Urëdi oa jo̧rȩta tänȩrea̧ Ma̧ȩ 23 - Biblia Pume

^13-14 Na̧ ja judi ta̧rëdiädërä judi, jabechji̧ bide cjaeämȩrȩ dabapa tänȩjo̧ȩ jabë dabaparea̧mi̧ damȩ oa. Aja̧, judi aeno̧a̧ oa cjiachea oa järimȩrȩ dabapa tänȩjo̧ȩ nȩmȩparea̧ decjiari̧. Ado oëra̧ jo̧rȩtadëvä. 'Jabo cjäri̧ madida, ca ja üdë bide cjaeärea̧mi̧dëdida, pio ju̧i̧ bide cjaeärä judi ja̧bopai̧ da jirodida' quëna̧ jo̧rȩtadëtäremȩrenȩ. Pio ju̧i̧iä ja̧bopa ma ja̧didë.

¹⁹ Danȩ ca̧ ja, chjadëri̧ ta̧rëcoe. Urëdi tjamo̧ oa jo̧rȩtavä. Chjadëri̧ ütarë jo̧rȩta ëte, 'Aja̧, ja̧di dari̧ cjo̧ro̧täremȩquëda' quëna̧ jo̧rȩtatäremȩrenȩ oëra̧ jo̧rȩtarea̧ decjiari̧.

²⁰ Ado danȩ, ërü goaraji̧ri̧ pio ji̧ri̧ nö̧ta ëba cjiadëchji̧jȩrȩ. Bino quȩmȩ ërü oa ji̧dë ma jaratämi̧ cjiaji̧ri̧ pio ji̧ri̧ nö̧ta ëba cjiadëchji̧jȩrȩ. Ado peaja̧di dari̧ japatäremȩrenȩjȩrȩ a̧dë chjäte juratämi̧ cjiaji̧ri̧ pio ji̧ri̧. Jabechji̧ ëba cjiadëchji̧jȩrȩ.

²¹ Danȩ, ërü goaramȩ judi, ji̧dë ma yu̧i̧mȩrȩ cjo̧ro̧mȩ pio judi, chjö̧na̧i̧ti̧ oa cjäri̧ ja̧bomȩrȩ cjiadiäpade chjaodëri̧. Ado eami̧ pumȩ üdë mo̧a̧rea̧ pio ju̧i̧mo̧i̧ jo̧rȩtarä judi, jurarea̧ pio ju̧i̧mo̧i̧ jo̧rȩtarä judi, peaja̧di mö̧na̧ tjamo̧mȩrȩ cjiadiäpade chjaodëri̧. Pio ju̧i̧iä yo̧requedemȩ. Jabechji̧ ëba cjiadëchji̧jȩrȩ.

²² Ba chia dajȩrȩ mȩa nö̧riji̧ri̧ pio ji̧ri̧. Mȩa nö̧rimȩ pio ju̧i̧ chja̧dëri̧ ta̧rëdiäjo̧ȩ. Ado mȩa arayi̧ pio ji̧, jabechji̧ ji̧dë ma ba chia dajȩ. Ji̧dë ma chjadëri̧ ni̧bäjȩ ütai̧ tjamo̧pea̧räbo.

²³ Danȩ ca̧ ja, tjamo̧i̧ cjiari̧ baämȩ jo̧rȩtarea̧ üdë ba chia tjamo̧de. Ado urëdi tjamo̧ oa jo̧rȩtarea̧ üdë peaja̧di ba chia tjamo̧de. Ado dabaparea̧ üdë ba chiade peaja̧di. Ado chjadëri̧ ütarë jo̧rȩta ëte japarea̧ üdë peaja̧di ba chiade. Tjamo̧ davä. Ba chia tjamo̧de. Ado danȩ, ja̧di dari̧ jo̧rȩtarea̧ üdë chërera̧ gatërea̧mi̧ darä judi, jabechji̧ chjadë tjamo̧täremȩde ji̧ra̧ tjamo̧ oa gatëpea̧ ji̧. Jabo cjäri̧ made, chërera̧ pio ju̧ri̧ra̧ gatërea̧mi̧ dëde. Ado peaja̧di gatë tänȩrea̧mi̧dëde. Jabo gatë tänȩrea̧mi̧ darä judicjȩ, cjäri̧ marenȩ, gatë tänȩdëtäremȩrenȩ. Jabechji̧ ba chia tjamo̧ tara, acji mitëmi̧ dari̧ goapea̧ tara, jabechji̧ gatë tänȩdëtäremȩrenȩjo̧ȩ. Jabechji̧ china̧chjami̧ dade. Ji̧dë ma chjadëri̧ boeapea̧de. Chjadëri̧ jidapea̧de. Tjamo̧ davä. Ja̧di dari̧ jo̧rȩtarea̧ üdë acji mitëmi̧ dari̧ boeapea̧de bucho ana̧. Jabechji̧ mȩnȩ mö̧na̧mi̧ dari̧ cjiachea oa, chjadëri̧ boeapea̧de. Chjadëri̧ jidapea̧de.

²⁴ Ado danȩ, coëma cjiari̧ cjo̧ro̧mȩ pio judi ma̧ chiadëri̧ cjiari̧ jo̧rȩta tänȩpadejȩ jibëa̧ ama̧i̧ ju̧i̧. 'Aja̧, ca̧ jadica̧da, coëma cjiari̧ cjo̧ro̧dida' quëna̧ jo̧rȩtamȩrȩ ma̧ chiadëri̧ cjiamȩrȩ dapadejȩ.

²⁵ Tjamo̧ davä, mȩnȩ coëma cjiari̧ cjo̧ro̧ro, jabechji̧ ma̧ chiadëri̧ cjiari̧ jo̧rȩtarea̧mi̧ dari̧ cjo̧ro̧ tänȩparenȩjȩrȩ mȩa nö̧rimȩ pio ju̧i̧, mȩa yo̧riyi̧ pio ji̧bo. Ado pio ju̧i̧iä yo̧requedemȩ. Jabechji̧ mȩa arayi̧ pio jini̧ ma̧ chiadëri̧ cjia tjamo̧yi̧rȩ cjo̧ro̧tänȩ pio mȩnȩ coëma cjiari̧ cjo̧ro̧a̧ oaiä.

²⁶ Danȩ ca̧ ja, chjadëri̧ ta̧rë ja̧bocoe a̧dë jo̧retarea̧ decjiari̧. Pio coa chjadëri̧ cho̧rëdiätä earequedemȩ.

²⁷ Danȩ, üi̧ goarayi̧ iei̧ pio jini̧ uapai̧ da tjamo̧nȩ. Böa mitërea̧ puëmi̧ danȩ. Puë urëdi tjamo̧mi̧ danȩ. Ja̧bo tänȩmi̧ dari̧ japapai̧ dani̧ibe.

²⁸ Garüyi̧mi̧ dari̧ goadi jidatanȩ iei̧ chiamȩ üi̧ pio ju̧i̧ oëra̧diä tänȩpea̧ oa. Aja̧ ca̧ ja, na̧e chia tjamo̧vä.