Pedro Ma̧ȩ 1 3 - Biblia Pume

Pedro judi chi̧dëearëremȩdejȩrȩ üi̧ chiaji̧ri̧ ivi pio ji̧ri̧.

¹ Ado mȩnȩro̧, oari chiaji̧ri̧ ivi pio jini̧ro̧ ta̧rëdiätäreji̧ri̧nȩro̧ji̧ri̧ dibëa̧ oari pio ji̧ri̧. Jabechji̧ mu̧i̧tjoi̧ pio judiro̧ jibëa̧ ano̧mȩ pio ju̧i̧ ta̧rëdiämi̧ dari̧ ta̧rëdiätäreji̧ri̧nȩro̧ji̧ri̧, ji̧ri̧ ja̧ chja̧oerä chjadëri̧ cjo̧ro̧ji̧ri̧rȩ. Jabechji̧ ja̧di dari̧ cjo̧ro̧ oaiä dibëa̧ oari judiro̧, orë Ütë tjamo̧ pio ju̧i̧iäpȩmo̧ jabë quëna̧dërä judi, jabechji̧ ano̧ mire jo̧rȩtaji̧ri̧pe bagapai̧ dadiro̧ pio mȩnȩro̧ chjadëri̧ ta̧rëdiäa̧ oaiä. Jabechji̧ mȩnȩro̧ chjadëri̧ na̧rȩriä cjo̧ro̧a̧ oaiä ana̧ri̧ jo̧rȩtapai̧ dadiro̧. Tjamo̧ davä. Mȩnȩro̧ pio ji̧ri̧iäpȩmo̧ Ütë ja̧ ma̧ȩ oa ni̧bä chjaodëräbo, jabechji̧ ana̧ri̧ jo̧rȩtapai̧ dadiro̧ davä, pio mȩnȩro̧ chjadëri̧ ta̧rëdiäa̧ oaiä, mȩnȩro̧ coëma cjiari̧ na̧rȩriä cjo̧ro̧a̧ oaiä.

² Jabechji̧ mȩnȩro̧ a̧dë oëadëri̧ cjiadëji̧ri̧rȩ cjo̧ro̧a̧ oaiä, mȩnȩro̧ tatachjami̧ dari̧ cjo̧ro̧a̧ oaiä, mȩnȩro̧ Ütë tjamo̧ pio ju̧i̧iäpȩmo̧ uapaji̧ri̧rȩ ba chia jo̧rȩtariä cjo̧ro̧a̧ oaiä, dëdë, ano̧ mire jo̧rȩtapai̧ dadiro̧ dibëa̧ oari pio judiro̧.

³ Ado pio ju̧i̧iä jabechji̧, chjacjiaji̧ri̧ tjamo̧mi̧ dari̧ cjo̧ro̧chji̧je judiro̧ ano̧ mire jo̧rȩtapea̧ oa. Jabo dai oa cjiamȩ chjacjiamȩrea̧ pio ju̧i̧ chjiari jo̧rȩtamȩrȩ yo̧dëquidibë jabo. Jabechji̧ dibëa̧ cö̧ pio ju̧i̧ chjiari, taria̧ oa cjiapea̧ pio ju̧i̧ chjiari yo̧dëquidibë. Orora̧ japea̧ oa cjiamȩ tjärichji oa i̧a̧pea̧ pio ju̧i̧, chjibo ba chia tjamo̧ oa ina̧pea̧ pio ju̧i̧ jo̧rȩtamȩrȩ yo̧dëquidibë.

⁴ Jabo jabechji̧ mȩnȩro̧ dibëa̧ chji̧ra̧ jo̧rȩta̧ pio ju̧i̧ jo̧rȩtaquë ca̧ oti̧. Danȩro̧, dibëa̧ tjoro pio ju̧i̧ chjacjiamȩri̧ cjiatä eaquidibë. Jabechji̧ ji̧dë ma badë maea oa ni̧bä chjaodëchji̧je, jabo ba chia maea oa ni̧bä chjaochji̧je, ma̧ȩ goae maeara̧. Ado o judiro̧ dibë ma̧i̧ dari̧ japea̧räbo, jabechji̧ ba dëbë japadëchji̧ji̧ri̧, jabo jabechji̧ cjiadiämi̧ tarari̧ jo̧rȩtachji̧je, ma̧ chjupi̧ cjiari̧ jo̧rȩtaji̧ri̧rȩ, Ütë tjamo̧ pio ju̧i̧iäpȩmo̧ chjuari̧ quëna̧ji̧ri̧rȩ. Jabechji̧ dai oa cjiamȩ ina̧rea̧ chjacjiamȩ üdë chjaodëri̧ yuropapadi. Tjärichji chjacjiamȩ üdë goarijäpadi. Tjamo̧ davä. Dai oa cjiamȩ chjacjiamȩrea̧ üdë chjaodëri̧ yuropapadi, jabo dibëa̧ tjoro ja̧ chjacjiamȩ tjamo̧rea̧ üdë, cjäri̧ madi, goarijädëmȩdi. Tjamo̧ davä. Goarijädëmȩdi, ado ba chia tjamo̧di Ütë tjamo̧ pio ju̧i̧iä.

⁵ Jabechji̧ no̧mȩ tjamo̧ri ja̧ cjo̧ro̧rëreji̧ri̧ ivi pio jini̧ro̧, Ütë tjamo̧ ja̧ oa tutia̧ oa cjiarëreji̧ri̧ pio jini̧ro̧ peaja̧di dari̧ cjo̧ro̧rëreji̧ri̧ni̧ro̧. Jabechji̧ Ütë tjamo̧ pio ju̧i̧ quëna̧ji̧ri̧rȩ chjadëri̧ ta̧rëdiärëreji̧ri̧ni̧ro̧ji̧ri̧ jibëa̧ oari pio ji̧ri̧. Jabechji̧ jibëa̧ tjoro ja̧ chjacjiamȩrea̧ra̧ pio ju̧ri̧ra̧ ina̧ oa cjiami̧ dari̧ cjiarëreji̧ri̧ni̧ro̧.

⁶ Jabechji̧ Abaraa̧ pio ju̧i̧rea̧ ja̧ iei̧ pio ji̧ni̧ ja̧di dari̧ cjo̧ro̧rëreyi̧ni̧. Tjamo̧ davä. Chara quȩyi̧rea̧ pio jini̧ jibëa̧ üi̧ pio ju̧i̧ chjadëri̧ ta̧rëdiärëreyi̧ni̧ji̧. Jabechji̧ “tjamo̧ yo̧mȩrenȩ” yo̧yi̧rȩ yo̧rëreyi̧ni̧ji̧. Ado mȩnȩro̧ Chara pio ji̧ cho̧rëdiärä judi, mȩnȩro̧ Chara pio ji̧ cho̧rëdiäji̧ri̧rȩ japarä judi, jabechji̧ dibëa̧ oari pio ji̧ri̧ uapadëji̧ri̧rȩ coëma cjiari̧ cjo̧ro̧panȩro̧, Chara pio ji̧rea̧ ja̧ u̧ri̧mi̧ dari̧. Ado ja̧di dari̧ cjo̧ro̧tä eaquidibë ca̧ oti̧. Jabechji̧ dibëa̧ oari pio ji̧ri̧ chjadëri̧ ta̧rëdiätä eaquidibë. Aja̧, pio ju̧i̧mo̧i̧ ma̧ȩ oa go̧ȩpe chjadüquidibë oari chiaji̧ri̧ ivi pio ji̧ri̧.

Oari judiro̧ chjadëri̧ jidatäreji̧ri̧diro̧jȩrȩ jibëa̧ ivi pio ji̧ri̧, tjamo̧ri̧ ju chiadëji̧ri̧ pio ji̧ri̧

⁷ Ado mȩnȩro̧, ivi chiaji̧ri̧ oari pio judiro̧, peaja̧di chjadëri̧ ëba cjo̧ro̧täreji̧ri̧renȩro̧jȩrȩ dibëa̧ ivi pio ji̧ri̧. Chjadëri̧ jidachji̧jȩrȩ ju chia tjamo̧dëji̧ri̧ pio ji̧ri̧. Jabechji̧ mȩnȩro̧ ju chiami̧ ju chiadëni̧rȩ. Jibëa̧ icjara üdë ju chia tjamo̧dëde. Ado pio ju̧i̧iä jabechji̧, cjäri̧ri̧ cjia dachji̧jȩrȩ, chjadëri̧ jidaji̧ri̧rȩ. Jabechji̧ Ütërë cjäri̧ri̧ cjiamȩrȩ yürüa̧ pio ju̧i̧ bucho ana̧ cjo̧ro̧rea̧ chiaji̧ri̧pea̧nȩrȩ dibëa̧ ivi pio ji̧ri̧ nö̧ta. Tjamo̧ davä. Mȩnȩro̧ yo̧a̧ri̧borë pio jiro cjo̧ro̧rea̧ chiaji̧ri̧pea̧nȩrȩ pio judirimȩ maearë yürüa̧ pio ju̧i̧. Ado pio ju̧i̧iä ba chia daji̧ri̧rȩ chjadëri̧ ëba cjo̧ro̧chji̧jȩrȩ. Tjamo̧ davä ca̧ oti̧, ja̧di dari̧ ëba cjo̧ro̧täreji̧ri̧renȩro̧jȩrȩ, mȩnȩro̧ Ütë tjamo̧ pio ju̧i̧iä goë cjo̧dëa̧ üdë tutia̧ oa cjiadiämi̧ dari̧ cjiadiächea oa. Danȩrȩ ca̧ oti̧, eami̧ pumȩrȩ jibëa̧ iei̧ pio ji̧ chjadëri̧ ëba cjo̧ro̧dërä judi, jibëa̧ iei̧ pio ji̧ nö̧ta chjadëri̧ jëdano̧dërä judi, jibëa̧ iei̧ pio ji̧ nö̧ta ori̧ bagari̧ ëba cjiarea̧ dadërä judi, peaja̧di ori̧ bagari̧ ëba cjiarea̧ dadëde Ütë tjamo̧ pio ju̧i̧ nö̧ta. Ado pio ju̧i̧iä pio jiro pumȩ judi Ütë tjamo̧ ju̧i̧iä goë cjo̧dërä judi, cjäri̧ madejȩ, goaeri̧ ta̧rëdëpadejȩ, jabo tutia̧ oa cjiadiämi̧ dari̧ cjiapadejȩ jȩnȩ cjo̧dëa̧ üdë. Aja̧ ca̧ oti̧, tutia̧ oa cjiadiämi̧ dari̧ cjiadiäpade. Ado pio ju̧i̧iä pio jiro ma̧ȩ oa go̧ȩpe chjadürequededibe ivi chiaji̧ri̧ oari pio ji̧ri̧iäpȩmo̧, mȩnȩro̧ dibëa̧ jadü pio ji̧ri̧ chjadëri̧ ëba cjo̧ro̧pea̧ oa, mȩnȩro̧ chjaodëri̧ jëdano̧pea̧ oa pio ji̧ri̧ nö̧ta.

O judiro̧ pio ibëiäpȩmo̧ chjai̧dëri̧ japea̧räbo, chjadëri̧ japa matäreji̧ri̧rea̧ro̧jȩrȩ, bape chjaorea̧ decjiari̧

⁸ Pio yoa a̧ra̧ano̧rea̧ ma̧ȩbo a̧de go̧ȩpatämi̧ cjiarequededibe ca̧ oti̧. Quëna̧ji̧ri̧ ütëbo oa go̧ȩpe chjadürequededibe chjadëri̧ ëba cjo̧ro̧pea̧ pio ju̧i̧ chjiari. Danȩrȩ, cja̧rȩmȩ chji̧ chiami̧ dari̧ jo̧rȩtachji̧vä. Cjäri̧ri̧ cjia dachji̧jȩrȩ quëna̧ji̧ri̧ pio ji̧ri̧. Jabechji̧ o judiro̧ gito ana̧ri̧ jo̧rȩtarä, a̧dë dami̧ dari̧ japadëchji̧jȩrȩ, jabo chjadëri̧ a̧dochji̧jȩrȩ, pio ji̧ri̧ nö̧ta chjai̧dë oa chjätämi̧ dari̧ jo̧rȩtaji̧ri̧rȩ. Jabechji̧ tjamo̧ri̧ eachji̧jȩrȩ, bücjüri̧ cjiaji̧ri̧rȩ. Dibëa̧ chji̧rämo̧ quëna̧tadëchji̧vä, jabo ütëbodärä oa chjadëri̧ dachji̧jȩrȩ, ‘o ji̧ri̧ u̧i̧ ba chiaquëda’ quëna̧rea̧ decjiari̧.

⁹ Ado pio dibëiäpȩmo̧ chjai̧dëri̧ japamȩ pio ju̧i̧ ba dëbë goëdëri̧ cjiadëchji̧jo̧ȩ. Pio dibëiäpȩmo̧ goae tarari̧ ya̧mȩ pio ju̧i̧, jabechji̧ ba dëbë ya̧dëchji̧jo̧ȩ. Mȩnȩro̧ goae tarari̧ bape chjaotärea̧ ji̧, jabechji̧ Ütë tjamo̧ pio ju̧i̧iä goë cjo̧dëchji̧vä pio ju̧i̧ chjiari. Tjamo̧ davä. Pio dibëiäpȩmo̧ chjai̧dëri̧ japamȩ pio ju̧i̧ chjiari goë cjo̧dëchji̧vä Ütë tjamo̧ pio ju̧i̧iä, judi pio ju̧i̧iäpȩmo̧ chjadëri̧ japatä. Jabechji̧ ca̧ oti̧, ja̧di dari̧ cjo̧ro̧pea̧ oa ëna̧diärëremȩdidibe Ütë tjamo̧ judi. Ado mȩnȩro̧ ja̧di dari̧ cjo̧ro̧a̧ oaiä, jabechji̧ japamitë chjätä ëte a̧dë chjäte chjadë oa yürüpadidibe Ütë tjamo̧ judi.

¹⁰ Peaja̧di ta̧rëri̧ go̧ȩpea̧ oa cjiarëremȩde ma̧ȩ üdë no̧mȩ tjamo̧ri ja̧, Ütërë go̧ȩpa tänȩrërea̧ ma̧ȩ pio judi. Ta̧rëchji̧vä: “Eami̧ pumȩ üdë chjadëri̧ cjo̧ro̧tämi̧ cjiarä judi, ma̧ chiadëri̧ cjiamȩrȩ cjo̧ro̧tämi̧ cjiarä judi, jabechji̧ chjadëri̧ jidatäremȩdejȩ jibëa̧ tjopono̧ oa chjai̧dëri̧ ni̧bächea oa. Jabechji̧ chjadëri̧ jidatäremȩdejȩ jibëa̧ ya oa u̧i̧pe ni̧bächea oa.

¹¹ Jabechji̧ ma̧ chiadëri̧ cjiamȩrȩ cjo̧ro̧tämi̧ cjiamȩ pio judi putu jura̧ a̧dë chami̧ dari̧ jiadatäremȩdejȩ chjai̧dë oa, chjadë pio ju̧i̧mo̧i̧ japapea̧ oa. Ado jënȩ nö̧tarä yuro järi tjamo̧täremȩde peaja̧di jibëa̧ pumȩ pio ji̧ri̧ nö̧ta chjadëri̧ ëba cjo̧ro̧pea̧ oa.

¹² Jabechji̧ coëma cjiari̧ cjo̧ro̧ji̧ri̧ pio ji̧ri̧ daba dadejȩrȩ Ano̧mȩ tjamo̧ judi. Ado chjadëri̧ jidadejȩrȩ. Ado pio jiro pumȩ judiro̧ pio jȩaiä goë cjo̧dëji̧ri̧ pio ji̧ri̧, jabechji̧ ta̧rë ja̧bodejȩrȩ. Jabo chjai̧dëri̧ jape chjaoji̧ri̧ pio ji̧ri̧, cjäri̧ madejȩrȩ, dëbëpe chjaodejȩrȩ.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë a̧ro̧rȩ ji̧dë u̧i̧ na̧e chiape bagarea̧ dapea̧ oa. Ado pio ju̧i̧iä ja̧di dari̧ cjo̧ro̧chji̧vä. Jabechji̧ goë cjo̧dëchji̧vä pio dibëiäpȩmo̧ chjai̧dëri̧ japaji̧ri̧ pio ji̧ri̧ chjiari, Ütë tjamo̧ judi pio ji̧ri̧iäpȩmo̧ chjadëri̧ japatä. Jabechji̧ ja̧di dari̧ cjo̧ro̧pea̧ oa ëna̧diärëremȩdidibe Ütë tjamo̧ judi. Ado mȩnȩro̧ ja̧di dari̧ cjo̧ro̧a̧ oaiä, jabechji̧ chjadëri̧ jidapadidibe.

Chjai̧dë oa chjätäpai̧ darea̧rȩ a̧ro̧rȩ chjadëri̧ japea̧ ba oa

¹³ Ado pio ju̧i̧ uëri a̧de yo̧mȩrȩ yo̧requededibe ca̧ oti̧. Danȩrȩ, mȩnȩro̧ coëma cjiari̧ cjo̧ro̧pea̧ ji̧ ji̧dë ma järirä judi, jabechji̧ gitori̧ tara tänȩdëpa jirodiro̧dibe pumȩ judiro̧.

¹⁴ Jabo mȩnȩro̧ coëma cjiari̧ cjo̧ro̧a̧räbo gitoi̧ dari̧ tara tänȩa̧ oa cjiarä judi, jabechji̧ chjadëri̧ ba ano̧padidibe Ütë tjamo̧ judi. Ado pio ju̧i̧iä jabechji̧, ji̧dë ma chjadëri̧ japachji̧jȩrȩ pio dibëiäpȩmo̧ gitoi̧ dari̧ tara tänȩji̧ri̧ pio ji̧ri̧. Jabechji̧ uapadëchji̧jȩrȩ. Ado bücjüri̧ cjiadëchji̧vä pio ji̧ri̧ chjiari, jabo chjadëri̧ japachji̧jȩrȩ judiro̧ pio dibëiäpȩmo̧ chjai̧dëri̧ japea̧ ba oa.

¹⁵ Jabechji̧ mȩnȩro̧ pio ji̧ri̧ chjiari ana̧ri̧ jo̧rȩtatärea̧ ji̧, ana̧ri̧ jo̧rȩtadëchji̧vä, jabo ji̧dë ma chjacjiamȩri̧ jo̧rȩtachji̧jo̧ȩ Quiricho pio ju̧i̧, ‘ca̧ Ano̧mȩ tjamo̧dida’ quëna̧ jo̧rȩtaji̧ri̧rȩ. Ado ji̧dë ma jo̧rȩtachji̧vä Ütë tjamo̧ ja̧ ma̧ȩra̧ pio ju̧ri̧ra̧ chjadëri̧ dëbë yo̧pea̧ ji̧. Jabechji̧ eami̧ pumȩ üdë chjaodëri̧ iëno̧ë iëno̧ ta̧rëpai̧ dadidibe. Tjamo̧ davä. Mȩnȩro̧ quëna̧ pio ju̧i̧ chjiari, mȩnȩro̧ jidata̧ pio ju̧i̧ chjiari, iëno̧ iëno̧ ta̧rëpai̧ dadidibe. Ado pio ju̧i̧iä jabërä chjadëri̧ jëdano̧a̧ oa goatäreji̧ri̧nȩrȩ pio ju̧i̧iäpȩmo̧ chjadëri̧ dëbë yo̧pea̧ oa mȩnȩro̧ Ütë tjamo̧ ja̧ ma̧ȩ oa quëna̧ pio ju̧i̧ chjiari, mȩnȩro̧ uapadëji̧ri̧rȩ cjo̧ro̧a̧ pio ju̧i̧ chjiari.

¹⁶ Jabo badë daji̧ri̧rȩ dëbë ni̧bädëchji̧jo̧ȩ, jabo ba chia daji̧ri̧rȩ chjadëri̧ ni̧bächji̧jo̧ȩ, ma̧ȩ bücjüi̧ra̧ ni̧bä chjaoji̧ri̧rȩ. Ado danȩrȩ ca̧ oti̧, dibëa̧ chji̧ üdë dibë aechidemi̧ dari̧ japachea oa, jabechji̧ mȩnȩro̧ dabapea̧ ma̧ȩrä ji̧dë ma coëma cjiari̧ cjo̧ro̧chji̧vä, dibëa̧ chji̧ üdë dibë japachea oa, mȩnȩro̧ chji̧ goae maeara̧ jo̧rȩtariä cjo̧ro̧pea̧ oa. Jabechji̧ o judiro̧, mȩnȩro̧ Quiricho pio ju̧i̧iäpȩmo̧ quëna̧ji̧ri̧pea̧ pio oaiä, mȩnȩro̧ ado cja̧rȩmo̧ no̧mi̧ darä ano̧ mire cjo̧ro̧ji̧ri̧pea̧ oaiä, ji̧dë ma chjai̧dëri̧ ni̧bäpai̧ dadirȩ pio dibë chjiari. Jabo mȩnȩro̧ ma̧ȩ oa babui̧ra̧ ta̧rëräbo, jabechji̧ ji̧dë ma coëma cjiari̧ cjo̧ro̧chji̧vä, pio judiro̧ idëri̧ cjiaji̧ri̧rȩ cjiadiäpea̧ oa, judiro̧ pio dibë chjiari yo̧a̧ ma̧ȩ üdë oëra̧ cjiadiämi̧ dari̧ cjiadiäpea̧ oa.

¹⁷ Danȩrȩ ca̧ oti̧, mȩnȩro̧ ji̧dë ma coëma cjiari̧ cjo̧ro̧räbo gitori̧ tarapai̧ danȩrȩ, Ütërë conȩdarea̧ yürürä judi. Jabo mȩnȩro̧ gitori̧ tara tänȩa̧ oa cjiarä judi, jabechji̧ chai̧dë oa japea̧ pio ju̧i̧iä taradëtäreji̧ri̧nȩrȩ. Ado pio ju̧i̧iä yo̧requededibe. Mȩnȩro̧ gitoi̧ dari̧ tara tänȩa̧ oa cjiarä judi, jabechji̧ chjai̧dë oa japea̧ pio ju̧i̧iä taradëtäreji̧ri̧nȩrȩ, jabo coëma cjiari̧ cjo̧ro̧a̧ pio ju̧i̧iämo̧i̧ taratäreji̧ri̧nȩrȩ. Jabechji̧ ja̧di dari̧ cjo̧ro̧tä eadidibe Ütë tjamo̧ judi.

¹⁸ Danȩrȩ, Quiricho pio judiborë conȩda̧ oa cjiarëremȩde Ütë tjamo̧ pio judi tänȩa̧ oaiä. Jabechji̧ judi coëma cjiari̧ cjo̧ro̧a̧räbo, ma̧i̧ dari̧ conȩdarëreji̧ri̧diro̧jo̧ȩ. Jabechji̧ cja̧rȩmȩ co chjai̧dëri̧ japadëmȩrȩ ano̧ mire ja̧borëremȩde ji̧ra̧ co chjai̧dëri̧ jape chjaoji̧ri̧ pio ji̧ri̧ chjiari, ibë chjadëri̧ ëba baämi̧ dari̧ japapea̧ oa Ütë tjamo̧ pio ju̧i̧iäpȩ. Jabechji̧ cja̧rȩmȩ co maea ja̧borëremȩde, ado judiri ja̧bodëpade. Aja̧, jibëa̧ icjara oa ja̧bo tänȩrëreji̧ri̧diro̧jo̧ȩ, jabo Tjo tjamo̧ pio ju̧i̧iä bëdüa̧ oa cjiarëremȩde.

¹⁹ Ado Jechu judi jibëa̧ tjo maeara̧ jämȩrȩ järëremȩde ja̧boa̧ji̧ri̧ pio judiro̧ tutia̧ oa cjiamȩräpȩ ju̧ri̧. Tjamo̧ davä. Tutia̧ oa cjiaji̧ri̧ pio ji̧ri̧iäpȩmo̧ to̧bari̧ ni̧bä chjaopea̧ oa, tjo maearë cjiaji̧ri̧ pio ji̧ri̧iäpȩmo̧ pio jȩa chjiari daba tänȩpea̧ oa järëremȩde. Jabechji̧ pio ji̧ri̧iäpȩmo̧ ma̧ȩ yürüpea̧ oa, jënȩ toro ja̧boa̧ pio ju̧i̧ chjiari na̧e chia tänȩpea̧ oa, jënȩ chjai̧dë pio ju̧i̧ boadäräa̧ pio ju̧i̧ chjiari ma̧ȩ yürüpea̧ oa järëremȩde pio ji̧ri̧iäpȩ, pio ji̧ri̧iäpȩmo̧ ëna̧dië ëna̧dië ni̧bäpea̧ oa.

²⁰ Jabo pio jiro pumȩ judiro̧, tjo maearë cjiaji̧ri̧ pio judiro̧ jabërä ta̧rë ja̧botärea̧ ji̧, Noerea̧ pio ju̧i̧ jabërä chjadëri̧ ta̧rë ja̧botärea̧ ji̧, judi chara ana̧ oa ja̧bepea̧rä chjadëri̧ ta̧rë ja̧botärea̧ ji̧, cjäri̧ madiro̧jo̧ȩ, ta̧rë ja̧bodë marëreji̧ri̧diro̧jo̧ȩ. Ado pio ju̧i̧ jiadarërea̧mi̧ peaja̧dimi̧ dari̧ jiadarëreji̧ri̧diro̧jo̧ȩ Jechu pio ju̧i̧. Jabechji̧ Ütë tjamo̧ pio judi jëreeadëmȩrȩ ma̧ chjua jidatatea̧räbo, cjäri̧ madiro̧jo̧ȩ, chjuari̧ jiadarëreji̧ri̧diro̧jo̧ȩ Noerea̧ pio ju̧i̧. Ado pio ju̧i̧iä pumȩ ji̧ra̧dërë, jabo 8 maearë quëna̧rëreji̧ri̧dirȩ. Ado pio judiro̧ uirä je mu̧i̧ ja̧botärea̧ ji̧, chararä yu̧a̧ji̧ri̧rȩ chjätärea̧ darëreji̧ri̧dirȩ ui ana̧ oa.

²¹ Ado pio jiro ui ana̧ üdë na̧rȩdiibe uirä go̧e cjaeä chudapea̧ pio ju̧i̧ chjiari. Danȩrȩ, a̧ro̧rȩ uirä go̧e cjaeä chuda̧ oa cjiarä, jabechji̧ na̧rȩde pio ibë chjiari. Igȩrȩ chiadëpe bagari̧ joadërea̧de, jabo na̧rȩrea̧de. Jabechji̧ na̧rȩde a̧ro̧rȩ Ütë tjamo̧ ja̧ ma̧ȩrämo̧ tjamo̧ri̧ cjo̧ro̧tämi̧ cjia̧ pio ju̧i̧ chjiari, a̧ro̧rȩ jo̧rȩtarea̧ peaja̧ maeara̧ ano̧ mire jo̧rȩtariä cjo̧ro̧tämi̧ cjia̧ pio ju̧i̧ chjiari. Ado pio ju̧i̧iä cho̧rëdiärea̧ro̧jȩrȩ pio jiro pumȩ ji̧ri̧, chara ana̧rä yu̧a̧rëreji̧ri̧ pio ji̧ri̧. Danȩrȩ ca̧ oti̧, ui ana̧ üdë acji jana̧ oaiä, judiro̧ chara ana̧rä yu̧a̧ oaiä, jabechji̧ jënȩro̧ pearä jo̧rȩtarërea̧ chjö̧na̧i̧ oa a̧dë ja̧boa̧mi̧ dari̧ cjiapea̧ oa yu̧a̧rëreji̧ri̧dirȩ, ado cja̧rȩmo̧ jo̧rȩtarea̧ peaja̧ra̧ pio ju̧ri̧ra̧ ano̧ mire jo̧rȩtapea̧ oa. Ado peaja̧dimi̧ dari̧ ano̧ mire jo̧rȩtaji̧ri̧pea̧nȩrȩ ca̧ oti̧. Jabechji̧ mȩnȩro̧ ado cja̧rȩmo̧ jo̧rȩtarea̧ra̧ tüdüa̧mi̧ darä cjo̧ro̧rërea̧ ji̧, mȩnȩro̧ ado cja̧rȩmo̧ jo̧rȩtarea̧ra̧ jo̧rȩtariä cjo̧ro̧rërea̧ ji̧, a̧dë ja̧boa̧mi̧ dari̧ quëna̧ji̧ri̧pea̧nȩrȩ ado cja̧rȩmo̧ jo̧rȩtarea̧ra̧ ano̧ mire jo̧rȩtapea̧ oa, cjo̧ro̧rea̧ peaja̧ oa yürümȩ ma̧ȩ maeara̧ ano̧ mire jo̧rȩtariä cjo̧ro̧pea̧ oa. Ado pio jiro cjo̧ro̧rea̧ peaja̧ pio ju̧i̧ chjiari na̧rȩde uirä go̧e cjaeä chudapea̧ üdë. Ado pio jiro cjo̧ro̧rea̧ peaja̧ üdë, jabechji̧ yürüa̧ oa cjiarëremȩde Jechu Quiricho pio judi bëdürërea̧ oaiä.

²² Aja̧, bëdürëremȩde. Ado peadëri ja̧ buarëremȩde a̧dëräpȩ Ütë tjamo̧ pio ju̧i̧ ja̧ mu̧i̧ chjua cotoräpȩ ju̧ri̧ chadäräpea̧ oa. Ado tjamo̧ yo̧mȩrȩ cjiade yaba̧. Jabechji̧ a̧dëräpȩ cjiaji̧ri̧ mu̧i̧tjoi̧ pio judiro̧, yaröca tjamo̧ yo̧ji̧ri̧ pio judiro̧, ado eami̧ tjamo̧ yo̧ji̧ri̧ pio judiro̧, jabechji̧ judiro̧ ütëbodärärë pio ju̧i̧ ja̧ chja̧oerämo̧ cjiami̧ dari̧ cjiadirȩ. Jabechji̧ Quiricho judi coëma cjiari̧ cjo̧ro̧a̧räbo, jibëa̧ Ama̧i̧ pio ju̧i̧ ja̧ ma̧ȩrä ji̧dë ma cjo̧ro̧a̧räbo, gitoi̧ri̧ conȩda̧ oa cjiarëremȩde. Jabo ja̧dëa ji̧ judi ma̧i̧ da chjai̧dë oa chjätä ëte, ¿tjana̧ oa japarëremȩdejȩ Ütë tjamo̧ judi? Tjana̧ oadë, jabechji̧ ba chia tjamo̧räpȩ cha tänȩrëremȩdejȩ. Tjamo̧ davä. A̧dëräpȩ ju̧ri̧ pio jȩa nö̧ta ëba cjiapea̧ oa, ba chia tjamo̧parȩrëremȩdejȩ. Ado danȩrȩ ca̧ oti̧, peaja̧di dari̧ japapadiibe Ütë tjamo̧ judi. Pio ibëbo ba chiaparȩpadiibe. Jabo a̧ro̧rȩ pio yoa chiri oa jabë cjo̧ro̧a̧ nö̧ta, dëdë, dami̧ti̧ chjai̧dë oa chjätäpai̧ darea̧rȩ. Gitori̧ conȩda̧ oa tarapai̧ darea̧rȩ. Jabo a̧ro̧rȩ ibëa̧ Ama̧i̧ pio ju̧i̧iäpȩmo̧ chjuari̧ quëna̧ji̧ri̧rȩ cjo̧ro̧a̧ oaiä, ma̧ chjua jo̧rȩtaji̧ri̧rȩ cjo̧ro̧a̧ oaiä, jabechji̧ pio ibëbo ba chiaparȩpadiibe cjiadiäa̧ japamitërä.