Pedro Ma̧ȩ 1 5 - Biblia Pume

Pedro judi chi̧dëearëremȩdejȩrȩ tjamo̧ jidaji̧ri̧ pio ji̧ri̧, quëna̧ji̧ri̧ pio ji̧ri̧ jidaji̧ri̧ pio ji̧ri̧iäpȩmo̧

¹ Ado yaba̧ chi̧dëeatämi̧ cjiarequededibe tjamo̧ jidaji̧ri̧ pio ji̧ri̧iäpȩmo̧. Jabechji̧ pio cüdëborë tjamo̧ jidamȩrequede pio dibë nö̧ta. Tjamo̧ davä. Pio cüdëborë jidarequedejȩrȩ quëna̧ji̧ri̧ pio ji̧ri̧. Ado danȩrȩ ca̧ oti̧, cüdë Jechu Quiricho pio ju̧i̧ irä daea̧ tara, ma̧i̧ dari̧ conȩda̧ oa cjiarëremȩ pio ju̧i̧ irä daea̧ tara, toro cji̧de ja̧bo tänȩa̧ oa cjiarëremȩ pio ju̧i̧ irä daea̧ tara, jabechji̧ chjadëri̧ ta̧rë ja̧bo ta̧rëtäreji̧ri̧renȩro̧coe. Jabechji̧ Jechu judi ji̧dë duri oa a̧dëri pio judiri ado ma̧na̧rä, japamitë chjätä ëte a̧dë chjäte tatari̧ na̧rȩmȩ pio judi ado ma̧na̧rä, jabechji̧ pio cüdëborë cjiaparequede pio ju̧i̧ nö̧ta. Ado pio ju̧i̧iämȩrȩ chi̧dëeatämi̧ cjiarequededibe pio dibë, tjamo̧ jidaji̧ri̧ pio ji̧ri̧.

² Danȩrȩ, Ütë tjamo̧ ja̧ ovejami̧ da pio ji̧ri̧ chjadëri̧ jidachji̧jȩrȩ. Pio jiro ja̧beparea̧ oa yürürëremȩdiibe Ütë tjamo̧ judi. Pio ju̧i̧iä jidatämi̧ cjiaji̧ri̧rȩ jidatäreji̧ri̧rea̧ro̧jȩrȩ, ‘ja̧di dari̧ ja̧bepadëri̧ cjiaquëda’ quëna̧rea̧ decjiari̧. Ado danȩrȩ, chëre pio ju̧i̧iä boa̧ oa cjiami̧ dari̧ ja̧bepadëchji̧vä, jabo jabechji̧ Ütë tjamo̧ ja̧ oa tjamo̧ri̧ ja̧bepatämi̧ cjiaji̧ri̧rȩ a̧dochji̧jȩrȩ.

³ Jabo chiri ütë cjo̧ro̧ji̧ri̧ pio judiro̧ japami̧ dari̧ japadëchji̧jȩrȩ. Jabechji̧ ërecjiaji̧ri̧rȩ to̧bari̧ yo̧dëchji̧jȩrȩ, jabo ma̧ȩ bücüi̧ra̧ chjadëri̧ chi̧dëeachji̧jȩrȩ. Jabechji̧ Ütë tjamo̧ judi dibë yürüa̧ pio ji̧ri̧, mȩnȩro̧ chjadëri̧ jidapea̧ oa yürüa̧ pio ji̧ri̧ chjadëri̧ jidachji̧jȩrȩ, cjäri̧ri̧ cjia daji̧ri̧rȩ. Jabechji̧ dibë chjadëri̧ cho̧rëdiärea̧mi̧ dari̧ na̧rȩriä cjo̧ro̧chji̧jȩrȩ.

⁴ Ado mȩnȩro̧ quëna̧ji̧ri̧ pio ji̧ri̧ ja̧di dari̧ jidariä ja̧bepea̧ oaiä, jabechji̧ chjadëri̧ ba ano̧a̧ oa cjiapanȩrȩ. Tjamo̧ davä. Oveja Tjamo̧ Jidamȩ pio judi a̧dëri pio judiri birë ma̧na̧rä, jabechji̧ chjadëri̧ ba ano̧padiibe ba chia tjamo̧ra̧ pio ju̧ri̧ra̧, badëpe bagadëmȩra̧.

⁵ Ado oari pei̧ chja pio ji̧ri̧bo chidëeatämi̧ cjiarequededibe ma̧ȩ boi̧chji̧ maea oa. Danȩrȩ, tjamo̧ jidaji̧ri̧ pio judiro̧ chi̧dëea̧ chja̧oerä cjo̧ro̧täreji̧ri̧nȩrȩ, chjadëri̧ ta̧rëdiäji̧ri̧rȩ. Aja̧, pio jiro ma̧ȩ maeara̧ chi̧dëeamȩrȩ go̧ȩpe chjadürequededibe oari pëi̧ chja pio ji̧ri̧. Ado yaba̧ dibë ütëbo oa, tjamo̧ jidaji̧ri̧ pio ji̧ri̧bo chi̧dëearequededibe. Danȩrȩ, dibëa̧ chji̧rämo̧ jo̧rȩtadëchji̧vä, jabo ütëbodärä oa ba chia daji̧ri̧rȩ a̧dochji̧jȩrȩ, ‘o ji̧ri̧ u̧i̧ ba chiaquëda’ quëna̧rea̧ decjiari̧. Jabechji̧ ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ta̧rëchji̧vä: “Ütë tjamo̧ judi chjuari̧ dëbëpe chjaodejȩ jibëa̧ chji̧rämo̧ quëna̧tamȩ pio ju̧i̧, jabo cjäri̧ri̧ cjiamȩrȩ a̧dodejȩ chjadëri̧ jo̧rȩtamȩ ju̧i̧, ‘o judiro̧ pio coa u̧i̧ ba chiadiro̧ca̧da’ quëna̧mȩ pio ju̧i̧.” Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Ado pio ju̧i̧iä ‘ba chia tjamo̧quëda’ quëna̧ jo̧rȩtadëtäreji̧ri̧nȩrȩ ‘jabomo̧ boquëda’ quëna̧ jo̧rȩtariä cjo̧ro̧täreji̧ri̧nȩrȩ.

Pedro judi quëna̧ji̧ri̧ ütëbo oa chi̧dëearëremȩdejȩrȩ

⁶ Ado pio ju̧i̧iä yo̧requededibe ca̧ oti̧. Jabechji̧ a̧dë chjäte jauëchjamȩ Ütë pio ju̧i̧ ja̧ chja̧oerämo̧ cjo̧ro̧chji̧vä. ‘Jabechji̧ ba chiadëquëda jabo a̧dë chjäte ba chiamȩ pio ju̧i̧iämo̧i̧ ja̧ȩ cjiami̧ dari̧ cjo̧ro̧pea̧ chiaquëda’ quëna̧ jo̧rȩtaji̧ri̧rȩ cjo̧ro̧chji̧vä, 'chja ja̧di judi jo̧rȩtami̧ japatädicoada’ quëna̧ jo̧rȩtaji̧ri̧rȩ. Ado mȩnȩro̧ ja̧di dari̧ cjo̧ro̧a̧ oaiä, jabechji̧ ütara̧ doro ba chia tjamo̧räpȩ cjia tänȩpadidibe Ütë tjamo̧ judi.

⁷ Ado danȩrȩ, uapea̧ oaiä boadäräa̧ cjiami̧ dari̧ cjiadëchji̧vä. Jabechji̧ chacha oa araji̧ri̧mi̧ dari̧ jo̧rȩtadëchji̧vä, jabo Ütë tjamo̧ pio ju̧i̧iä ni̧bächji̧jo̧ȩ pio judi ano̧ mire arami̧ dari̧ japapea̧ oa, mȩnȩro̧ bücjüchjai̧mi̧ dari̧ cjo̧ro̧pea̧ oa. Jabechji̧ ba chia da tjamo̧mȩrȩ jidadidibe.

⁸ Ado na̧e chiachji̧vä. Jabechji̧ tüdüa̧mi̧ darä cjo̧ro̧rea̧mi̧ dari̧ chjadëri̧ jidachji̧vä dibëa̧ chji̧ oa, mo̧a̧ji̧ri̧mi̧ dari̧ cjo̧ro̧rea̧ decjiari̧. Jabechji̧ Ichiae pio judi pa̧rȩmȩ chjuamȩmi̧ darë oëra̧ti̧ oa na̧riämȩmi̧ dari̧ tai̧de pumȩ pio ji̧ri̧ acji bagurami̧ dari̧ japapea̧ oa, pio ji̧ri̧ jurami̧ dari̧ u̧i̧papea̧ oa.

⁹ Jabo dëbëpe chjaochji̧jo̧ȩ. Aja̧ ca̧ oti̧, Ütë tjamo̧ pio ju̧i̧iäpȩmo̧ chjuari̧ quëna̧rea̧ra̧ pio ju̧ri̧ra̧ dëbëpe chjaochji̧jo̧ȩ. Jabechji̧ mȩnȩro̧ goaedë oa chjätäräbo, dami̧ti̧ chjai̧dë oa chjätäräbo, jabechji̧ ma̧ chjua jo̧rȩtachji̧vä. Peaja̧dimi̧ dari̧ chjätä chjao maeadirȩ dibëa̧ pumȩ judiro̧, chiriräpȩti̧ oa cjo̧ro̧ji̧ri̧ pio judiro̧.

¹⁰ Ado mȩnȩro̧ chjai̧dë oa chjätä ëte, japamitë nö̧ta chjai̧dë oa chjätä ëte, jabechji̧ Ütë tjamo̧ pio judi chjadëri̧ a̧dopadidibe. Jabechji̧ chjadëri̧ jëdano̧däräpadidibe mȩnȩro̧ nö̧tadäräri̧ cjiarea̧mi̧ dari̧ cjiapea̧ oa, mȩnȩro̧ jabëdiärea̧ decjiari̧ cjiapea̧ oa. Aja̧ ca̧ oti̧, mȩnȩro̧ ji̧dë u̧i̧ chjuari̧ cjiami̧ dari̧ cjiapea̧ oa, mȩnȩro̧ jaejaea cjiami̧ dari̧ cjiachea oa, mȩnȩro̧ ji̧dë u̧i̧ ju chiami̧ dari̧ cjiapea̧ oa chjadëri̧ jëdano̧däräpadidibe, mȩnȩro̧ taru a̧rȩmȩ chjua tjamo̧rä cjiami̧ dari̧ cjiapea̧ oa. Jabechji̧ chjamȩrȩ yürümȩ pio judi cjäri̧ri̧ cjiamȩrȩ ëna̧diärëremȩdidibe Ütë tjamo̧ judi. Tjamo̧ davä. Dami̧ti̧ chjadë oa yürümȩ pio judi ëna̧diärëremȩdidibe Quiricho pio ju̧i̧iä, mȩnȩro̧ pio ju̧i̧ nö̧ta ba chia tjamo̧räpȩ ju̧ri̧ bucho ana̧ ëba cjo̧ro̧rea̧ dapea̧ oa, mȩnȩro̧ pio ju̧i̧ nö̧ta a̧dë chjäte tatari̧ cjiamȩräpȩ cjo̧ro̧rea̧ dapea̧ oa.

¹¹ Ado pio ju̧i̧iä jabechji̧, a̧dë chjäte jauëchjamȩ Ütë pio judi bucho ana̧ tjamo̧ yo̧mȩrȩ cjiatäde, tjamo̧ yo̧dëmȩpe bagarea̧ decjiari̧. Aja̧, ja̧ditäde. Ado pio ju̧i̧iä yo̧requededibe ca̧ oti̧. Jabechji̧ mȩnȩro̧ eami̧ chjai̧dë oa chjätäräbo, jabechji̧ dibë chjadëri̧ jidamȩ pio ju̧i̧ ji̧dë ma chjuari̧ quëna̧täreji̧ri̧renȩro̧jo̧ȩ Ütë tjamo̧ ju̧i̧, pio ju̧i̧iämo̧i̧ ji̧dë ma ja̧ȩ cjiami̧ dari̧ quëna̧ji̧ri̧rȩ.

Cjiadiärea̧ Ma̧ȩ

¹² Danȩrȩ, Chivano quȩmȩ pio judi coa chjadëri̧ go̧ȩpe yürüa̧ oaiä, cüdë ni̧bä chjaoa̧ duri pio ju̧i̧ go̧ȩpe yürüa̧ oaiä, jabechji̧ pio yoa ma̧ȩ go̧a̧ti̧ tjamo̧dë oa go̧ȩpe chjadürequededibe ca̧ oti̧. Ado Chivano judi, jabechji̧ ibëa̧ omȩde. Ado Ütë tjamo̧ ja̧ ma̧ȩ oa ta̧rëdiämȩrȩ ja̧bepamȩde chjadëri̧. Ado pio judi chjadëri̧ a̧doa̧dique pio yoa ma̧ȩ oa go̧ȩpapea̧ ji̧. Ado pio yoa ma̧ȩra̧ pio ju̧ri̧ra̧ chi̧dëeatämi̧ cjiarequededibe ca̧ oti̧, mȩnȩro̧ chjadëri̧ dabatä. Jabechji̧ mȩnȩro̧ eami̧ti̧ chjai̧dë oa chjätärä, Ütë tjamo̧ pio judi cjäri̧ri̧ cjiamȩrȩ a̧dopadidibe. Ado pio ju̧i̧ tjamo̧ri̧ jo̧rȩtariä cjo̧ro̧tä earequededibe ca̧ oti̧, mȩnȩro̧ jo̧rȩtadëpe bagarea̧ decjiari̧.

¹³ Ado Babironia quȩmȩräpȩ quëna̧ji̧ri̧ pio judiro̧ peaja̧di cjäri̧ri̧ cjia jo̧rȩtadiro̧dibe. Jearea̧ chjadüdiro̧dibe. Pio judiro̧borë mitëa̧ oa cjiadirȩ Ütë tjamo̧ pio ju̧i̧iä. Ado danȩrȩ, ca̧ jami̧ da üdë, Marco quȩmȩ pio judiborë jearea̧ chjadüdidibe.

¹⁴ Danȩrȩ, dibëa̧ dëbëti̧ra̧ chia chjadëri̧ jeachji̧vä, tjamo̧ri̧ eaji̧ri̧rȩ. Ado yaba̧ cüdë cjiadiäbea yaboi̧, jabechji̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe ca̧ oti̧. Aja̧, ma̧ chjupi̧ cjiari̧ jo̧rȩtaji̧ri̧rȩ cjo̧ro̧tänȩrȩ, Quiricho pio judiri ja̧ji̧ri̧ pio judiro̧. Aja̧ ca̧ oti̧, pio yoamo̧i̧ ma̧ȩ oa go̧ȩpe chjadürequededibe. Chjadëri̧ cjo̧ro̧chji̧ibe. Dibëa̧ omȩ, Pedro.