Marcos 9 - Biblia Pume

Jechu judi na̧rȩrëremȩdejȩrȩ jibëa̧ jauëchja oa ya̧mi̧ uëräpȩ ju̧ri̧

¹ Ado Jechu judi, ji̧dë u̧i̧ yo̧mȩrȩ a̧de yo̧rëremȩdejȩrȩ: —Tjamo̧ri̧ yo̧requededibe. Danȩrȩ, pio yoaiäji̧ri̧ judiro̧ orë, jabechji̧ irä dapadiro̧jo̧ȩ Ütërë yo̧a̧ chja̧oerä cjo̧ro̧pea̧ pio ju̧i̧ jënȩro̧ ja̧bobea yaboi̧. Tjamo̧ davä. Ütërë yo̧a̧ chja̧oerä cjo̧ro̧pea̧ pio ju̧i̧ a̧dë chjäte jauëchja cjiari̧ ma̧na̧na̧ra̧pamȩ oa irä dapadiro̧jo̧ȩ —yo̧a̧dejȩrȩ.

² Ado 6 do chjätä ëte, Jechu judi ëba buarëremȩdejȩrȩ jibëa̧ jadü ji̧ri̧, tjarari̧ oa. Pedro pio ju̧i̧, Santiago pio ju̧i̧, Juan pio ju̧i̧ ëba bua̧dejȩrȩ ya̧mi̧ uë tjamo̧räpȩ yuro judiro̧ jibëa̧ma̧i̧ cjiapea̧ oa. Ado Jechu judi chjaodëri̧ tjaoëpai̧ da tjamo̧pe bagarëremȩde.

³ Ju̧i̧ ja̧ chjibo üdë a̧dë chjäte bërëbërëai̧pea̧de, ma̧i̧ dari̧ tata mape bagari̧. Eami̧ chjibo bërëbërëa̧ oa jaboni̧ra̧ joa oa cjiarä, ja̧di dari̧ bërëbërëape järi̧ joarea̧mi̧dëde. Jabechji̧ a̧dë chjäte bërëbërëai̧ tjamo̧pe järëremȩde.

⁴ Ado pio ju̧i̧ ja̧ yuroro chjaodëri̧ idëpea̧dirȩ yo̧a̧ri̧ pumȩ judiro̧. Aja̧, Eria pio judi, ado Moiche pio judiborë ëba cjiarëreji̧ri̧diro̧jo̧ȩ. Ado Jechu pio ju̧i̧ nö̧ta ni̧bä chjaoa̧diro̧jo̧ȩ.

⁵ Ado Pedro judi pio ju̧i̧ daea̧ oaiä, yo̧a̧dejȩ Jechu ju̧i̧: —Danȩ Ano̧mȩ, chjadë tjamo̧de a̧ro̧rȩ pio yi tara. Danȩ, tjarari̧ jo̧ bori̧ oa cji̧deno̧täreji̧ri̧rea̧rȩ. Pio na̧ea̧ ja̧ oa, Moiche ja̧ oa, ado Eria ja̧ oa peaja̧di.

⁶ Jabo Jechu ja̧ jadü judiro̧ uapa tjamo̧pe baga̧ pio oaiä, ja̧di ta̧rëri̧ yo̧rëremȩde Pedro judi, chjadëri̧ jo̧rȩtadëmȩrȩ.

⁷ Ado chjaodëri̧ a̧dë chjäte tatari̧ cjiamȩ go̧a̧ra̧ ë üdë birana̧ra̧rëremȩdejȩrȩ ji̧ri̧ ja̧ uëräpȩ. Ado go̧a̧ra̧ ë tjori pio judiri ni̧bämȩ oa ta̧rëa̧diro̧jo̧ȩ ja̧di ta̧rëri̧ ni̧bämȩ oa: "Pio yodëje ca̧ Jadiquȩ. Ea tjamo̧reconȩ. Ta̧rë ja̧bochji̧jo̧ȩ."

⁸ Ado pio ju̧i̧ ta̧rëa̧ oaiä, Jechu ja̧ jadü judiro̧ chjaodëri̧ uëräpȩmo̧ gatë daea̧dirȩ, jabo Jechu pio ju̧i̧mo̧i̧ daea̧diro̧jo̧ȩ.

⁹ Ado ja̧dëa ji̧ judiro̧ ya̧mi̧ uëri pio judiri bira̧ji̧ri̧ oa, Jechu judi yo̧a̧dejȩrȩ: —Danȩrȩ, jabechji̧ cjapiri̧ cjo̧ro̧tä earequededibe. Mȩnȩro̧ pea yabo daea̧ pio ju̧i̧ chjiari, jabechji̧ o ji̧ri̧iäpȩmo̧ ni̧bädëpea̧de. Jabo cüdë, Pumȩrȩ Ara̧ Tjamo̧ pio judi ja̧boa̧remȩrȩ bëdüa̧rä, dëdë, ni̧bä chjaopea̧de. Jabo cüdë jabë bëdüdëa̧rä, jabechji̧ ni̧bä chjaodëpea̧de —yo̧mȩrȩ yo̧rëremȩdejȩrȩ.

¹⁰ Ado pio ju̧i̧iä jabechji̧, cjapiri̧ cjiadiärëreji̧ri̧dirȩ. Jabo ana̧ri̧ jo̧rȩtaji̧ri̧pea̧dirȩ davä jënȩ bëdüpea̧ pio ju̧i̧ chjiari yo̧a̧ pio ju̧i̧iä. '¿Tjana̧ yo̧a̧cjivadi, ¿yö̧ta jo̧rȩtamȩrȩ yo̧a̧cjivadi' quëna̧ jo̧rȩtaji̧ri̧rȩ ni̧bä chjaoji̧ri̧pea̧dirȩ jibëa̧ dëbëti̧ra̧ chia.

¹¹ Ado ja̧dëa ji̧ yo̧ë ta̧rëa̧diro̧jo̧ȩ Jechu ju̧i̧: —Jabo danȩ, ¿Eria pio judi yabochjarë ma̧na̧pea̧ chiadiibe Chjätä Tänȩmȩ pio judi ma̧na̧bea yaboi̧? Ja̧di ta̧rëri̧ a̧ra̧ano̧dirȩ Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧. ¿Jabo tjana̧ ju̧i̧iä ja̧di dari̧ a̧ra̧ano̧dirȩ? —iëno̧ë ta̧rëa̧diro̧jo̧ȩ.

^12-13 Jabo Jechu judi chjadëri̧ daba̧ oaiä, 'Eria yo̧a̧ ji̧, Juan pio ju̧i̧ chjiari yo̧rea̧dida' quëna̧ daba̧ oaiä, 'go̧ȩ cjaeä chudamȩ pio ju̧i̧ chjiari yo̧rea̧dida' quëna̧ daba̧ oaiä, jabechji̧ ja̧di ta̧rëri̧ yo̧mȩrȩ dëbë yo̧a̧dejȩrȩ: —Tjana̧ japatädë, jabechji̧ tjamo̧ri̧ a̧ra̧ano̧dirȩ. Eria pio judi yabochjarë ma̧na̧pea̧ chiade chjö̧na̧i̧ oa chjadëri̧ jëdano̧pea̧ oa. Jabo danȩrȩ, peadë ma̧na̧de. Peadë chjö̧na̧i̧ oa jëdano̧a̧de. Ado pumȩ judiro̧ ma̧i̧ dari̧ conȩda̧diro̧jo̧ȩ. Tjamo̧ davä. Jënȩro̧ jo̧rȩta̧mi̧ ma̧i̧ dari̧ japea̧diro̧jo̧ȩ Ütë tjamo̧ ja̧ ma̧ȩ üdë go̧ȩpea̧ oa cjiarërea̧mi̧. Ado peaja̧di dari̧ japapadiro̧coe, Pumȩrȩ Ara̧ Tjamo̧ pio ju̧i̧. Tjamo̧ davä. Ma̧i̧ dari̧ conȩdapadiro̧coe. Badë dapadiro̧coe chjuari̧ jiadaji̧ri̧rȩ. Ütë tjamo̧ ja̧ ma̧ȩ üdë go̧ȩpea̧ oa cjiarërea̧mi̧ ma̧i̧ dari̧ japapadiro̧coe —yo̧a̧dejȩrȩ.

Yaröca chiamȩ üi̧ boi̧ chjaparȩrëremȩdejȩ Jechu judi

¹⁴ Ado Jechu judi pio jȩa nö̧ta järeji̧ri̧borë cuchupë bira̧rä, dadärärëji̧ri̧diro̧jȩrȩ jibëa̧ jadü ji̧ri̧, o ji̧ri̧. Moicherë go̧ȩparërea̧ ma̧ȩ pio ju̧i̧ a̧ra̧ano̧ji̧ri̧ pio ji̧ri̧ nö̧ta dëbë ni̧bätaji̧ri̧ oa daea̧diro̧jȩrȩ. Ado pumȩ no̧i̧dë tjamo̧rȩ tjo̧ro tänȩrëreji̧ri̧dirȩ nibätaji̧ri̧ oa.

¹⁵ Ado pumȩ bubarë Jechu pio ju̧i̧ daea̧rä ya yabë cjiaji̧ri̧rȩ daea̧diro̧jo̧ȩ. Ado chjaodëri̧ bagureno̧a̧dirȩ pio ju̧i̧iäpȩmo̧ chjadëri̧ jeapea̧ oa.

¹⁶ Ja̧dëa ji̧ Jechu judi iëno̧ë ta̧rëa̧dejȩrȩ jibëa̧ jadü ji̧ri̧: —Jabo yo̧chji̧coe. ¿Yö̧ta yo̧ji̧ri̧rȩ dëbë ni̧bätarenȩro̧jȩrȩ?

¹⁷ Ado cja̧rȩmo̧rȩ, jibëa̧ jadüdërë dëbë yo̧a̧dejȩ: —Danȩ A̧ra̧ano̧mȩ, ca̧ ja pio ju̧i̧ ëba jana̧requede mȩnȩ chjaparȩpea̧ oa. Yaröca chiade, ado pio ju̧i̧iä ni̧bärea̧ dadëde.

¹⁸ Ado pio jiro yaröca üdë ca̧ ja oa conȩdarä, ma̧i̧ dari̧ japadejȩ. Jabechji̧ babui̧ra̧ boadärä chjaodejȩ jibëa̧ icjara codërë aäpape bagari̧. Ado daburäpȩmo̧ cjatä chjao tänȩdejȩ pjuru üdë jibëa̧ yari pio judiri go̧dürea̧mi̧ dari̧. Ado jibëa̧ jo̧dë oa ma̧i̧ dari̧ idë idë jui tänȩdejȩ. Ado danȩ, yaröca pio ju̧i̧ baä tänȩtä yo̧tea̧requedejȩrȩ na̧ jadü ji̧ri̧, jabo cjäri̧ madiro̧jo̧ȩ, baä tänȩrea̧ dadëa̧dirȩ —yo̧a̧dejȩ.

¹⁹ Ado Jechu ja̧di ta̧rëri̧ ta̧rëa̧ oaiä, yo̧a̧dejȩrȩ pumȩ ütëbo oa: —Jabo cjäri̧ manȩrȩ, ji̧dë ma darequedediibe tjamo̧ri̧ quëna̧dëji̧ri̧ oa. Pio yaba̧mȩ yoaiä cjo̧ro̧ji̧ri̧ pio mȩnȩro̧ chjadëri̧ jo̧rȩtarea̧ chiadëji̧ri̧ti̧nȩrȩ —yo̧a̧dejȩrȩ—. Danȩrȩ, ¿napai̧rä yuro jidatapea̧ chiarequededibe mȩnȩro̧ quëna̧pea̧ ji̧? ¿Napai̧ japamitë ëba cjiapea̧ chiarequededibe mȩnȩro̧ chjadëri̧ quëna̧pea̧ oa —yo̧mȩrȩ yo̧a̧dejȩrȩ ütëbo oa—. Jabo danȩrȩ, ëba jana̧chji̧coe üi̧ bo pio ju̧i̧.

²⁰ Ado ëba jäa̧diro̧jo̧ȩ Jechu pio ju̧i̧iäpȩ. Ado yaröca üdë Jechu pio ju̧i̧ daea̧ ji̧, chjaodëri̧ bübürüpe tai̧ cjia tänȩrëremȩdejȩ üi̧ bo oa. Ado daburäpȩ a̧rȩdärämȩrȩ cjarari̧ cjia bübürepe tai̧ cjiarëremȩde ya pjuru to da̧ cjiari̧.

²¹ Ado Jechu judi iëno̧ë ta̧rëa̧dejȩ jäja oa: —¿Na̧paräri ja̧ tarade? Ado jäja judi dëbë yo̧a̧dejȩ: —Naparäri ja̧dë, jabechji̧ judi boi̧chji̧ri ja̧ tarade.

²² Ji̧dë ma ma̧i̧ dari̧ japadejȩ yaröca üdë. Ca̧ ja pio ju̧i̧ tjamo̧ri̧ ja̧bo tänȩtämi̧ cjiamȩrȩ co ji̧ra̧ri̧ cjatä tänȩa̧dejȩ cjo̧dëräpȩ. Ado ui cjücjürüräpȩ peaja̧di co ji̧ra̧ri̧ aeno̧a̧dejȩ. Ja̧di tara yo̧requedemȩ. Jabechji̧ cjäri̧ri̧ cjia daibe. Mȩnȩ a̧dopea̧ ji̧ nö̧tarä judi, chjadëri̧ a̧doibe —yo̧mȩrȩ cjo̧dëtarëremȩdejȩ.

²³ Jabo Jechu judi dëbë yo̧mȩrȩ yo̧ë ta̧rëa̧dejȩ: —¿Tjana̧ ju̧i̧iä ja̧di ta̧rëri̧ yo̧a̧renȩque? 'Jechu judi tjamo̧ri̧ a̧dopea̧ ji̧ nö̧tadë jirodida' ¿quëna̧dënȩ? Danȩ, Ütë tjamo̧ pio ju̧i̧iäpȩmo̧ chjuari̧ quëna̧mȩ judi, 'Aja̧, nö̧tadida, eami̧ oa japapea̧ ji̧ nö̧ta tjamo̧dida, tjamo̧ tuti japamȩ pio judidida, japarea̧ decjiadida quëna̧rea̧mi̧dëdida' quëna̧ jo̧rȩtapea̧de —yo̧a̧dejȩ.

²⁴ Ado ju̧i̧ ta̧rëa̧ oaiä jäja judi to̧bari̧ yo̧a̧de: —Aja̧, quëna̧mȩrequede cüdë, jabo a̧docoe cüdë ji̧dë u̧i̧ quëna̧pea̧ ji̧.

²⁵ Ado Jechu judi pumȩ buba oa pio jȩaiäpȩmo̧ jo̧ȩra̧pe jana̧ji̧ri̧ oa daea̧ oaiä chjaodëri̧ ya̧mi̧ ta̧rëri̧ yo̧a̧dejȩ yaröca pio ju̧i̧: —Pio mȩa to̧bari̧ yo̧requedemȩ yaröca ju̧i̧, ta̧ra̧ coto tänȩmȩ pio ju̧i̧, ya coto tänȩmȩ pio ju̧i̧. Jabechji̧ pio yoa üi̧ bo oa a̧dë baäjo̧ȩ bucho ana̧. Ado chjereno̧ ira̧diä cjaeädëjo̧ȩ —yo̧a̧dejȩ.

²⁶ Ado yaröca üdë ma̧i̧ dari̧ ëna̧ quirati̧ cjiamȩpea̧de. Ado üi̧ bo pio ju̧i̧ ma̧i̧ dari̧ bübürepe tai̧ cjia tänȩ ëte, a̧dë baärëremȩdejȩ. Ado a̧dë baäa̧ ji̧, ja̧boa̧mȩmi̧ dari̧ a̧rȩrëremȩde boi̧chji̧ pio judi. Ado dae cjiaji̧ri̧ judiro̧ orë: "Ja̧boa̧de" yo̧a̧dirȩ.

²⁷ Jabo Jechu judi ju̧i̧ ja̧ ichi oa mu̧i̧mȩrȩ a̧doa̧dejȩ cjitëpea̧ ji̧. Ado cjiamȩpea̧de.

²⁸ Ado ja̧di dari̧ japa ëte, Jechu judi jibëa̧ jadüborë pumȩ ja̧ bëräpȩ yu̧a̧dirȩ. Ado jibëa̧ma̧i̧pea̧rä, Jechu ja̧ jadü judiro̧ iëno̧ë ta̧rëa̧diro̧jo̧ȩ: —¿Jabo tjana̧ ju̧i̧iä baä tänȩrea̧ dadëa̧rea̧ro̧jo̧ȩ pio jiro yaröca oa?

²⁹ Ado Jechu judi dëbë yo̧mȩrȩ yo̧a̧dejȩrȩ: —Tjana̧ ju̧i̧iädë, jabechji̧ Ütë tjamo̧ pio ju̧i̧iä goë cjo̧dëa̧ oaiämo̧i̧ baä tänȩrea̧mi̧ dade —yo̧mȩrȩ dëbë yo̧rëremȩdejȩrȩ.

Jechu judi, jënȩ ja̧bopea̧ pio ju̧i̧ chjiari ado ni̧bä chjaorëremȩdejȩrȩ

³⁰ Ado Jechu judi jibëa̧ jadüborë pio jiro bë ma̧ri̧ri pio judiri go̧düji̧ri̧rȩ dae chjätärëreji̧ri̧diro̧jo̧ȩ Garirea quȩmȩ chiri oëräpȩ yuro. Ado Jechu judi ütëborë pio jȩa chjiari tjamo̧ri̧ dabatä eadëa̧ oaiä, 'Aja̧, Jechu pio ju̧ri̧pȩdida' quëna̧ dabatä eadëa̧ oaiä, jabo jibëa̧ jadü pio ji̧ri̧mo̧i̧ a̧ra̧ano̧tämi̧ cjia̧ oaiä, jabechji̧ pumȩ decjiaräpȩ järëreji̧ri̧dirȩ.

³¹ Ado jibëa̧ma̧i̧ji̧ri̧rȩ ja̧di ta̧rëri̧ yo̧mȩrȩ a̧ra̧ano̧rëremȩdejȩrȩ: —Danȩrȩ, Pumȩrȩ Ara̧ Tjamo̧requede cüdë. Ado pio coa eadëji̧ri̧ pio ji̧ri̧iäpȩmo̧ yürüpadiro̧coe. Ado pio judiro̧ ja̧bo tänȩpadiro̧coe. Jabo tjarari̧ do chjätä ëte, ado chjereno̧ bëdüparequede ja̧boa̧remȩrȩ —yo̧mȩrȩ yo̧a̧dejȩrȩ jibëa̧ jadü ji̧ri̧ pio jȩa chjiari.

³² Jabo Jechu ja̧ jadü judiro̧ tjamo̧ri̧ bapë ta̧rëdëa̧diro̧jo̧ȩ. Ado judiro̧ iëno̧ë ta̧rëtärea̧ ji̧, iëno̧ë ta̧rëdëa̧diro̧jo̧ȩ uapa tara.

¿Chjiade o ji̧ri̧ u̧i̧ ba chiamȩ judi?

³³ Ado Jechu judi jibëa̧ jadü pio ji̧ri̧ nö̧ta Capenau quȩmȩ bë ma̧ri̧räpȩ go̧düdäräa̧ ji̧, jo̧ tjoräpȩ yu̧a̧rëreji̧ri̧dirȩ. Ado ja̧dëa ji̧ Jechu judi iëno̧ë ta̧rëa̧dejȩrȩ jibëa̧ jadü ji̧ri̧: —Danȩrȩ, a̧ro̧rȩ pio yabo jana̧ ji̧ ¿tjana̧ ni̧bä chjaoreji̧ri̧nȩrȩ no̧ro? —iëno̧ë ta̧rëa̧dejȩrȩ.

³⁴ Jabo judiro̧ chjadëri̧ dëbë yo̧tärea̧ ju̧i̧, cjapi maearë cjiadiäa̧dirȩ idëri̧ cjiaji̧ri̧pea̧ji̧ri̧rȩ. Jabechji̧ judiro̧ no̧ro jibëa̧ dëbëti̧ra̧ chia ni̧bätarërea̧ oaiä, 'Aja̧, pio cüdë ji̧dë u̧i̧ ba chiamȩ tjamo̧quëda, pio dibë ji̧dë u̧i̧ ba chiamȩquëda' quëna̧ jo̧rȩtaji̧ri̧rȩ ni̧bä chjaoa̧ oaiä, jabechji̧ idëri̧ cjiaji̧ri̧pea̧dirȩ Jechu pio ju̧i̧iä.

³⁵ Ado Jechu judi chadärä ëte, yo̧a̧dejȩrȩ jibëa̧ jadü oa, 12 oa. Pio jȩaiäpȩ jana̧tä yo̧a̧dejȩrȩ. Ado ja̧dëa ji̧ yo̧a̧dejȩrȩ: —Danȩrȩ, eami̧ pumȩ judi o ji̧ri̧ u̧i̧ ba chiatämi̧ cjiarä judi, 'jabechji̧ ütëborë pio coa u̧i̧ ba chia maeadiro̧da, pio ji̧ri̧ ja̧ mu̧i̧tjoi̧mi̧ dari̧ cjiaquëda' quëna̧ jo̧rȩtariä cjo̧ro̧täremȩde —yo̧a̧dejȩrȩ.

³⁶ Ado ja̧dëa ji̧ Jechu judi mitëa̧dejȩ boi̧chji̧ oa. Ado jibëa̧ jadü ja̧ dëbëräpȩ ju̧ri̧ cjia tänȩa̧dejȩ. Ado boi̧chji̧ pio ju̧i̧ idamȩrȩ yo̧a̧dejȩrȩ:

³⁷ —Danȩrȩ, eami̧ pumȩ judi pio yoa boi̧chji̧ oa cjäri̧ri̧ cjiamȩrȩ jearä judi, eami̧ pumȩ judi cjäri̧ri̧ cjiamȩrȩ jearä judi, jabechji̧ pio coabo cjäri̧ri̧ cjiamȩrȩ jeadique. Ado pio coa cjäri̧ri̧ cjiamȩrȩ jeamȩ judi, pio coamo̧ cjäri̧ri̧ cjiamȩrȩ jeadëdejȩ, jabo jabechji̧ coa chjadüa̧mȩ pio ju̧i̧bo cjäri̧ri̧ cjiamȩrȩ jeadejȩ —yo̧mȩrȩ yo̧rëremȩdejȩrȩ jibëa̧ jadü ji̧ri̧.

Pio coa dëbëpe chjaodëmȩ pio judi chjadëri̧ a̧dodique yo̧rëremȩde Jechu judi

³⁸ Ja̧dëa ji̧ Juan judi yo̧a̧dejȩ Jechu ju̧i̧iäpȩmo̧: —Danȩ A̧ra̧ano̧mȩ, a̧ro̧rȩ cja̧rȩmo̧ pumȩ oa daea̧rea̧ro̧jo̧ȩ ira̧diä cjaeämȩ pio ju̧i̧ baä tänȩmȩ oa. Aja̧ na̧ quȩrä japamȩ oa daea̧rea̧ro̧jo̧ȩ. Jabo tja̧reparea̧rea̧ro̧jo̧ȩ pio ibë no̧tadëmȩ tara, na̧ jadüdë tara.

³⁹ Jabo Jechu judi dëbë yo̧a̧dejȩ Juan ju̧i̧, o ji̧ri̧bo: —Jabo cjäri̧ manȩrȩ, tja̧reparȩdëa̧täreji̧ri̧renȩro̧jo̧ȩ. Chja jabechji̧ japatäde. Ca̧ quȩrä jauëchja cjiari̧ japamȩ judi chjaodëri̧ ma̧ȩ goaedëti̧ oa ni̧bädëpade pio coa chjiari.

⁴⁰ Danȩrȩ, pio ibë dëbëpe chjaodëmȩ pio judi a̧dodiibe.

⁴¹ Ado pio yoa ma̧ȩbo a̧dë yo̧requededibe, tjamo̧i̧ cjiari̧ baämȩ ma̧ȩ oa. Eami̧ pumȩ judi pio dibëiäpȩmo̧ eami̧ oa yürürä judi, mȩnȩro̧ Quiricho pio judiri ja̧pea̧ tara yürürä judi, jabechji̧ ba ano̧a̧ oa cjiapade. Tjamo̧ davä. Ui maea oa yürüa̧räbo chjadëri̧ ba ano̧a̧ oa cjiapade —yo̧a̧dejȩrȩ.

⁴² Ado Jechu judi cjiadiädëmȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü ji̧ri̧: —Danȩrȩ, eami̧ pumȩ judi ado cja̧rȩmo̧ oa chjai̧dëri̧ japa tänȩrä judi, pio coaiäpȩmo̧ quëna̧mȩ pio ju̧i̧ chjai̧dëri̧ japa tänȩrä judi, cjäri̧ made, Ütë tjamo̧ pio judi tänȩa̧ oa uapai̧ da tjamo̧ri̧ bape chjaoa̧ oa cjiapade. Ado pio ju̧i̧iä yo̧requededibe. Ji̧dë u̧i̧ chjadëtäremȩde pio jiro pumȩ judi ui ana̧räpȩ aeno̧a̧ oa cjiarä judi ado cja̧rȩmo̧ oa chjai̧dëri̧ japa tänȩpea̧ pio ju̧i̧iä, ba chiadëmȩmi̧ da pio ju̧i̧ chjai̧dëri̧ japa tänȩpea̧ pio ju̧i̧iä. Tjamo̧ davä. Judi ta̧dë chacha tjamo̧ra̧ pio ju̧ri̧ra̧ jibëa̧ gürü juro chjuari̧ yura̧ ëte dae tjaräpȩmo̧ aeno̧a̧ oa cjiarä judi, chjaodëri̧ jemu̧i̧ ja̧bopea̧ oa aenoa̧ oa cjiarä judi, jabechji̧ ji̧dë u̧i̧ chjadëtäremȩde judi ado cja̧rȩmo̧ oa oëra̧diä tänȩpea̧ pio ju̧i̧iä. Jabechji̧ Ütë tjamo̧ judi pio jiro pumȩ pio ju̧i̧ ji̧dë u̧i̧ ana̧ri̧ bape chjaochea oa, jabechji̧ ji̧dë u̧i̧ chjadëtäremȩde —yo̧mȩrȩ ni̧bä chjaorëremȩdejȩrȩ Jechu judi.

Quëna̧dëji̧ri̧ pio judiro̧ järitäreji̧ri̧dirȩ quëna̧pea̧ ji̧

^43-44 Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jibëa̧ jadü ji̧ri̧ chjai̧dë pio ju̧i̧ aeno̧mi̧ dari̧ japapea̧ oa, jibëa̧ icjarari ja̧ pio ju̧i̧ chjiari: —Danȩrȩ, dibëa̧ ichira̧ pio ju̧ri̧ra̧ ji̧dë ma chjai̧dëri̧ japarä judi, jabechji̧ tuti budochji̧jo̧ȩ. Mȩnȩro̧ cjo̧dë tja ana̧räpȩ ichi chiaji̧ri̧rȩ aeno̧a̧ oa cjiatärea̧ ji̧, cjo̧dë oa chjö̧röparea̧mi̧dëräpȩ aeno̧a̧ oa cjiatärea̧ ji̧, jabechji̧ ji̧dë u̧i̧ chjadëtäremȩde a̧dëräpȩ ju̧ri̧ go̧düdäräpea̧ ji̧ ichi cotoji̧ri̧borë.

^45-46 Ado dibëa̧ tara̧ pio ju̧ri̧ra̧ ji̧dë ma chjai̧dëri̧ japarä judi, dibëa̧ ta pio oaiä Ütë tjamo̧ pio ju̧i̧iäpȩmo̧ quëna̧rea̧ dadërä judi, jabechji̧ tuti budochji̧jo̧ȩ dibëa̧ ta oa. Mȩnȩro̧ cjo̧dë tja ana̧räpȩ ta chiaji̧ri̧rȩ aeno̧a̧ oa cjiatärea̧ ji̧, jabechji̧ ji̧dë u̧i̧ chjadëtäremȩde a̧dëräpȩ ju̧ri̧ go̧düdäräpea̧ ji̧ ta cotoji̧ri̧borë.

⁴⁷ Ado dibëa̧ dachora̧ pio ju̧ri̧ra̧ ji̧dë ma chjai̧dëri̧ japarä judi, dibëa̧ dacho pio oaiä Ütë tjamo̧ pio ju̧i̧iäpȩmo̧ quëna̧rea̧ dadërä judi, jabechji̧ pupi guachji̧jo̧ȩ dibëa̧ dacho oa. Mȩnȩro̧ cjo̧dë tja ana̧räpȩ dacho chiaji̧ri̧rȩ aeno̧a̧ oa cjiatärea̧ ji̧, jabechji̧ ji̧dë u̧i̧ chjadëtäremȩde mȩnȩro̧ Ütërë yo̧a̧ chja̧oeräpȩ yu̧a̧däräpea̧ ji̧ da cotoji̧ri̧borë.

⁴⁸ Ado cjo̧dë tja ana̧ üdë, jabechji̧ chjö̧röparea̧ decjiari̧, pjö̧rö̧rȩ goari järea̧ decjiari̧ cjitëdiä cjitëdiä cjiade gärimȩ üdë cjatäcjie jo̧rȩtarea̧ decjiari̧ —yo̧mȩrȩ ni̧bä chjaoa̧dejȩrȩ.

⁴⁹ Ado Jechu judi ji̧dë u̧i̧ yo̧mȩrȩ a̧de yo̧a̧dejȩrȩ: —Pumȩ judiro̧ ütëborë cjo̧dë pio ju̧i̧ chjätämi̧ dari̧ chjätäpea̧ chiadiro̧jo̧ȩ chjai̧dë pio ju̧i̧. Jabo chjai̧dë pio ju̧i̧ chjätäa̧ oaiä, jabechji̧ ji̧dë u̧i̧ goae tarari̧ cjo̧ro̧rea̧ dapadirȩ. Danȩrȩ, yagoemȩ pio ju̧i̧iä ji̧dë u̧i̧ goaepe jäde jurarea̧ üdë. Ado peaja̧dimi̧ dari̧ japadiibe chjai̧dë oa chjätäpea̧ üdë. Jabechji̧ a̧ro̧rȩ pio ju̧i̧ chjätäa̧ oaiä, ji̧dë u̧i̧ goae tarari̧ cjo̧ro̧rea̧ dadirȩ chjadëri̧ jëdano̧a̧ oa cjiaji̧ri̧rȩ —yo̧mȩrȩ ni̧bä chjaoa̧dejȩrȩ.

⁵⁰ Ado yagoemȩ pio ju̧i̧ chjiari a̧de ni̧bä chjaomȩrȩ ja̧di ta̧rëri̧ yo̧rëremȩdejȩrȩ: —Danȩrȩ, yagoemȩ üdë chjadëde. Goaede. Jabo goaedëpe baga̧rä judi, jabechji̧ ado chjereno̧ chjadëparea̧mi̧dëde. Ado danȩrȩ, pio mȩnȩro̧ yagoemȩ goaera̧ pio ju̧ri̧ra̧ mirea̧ oa cjiami̧ dari̧ ëba cjo̧ro̧täreji̧ri̧nȩrȩ dibëa̧ pumȩ pio ji̧ri̧, goaeri̧ ëba cjo̧ro̧ji̧ri̧rȩ, ma̧ chjupi̧ cjiari̧ jo̧rȩtaji̧ri̧rȩ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.