Marcos 8 - Biblia Pume

Jechu judi ëba jurarëremȩdejȩrȩ 4 mil pumȩ ji̧ri̧

¹ Japamitë ana̧dë chjätä ëte, pumȩ no̧i̧dërë a̧dopea̧ oa cjiarëreji̧ri̧dirȩ. Ado jibëa̧ jurarea̧ oa juratärea̧ ji̧, goadëa̧dirȩ. Ja̧dëa ji̧ Jechu judi yabëa̧dejȩrȩ jibëa̧ jadü ji̧ri̧ pio jȩaiäpȩ jana̧tä. Ado jana̧ji̧ri̧ oa yo̧a̧dejȩrȩ:

² —Danȩrȩ, pio jiro pumȩ ji̧ri̧ cjäri̧ri̧ cjia darequedejȩrȩ. Tjarari̧ do goadirȩ pio coadi, jabo jurarea̧ dadëa̧dirȩ.

³ Cüdë ji̧ri̧ baä tänȩrä judi, jurarea̧ yürüdë ëte baä tänȩrä judi, cjäri̧ madirȩ, järea̧ no̧ro ju̧ri̧ dabadëtä bagapai̧ dadirȩ ta̧mȩcho̧ ja̧boa̧ pio ju̧i̧iä. Jabechji̧ o judiro̧ jachi tjamo̧räpȩ cjo̧ro̧dirȩ —yo̧a̧dejȩrȩ.

⁴ Ja̧dëa ji̧ jibëa̧ jadü judiro̧ dëbë yo̧a̧diro̧jo̧ȩ: —Danȩ, chiri maearäpȩrea̧rȩ. Jurarea̧ decjiaräpȩrea̧rȩ. Ado pio jiro pumȩ ji̧ra̧ tjamo̧ oa ëba jurapea̧ ji̧ ¿tjana̧räpȩ datäreji̧ri̧rea̧rȩ jurarea̧ oa? Cjäri̧ made, japarea̧ decjiade —yo̧a̧diro̧jo̧ȩ.

⁵ Jabo Jechu judi iëno̧ë ta̧rëa̧dejȩrȩ: —¿Na̧pai̧ chja̧pe oa goanȩrȩ mȩnȩro̧? Ado dëbë yo̧a̧diro̧jo̧ȩ: —Napai̧dë, 7 chja̧pe maea oa goarea̧rȩ.

⁶ Ja̧dëa ji̧ Jechu judi daburo cha tänȩrëremȩdejȩrȩ pumȩ ji̧ri̧. Ado chja̧pe oa mitëmȩrȩ ni̧bäa̧dejȩ jibëa̧ Ama̧i̧ ju̧i̧. "Ama̧i̧, chjadëri̧ yürüa̧renȩibe" yo̧mȩrȩ ni̧bäa̧dejȩ. Ado ni̧bä ëte chja̧pe oa mu̧i̧ quirë yareno̧a̧dejȩ. Ado yarë ëte yürüa̧dejȩrȩ jibëa̧ jadü ji̧ri̧ pumȩ pio ji̧ri̧iäpȩmo̧ chjarepë yürüpea̧ oa.

⁷ Ado Jechu ja̧ jadü judiro̧ peaja̧di goarëreji̧ri̧dirȩ cho̧ ji̧ra̧dë oa. Ado Jechu judi ado ni̧bäa̧dejȩ jibëa̧ Ama̧i̧ ju̧i̧. "Chjadëri̧ yürüa̧renȩibe Ama̧i̧" yo̧mȩrȩ ni̧bäa̧dejȩ. Ja̧dëa ji̧ yo̧a̧dejȩrȩ jibëa̧ jadü ji̧ri̧ cho̧ oa peaja̧di chjarepë yürütä pumȩ pio ji̧ri̧iäpȩmo̧.

⁸ Ado pumȩ judiro̧ ütëborë mairi̧ jura̧dirȩ. Ado judiro̧ jura̧ duri oa, Jechu ja̧ jadü judiro̧ boa̧diro̧jo̧ȩ cjiadiäa̧mȩ jurarea̧ pënȩi̧ oa. Taio ji̧ra̧ oa boa̧dirȩ, 7 taio tjuri cjia oa.

⁹ Mairi̧ jurarëreji̧ri̧ judiro̧ ji̧ra̧ tjamo̧rëreji̧ri̧dirȩ. Jabechji̧ 4 mil pumȩrëreji̧ri̧dirȩ. Ado judiro̧ jura̧ duri oa, Jechu judi baä tänȩa̧dejȩrȩ.

¹⁰ Ado ja̧dëa ji̧ Jechu judi chjaodëri̧ bua̧de uimo̧mȩ chararä. Jibëa̧ jadü pio ji̧ri̧ nö̧ta bua̧de. Ado järëreji̧ri̧dirȩ Damanuta quȩmȩ chiriräpȩ.

Jibëa̧ jauëchja oa chjadëri̧ na̧rȩtä yo̧tarëreji̧ri̧diro̧jo̧ȩ pjaricheo judiro̧

¹¹ Ado pjaricheo judiro̧ orëmo̧rȩ go̧düdärärëreji̧ri̧dirȩ Jechu pio ju̧i̧iäpȩ. Ado chjaodëri̧ tarupea̧dirȩ pio ju̧i̧ nö̧ta dëbë ni̧bätapea̧ ji̧. Jibëa̧ jauëchja oa na̧rȩtä eaji̧ri̧rȩ yo̧tea̧diro̧jo̧ȩ, ja̧di ta̧rëri̧ yo̧ji̧ri̧rȩ: —Danȩ, mȩnȩ Ütë tjamo̧ pio judi chjadüa̧ oa tjamo̧ri̧ birë ma̧na̧rä judi, jabechji̧ na̧rȩibe —yo̧a̧diro̧jo̧ȩ—. 'Jabo cjäri̧ madida, a̧dëri pio judiri tjamo̧ri̧ biradëa̧dida, ado a̧dëri ma̧na̧mȩ na̧rȩrea̧ra̧ tjamo̧ri̧ na̧rȩrea̧mi̧dëdida, jabechji̧ Ütë tjamo̧ judi tjamo̧ri̧ chjadüa̧ oa ma̧na̧dëa̧dida' quëna̧ jo̧rȩtaji̧ri̧rȩ puëräpȩ choë cjatämi̧ dari̧ japa tänȩtarëreji̧ri̧diro̧jo̧ȩ.

¹² Jabo Jechu judi gitori̧ jo̧rȩtamȩrȩ acji jȩoë järëremȩde. Ado yo̧a̧dejȩrȩ: —Danȩrȩ, ¿tjana̧pea̧ oa ji̧dë ma jauëchja cjiari̧ na̧rȩtä eatarenȩro̧coe? ¿Tjana̧pea̧ ju̧i̧ na̧rȩrea̧ pio ju̧i̧mo̧i̧ jo̧rȩtaji̧ri̧rȩ datämi̧ cjianȩrȩ? Cjäri̧ marequededibe. Eami̧ na̧rȩrea̧ oa yürüdëparequededibe —yo̧mȩrȩ yo̧rëremȩdejȩrȩ.

¹³ Ado pumȩ ji̧ri̧ a̧dë baämȩrȩ, tja oëräpȩmo̧ baärëremȩde Jechu judi. Chara oa ado chjereno̧ buamȩrȩ charara̧ baärëremȩde jibëa̧ jadü pio ji̧ri̧ nö̧ta.

Oëra̧ a̧ra̧ano̧rea̧ pio ju̧i̧ chjiari a̧ra̧ano̧mȩrȩ ni̧bä chjaorëremȩdejȩrȩ pjuru chiaparȩrea̧mi̧ da pio ju̧i̧ chjiari

¹⁴ Ado Jechu ja̧ jadü judiro̧ chja̧pe oa goa ma̧na̧pea̧ ji̧ a̧dë jo̧rȩtapea̧ oaiä, jabechji̧ jiro decjiarëremȩde. Pio ju̧i̧mo̧i̧ goarëreji̧ri̧dirȩ chja̧pe oa cja̧rȩmȩ oa. Pio ju̧i̧mo̧i̧ jurarea̧ oa goarëreji̧ri̧dirȩ chararä.

¹⁵ Ado Jechu judi na̧rȩrea̧mi̧ da ma̧ȩra̧ pio ju̧ri̧ra̧ chi̧dëearëremȩdejȩrȩ oëra̧ a̧ra̧ano̧rea̧ ma̧ȩ pio ju̧i̧ chjiari. Ja̧di ta̧rëri̧ yo̧a̧dejȩrȩ: —Danȩrȩ, quëna̧chji̧vä. Na̧e chiachji̧vä —yo̧a̧dejȩrȩ. Pjaricheo pio ji̧ri̧ ja̧ pjuru chiaparȩrea̧mi̧ da pio ju̧i̧ chjiari na̧e chiachji̧vä. Erode quȩmȩ ütë pio ju̧i̧ ja̧ pjuru chiaparȩrea̧mi̧ da pio ju̧i̧ chjiaribo na̧ȩ chiachji̧vä —yo̧mȩrȩ yo̧a̧dejȩrȩ pjuru chiaparȩrea̧mi̧ da pio ju̧i̧, oëra̧ a̧ra̧ano̧rea̧ ma̧ȩ pio ju̧i̧.

¹⁶ Ado Jechu ja̧ jadü judiro̧ pio ju̧i̧ ta̧rëa̧ oaiä, '¿Tjana̧ yo̧cjivadi, ¿tjana̧pea̧ oa pjuru chiaparȩrea̧ pio ju̧i̧ chjiari yo̧cjivadi, chja̧pe pio ju̧i̧ chjiari yo̧ jirodida, a̧ro̧rȩ chja̧pe oa goa ma̧na̧dëa̧ oaiä yo̧ jirodibëda' quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia.

¹⁷ Jabo Jechu judi, cjacjarë damȩ pio judi, 'Aja̧, ja̧di dari̧ jo̧rȩtadiro̧da' quëna̧ dabamȩrȩ iëno̧ë ta̧rëa̧dejȩrȩ: —Jabo danȩrȩ, ¿tjana̧pea̧ oa ana̧ri̧ jo̧rȩtaji̧ri̧rȩ ni̧bä chjaonȩrȩ jurarea̧ oa goa ma̧na̧dëa̧ pio ju̧i̧ chjiari? ¿Mȩnȩro̧ pio coa chjiari jabë tjamo̧ri̧ dabadënȩrȩ? ¿Dibëa̧ chji̧rä urëdi oa pio coa chjiari jabë tjamo̧ri̧ jo̧rȩtadënȩrȩ?

¹⁸ Danȩrȩ, dacho chiaji̧ri̧borë da cotomi̧ dari̧ cjianȩrȩ. Ta̧ra̧ puë chiaji̧ri̧borë ta̧ra̧ cotomi̧ dari̧ cjianȩrȩ. Cüdë japea̧ pio ju̧i̧ ¿jo̧rȩtadënȩrȩ?

¹⁹ Cüdë chja̧pe oa, 5 oa chjarepë yürüa̧ ji̧, 5 mil oari pio ji̧ri̧ ëba jurapea̧ oa chjarepë yürüa̧ ji̧, ¿jo̧rȩtadënȩrȩ? Ado judiro̧ jura̧ duri oa ¿na̧pai̧ taio tjuri cjia oa boa̧nȩrȩ mȩnȩro̧ chja̧pe pënȩ pio ju̧i̧? Ado dëbë yo̧ji̧ri̧rȩ yo̧a̧diro̧jo̧ȩ: —Na̧pai̧dë, 12 taio tjuri cjia oa boa̧rea̧rȩ.

²⁰ Ado ja̧dëa ji̧ Jechu judi ado iëno̧ë ta̧rëa̧dejȩrȩ: —Ado cüdë ji̧dë duri oa 7 chja̧pe oa chjarepë yürürërea̧ ji̧, 4 mil pumȩ pio ji̧ri̧ ëba jurapea̧ oa chjarepë yürürërea̧ ji̧, ¿na̧pai̧ taio tjuri cjia oa boa̧nȩrȩ judiro̧ jura̧ duri oa? Ado dëbë yo̧ji̧ri̧rȩ yo̧a̧diro̧jo̧ȩ: —Na̧pai̧dë, jabechji̧ 7 taio tjuri cjia oa boa̧rea̧rȩ —yo̧a̧diro̧jo̧ȩ.

²¹ Ja̧dëa̧ ji̧ Jechu judi iëno̧ë ta̧rëa̧dejȩrȩ ado: —Ado pio ju̧i̧iä iëno̧ë ta̧rërequededibe. Danȩrȩ, mȩnȩro̧ cüdë pumȩ ji̧ra̧ oa jurarea̧ oa yürüa̧ oaiä, ¿jabechji̧ pio coa chjiari jabë tjamo̧ri̧ dabadënȩrȩ? Cüdë dibë ni̧bä chjaoa̧ pio ju̧i̧ chjiari ¿jabë bapë ta̧rëdënȩrȩ? —iëno̧ë ta̧rëa̧dejȩrȩ Jechu judi.

Jechu judi chjaparȩrëremȩdejȩ da cotomȩ pio ju̧i̧

²² Ado judiro̧ Bechaida quȩmȩ bë ma̧ri̧räpȩ go̧düdäräa̧ ji̧, pumȩ judiro̧ ëba järëreji̧ri̧diro̧jo̧ȩ da cotomȩ ju̧i̧ Jechu pio ju̧i̧iäpȩ. Ga̧re taratä cjo̧dëa̧diro̧jo̧ȩ judi chjapaparȩa̧ oa cjiapea̧ oa.

²³ Ado Jechu judi, da cotomȩ ja̧ ichi oa mitëmȩrȩ mu̧i̧ go̧dürëremȩdejȩ bë ma̧ri̧ri pio judiri. Ado jibëa̧ dacho oa pju̧i̧no̧ ëte, jibëa̧ ichi dëbëribora̧ ga̧re tara̧dejȩ jibëa̧ dacho oa. Ado ja̧dëa ji̧ iëno̧ë ta̧rëa̧dejȩ: —¿Eami̧ oa dadënȩ?

²⁴ Ado da cotomȩ judi jabëtari̧mi̧ damȩpe bagamȩrȩ dëbë yo̧a̧dejȩ: —Aja̧, pumȩ ji̧ri̧ darequedejȩrȩ, jabo tomi̧ da oa darequedejȩrȩ tai̧rea̧ chiami̧ da oa.

²⁵ Ado Jechu judi ado chjereno̧ ga̧re tara̧dejȩ jibëa̧ dacho oa. Ado üi̧ judi jibëa̧ dacho oa ana̧ri̧ areiamȩrȩ chjadëri̧ chjapea̧ oa cjiadiäa̧de. Chjö̧na̧i̧ oa chjadëri̧ damȩpea̧de chjadë maeari̧.

²⁶ Ja̧dëa ji̧ Jechu judi jibëa̧ bëräpȩ baä tänȩa̧dejȩ. Ado yo̧a̧dejȩ: —Jabo bë ma̧ri̧räpȩ cuchupariä jädëvä, jabo jabechji̧, tjamo̧i̧ baävä na̧ bëräpȩ —yo̧a̧dejȩ.

Pedro judi coëma cjiari̧ yo̧rëremȩde Jechu pio ju̧i̧ chjiari

²⁷ Jechu judi jibëa̧ jadüborë Bechaida quȩmȩ bë ma̧ri̧ri pio judiri go̧düji̧ri̧rȩ järëreji̧ri̧dirȩ bë ma̧ri̧ boi̧chji̧ ji̧ra̧räpȩ ju̧ri̧. Jabechji̧ tai̧rëreji̧ri̧dirȩ pio jiro chiriräpȩ, Checharea Pjiripo quȩmȩ bë ma̧ri̧ a̧rȩmȩ chiriräpȩ ju̧ri̧. Ado järea̧ no̧ro ju̧ri̧ Jechu judi iëno̧ë ta̧rëa̧dejȩrȩ jibëa̧ jadü ji̧ri̧: —Danȩrȩ, ¿yö̧ta yo̧dirȩ pumȩ judiro̧ pio coa chjiari? ¿Chjia tjamo̧rämi̧ cjiadiro̧coe? —iëno̧ë ta̧rëa̧dejȩrȩ.

²⁸ Ado judiro̧ dëbë yo̧ji̧ri̧rȩ yo̧a̧diro̧jo̧ȩ: —Chjiadë, jabechji̧ o judiro̧, 'Aja̧, Juan pio judidida, go̧e cjaeä chudarëremȩ pio judi jirodida, ja̧boa̧remȩrȩ bëdüa̧ jirodida' quëna̧ jo̧rȩtadiro̧mȩ. Ado o judiro̧, 'Aja̧, no̧mȩ tjamo̧ri ja̧ cjo̧ro̧rëremȩ pio judi jirodida, Eria quȩmȩrea̧ pio judipamȩ jirodida' quëna̧ jo̧rȩtadiro̧mȩ. Ado o judiro̧, 'Aja̧, Ütërë ea jana̧ chjadüa̧ oa ni̧bärëremȩ pio judipamȩ jirodida, bëdüa̧ jirodida' quëna̧ jo̧rȩtadiro̧mȩ. Aja̧, ja̧di dari̧ yo̧dirȩ pumȩ judiro̧ pio mȩa chjiari —dëbë yo̧a̧diro̧jo̧ȩ.

²⁹ Ja̧dëa ji̧ Jechu judi ado iëno̧ë ta̧rëa̧dejȩrȩ: —Ado pio mȩnȩro̧, ¿yö̧ta dari̧ jo̧rȩtanȩrȩ pio coa chjiari? ¿Chjia tjamo̧rämi̧ cjiarenȩro̧coe? —iëno̧ë ta̧rëa̧dejȩrȩ. Ado Pedro judi dëbë yo̧a̧dejȩ: —Chjia tjamo̧rämi̧ cjiadë, jabechji̧ Ütë tjamo̧ judi mitëa̧ Chjätä Tänȩmȩ pio judi tjamo̧renȩ —yo̧mȩrȩ dëbë yo̧a̧dejȩ.

³⁰ Ado Pedro judi ja̧di ta̧rëri̧ yo̧a̧ oaiä Jechu judi yo̧a̧dejȩrȩ: —Jabo pio coa chjiari ja̧di ta̧rëri̧ yo̧dë machji̧jȩrȩ o ji̧ri̧iäpȩmo̧ —yo̧a̧dejȩrȩ.

Jechu judi ni̧bä chjaorëremȩdejȩrȩ jënȩ ja̧bopea̧ pio ju̧i̧ chjiari

³¹ Ja̧dëa ji̧ pio judiri yurori Jechu judi taruparëremȩde jibëa̧ jadü ji̧ri̧ a̧ra̧ano̧pea̧ ji̧ jënȩ gitori̧ chjätäpea̧ pio ju̧i̧ chjari. Ja̧di ta̧rëri̧ yo̧mȩrȩ yo̧a̧dejȩrȩ: —Danȩrȩ, Pumȩrȩ Ara̧ Tjamo̧ pio judi dami̧ti̧ chjai̧dë oa chjätäpea̧ chiade —yo̧a̧dejȩrȩ—. Jabechji̧ judio tjamo̧ yo̧ji̧ri̧ pio judiro̧, ado o ji̧ri̧ chjiari tjamo̧ goë tuti ja̧bepaji̧ri̧ pio judiro̧, ado Moicherë go̧ȩparea̧ ma̧ȩ oa a̧ra̧ano̧ji̧ri̧ pio judiro̧ jiada mapadiro̧coe. Ado ja̧bo tänȩa̧ oa cjiaparequede ji̧dëri̧. Jabo danȩrȩ, tjarari̧ do chjätä ëte, ado chjereno̧ bëdüparequede —yo̧mȩrȩ ni̧bä chjaorëremȩdejȩrȩ pio jȩa chjiari, pumȩ judiro̧ pio jȩa ja̧bo tänȩpea̧ pio ju̧i̧ chjiari.

³² Jabo Jechu judi ja̧di ta̧rëri̧ ni̧bä chjaoa̧ ji̧, cuchu chiadëri̧ ni̧bä chjaoa̧ ji̧, Pedro pio judi mu̧i̧ jäa̧dejȩ pio judiro̧mo̧rȩ ni̧bä chjaopea̧ oa. Ado ja̧dëa ji̧ to̧bari̧ tuti yo̧mȩrȩ yo̧a̧dejȩ Jechu ju̧i̧iäpȩmo̧ judi ja̧di dari̧ jo̧rȩtamȩrȩ ni̧bä chjaochea oa.

³³ Jabo ja̧dëa ji̧ Jechu judi mȩmȩrȩpe cjiadiämȩrȩ dëbë daea̧dejȩrȩ jibëa̧ jadü pio ji̧ri̧. Ado jibëa̧ yuroro cjiamȩ oa to̧bari̧ dëbë yo̧a̧dejȩ Pedro ju̧i̧: —Cjapiri̧ cjiavä. Ta̧rë ja̧bodëparequedemȩ. Ichiae pio judimi̧ dari̧ ni̧bämȩrenȩ. Ütë tjamo̧ judi jo̧rȩta̧mi̧ ni̧bädëmȩrenȩ, jabo pumȩrȩ jo̧rȩta̧mi̧ ni̧bämȩrenȩ. Cjapiri̧ cjiavä —yo̧mȩrȩ yo̧a̧dejȩ Pedro ju̧i̧ to̧bari̧.

³⁴ Ja̧dëa ji̧ Jechu judi ma̧ȩ yu̧rürëremȩdejȩrȩ pumȩ buba oa pio jȩaiäpȩ jana̧tä, jibëa̧ jadü pio ji̧ri̧ nö̧ta ëba cjiatä. Ado ja̧dëa ji̧, ja̧di ta̧rëri̧ yo̧a̧dejȩrȩ: —Danȩrȩ, eami̧ pumȩ judi pio coa cho̧rë jana̧tämi̧ cjiarä judi, jabechji̧ jibëa̧ jo̧rȩtarea̧ maeara̧ jo̧rȩtarërea̧ ji̧, ca̧ jo̧rȩtarea̧ maeara̧ ano̧ mire jo̧rȩtapea̧ chiade. Tjamo̧ davä. Eami̧rȩ pio coa cho̧rë jana̧tämi̧ cjiarä judi, jabechji̧ pio jȩa ja̧bopea̧ to pio ju̧i̧ doti̧mi̧ arami̧ dari̧ cjo̧ro̧pea̧ chiade. Jabechji̧ pio coa ta̧rëdiäpea̧ chiadique uapai̧ daräbo, o judiro̧ pio jȩaiäpȩmo̧ ja̧bo tänȩpai̧ daräbo. Ado ja̧di dari̧ cjo̧ro̧ ëte, jabechji̧ ji̧dë ma cho̧rë jana̧mi̧ dari̧ cjo̧ro̧tädique.

³⁵ Danȩrȩ, eami̧ pumȩ judi pio jȩa chjiari ji̧dë ma bücjüri̧ cjiamȩrȩ cjo̧ro̧rä judi, jibëa̧ i pio ju̧i̧mo̧i̧ jidarea̧ jo̧rȩtami̧ dari̧ cjo̧ro̧rä judi, jabechji̧ goae tarari̧ cjo̧ro̧rea̧ dadëpade. Badëri̧ cjiadiäpade. Jabo ca̧ea̧ pio ju̧i̧ jo̧rȩtamȩrȩ cjo̧ro̧rä judi, ma̧ȩ chjadëi̧ üdë chiriräpȩti̧ oa a̧ra̧ano̧a̧ oa cjiapea̧ oa cjo̧ro̧rä judi, jabechji̧ judi ja̧boa̧räbo goae tarari̧ cjo̧ro̧rea̧ dapade. Badëri̧ cjiadiädëpade jabo chjadëri̧ ba ano̧a̧ oa cjiapade.

³⁶ Jabo danȩrȩ, eami̧ pumȩ judi dai chirirä ja̧ pio ju̧i̧ a̧dë chjäte ji̧ra̧ri̧ goarä judi, jabechji̧ jibëa̧ tjo üdë ado̧a̧ oa cjiadëpade, jabo dabadëpea̧ oa cjiami̧ dari̧ cjiadiäpade.

³⁷ Ado jënȩ goa̧ pio ju̧i̧ chjö̧na̧i̧ oa yürürä judi, jabechji̧ nö̧tadëtäremȩdejȩ jënȩ bucho ana̧ cjo̧ro̧rea̧ mitëpea̧ ji̧.

³⁸ Ado danȩrȩ, eami̧ pumȩ judi pio coa chjiari idëri̧ cjiarä judi, ca̧ ma̧ȩ pio ju̧i̧ chjiari idëri̧ cjiarä judi, chjai̧dë oa jape chjaoji̧ri̧ pio ji̧ri̧iä idëri̧ cjiarä judi, Ütë tjamo̧ pio ju̧i̧ jiadaji̧ri̧ pio ji̧ri̧iä idëri̧ cjiarä judi, peaja̧di ba dëbë idëri̧ cjiaparequede pio ju̧i̧ chjiari cüdë ma̧na̧rä. Danȩrȩ, Pumȩrȩ Ara̧ Tjamo̧ pio judirequede cüdë. Ado cüdë ma̧na̧rä, cüdë ca̧ chjacjiamȩrea̧ jauëchja oa ana̧ri̧ na̧rȩmȩrȩ ma̧na̧rä, cüdë ca̧ Ama̧i̧ pio ju̧i̧ ja̧ tatarea̧ra̧ ma̧na̧rä, jabechji̧ pio cüdëborë idëri̧ cjiaparequede pio ju̧i̧ chjiari, cüdë a̧dëriji̧ri̧ mu̧i̧tjoi̧ ja̧ tatarea̧rä ma̧na̧rä —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧.