Jechurë Na̧rȩrërea̧ Ma̧ȩ 11 - Biblia Pume

Ütërë ea jana̧ chjadüa̧ oa ni̧bäji̧ri̧ judiro̧ ja̧bepapadirȩ Ütë tjamo̧ ja̧ oa

¹ Ado cja̧rȩmȩrȩ yürüa̧ oa goaremȩrequede ütararea̧ to oa, tjätjäpë tai̧rea̧ tomi̧ da oa. Ja̧dëa ji̧ Ano̧mȩ judi ma̧ȩ oa yürüa̧dique: —Jävä —yo̧a̧dique—. Ca̧ bëräpȩ jävä pio ju̧i̧ chjadëri̧ ütarapea̧ oa. Ado yürürea̧ mechja pio ju̧i̧bo ütaratä earequedemȩ. Ado coaiäpȩmo̧ chjacjiamȩri̧ jo̧rȩtaji̧ri̧ pio ji̧ri̧bo ütaratä earequedemȩ. ‘Aja̧, ¿napai̧ ji̧radiro̧da, ca̧ bëräpȩ ju̧ri̧ a̧dopaji̧ri̧ judiro̧ ¿napai̧ ji̧ra̧diro̧da, pio coaiäpȩmo̧ chjacjiamȩri̧ jo̧rȩtaji̧ri̧ judiro̧ ja̧di ji̧ra̧diro̧da' quëna̧pea̧ oa ütaratä earequedemȩ. Jaevä. Jävä.

² Jabo pio ju̧i̧mo̧i̧ ütaradëpea̧de —yo̧a̧dique—. Ca̧ bë dairäpȩ tutia̧ oa cjiamȩ pio ju̧i̧ ataradëpea̧de. Jabechji̧ judiodë pio ji̧ri̧ ja̧de. Ado danȩ, pio judiro̧dirȩ. Judiodë pio judiro̧dirȩ conȩdapaji̧ri̧ judiro̧. Tjamo̧ davä. China̧chjari̧ tutia̧ oa cjiamȩ bë ma̧ri̧ pio ju̧i̧ boë cjaeä chjätämi̧ dari̧ conȩdapadiro̧jo̧ȩ. Aja̧, 42 gupënȩ nö̧ta, tjarari̧ ui tjomo̧ra̧ a̧de ma̧i̧ dari̧ japapadiro̧jo̧ȩ pio jiro bë ma̧ri̧ oa, cüdë china̧chjari̧ tutia̧ bë ma̧ri̧ pio ju̧i̧.

³ Jabo danȩ, chjadüparequedejȩrȩ pio coa chjiari ni̧bäpaji̧ri̧ pio ji̧ri̧, yo̧a̧ri̧ oa. Töca chiamȩ ina̧rea̧ oa ina̧ji̧ri̧ oa chjadüpaquedejȩrȩ. Ado pio cüdë ea jana̧ chjadüa̧ oa ni̧bäpadirȩ. Aja̧, cüdë chjadüa̧ ma̧ȩ pio ju̧i̧ ni̧bäpadirȩ tjarari̧ ui tjomo̧ra̧ a̧de. Aja̧, 1260 do nö̧ta ni̧bäpadirȩ, japamitë ana̧ nö̧ta. Aja̧, ja̧di ta̧rëri̧ yo̧a̧dique Ano̧mȩ judi.

⁴ Aja̧, pio jiro ni̧bäji̧ri̧ judiro̧ yo̧a̧ri̧rȩ chiri Ano̧mȩ pio ju̧i̧ ja̧ oa ja̧bepadirȩ. Jabechji̧ yo̧a̧ri̧ Orivo tomi̧ dari̧, yo̧a̧ri̧ tataparea̧ chiamȩ tomi̧ dari̧ cjiadirȩ Ütë pio ju̧i̧ ja̧ dëbëräpȩ.

⁵ Ado eami̧rȩ pio ji̧ri̧ conȩdatä järitarä judi, jabechji̧ pio ji̧ri̧ ja̧ yari pio judiri cjitëpade gärimȩ go̧a̧ti̧ üdë, pio jibë goëdëri̧ cjia daji̧ri̧ pio ji̧ri̧iäpȩmo̧ ja̧bo tänȩpea̧ oa, chjaodëri̧ tüe ja̧bo tänȩpea̧ oa. Jabechji̧ eami̧ pumȩ üdë pio ji̧ri̧iäpȩmo̧ conȩdatarä judi, ja̧di dari̧ tüe ja̧bo tänȩa̧ oa cjiapadȩ.

⁶ Jabechji̧ jauëchjaji̧ri̧rȩ cjo̧ro̧padirȩ, dami̧ti̧ conȩdarea̧ oa yürüpai̧ daji̧ri̧rȩ. Ado peaja̧di cjüdëparȩrea̧ chiapadirȩ. Ado ui oa goe mape baga tänȩrea̧ chiapadirȩ peaja̧di. Jabechji̧ judiro̧ a̧ra̧ano̧a̧ nö̧ta, eami̧ti̧ conȩdarea̧ra̧ japapai̧ dadiro̧jo̧ȩ chiri oa, pumȩ pio ji̧ri̧bo. Aja̧, jënȩro̧ tara̧mi̧ japapai̧ dadirȩ.

⁷ Ado judiro̧ Ütë tjamo̧ ja̧ ma̧ȩ oa nö̧tadäräri̧ a̧ra̧ano̧däräa̧rä, a̧dë chjäte puë urëdiri pio judiri go̧düpade ma̧i̧ darë, jadüchiami̧ ta chiamȩmi̧ da üdë. Ado pio judi acji jäpadejȩrȩ ni̧bäji̧ri̧ yo̧a̧ri̧ oa. Ado boadäräpadejȩrȩ. Ado ja̧dëa ji̧ ja̧bo tänȩpadejȩrȩ.

⁸ Ado ji̧ri̧ ja̧ icjararemȩ pio judi, jabechji̧ dairäpȩ a̧rȩpade. Aja̧, bë ma̧ri̧ ba chia tjamo̧räpȩ ju̧ri̧, Ano̧mȩ pio ju̧i̧ toro ja̧bo tänȩrërea̧ bë ma̧ri̧räpȩ pio ju̧ri̧ a̧rȩpade no̧ro. Pio jiro bë ma̧ri̧ pio ju̧i̧ chjiari ni̧bädirȩ pumȩ judiro̧. “Aja̧, Chodoma bë ma̧ri̧mi̧ dari̧ cjiade” yo̧dirȩ. “Ejito bë ma̧ri̧mi̧ dari̧ cjiade” yo̧dirȩ peaja̧di.

⁹ Ado pio jiro bë ma̧ri̧räpȩ cjo̧ro̧ji̧ri̧ pumȩ judiro̧ ütëbodärärë dae chjaopadiro̧jo̧ȩ jibëa̧ icjararemȩ oa, daburo a̧rȩji̧ri̧ oa. Chiri nö̧tai̧ oa cjo̧ro̧ji̧ri̧ judiro̧, ado cja̧rȩmo̧ jo̧rȩtarea̧ chiaji̧ri̧ judiro̧, ado cja̧rȩmo̧ ma̧ȩ oa ni̧bäji̧ri̧ judiro̧, ado cja̧rȩmo̧ taruri ja̧ pumȩ judiro̧ dae chjaopadiro̧jȩrȩ. Aja̧, tjarari̧ do tjomo̧ra̧ a̧de dae chjaopadiro̧jo̧ȩ jibëa̧ icjararemȩ oa. Ado ta̧dë cjararä chjadëri̧ idë a̧ra̧ oa cjiatärea̧ ji̧, cjäri̧ madiro̧jo̧ȩ, japadëpadiro̧jo̧ȩ jabo jabechji̧, dairä a̧rȩpade.

¹⁰ Ado danȩ, judiro̧ ja̧boa̧ oaiä, pumȩ pio ji̧ri̧iäpȩmo̧ ana̧ri̧ conȩdareji̧ri̧ pio judiro̧ ja̧boa̧ oaiä, jabechji̧ chiriräpȩti̧ oa cjo̧ro̧ji̧ri̧ pio judiro̧ a̧dë chjäte ma̧ chiadëri̧ cjiapadirȩ. Tjamo̧ davä. Ütërë ea jana̧ chjadüa̧ oa ni̧bäji̧ri̧ pio judiro̧ ja̧boa̧ oaiä cjatäcjie jo̧rȩtarea̧ dapadirȩ. Ado pio ju̧i̧iä airi̧ cjia airi̧ cjia a̧dopapadirȩ jibëa̧ dëbëti̧ra̧ chia eami̧ti̧ oa yürüpapea̧ oa, badëri̧ yürüji̧ri̧rȩ.

¹¹ Jabo cüdë jabë da nö̧ta, ja̧di dari̧ daea̧requede: Aja̧, tjarari̧ do tjomo̧mi̧ chjätä ëte, jabechji̧ Ütë tjamo̧ judi ado chjereno̧ bëdü tänȩa̧dejȩrȩ ja̧boa̧reji̧ri̧ pio ji̧ri̧. Aja̧, ja̧boa̧reji̧ri̧rȩ cjitëno̧a̧dirȩ. Ado pio ji̧ri̧ irä daea̧ji̧ri̧ pio judiro̧ a̧dë chjäte uapea̧dirȩ chjaodëri̧.

¹² Ja̧dëa ji̧ a̧dëri pio judiri ma̧na̧mȩ ma̧ȩ oa ta̧rëa̧diro̧jo̧ȩ. Tjamo̧ davä. Jibë to̧bari̧ ni̧bämȩ pio ju̧i̧ ta̧rëa̧diro̧jo̧ȩ Ütërë ea jana̧ chjadüa̧ oa ni̧bäji̧ri̧ judiro̧. Ado ja̧di ta̧rëri̧ yo̧a̧dejȩrȩ: —Ma̧na̧chji̧vä a̧dëräpȩmo̧ —yo̧a̧. Ado chjaodëri̧ bua̧dirȩ a̧dëräpȩmo̧. Pio jibë goëdëri̧ cjia goëdëri̧ cjia daji̧ri̧ pio ji̧ri̧ ja̧ dachoro bua̧dirȩ, go̧a̧ra̧ ërä cjiaji̧ri̧rȩ.

¹³ Ja̧dëa ji̧ chjaodëri̧ cjiarea̧mi̧dëpea̧de. Jabechji̧ a̧dë chjäte jö̧nö̧jö̧nö̧pai̧ cjiari̧ cjiamȩpea̧de chiri üdë, pumȩ no̧i̧dërë ja̧borea̧mi̧ dari̧. Aja̧, 7 mil pumȩ judiro̧ chjaodëri̧ ja̧boa̧dirȩ, a̧dë chjäte ji̧ra̧ tjamo̧rȩ. Ado Jerucharȩ bë ma̧ri̧ üdë ana̧ri̧ gu̧ro tänȩa̧ oa cjiami̧ dari̧ cjiadiäa̧de, pearärëremi̧dëri̧. Jabechji̧ bë ma̧ri̧remȩ üdë boi̧dë tjamo̧ri̧ cjiarërea̧ ji̧, jabechji̧ pënȩmi̧ darë gu̧roa̧de. Ado ja̧bodëa̧ pumȩ pio judiro̧ ana̧ri̧ jo̧rȩtaji̧ri̧pea̧dirȩ Ütë tjamo̧ pio ju̧i̧ chjiari, a̧dë chjäte uapaji̧ri̧rȩ. ‘A̧ja̧, a̧dëräpȩ cjiamȩ üdë a̧dë chjäte jauëchjamȩdida, uapai̧ da tjamo̧dida’ quëna̧ jo̧rȩtaji̧ri̧pea̧diro̧jo̧ȩ, dacho bëremi̧ cjiaji̧ri̧rȩ.

¹⁴ Aja̧, yo̧a̧ri̧ uapapai̧ dari̧ bape chjaorea̧ üdë chjätäa̧de. Jabo jabëde. Pjärämȩde. Cja̧rȩmȩrȩ pjärämȩde. Cja̧rȩmȩ pjurarea̧ üdë jabë pjärämȩde.

A̧dërämȩ ja̧ mu̧i̧tjoi̧ üdë pjura̧dejȩ cjiadiäa̧mȩ pjurarea̧ra̧

¹⁵ Ja̧dëa ji̧ ado cja̧rȩmo̧ mu̧i̧tjoi̧ üdë pjura̧dejȩ jibëa̧ pjurarea̧ra̧. Cja̧ȩta̧ra̧ ichiri cja̧rȩmȩ mu̧i̧tjoi̧rȩ jibëa̧ra̧ pjurarërea̧ ji̧, cjiadiäa̧mȩ pio judi pjura̧dejȩ jibëa̧ra̧. Ado a̧dëräpȩji̧ri̧ pio judiro̧ chjaodëri̧ ni̧bäji̧ri̧pea̧dirȩ to̧bari̧. Ado ja̧di ta̧rëri̧ yo̧a̧dirȩ: —Pio yaba̧ doro Ütë tjamo̧ judi tjamo̧ cjo̧ro̧mȩrȩ cjo̧ro̧pade daburäpȩ —yo̧a̧dirȩ—. Pumȩ ütëbodärärë pio ju̧i̧ ja̧ chja̧oerämo̧ cjo̧ro̧padirȩ, ja̧di dari̧ cjo̧ro̧dërërea̧ ji̧. Ado Chjätä Tänȩmȩ pio ju̧i̧ ja̧ chja̧oerä cjo̧ro̧padirȩ peaja̧di, Ütërë chjadüa̧ pio ju̧i̧ ja̧ chjaoerä. Jabechji̧ pio judiro̧ tjamo̧ cjo̧ro̧ji̧ri̧rȩ cjo̧ro̧padirȩ bucho ana̧, yuroparea̧ decjiari̧. Aja̧, ja̧di ta̧rëri̧ yo̧ji̧ri̧ oa ta̧rëa̧requedejȩrȩ.

¹⁶ Ado pio ju̧i̧ ta̧rëa̧ oaiä, tjamo̧ jidaji̧ri̧ judiro̧, 24rë, juchatura̧ tjätjäpë china̧däräa̧ maeadirȩ jibëa̧ daito oa daburäpȩ yuro. Jibëa̧ charea̧ ba chiaräpȩ chareji̧ri̧rȩ chjaodëri̧ japeno̧a̧dirȩ Ütë tjamo̧ ju̧i̧iäpȩmo̧, chjacjiamȩri̧ jo̧rȩtaji̧ri̧rȩ.

¹⁷ Ado Ütë tjamo̧ pio ju̧i̧iäpȩmo̧ yo̧a̧diro̧jo̧ȩ: “Aja̧, ibëa̧ Ütërenȩ. Ibëa̧ Ano̧mȩrenȩ. A̧dë chjäte jauëchjamȩ pio judirenȩ. Jabechji̧ peadëri ja̧ cjiamȩrenȩ taruparea̧ decjiamȩrȩ. ‘Ado chjadëri̧ japadida’ quëna̧ jo̧rȩtaji̧ri̧rȩ chjacjiamȩri̧ jo̧rȩtarea̧ro̧mȩ ibëa̧ Ütë. Jabechji̧ na̧ jauëchjara̧ pio ju̧ri̧ra̧ chiri tjamo̧ cjo̧ro̧mȩpea̧renȩ yaba̧, pumȩ ütëbodärärë na̧ chja̧oerämo̧ cjo̧ro̧pea̧ oa.

¹⁸ Jabo ërecjiapea̧dirȩ jabo. Chiriräpȩti̧ oa cjo̧ro̧ji̧ri̧ pio judiro̧ peaja̧di ërecjiapea̧dirȩ na̧ ërecjia̧ üdë ma̧na̧pea̧ do üdë querediä oaiä. Tjamo̧ davä. Mȩnȩ ja̧boa̧ji̧ri̧ pio ji̧ri̧ ütarë bape chjaopea̧ do üdë ma̧na̧na̧ra̧ oaiä, ma̧ cjüëtü tjamo̧ji̧ri̧rȩ ërecjiapea̧dirȩ, mȩnȩ acji tai̧a̧ oaiä. Jabo uapai̧ dari̧ bape chjaopea̧ pio ju̧i̧mo̧i̧ jo̧rȩtadërenȩ. Jabechji̧ na̧ mu̧i̧tjoi̧ pio ji̧ri̧bo jo̧rȩtarenȩ. Na̧ pumȩ pio ji̧ri̧iäpȩmo̧ yürüpea̧ pio ju̧i̧bo jo̧rȩtarenȩ. Ado pio ji̧ri̧iäpȩmo̧ yürüpea̧ ütara̧ do üdë, peaja̧di ma̧na̧na̧ra̧diibe. Tjamo̧ davä. Pio mȩaiäpȩmo̧ ba chia jo̧rȩtaji̧ri̧ pio ji̧ri̧iäpȩmo̧, Ütërë ea jana̧ chjadüa̧ oa ni̧bäji̧ri̧ pio ji̧ri̧iäpȩmo̧ yürüpea̧ japamitë üdë ma̧na̧diibe peaja̧di. Aja̧, pio ji̧ri̧iäpȩmo̧ ba ano̧pea̧ do üdë ma̧na̧diibe. Aja̧, pio mȩaiäpȩmo̧ uapami̧ dari̧ ba chia jo̧rȩtaji̧ri̧ pio ji̧ri̧ ütëbo oa peaja̧di ba ano̧parenȩjȩrȩ. Tjamo̧ cjo̧ro̧ji̧ri̧ pio ji̧ri̧iäpȩmo̧, ado mu̧i̧tjoi̧ pio ji̧ri̧iäpȩmo̧bo ba ano̧parenȩjȩrȩ. Jabo o ji̧ri̧iäpȩmo̧ ji̧dë ma conȩdareji̧ri̧ pio ji̧ri̧, o ji̧ri̧iäpȩmo̧ ji̧dë ma chjai̧dëri̧ japaji̧ri̧ pio ji̧ri̧ bape chjaopea̧ do üdë ma̧na̧diibe uapai̧ dari̧." Ja̧di ta̧rëri̧ yo̧ji̧ri̧rȩ yo̧reji̧ri̧dirȩ Ütë tjamo̧ ju̧i̧iäpȩmo̧ tjamo̧ yo̧ji̧ri̧ judiro̧ ta ütëbo jadüchiami̧rȩ, 24rë.

¹⁹ Ja̧dëa ji̧ chjaodëri̧ ano̧ mire daea̧reconȩ Ütë tjamo̧ ja̧ bë oa, a̧dëräpȩ cjiamȩ bë oa. Ado tuti cararea̧ joë ya üdë areia̧ oa cjiaremȩde, tjoräpȩmo̧ darea̧mi̧ dari̧. Ado daea̧reconȩ Ütë tjamo̧ ja̧ ma̧ȩ chiamȩ joë oa, ichi chjö̧na̧i̧ ma̧ȩ chiamȩ joë oa. Ja̧dëa ji̧ oëra̧ti̧ oa ma̧i̧ dari̧ bërepe chjaomȩpea̧de ti̧ma baäri̧. Jachipadäräri̧ dörö eari̧ baäremȩde ado cja̧rȩmo̧ no̧ oa, ado cja̧rȩmo̧ no̧ oa. Ado dabu üdë cjiarea̧mi̧dëri̧ jö̧no̧jö̧nö̧pai̧ cjiari̧ cjiaremȩde ado. Ado a̧dëri pio judiri acji cjatäa̧dejȩ daburäpȩmo̧ ui choco chacharë, uapai̧ darë. Aja̧, ja̧di dari̧ japea̧de Ütë tjamo̧ judi jibëa̧ bë ja̧ joë ya üdë areia̧ oaiä. Aja̧, ja̧di dari̧ na̧rȩa̧dique Ütë tjamo̧ judi. Ji̧dë duri oa na̧rȩpea̧ pio ju̧i̧ chjiari dabadëchea oa, ja̧di dari̧ na̧rȩa̧dique.