Pedro Ma̧ȩ 1 1 - Biblia Pume

Taruparea̧ Ma̧ȩ

¹ Danȩrȩ ca̧ oti̧, ¿jabënȩrȩ? Jabëti̧ cjianȩrȩ? ‘Jabë jirodiro̧da’ quëna̧ jo̧rȩtamȩrȩ go̧ȩpe chjadürequededibe. Danȩrȩ, Pedro quȩmȩ pio judirequede. Ado go̧ȩpe chjadürequededibe, dibë tjamo̧ri̧ jo̧rȩtamȩrȩ. Jechu Quirichorë chjadüa̧ oa cjiamȩrȩ go̧ȩpe chjadürequededibe, Ütërë mitëa̧ pumȩ pio ji̧ri̧. Jabechji̧ dibëa̧ chiri tjamo̧räpȩ jabë cjo̧ro̧dëji̧ri̧ pio ji̧ri̧, jabë oëra̧ti̧ oa a̧rȩmȩ chirirä chjätäti̧ cjiaji̧ri̧ pio ji̧ri̧ go̧ȩpe chjadürequededibe ca̧ oti̧, a̧dëräpȩ tjamo̧ri̧ cjo̧ro̧paji̧ri̧ pio ji̧ri̧. Tjamo̧ davä. Mȩnȩro̧ no̧i̧dërë Quiricho pio ju̧i̧iäpȩmo̧ quëna̧ji̧ri̧pea̧ oaiä, japë ma̧ȩa̧ oa cjiarëreji̧ri̧nȩrȩ dibëa̧ chiriri pio judiri, mȩnȩro̧ pearä cjo̧ro̧rërea̧ chiriri pio judiri. Aja̧ ca̧ oti̧, pio ju̧i̧ tjamo̧ri̧ dabarequede. Ado pio ju̧i̧iä Po̧to quȩmȩ chiriräpȩ cjo̧ro̧ji̧ri̧ pio ji̧ri̧, Garachia quȩmȩ chiriräpȩ cjo̧ro̧ji̧ri̧ pio ji̧ri̧, ado Capadochia quȩmȩ chiriräpȩ cjo̧ro̧ji̧ri̧ pio ji̧ri̧ jo̧rȩtamȩrȩ go̧ȩpe chjadürequededibe. Ado Achia quȩmȩ chiriräpȩ cjo̧ro̧ji̧ri̧ pio ji̧ri̧, Bitinia quȩmȩ chiriräpȩ cjo̧ro̧ji̧ri̧ pio ji̧ri̧ jo̧rȩtamȩrȩ go̧ȩpe chjadürequededibe peaja̧di. Jabechji̧ dibëa̧ chiri tjamo̧ üdë a̧dëräpȩ cjiaräbo, jabë oëra̧ti̧ oa a̧rȩmȩ chiriräpȩ chjätäti̧ cjiaji̧ri̧ oa jo̧rȩtamȩrȩ go̧ȩpe chjadürequededibe, dibëa̧ chiri tjamo̧dëräpȩji̧ri̧ oa.

² Aja̧ ca̧ oti̧, ibëa̧ Ama̧i̧ Ütë judi pio dibë chjiari no̧mȩ tjamo̧ri ja̧ chjö̧na̧i̧ oa dabarërea̧ oaiä, jabechji̧ mitërëremȩdidibe. Tjo tjamo̧ judi dibë china̧chjari̧ tutipea̧ oa mitërëremȩdidibe mȩnȩro̧ Jechu ja̧ goera̧ pjo̧dechäa̧ oa cjiami̧ dari̧ cjiapea̧ oa, mȩnȩro̧ Jechu Quiricho pio ju̧i̧ ta̧rëdiäpea̧ oa. Jabechji̧ Moiche judi icharaita pio ji̧ri̧ pearä judi goera̧ pio ju̧ri̧ra̧ pjo̧dechärërea̧mi̧ pjo̧dechäa̧ oa cjiami̧ dari̧ cjiarëreji̧ri̧nȩrȩ peaja̧di Jechu ja̧ goera̧ pio ju̧ri̧ra̧. Ado pio ju̧i̧iä go̧ȩpe chjadürequededibe ca̧ oti̧. Ütë tjamo̧ judi peadëri ja̧ dabarërea̧ pumȩ pio ji̧ri̧ go̧ȩpe chjadürequededibe. Ado yaba̧ cüdë ji̧dë u̧i̧ go̧ȩpabea yaboi̧, jabechji̧ Ütë tjamo̧ pio ju̧i̧iä goë cjo̧dë yürümȩmi̧ dari̧ ni̧bätämi̧ cjiarequededibe. Jabechji̧ Ütë tjamo̧ pio judi cjäri̧ri̧ cjiamȩrȩ chjadëri̧ a̧dotädidibe. Jabechji̧ ji̧dë u̧i̧ ji̧ra̧ri̧ a̧dotädidibe, mȩnȩro̧ ji̧dë ma ma̧ chjupi̧ cjiari̧ jo̧rȩtaji̧ri̧rȩ cjo̧ro̧pea̧ oa.

A̧ro̧rȩ Tjo tjamo̧ pio ju̧i̧iä jauëchja cjiari̧ ado nö̧ria̧ oa cjia̧ oaiä, jabechji̧ bucho ana̧ cjo̧ro̧rea̧ chiarea̧rȩ, jidatarea̧bo

³ Chjacjiamȩri̧ ni̧bäpea̧de ibëa̧ Ano̧mȩ Jechu pio ju̧i̧ ja̧ Ütë judi, Quiricho pio ju̧i̧ ja̧ Ama̧i̧ judi. Jabechji̧ pio judi ibë a̧dë chjäte cjäri̧ri̧ cjiamȩrȩ jo̧rȩtarërea̧ oaiä, ado nö̧ria̧ oa cjiaji̧ri̧pea̧rea̧rȩ. Tjamo̧ davä. Jechu Quiricho judi ja̧borëremȩrȩ bëdüa̧ oaiä, ado nö̧ria̧ oa cjiaji̧ri̧pea̧rea̧rȩ, a̧ro̧rȩ ma̧diä ma̧diä cjia tänȩdëmȩ jidatarea̧ oa chiaji̧ri̧rȩ cjo̧ro̧pea̧ oa.

⁴ Jabechji̧ a̧dëräpȩ ju̧ri̧ goë boea̧ oa goade Ütë tjamo̧ judi, a̧dë chjäte ba chia maea oa pio ibëiäpȩmo̧ yürüpea̧ oa. Jabechji̧ chjadëdëpe bagarea̧mi̧dëmȩ oa, yuroparea̧mi̧dëmȩ oa goë boea̧ oa goadejȩ, ë chiape bagarea̧mi̧dëmȩ oa.

⁵ Jabechji̧ mȩnȩro̧ quëna̧ oaiä Ütë tjamo̧ judi chjadëri̧ jidapadidibe cjiadiäa̧ japamitërä yuro. Tjamo̧ davä. Jibëa̧ jauëchjara̧ pio ju̧ri̧ra̧ tuti japamȩrȩ chjadëri̧ jidapadidibe mȩnȩro̧ chjadëri̧ chjätärea̧ dapea̧ oa. Jabechji̧ pio jiro japamitërä Ütë tjamo̧ judi jëdano̧a̧ chjätärea̧ pio judi chjadëri̧ na̧rȩa̧ oa cjiapade. Tjamo̧ davä. Pio jiro japamitërä, cjiadiäa̧ japamitërä, Ütë tjamo̧ judi pumȩ ütëbodärä oa ütarapea̧ doro, pio ibëiäpȩmo̧ goë boea̧ pio judi chjadëri̧ na̧rȩa̧ oa cjiapade ütëbodärärë chjadëri̧ darea̧mi̧ dari̧.

⁶ Ado Ütë tjamo̧ judi dibë chjätärea̧ yürüa̧ pio ju̧i̧iä, jabechji̧ a̧dë chjäte ma̧ chiadëri̧ cjiari̧ jo̧rȩtanȩrȩ ca̧ oti̧, mȩnȩro̧ eami̧ti̧ chjai̧dë oa chjätäji̧ri̧borë. Tjamo̧ davä. Mȩnȩro̧ pio yoa chirirä cjo̧ro̧a̧ nö̧ta, dëdë, japamitë boi̧chji̧ nö̧ta eami̧ti̧ chjai̧dë oa chjätäpai̧ danȩrȩ.

⁷ Jabo danȩrȩ, mȩnȩro̧ chjai̧dë oa chjätäräbo chjuari̧ quëna̧rä judi, jabechji̧ ana̧ri̧ na̧rȩrenȩro̧jȩrȩ pumȩ pio ji̧ri̧iiäpȩmo̧ mȩnȩro̧ chjuari̧ quëna̧ pio ju̧i̧ chjiari. Tjamo̧ davä. ‘Chjuari̧ quëna̧diro̧da, teracabari̧ na̧rȩdëdiro̧da, ya maeara̧ quëna̧dëdiro̧da, jabo tjamo̧ri̧ quëna̧diro̧da’ quëna̧ jo̧rȩtarea̧mi̧ dari̧ na̧rȩrenȩro̧jȩrȩ ca̧ oti̧. Ado ja̧di dari̧ quëna̧ üdë, jabechji̧ ba chia tjamo̧de. Teracabadëde. Ado danȩrȩ, a̧ro̧rȩ chjai̧dëri̧ chjätäa̧ üdë, jabechji̧ cjo̧dëmi̧ dade. Ado pio ju̧i̧iä na̧rȩrea̧ ma̧ȩmi̧ dara̧ pio ju̧ri̧ ni̧bä chjaotämi̧ cjiarequededibe oro pio ju̧i̧ chjiari. Danȩrȩ, oro quȩmȩ chjiparari oa tjamo̧ri̧ ütaratämi̧ cjiaji̧ri̧ pio judiro̧ ¿tjana̧ japadirȩ? Tjana̧ japadë, jabechji̧ ma̧i̧ da gärimȩ cjo̧dërä gatëchädiro̧jo̧ȩ chjadëri̧ ütarë dapea̧ oa. Tjamo̧ davä. ‘Oro chjadida, teracabadëdida’ quëna̧ ütarë dapea̧ oa cjo̧dërä gatëchädiro̧jo̧ȩ. Jabo judiro̧ cjo̧dëra̧ ütaradërä judi, jabechji̧ tjamo̧ri̧ dabarea̧mi̧dëde. Ado danȩrȩ ca̧ oti̧, oro üdë pio yoa chirirä ba chia tjamo̧räbo, jabomo̧ dai chirirä ja̧de. Bucho ana̧dëmȩde, jabo goarijäpamȩde. Jabo danȩrȩ, oro üdë bucho ana̧dëräbo, yuropapamȩräbo, jabechji̧ pumȩ pio judiro̧ ba chia dadiro̧jo̧ȩ. Ado pio ju̧i̧iä cjo̧dëra̧ pio ju̧ri̧ra̧ chjadëri̧ ütaratämi̧ cjiadiro̧jo̧ȩ pio ju̧i̧ chjiari tjamo̧ri̧ dabapea̧ oa, ‘oro chja tjamo̧dida, teracabadë madida’ quëna̧ dabapea̧ oa. Jabo danȩrȩ ca̧ oti̧, oro pio ju̧i̧iä ji̧dë u̧i̧ ba chiade mȩnȩro̧ quëna̧ üdë. Jabechji̧ mȩnȩro̧ quëna̧ üdë a̧dë chjäte ba chia tjamo̧de. Ado pio ju̧i̧iä peaja̧dimi̧ dari̧ ütara̧ oa cjiapea̧ chiade ca̧ oti̧. Tjamo̧ davä. A̧ro̧rȩ quëna̧ üdë ba chia tjamo̧ tara, cjo̧dëra̧ pio ju̧ri̧ra̧ ütara̧ oa cjiami̧ dari̧ cjiapea̧ chiade mȩnȩro̧ chjai̧dë oa chjätäa̧ pio ju̧i̧iä. Tjamo̧ davä. A̧ro̧rȩ chjai̧dë oa chjätäa̧ üdë jabechji̧ cjo̧dëmi̧ dade. Ado dëdë, chjao tjamo̧de. Goae tjamo̧dëde. Jabo danȩrȩ ca̧ oti̧, mȩnȩro̧ Ütë tjamo̧ pio ju̧i̧iäpȩmo̧ chjuari̧ quëna̧ji̧ri̧rȩ chjätäa̧ oaiä, jabechji̧ ana̧ri̧ na̧rȩnȩrȩ mȩnȩro̧ quëna̧ pio ju̧i̧ chjiari. Tjamo̧ davä. ‘Teracabari̧ quëna̧dëdiro̧da, jabo tjamo̧ri̧ quëna̧diro̧da’ quëna̧rea̧mi̧ dari̧ na̧rȩnȩrȩ. Ado pio ju̧i̧iä cjiadiäa̧ japamitërä, mȩnȩro̧ quëna̧ üdë oro chjami̧ dari̧ cjiarä, jabechji̧ chjacjiamȩri̧ ni̧bäpadidibe Ütë tjamo̧ judi. Ba chiaparȩpadidibe. Tjamo̧ davä. Jechu Quiricho pio judi ütara̧ doro na̧rȩ ma̧na̧rä, jënȩ cjiamȩräpȩ cjiapanȩrȩ a̧dë chjäte tatari̧ cjiamȩräpȩ.

⁸ Jabo jabënȩrȩ ca̧ oti̧. Jechu pio ju̧i̧ jabë dadëa̧nȩrȩ, jabo pio ju̧i̧ jabë dadëa̧räbo, jabechji̧ ea tjamo̧renȩro̧jo̧ȩ. Mȩnȩro̧ pio ju̧i̧ jabë irä dadëa̧räbo chjuari̧ quëna̧renȩro̧jo̧ȩ. Ado pio ju̧i̧iä a̧dë chjäte ma̧ chiadëri̧ cjiari̧ jo̧rȩtarea̧ra̧ pio ju̧ri̧ra̧ jo̧rȩtanȩrȩ ca̧ oti̧, dibëa̧ yara̧ pio ju̧ri̧ra̧ ütarë ni̧bärea̧mi̧dëri̧.

⁹ Jabechji̧ a̧dëräpȩ bucho ana̧ cjo̧ro̧pea̧ oa chjätärea̧ daea̧nȩrȩ ca̧ oti̧. Jabechji̧ mȩnȩro̧ irä dadëa̧ pio ju̧i̧ quëna̧ oaiä, jabechji̧ dibëa̧ tjo üdë chjätärea̧ daea̧de bucho ana̧.

¹⁰ Ado Ütë tjamo̧ judi yürüa̧ chjätärea̧ pio judi a̧dë chjäte chjadë tjamo̧de ca̧ oti̧. Ado pio ju̧i̧iä no̧mȩri ja̧ cjo̧ro̧rëreji̧ri̧ pio judiro̧, Ütërë ea jana̧ chjadüa̧ oa ni̧bäji̧ri̧ pio judiro̧ ji̧dë ma jo̧rȩtarëreji̧ri̧dirȩ jabërä Ütërë yürüpea̧ pio ju̧i̧ chjiari, judi tuti chjadüpea̧ pio ju̧i̧ chjiari. Jabechji̧ ji̧dë u̧i̧ dabapatämi̧ cjiarëreji̧ri̧dirȩ pio jiro chjätärea̧ pio ju̧i̧ chjiari. Ado pio ju̧i̧iä iëno̧ iëno̧ cjiarëreji̧ri̧dirȩ. Tjamo̧ davä. Ütërë cjäri̧ri̧ cjiamȩrȩ yürüpea̧ pio ju̧i̧ chjiari ea jana̧ chjadüa̧ oa ni̧bäji̧ri̧ pio judiro̧ ji̧dë ma na̧taji̧ri̧mi̧ dari̧ iëno̧ë iëno̧ë cjiarëreji̧ri̧dirȩ.

¹¹ Jabechji̧ tjamo̧ri̧ dabapatämi̧ cjiarëreji̧ri̧dirȩ ma̧na̧pamȩ pio ju̧i̧ chjiari, judi ma̧na̧pea̧ do pio ju̧i̧ chjiari. Jabechji̧ Quiricho pio ju̧i̧ ja̧ tjo üdë pio ji̧ri̧ ja̧ icjararä cjiamȩrȩ ma̧ȩ yürürërea̧ ji̧, ana̧ tjamo̧ri̧ jo̧rȩtaji̧ri̧pea̧dirȩ, tjamo̧ri̧ jidate cjiaji̧ri̧rȩ. Tjamo̧ davä. Quiricho ja̧ tjo üdë pio ji̧ri̧iä ma̧ȩ yürürërea̧ ji̧, jënȩ gitoi̧ dari̧ conȩda̧ oa cjiapea̧ pio ju̧i̧ chjiari jabërä pio ji̧ri̧iä ma̧ȩ yürürërea̧ ji̧, jënȩ a̧dë chjäte ba chia tjamo̧räpȩ ju̧ri̧ ado chjereno̧ chadäräpea̧ pio ju̧i̧ chjiari jabërä pio ji̧ri̧iä ma̧ȩ yürürërea̧ ji̧, jabechji̧ ana̧ri̧ jo̧rȩtaji̧ri̧pea̧dirȩ no̧mȩ tjamo̧ri ja̧ cjo̧ro̧ji̧ri̧ pio judiro̧. ‘Chia chia, ¿chjia ju̧i̧ chjiari yo̧diibëda, naparä ma̧na̧padiibëda, chjia tjamo̧dida’ quëna̧ jo̧rȩtaji̧ri̧rȩ na̧tami̧ dari̧ iëno̧ iëno̧ cjiarëreji̧ri̧dirȩ, tjamo̧ri̧ dabapatämi̧ cjiaji̧ri̧rȩ.

¹² Jabo danȩrȩ, judiro̧ tjamo̧ri̧ dabapatämi̧ cjiaji̧ri̧ borë, cjäri̧ madirȩ, dabapadärärea̧ dadëa̧dirȩ. Jabechji̧ Ütë tjamo̧ judi pio ji̧ri̧ chjadëri̧ daba tänȩa̧ oaiä, ‘jabo cjäri̧ maa̧ro̧da, a̧ro̧rȩ go̧ȩpea̧ ma̧ȩ üdë ibëa̧dëdida, jabo ibëa̧ duri oa ano̧ mire cjo̧ro̧paji̧ri̧ pio ji̧ri̧ ja̧dida’ quëna̧ jo̧rȩtaji̧ri̧pea̧dirȩ. Tjamo̧ davä ca̧ oti̧. Judiro̧ go̧ȩparërea̧ ma̧ȩ üdë dibëa̧ pio judide. Jabechji̧ pio dibëiäpȩmo̧ a̧ra̧ano̧a̧ oa cjiarëremȩde pio jiro ma̧ȩ üdë. Tjamo̧ davä. Pio jiro ma̧ȩ chjadëi̧ üdë, a̧dë chjäte goae tjamo̧mȩ ma̧ȩ pio judi, jabechji̧ pio dibëiäpȩmo̧ to̧bari̧ a̧ra̧ano̧a̧ oa cjiarëremȩde a̧ra̧ano̧ji̧ri̧ pio ji̧ri̧iä, a̧dëri pio judiri chjadüa̧ oa birarëremȩ Tjo tjamo̧ pio ju̧i̧iä. Aja̧, Tjo tjamo̧ pio ju̧i̧iä a̧ra̧ano̧a̧ oa cjiarëremȩde pio ju̧i̧ ja̧ ju chiarea̧ra̧. Ado pio jiro ma̧ȩ üdë a̧dë chjäte goae tara, jabechji̧ a̧dëräpȩ cjiaji̧ri̧ mu̧i̧tjoi̧ pio judiro̧borë järi tjamo̧ji̧ri̧rȩ gürü toboe dae cjiaji̧ri̧mi̧ dari̧ japadirȩ, a̧ro̧rȩ pio jiro ma̧ȩrä chjätärea̧ dapea̧ pio ju̧i̧ chjiari tjamo̧ri̧ dabapatämi̧ cjiaji̧ri̧rȩ, ‘¿yö̧ta dari̧ chjätärea̧ dapadiro̧da?’ quëna̧ dabatämi̧ cjiaji̧ri̧rȩ.

Mȩnȩro̧ tatachjamȩ tjamo̧ judi dibë ëna̧diäa̧ oaiä, jabechji̧ tatachjami̧ dari̧ cjo̧ro̧täreji̧ri̧nȩrȩ

¹³ Ja̧di tara ca̧ oti̧, Ütë tjamo̧ judi pio dibëiäpȩmo̧ chjätärea̧ goae tjamo̧ oa yürüa̧ tara, a̧ro̧rȩ chjai̧dë oa chjätäpea̧ oa chjadëri̧ ju chiarea̧ yürüa̧ tara, jabechji̧ ji̧dë ma jo̧rȩtachji̧vä pio ju̧i̧ chjiari. Jabechji̧ jëdano̧chji̧vä dibëa̧ chji̧ oa tüdüa̧mi̧ darämo̧ jo̧rȩtapea̧ oa, coëma cjiari̧ jo̧rȩtapea̧ oa. Jabechji̧ dibëa̧ icjara oa chjadëri̧ boadäräa̧ oa goami̧ dari̧ cjo̧ro̧chji̧vä, chjadë pio ju̧i̧mo̧i̧ mitëji̧ri̧rȩ. Jabechji̧ Jechu Quiricho pio judi na̧rȩmȩrȩ ma̧na̧rä, dibë cjäri̧ri̧ cjiamȩrȩ yürüpadidibe. Ja̧di tara jabechji̧, judi dibë yürüpea̧ pio ju̧i̧ ji̧dë ma jidataji̧ri̧rȩ jo̧rȩtariä cjo̧ro̧chji̧vä.

¹⁴ Jabechji̧ Ütë tjamo̧ ja̧ u̧ri̧ tjamo̧pea̧nȩrȩ ca̧ oti̧. Ado pio ju̧i̧iä chjadë tjamo̧de mȩnȩro̧ pio ju̧i̧ ja̧ ma̧ȩrämo̧ cjo̧ro̧pea̧ ji̧. Jabechji̧ mȩnȩro̧ pearä dabadëji̧ri̧rȩ cjo̧ro̧rërea̧ ji̧, mȩnȩro̧ chjai̧dëri̧ japatämi̧ cjiamȩ chji̧ maeara̧ jo̧rȩtariä cjo̧ro̧rërea̧ ji̧, jabechji̧ Ütë tjamo̧ ja̧ u̧ri̧mi̧ dari̧ cjo̧ro̧chji̧vä yaba̧.

¹⁵ Ji̧dë ma ja̧di maeari̧ cjo̧ro̧chji̧vä. Tjamo̧ri̧ yo̧requededibe. Mȩnȩro̧ eami̧ oa japarä, jabechji̧ tatachjami̧ dari̧ cjo̧ro̧chji̧vä. Jabechji̧ tatachjamȩ tjamo̧ pio judi ëna̧diärëremȩdidibe. Tjamo̧ davä. Ëna̧diärëremȩdidibe mȩnȩro̧ Ütë tjamo̧ ja̧ u̧ri̧pe bagapea̧ oa. Ado pio ju̧i̧iä pio judimi̧ dari̧ tatachjami̧ dari̧ cjo̧ro̧täreji̧ri̧nȩrȩ peaja̧di, chjai̧dëra̧ pio ju̧ri̧ra̧ mirea̧ oa jo̧rȩtarea̧ decjiari̧.

¹⁶ Danȩrȩ, peaja̧di dari̧ cjo̧ro̧tä eamȩrȩ yo̧diibe Ütë tjamo̧ judi. Ta̧rëchji̧vä: “Aja̧, pio cüdëmi̧ dari̧ cjo̧ro̧chji̧vä tatachjami̧ dari̧.” Aja̧, ja̧di ta̧rëri̧ yo̧rëremȩde Ütë tjamo̧ judi no̧mȩ tjamo̧ri ja̧. Ado pio ju̧i̧iä peaja̧di dari̧ cjo̧ro̧täreji̧ri̧rea̧rȩ.

¹⁷ Danȩrȩ ca̧ oti̧, Ütë tjamo̧ judi ibëa̧ Ama̧i̧pea̧ tara, jabechji̧ pio ju̧i̧iä goë cjo̧dërea̧rȩ. Jabo danȩrȩ, ibëa̧ Ama̧i̧ pio judi peaja̧di ibë ütëbo oa cja̧rȩmȩ ba chia maeara̧ damȩrȩ ütarapadiibe. Ado judi ibë ütarapa tara, quëna̧ji̧ri̧ ütëbo oa cja̧rȩmȩ ütararea̧ra̧ ütarapa tara, jabechji̧ uapami̧ dari̧ ba chia jo̧rȩtaji̧ri̧rȩ ta̧rëdiä matäreji̧ri̧rea̧ro̧jo̧ȩ. Tjamo̧ davä. A̧ro̧rȩ japea̧ chjö̧na̧i̧ oa ütarapa tara, a̧ro̧rȩ jo̧rȩta̧ chjö̧na̧i̧ oa ütarapa tara, jabechji̧ uapami̧ dari̧ ba chia jo̧rȩtaji̧ri̧rȩ ta̧rëdiä matäreji̧ri̧rea̧ro̧jo̧ȩ a̧ro̧rȩ pio yoa chiri oa chjätäti̧ cjiaji̧ri̧mi̧ dari̧ cjo̧ro̧a̧ nö̧ta.

¹⁸ Jabechji̧ Ütë tjamo̧ judi dibë go̧dü tänȩmȩ pio judide. Jabechji̧ mȩnȩro̧ teracaba ma̧ȩrä cjo̧ro̧rërea̧ ji̧, dibëa̧ ütëti̧rea̧ pio judiro̧ yo̧a̧ chja̧oerä cjo̧ro̧rërea̧ ji̧, dibë a̧dodëmȩ ma̧ȩrä cjo̧ro̧rërea̧ ji̧, mȩnȩro̧ ba chiadëmȩ ma̧ȩrä cjo̧ro̧rërea̧ ji̧, jabechji̧ ba ano̧a̧ oa cjiaji̧ri̧pea̧nȩrȩ go̧dürea̧mi̧ dari̧. Ado mȩnȩro̧ ba ano̧a̧ oa cjia̧rä, teracabara̧ pio ju̧ri̧ra̧ ba ano̧a̧ oa cjiadërëreji̧ri̧nȩrȩ ca̧ oti̧. Ë chiape bagapai̧ damȩra̧ pio ju̧ri̧ra̧ ba ano̧a̧ oa cjiadëa̧nȩrȩ. Tjamo̧ davä. Orora̧ ba ano̧a̧ oa cjiadëa̧nȩrȩ. Paratara̧ ba ano̧a̧ oa cjiadëa̧nȩrȩ.

¹⁹ Jabo jabechji̧ Quiricho pio ju̧i̧ ja̧ goe ba chia tjamo̧ra̧ pio ju̧ri̧ra̧ ba ano̧a̧ oa cjiarëreji̧ri̧nȩrȩ ca̧ oti̧. Jabechji̧ oveja co chjami̧ darë goe gu̧rori̧ ja̧borëremȩde. Goë tuti ja̧bepaji̧ri̧ pio judiro̧ oveja co chja oa ja̧bo tänȩrërea̧mi̧ ja̧borëremȩde Jechu judi peaja̧di, oveja co chjami̧ darë. Tjamo̧ davä. Goe gu̧rori̧ ja̧borëremȩde pio dibë chjiari tuti ba ano̧pea̧ oa.

²⁰ Jabechji̧ dabu üdë jabë pareapea̧ oa cjiadëa̧rä chjö̧na̧i̧ oa dabamȩrȩ mitërëremȩdejȩ Ütë tjamo̧ judi pio dibë chjiari ba ano̧pea̧ oa, pio dibë go̧dü tänȩpea̧ oa. Ado ja̧dëa ji̧ japamitë chjätä ëte ütara̧ doro, Ütë tjamo̧ judi a̧dëri pio judiri chjadürëremȩdejȩ pumȩ ja̧ dachoro cjo̧ro̧pea̧ oa. Jabechji̧ pio dibë chjiari birë ma̧na̧rëremȩde.

²¹ Ado yaba̧ mȩnȩro̧ birë ma̧na̧rëremȩ pio ju̧i̧iä quëna̧ji̧ri̧pea̧renȩro̧jo̧ȩ Ütë tjamo̧ pio ju̧i̧. Tjamo̧ davä. Quiricho pio ju̧i̧iä quëna̧ji̧ri̧pea̧renȩro̧jo̧ȩ Ütë tjamo̧ pio ju̧i̧ bëdü tänȩrëremȩ pio ju̧i̧. Ado Quiricho pio ju̧i̧, bëdüa̧ oa cjiarëremȩ pio ju̧i̧ a̧dë chjäte ba chiaparȩrëremȩdejȩ Jäja judi. Tjamo̧ davä. Pumȩ judiro̧ ba chia dadërërea̧ pio ju̧i̧ a̧dë chjäte ba chiaparȩrëremȩdejȩ. Ado pio ju̧i̧iä jabechji̧, Ütë tjamo̧ pio ju̧i̧iäpȩmo̧ ma quëna̧renȩro̧jo̧ȩ yaba̧. Ado pio ju̧i̧iäpȩmo̧ ma jidatarenȩro̧jo̧ȩ dibëiäpȩmo̧ teracabari̧ ma̧diä ma̧diä cjia tänȩdëmȩ pio ju̧i̧. Ado danȩrȩ ca̧ oti̧, Ütë tjamo̧ judi ja̧di dari̧ tuti japarërea̧ oaiä, pio ibë chjiari a̧dë chjäte chjadëri̧ japarërea̧ oaiä, jabechji̧ järi tjamo̧täreji̧ri̧rea̧rȩ tatachjami̧ dari̧ cjo̧ro̧pea̧ ji̧ a̧ro̧rȩ pio yoa chiri oa cjo̧ro̧a̧ nö̧ta.

Mȩnȩro̧ ado nö̧ria̧ oa cjiaji̧ri̧pea̧ tara, jabechji̧ dibëa̧ dëbëti̧ra̧ chia ea tjamo̧pea̧de

²² Mȩnȩro̧ tjamo̧i̧ cjiari̧ baämȩ ma̧ȩ pio ju̧i̧ ta̧rëdiäa̧ oaiä joa̧ oa cjiami̧ dari̧ cjiade dibëa̧ chji̧ üdë, chjai̧dë pio ju̧i̧ aene jo̧rȩtarea̧mi̧ dari̧. Ado mȩnȩro̧ ja̧di dari̧ cjo̧ro̧a̧ oaiä, jabechji̧ quëna̧ji̧ri̧ pio ji̧ri̧ earea̧ chianȩrȩ. Ado pio ju̧i̧iä yo̧requededibe. Järi tjamo̧chji̧vä dibëa̧ dëbëti̧ra̧ chia ji̧dë ma ea tjamo̧pea̧ ji̧ chjaocjiarea̧ decjiari̧.

²³ Jabechji̧ dibëa̧ dëbëti̧ra̧ chia ja̧di dari̧ eapea̧ oa earea̧ chianȩrȩ mȩnȩro̧ ado nö̧ria̧ oa cjiaji̧ri̧pea̧ tara, mȩnȩro̧ cjo̧ro̧rea̧ peaja̧ oa chiaji̧ri̧pea̧ tara. Jabo danȩrȩ ca̧ oti̧, ¿yö̧ta dari̧ chiaji̧ri̧pea̧nȩrȩ pio jiro cjo̧ro̧rea̧ peaja̧ oa? ¿Yö̧ta dari̧ ado nö̧ria̧ oa cjiadiäji̧ri̧pea̧nȩrȩ? ¿Dibë nö̧riji̧ri̧ pio ji̧ri̧iä taruparëremȩde? Cjäri̧ madiibe ca̧ oti̧, pio ji̧ri̧iä tarupadërëremȩde. Ja̧bopaji̧ri̧ pio ji̧ri̧iä tarupadëa̧de. Ja̧borea̧ chiaji̧ri̧ pio ji̧ri̧iä tarupadëa̧de, jabo Ütë tjamo̧ ja̧ ma̧ȩ pio ju̧i̧iämo̧i̧ taruparëremȩde. Tjamo̧ davä. Ütë tjamo̧ ja̧ ma̧ȩ pio ju̧i̧iä, bucho ana̧mȩ ma̧ȩ pio ju̧i̧iä taruparëremȩde. Ado pio ju̧i̧iä peaja̧di bucho ana̧ cjo̧ro̧rea̧ chianȩrȩ. Jabechji̧ mȩnȩro̧ cjo̧ro̧rea̧ yürümȩ ma̧ȩ pio ju̧i̧ quëna̧ oaiä, ado nö̧ria̧ oa cjiadiäji̧ri̧pea̧nȩrȩ, bucho ana̧ cjo̧ro̧rea̧ chiaji̧ri̧rȩ.

²⁴ Ado pio jiro ma̧ȩ üdë ji̧mo̧ baäde no̧mȩ tjamo̧ri ja̧ go̧ȩpea̧ oa cjiarëremȩ ma̧ȩ pio ju̧i̧ nö̧ta. Ta̧rëchji̧vä: “Pumȩ judiro̧ ütëbodärärë jabomo̧ cärämi̧ dadirȩ. Jabechji̧ japamitë boi̧chji̧ chjätä ëte ja̧bo maeadirȩ. Ado judiro̧ goa̧ üdë, judiro̧ jo̧rȩta̧ üdë, ‘ba chia tjamo̧a̧ro̧da’ quëna̧ üdë, jabomo̧ chirirä cjo̧ro̧mȩ chjuchju pio judimi̧ dade. Jabechji̧ cärä üdë chjaodëri̧ gaüpe jäde. Jabechji̧ puripe baga ëte, gaüpe jäde. Chjaodëri̧ goarijämȩde. Ado peaja̧dimi̧ dadirȩ pumȩ judiro̧. Jabechji̧ ji̧ri̧ ja̧ üdë, judiro̧ jo̧rȩta̧ üdë, ‘ba chia tjamo̧a̧ro̧da’ quëna̧ üdë, jabechji̧ chjuchju üdë daburäpȩmo̧ chjaodëri̧ gu̧romi̧ dari̧ yuropapade.

²⁵ Jabo ibëa̧ Ano̧mȩ ja̧ ma̧ȩ üdë yuropadëmȩde, jabo bucho ana̧mȩde.” Aja̧ ca̧ oti̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë bucho ana̧mȩ ma̧ȩ pio ju̧i̧ chjiari. Ado pio jiro ma̧ȩ üdë ma̧ȩ chjadëi̧ pio judi tjamo̧de, pio dibëiäpȩmo̧ a̧ra̧ano̧a̧ oa cjiarërea̧ ma̧ȩ pio judi. Ado mȩnȩro̧ pio jiro ma̧ȩ oa quëna̧rërea̧ ji̧, jabechji̧ bucho ana̧mȩ ma̧ȩ pio ju̧i̧ quëna̧rëreji̧ri̧renȩro̧jo̧ȩ. Ado mȩnȩro̧ pio jiro ma̧ȩ oa quëna̧ji̧ri̧pea̧ oaiä, jabechji̧ bucho ana̧ cjo̧ro̧rea̧ chiaji̧ri̧pea̧nȩrȩ. Cjo̧ro̧rea̧ peaja̧ oa chiaji̧ri̧pea̧nȩrȩ. Ado pio ju̧i̧iä dibëa̧ dëbëti̧ra̧ chia ea tjamo̧ji̧ri̧rȩ cjo̧ro̧täreji̧ri̧nȩrȩ ca̧ oti̧. Tjamo̧ davä. Mȩnȩro̧ pio jiro ma̧ȩ oaiä joa̧ oa cjiami̧ dari̧ cjiadiäa̧ oaiä, jabechji̧ dibëa̧ dëbëti̧ra̧ chia ea tjamo̧ji̧ri̧rȩ cjo̧ro̧täreji̧ri̧nȩrȩ. Jabechji̧ mȩnȩro̧ ütëborë bucho ana̧mȩ ma̧ȩ pio ju̧i̧iä ado nö̧ria̧ oa cjiaji̧ri̧pea̧ tara, cja̧rȩmȩ pumȩ mapea̧nȩrȩ. Ado pio ju̧i̧iä, dëdë, ibëa̧ dëbëti̧ra̧ chia eaji̧ri̧rȩ cjo̧ro̧täreji̧ri̧rea̧rȩ.