Jechurë Na̧rȩrërea̧ Ma̧ȩ 1 - Biblia Pume

Taruparea̧ Ma̧ȩ

¹ Juan pio judirequede. Ado Ütë tjamo̧ pio ju̧i̧ ja̧ mu̧i̧tjoi̧mȩrȩ go̧ȩparequede pio yoa ma̧ȩ oa. Jechu judi pio coaiäpȩmo̧ na̧rȩa̧ pio ju̧i̧ go̧ȩparequede, cja̧rȩmȩ co na̧rȩdërërea̧ pio ju̧i̧. Tjamo̧ davä. Pio yoa ma̧ȩ üdë Jechu Quiricho judi na̧rȩrërea̧ ma̧ȩ pio judide. Ütë tjamo̧ judi jiro ma̧ȩ oa Joja pio ju̧i̧ daba tänȩrëremȩdejȩ, judi jibëa̧ pumȩ pio ji̧ri̧iäpȩmo̧ ano̧ mire daba tänȩpea̧ oa. jibëa̧ mu̧i̧tjoi̧ pio ji̧ri̧iäpȩmo̧ daba tänȩpea̧ oa. Aja̧, judiro̧ dabadëchea oa, ma̧na̧pea̧ querediäa̧ japamitë pio ju̧i̧ chjiari dabadëchea oa, jabechji̧ Joja pio ju̧i̧ daba tänȩrëremȩdejȩ Ütë tjamo̧ judi. Ado pio ju̧i̧iä a̧dërimȩ mu̧i̧tjoi̧ pio ju̧i̧ chjadürëremȩdique Jechu judi. Pio coa ano̧ mire daba tänȩpea̧ oa, pio coa na̧rȩpea̧ oa chjadürëremȩdique.

² Ado cüdë daea̧ pio ju̧i̧ chjiari jabechji̧ chjadëri̧ go̧ȩpea̧reconȩ. Aja̧, cüdë daea̧ pio ju̧i̧ chjiari, cüdë dabapea̧ pio ju̧i̧ chjiari chjadëri̧ go̧ȩpea̧reconȩ. Danȩrȩ, pio yoa ma̧ȩ üdë Ütë tjamo̧ pio judiri ja̧de. Jechu Quiricho pio judi daba tänȩrërea̧ ma̧ȩde.

³ Pio yoa ma̧ȩ üdë cjiadiäa̧ japamitë pio ju̧i̧ chjiari ma̧ȩde. Pumȩ no̧i̧dërë chjätäpea̧ pio ju̧i̧ chjiari ma̧ȩde. Ado cüdë go̧ȩpea̧ üdë, jabechji̧ queri̧na̧ra̧mi̧ dari̧ ma̧na̧de. Ado eami̧ pumȩ üdë pio yoa ma̧ȩ oa go̧ȩ ni̧bärä judi, pio yoa ma̧ȩ oa ta̧rërä judi, jabechji̧ tjamo̧ri̧ a̧doa̧ oa cjiapade Ütë tjamo̧ pio ju̧i̧iä. Tjamo̧ davä. Pio yoa ma̧ȩ oa ta̧rëdiärä judi, tjamo̧ri̧ a̧doa̧ oa cjiapade Ütë tjamo̧ pio ju̧i̧iä.

Juan judi jearea̧ chjadürëremȩdejȩrȩ a̧doparea̧ pio ji̧ri̧iäpȩmo̧

⁴ Aja̧, Juan pio judi tjamo̧requede cüdë. Pio yoa ma̧ȩ oa go̧ȩpe chjadürequedejȩrȩ Quiricho ja̧ a̧doparea̧ oa, cja̧ȩta̧ra̧ ichiri yo̧a̧ri̧ buba oa, Achia quȩmȩ chiriräpȩ tjaoëpa a̧dopaji̧ri̧ oa. Ado pio dibë chjiari goë cjo̧dërequede Ütë tjamo̧ pio ju̧i̧iä. Tjamo̧ davä. Pearämȩ pio ju̧i̧iä, jabechji̧ cjiamȩ pio ju̧i̧iä, yuropadëmȩrȩ cjiamȩ pio ju̧i̧iä goë cjo̧dërequede pio dibë chjiari. Aja̧, pio dibëiäpȩmo̧ cjäri̧ri̧ cjiamȩrȩ yürütä goë cjo̧dërequede, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabo pio ju̧i̧iämo̧ cjo̧dëdërequede. Jabechji̧ Tjo tjamo̧ pio ju̧i̧iäbo goë cjo̧dërequede. Tjamo̧ davä, Tjo tjamo̧ pio ju̧i̧iä, Ütë ja̧ charea̧ ba chia ja̧ dëbëräpȩ cjiamȩ pio ju̧i̧iä, cja̧ȩta̧ra̧ ichiri yo̧a̧ri̧ na̧rȩrea̧ chiamȩ Tjo tjamo̧ pio ju̧i̧iä peaja̧di goë cjo̧dërequede pio dibë chjiari.

⁵ Ado Jechu Quiricho pio ju̧i̧iäbo goë cjo̧dërequede. Aja̧, Ütë ja̧ ma̧ȩ oa coëma cjiari̧ daba tänȩmȩ pio ju̧i̧iä, o ji̧ri̧ ja̧ yaboi̧ bëdüa̧ oa cjiamȩ pio ju̧i̧iä, ja̧boa̧remȩrȩ bëdüa̧ oa cjiamȩ pio ju̧i̧iäbo goë cjo̧dërequede, a̧dë chjäte tjamo̧ yo̧mȩ pio ju̧i̧iä, ado cja̧rȩmo̧rȩ nö̧tadärärea̧mi̧dëri̧ cjiamȩ Ütë pio ju̧i̧iä. Jabechji̧ pio ju̧i̧iäbo goë cjo̧dërequede, judi pio dibë cjäri̧ri̧ cjiamȩrȩ yürütä, mȩnȩro̧ ma̧ chjupi̧ cjiari̧ jo̧rȩtarea̧mi̧ dari̧. Jabechji̧ ji̧dë ma idami̧ dari̧ ea tjamo̧diibe Quiricho judi, eadëpe bagarea̧ decjiari̧. Ado pio ibë chjiari goe gu̧rori̧ ano̧ mire ja̧borërea̧ oaiä, jabechji̧ jare chjadüa̧ oa cjiami̧ dari̧ cjiarea̧rȩ yaba̧, a̧ro̧rȩ ibëa̧ icjararä chjai̧dërë yo̧a̧ chja̧oerä cjo̧ro̧chea oa.

⁶ Ado pio judi tänȩa̧ oa, jabechji̧ o ji̧ri̧ chjiari goë tuti ja̧bepaji̧ri̧ mapea̧rea̧rȩ yaba̧, pio ju̧i̧ ja̧ Ama̧i̧ Ütë ja̧ oa ja̧bepë yürüpea̧ oa. Ado pio ju̧i̧iä yo̧requededibe. Jabechji̧ Jechu Quiricho pio ju̧i̧iäpȩmo̧ a̧dë chjäte chjacjiamȩri̧ jo̧rȩtapea̧de bucho ana̧. Ji̧dë ma a̧dë chjäte ju chiarea̧ra̧ pio ju̧ri̧ra̧ ja̧bepatäde, tjamo̧ yo̧mȩrȩ. Ja̧ditäde.

⁷ Danȩrȩ, go̧a̧ra̧ ë oaiä ma̧na̧padiibe Jechu Quiricho judi. Ado ütëbodärärë irä dapadiro̧jo̧ȩ. Jibëa̧ icjara oa cjacjarë guarëreji̧ri̧ pio judiro̧borë irä dapadiro̧jo̧ȩ. Ado chiri nö̧tai̧ oa cjo̧ro̧ji̧ri̧ judiro̧, ado cja̧rȩmo̧ ma̧ȩ oa ni̧bäji̧ri̧ judiro̧ to̧bari̧ ejaro cjiaji̧ri̧rȩ dapadiro̧jo̧ȩ. ‘Aja̧, uapai̧ dari̧ bape chjaopadiibëda’ quëna̧ jo̧rȩtaji̧ri̧rȩ ejaro cjiapadirȩ. Aja̧, ütëbodärärë datädiro̧jo̧ȩ.

⁸ Ado Ano̧mȩ Ütë judi, a̧dë chjäte jauëchjamȩ pio judi, ja̧di ta̧rëri̧ yo̧de: “Pio cüdë pearä judirä pareaparërea̧ oaiä, jabechji̧ chjö̧na̧i̧rȩ taruparëremȩde. Pio coaiämo̧ taruparëremȩde. Ado yaba̧ pio cüdë tänȩa̧ oaiä, yuropea̧ oa cjiapade goarijädärärea̧mi̧ dari̧. Jabechji̧ pearämȩ pio judimȩrȩ cjiarequede yuropadëmȩrȩ cjiamȩ judi.” Aja̧, ja̧di ta̧rëri̧ yo̧de Ano̧mȩ Ütë judi.

Juan judi darëremȩdejȩ Jechu Quiricho ju̧i̧

⁹ Danȩrȩ, dibëa̧ omȩ pio judirequede cüdë. Juan pio judirequede. Pio dibë nö̧ta cjiami̧ dari̧ cjiarequede a̧ro̧rȩ Jechu pio judiri ja̧ mapea̧ tara. Ado ja̧di tara pio dibë nö̧ta conȩda̧ oa cjiarequede peaja̧di. Danȩrȩ, a̧ro̧rȩ Ütërë yo̧a̧ chja̧oerä cjo̧ro̧ji̧ri̧pea̧ oaiä, jabechji̧ chjai̧dë oa chjätärea̧rȩ. Jabo goae tjamo̧dë oa chjätäräbo, jabechji̧ chjuari̧ quëna̧rea̧rȩ Ütë tjamo̧ ju̧i̧ jaepeparea̧ decjiari̧. Danȩrȩ, ma̧i̧ dari̧ japea̧diro̧coe ca̧ oti̧. Pio coa jaepë ma̧ȩa̧diro̧coe. Jachi tjamo̧räpȩ jaepë ma̧ȩa̧diro̧coe cüdë Ütë tjamo̧ ja̧ ma̧ȩ oa a̧ra̧ano̧a̧ oaiä. Tjamo̧ davä. Ui ana̧ tjoro chamȩ chiriräpȩ tutimi̧ dari̧ jaepë ma̧ȩa̧diro̧coe, Patamo̧ quȩmȩräpȩ. Aja̧, ja̧di dari̧ japea̧diro̧coe cüdë Jechurë daba tänȩa̧ ma̧ȩ pio ju̧i̧ a̧ra̧ano̧a̧ oaiä. Ado pio jiro chiri tjaoëräpȩ cjo̧ro̧mȩpea̧requede yaba̧. Aja̧, pio yoa chiri tjaoëräpȩ ano̧ mire cjo̧ro̧mȩpea̧requede.

¹⁰ Ado danȩrȩ, ado cja̧rȩmo̧ doremȩrä a̧doparea̧ doremȩde. Quëna̧ji̧ri̧ judiro̧ Ano̧mȩ pio ju̧i̧iäpȩmo̧ chjacjiamȩri̧ jo̧rȩtarea̧ doremȩde. Ado pio jiro doro, jabechji̧ Tjo tjamo̧rȩ chi̧dëea̧ chja̧oeräremȩrequede. Ado chjaodëri̧ ca̧ duriri pio judiri ma̧na̧mȩ ma̧ȩ oa ta̧rëa̧reconȩ, pjurarea̧ üdë goae tarari̧ ea cjiami̧ ta̧rëri̧ ea cjiamȩ oa.

¹¹ Ja̧di ta̧rëri̧ yo̧mȩrȩ yo̧a̧dique: —Danȩ Juan, mȩnȩ dapea̧ pio ju̧i̧ chjiari go̧ȩpatä earequedemȩ go̧ȩ irä —yo̧a̧dique—. Ado mȩnȩ go̧ȩpa ëte, jabechji̧ chjadütä earequedemȩ ca̧ a̧doparea̧ ji̧ra̧ oa, cja̧ȩta̧ra̧ ichiri yo̧a̧ri̧ oa. Aja̧, Epjecho quȩmȩ bë ma̧ri̧räpȩ a̧doparea̧ pio ju̧i̧, Echimira quȩmȩ bë ma̧ri̧räpȩ a̧doparea̧ pio ju̧i̧, Pegamo quȩmȩ bë ma̧ri̧räpȩ a̧doparea̧ pio ju̧i̧ chjadütä earequedemȩ. Ado Tiatira quȩmȩ bë ma̧ri̧räpȩ a̧doparea̧ pio ju̧i̧, Charade quȩmȩ bë ma̧ri̧räpȩ a̧doparea̧ ju̧i̧, Pjiradëpjia quȩmȩ bë ma̧ri̧räpȩ a̧doparea̧ ju̧i̧, ado Daodichea quȩmȩ bë ma̧ri̧räpȩ a̧doparea̧ pio ju̧i̧ chjadütä earequedemȩ peaja̧di. Aja̧, Achia quȩmȩ chiriräpȩ tjaoëpa a̧dopaji̧ri̧ oa chjadütä earequedemȩ ma̧ȩ oa —yo̧a̧dique.

¹² Ado pio coaiäpȩmo̧ ni̧bämȩ judi ¿chjiacjivadi? quëna̧ jo̧rȩtamȩrȩ mire daea̧requede ca̧ duriräpȩmo̧. Ado cja̧ȩta̧ra̧ ichiri yo̧a̧ri̧ oa daea̧requede tataparea̧ chiamȩ to oa, oro maeara̧ japea̧ oa cjiaji̧ri̧ oa.

¹³ Ado tataparea̧ chiamȩ to chjarerä cjiamȩ ju̧i̧ daea̧reconȩ pumȩmi̧ da oa, chjibo go̧a̧ti̧ra̧ ina̧mȩ oa, jibëa̧ ta cararäpȩ yuro barari̧ ina̧mȩ oa. Ado orora̧ japea̧ oa cjiamȩ cada abürea̧mi̧ dara̧ cji̧däa̧ oa goaremȩde jibëa̧ maitoro.

¹⁴ Ado jibëa̧ cö̧ üdë a̧dë chjäte bërebëreai̧remȩde oveja cö̧mi̧ dari̧. Ado jibëa̧ dacho üdë, jabechji̧ cjo̧dërë goae tarari̧ gärimi̧ dari̧ cjiaremȩde.

¹⁵ Ado jibëa̧ ta üdë tatari̧ baäremȩde. Danȩrȩ, boro̧che quȩmȩ chjipararira̧ ja̧bepea̧ oaiä, ma̧i̧ dari̧ cjüëtü tänȩ oaiä, jabechji̧ tatari̧ cjiade. Peaja̧dimi̧ dari̧ tatari̧ cjiaremȩde jibëa̧ ta üdë. Ado judi ni̧bäa̧ ma̧ȩ üdë bea ui üdë curë uë tjamo̧ri pio judiri ca̧mi̧ ta̧rëri̧ ea cjiaremȩde, mai̧ dari̧ eamȩrȩ.

¹⁶ Ado jibëa̧ mu̧i̧ chjuari ja̧ ichirä goaremȩde cja̧ȩta̧ra̧ ichiri yo̧a̧ri̧ büë oa. Ado jibëa̧ yari pio judiri go̧düa̧ oa cjiaremȩde coana̧rea̧ jujui̧ üdë, dëbëribo jo̧dë chiamȩ coana̧rea̧ go̧a̧ti̧ üdë. Ado jibëa̧ chamacho üdë, jabechji̧ do üdë, dorë tjomo̧ro goae tarari̧ tatami̧ dari̧ tataremȩde.

¹⁷ Ado cüdë pio ju̧i̧ daea̧ ji̧, jabechji̧ ja̧boa̧mȩmi̧ dari̧ toboe china̧däräa̧requede daburo, pio ju̧i̧ ja̧ ta cotoräpȩ ju̧ri̧. Jabo mu̧i̧ chjuari ja̧ ichira̧ pio ju̧ri̧ra̧ ida̧dique. Ado yo̧a̧dique: —Uapadëvä —yo̧a̧dique—. Uapadëvä. Jabechji̧ pearämȩ pio judimȩrȩ cjiarequede yuropadëmȩrȩ cjiamȩ üdë —yo̧a̧dique—.

¹⁸ Cjo̧ro̧rea̧ yürümȩ pio judirequede. Ja̧boa̧rëremȩrȩ bëdüa̧requede davä bucho ana̧ cjo̧ro̧pea̧ oa. Danȩ, ja̧borea̧ üdë ca̧ mu̧i̧tjoi̧mi̧ dade. Ca̧ chja̧oerä cjiami̧ dari̧ cjiade. Ado joë ya coërea̧ oa goarequede ja̧boa̧ji̧ri̧ judiro̧ tutia̧ oa cjiamȩräpȩ arë goëpea̧ oa, chjuari̧ tuti carapea̧ oa.

¹⁹ Pio ju̧i̧iä yo̧requedemȩ. Go̧ȩpavä. Mȩnȩ pio yabo daea̧ pio ju̧i̧ go̧ȩpavä. Ado mȩnȩ dapea̧ pio ju̧i̧ chjiaribo go̧ȩpatä earequedemȩ duri oa cjiadiäa̧mȩ pio ju̧i̧.

²⁰ Ado mȩnȩ, goadia̧ oa cjiarëremȩ pio ju̧i̧ chjiari dabadëchea oa, jabechji̧ chjadëri̧ yo̧parequedemȩ yaba̧ cja̧ȩta̧ra̧ ichiri yo̧a̧ri̧ büë pio ju̧i̧ chjiari, mȩnȩ ca̧ mu̧i̧ chjuari ja̧ ichirä daea̧ pio ju̧i̧ chjiari. Ado cja̧ȩta̧ra̧ ichiri yo̧a̧ri̧ tataparea̧ chiamȩ to pio ju̧i̧ chjiari, oro maeara̧ japea̧ pio ju̧i̧ chjiari, peaja̧di chjadëri̧ yo̧parequedemȩ. Danȩ, pio jiro tataparea̧ chiamȩ to üdë, jabechji̧ ca̧ a̧doparea̧ pio judide. Cja̧ȩta̧ra̧ ichiri yo̧a̧ri̧ a̧doparea̧de. Achia quȩmȩ chiriräpȩ a̧doparea̧de. Ado ca̧ ichirä goa̧ büë üdë, cja̧ȩta̧ra̧ ichi yo̧a̧ri̧rȩ, jabechji̧, mu̧i̧tjoi̧dirȩ. Cja̧ȩta̧ra̧ ichiri yo̧a̧ri̧ mu̧i̧tjoi̧dirȩ. Ca̧ a̧doparea̧ pio ji̧ri̧ tjamo̧ jidaji̧ri̧ pio judiro̧dirȩ —yo̧mȩrȩ ni̧bä chjaoremȩdique pumȩmi̧ da cjiamȩ judi.