Mateo 19 - Biblia Pume

Iei̧ ëbapea̧ pio ju̧i̧ chjiari, ado iei̧ ano̧pea̧ pio ju̧i̧ chjiari ni̧bärëremȩdejȩrȩ Jechu judi

¹ Ado Jechu judi pio jiro ma̧ȩ oa ni̧bä chjaodäräa̧rä, Garirea quȩmȩ chiriri pio judiri go̧dümȩrȩ järëremȩde Judea quȩmȩ chiriräpȩ, bea Joroda̧ oëräpȩ.

² Ado pumȩ bubarë cho̧rë järëreji̧ri̧diro̧jo̧ȩ. Ado Jechu judi gito ja̧boji̧ri̧ ütëbodärä oa chjaparȩrëremȩdejȩrȩ pio ju̧ri̧pȩji̧ri̧ oa.

³ Ado pjaricheo judiro̧ Jechu pio ju̧i̧iäpȩ go̧düdäräji̧ri̧rȩ iëno̧ë ta̧rërëreji̧ri̧diro̧jo̧ȩ, pio ju̧i̧ ütarami̧ dari̧ japatämi̧ cjiaji̧ri̧rȩ. Jabechji̧ Jechu judi puëräpȩ choë cjatämi̧ dari̧ cjiatä eaji̧ri̧rȩ ja̧di ta̧rëri̧ iëno̧ë ta̧rëa̧diro̧jo̧ȩ: ⁠—⁠Danȩ, üi̧ judi jibëa̧ iei̧ pio ji̧ ano̧rea̧ tararä judi, ¿jabechji̧dëde Moicherë go̧ȩparërea̧ ma̧ȩ pio ju̧i̧iä? ⁠—⁠iëno̧ë ta̧rëa̧diro̧jo̧ȩ.

⁴ Ado Jechu judi dëbë yo̧a̧dejȩrȩ: ⁠—⁠Danȩrȩ, ma̧ȩ oa ¿go̧ȩ ni̧bädëa̧nȩrȩ? ⁠—⁠iëno̧ë ta̧rëa̧dejȩrȩ⁠—⁠. Ütë tjamo̧ judi pumȩ ji̧ri̧ pearä judirä pareaparërea̧ pio ju̧i̧ chjiari ¿go̧ȩ ni̧bädëa̧nȩrȩ? Danȩrȩ, Ütë tjamo̧ judi ibëa̧ taru pio ji̧ri̧ pearä judirä pareaparërea̧ ji̧, jibëa̧ iodë maea oa pareaparëremȩdejȩrȩ, tjaoëji̧ri̧ oa. Jabechji̧ üi̧ pio ju̧i̧ pareaparëremȩdejȩ, ado iei̧ pio ji̧bo.

⁵ Ado pio ji̧ri̧ pareapea̧ duri oa, ja̧di ta̧rëri̧ yo̧rëremȩde Ütë tjamo̧ judi: “Aja̧, üi̧ judi jibëa̧ iei̧ ji̧ ëbarä, jabechji̧ a̧dë baätäremȩdejȩrȩ pio jȩa nö̧riji̧ri̧ pio ji̧ri̧. Jabechji̧ üi̧ judi jibëa̧ iei̧ pio ji̧ ëbarä, cja̧rȩmȩ pumȩmi̧ dari̧ cjiadiäpadirȩ.” Aja̧, ja̧di ta̧rëri̧ yo̧rëremȩde Ütë tjamo̧ judi.

⁶ Jabechji̧ judiro̧ yo̧a̧ri̧ pumȩrërea̧ ji̧, cja̧rȩmȩ pumȩpe bagami̧ dari̧ cjiadirȩ ëba̧ pio ju̧i̧iä. Jabechji̧ Ütë tjamo̧ pio judi tänȩa̧ oa, cja̧rȩmȩ pumȩpe jämi̧ dari̧ cjiadirȩ. Ado pio ju̧i̧iä ano̧dëpea̧de. Jabechji̧ ëba̧mi̧ ëbapea̧de bucho ana̧. Tjamo̧ davä. Ütë tjamo̧ judi ji̧mo̧ mape baga tänȩa̧ oaiä, jabechji̧ eami̧ üdë tänȩa̧ oaiä, ano̧dë matäreji̧ri̧dirȩ. Jabechji̧ üi̧ judi ano̧dëtäremȩdejȩ jibëa̧ iei̧ ji̧. Ado iei̧ jini̧ ano̧dëtäreyi̧nȩjȩ jibëa̧ üi̧ ju̧i̧. Jabechji̧ ëba̧ üdë china̧chjade. Ado pio ju̧i̧iä ano̧rea̧mi̧dëde ⁠—⁠dëbë yo̧mȩrȩ yo̧rëremȩdejȩrȩ.

⁷ Jabo pjaricheo judiro̧ ado iëno̧ë ta̧rëa̧diro̧jo̧ȩ: ⁠—⁠Jabo chjadëri̧ yo̧ibe ⁠—⁠yo̧a̧diro̧jo̧ȩ⁠—⁠. ¿Tjana̧ ju̧i̧iä yo̧rëremȩde Moicherea̧ judi ano̧rea̧ go̧ȩ i pio ju̧i̧ chjiari? Danȩ, iei̧ ji̧ ano̧a̧ üdë china̧chjarä judi, ado üi̧ judi jibëa̧ iei̧ pio ji̧ ano̧a̧ üdë peaja̧di china̧chjarä judi ¿tjana̧ ju̧i̧iä yo̧rëremȩde ano̧rea̧ go̧ȩ i pio ju̧i̧ yürütä? ⁠—⁠iëno̧ë ta̧rëa̧diro̧jo̧ȩ⁠—⁠. Pumȩ üi̧ judi jibëa̧ iei̧ pio ji̧ ano̧bea yaboi̧, ¿tjana̧ ju̧i̧iä ano̧rea̧ go̧ȩ i pio ju̧i̧ yürütä yo̧rëremȩde? 'Jabechji̧ ano̧a̧ üdë jabechji̧dida’ quëna̧rea̧mi̧ dari̧ ni̧bärëremȩde Moicherea̧ judi. Pio ju̧i̧iä iëno̧ë ta̧rërea̧ro̧mȩ. ¿Tjana̧ ju̧i̧iä ja̧di ta̧rëri̧ yo̧rëremȩde? Yo̧ibe ⁠—⁠yo̧ji̧ri̧rȩ yo̧a̧diro̧jo̧ȩ pjaricheo judiro̧.

⁸ Jabo Jechu judi dëbë yo̧a̧dejȩrȩ: ⁠—⁠Tjana̧ ju̧i̧iädë, jabechji̧ dibëa̧ ütëti̧rea̧ pio judiro̧ chjuari̧ jiadarërea̧ pio ju̧i̧iä, pio mȩnȩro̧borë chjuari̧ jiada̧ oaiä, jabechji̧ dibëa̧ iei̧ pio ji̧ ano̧rea̧ yürürëremȩdidibe Moicherea̧ judi. Jabo ja̧didërëremȩde pearä judi. Jabechji̧ pearä judi ja̧di dari̧ jo̧rȩtadërëremȩde Ütë tjamo̧ judi ëbapea̧ pio ju̧i̧ chjiari.

⁹ Ado pio ju̧i̧iä yo̧requededibe. Eami̧ pumȩ judi jibëa̧ iei̧ pio ji̧ ano̧rä judi, baë ëba mo̧a̧dëyi̧ pio ji̧ ano̧rä judi, chjai̧dëri̧ japade jibëa̧ iei̧ pio ji̧iäpȩmo̧. Ado judi ano mire ëbarä judi, peaja̧di chjai̧dëri̧ japade ano̧ mire ëbayi̧ pio ji̧iäpȩmo̧. Ado peaja̧dide iei̧ pio ji̧iä. Eami̧ iei̧ pio jini̧ baë ëba mo̧a̧dëmȩ pio ju̧i̧ ano̧rä judi, chjai̧dëri̧ japanȩjȩ jibëa̧ üi̧ pio ju̧i̧iäpȩmo̧. Ado jini̧ ano̧ mire ëbarä judi, peaja̧di chjai̧dëri̧ japanȩ ano̧ mirȩ ëbamȩ pio ju̧i̧iäpȩmo̧. Jabechji̧ bucho ana̧ ëbapea̧de. Baë ëba mo̧a̧rämo̧ ano̧rea̧mi̧ dade ⁠—⁠yo̧a̧dejȩrȩ.

¹⁰ Ja̧dëa ji̧ Jechu ja̧ jadü pio judiro̧ ano̧ mire yo̧a̧diro̧jo̧ȩ ëbapea̧ pio ju̧i̧ chjiari: ⁠—⁠Ja̧dirä judi, ëba̧ üdë bucho ana̧rä judi, iei̧ pio ji̧ ëba̧ üdë bucho ana̧rä judi, jabechji̧ iei̧ decjiamȩrȩ cjo̧ro̧rä judi ji̧dë u̧i̧ chjadëtäremȩde ⁠—⁠yo̧a̧diro̧jo̧ȩ.

¹¹ Jabo Jechu judi dëbë yo̧a̧dejȩrȩ: ⁠—⁠Danȩrȩ, o judiro̧ iei̧ ëbarea̧ jo̧rȩtadëdirȩ. Jabechji̧ Ütë tjamo̧ pio judi iei̧ ëbarea̧ yürüdëa̧ oaiä, jabechji̧ iei̧ ëbarea̧ taradëji̧ri̧rȩ cjo̧ro̧dirȩ. Jabo pio jiro jo̧rȩtarea̧ üdë goae tjamo̧dëdejȩrȩ o ji̧ri̧iä. Jabechji̧ iei̧ ëbadëri̧ cjiaji̧ri̧rȩ cjo̧ro̧dëri̧ cjiadirȩ.

¹² Jabo o judiro̧, jabechji̧ ëbarea̧ taradë madirȩ. ¿Tjana̧ ju̧i̧iä taradë madirȩ judiro̧? Tjana̧ ju̧i̧iädë, jabechji̧ o judiro̧ nö̧ decjiaji̧ri̧rȩ ara̧ oa cjiadirȩ. Ado pio ju̧i̧iä ëbarea̧ taradëdirȩ. Ado o judiro̧, jabechji̧ nö̧ cotodirȩ pumȩ pio judiro̧ nö̧ budoa̧ oaiä. Peaja̧di ëbadëdirȩ. Ado o judiro̧, jabechji̧ iei̧ ëbadëri̧ cjiadirȩ, iei̧ pio ji̧iä oëra̧diächea oa, Ütë tjamo̧ ja̧ maea oa china̧chjari̧ ja̧bepapea̧ oa. Pio ju̧i̧iä iei̧ ëbadëri̧ cjiadirȩ o judiro̧. Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. ‘Chja ja̧di iei̧ ëbamȩrȩ cjo̧ro̧dëpaquëda’ quëna̧mȩ judi, jabechji̧ cjiadiämi̧ tarari̧ jo̧rȩtamȩrȩ cjo̧ro̧täde, iei̧ ëbadëmȩrȩ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi iei̧ ëbadëji̧ri̧ pio ji̧ri̧ chjiari.

Jechu judi ba chia dadejȩrȩ bori̧ pio ji̧ri̧

¹³ Ja̧dëa ji̧ pumȩ judiro̧ ëba go̧düdärärëreji̧ri̧diro̧jȩrȩ jibëa̧ bori̧ ji̧ri̧ Jechu pio ju̧i̧iäpȩ. Jabechji̧ Jechu judi bori̧ ja̧ tjübë oa idapea̧ oa, pio ji̧ri̧ chjiari Ütë tjamo̧ pio ju̧i̧iä goë cjo̧dëpea̧ oa, ëba go̧düdärä chjaorëreji̧ri̧diro̧jo̧ȩ. Jabo Jechu ja̧ jadü judiro̧ to̧bari̧ yo̧rëreji̧ri̧diro̧jȩrȩ nö̧riji̧ri̧ pio ji̧ri̧iäpȩmo̧, jibëa̧ bori̧ ji̧ri̧ ëba jana̧dëtä.

¹⁴ Jabo Jechu judi chjaodëri̧ tuti yo̧mȩrȩ yo̧rëremȩdejȩrȩ: ⁠—⁠Jabo cjäri̧ ma, chja jabechji̧ jana̧tädiro̧coe bori̧ judiro̧. Tja̧reparȩdëchji̧jȩrȩ ⁠—⁠yo̧a̧dejȩrȩ⁠—⁠. Jabechji̧ pio jiro bori̧mi̧ da maearë yu̧a̧rea̧ dapadirȩ Ütërë yo̧a̧ chja̧oerä. Chja jabechji̧ jana̧tädiro̧coe ⁠—⁠yo̧a̧dejȩrȩ.

¹⁵ Ado Jechu judi jibëa̧ ichira̧ bori̧ ja̧ tjübë oa idamȩrȩ goë cjo̧dërëremȩde pio ji̧ri̧ chjiari Ütë tjamo̧ ju̧i̧iäpȩmo̧. Ado ja̧di dari̧ japa ëte, a̧dë baärëremȩdejȩrȩ.

Chëre ji̧ra̧ri̧ goamȩ pio ju̧i̧ chjiari ni̧bä chjaorëremȩde Jechu judi

¹⁶ Ado cja̧rȩmȩ pumȩ üi̧ judi go̧düna̧ra̧rëremȩdejȩ Jechu pio ju̧i̧iäpȩ. Ado ja̧di ta̧rëri̧ yo̧mȩrȩ iëno̧ë ta̧rëa̧dejȩ: ⁠—⁠A̧ra̧ano̧mȩ, chjadëri̧ yo̧coe ⁠—⁠yo̧a̧dejȩ⁠—⁠. Cüdë bucho ana̧ cjo̧ro̧rea̧ dapea̧ oa, ¿tjana̧ chjadë oa japatäremȩrequede cüdë? ⁠—⁠iëno̧ë ta̧rëa̧dejȩ.

¹⁷ Ado Jechu judi dëbë yo̧a̧dejȩ: ⁠—⁠¿Tjana̧ ju̧i̧iä iëno̧ë ta̧rërenȩquȩ chjadë oa japapea̧ pio ju̧i̧ chjiari? Danȩ, chjadëmȩ judi jabomo̧ cja̧rȩmȩde. Ütë tjamo̧ pio judimo̧de. Jabo yaba̧ dëbë yo̧parequedemȩ mȩnȩ pio coa iëno̧ë ta̧rëa̧ pio ju̧i̧ chjiari ⁠—⁠yo̧a̧dejȩ⁠—⁠. Danȩ, mȩnȩ bucho ana̧ cjo̧ro̧rea̧ chiatämi̧ cjia tjamo̧rä judi, jabechji̧ nö̧tadäräri̧ japavä tüdüa̧mi̧ darä cjo̧ro̧pea̧ ma̧ȩ pio ju̧i̧ ⁠—⁠yo̧a̧dejȩ.

¹⁸ Jabo pumȩ üi̧ judi dëbë yo̧mȩrȩ iëno̧ë ta̧rëa̧dejȩ: ⁠—⁠¿Tjana̧ ma̧ȩ oa ta̧rëdiäpea̧de? Chjadëri̧ yo̧coe. Ado Jechu judi dëbë yo̧mȩrȩ, yo̧a̧dejȩ: ⁠—⁠Tjana̧ ma̧ȩdë, danȩ, ütarë yo̧parequedemȩ ⁠—⁠yo̧a̧dejȩ Jechu judi⁠—⁠. Ado cja̧rȩmo̧ pumȩ oa ja̧bo tänȩdëvä. Ado cja̧rȩmo̧ ja̧ iei̧ pio ji̧ baë ëba mo̧a̧dëvä. Ado eami̧ oa garüdëvä. Ado pumȩ pio ji̧ri̧ chjiari ma̧ȩ chjádë yürüdëvä.

¹⁹ Ado mȩa nö̧riji̧ri̧ pio ji̧ri̧ ba chia dajȩrȩ. Ado na̧ i pio ju̧i̧ eami̧ eajȩrȩ o ji̧ri̧. Aja̧, pio jiro ma̧ȩ oa ta̧rëdiäpea̧de ⁠—⁠yo̧mȩrȩ dëbë yo̧rëremȩdejȩ pumȩ üi̧ pio ju̧i̧ Jechu judi.

²⁰ Ado pumȩ üi̧ judi ütama̧i̧ tjamo̧dërë jabo pëi̧ chjarë pio ju̧i̧ ta̧rëa̧ oaiä, dëbë yo̧a̧dejȩ Jechu ju̧i̧: ⁠—⁠Danȩ, mȩnȩ yo̧a̧ ma̧ȩ chjö̧na̧i̧ oa nö̧tadäräri̧ ta̧rëdiäa̧reconȩ, cjiadiärea̧ decjiari̧. Jabo chjadëri̧ yo̧coe ⁠—⁠yo̧a̧dejȩ⁠—⁠. ¿Tjana̧ a̧de japapea̧de? ¿Tjana̧ jabë pjärämȩde cüdë bucho ana̧ cjo̧ro̧rea̧ pio ju̧i̧ boapea̧ oa? Chjadëri̧ yo̧coe ⁠—⁠yo̧a̧dejȩ.

²¹ Jabo pio ju̧i̧ ta̧rëa̧ oaiä, ja̧di ta̧rëri̧ dëbë yo̧a̧dejȩ Jechu judi: ⁠—⁠Danȩ, mȩnȩ jabëdiärea̧ decjiari̧ cjo̧ro̧tämi̧ cjiarä judi, jabechji̧ na̧ea̧ chjö̧na̧i̧ oa gatë tänȩno̧jo̧ȩ ⁠—⁠yo̧a̧dejȩ⁠—⁠. Ado gatë tänȩ ëte, jabechji̧ chëre chjö̧na̧i̧ oa yürüjȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Jabechji̧ mȩnȩ ja̧di dari̧ japarä judi, a̧dë chjäte ba chia pio ju̧i̧ goaparenȩ a̧dëräpȩ ju̧ri̧. Aja̧, ja̧di dari̧ japavä. Ado ja̧di dari̧ japa ëte, jabechji̧ cho̧rë jana̧coe ⁠—⁠yo̧a̧dejȩ.

²² Jabo jiro pëi̧ chjarë, pio jiro ma̧ȩ oa ta̧rëa̧ oaiä, gito ana̧ri̧ jo̧rȩtamȩrȩ baäeno̧rëremȩde. Jabechji̧ a̧dë chjäte ji̧ra̧ri̧ goamȩ tara, gito ana̧ri̧ jo̧rȩtamȩrȩ baäa̧de.

²³ Ado ja̧dëa ji̧ Jechu judi yo̧rëremȩdejȩrȩ jibëa̧ jadü ji̧ri̧: ⁠—⁠Danȩrȩ, tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Chjao tjamo̧de chëre ji̧ra̧ri̧ goamȩ judi Ütërë yo̧a̧ chja̧oeräpȩ yu̧a̧pea̧ üdë.

²⁴ Ado peaja̧di chjao tjamo̧de putu ju chocomȩ pio judi cararea̧ cjara oa yu̧ë chjätäpea̧ üdë. Jabo danȩrȩ, ji̧dë u̧i̧ chjaode chëre ji̧ra̧ri̧ goamȩ judi Ütërë yo̧a̧ chja̧oerä yu̧a̧pea̧ üdë. Tjamo̧ davä. Putu ju chocomȩ pio judi cararea̧ cjara oa yu̧ë chjätäpea̧ pio ju̧i̧iä ji̧dë u̧i̧ chjaode chëre ji̧ra̧ri̧ goamȩ judi Ütërë yo̧a̧ chja̧oeräpȩ yu̧a̧pea̧ üdë ⁠—⁠yo̧a̧dejȩrȩ.

²⁵ Ado Jechu judi pio jiro ma̧ȩ oa ni̧bä chjaoa̧ oaiä, dacho bëremi̧ cjiami̧ dari̧ jo̧rȩtaji̧ri̧pea̧dirȩ jibëa̧ jadü judiro̧, ana̧ri̧ jo̧rȩtaji̧ri̧rȩ. Ado yo̧a̧diro̧jo̧ȩ Jechu ju̧i̧: ⁠—⁠Jabo ja̧dirä judi, ¿yö̧ta dari̧ chjätärea̧ dapacjivaa̧ro̧? Chjätäpea̧ üdë chëre ji̧ra̧ri̧ go̧a̧mȩ pio ji̧ri̧iä chjao tjamo̧rä judi, ¿tjana̧ pumȩrȩ chjätärea̧ dapacjivadi? ⁠—⁠yo̧a̧dirȩ.

²⁶ Jabo Jechu judi jibëa̧ jadü pio ji̧ri̧ dëbë damȩrȩ yo̧rëremȩdejȩrȩ: ⁠—⁠Dëdë, chjätärea̧ üdë pumȩ pio ji̧ri̧iä chjao tjamo̧de. Jabechji̧ japarea̧mi̧dëde. Jabo chjao tjamo̧dëde Ütë tjamo̧ pio ju̧i̧iä ⁠—⁠yo̧a̧dejȩrȩ⁠—⁠. 'Jabechji̧ japarea̧mi̧dëdida' quëna̧dëpea̧de. Dëdë, pumȩ judiro̧ jibëa̧ ma̧na̧ri̧ japea̧ oaiä chjätärea̧mi̧dëdirȩ, jabo Ütë tjamo̧ pio judi tuti japea̧ oaiä, dëdë, chjätärea̧ dapai̧ dadirȩ ⁠—⁠yo̧a̧dejȩrȩ Jechu judi

Chjadëri̧ ba ano̧a̧ oa cjiapadirȩ Jechu ja̧ oa ja̧bepaji̧ri̧ pio judiro̧

²⁷ Pio ju̧i̧ ta̧rëa̧ oaiä, dëbë yo̧a̧dejȩ Jechu ju̧i̧ Pedro judi: ⁠—⁠Danȩ, pio mȩa cho̧rë ma̧na̧pea̧ oa ibëa̧remȩ chjö̧na̧i̧ oa a̧dë ma̧na̧rea̧ro̧jo̧ȩ. Ado pio ju̧i̧iä mö̧na̧rea̧rȩ yaba̧. Jabo yo̧coe ⁠—⁠yo̧a̧dejȩ⁠—⁠. ¿Yö̧ta dari̧ jo̧rȩtamȩrȩ dadiibe Ütë tjamo̧ judi? ¿Tjana̧ oa yürüpadiibe pio ibë ba ano̧pea̧ oa? ⁠—⁠yo̧a̧dejȩ.

²⁸ Ado Jechu judi dëbë yo̧mȩrȩ ütëbo oa yo̧a̧dejȩrȩ: ⁠—⁠Tjamo̧i̧ cjiari̧ yo̧requededibe ⁠—⁠yo̧a̧dejȩrȩ⁠—⁠. Danȩrȩ, chjadëri̧ ba ano̧a̧ oa cjiapanȩrȩ. Jabechji̧ dabu peaja̧ üdë pareapea̧ oa cjiarä, ado Pumȩrȩ Ara̧ Tjamo̧ pio judi a̧dë chjäte tatari̧ cjiamȩ charea̧ ba chia tjamo̧räpȩ charä, jabechji̧ pio mȩnȩro̧borë chapanȩrȩ davä dibëa̧ charea̧ ba chia tjamo̧ro ⁠—⁠yo̧a̧dejȩrȩ⁠—⁠. Danȩrȩ, pio coa cho̧rë jana̧rëreji̧ri̧ pio judiro̧nȩrȩ. Aja̧, 12nȩrȩ. Ado pio mȩnȩro̧ pio jiro doro, jabechji̧ 12 charea̧ ba chiarä chapanȩrȩ. Ado Icharai pio judiri ja̧ buba pio ji̧ri̧ ütaraparenȩro̧jȩrȩ, 12 buba oa. Aja̧, ja̧di dari̧ japamȩrȩ ba ano̧padidibe Ütë tjamo̧ judi. Tjamo̧ yo̧rea̧ yürüpadidibe ⁠—⁠yo̧a̧dejȩrȩ⁠—⁠.

²⁹ Ado danȩrȩ, eami̧ pumȩ üdë pio coa eamȩrȩ jibëa̧ bë oa a̧dë baärä judi, jibëa̧ ayi̧ma̧i̧ pio ji̧ri̧ a̧dë baärä judi, jibëa̧ ayi̧cai̧ pio ji̧ri̧ a̧dë baärä judi, jibë nö̧riji̧ri̧ pio ji̧ri̧ a̧dë baärä judi, jibëa̧ chiri oa a̧dë baärä judi, jibëa̧ tjado oa a̧dë baärä judi, pio coa ta̧rëdiäpea̧ oa a̧dë baärä judi, jabechji̧ a̧dë chjäte ji̧ra̧ ba chiara̧ pio ju̧ri̧ra̧ ba ano̧a̧ oa cjiapade ⁠—⁠yo̧a̧dejȩrȩ⁠—⁠. Jabechji̧ jënȩ a̧dë baäa̧ pio ju̧i̧ u̧i̧ ji̧ra̧ tjamo̧ oa ba ano̧a̧ oa cjiapade. Ado ju̧i̧ uëri bucho ana̧ cjo̧ro̧rea̧ dapade ji̧dëri̧.

³⁰ Jabechji̧ pio yaba̧mȩ yoaiä cjo̧ro̧ji̧ri̧ pio judiro̧ orë ba chia tjamo̧mi̧ dari̧ cjo̧ro̧dirȩ. O ji̧ri̧iä ji̧dë u̧i̧ ba chiami̧ dari̧ cjo̧ro̧dirȩ. Jabo cjäri̧ madirȩ, pio jiro pumȩ pio judiro̧ mu̧i̧tjoi̧mi̧ da maearë ano̧ mire cjo̧ro̧padirȩ pio jiro doro. Ado mu̧i̧tjoi̧mi̧ dari̧ cjo̧ro̧rëreji̧ri̧ pio judiro̧, ba chiadëji̧ri̧mi̧ dari̧ cjo̧ro̧rëreji̧ri̧ pio judiro̧, jabechji̧ ba chia tjamo̧ji̧ri̧ maearë ano̧ mire cjo̧ro̧padirȩ. Tjamo̧ davä. Ba chiadëji̧ri̧mi̧ dari̧ cjo̧ro̧rëreji̧ri̧ pio judiro̧, pio jiro doro, jabechji̧ ba chia tjamo̧ji̧ri̧mi̧ dari̧ ano̧ mire cjiadiäpadirȩ. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.