Mateo 16 - Biblia Pume

Pjaricheo judiro̧, Chaducheo pio judiro̧borë na̧rȩrea̧ oa na̧rȩtä eaji̧ri̧rȩ yo̧ chjaorëreji̧ri̧diro̧jo̧ȩ Jechu ju̧i̧

¹ Ado pjaricheo judiro̧, chaducheo pio judiro̧borë goë daera̧pea̧diro̧jo̧ȩ Jechu pio ju̧i̧. Ado Jechu pio ju̧i̧ ütarami̧ dari̧ japapea̧ oa, judi puëräpȩ choë cjatämi̧ dari̧ cjia tänȩpea̧ oa, jabechji̧ ja̧di ta̧rëri̧ yo̧ji̧ri̧rȩ yo̧rëreji̧ri̧diro̧jo̧ȩ: ⁠—⁠Danȩ, mȩnȩ Ütë tjamo̧ pio judi chjadüa̧ oa tjamo̧ri̧ birë ma̧na̧rä judi, jabechji̧ na̧rȩibe ⁠—⁠yo̧a̧diro̧jo̧ȩ⁠—⁠. A̧dëri ma̧na̧mȩ jauëchjarea̧ra̧ pio ju̧ri̧ra̧ chjadëri̧ na̧rȩibe ⁠—⁠yo̧a̧diro̧jo̧ȩ.

² Jabo Jechu judi dëbë yo̧mȩrȩ ja̧di ta̧rëri̧ yo̧a̧dejȩrȩ: ⁠—⁠Danȩrȩ, mȩnȩro̧ gȩnȩpe järä, jabechji̧ ütarë darenȩro̧jo̧ȩ a̧dë i oa ⁠—⁠yo̧a̧dejȩrȩ⁠—⁠. ‘Aja̧, a̧dë i üdë coëcoëadiibëda, do üdë coëcoëari̧ biradibëda, pio ju̧i̧iä jabechji̧, jaco chjadërë cjitëpai̧ dadiibëda do üdë, ma̧i̧ dari̧ pupuriparea̧ decjiari̧ cjitëpadiibëda’ quëna̧ ütarë daji̧ri̧rȩ yo̧nȩrȩ ⁠—⁠yo̧a̧dejȩrȩ⁠—⁠.

³ Ado peadai̧rä mȩnȩro̧ bëdüa̧rä, peaja̧di ütarë darenȩro̧jo̧ȩ a̧dë i oa. ‘Aja̧, a̧dë i üdë coëcoëadiibëda, do üdë coëcoëarë cjitëdiibëda, jabechji̧ pio yaba̧ uapai̧ dari̧ japapai̧ dadiibëda, pupuripapai̧ dadiibëda’ quëna̧ ütarë daji̧ri̧rȩ yo̧nȩrȩ ⁠—⁠yo̧a̧dejȩrȩ⁠—⁠. Aja̧, ja̧di dari̧ japaji̧ri̧rȩ ütarë danȩrȩ davä a̧dë i pio ju̧i̧. Jabechji̧ a̧dë i pio ju̧i̧ ütarapea̧ ji̧ chjadëri̧ dabapea̧nȩrȩ. ¿Jabo tjana̧ ju̧i̧iä tjamo̧ri̧ ütarë dadë manȩrȩ pio coa chjiari? ⁠—⁠iëno̧ë ta̧rëa̧dejȩrȩ⁠—⁠. Danȩrȩ, pio yaba̧ domȩ oa Ütë tjamo̧ judi na̧rȩrea̧ ji̧ra̧ tjamo̧ oa yürüde pio coaiä. Jabo ji̧ra̧ tjamo̧ oa na̧rȩa̧räbo, jabechji̧ pio ju̧i̧ chjiari chjadëri̧ ütarë jo̧rȩtadënȩrȩ. Pio ju̧i̧ chjiari jabë tjamo̧ri̧ ütarë jo̧rȩtapea̧ ji̧ dabadënȩrȩ.

⁴ Jabechji̧ pio yaba̧ domȩ oa cjo̧ro̧ji̧ri̧ pio mȩnȩro̧, chjai̧dë tjamo̧nȩrȩ. Jabechji̧ Ütë tjamo̧ pio ju̧i̧ putu jura̧ a̧dë chami̧ dari̧ a̧dë jo̧rȩtarenȩro̧jo̧ȩ. Jabechji̧ na̧rȩrea̧ pio ju̧i̧mo̧i̧ jo̧rȩtanȩrȩ. Tjamo̧ davä, jauëchja cjiari̧ na̧rȩrea̧ pio ju̧i̧mo̧i̧ datämi̧ cjianȩrȩ. Jabo cjäri̧ marequededibe, eami̧ na̧rȩrea̧ oa yürüdëparequededibe, jabo Jona̧ quȩmȩrea̧ pio ju̧i̧ chjiarimo̧i̧ na̧rȩrea̧ oa yürüparequededibe ⁠—⁠yo̧a̧dejȩrȩ. Ado Jechu judi ja̧di ta̧rëri̧ ni̧bä ëte, a̧dë baärëremȩdejȩrȩ.

Jechu judi na̧rȩrea̧ ma̧ȩmi̧ da oa ni̧bärëremȩdejȩrȩ pjaricheorë teracabari̧ a̧ra̧ano̧rea̧ pio ju̧i̧ chjiari

⁵ Ado Jechu ja̧ jadü judiro̧ tja oëräpȩ yuro go̧düdäräa̧rä, jabechji̧ jo̧rȩtadëpe bagarëreji̧ri̧dirȩ chja̧pe pio ju̧i̧ goa jäpea̧ ji̧.

⁶ Ado Jechu judi 'chja̧pe oa a̧dë jo̧rȩtapea̧diro̧da' quëna̧ oaiä, jabechji̧ taruparëremȩde pio ji̧ri̧iäpȩmo̧ ni̧bä chjaopea̧ ji̧ na̧rȩrea̧ ma̧ȩmi̧ dara̧. Ja̧di ta̧rëri̧ yo̧mȩrȩ yo̧rëremȩdejȩrȩ: ⁠—⁠Danȩrȩ, na̧e chiachji̧vä ⁠—⁠yo̧a̧dejȩrȩ⁠—⁠. Jabechji̧ pjaricheo ja̧ pjuru chiaparȩrea̧mi̧ da pio ju̧i̧ chjiari na̧ȩ chiachji̧vä. Ado chaducheo pio ji̧ri̧ ja̧ pjuru chiaparȩrea̧mi̧ da pio ju̧i̧ chjiaribo quëna̧chji̧vä ⁠—⁠yo̧a̧dejȩrȩ.

⁷ Jabo Jechu ja̧ jadü judiro̧, ‘¿tjana̧ yo̧cjivadi?’ quëna̧ji̧ri̧rȩ tjamo̧ri̧ bapë ta̧rëdëa̧diro̧jo̧ȩ. ‘Aja̧, oëra̧ a̧ra̧ano̧rea̧ ma̧ȩ pio ju̧i̧ chjiari na̧ȩ chiatä ea jirodiibëda’ quëna̧tärea̧ ji̧, ja̧di dari̧ quëna̧dëa̧dirȩ. ‘Jabechji̧ a̧ro̧rȩ chja̧pe oa goa jana̧dëa̧ oaiä, ja̧di ta̧rëri̧ yo̧a̧ jirodiibëda’ quëna̧ jo̧rȩtarëreji̧ri̧dirȩ pjuru chiaparȩrea̧ pio ju̧i̧ chjiari ta̧rëa̧ oaiä.

⁸ Jabo Jechu judi, ‘Chia chia, chja̧pe pio ju̧i̧mo̧i̧ jo̧rȩtadiro̧da, ado pio ju̧i̧iä oëra̧ a̧ra̧ano̧rea̧ pio ju̧i̧ chjiari bapë ta̧rëdëa̧diro̧da, cüdë pio yaboi̧ a̧ra̧ano̧tea̧ pio ju̧i̧ bapë ta̧rëdëa̧diro̧da’ quëna̧ jo̧rȩta̧ oaiä, oëra̧ a̧ra̧ano̧rea̧ pio ju̧i̧ chjiari ni̧bärëremȩrȩ ano̧ mire ni̧bä chjaomȩpea̧dejȩrȩ judiro̧ pio jȩaiäpȩmo̧ chjuari̧ quëna̧pea̧ pio ju̧i̧ chjiari. Ado pio ju̧i̧iä ja̧di ta̧rëri̧ iëno̧ë ta̧rëa̧dejȩrȩ: ⁠—⁠Danȩrȩ, ¿tjana̧ ju̧i̧iä bücüri̧ cjiaji̧ri̧rȩ ni̧bä chjaonȩrȩ chja̧pe oa goa jana̧dëa̧ pio ju̧i̧ chjiari? ⁠—⁠iëno̧ë ta̧rëa̧dejȩrȩ⁠—⁠. ¿Tjana̧ ju̧i̧iä jabëtari̧mi̧ maea oa quëna̧renȩro̧coe? ¿Tjana̧ ju̧i̧iä ja̧ȩ cjiami̧ dari̧ quëna̧dërenȩro̧coe chja̧pe pio ju̧i̧ chjiari?

⁹ ¿Jabë na̧e chiape bagadëa̧nȩrȩ pio coa chjiari? ⁠—⁠iëno̧ë ta̧rëa̧dejȩrȩ⁠—⁠. Danȩrȩ, ado cja̧rȩmo̧ doremȩrä cüdë chjaodëri̧ japea̧ pio ju̧i̧ chjiari ¿jabë jo̧rȩtadënȩrȩ? Cüdë cja̧rȩichimo̧ chja̧pe maeara̧ japea̧ pio ju̧i̧ chjiari, cüdë 5 mil oari pio ji̧ri̧ jurarea̧ oa chjaodëri̧ ëba jura̧ pio ju̧i̧ chjiari, ¿jabë jo̧rȩtadënȩrȩ? Ado danȩrȩ, judiro̧ jura̧ duri oa, mȩnȩro̧ jurarea̧ pënȩi̧ pio ju̧i̧ mitëa̧ pio ju̧i̧ chjiari, mȩnȩro̧ taio ji̧ra̧ oa mitëa̧ pio ju̧i̧ chjiari ¿jo̧rȩtadënȩrȩ?

¹⁰ Ado ji̧dë duri oa cüdë 4 mil oari pio ji̧ri̧ ëba jura̧ ji̧, cüdë 7 chja̧pe maea oa goamȩborë, pio jiro pumȩ pio ji̧ri̧ chjaodëri̧ ëba jura̧ pio ju̧i̧ ¿peaja̧di jo̧rȩtadënȩrȩ? Ado pio ji̧ri̧ ëba jura̧ duri oa, ¿napai̧ taio oa mitëa̧nȩrȩ? Napai̧dë, ji̧ra̧ oa mitëa̧nȩrȩ. Ado pio ju̧i̧iä jabechji̧, jurarea̧ pio ju̧i̧ chjiari bücjüri̧ cjiarea̧mi̧dëde ⁠—⁠yo̧a̧dejȩrȩ⁠—⁠.

¹¹ Jabo danȩrȩ, cüdë pio yabo pjuru chiaparȩrea̧ pio ju̧i̧ chjiari yo̧a̧ ji̧, ¿tjana̧ ju̧i̧iä chja̧pe pio ju̧i̧ chjiari yo̧a̧rämi̧ cjiarenȩro̧coe? Danȩrȩ, chja̧pe pio ju̧i̧ chjiari yo̧dëa̧requededibe, jabo ado cja̧rȩmo̧ jo̧rȩtarea̧ chiamȩrȩ yo̧a̧requededibe. Ado pio ju̧i̧iä ado yo̧requededibe yaba̧. Mȩnȩro̧ chjadëri̧ ta̧rëpea̧ oa, jabechji̧ ado chjereno̧ yo̧requededibe ⁠—⁠yo̧a̧dejȩrȩ⁠—⁠. Danȩrȩ, na̧e chiachji̧vä. Pjaricheo ja̧ pjuru chiaparȩrea̧ pio ju̧i̧ chjiari na̧ȩ chiachji̧vä. Chaducheo ja̧ pjuru chiaparȩrea̧ pio ju̧i̧ chjiari quëna̧chji̧vä ⁠—⁠yo̧a̧dejȩrȩ.

¹² Ado Jechu judi ja̧di ta̧rëri̧ ado ni̧bä chjaoa̧ oaiä, coëma cjiari̧ jo̧rȩtaji̧ri̧pea̧dirȩ. ‘Aja̧, pjuru chiaparȩrea̧ pio ju̧i̧ chjiari tjamo̧ri̧ yo̧dëa̧diibëda, jabo pjaricheo pio judiro̧ oëra̧ a̧ra̧ano̧a̧ pio ju̧i̧ chjiari na̧e chiatä yo̧a̧diibëda, chaducheo pio judiro̧ oëra̧ a̧ra̧ano̧a̧ pio ju̧i̧ chjiari na̧e chiatä yo̧a̧diibëda’ quëna̧ jo̧rȩtaji̧ri̧pea̧dirȩ.

Tjamo̧i̧ cjiari̧ yo̧rëremȩde Pedro judi Jechu pio ju̧i̧ chjiari

¹³ Ado Jechu judi ado cja̧rȩmo̧ doremȩrä jibëa̧ jadü pio ji̧ri̧ nö̧ta ja̧dira̧ järëremȩde, Checharea Pjiripo quȩmȩ be ma̧ri̧ a̧rȩmȩ chiriräpȩmo̧. Ado judiro̧ pio jiro chiriräpȩ go̧düdäräa̧rä, jabechji̧ Jechu pio judi pio jȩa chjiari iëno̧ë ta̧rërëremȩdejȩrȩ jibëa̧ jadü ji̧ri̧: ⁠—⁠Danȩrȩ, ¿tjana̧ yo̧dirȩ pumȩ judiro̧ pio coa chjiari? ¿Chjia tjamo̧rämi̧ cjiadiro̧coe Pumȩrȩ Ara̧ Tjamo̧ pio ju̧i̧? ⁠—⁠iëno̧ë ta̧rëa̧dejȩrȩ.

¹⁴ Ado dëbë yo̧a̧diro̧jo̧ȩ: ⁠—⁠Chjia tjamo̧rämi̧ cjiadë, jabechji̧ o judiro̧ Juan pio judirämi̧ cjiadiro̧mȩ, uirä go̧ȩ cjaeä chudarëremȩ pio judi. Ado o judiro̧ ‘Jeremia pio judi jirodida’ quëna̧diro̧mȩ. Ado o judiro̧, ‘Aja̧ Eria pio judipamȩ jirodida’ quëna̧ jo̧rȩtadiro̧mȩ. Ado o judiro̧, ‘A̧ja̧ Ütërë ea jana̧ chjadüa̧ oa ni̧bämȩ pio judipamȩdida’ quëna̧diro̧mȩ ⁠—⁠dëbë yo̧ji̧ri̧rȩ yo̧a̧diro̧jo̧ȩ.

¹⁵ Ja̧dëa ji̧ Jechu judi iëno̧ë ta̧rëa̧dejȩrȩ: ⁠—⁠Ado mȩnȩro̧, ¿yö̧ta dari̧ jo̧rȩtarenȩro̧coe? ¿Chjia tjamo̧rämi̧ cjiarenȩro̧coe coa? ⁠—⁠iëno̧ë ta̧rëa̧dejȩrȩ.

¹⁶ Ado Chimo̧ Pedro pio judi dëbë yo̧mȩrȩ yo̧a̧dejȩ: ⁠—⁠Chjia tjamo̧rämi̧ cjiadë, ‘jabechji̧ Ütërë mitëa̧ Chjätä Tänȩmȩ pio judida, ja̧bodëmȩ Ütë pio ju̧i̧ ja̧ Joja tjamo̧dida’ quëna̧ jo̧rȩtaji̧ri̧rȩ darea̧ro̧mȩ ⁠—⁠dëbë yo̧a̧dejȩ.

¹⁷ Ado Jechu judi pio ju̧i̧ ta̧rëa̧ oaiä yo̧a̧dejȩ Pedro ju̧i̧: ⁠—⁠Ütë tjamo̧ judi pio coa chjiari chjadëri̧ daba tänȩa̧ oaiä, jabechji̧ na̧ȩ chiapea̧renȩ ⁠—⁠yo̧a̧dejȩ⁠—⁠. Ado pio mȩa ja̧di dari̧ daba tänȩa̧ oaiä, jabechji̧ Ütërë chjadëri̧ a̧doa̧ oa cjiarenȩ. Jabechji̧ eami̧ pumȩ pio judi tänȩa̧ oaiä na̧e chiape bagadëa̧renȩ, jabo jabechji̧ ca̧ Ama̧i̧ pio judi dabarea̧ yürü oaiämo̧i̧ na̧e chiapea̧renȩ. Tjamo̧ davä. A̧dëräpȩ cjiamȩ Ama̧i̧ pio judi daba tänȩa̧ oaiä, na̧e chiapea̧renȩ pio coa chjiari. Ado judi ja̧di dari̧ japea̧ oaiä, jabechji̧ chjadëri̧ a̧doa̧ oa cjiarenȩ.

¹⁸ Ado danȩ ca̧ jadü ⁠—⁠yo̧a̧dejȩ⁠—⁠. Pedro quȩmȩrenȩ mȩnȩ. Ado Pedro yo̧rea̧ quȩ üdë, jabechji̧ “ta̧dë” yo̧rea̧de ⁠—⁠yo̧a̧dejȩ⁠—⁠. Ado danȩ, ta̧dëmi̧ darä cji̧dämi̧ dari̧ japaparequede ca̧ bëmi̧ da pio ju̧i̧, ca̧ a̧doparea̧ pio ju̧i̧. Jabechji̧ cji̧dämi̧ dari̧ japapareconȩ, Ichiae pio judi boadärärea̧ decjiari̧.

¹⁹ Ado Ütërë yo̧a̧ chja̧oeräpȩ yu̧a̧rea̧ joë ya coërea̧ pio ju̧i̧ yürüparequedemȩ Pedro ⁠—⁠yo̧a̧dejȩ⁠—⁠. Tjamo̧ davä. Joë ya coërea̧ pio ju̧i̧, joë ya tuticararea̧ pio ju̧i̧ yürüparequedemȩ. Jabechji̧ tjamo̧ yo̧rea̧ oa yürürequedemȩ. Ado mȩnȩ pio yoa chirirä eami̧ oa china̧chjaparȩrä judi, peaja̧di china̧chjaparȩa̧ oa cjiapade a̧dëräpȩ ju̧ri̧. Ado mȩnȩ pio yoa chirirä eami̧ oa china̧chjaparȩdërä judi, peaja̧di china̧chjaparȩdëa̧ oa cjiapade a̧dëräpȩ ju̧ri̧ ⁠—⁠yo̧mȩrȩ yo̧rëremȩdejȩ Pedro pio ju̧i̧ Jechu judi.

²⁰ Ado Jechu judi ja̧di ta̧rëri̧ ni̧bäa̧ duri oa, pio jȩa chjiari cjapiri̧ cjiatä yo̧rëremȩdejȩrȩ jibëa̧ jadü ji̧ri̧, judiro̧ eami̧ oa yo̧chea oa pio jȩa chjiari. Jabechji̧ ‘Ütërë mitëa̧ Chjätä Tänȩmȩ pio judidida’ quëna̧ jo̧rȩtaji̧ri̧rȩ yo̧chea oa, cjapiri̧ cjiatä yo̧rëremȩdejȩrȩ.

Jechu judi, jënȩ gitori̧ ja̧bopea̧ pio ju̧i̧ chjiari ni̧bä chjaorëremȩdejȩrȩ jibëa̧ jadü ji̧ri̧

²¹ Pio jiro dori pio judiri yurori Jechu judi ni̧bä chjaorëremȩdejȩrȩ jibëa̧ jadü ji̧ri̧, jënȩ Jerucharȩräpȩ jäpea̧ pio ju̧i̧ chjiari, jënȩ pio ju̧ri̧pȩ gitori̧ ja̧bo tänȩa̧ oa cjiapea̧ pio ju̧i̧ chjiari. Tjamo̧ davä, jënȩ pio ju̧ri̧pȩ ana̧ri̧ conȩda̧ oa cjiapea̧ pio ju̧i̧ chjiari, jënȩ ja̧bo tänȩa̧ oa cjiapea̧ pio ju̧i̧ chjiari, ado tjarari̧ do chjätä ëte jënȩ bëdüpea̧ pio ju̧i̧ chjiari ni̧bä chjaorëremȩdejȩrȩ. Ado pio jȩaiäpȩmo̧ ja̧di dari̧ japapaji̧ri̧ pio ji̧ri̧ chjiaribo ni̧bä chjaoa̧dejȩrȩ tjamo̧ yo̧ji̧ri̧ judio pio ji̧ri̧ chjiari, ado tjamo̧ goë tuti ja̧bepaji̧ri̧ pio ji̧ri̧ chjiari, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ chjiari. Aja̧, ana̧ri̧ ni̧bä chjaorëremȩdejȩrȩ jibëa̧ jadü ji̧ri̧ jënȩ chjai̧dëri̧ chjätäpea̧ pio ju̧i̧ chjiari.

²² Jabo Pedro judi ta̧rë ja̧bodëmȩrȩ mitëa̧dejȩ Jechu ju̧i̧ jachidëräpȩ ëba jäpea̧ oa, pio ju̧i̧ ni̧bäpea̧ oa. Ado ya̧mi̧ ta̧rëri̧ yo̧mȩrȩ ja̧di ta̧rëri̧ yo̧rëremȩdejȩ: ⁠—⁠Jabo cjäri̧ marenȩ ca̧ Ano̧mȩ ⁠—⁠yo̧a̧dejȩ⁠—⁠. Cjäri̧ri̧ cjiamȩrȩ jidatädimȩ Ütë tjamo̧ judi, mȩnȩ ja̧di dari̧ ja̧bochea oa, pio mȩa chjadëri̧ chjätä tänȩpea̧ oa ⁠—⁠yo̧mȩrȩ yo̧rëremȩdeje Pedro judi.

²³ Jabo Jechu judi chjaodëri̧ mȩrȩmȩpë cjiadiäa̧mȩrȩ dëbë daea̧dejȩ Pedro ju̧i̧, ado cja̧rȩmo̧ ja̧ dachomi̧ da oa damȩrȩ. Ado ja̧di ta̧rëri̧ yo̧mȩrȩ yo̧a̧dejȩ: ⁠—⁠Jabo cjäri̧ marenȩ Ichiae, a̧dë baäcoe ⁠—⁠yo̧a̧dejȩ Pedro ju̧i̧⁠—⁠. Jabechji̧ Ichiae pio judiri ma̧na̧mȩ ma̧ȩra̧ ni̧bärenȩque Pedro. Danȩ, Ütë tjamo̧ judi ütara̧ pio ju̧i̧ japatämi̧ cjiarequede, jabo cjäri̧ marenȩque, ana̧ri̧ tja̧reparȩmi̧ dari̧ japarenȩque ⁠—⁠yo̧a̧dejȩ⁠—⁠. Jabechji̧ Ütë tjamo̧ pio judi tänȩa̧ oa yo̧dëa̧renȩque, jabo pumȩ ja̧ chji̧ri pio judiri cjitëmȩ jo̧rȩtarea̧ maeara̧ yo̧a̧renȩque. Ja̧di dari̧ yo̧rea̧mi̧dëde ⁠—⁠yo̧mȩrȩ yo̧rëremȩdejȩ Jechu judi Pedro ju̧i̧. 2

Ca̧ mu̧i̧tjoi̧ judiro̧ conȩda̧ oa cjiapadirȩ jabo chjadëri̧ ba ano̧a̧ oa cjiapadirȩ

²⁴ Ja̧dëa ji̧ Jechu judi yo̧rëremȩdejȩrȩ jibëa̧ jadü ji̧ri̧: ⁠—⁠Danȩrȩ, eami̧ pumȩ judi pio coa cho̧rë jana̧tämi̧ cjiarä judi, jabechji̧ jibëa̧ jo̧rȩtarea̧ maeara̧ jo̧rȩtarërea̧ ji̧, ca̧ jo̧rȩtarea̧ maeara̧ ano̧ mire jo̧rȩtapea̧ chiade. ⁠—⁠yo̧a̧dejȩrȩ⁠—⁠. Tjamo̧ davä. Eami̧ pumȩ judi pio coa cho̧rë jana̧tämi̧ cjiarä judi, jabechji̧ jȩa ja̧bopea̧ to pio ju̧i̧ doti̧mi̧ a̧rȩ aramȩmi̧ dari̧ cjo̧ro̧pea̧ chiade. Jabechji̧ pio coa ta̧rëdiäpea̧ chiadique uapai̧ daräbo, o judiro̧ pio jȩaiäpȩmo̧ ja̧bo tänȩpai̧ daräbo. Ado ja̧di dari̧ cjo̧ro̧ ëte, jabechji̧ ji̧dë ma cho̧rë jana̧mi̧ dari̧ cjo̧ro̧tädique pio coaiäpȩmo̧.

²⁵ Danȩrȩ, eami̧ pumȩ judi pio jȩa chjiari ji̧dë ma bücjüri̧ cjiamȩrȩ cjo̧ro̧rä judi, jibëa̧ i pio ju̧i̧mo̧i̧ jidarea̧ jo̧rȩtami̧ dari̧ cjo̧ro̧rä judi, jabechji̧ goae tarari̧ cjo̧ro̧rea̧ dadëpade. Ado badëri̧ cjiadiäpade ji̧dëri̧. Jabo ca̧ea̧ pio ju̧i̧ jo̧rȩtamȩrȩ cjo̧ro̧rä judi, chiriräpȩti̧ oa cjo̧ro̧ji̧ri̧ pio ji̧ri̧ ma̧ȩ chjadëi̧ oa a̧ra̧ano̧mȩrȩ cjo̧ro̧rä judi, jabechji̧ judi ja̧boa̧räbo goae tarari̧ cjo̧ro̧rea̧ dapade. Ado badëri̧ cjiadiädëpade, jabo chjadëri̧ ba ano̧a̧ oa cjiapade.

²⁶ Jabo eami̧ pumȩ judi dai chirirä ja̧ pio ju̧i̧ a̧dë chjäte ji̧ra̧ri̧ goamȩrȩ ja̧borä judi, dami̧ti̧ ba chia oa boa ëte ja̧borä judi, jabechji̧ a̧doa̧ oa cjiadëpade jibëa̧ tjo üdë. Tjamo̧ davä. Jënȩ dami̧ti̧ oa boa̧ pio ju̧i̧iä a̧doa̧ oa cjiadëpade. Ado judi, jënȩ goa̧ pio ju̧i̧ chjö̧na̧i̧ oa yürüräbo, jabechji̧ nö̧tadëtäremȩdejȩ jënȩ goae tarari̧ cjo̧ro̧rea̧ mitëpea̧ ji̧ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

²⁷ ⁠—⁠Danȩrȩ, Pumȩrȩ Ara̧ Tjamo̧ pio judirequede cüdë ⁠—⁠yo̧a̧dejȩrȩ⁠—⁠. Ado pio cüdë ma̧na̧rä, ca̧ Ama̧i̧ pio ju̧i̧ ja̧ tatarea̧ra̧ pio ju̧ri̧ra̧ ma̧na̧rä, a̧dëräpȩ cjiaji̧ri̧ mu̧i̧tjoi̧ pio ji̧ri̧ nö̧ta ma̧na̧rä, jabechji̧ pumȩ ji̧ri̧ ütëbodärä oa chjadëri̧ ba ano̧parequedejȩrȩ, jënȩro̧ ja̧bepea̧ ba oa.

²⁸ Ado tjamo̧i̧ cjiari̧ yo̧requededibe ca̧ pumȩ ⁠—⁠yo̧a̧dejȩrȩ⁠—⁠. Mȩnȩro̧ orë jabë ja̧bodëa̧rä, pio yi cjiaji̧ri̧ pio judiro̧ orë jabë ja̧bodëa̧rä jabechji̧ tjamo̧ yo̧mȩ pio ju̧i̧ irä daparenȩro̧coe, Pumȩrȩ Ara̧ Tjamo̧ pio ju̧i̧. Tjamo̧ davä. A̧dë chjäte tatari̧ cjiamȩ oa, tjamo̧ yo̧mȩpea̧mȩ oa irä daparenȩro̧coe orë ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.