Pedro Ma̧ȩ 1 2 - Biblia Pume

Tjamo̧ goë chamȩ ta̧dëmi̧ damȩ pio ju̧i̧ ja̧ chja̧oerä chjadëri̧ cjo̧ro̧pea̧ oa, ji̧dë ma järichji̧vä dibëa̧ tjo ja̧ yö̧cömi̧ da pio ju̧i̧ jarariä cjo̧ro̧pea̧ ji̧

¹ Ado mȩnȩro̧ Ütë tjamo̧ ja̧ ma̧ȩ pio oaiä ado nö̧ria̧ oa cjiaji̧ri̧pea̧ tara, jabechji̧ dami̧ti̧ chjai̧dë jo̧rȩtarea̧ oa aeno̧chji̧vä ca̧ oti̧. Jabechji̧ ma̧ȩ chjádë yürüdëchji̧vä. Ado ‘pumȩ chjadëquëda’ quëna̧cji̧ quëna̧ japaji̧ri̧rȩ u̧i̧padëchji̧jȩrȩ o ji̧ri̧. Ado pumȩrȩ goa̧ pio ju̧i̧ dae ja̧bo dae ja̧bo dadëchji̧vä. ‘Aja̧, goadida, coa u̧i̧ ji̧ra̧ri̧ goadida’ quëna̧ jo̧rȩji̧ri̧rȩ ma̧ cjüëtüri̧ jo̧rȩtadëchji̧vä. Ado chjai̧dëri̧ ni̧bädëchji̧vä quëna̧ji̧ri̧ pio ji̧ri̧ chjiari.

² Aja̧ ca̧ oti̧, mȩnȩro̧ ja̧dimi̧ dari̧ jape chjaorërea̧ ji̧, jabechji̧ pea nö̧ria̧ oa cjiami̧ dari̧ cjiaji̧ri̧pea̧nȩrȩ. Ado pea nö̧ria̧ oa cjiaji̧ri̧rȩ chuchu cö maea oa jaratämi̧ cjiaji̧ri̧mi̧ dari̧ ji̧dë ma järichji̧vä dibëa̧ tjo ja̧ yö̧cö̧ uimi̧ da oa jarapea̧ oa, Ütë tjamo̧ ja̧ ma̧ȩ pio ju̧i̧ dabapapea̧ oa. Jabechji̧ ja̧dimi̧ dari̧ jara chjaoa̧ oaiä ji̧dë u̧i̧ ütëchjai̧pe bagarea̧ dapanȩrȩ üi̧padäräa̧mi̧ dari̧ cjo̧ro̧a̧rä yuro, mȩnȩro̧ a̧dëräpȩ go̧düdäräa̧rä yuro.

³ 'Jabechji̧ ibëa̧ Ano̧mȩ judi chjadë tjamo̧diibëda, chjamȩrȩ jape chjaodiibëda’ quëna̧ dabaji̧ri̧pea̧nȩrȩ peadëri ja̧.

^4-5 Danȩrȩ ca̧ oti̧, a̧ro̧rȩ Ütë tjamo̧ ja̧ ma̧ȩ oa ji̧dë ma dabapaji̧ri̧rȩ cjo̧ro̧a̧ oaiä, ji̧dë u̧i̧ ütëchjai̧pe bagarea̧rȩ. Ado a̧ro̧rȩ ji̧dë u̧i̧ ütëchjai̧pe baga̧ oaiä, ji̧dë u̧i̧ queri̧räpȩ cjiami̧ dari̧ cjiarea̧rȩ ibëa̧ Ano̧mȩ Jechu pio ju̧i̧ nö̧ta, ibë cjo̧ro̧rea̧ yürümȩ pio ju̧i̧ nö̧ta. Ado goë cji̧däriä baämi̧ dari̧ japadiibe jibëa̧ bëmi̧ darä, taru a̧rȩmȩ chjadëmi̧ darä, cji̧däa̧ oa cjiamȩ bëmi̧ darä. Jabechji̧ quëna̧ji̧ri̧ pio ji̧ri̧iä cji̧däa̧ oa cjiami̧ dari̧ cjiade jibëa̧ bë üdë a̧ro̧rȩ pio ju̧i̧iäpȩmo̧ chjacjiamȩri̧ jo̧rȩtapea̧ oa, a̧ro̧rȩ pio ju̧i̧iäpȩmo̧ ma̧ȩ goaera̧ ni̧bäpea̧ oa. Tjamo̧ davä. Cjo̧ro̧rea̧ chiamȩ ta̧dëmi̧ da oa goë cji̧däriä baämi̧ dari̧ japadiibe jibëa̧ bëmi̧ darä, ta̧dë ji̧ra̧ tjamo̧mi̧ da oa. Danȩrȩ ca̧ oti̧, eami̧ pumȩ üdë jibëa̧ bë oa ta̧dëra̧ pio ju̧ri̧ra̧ cji̧därä judi, jabechji̧ taru a̧rȩmȩ pio ju̧i̧ cji̧dädejȩ yabochja. Ado pio ju̧i̧ tarupë cji̧därä, jabechji̧ buräpȩ ju̧ri̧ yabochja arëchädejȩ tjamo̧ goë chamȩ ta̧dë pio ju̧i̧. Ana̧ tjamo̧ oa, chjadëri̧ chjuroa̧ oa cjiamȩ oa arëchädejȩ buräpȩ ju̧ri̧. Jabechji̧ tjamo̧ goë chamȩ ta̧dëri pio judiri baäde taru a̧rȩmȩ üdë. Ado ja̧dëa ji̧ taru a̧rȩmȩ pio ju̧i̧ chjadëri̧ cji̧däa̧ oa goarä, jabechji̧ pio ju̧i̧ uëmo̧ ta̧dë ji̧ra̧ tjamo̧ oa goë cji̧dädejȩ ji̧mo̧ cjia maeari̧, chjuari̧ cjia maeari̧, cja̧rȩmȩ codë maearë cjiari̧. Ado danȩrȩ ca̧ oti̧, ibëa̧ Ano̧mȩ Jechu pio judi tjamo̧ goë chamȩ ta̧dëmi̧ dade. Jabechji̧ pio judiri ja̧ maearë chjuari̧ goë cji̧däa̧ oa cjiami̧ dari̧ cjiarea̧rȩ jibëa̧ bëmi̧ darä. Pio ju̧i̧iä cjo̧ro̧rea̧ chiarea̧rȩ. Danȩrȩ, Ütë tjamo̧ pio judi mitërëremȩdejȩ tjamo̧ goë chamȩ ta̧dëmi̧ damȩ pio ju̧i̧, ‘ba chia tjamo̧dida’ quëna̧ jo̧rȩtamȩrȩ. Ado o judiro̧ peaja̧dimi̧ dari̧ jo̧rȩtatärea̧ ji̧, peaja̧di ba chia datärea̧ ji̧, cjäri̧ madiro̧jo̧ȩ, ba chia dadëa̧diro̧jo̧ȩ, jabo ta̧dë teracabami̧ da oa darëreji̧ri̧diro̧jo̧ȩ, ba chiadëmȩmi̧ da oa. Jabo Ütë tjamo̧ pio judi mitërëremȩdejȩ. Jabo dai oa cjiamȩ bërä arëchäpea̧ oa mitëdërëremȩdejȩ jabo. Pumȩ pio judiro̧ japea̧ bërä arëchäpea̧ oa, dai chirirä ja̧ bërä cji̧däpea̧ oa mitëdërëremȩdejȩ, jabo jibëa̧ bëmi̧ darä arëchäpea̧ oa mitërëremȩdejȩ. Jabo dëdë, o judiro̧ chjuari̧ jiadadiro̧jo̧ȩ, jabo ja̧di dari̧ japadërëreji̧ri̧renȩrȩ ca̧ oti̧. Badë dadëa̧renȩro̧jo̧ȩ, jabo ba chia darëreji̧ri̧renȩro̧jo̧ȩ. Ado pio ju̧i̧iä jabechji̧, mȩnȩro̧ Ütë tjamo̧ pio ju̧i̧ ja̧ queri̧räpȩ jämi̧ dari̧ japarä, jabechji̧ Ütë tjamo̧ pio judi goë cji̧däriä baämi̧ dari̧ japadidibe jibëa̧ bëpe bagarea̧mi̧ dari̧. Tjamo̧ davä. Cjo̧ro̧rea̧ peaja̧ oa chiamȩ ta̧dëmi̧ da maea oa, ji̧ra̧ tjamo̧ oa goë cji̧däriä baämi̧ dari̧ japadidibe ca̧ oti̧, ji̧mo̧ ma cjiape bagapea̧ oa, pio ju̧i̧ ja̧ bëpe bagami̧ dari̧ cjiapea̧ oa. Jabechji̧ pio judi bëpapea̧ oa, goë cji̧däriä baämi̧ dari̧ japadiibe a̧ro̧rȩ pio ju̧i̧ ja̧ oa ja̧bepapea̧ oa, a̧ro̧rȩ pio ju̧i̧iäpȩmo̧ chjacjiamȩri̧ jo̧rȩtapea̧ oa. Danȩrȩ ca̧ oti̧, a̧ro̧rȩ quëna̧ji̧ri̧ pio judiro̧ ütëborë goë tuti ja̧bepaji̧ri̧pea̧rea̧rȩ. Tjamo̧ davä. Ütë tjamo̧ ja̧ bëmi̧ darä ja̧bepapea̧ oa, goë tuti ja̧bepaji̧ri̧pea̧rea̧rȩ. Jabo danȩrȩ, ¿tjana̧ oa japadirȩ Ütë tjamo̧ ja̧ bërä goë tuti ja̧bepaji̧ri̧ pio judiro̧? Tjana̧ oa japadë, jabechji̧ ji̧dë ma goe gu̧rori̧ cäë yürüji̧ri̧rȩ ja̧bepadirȩ. Jabo danȩrȩ ca̧ oti̧, dai chirirä cjo̧ro̧mȩ pio ju̧i̧ goe gu̧rori̧ cäë yürüdë marea̧ro̧jo̧ȩ. Tjamo̧ davä. Dai chirirä ja̧ oveja oa, dai chiri ja̧ chivo oa goe gu̧rori̧ cäë yürüdë marea̧rȩ, jabo Tjo tjamo̧ ja̧ chja̧oerä cjiaji̧ri̧rȩ cäë yürümi̧ dari̧ yürürea̧ro̧jo̧ȩ dami̧ti̧ ba chia oa. Jabechji̧ a̧ro̧rȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩta oaiä, a̧ro̧rȩ chjacjiamȩri̧ ni̧bä oaiä, cäë yürümi̧ dari̧ yürürea̧ro̧jo̧ȩ ca̧ oti̧. ‘Aja̧, Ütë tjamo̧ judi chjadëri̧ japea̧diibëda’ quëna̧ jo̧rȩta̧ oaiä, cäë yürümi̧ dari̧ yürürea̧ro̧jo̧ȩ. Ado Jechu Quiricho judi pio ibë chjiari chjadëri̧ tuti japea̧ oaiä, jabechji̧ goae tjamo̧dejȩ davä Ütë tjamo̧ pio ju̧i̧iä, a̧ro̧rȩ cäë yürümi̧ dari̧ yürüa̧ üdë.

⁶ Danȩrȩ ca̧ oti̧, Jechu Quiricho pio ju̧i̧ chjiari jabërä go̧ȩpea̧ oa cjiarëremȩde ma̧ȩ üdë, Ütërë go̧ȩpa tänȩrërea̧ ma̧ȩrä. Ja̧di ta̧rëri̧ go̧ȩpea̧ oa cjiarëremȩde. Ta̧rëchji̧vä: “Danȩrȩ, ta̧dëmi̧ damȩ pio ju̧i̧, buräpȩ tjamo̧ goë chamȩ ta̧dëmi̧ damȩ pio ju̧i̧ mitëa̧reconȩ ba chia tjamo̧mȩ pio ju̧i̧. Ado Jerucharȩräpȩ pio ju̧ri̧ arëchäa̧reconȩ. Ado eami̧ pumȩ üdë, pio jiro ta̧dëmi̧ damȩ pio ju̧i̧iäpȩmo̧ quëna̧mȩ pio judi, jabechji̧ idëri̧ cjiamȩrȩ cjiadiädëpade.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë Jechu pio ju̧i̧ chjiari, tjamo̧ goë chamȩ ta̧dëmi̧ damȩ pio ju̧i̧ chjiari.

⁷ Ado pio ju̧i̧iä yo̧requededibe. Quëna̧ji̧ri̧ pio ji̧ri̧iä ba chia tjamo̧de ta̧dëmi̧ damȩ pio judi. Jabo quëna̧dëji̧ri̧ pio ji̧ri̧iä ba chiadëde. Ado pio ju̧i̧iä go̧ȩpea̧ oa cjiarëremȩde ma̧ȩ üdë. Ta̧rëchji̧vä: “Danȩrȩ, ta̧dëmi̧ damȩ judi, buräpȩ tjamo̧ goë chamȩ ta̧dëmi̧ damȩ pio judide. Pio ju̧i̧iä chjuari̧ cji̧däa̧ oa cjiade bëmi̧ da üdë. Jabo cjäri̧ madiro̧jo̧ȩ. Bë pio ju̧i̧ ja̧bepami̧ dari̧ cjiaji̧ri̧ pio judiro̧ jiada̧diro̧jo̧ȩ. ‘Chjadëdëde’ yo̧dirȩ pio ju̧i̧ chjiari. “Ba chiadëde” yo̧a̧dirȩ. Jabo cjäri̧ made, pumȩ judiro̧ jiada̧räbo, ‘ba chia tjamo̧dëdida’ quëna̧räbo, jabechji̧ a̧dë chjäte ba chiamȩpea̧de. Ado yaba̧ pio jiro ta̧dëmi̧ damȩ pio ju̧i̧iä chjua tjamo̧ri̧ cjiade bëmi̧ da üdë.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë, Jechu ju̧i̧ quëna̧dëji̧ri̧ pio ji̧ri̧ chjiari.

⁸ Ado danȩrȩ, pio yoa ma̧ȩbo a̧de go̧ȩparëreji̧ri̧dirȩ pio jiro pumȩ pio ji̧ri̧ chjiari, bë oa ja̧bepami̧ dari̧ cjiaji̧ri̧ pio ji̧ri̧ chjiari. Ta̧rëchji̧vä: “Jabechji̧ ta̧dëmi̧ damȩ pio ju̧i̧iä ta ano̧e cjatäji̧ri̧mi̧ dari̧ cjiadiäpadirȩ pumȩ judiro̧. Ado pio ju̧i̧iä toboe china̧däräji̧ri̧mi̧ dari̧ cjiadiäpadirȩ.” Aja̧, ja̧di ta̧rëri̧ go̧ȩpea̧ oa cjiade ta̧dëmi̧ damȩ pio ju̧i̧ eadëji̧ri̧ pio ji̧ri̧ chjiari. Ado tjamo̧i̧ cjiari̧ baäde ma̧ȩ üdë. Jabechji̧ Ütë tjamo̧ ja̧ ma̧ȩ pio ju̧i̧ ta̧rëdiädëa̧ oaiä ta ano̧e cjatäji̧ri̧mi̧ dari̧ cjiadiäpadirȩ. Jabechji̧ judiro̧ quëna̧dëa̧ oaiä ütarë bape chjaoa̧ oa cjiapadirȩ, Ütë tjamo̧ pio judi jabërä ütarë jo̧rȩtarërea̧mi̧.

⁹ Jabo cjäri̧ manȩrȩ ca̧ oti̧. Ja̧di dari̧ cjiadiädëa̧nȩrȩ. Ta̧dëmi̧ damȩ pio ju̧i̧iä ta ano̧e cjatäji̧ri̧ pio judiro̧dënȩrȩ, jabo Ütërë mitërërea̧ pumȩ pio judiro̧nȩrȩ. Ibëa̧ Ütë pio ju̧i̧ ja̧ oa goë tuti ja̧bepaji̧ri̧ pio judiro̧nȩrȩ. Tjamo̧ davä. A̧dë chjäte Ütë pio judi mitëa̧ oa, pio ju̧i̧ ja̧ oa goë tuti ja̧bepaji̧ri̧nȩrȩ. Aja̧, Ütë tjamo̧ pio ju̧i̧ cäë yürümi̧ dari̧ japaji̧ri̧ pio judiro̧nȩrȩ mȩnȩro̧ pio ju̧i̧ ja̧ pumȩpea̧ tara. Jabechji̧ pio ju̧i̧ ja̧ pumȩpe bagarea̧mi̧ dari̧ china̧chjari̧ tutirëremȩdidibe. Danȩrȩ, mȩnȩro̧ a̧dë chjäte bagönȩmi̧ daräpȩ cjo̧ro̧rërea̧ ji̧, ëna̧diärëremȩdidibe mȩnȩro̧ a̧dë chjäte tatami̧ daräpȩ ano̧ mire cjo̧ro̧pea̧ oa, mȩnȩro̧ pio ju̧i̧ chjiari ni̧bä chjaopea̧ oa, judi pio dibë chjiari chjadëri̧ tuti japea̧ pio ju̧i̧ chjiari ni̧bä chjaopea̧ oa. Aja̧ ca̧ oti̧, pio ju̧i̧ ja̧ pumȩ tjamo̧pea̧nȩrȩ.

¹⁰ Pearä judi Ütë tjamo̧ ja̧ pumȩdë marëreji̧ri̧nȩrȩ, jabo yaba̧ pio ju̧i̧ ja̧ pumȩpea̧nȩrȩ. Pearä judi Ütërë cjäri̧ri̧ cjia da̧ chja̧oerä cjo̧ro̧dërëreji̧ri̧nȩrȩ, jabo yaba̧ pio ju̧i̧ ja̧ chja̧oerä cjo̧ro̧ji̧ri̧pea̧nȩrȩ. Ja̧di tara ca̧ oti̧, mȩnȩro̧ Ütë tjamo̧ ja̧ pumȩpea̧ tara, mȩnȩro̧ pio ju̧i̧ ja̧ bëmi̧ darä goë cji̧däriä baämi̧ dari̧ cji̧däa̧ oa cjiaji̧ri̧pea̧ tara, ibëa̧ Ano̧mȩ pio ju̧i̧ nö̧ta ja̧bepaji̧ri̧pea̧ tara, jabechji̧ ji̧dë ma järitäreji̧ri̧nȩrȩ yö̧cö uimi̧ da pio ju̧i̧ dabapapea̧ oa, mȩnȩro̧ to̧bari̧ cjiami̧ dari̧ cjo̧ro̧rea̧ dapea̧ oa.

Ütë tjamo̧ ja̧ mu̧i̧tjoi̧ji̧ri̧rȩ ji̧dë ma chjadëri̧ japatäreji̧ri̧nȩrȩ, o judiro̧ pio dibëiäpȩmo̧ aechide yo̧chea oa

¹¹ Danȩrȩ ca̧ oti̧, pio yoa chiri üdë dibëa̧ chiri tjamo̧dëde, jabomo̧ chjätäti̧ cjiami̧ dari̧ cjo̧ro̧nȩrȩ mȩnȩro̧ tjamo̧ri̧ baärea̧ chia tara. Ja̧di tara yo̧tarequededibe mȩnȩro̧ na̧e chiatä. Jabechji̧ dibëa̧ icjarari ja̧ chjai̧dë üdë acji jana̧mi̧ dari̧ japadidibe dibëa̧ tjo pio ju̧i̧ boadärämi̧ dari̧ japapea̧ oa. Jabo aja̧padë machji̧jo̧ȩ, jabo putu jura̧ a̧dë chami̧ dari̧ jiadachji̧vä.

¹² Danȩrȩ, mȩnȩro̧ quëna̧dëji̧ri̧ pio ji̧ri̧ ja̧ chjarerä cjo̧ro̧ tara, jabechji̧ na̧e chiaji̧ri̧rȩ chjadëri̧ na̧rȩriä cjo̧ro̧chji̧vä judiro̧ dibë chjadëri̧ darea̧mi̧ dari̧. Ado dëdë, aechide yo̧pai̧ dadiro̧dibe ca̧ oti̧. Pio dibë chjiari ma̧ȩ chjádë yürüpai̧ dadiro̧dibe. Jabo judiro̧ ja̧di dari̧ japaräbo, jabechji̧ mȩnȩro̧ coëma cjiari̧ cjo̧ro̧ji̧ri̧ oa dae chjaoa̧ oaiä, jabechji̧ na̧e chiaji̧ri̧pe bagapai̧ dadirȩ. Quëna̧ji̧ri̧pe bagapai̧ dadirȩ ji̧dëri̧. Ado ja̧dëa ji̧ cjiadiäa̧ japamitërä Ütë tjamo̧ pio judi pio yoa chiri oa birë ma̧na̧rä, jabechji̧ chjacjiamȩri̧ jo̧rȩtaji̧ri̧rȩ ni̧bäpadiro̧jo̧ȩ Ütë tjamo̧ pio ju̧i̧iäpȩmo̧. Jabechji̧ mȩnȩro̧ chjadëri̧ na̧rȩriä cjo̧ro̧a̧ pio ju̧i̧ irä daea̧ oaiä chjacjiamȩri̧ ni̧bäpadiro̧jo̧ȩ jiro doro. Pio ju̧i̧iä jabechji̧, ji̧dë ma na̧rȩriä cjo̧ro̧chji̧vä judiro̧ dibë aechide yo̧pai̧ daräbo.

¹³ Ado danȩrȩ ca̧ oti̧, mȩnȩro̧ Ano̧mȩ tjamo̧ pio ju̧i̧ ja̧ pumȩpea̧ tara, jabechji̧ dai chirirä cjo̧ro̧ji̧ri̧ ütëti̧ pio ji̧ri̧ chjadëri̧ ta̧rëdiäji̧ri̧rȩ cjo̧ro̧täreji̧ri̧renȩrȩ, chjadëri̧ na̧rȩji̧ri̧rȩ.

¹⁴ Ado dai chirirä cjo̧ro̧ji̧ri̧ ütëti̧ pio ji̧ri̧ ja̧ oa ja̧bepaji̧ri̧ pio ji̧ri̧bo ta̧rëdiäpea̧de. Jabechji̧ chiri ütë cjo̧ro̧mȩ pio judi tänȩa̧ oa tjamo̧ yo̧ji̧ri̧rȩ ja̧bepadirȩ chjai̧dëri̧ japaji̧ri̧ pio ji̧ri̧ bape chjaopea̧ oa, chjadëri̧ cjo̧ro̧ji̧ri̧ pio ji̧ri̧ chjadëri̧ ni̧bäpea̧ oa. Pio ju̧i̧iä ta̧rëdiäpea̧de.

¹⁵ Jabechji̧ coëma cjiari̧ na̧rȩji̧ri̧rȩ cjo̧ro̧tä eadidibe Ütë tjamo̧ judi o judiro̧ pio dibë chjiari aechide yo̧chea oa, chji̧ cotomi̧ dari̧ jo̧rȩtaji̧ri̧ pio judiro̧ dibë chjiari aechide yo̧chea oa. Jabechji̧ mȩnȩro̧ ji̧dë ma coëma cjiari̧ cjo̧ro̧a̧ oaiä, jabechji̧ “chjai̧dëri̧ japaji̧ri̧rȩ cjo̧ro̧dirȩ” yo̧rea̧ dadë matäreji̧ri̧dirȩ pio dibë chjiari. Jabechji̧ mȩnȩro̧ chjadëri̧ na̧rȩriä cjo̧ro̧a̧ oaiä cjapi maeari̧ cjo̧ro̧ tänȩmi̧ dari̧ japa matäreji̧ri̧renȩro̧jȩrȩ.

¹⁶ Danȩrȩ, Jechu pio judi tänȩa̧ oaiä, jabechji̧ eami̧ ca̧i̧ra̧ pio ju̧ri̧ra̧ tabüa̧ oa cjiami̧ dari̧ cjo̧ro̧dë manȩrȩ, jabo jabechji̧ mȩnȩro̧ jo̧rȩtami̧ japapai̧ danȩrȩ, eami̧ti̧ oa japaji̧ri̧rȩ. Jabo oëra̧ jo̧rȩtadëtäreji̧ri̧nȩrȩ ca̧ oti̧. Jabechji̧ eami̧ ca̧i̧ra̧ tabüa̧ oa cjiami̧ dari̧ cjo̧ro̧dëji̧ri̧borë, jabechji̧ Ütë tjamo̧ pio ju̧i̧ ja̧ mu̧i̧tjoi̧ maearë cjo̧ro̧nȩrȩ. Ado pio ju̧i̧iä eami̧ chjai̧dë oa japarea̧mi̧dëde. Ado pio ju̧i̧iä yo̧requededibe. Danȩrȩ, chjadëri̧ ta̧rëdiätäreji̧ri̧nȩrȩ chiri ütëti̧ cjo̧ro̧ji̧ri̧ pio ji̧ri̧. Jabechji̧ pio ji̧ri̧ ja̧ mu̧i̧tjoi̧dëji̧ri̧borë, chjadëri̧ ta̧rëdiätäreji̧ri̧renȩro̧jȩrȩ, dibëa̧ ano̧ji̧ri̧dëbo oa. Jabechji̧ mȩnȩro̧ pearä judi chjai̧dë ja̧ chja̧oerä cjo̧ro̧rërea̧ ji̧, mȩnȩro̧ dami̧ti̧ chjai̧dë oa jape chjaorërea̧ ji̧, jabechji̧ Ütë tjamo̧ ja̧ mu̧i̧tjoi̧ mapea̧nȩrȩ yaba̧. Ado pio ju̧i̧iä chjadë pio ju̧i̧mo̧i̧ ano̧ mire japaji̧ri̧rȩ cjo̧ro̧täreji̧ri̧nȩrȩ.

¹⁷ Ado pio ju̧i̧iä yo̧requededibe ca̧ oti̧. Pumȩ ütëbodärä oa ba chia dachji̧jȩrȩ, cja̧rȩmȩ pumȩrȩ a̧dë cjiadiärea̧ decjiari̧. Ado dibëa̧ pumȩ pio ji̧ri̧, Jechu ju̧i̧ quëna̧ji̧ri̧pea̧ji̧ri̧ pio ji̧ri̧, ea tjamo̧chji̧jȩrȩ. Ado uapaji̧ri̧rȩ ba chia tjamo̧ri̧ jo̧rȩtachji̧jo̧ȩ Ütë tjamo̧ ju̧i̧. Ado chiri ütë cjo̧ro̧mȩ pio ju̧i̧, jabechji̧ ba chia dachji̧jo̧ȩ peaja̧di.

Quiricho judi gitoi̧ dari̧ conȩda̧ oa cjiarërea̧mi̧ cjiapai̧ darea̧rȩ peaja̧di

¹⁸ Mȩnȩro̧, gatëa̧ oa cjiaji̧ri̧ mu̧i̧tjoi̧ pio judiro̧, jabechji̧ dibëa̧ ano̧mȩ pio ju̧i̧ ja̧ ma̧ȩrä cjo̧ro̧nȩrȩ. Pio ju̧i̧iä chjadëri̧ ta̧rëdiächji̧jo̧ȩ, pio ju̧i̧ ba chia daji̧ri̧rȩ. Jabo danȩrȩ, pio dibëiäpȩmo̧ tjamo̧ri̧ eamȩ pio ju̧i̧mo̧i̧ ta̧rëdiädëpea̧de. Pio dibëiäpȩmo̧ bücjüri̧ cjia damȩ pio ju̧i̧mo̧i̧ ta̧rëdiädëpea̧de, jabo dibë ma̧i̧ dari̧ japamȩ pio ju̧i̧bo ta̧rëdiäpea̧de.

¹⁹ Jabechji̧ dibëa̧ ano̧mȩ judi dibë ma̧i̧ dari̧ japarä judi, mȩnȩro̧ oëra̧ japadëräbo gitoi̧ dari̧ japarä judi, jabechji̧ ana̧ri̧ jo̧rȩtadëchji̧vä, jabo ma̧ chjua jo̧rȩtachji̧vä, Ütë tjamo̧ pio ju̧i̧ chjuari̧ quëna̧ji̧ri̧rȩ. Jabechji̧ mȩnȩro̧ ja̧di dari̧ cjo̧ro̧a̧ oaiä, cjäri̧ri̧ cjiamȩrȩ a̧dorea̧ yürüpadidibe Ütë tjamo̧ judi, ‘chjuari̧ quëna̧diro̧coada’ quëna̧ jo̧rȩtamȩrȩ.

²⁰ Jabo danȩrȩ, mȩnȩro̧ dibëa̧ ano̧mȩ pio ju̧i̧iäpȩmo̧ chjai̧dëri̧ japea̧ ba oa bide cjaeäa̧ cjiarä judi, jabechji̧ mȩnȩro̧ japea̧ ba oa bidea̧ oa cjianȩrȩ. Mȩnȩro̧ chjai̧dëri̧ japea̧ tara, dëdë, bide cjaeäa̧ oa cjiapai̧ danȩrȩ. Ado danȩrȩ, mȩnȩro̧ bide cjaeäa̧ pio ju̧i̧ tararä ma̧ chjua jo̧rȩtaräbo, cjäri̧ made, goaedëde Ütë tjamo̧ pio ju̧i̧iä. Jabechji̧ mȩnȩro̧ dibëa̧ ano̧mȩ pio ju̧i̧iäpȩmo̧ chjai̧dëri̧ japea̧ oaiä goaedëde. Jabechji̧ chjai̧dë oa japadëtäreji̧ri̧nȩrȩ ca̧ oti̧, jabo coëma cjiari̧ cjo̧ro̧ matäreji̧ri̧nȩrȩ, chjai̧dëri̧ japadëji̧ri̧rȩ. Ado pio ju̧i̧iä yo̧requededibe. Mȩnȩro̧ chjai̧dëri̧ japarä judi, tarapai̧ danȩrȩ. Jabo danȩrȩ ca̧ oti̧, mȩnȩro̧ dibëa̧ ano̧mȩ pio ju̧i̧iäpȩmo̧ chjai̧dëri̧ japadëa̧ oa bide cjaeäa̧ oa cjiaräbo ma̧ chjua jo̧rȩtarä judi, dëdë, ba chia tjamo̧de Ütë tjamo̧ pio ju̧i̧iä.

²¹ Aja̧ ca̧ oti̧, chjai̧dë oa chjätäpea̧ oa, ma̧ chjua jo̧rȩtaji̧ri̧rȩ chjätäpea̧ oa ëna̧diärëremȩdidibe Ütë tjamo̧ judi. Jabechji̧ Quiricho judi ma̧i̧ da chjai̧dë oa chjätäa̧räbo, judi pio ibë chjiari a̧dë chjäte gitoi̧ dari̧ chjätäa̧räbo, ma̧ chjua jo̧rȩtarëremȩde, Ütë tjamo̧ pio ju̧i̧iäpȩmo̧ chjuari̧ quëna̧mȩrȩ. Ado judi ja̧di dari̧ cjo̧ro̧a̧ oaiä, chjadëri̧ na̧rȩrëremȩdiibe a̧ro̧rȩ peaja̧di dari̧ cjo̧ro̧pea̧ oa, a̧ro̧rȩ pio ju̧i̧ cho̧rë cjo̧ro̧pea̧ oa.

²² Jabechji̧ ma̧i̧ da chjai̧dë oa chjätäa̧räbo, cja̧rȩmȩ co chjai̧dëri̧ japadërëremȩde. Cja̧rȩmȩ co jibëa̧ yara̧ u̧i̧pe ni̧bädërëremȩde.

²³ O judiro̧ pio ju̧i̧ goae tarari̧ ya̧ea̧räbo ba dëbë ya̧dërëremȩdejȩrȩ. Judiro̧ gitoi̧ dari̧ conȩda̧räbo ba dëbë uapai̧ ta̧rëri̧ yo̧ë cji̧dädërëremȩdejȩrȩ, jabo jabechji̧ ji̧dë ma chjuari̧ jo̧rȩtamȩrȩ quëna̧rëremȩdejȩ Ütë tjamo̧ ju̧i̧, coëma cjiari̧ ütarë yo̧mȩ pio ju̧i̧. ‘Aja̧, jidadicoada, ado pio ju̧i̧iä cjiadiämi̧ tarari̧ jo̧rȩtapaquëda, jabechji̧ coëma cjiari̧ ütarë yo̧mȩ pio judidida, ado pio judi daba̧mi̧ ütarë bape chjaopadiji̧ri̧da’ quëna̧ jo̧rȩtarëremȩde Jechu judi, Ütë tjamo̧ pio ju̧i̧iämo̧i̧ ja̧ȩ cjiami̧ dari̧ jo̧rȩtamȩrȩ.

²⁴ Jabechji̧ judi toro ja̧boa̧rä, a̧ro̧rȩ chjai̧dëri̧ japea̧ pio ju̧i̧ tuti aramȩrȩ ja̧borëremȩde, a̧ro̧rȩ chjai̧dërë yo̧a̧ chja̧oerä cjo̧ro̧chea oa. Tjamo̧ davä ca̧ oti̧. Pio ibë chjiari ja̧borëremȩde a̧ro̧rȩ coëma cjiari̧ cjo̧ro̧pea̧ oa, a̧ro̧rȩ chjai̧dëri̧ cjo̧ro̧rërea̧ pio ju̧i̧ a̧dë ja̧boa̧mi̧ dari̧ cjo̧ro̧pea̧ oa. Jabechji̧ a̧ro̧rȩ ma̧i̧ da co chiami̧ dari̧ cjo̧ro̧rërea̧ ji̧, a̧ro̧rȩ ja̧bopea̧ querediä tjamo̧ji̧ri̧mi̧ dari̧ cjo̧ro̧rërea̧ ji̧, jabechji̧ ma̧i̧ da co chiamȩrȩ cji̧däa̧ oa cjiarëremȩde toro, pio a̧ro̧rȩ chjadëri̧ chjaparȩa̧ oa cjiami̧ dari̧ cjiapea̧ oa, pio a̧ro̧rȩ co chjami̧ dari̧ ano̧ mire cjiapea̧ oa.

²⁵ Danȩrȩ ca̧ oti̧, dabadëpea̧ oa cjiaji̧ri̧ ovejami̧ dari̧ cjo̧ro̧rëreji̧ri̧nȩrȩ, oëra̧ti̧ oa chjätäti̧ cjiaji̧ri̧mi̧ darë. Jabo ja̧di dari̧ cjo̧ro̧rërea̧ ji̧, ja̧di dari̧ cjo̧ro̧dëji̧ri̧pea̧nȩrȩ yaba̧. Jabechji̧ oveja tjamo̧ jidamȩ pio ju̧i̧iäpȩ chjadëri̧ a̧dopea̧ oa cjiami̧ dari̧ cjianȩrȩ. Tjamo̧ davä. Dibëa̧ tjo pio ju̧i̧ chjadëri̧ jidamȩ pio ju̧i̧iäpȩ a̧dopea̧ oa cjiami̧ dari̧ cjiaji̧ri̧pea̧nȩrȩ, dibë chjiari tuti japamȩ pio ju̧i̧iäpȩ. Aja̧ ca̧ oti̧, a̧dë chjäte chjai̧dë oa ano̧ mire chjätärëremȩde Quiricho judi, pio a̧ro̧rȩ ano̧ mirȩ a̧dë chjäte chjadë oa chjätäpea̧ oa. Ja̧di tara a̧ro̧rȩ pio yoa chirirä cjo̧ro̧a̧ nö̧ta chjai̧dë oa chjätärä judi, a̧ro̧rȩ Jechu pio ju̧i̧ quëna̧ji̧ri̧pea̧ pio ju̧i̧iä conȩda̧ oa cjiarä judi, jabechji̧ ana̧ri̧ jo̧rȩtadëtäreji̧ri̧rea̧rȩ, jabo chjuari̧ quëna̧täreji̧ri̧rea̧ro̧jo̧ȩ Ütë tjamo̧ pio ju̧i̧, Jechu pio ju̧i̧ cho̧rëdiäji̧ri̧rȩ.