iä. Jabechji̧ a̧dë chjäte uapai̧ da tjamo̧padejȩrȩ Ichiae judi. Jabechji̧ a̧dëri pio judiri ërecjia tjamo̧mȩrȩ acji bira̧dejȩrȩ daburopȩ cjo̧ro̧ji̧ri̧ pio ji̧ri̧iäpȩmo̧, ui ana̧ yuroro cjo̧ro̧ji̧ri̧ pio ji̧ri̧iäpȩmo̧. 'Jabechji̧ Ütërë ütara̧ do üdë acji ma̧na̧mi̧ dari̧ queri̧na̧ra̧dicoada, ado pio ju̧i̧iä a̧dë chjäte ërecjiamȩrȩ conȩdapaquiji̧ri̧da' quëna̧ dabamȩrȩ acji bira̧dejȩrȩ pumȩ ji̧ri̧.

¹³ Ado chö̧ri̧mi̧ damȩ pio judi na̧e chiapea̧rä, ‘Chia chia, daburäpȩmo̧ aeno̧a̧diro̧coada’ quëna̧ jo̧rȩtamȩpea̧rä, chjaodëri̧ järimȩpea̧de iei̧ pio ji̧ cho̧rë jäpea̧ ji̧, üi̧ boi̧ pio ju̧i̧ ararëreyi̧ pio ji̧.

¹⁴ Jabo goadi baärea̧ daea̧nȩ jabo. Iu pua boi̧dëmi̧ damȩ ja̧ pjö̧dato yo̧a̧ri̧ oa iei̧ ji̧iäpȩmo̧ yürüa̧ oaiä, goadi pjo̧a̧därärea̧ daea̧nȩ chiri maearäpȩ, dabu nȩgȩ maearäpȩ. Pio ju̧ri̧pȩ chjadëri̧ jida̧ oa cjiareyi̧nȩ tjarari̧ ui tjomo̧mi̧, chö̧ri̧mi̧ damȩ pio judi eami̧ oa japachea oa.

¹⁵ Jabo ja̧dëa ji chjö̧ri̧mi̧ damȩ pio ju̧i̧ ja̧ yari pio judiri uapai̧ dari̧ ca̧remȩde ma̧i̧ da ui üdë, iei̧ pio ji̧ ara baäpea̧ oa, jemu̧i̧ ja̧bo tänȩpea̧ oa.

¹⁶ Jabo dabu üdë chjadëri̧ a̧doa̧dejȩ iei̧ ji̧. Jabechji̧ ya yabë cjiami̧ dari̧ tuti japea̧dejȩ jibëa̧ yami̧ da oa chjaodëri̧, ui chjö̧na̧i̧ oa are cö̧a̧mi̧ dari̧ japapea̧ oa, chjö̧ri̧mi̧ damȩ ja̧ yari pio judiri ca̧mȩ ui pio ju̧i̧.

¹⁷ Ado pio ju̧i̧iä a̧dë chjäte ërecjiapea̧dejȩ iei̧ ji̧ chö̧ri̧mi̧ damȩ pio judi. Jabo cjäri̧ madejȩ, eami̧ oa japarea̧ dadëa̧dejȩ. Pio ju̧i̧iä ano̧ mire acji jäa̧dejȩrȩ iei̧ pio judiri ja̧ji̧ri̧ pio ji̧ri̧iäpȩmo̧. Tjamo̧ davä, Ütë tjamo̧ ja̧ ma̧ȩ oa ta̧rëdiäji̧ri̧ pio ji̧ri̧iäpȩmo̧, Jechurë yürüa̧ ma̧ȩ tjamo̧i̧ cjia oa ta̧rë japaji̧ri̧ pio ji̧ri̧iäpȩmo̧ ano̧ mire acji jäa̧dejȩrȩ.

¹⁸ Ado chjö̧ri̧mi̧ damȩ judi cjiaremȩde ui ana̧ yuroropȩ ju̧ri̧ dabu nȩgȩ marä.