Pjiremo̧ 1 - Biblia Pume

Pablo judi jearëremȩdejȩ Pjiremo̧ ju̧i̧.

¹ Danȩ, pio mȩa jo̧rȩtamȩrȩ go̧ȩpe chjadürequedemȩ Pjiremo̧. ¿Jabënȩ? ¿Jabë cjo̧ro̧ baänȩ? ‘Jabëti̧ cjia jirodida’ quëna̧ jo̧rȩtamȩrȩ go̧ȩpe chjadürequedemȩ. Danȩ, Pablo pio judirequede. Ado cüdë Jechu Quiricho pio ju̧i̧ ta̧rëdiämȩrȩ cjo̧ro̧a̧ oaiä, jabechji̧ chaäa̧ oa cjo̧ro̧requede. Ado Timoteo judi, pio ibë nö̧ta quëna̧mȩ pio judi, pio coadide. Ado pio a̧ro̧rȩ go̧ȩpe chjadürea̧ro̧mȩ. Jabechji̧ a̧ro̧rȩ tjamo̧ri̧ ea̧ pio ju̧i̧, ibëa̧ omȩ pio ju̧i̧ go̧ȩpe chjadürea̧ro̧mȩ, pio ibë nö̧ta ëba ja̧bepamȩ pio ju̧i̧.

² Ado pio mȩamo̧dë oa jabo na̧ bëräpȩ a̧dopaji̧ri̧ pio ji̧ri̧bo jo̧rȩtaji̧ri̧rȩ go̧ȩpe chjadürea̧ro̧jȩrȩ quëna̧ji̧ri̧ pio ji̧ri̧. Ado ibëa̧ oyi̧ pio ji̧, Apia quȩyi̧ pio ji̧ jo̧rȩtarea̧ro̧jȩ peaja̧di. Ado Aquipo pio ju̧i̧, pio ibë nö̧ta ëba ja̧bepamȩ pio ju̧i̧ jo̧rȩtaji̧ri̧rȩ go̧ȩpe chjadürea̧ro̧jo̧ȩ peaja̧di. Aja̧, Quiricho ja̧ oa ji̧dë ma ja̧bepamȩde chjai̧dë oa chjätäräbo. Jabechji̧ judi Ütë tjamo̧ ja̧ ma̧ȩ oa a̧ra̧ano̧a̧ oaiä, ibë nö̧ta Ano̧mȩ ja̧ oa ja̧bepamȩrȩ cjo̧ro̧ oaiä, cjäri̧ madiro̧jo̧ȩ, ana̧ri̧ dëbëpe chjaodiro̧jo̧ȩ. Ana̧ri̧ conȩdadiro̧jo̧ȩ. Jabo dami̧ti̧ chjai̧dë oa chjätäräbo, jabechji̧ ji̧dë ma ja̧bepamȩde Quiricho ja̧ oa. Aja̧, pio ju̧i̧iäpȩmo̧bo jo̧rȩtaji̧ri̧rȩ ma̧ȩ oa go̧ȩpe chjadürea̧ro̧jo̧ȩ.

³ Ibëa̧ Ama̧i̧ judi, ado ibëa̧ Ano̧mȩ Jechu Quiricho pio judiborë cjäri̧ri̧ cjia daji̧ri̧rȩ chjadëri̧ a̧dotädiro̧mȩ omȩ, mȩnȩ ma̧ chjupi̧ cjiari̧ jo̧rȩtarea̧mi̧ dari̧.

Pjiremo̧ judi tjamo̧ri̧ earëremȩdejȩrȩ quëna̧ji̧ri̧ pio ji̧ri̧.

⁴ Cüdë pio mȩa chjiari Ütë tjamo̧ pio ju̧i̧iä goë cjo̧dëa̧mi̧ nö̧ta, jabechji̧ ma̧ chiadëri̧ cjiamȩrȩ jo̧rȩtareconȩ Ütë tjamo̧ ju̧i̧, 'chjadëri̧ japea̧diji̧da’ quëna̧ jo̧rȩtamȩrȩ.

⁵ Jabechji̧ pio mȩa chjiari ji̧dë ma goë ta̧rërequede omȩ. Tjamo̧ davä. Mȩnȩ Ütë tjamo̧ ja̧ pumȩ ütëbo oa tjamo̧ri̧ ea̧ pio ju̧i̧ chjiari goë ta̧rërequede, mȩnȩ ibëa̧ Ano̧mȩ Jechu pio ju̧i̧iäpȩmo̧ chjuari̧ quëna̧ pio ju̧i̧ chjiaribo.

⁶ Ado pio ju̧i̧iä ji̧dë ma goë cjo̧dërequede pio mȩa chjiari. Tjamo̧ davä. Mȩnȩ pio ibë nö̧ta quëna̧mȩpea̧ tara, goë cjo̧dërequede mȩnȩ nö̧tadäräri̧ dabaparea̧ dapea̧ oa, Ütë tjamo̧ judi pio ibëiäpȩmo̧ yürüa̧ pio ju̧i̧ chjiari nö̧tadäräri̧ dabaparea̧ dapea̧ oa. Danȩ omȩ, a̧ro̧rȩ Quiricho pio ju̧i̧ nö̧ta cara̧ oa cjiami̧ dari̧ cjia tara dami̧ti̧ chjadë oa yürürëremȩdiibe Ütë tjamo̧ judi. Ado judi pio ibëiäpȩmo̧ dami̧ti̧ chjadë oa yürüa̧ pio ju̧i̧ chjiari nö̧tadäräri̧ dabaparea̧ datä ea tjamo̧mȩrȩ goë cjo̧dërequedemȩ Ütë tjamo̧ pio ju̧i̧iä pio mȩa chjiari.

⁷ Jabechji̧ mȩnȩ Ütë tjamo̧ ja̧ pumȩ pio ji̧ri̧iäpȩmo̧ tjamo̧ri̧ eamȩrȩ cjo̧ro̧a̧ pio oaiä järimȩpea̧requede omȩ, ma̧ chiadëri̧ cjia tjamo̧mȩrȩ. Tjamo̧ davä. Mȩnȩ Quiricho pio ju̧i̧iä tutia̧ oa cjiaji̧ri̧ pumȩ pio ji̧ri̧ ji̧dë ma chji̧ goaera̧ jo̧rȩta tänȩa̧ oaiä, pio ji̧ri̧ ji̧dë ma ma̧ chjupi̧ cjiari̧ jo̧rȩtarea̧mi̧ dari̧ jo̧rȩta tänȩa̧ oaiä, jabechji̧ tjamo̧ri̧ järimȩpea̧requede pio mȩaiä.

Pablo judi ni̧bärëremȩdejȩ Onechimo̧ pio ju̧i̧ chjiari.

⁸ Ado pio ju̧i̧iä coa a̧dotä earequedemȩ omȩ. Danȩ, cüdë Jechurë chjadüa̧ tara, jabechji̧ oëadëmȩmi̧ darë yo̧pai̧ darequedemȩ davä, mȩnȩ coa chjadëri̧ a̧dotä. Jabo cüdë tjamo̧ yo̧rea̧ chiamȩborë ja̧di ta̧rëri̧ yo̧dëparequedemȩ.

⁹ Jabo jabechji̧ cüdë mȩa ea tjamo̧ tara tjamo̧ yo̧mȩmi̧ darë yo̧dërequedemȩ, jabo jabechji̧ ma̧ȩ bücjüi̧ra̧ ni̧bämi̧ dari̧ cjo̧dërequedemȩ coa a̧dotä. Jabechji̧ Pablo pio judimȩrȩ cjo̧dërequedemȩ. Aja̧, Jechu Quiricho pio ju̧i̧ ja̧ ma̧ȩrä cjo̧ro̧a̧ ba oa chaärea̧ bëräpȩ tutia̧ oa cjiamȩrȩ cjo̧dërequede, peadë ütama̧i̧pea̧mȩrȩ.

¹⁰ Ado danȩ omȩ, ja̧di dari̧ cjo̧dëtämi̧ cjiarequedemȩ mȩnȩ coa a̧dotä. Jabechji̧ ca̧ jami̧ damȩ pio chjiari goë cjo̧dërequedemȩ Onechimo̧ quȩmȩ pio ju̧i̧ chjiari. Jabechji̧ pio judi quëna̧mȩpea̧de cüdë pio yi chaärea̧ bëräpȩ a̧ra̧ano̧a̧ oaiä. Ado pio ju̧i̧iä pio ju̧i̧ ja̧ ama̧i̧mi̧ darë goë cjo̧dërequedemȩ yaba̧ na̧ mu̧i̧tjoi̧ pio ju̧i̧ chjiari.

¹¹ Danȩ omȩ, Onechimo̧ judi pearä judi na̧ea̧ pio ju̧i̧ ja̧bepë yürürërea̧ ji̧, gatëa̧ mu̧i̧tjoi̧mȩrȩ ja̧bepë yürürërea̧ ji̧, cjäri̧ made, chjadëri̧ ja̧bepadë jirorëremȩde. Chjadëri̧ a̧dodëa̧ jirodimȩ. Jabo tjaoëpea̧de yaba̧. Jabechji̧ judi pearä judi mȩa chjadëri̧ a̧dodërërea̧ ji̧, jabechji̧ chjadëri̧ a̧dopai̧ dadimȩ yaba̧, ado pio mȩamo̧dë jabo pio coabo.

¹² Danȩ, pio mȩaiäpȩ ado chjereno̧ baäpea̧ oa chjadüreconȩ yaba̧. Jabechji̧ cüdë tjamo̧ri̧ ea̧ pio ju̧i̧, ca̧ chji̧rä chami̧ dari̧ cjiamȩ pio ju̧i̧ chjadüreconȩ na̧ chja̧oerä ado chjereno̧ cjo̧ro̧pea̧ oa.

¹³ Jabo danȩ, tjamo̧ri̧ cjiadiätä eatea̧reconȩ Onechimo̧ ju̧i̧ pio coa chjadëri̧ a̧dopea̧ oa. Jabechji̧ judi pio mȩa a̧dotärea̧ ji̧, na̧ bëräpȩ ju̧ri̧ ja̧bepatärea̧ ji̧, jabechji̧ pio coa nö̧ta ja̧bepatä eamȩrȩ cjiadiätä eatea̧reconȩ. Jabechji̧ pio coa nö̧ta ja̧bepatä eatea̧reconȩ cüdë pio yoaiä tutia̧ oa cjia̧ nö̧ta, cüdë ma̧ȩ chjadëi̧ pio ju̧i̧ a̧ra̧ano̧a̧ ba oa chaäa̧ oa cjia̧ nö̧ta. Tjamo̧ davä. Pio mȩnȩ coa cjäri̧ri̧ cjiamȩrȩ yürüa̧rä judi, dëdë, pio coa nö̧ta ëba ja̧bepamȩmi̧ dari̧ ëba cjiadiäa̧täremȩdique.

¹⁴ Jabo cjäri̧ marequede, ca̧ea̧ ma̧na̧ri̧ jo̧rȩtamȩrȩ cjiadiä tänȩdëri̧ cjiaremȩreconȩ, jabo jabechji̧ na̧ȩa̧ ma̧na̧ri̧ jo̧rȩtamȩrȩ cjiadiä tänȩtä eatea̧requedemȩ pio coa a̧dopea̧ oa. Jabo a̧dorea̧ taradëa̧rä judi, jabechji̧ cjiadiä tänȩdëri̧ cjiaremȩreconȩ.

¹⁵ Jabo danȩ omȩ, cüdë tjamo̧ri̧ daba ma ja̧didë jabo danȩ, Ütë tjamo̧ pio judi tänȩa̧ oaiä, Onechimo̧ pio judi a̧dë ma̧na̧ jirorëremȩdimȩ judi Quiricho pio ju̧i̧iäpȩmo̧ quëna̧rea̧ dapea̧ oa. Ja̧dëa ji judi Quiricho pio ju̧i̧iäpȩmo̧ quëna̧mȩpea̧ duri oa, jabechji̧ mȩnȩ na̧ mu̧i̧tjoi̧ pio ju̧i̧ ado chjereno̧ ëbapea̧ oa tänȩ jirorëremȩde. Tjamo̧ davä. Mȩnȩ na̧ mu̧i̧tjoi̧rëremȩ pio ju̧i̧ ado chjereno̧ bucho ana̧ ëbapea̧ oa tänȩ jirorëremȩde Ütë tjamo̧ judi. Cüdë tjamo̧ri̧ daba ma ja̧didë jabo ja̧di dari̧ jo̧rȩtarequede.

¹⁶ Jabechji̧ Onechimo̧ judi na̧ mu̧i̧tjoi̧ maearë cjo̧ro̧rërea̧ ji̧, ji̧dë u̧i̧ ba chiamȩpea̧de yaba̧, judi pio ibë nö̧ta Quiricho pio ju̧i̧iäpȩmo̧ quëna̧mȩpea̧ pio ju̧i̧iä. Danȩ, ea tjamo̧reconȩ ju̧i̧. Jabo mȩnȩ pio coaiä ji̧dë u̧i̧ ea jirorenȩjo̧ȩ. Jabechji̧ na̧ mu̧i̧tjoi̧ tara, ado peaja̧di na̧ omȩpea̧ tara, jabechji̧ pio coaiä ji̧dë u̧i̧ ea jirorenȩjo̧ȩ judi ibëa̧ Ano̧mȩ Jechu pio ju̧i̧ quëna̧mȩpea̧ tara.

¹⁷ Ja̧di tara, mȩnȩ pio coa jabë jo̧rȩtarä judi, pio yoa ma̧ȩ oa, cüdë go̧ȩpea̧ pio ju̧i̧ go̧ȩ ni̧bä ëte jabë jo̧rȩtarä judi, ‘Aja̧, Pablo judi ca̧ jadüdica̧da, pio ju̧i̧ nö̧ta ori̧ bagari̧ ëba cjiarea̧mi̧ dadida’ jabë quëna̧ jo̧rȩtarä judi, jabechji̧ Onechimo̧ pio ju̧i̧ cjäri̧ri̧ cjia dajo̧ȩ, mȩnȩ pio coa cjäri̧ri̧ cjia dami̧ dari̧. Ado judi pio mȩaiäpȩ baädäräa̧rä, jabechji̧ chjadëri̧ jeajo̧ȩ mȩnȩ pio coa jeami̧.

¹⁸ Ado danȩ, judi pio mȩaiäpȩmo̧ eami̧ chjai̧dë oa japea̧rä judi, judi mȩa eami̧ oa bacjiarä judi, jabechji̧ pio coaiä ba eacoe. Judi bacjiarä judi yo̧coe.

¹⁹ Danȩ, Paboro pio judimȩrȩ pio yoa ma̧ȩ oa go̧ȩparequede ca̧ ichira̧. Jabechji̧ mȩnȩ pio coa chjiari tjamo̧ri̧ dabapea̧ oa, 'ado cja̧rȩmo̧ pumȩ jirodida' quëna̧chea oa, jabechji̧ ca̧ ichira̧ pio ju̧ri̧ra̧ go̧ȩparequede pio yoa ma̧ȩ oa omȩ, mȩnȩ bücjüri̧ cjiachea oa, 'Paboro pio judidëpamȩ jirodida' quëna̧chea oa. Ado pio ju̧i̧iä yo̧requedemȩ. Bücjüri̧ cjiadëvä judi mȩa bacjia̧ pio ju̧i̧ chjiari. Jabechji̧ Onechimo̧ judi pio mȩaiä bacjiarä judi, tjamo̧ri̧ ba ano̧däräparequedemȩ chjadëri̧ jëdano̧rea̧mi̧ dari̧. Jabo mȩnȩ pio coaiäpȩmo̧ ana̧ri̧ bacjiadiämi̧ dari̧ cjiaräbo, cüdë pio mȩaiäpȩmo̧ bucho ana̧ cjo̧ro̧rea̧ yürümȩ ma̧ȩ oa a̧ra̧ano̧a̧ ba oa bacjia̧räbo, jabechji̧ pio ju̧i̧ chjiari yo̧dërequedemȩ yaba̧. Pio ju̧i̧ chjiari ba eadërequedemȩ yaba̧.

²⁰ Ja̧di tara ca̧ omȩ, mȩnȩ ibëa̧ Ano̧mȩ ja̧ ma̧ȩ oa ta̧rëdiämȩ tara, jabechji̧ chjamȩrȩ a̧docoe Onechimo̧ pio ju̧i̧ chjiari, cüdë pio mȩaiä cjo̧dëa̧ pio ju̧i̧ chjiari. Jabechji̧ mȩnȩ Quiricho pio ju̧i̧iä tjaoëpai̧ dari̧ cjo̧ro̧rea̧ daea̧ oaiä, jabechji̧ järi̧ tänȩcoe. Jabechji̧ cüdë mȩaiä Onechimo̧ pio ju̧i̧ chjiari cjo̧dëa̧mi̧ a̧doa̧ oaiä, järi tänȩcoe cüdë chji̧ goae tjamo̧ra̧ jo̧rȩtarea̧mi̧ dari̧.

²¹ Jabechji̧ cüdë pio yoa ma̧ȩ oa go̧ȩpamȩrȩ, ‘Aja̧, ca̧ omȩ üdë tjamo̧ri̧ ta̧rë ja̧bopa jirodicoada, jabechji̧ cüdë pio ju̧i̧iä cjo̧dëa̧ pio ju̧i̧ chjadëri̧ japapai̧ dadida, ado cüdë pio ju̧i̧iä cjo̧dëa̧ pio ju̧i̧ u̧i̧ ana̧ri̧ japapai̧ dadida’ quëna̧ jo̧rȩtamȩrȩ go̧ȩpe chjadürequedemȩ omȩ.

²² Ado danȩ omȩ, pio yoa ma̧ȩbo a̧de go̧ȩpe chjadürequedemȩ. Jabechji̧ chjadëri̧ jëdano̧a̧ oa boeacoe jo̧tjo oa. Jabechji̧ Ütë tjamo̧ judi japamitë boi̧chji̧ chjätä ëte, ‘jabechji̧ pio mȩaiäpȩ järea̧ yürüpa jirodicoada, pio mȩnȩ Ütë tjamo̧ pio ju̧i̧iä goë cjo̧dëa̧mi̧ järea̧ yürüpa jirodicoada’ quëna̧ jo̧rȩtamȩrȩ yo̧requedemȩ jo̧tjo̧ pio ju̧i̧ chjiari.

Cjiadiärea̧ Ma̧ȩ

²³ Danȩ, pio coa nö̧ta chaäa̧ oa cjiamȩ pio judi jearea̧ chjadüdimȩ. Tjamo̧ davä. Epapara judi, Quiricho ja̧ ma̧ȩrä cjo̧ro̧a̧ oaiä, chaäa̧ oa cjiamȩ pio judi cjäri̧ri̧ cjia jo̧rȩtamȩrȩ jearea̧ chjadüdimȩ.

²⁴ Ado judimo̧rȩdë jabo pio coa nö̧ta ëba ja̧bepaji̧ri̧ pio judiro̧borë cjäri̧ri̧ cjia jo̧rȩtaji̧ri̧rȩ jearea̧ chjadüdiro̧mȩ. Danȩ, Marco judi, Aritaco judi, ado Dema̧ judi, ado Uruca judi, jabechji̧ jearea̧ chjadü maeadiro̧mȩ.

²⁵ Danȩ omȩ, ibëa̧ Ano̧mȩ Jechu Quiricho judi pio mȩaiäpȩmo̧ cjäri̧ri̧ cjia damȩrȩ chjadëri̧ a̧dotädimȩ. Aja̧, pio ju̧i̧mo̧i̧ ma̧ȩ oa go̧ȩpe chjadürequedemȩ omȩ. Cjo̧ro̧ cjiaibe. Na̧ omȩ, Pablo