Pedro Ma̧ȩ 1 4 - Biblia Pume

Jëdano̧a̧ oa cjiami̧ dari̧ cjiatäreji̧ri̧rea̧rȩ Quiricho pio judimi̧ dari̧ jo̧rȩtapea̧ oa, a̧ro̧rȩ chjai̧dë pio ju̧i̧ chjätäa̧rä pio judimi̧ dari̧ jo̧rȩtapea̧ oa

¹ Danȩrȩ ca̧ oti̧, Quiricho judi jo̧rȩtamȩrȩ yürürëremȩdejȩ jibëa̧ icjara oa. ‘Aja̧, ca̧ icjara oa nȩmȩpadëmȩrȩ yürüpacuni̧da, a̧dë chjäte gitoi̧ dari̧ tarapea̧ oa yürüpacuni̧da’ quëna̧ jo̧rȩtamȩrȩ yürürëremȩdejȩ. Ado peaja̧dimi̧ dari̧ yürüpea̧ oa jëdano̧mi̧ dari̧ poë cürë jo̧rȩtatäreji̧ri̧rea̧rȩ ca̧ oti̧, pio ju̧i̧ ja̧ chji̧ra̧ jo̧rȩtami̧ dari̧ yürüpea̧ oa, peaja̧di ibëa̧ icjara oa nȩmȩpadëji̧ri̧rȩ yürüpea̧ oa. Danȩrȩ, guadia üdë ma̧i̧ da chjai̧dë oa chjätäbea yaboi̧, ¿tjana̧ japade? Tjana̧ japadë, jabechji̧ poë cürë jo̧rȩtamȩrȩ jëdano̧de jibëa̧ icjara oa yürüpea̧ oa, ma̧i̧ da chjai̧dë oa chjätäpea̧ oa, uapai̧ da tjamo̧räpȩ ja̧bepapea̧ oa, ja̧bopai̧ daräpȩ jäpea̧ oa. Ado peaja̧dimi̧ dari̧ japatäreji̧ri̧rea̧rȩ ca̧ oti̧. Jabechji̧ jibëa̧ icjara oa china̧chjari̧ yürümȩ judi, Ütë tjamo̧ ja̧ oa china̧chjari̧ yürümȩ judi, gitoi̧ dari̧ conȩda̧ oa cjiapai̧ daräbo yürümȩ pio judi, ¿yö̧ta dari̧ jo̧rȩtade? Yö̧ta dari̧ jo̧rȩtadë, jabechji̧ chjai̧dë oa japapea̧ oa yürüdëri̧ cjiadejȩ jibëa̧ icjara oa, jabo chjadëri̧ japapea̧ maea oa yürütämi̧ cjiadejȩ Quiricho pio judimi̧ dari̧.

² Ado judi ja̧di dari̧ cjo̧ro̧mȩpea̧ tara, jabechji̧ jibëa̧ icjarari cjitëmȩ chjai̧dërë chi̧dëea̧ chja̧oerä cjo̧ro̧dëpade, jabo judi ja̧boa̧rä yuro Ütërë ea̧ pio ju̧i̧mo̧i̧ japamȩrȩ cjo̧ro̧pade. Ado peaja̧dimi̧ dari̧ cjo̧ro̧täreji̧ri̧nȩrȩ ca̧ oti̧.

³ Nö̧tade davä mȩnȩro̧ chjai̧dëri̧ japarërea̧ üdë. Danȩrȩ, mȩnȩro̧ jabë quëna̧dëa̧rä, cho̧rëdiä jo̧rȩtarëreji̧ri̧renȩro̧jȩrȩ jibëa̧ chja̧oerä cjo̧ro̧ji̧ri̧ pio ji̧ri̧, jibëa̧ icjarari pio judiri cjitëmȩ chjai̧dë üdë chi̧dëea̧ chja̧oerä cjo̧ro̧ji̧ri̧ pio ji̧ri̧. Tjamo̧ davä, japamitë ana̧ tjamo̧ri̧ cho̧rë japarëreji̧ri̧renȩro̧jȩrȩ. Ado pio ju̧i̧iä yo̧requededibe ca̧ oti̧. Jabechji̧ nö̧tade yaba̧. Mȩnȩro̧ chjai̧dëri̧ japea̧ üdë nö̧tade. Jabechji̧ mȩnȩro̧ Quiricho pio judiri ja̧ji̧ri̧pea̧ tara, mȩnȩro̧ Tjo tjamo̧ ja̧ chja̧oerä cjo̧ro̧ji̧ri̧pea̧ tara, jabechji̧ ado judiri japadëpea̧de jabo cjiadiäpea̧de yaba̧. ‘Ado cüdë chjai̧dëri̧ japarërea̧ pio ju̧i̧ uëri a̧de japatäremȩquëda’ quëna̧dëchji̧vä. Jabechji̧ pio jiro pumȩ pio judiro̧ china̧chja pio ji̧ri̧ baë ëba mo̧a̧ chjaodirȩ. Jibëa̧ icjarari cjitëmȩ chjai̧dë üdë chi̧dëea̧ chja̧oerä cjo̧ro̧dirȩ, dami̧ti̧ idi̧ dati̧ oa jape chjaoji̧ri̧rȩ. Ado yu̧i̧ji̧ri̧rȩ chjaocjiadirȩ, chjai̧dë oa japaji̧ri̧rȩ. Aja̧, a̧dë chjäte jaraji̧ri̧rȩ airi̧ cjia airi̧ cjia a̧dope chjaodirȩ. Ado pio ju̧i̧ uëri pumȩrȩ jëdano̧a̧ oa cjiaji̧ri̧ pio ji̧ri̧iäpȩmo̧ chjacjiamȩri̧ jo̧rȩtadiro̧jȩrȩ teracaba ütëti̧ pio ji̧ri̧, Ütë tjamo̧ pio ju̧i̧iä china̧chja pio ji̧ri̧. Ado dëdë, pio mȩnȩro̧borë ja̧di dari̧ cjo̧ro̧rëreji̧ri̧nȩrȩ pearä judi. Jabo ja̧di dari̧ cjo̧ro̧rërea̧ ji̧, ‘jabechji̧ nö̧tadida yaba̧, ado judiri ja̧di dari̧ cjo̧ro̧rea̧mi̧dëquëda’ quëna̧ jo̧rȩtaji̧ri̧rȩ ano̧ mire cjo̧ro̧täreji̧ri̧nȩrȩ.

⁴ Ado danȩrȩ, pio jiro pumȩ judiro̧ ana̧ri̧ jo̧rȩtaji̧ri̧pea̧dirȩ. Tjamo̧ davä. Jibëa̧ icjarari cjitëmȩ chjai̧dë üdë chi̧dëea̧ chja̧oerä cjo̧ro̧ji̧ri̧ pio judiro̧, jabechji̧ ana̧ri̧ jo̧rȩtaji̧ri̧pea̧dirȩ pio dibë chjiari. Jabechji̧ mȩnȩro̧ pio ji̧ri̧ nö̧ta a̧dë chjäte ma̧i̧ dari̧ jape chjaorërea̧ ji̧, mȩnȩro̧ oëadëji̧ri̧rȩ dami̧ti̧ chjai̧dë oa jape chjaorërea̧ ji̧, tjaoëpai̧ dari̧ ano̧ mire cjo̧ro̧ji̧ri̧pea̧nȩrȩ ca̧ oti̧, tüdüa̧mi̧ darä cjo̧ro̧ji̧ri̧rȩ. Ado pio ju̧i̧iä o judiro̧, ‘Chia chia, ¿tjana̧ ju̧i̧iä ëba tai̧dëdiro̧ibëda, ¿tjana̧ ju̧i̧iä airi̧ cjia airi̧ cjia ëba a̧dopadëdiro̧ibëda yaba̧, a̧ro̧rȩ pearä ji̧mo̧ ëba tai̧rërea̧ ji̧ a̧dë cjiadiäa̧diro̧ibëda’ quëna̧ jo̧rȩtaji̧ri̧rȩ ji̧dë ma chjai̧dëri̧ ni̧bä chjaodirȩ yaba̧ pio dibë chjiari, “pumȩ chjadëdëpea̧dirȩ” aechide yo̧ji̧ri̧rȩ.

⁵ Jabo danȩrȩ ca̧ oti̧, pio jiro pumȩ judiro̧ ütara̧ oa cjiapadirȩ. Tjamo̧ davä. Pumȩ pio judiro̧ ütëbodärärë Ütë tjamo̧ pio ju̧i̧ ja̧ dëbëräpȩ cjiadäräpea̧ chiadirȩ. Ado pio judi iëno̧ë iëno̧ë cjiarä, chjadëri̧ dëbë yo̧pea̧ chiadiro̧jo̧ȩ jënȩro̧ japea̧ pio ju̧i̧ chjiari, jënȩro̧ yo̧a̧ pio ju̧i̧ chjiari, jënȩro̧ pio dibëiäpȩmo̧ aechide yo̧a̧ pio ju̧i̧ chjiari. Tjamo̧ davä. Cjo̧ro̧ji̧ri̧ pio ji̧ri̧ ütëbo oa ütarapadejȩrȩ, ja̧boa̧ji̧ri̧ pio ji̧ri̧bo.

⁶ Ado pumȩ judiro̧ ütëbodärärë ütara̧ oa cjiapa tara, jabechji̧ ma̧ȩ chjadëi̧ üdë jabërä a̧ra̧ano̧a̧ oa cjiapea̧ chiade pio ji̧ri̧iäpȩmo̧, judiro̧ ja̧bobea yaboi̧. Jabechji̧ judiro̧ jabërä quëna̧rä judi, jabechji̧ bucho ana̧ cjo̧ro̧rea̧ dapadirȩ, jibëa̧ icjara üdë ja̧boa̧räbo. Jabechji̧ pearämȩ üi̧ üdë chjai̧dëri̧ japarërea̧ oaiä, Ütë ja̧ ërecjia̧ üdë pearä judi acji cjatärërea̧ oaiä, jabechji̧ pumȩ ja̧ icjara üdë chjö̧na̧i̧rȩ ja̧bopea̧ maeade. Jabo eami̧ pumȩ üdë ma̧ȩ chjadëi̧ pio ju̧i̧ quëna̧rä judi, jabechji̧ tjo maearë cjiamȩrȩ cjo̧ro̧rea̧ dapade Ütë tjamo̧ pio judimi̧ dari̧. Jabechji̧ Ütë tjamo̧ judi icjara chiadëmȩborë bucho ana̧mȩde. Ado peaja̧dimi̧ dari̧ cjiadiäpadirȩ ma̧ȩ chjadëi̧ oa quëna̧ji̧ri̧ pio judiro̧. Jabechji̧ jibëa̧ icjara oa a̧dë ja̧boa̧räbo, bucho ana̧ cjo̧ro̧pade jibëa̧ tjo üdë. Ado pio ju̧i̧iä ma̧ȩ chjadëi̧ üdë jabërä a̧ra̧ano̧a̧ oa cjiapea̧ chiade pumȩ ütëbo ja̧ oa. A̧ro̧rȩ ma̧ȩ chjadëi̧ pio ju̧i̧ quëna̧ji̧ri̧pea̧ oaiä, jabechji̧ Tjo tjamo̧ ja̧ chja̧oerä cjo̧ro̧rea̧ daea̧rea̧rȩ yaba̧. Ado pio ju̧i̧iä, a̧ro̧rȩ pio yoa icjararä jabë cjo̧ro̧a̧ nö̧ta, jabechji̧ jëdano̧mi̧ dari̧ poë cürë jo̧rȩtapea̧ chiarea̧rȩ ca̧ oti̧, a̧ro̧rȩ Ütë tjamo̧ ja̧ ma̧ȩrämo̧ cjo̧ro̧pea̧ oa, a̧ro̧rȩ pio yoa chirirä cjo̧ro̧a̧ nö̧ta dami̧ti̧ chjai̧dë oa chjätäräbo pio jiro ma̧ȩrä cjo̧ro̧pea̧ oa.

Quiricho judi ma̧na̧pea̧ ji̧ querediä tara, jabechji̧ järitäreji̧ri̧rea̧rȩ ibëa̧ Ama̧i̧ ja̧ oa chjadëri̧ ja̧bepapea̧ ji̧, quëna̧ji̧ri̧ pio judiro̧ Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧ oa

⁷ Japamitë ana̧ tjamo̧dë chjätä ëte Ütë tjamo̧ judi ütarapadejȩ a̧ro̧rȩ japea̧ pio ju̧i̧, a̧ro̧rȩ cjo̧ro̧a̧ pio ju̧i̧. Jabechji̧ pio yoa dabu üdë goarijäpea̧ üdë querediä tjamo̧de. Ja̧di tara yo̧requededibe ca̧ oti̧. Badë oa jo̧rȩtadëchji̧vä, jabo urëdi tjamo̧ oa jo̧rȩtachji̧vä. Tüdüa̧ tjoro cjiami̧ dari̧ jo̧rȩtachji̧vä. Ja̧di dari̧ cjo̧ro̧chji̧vä mȩnȩro̧ Ütë tjamo̧ pio ju̧i̧ chjadëri̧ ni̧bärea̧ dapea̧ oa.

⁸ Ado ji̧dë ma ea tjamo̧chji̧vä dibëa̧ dëbëti̧ra̧ chia, tjamo̧ri̧ eaji̧ri̧rȩ. Jabechji̧ o ji̧ri̧iäpȩmo̧ tjamo̧ri̧ ea̧ üdë a̧dë chjäte ba chiade. Jabechji̧ pumȩ pio ji̧ri̧ tjamo̧ri̧ eamȩ judi, ¿yö̧ta dari̧ cjo̧ro̧pade? ¿Yö̧ta dari̧dë, jabechji̧ jibëa̧ pumȩ judiro̧ pio jȩaiäpȩmo̧ chjai̧dëri̧ japea̧räbo, chji̧ goaera̧ jo̧rȩtamȩrȩ dapadejȩrȩ goadi ërecjiarea̧ decjiari̧. Aja̧ ca̧ oti̧, ja̧di dari̧ cjo̧ro̧pea̧de.

⁹ Ado danȩrȩ, cjäri̧ri̧ cjia dachji̧jȩrȩ quëna̧ji̧ri̧ pio ji̧ri̧, dibëa̧ bëräpȩ go̧düdäräa̧ji̧ri̧ pio ji̧ri̧. Jabechji̧ tjamo̧ri̧ a̧dotämi̧ cjiaji̧ri̧rȩ chjadëri̧ ëba cjo̧ro̧chji̧jȩrȩ, ma̧ chiadëri̧ cjiaji̧ri̧rȩ. Aja̧ ca̧ oti̧, ma̧ȩ goaedë oa yo̧rea̧ decjiari̧ chjadëri̧ a̧dochji̧jȩrȩ.

¹⁰ Jabechji̧ Ütë tjamo̧ judi pio ibëiäpȩmo̧ tjaoëti̧ chia ja̧beparea̧ oa jauëchja cjiari̧ yürüa̧ oaiä, jabechji̧ a̧ro̧rȩ ütëbodärärë ibëa̧ ja̧beparea̧ chia maearea̧rȩ. Ado judi ibë jauëchja cjiari̧ yürüa̧ra̧ pio ju̧ri̧ra̧ chjadëri̧ ja̧bepatäreji̧ri̧rea̧rȩ, ibëa̧ dëbëti̧ra̧ chia chjadëri̧ a̧doji̧ri̧rȩ. Jabechji̧ Ütë tjamo̧ judi ibë cjäri̧ri̧ cjiamȩrȩ yürüa̧ pio ju̧i̧ badë jo̧rȩtadëtäreji̧ri̧rea̧ro̧jo̧ȩ, jabo chjadëri̧ ja̧bepatäreji̧ri̧rea̧rȩ daburäpȩmo̧ arë cürëmi̧ dari̧ japarea̧ decjiari̧.

¹¹ Jabechji̧ a̧ra̧ano̧mȩ judi Ütë tjamo̧ pio ju̧i̧ ja̧ yami̧ dara̧ pio ju̧ri̧ra̧ ni̧bämȩ pio judi, jabechji̧ coëma cjiari̧ a̧ra̧ano̧täremȩde Ütë tjamo̧ ja̧ ma̧ȩ oa, Ütërë yürüa̧ duri maea oa. Ado o ji̧ri̧ a̧domȩ pio judi, Ütërë yürüa̧ ju chiarea̧ra̧ pio ju̧ri̧ra̧ chjadëri̧ a̧dotäremȩdejȩrȩ. Ado danȩrȩ ca̧ oti̧, mȩnȩro̧ Ütërë yürüa̧ra̧ pio ju̧ri̧ra̧ ana̧ri̧ ja̧bepea̧ oaiä, dibëa̧ pumȩ pio ji̧ri̧ chjadëri̧ a̧doa̧ oaiä, jabechji̧ ma̧ chiadëri̧ cjia tjamo̧ji̧ri̧rȩ jo̧rȩtapai̧ dadirȩ, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ. ‘Aja̧, Jechu Quiricho pio judi ibë chjiari ano̧ mire ja̧boa̧ oaiä, jabechji̧ Ütë tjamo̧ judi chjadëri̧ a̧dodiibëda, pumȩ pio ji̧ri̧iä chjadëri̧ a̧dodiibëda’ quëna̧ jo̧rȩtaji̧ri̧rȩ chjacjiamȩri̧ jo̧rȩtaji̧ri̧rȩ ni̧bäpadiro̧jo̧ȩ, ‘Ütë tjamo̧ pio judi chjadë tjamo̧dida’ quëna̧ jo̧rȩtaji̧ri̧rȩ. Ado ja̧di dari̧ ni̧bäpea̧ üdë chjadë tjamo̧de. Jabechji̧ ibëa̧ Ama̧i̧ Ütë pio judi, a̧dë chjäte tatari̧ cjiamȩ Ütë pio judi, jabechji̧ ji̧dë ma chjacjiamȩri̧ jo̧rȩtapea̧de Jechu Quiricho pio ju̧i̧iä. Jabechji̧ bucho ana̧mȩde. Goarijärea̧mi̧dëri̧ tjamo̧ yo̧mȩrȩ cjiamȩde. Ado pio ju̧i̧iä ji̧dë ma chjacjiamȩri̧ jo̧rȩtapea̧de. Ja̧ditäde.

Quiricho judi chjai̧dë oa chjätärërea̧mi̧ chjätäpadirȩ quëna̧ji̧ri̧ pio judiro̧

¹² Danȩrȩ ca̧ oti̧, mȩnȩro̧ ma̧i̧ da chjai̧dë oa chjätärä, ana̧ri̧ jo̧rȩtadëchi̧vä. Tjamo̧i̧ cjiari̧ yo̧requededibe oti̧. Mȩnȩro̧ chjai̧dë oa chjätärä, mȩnȩro̧ quëna̧ üdë ütara̧ oa cjiapea̧ oa chjai̧dë oa chjätärä, ‘¿tjana̧ ju̧i̧iä chjai̧dë oa chjätäcjivaquë’ quëna̧ jo̧rȩtadëchji̧vä.

¹³ Jabo jabechji̧ ma̧ chiadëri̧ cjiari̧ jo̧rȩtachji̧vä ji̧dëri̧, mȩnȩro̧ Quiricho pio judi chjai̧dë oa chjätärërea̧mi̧ chjätä tara. Ado mȩnȩro̧ ja̧di dari̧ jo̧rȩtaji̧ri̧rȩ cjo̧ro̧a̧ oaiä, jabechji̧ ma̧ chiadëri̧ cjia tjamo̧ji̧ri̧rȩ daparenȩro̧jo̧ȩ Quiricho pio ju̧i̧ judi ma̧na̧rä. Tjamo̧ davä. Judi ma̧na̧rä, judi a̧dë chjäte tatari̧ cjiamȩrȩ ma̧na̧rä, jabechji̧ ma̧ chiadëri̧ cjia tjamo̧ji̧ri̧rȩ daparenȩro̧jo̧ȩ, cjätäcjie jo̧rȩtaji̧ri̧rȩ.

¹⁴ Ado pio ju̧i̧iä yo̧requededibe ca̧ oti̧. Jabechji̧ o judiro̧ dibë ya̧rä judi, mȩnȩro̧ Quiricho pio ju̧i̧ quëna̧ oaiä chjai̧dëri̧ ni̧bärä judi, ana̧ri̧ jo̧rȩtadëchji̧vä, jabo jabechji̧ ma̧ chiadëri̧ cjiari̧ jo̧rȩtachji̧vä. Jabechji̧ na̧rȩde Ütë ja̧ Tjo pio judi dibëa̧ icjararä bëpea̧ pio ju̧i̧ chjiari. Aja̧, a̧dë chjäte tatari̧ cjiamȩ Tjo tjamo̧ pio judi bëpea̧ pio ju̧i̧ chjiari, dibë chjadëri̧ a̧doa̧ pio ju̧i̧ chjiari na̧rȩde. Pio ju̧i̧iä dibë ya̧ea̧räbo jabechji̧ ma̧ chiadëri̧ cjiachji̧vä.

¹⁵ Jabo mȩnȩro̧ bape chjaoa̧ oa cjiarä judi, jabechji̧ chjai̧dëri̧ japea̧ oaiä bape chjaoa̧ oa cjiadëtäreji̧ri̧nȩrȩ. Jabechji̧ ado cja̧rȩmo̧ oa ja̧bo tänȩa̧ oaiä, o ji̧ri̧iä garüa̧ oaiä, pumȩ ji̧ri̧iäpȩmo̧ chjai̧dëri̧ japea̧ oaiä, dibëa̧dë pio ju̧i̧ chjiari ji̧dë ma iëno̧ iëno̧ ta̧rë ëte tuti yo̧a̧ oaiä bape chjaoa̧ oa cjiadëtäreji̧ri̧nȩrȩ. Jabechji̧ ja̧di dari̧ japea̧ üdë chjai̧dëde, ado idëri̧ cjia tänȩmȩde.

¹⁶ Jabo mȩnȩro̧ Quiricho pio ju̧i̧ quëna̧ oaiä gitori̧ taraji̧ri̧rȩ conȩda̧ oa cjiarä judi, jabechji̧ idëri̧ cjiadëtäreji̧ri̧renȩrȩ, jabo ma̧ chiadëri̧ cjiaji̧ri̧rȩ jo̧rȩtatäreji̧ri̧renȩro̧jo̧ȩ Ütë tjamo̧ pio ju̧i̧. Tjamo̧ davä. Idëri̧ cjiadëtäreji̧ri̧nȩrȩ, jabo chjacjiamȩri̧ ni̧bätäreji̧ri̧renȩro̧jo̧ȩ Ütë tjamo̧ pio ju̧i̧iäpȩmo̧ quëna̧dëji̧ri̧ pio judiro̧ pio dibë chjiari tjamo̧ri̧ dabaji̧ri̧pea̧ tara. ‘Aja̧, pio jiro pumȩ judiro̧ quëna̧ji̧ri̧pea̧diro̧da, Jechu pio ju̧i̧ ja̧ pumȩpea̧diro̧da’ quëna̧ jo̧rȩtaji̧ri̧rȩ dabaji̧ri̧pea̧ tara, jabechji̧ chjacjiamȩri̧ jo̧rȩtatäreji̧ri̧renȩro̧jo̧ȩ Ütë tjamo̧ ju̧i̧.

¹⁷ Jabechji̧ Ütë tjamo̧ judi pumȩ ütëbodärä oa ütarapea̧ japamitë üdë ma̧na̧diibe. Ado jibëa̧ pumȩ pio ji̧ri̧ tarupë ütarapadiibe pio ibë. Aja̧, quëna̧dëji̧ri̧ pio ji̧ri̧ ja̧ yabo ütarë dapadiibe. Aja̧, pio ibë chjai̧dë oa chjätä tänȩmȩrȩ ütarë dapadiibe a̧ro̧rȩ chjuari̧ quëna̧pea̧ pio ju̧i̧ chjiari. Ado danȩrȩ ca̧ oti̧, pio a̧ro̧rȩ, chjätärea̧ dapaji̧ri̧ pio judiro̧ chjai̧dë oa chjätäpea̧ chiarä judi, pio a̧ro̧rȩ o ji̧ri̧ ja̧ yaboi̧ ütara̧ oa cjiapea̧ chiarä judi, ¿yö̧ta dari̧ cjiadiäpadirȩ ma̧ȩ chjadëi̧ pio ju̧i̧ quëna̧dëji̧ri̧ judiro̧? Yö̧ta dari̧dë, jabechji̧ a̧dë chjäte uapai̧ dari̧ cjiadiäpadirȩ.

¹⁸ Ado peaja̧di ta̧rëri̧ go̧ȩpea̧ oa cjiarëremȩde ma̧ȩ üdë, Ütërë no̧mȩ tjamo̧ri ja̧ go̧ȩpa tänȩrërea̧ ma̧ȩ üdë. Ta̧rëchji̧vä: “¿Coëma cjiari̧ cjo̧ro̧ji̧ri̧ pio judiro̧ chjai̧dë oa chjätäpea̧ chiarä judi, ¿tjana̧ chjai̧dë oa chjätäpadirȩ Ütë tjamo̧ pio ju̧i̧ chjiari jo̧rȩtadëri̧ cjiaji̧ri̧ judiro̧? ¿Chjätärea̧ dapaji̧ri̧ pio judiro̧ dami̧ti̧ chjai̧dë oa chjätäpea̧ chiarä judi, ¿napai̧ chjai̧dë oa chjätäpadirȩ quëna̧dëri̧ cjiaji̧ri̧ pio judiro̧, ji̧dë ma chjai̧dë oa japaji̧ri̧ pio judiro̧? Cjäri̧ madirȩ ca̧ oti̧, a̧dë chjäte ma̧i̧ da chjai̧dë oa chjätäpadirȩ." Aja̧ ca̧ oti̧ ja̧di ta̧rëri̧ go̧ȩpea̧ oa cjiarëremȩde ma̧ȩ üdë.

¹⁹ Ado pio ju̧i̧iä yo̧requededibe ca̧ oti̧. Mȩnȩro̧ chjai̧dë oa chjätärä judi, Ütë tjamo̧ pio judi ütara̧mi̧ chjätärä judi, jabechji̧ järidëpe bagadëchji̧vä, jabo ji̧dë ma coëma cjiari̧ cjo̧ro̧chji̧vä, chjadëri̧ japaji̧ri̧rȩ. ‘Jabechji̧ Ütë tjamo̧ pio judi chjadëri̧ jidadicoada, oëra̧ japadëmȩdida, jabo jënȩ yo̧a̧mi̧ chjadëri̧ japamȩdida, ado cüdë chjai̧dë oa chjätäräbo chjadëri̧ jidadicoada, jabechji̧ coa Pareapamȩ pio ju̧i̧ chjuari̧ quëna̧riä cjo̧ro̧paquëda’ quëna̧ jo̧rȩtariä cjo̧ro̧täreji̧ri̧nȩrȩ ca̧ oti̧.