Pjiripo Ma̧ȩ 3 - Biblia Pume

Ütë tjamo̧ pio judi tänȩa̧ oa jabechji̧parȩa̧ oa cjiaji̧ri̧pea̧rea̧rȩ

¹ Ca̧ oti̧, a̧de go̧ȩparea̧ chiamȩrȩ go̧ȩpe chjadürequededibe ji̧dë uëri. Danȩrȩ, mȩnȩro̧ dibëa̧ Ano̧mȩ pio judiri ja̧ji̧ri̧ tara, jabechji̧ ji̧dë ma ma̧ chiadëri̧ cjiaji̧ri̧rȩ cjo̧ro̧chji̧vä. Cüdë dibë no̧mȩ go̧ȩparërea̧ pio ju̧i̧ ado chjereno̧ go̧ȩpe chjadürequededibe. 'Jabechji̧ ja̧di dari̧ japapea̧ üdë pio coaiä goeadëdicoada' quëna̧dë tara, jabechji̧ go̧ȩpe chjadürequededibe ado chjereno̧, mȩnȩro̧ to̧bari̧ cjiapea̧ oa, dibëa̧ chji̧ üdë chjadëri̧ jida̧ oa cjiapea̧ oa.

² Na̧e chiachji̧vä. Danȩrȩ, o judiro̧ chjadëdëdirȩ. Uapai̧ da tjamo̧dirȩ. Aure chjuamȩmi̧ dadirȩ. Jabechji̧ oëra̧ a̧ra̧ano̧dirȩ. 'Aja̧, budoa̧ oa cjia̧ pio oaiämo̧i̧ Ütë tjamo̧ ja̧ pumȩpe järea̧ daa̧ro̧da' quëna̧tä a̧ra̧ano̧tadiro̧dibe.

³ Jabo cjäri̧ madirȩ, chjadëri̧ a̧ra̧ano̧dëdirȩ. Danȩrȩ, tjamo̧ri̧ budoa̧ oa cjiami̧ dari̧ cjiaji̧ri̧ pio judiro̧rea̧rȩ a̧ro̧rȩ coëma cjiari̧ quëna̧ji̧ri̧pea̧ tara. Ado Tjo tjamo̧ pio judi a̧doa̧ oaiä, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧ pio judiro̧ tjamo̧rea̧rȩ. Jabechji̧ Jechu Quiricho judi pio ibë chjiari tuti japea̧ pio ju̧i̧iämo̧i̧ ma̧ chiadëri̧ cjiari̧ jo̧rȩtarea̧rȩ. 'Jabechji̧ a̧ro̧rȩ pumȩ chjadë tara Ütë tjamo̧ ja̧ pumȩpe järea̧ dapai̧ daa̧ro̧da' quëna̧ jo̧rȩtadë marea̧rȩ.

⁴ Jabo danȩrȩ ca̧ oti̧, cüdë ja̧di dari̧ quëna̧rä judicjȩ, 'Aja̧, cüdë chjadëri̧ japea̧ pio ju̧i̧iä Ütë tjamo̧ ja̧ pumȩpe järea̧ dapai̧ daquëda' quëna̧rä judicjȩ, dëdë, ba chia jo̧rȩtatäremȩreconȩ cüdë japea̧ pio ju̧i̧, cüdë cjo̧ro̧a̧ pio ju̧i̧. Ado eami̧ pumȩrȩ quëna̧rä judi, 'Jaeboquëda, cüdë pumȩ chjadë tara Ütë tjamo̧ ja̧ pumȩpe jäpai̧ daquëda' quëna̧rä judi, cjäri̧ made, judi japea̧ pio ju̧i̧iä ji̧dë u̧i̧ chjadëri̧ japea̧requede pio cüdë. Jabechji̧ ado cja̧rȩmo̧rȩ japea̧ üdë nö̧tadëtäremȩdique. Jabechji̧ a̧dë chjäte japea̧requede.

⁵ Ado mȩnȩro̧ dabadëchea oa, jabechji̧ chjadëri̧ ütarë yo̧parequededibe. Danȩrȩ, ca̧ taru judiro̧ ebereo maeadirȩ. Ado coa nö̧riji̧ri̧ pio judiro̧ peaja̧di ebereo chja maeadirȩ. Ado cüdë ca̧i̧ta̧ra̧ ichiri tjarari̧ do goapea̧mȩ oa budoa̧diro̧coe ütara̧ doro. Ado danȩrȩ, Jacobo joja pio judiri ja̧mȩrequede cüdë. Bejami̧ quȩmȩ pio judiri ja̧mȩrequede. Ado pio ju̧i̧iä icharaita chja tjamo̧requede. Ado cüdë pjaricheo tara, jabechji̧ Moicherë go̧ȩparërea̧ ma̧ȩ pio ju̧i̧ järi tjamo̧mȩrȩ ta̧rë ta̧rë japarëremȩreconȩ, o judiro̧ coa aechide yo̧rea̧mi̧dëri̧. "Aja̧, Pablo judi pio jiro ma̧ȩ oa nö̧tadäräri̧ ta̧rë ta̧rë japadëmȩde” yo̧rea̧mi̧dëri̧ cjo̧ro̧rëremȩrequede.

⁶ Ado cüdë pio jiro ma̧ȩ oa chjuari̧ quëna̧ oaiä, 'ado Quiricho ja̧ quȩrä a̧dopaji̧ri̧ judiro̧ pio jiro ma̧ȩ oa jiadadiro̧da' quëna̧ jo̧rȩta̧ oaiä, jabechji̧ järimȩrȩ conȩdae chjaorëremȩrequedejȩrȩ, a̧dë chjäte oëadëri̧ cjiamȩrȩ. Aja̧, ja̧di dari̧ japea̧requede pio jiro ma̧ȩ oa chjuari̧ quëna̧mȩrȩ, pio jiro ma̧ȩ oa chjadëri̧ ta̧rëdiämȩrȩ. O judiro̧, 'Aja̧, Pablo judi nö̧tadäräri̧ ta̧rëdiädëmȩdida' quëna̧ji̧ri̧rȩ aechide yo̧rea̧mi̧dëri̧ ta̧rëdiäa̧reconȩ davä. Aja̧ ca̧ oti̧, ja̧di ta̧rëri̧ ütarë jo̧rȩtamȩrȩ yo̧requededibe cüdë cjo̧ro̧rërea̧ pio ju̧i̧, cüdë japea̧ pio ju̧i̧.

⁷ Jabo cjäri̧ made ca̧ oti̧, ba chiadë maeade. 'Jabechji̧ ba chiadida' quëna̧rërea̧ ji̧, 'ja̧di dari̧ cjo̧ro̧rërea̧ üdë ba chia tjamo̧dida' quëna̧rërea̧ ji̧, ja̧di dari̧ quëna̧dëmȩpea̧requede yaba̧. Jabo Quiricho pio ju̧i̧ daba̧ üdë, dëdë, ba chia tjamo̧de. Ado pio ju̧i̧ tjamo̧ri̧ jo̧rȩtamȩpea̧requede yaba̧.

⁸ Tjamo̧ davä. 'Cüdë cjo̧ro̧rërea̧ üdë ba chiadë madida, icharaita chjarë ara̧ oa cjia̧ üdë ba chiadë madida, cüdë jo̧rȩtarërea̧ üdë badë madida, jabechji̧ pio coa chjätä tänȩpea̧ ji̧ nö̧tadë madida, eami̧ti̧ japea̧ üdë badë madida, jabechji̧ ami̧ da maea oa aeno̧cuni̧da, jabechji̧ ca̧ Ano̧mȩ Jechu Quiricho pio ju̧i̧ daba̧ üdë a̧dë chjäte ba chiadida' quëna̧ jo̧rȩtamȩpea̧requede Quiricho pio ju̧i̧ ja̧ pumȩpe jäpea̧ oa.

⁹ 'Aja̧, cüdë ca̧ea̧ ma̧na̧ri̧ japea̧ oaiä jabechji̧quëda' quëna̧rërea̧ ji̧, 'Moicherë go̧ȩparërea̧ ma̧ȩ pio ju̧i̧ ta̧rëdiäa̧ oaiä jabechji̧ chjadëquëda' quëna̧rërea̧ ji̧, ja̧di dari̧ quëna̧dëmȩpea̧requede yaba̧. Jabechji̧ Quiricho pio ju̧i̧mo̧i̧ quëna̧requede. Ado Quiricho pio ju̧i̧ quëna̧ oaiämo̧i̧ jabechji̧parȩa̧dique Ütë tjamo̧ judi.

¹⁰ Ado yaba̧ jabechji̧, Quiricho pio ju̧i̧ ji̧dë u̧i̧ dabatämi̧ cjiareconȩ, uëmo̧ uëmo̧ jo̧rȩtarea̧ decjiari̧. Ado bëdüa̧ oa cjiarëremȩ pio ju̧i̧ ja̧ ju chiarea̧ maeara̧ cjo̧ro̧tämi̧ cjiarequede ca̧ea̧dë maeara̧. Ado judi conȩda̧ oa cjo̧ro̧rërea̧mi̧ cjo̧ro̧tämi̧ cjiarequede peaja̧di, pio ju̧i̧ cho̧rëdiämȩrȩ. Danȩrȩ, jënȩ ja̧boa̧rä yuro ta̧rëdiärëremȩdejȩ Ütë tjamo̧ ju̧i̧. Peaja̧dimi̧ dari̧ ta̧rëdiätämi̧ cjiareconȩ ja̧bopai̧ dari̧ cjiamȩborë.

¹¹ Ado cüdë ja̧borä, 'jabechji̧ pio judi bëdüa̧mi̧ bëdüpaquëda' quëna̧ jo̧rȩtarequede.

Järi tjamo̧pea̧ chiarea̧rȩ üi̧padärämi̧ dari̧ cjo̧ro̧pea̧ oa

¹² Jabo jabërequede ca̧ oti̧, Quiricho pio ju̧i̧ nö̧tadäräri̧ dabadëreconȩ. Jechu Quiricho pio ju̧i̧ nö̧tadäräri̧ cho̧rëdiädëreconȩ. Jabo danȩrȩ, cüdë nö̧tarä yuro chjadëri̧ cho̧rëdiätämi̧ cjiareconȩ nö̧tadäräri̧ cho̧rëdiäpea̧ oa. Jabechji̧ pio coa mitëa̧ tara, pio jënȩmi̧ dari̧ cjiape jäpea̧ oa mitëa̧ tara, jabechji̧ ji̧dë u̧i̧ järimȩrȩ cho̧rëdiätämi̧ cjiareconȩ.

¹³ Jabo cjäri̧ marequede ca̧ oti̧, 'Jechu pio ju̧i̧ nö̧tadäräri̧ cho̧rëdiämȩrȩ cjo̧ro̧quëda, oëra̧diädëmȩrȩ cjo̧ro̧quëda' quëna̧dërequede jabo jabechji̧, cüdë nö̧tarä yuro tjätjäpë baguramȩmi̧ dari̧ cho̧rëdiäreconȩ duriräpȩmo̧ mire darea̧ decjiari̧. Tjamo̧ davä. Goae tarari̧ baguramȩmi̧ dari̧ cjo̧ro̧requede ca̧ duriräpȩmo̧ mire darea̧ decjiari̧, cüdë pearä japea̧ duri pio ju̧i̧ ana̧ri̧ jo̧rȩtarea̧ decjiari̧.

¹⁴ Jabechji̧ tjätjäpë baguramȩmi̧ dari̧ cjo̧ro̧requede, Quiricho pio ju̧i̧ nö̧tadäräri̧ cho̧rëdiäpea̧ pio ju̧i̧mo̧i̧ jo̧rȩtamȩrȩ. Tjamo̧ davä. Quiricho pio ju̧i̧ cho̧rëdiäpea̧ pio ju̧i̧mo̧i̧ jo̧rȩtamȩrȩ cjo̧ro̧requede. Jabechji̧ ji̧dë u̧i̧ järimȩrȩ cho̧rëdiätämi̧ cjiareconȩ cüdë ja̧boa̧rä yuro. Ja̧dëa ji̧ ütara̧ doro Ütë tjamo̧ judi ëna̧diäpadique cüdë a̧dëräpȩ baäpea̧ ji̧, pio jȩa nö̧ta bucho ana̧ ëba cjo̧ro̧pea̧ ji̧. Jabechji̧ Jechu Quiricho pio judiri ja̧ tara, bucho ana̧ cjo̧ro̧parequede a̧dëräpȩ ju̧ri̧.

¹⁵ Ja̧di tara a̧ro̧rȩ ütëborë, üi̧padäräa̧mi̧ dari̧ cjo̧ro̧ji̧ri̧ pio judiro̧, jabechji̧ Quiricho pio ju̧i̧mo̧i̧ cho̧rëdiäpea̧ ji̧ jo̧rȩtaji̧ri̧rȩ cjo̧ro̧täreji̧ri̧rea̧rȩ. Ado eami̧ pumȩ üdë Quiricho pio ju̧i̧ cho̧rëdiäpea̧ ji̧ jo̧rȩtadëmȩrȩ cjo̧ro̧rä judi, jabechji̧ Ütë tjamo̧ pio judi chjadëri̧ jo̧rȩta tänȩpadejȩ judi coëma cjiari̧ jo̧rȩtapea̧ oa.

¹⁶ Danȩrȩ ca̧ oti̧, a̧ro̧rȩ dabapea̧ ma̧ȩrä cjo̧ro̧ matäreji̧ri̧rea̧rȩ. Aja̧, Ütë tjamo̧ judi ibë daba tänȩa̧ ma̧ȩrä chjadëri̧ tüdüa̧mi̧ darä cjo̧ro̧ matäreji̧ri̧rea̧rȩ. Ja̧di dari̧ cjo̧ro̧pea̧ üdë ba chia tjamo̧de.

¹⁷ Danȩrȩ ca̧ oti̧, mȩnȩro̧ ütëborë cja̧rȩmȩ chji̧ chiami̧ dari̧ cho̧rëdiächji̧coe. Ado pio cüdëmi̧ dari̧ cjo̧ro̧ji̧ri̧ pio ji̧ri̧ chjadëri̧ ütarë dachji̧jȩrȩ. Jabechji̧ pio ji̧ri̧bo cho̧rëdiächji̧jȩrȩ.

¹⁸ Jabo o ji̧ri̧ cho̧rëdiädëpea̧dirȩ jabo. Jabechji̧ chjai̧dëri̧ cjo̧ro̧dirȩ. Quiricho pio ju̧i̧ dëbëpe chjaoji̧ri̧rȩ cjo̧ro̧dirȩ. "Aja̧, Quiricho ju̧i̧ quëna̧rea̧ro̧jo̧ȩ" yo̧ji̧ri̧rȩ cjo̧ro̧dirȩ, jabo cjäri̧ madirȩ, ma̧ȩ ba chia oa jiadadirȩ. Aja̧, "Quiricho judi toro ibë chjiari ano̧ mire ja̧boa̧ pio oaiä chjai̧dë ja̧ chja̧oeri judiri go̧dürea̧ daea̧rea̧rȩ" yo̧mȩ a̧ra̧ano̧rea̧ ma̧ȩ pio ju̧i̧ jiadaji̧ri̧rȩ cjo̧ro̧dirȩ. Aja̧ ca̧ oti̧, pio ji̧ri̧ chjiari co ji̧ra̧ri̧ ma̧ȩ yürüa̧requededibe. Ado yaba̧ ado chjereno̧ ma̧ȩ yürü chjadürequededibe pio ji̧ri̧ chjiari, ejaro cjiapai̧ tarari̧ jo̧rȩtamȩrȩ.

¹⁹ Jabechji̧ a a ma cjiarea̧räpȩ aeno̧a̧ oa cjiapadirȩ jënȩro̧ ma̧i̧ dari̧ japea̧ oaiä. Jabechji̧ jibëa̧ icjararä chjai̧dë pio ju̧i̧ ütëmi̧ da oa ta̧rëdiä chjaodiro̧jo̧ȩ, idi̧ da maea oa japaji̧ri̧rȩ. Jënȩro̧ chjai̧dëri̧ jo̧rȩta̧mi̧ jape chjaodirȩ. Ado judiro̧ ma̧i̧ dari̧ japea̧ oaiä idëri̧ cjiatärea̧ ji̧, oëadëji̧ri̧ maearë jape chjaodirȩ, idëri̧ cjiarea̧ taradëji̧ri̧rȩ. Jabechji̧ judiro̧ chjai̧dëri̧ japea̧ pio ju̧i̧ chjiari goaeri̧ yo̧ chjaodirȩ jibëa̧ chji̧rämo̧ jo̧rȩtaji̧ri̧rȩ. Dai chirirä ja̧ maea oa jo̧rȩtaji̧ri̧rȩ cjo̧ro̧dirȩ.

²⁰ Jabo danȩrȩ ca̧ oti̧, pio a̧ro̧rȩ a̧dëriji̧ri̧rea̧rȩ. A̧dëräpȩ a̧rȩmȩ chiri oa mitëa̧ oa goaji̧ri̧rȩ cjo̧ro̧rea̧rȩ. Ado a̧dëri pio judiri jana̧pamȩ pio ju̧i̧ jidataji̧ri̧rȩ cjo̧ro̧rea̧ro̧jo̧ȩ pio ibë Chjätä Tänȩmȩ pio ju̧i̧, Ano̧mȩ Jechu Quiricho pio ju̧i̧.

²¹ Ado pio judi jana̧rä, chjö̧na̧i̧däräti̧rȩ pio ju̧i̧ ja̧ chja̧oerämo̧ cjiadiäpade pio judi tänȩa̧ oa. Jabechji̧ judi a̧dë chjäte jauëchja tara, ja̧di dari̧ japarea̧ dapade. Ado pio jiro jauëchjara̧ pio ju̧ri̧ra̧ chjadëri̧ jëdano̧padejȩ ibëa̧ icjararemȩ pio ju̧i̧. Aja̧, jibëa̧ icjarami̧ dape järea̧mi̧ dari̧, bucho ana̧ cjo̧ro̧rea̧mi̧ dari̧ jëdano̧padejȩ a̧dëräpȩ go̧düdärärea̧mi̧ dari̧. Tjamo̧ davä. Ja̧borea̧ chiamȩ icjara pio ju̧i̧, dai chiririmȩ icjara pio ju̧i̧ jëdano̧padejȩ ja̧borea̧ chiadëpe bagari̧, Ütë tjamo̧ pio ju̧i̧ nö̧ta ëba cjiarea̧mi̧ dari̧.