Marcos 7 - Biblia Pume

Moicherë go̧ȩparërea̧ pio ju̧i̧ uëri a̧de a̧ra̧ano̧rëreji̧ri̧dirȩ o judiro̧

¹ Ado cja̧rȩmo̧ doremȩrä, pjaricheo judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë Jerucharȩ quȩmȩ bë ma̧ri̧ri pio judiriji̧ri̧ judiro̧ go̧düdärärëreji̧ri̧dirȩ Jechu pio ju̧i̧ dapea̧ oa.

² Ado ja̧dëa ji̧ judiro̧ Jechu ja̧ jadü pio ji̧ri̧ daea̧ ji̧, ichi joadë ëte juraji̧ri̧ oa daea̧ ji̧, igȩrȩ chiaji̧ri̧mi̧ dari̧ juraji̧ri̧ oa daea̧ ji̧, jabechji̧ ana̧ri̧ jo̧rȩtaji̧ri̧pea̧dirȩ.

³ Jabechji̧ pjaricheo judiro̧, ado judio ütëborë ichi oa ütara̧mi̧ joa̧rämo̧ jurarëreji̧ri̧dirȩ. Ichi joadë ëte juradë marëreji̧ri̧dirȩ. Jibëa̧ ütëti̧rȩ a̧ra̧ano̧rërea̧ ma̧ȩ pio oaiä, jabechji̧ ja̧di dari̧ japariä cjo̧ro̧rëreji̧ri̧dirȩ no̧mȩ tjamo̧ri ja̧.

⁴ Ja̧di tara judiro̧ eami̧ jurarea̧ oa gatë tänȩrea̧ bëräpȩ gatë ëte, jibëa̧ bëräpȩ goa baä ëte, jabechji̧ ütara̧mi̧ joa marëreji̧ri̧diro̧jo̧ȩ. Jibëa̧ jurarea̧ oa ütara̧mi̧ joadë ëte juradë marëreji̧ri̧diro̧jo̧ȩ. Aja̧, ma̧ȩ ji̧ra̧ tjamo̧ro cjo̧ro̧rëreji̧ri̧dirȩ pjaricheo judiro̧. Ado danȩrȩ, ae jararea̧ oa, jëdërea̧ oa, canari oa peaja̧di ütara̧mi̧ joarëreji̧ri̧diro̧jo̧ȩ. Aja̧, ütëti̧rea̧rȩ a̧ra̧ano̧rërea̧mi̧ ja̧di maeari̧ joariä cjo̧ro̧rëreji̧ri̧diro̧jo̧ȩ.

⁵ Pio ju̧i̧iä pjaricheo judiro̧, Moicherë go̧ȩparërea̧ ma̧ȩ oa a̧ra̧ano̧ji̧ri̧borë iëno̧ë ta̧rëa̧diro̧jo̧ȩ Jechu ju̧i̧: —Danȩ, na̧ jadü judiro̧ jurabea yaboi̧, jibëa̧ ichi oa ütara̧mi̧ joadë madirȩ. ¿Tjana̧ ju̧i̧iä jiadadiro̧jo̧ȩ ibëa̧ ütëti̧rea̧rȩ a̧ra̧ano̧rërea̧ ma̧ȩ oa? Tjana̧ ju̧i̧iä igȩnȩ chiami̧ dari̧ cjiaji̧ri̧rȩ juradirȩ? —yo̧ji̧ri̧rȩ iëno̧ë ta̧rëa̧diro̧jo̧ȩ Jechu ju̧i̧.

⁶ Ado Jechu judi dëbë yo̧mȩrȩ yo̧a̧dejȩrȩ: —Danȩrȩ, Ichaia judi no̧mȩ tjamo̧ri ja̧ go̧ȩparërea̧ ji̧, Ütërë ea jana̧ chjadüa̧ oa go̧ȩparërea̧ ji̧, jabechji̧ coëma cjiari̧ go̧ȩparëremȩde pio dibë chjiari. Danȩrȩ, jabomo̧ quëna̧cji̧ quëna̧ japaji̧ri̧rȩ cjo̧ro̧nȩrȩ mȩnȩro̧. Peaja̧di ta̧rëri̧ go̧ȩparëremȩde Ichaia judi. Tarëchji̧vä Ütë tjamo̧ judi yo̧rërea̧ ma̧ȩ oa: "Pio jiro pumȩ judiro̧ jibëa̧ ya maeara̧ goaeri̧ ni̧bädiro̧coe jibëa̧ chji̧dë maeara̧.

⁷ Badë jo̧rȩtadiro̧coe pio coaiäpȩmo̧ chjacjiamȩri̧ jo̧rȩtatärea̧ ji̧. Danȩrȩ, judiro̧ a̧ra̧no̧a̧ üdë teracaba maeade. Pumȩrȩ a̧ra̧ano̧rërea̧ duri maeade. Ca̧ ma̧ȩmi̧ dadë maea oa a̧ra̧ano̧diro̧jo̧ȩ." Aja̧, ja̧di ta̧rëri̧ go̧ȩparëremȩde Ichaia judi pio dibë chjiari.

⁸ Danȩrȩ, Ütë tjamo̧ ja̧ ma̧ȩ pio ju̧i̧ ta̧rëdiätärea̧ ji̧, cjäri̧ manȩrȩ, gi̧de ami̧ dari̧ japarenȩro̧jo̧ȩ. Ado teracaba pio ju̧i̧ jiadatärea̧ ji̧, pio ju̧i̧mo̧i̧ järiji̧ri̧rȩ ta̧rëdiänȩrȩ mȩnȩro̧, pumȩrȩ a̧ra̧ano̧rërea̧ duri pio ju̧i̧mo̧i̧ —yo̧a̧dejȩrȩ Jechu judi.

⁹ Ja̧dëa ji̧ ji̧dë u̧i̧ yo̧mȩrȩ a̧de yo̧a̧dejȩrȩ Jechu judi: —Danȩrȩ, Ütë tjamo̧ ja̧ ma̧ȩ pio ju̧i̧ jiadanȩrȩ dibëa̧ ütëti̧rea̧ judiro̧ a̧ra̧ano̧rërea̧ ma̧ȩ pio ju̧i̧ ano̧ mire quëna̧pea̧ oa. Ma̧i̧ dari̧ japanȩrȩ.

¹⁰ Danȩrȩ, ja̧di ta̧rëri̧ go̧ȩparëremȩde Moiche judi: "Ba chia dachji̧vä dibë no̧rimȩ ju̧i̧, dibë arayi̧ pio ji̧bo." Aja̧, ja̧di ta̧rëri̧ go̧ȩparëremȩde Moiche judi. Ado pio ju̧i̧ uëri pio yoa ma̧ȩbo go̧ȩparëremȩde: "Eami̧ pumȩrȩ pio jȩa nö̧riji̧ri̧ pio ji̧ri̧iäpȩmo̧ chjai̧dëri̧ ni̧bärä judi, pio ji̧ri̧ chjiari aechide yo̧rä judi, jabechji̧ ja̧bo tänȩpea̧de." Aja̧, pio jiro ma̧ȩbo a̧de go̧ȩparëremȩde Moiche judi.

^11-12 Jabo cjäri̧ marenȩro̧jȩrȩ, dibëa̧ pumȩ pio ji̧ri̧ chjadëri̧ a̧ra̧ano̧dërenȩro̧jȩrȩ pio jibë nö̧riji̧ri̧ pio ji̧ri̧ chjiari. Jabechji̧ eami̧ pumȩ judi pio jibë nö̧riji̧ri̧ pio ji̧ri̧iäpȩmo̧ yo̧rä judi, "Jabo cjäri̧ marequededibe. Ca̧ea̧ üdë china̧chjari̧ tutia̧ oa cjiade. Ütë tjamo̧ pio ju̧i̧iäpȩmo̧ yürüpea̧ oa tutia̧ oa cjiade cüdë pio ju̧i̧iäpȩmo̧ yo̧ë cji̧däa̧ oaiä. Ado pio ju̧i̧iä pio dibëiäpȩmo̧ eami̧ oa yürürea̧mi̧dërequededibe. Pio dibë a̧dorea̧mi̧dërequededibe" yo̧rä judi, "Aja̧, jabechji̧ chjadëde" yo̧renȩro̧jȩrȩ. Ado mȩnȩro̧ ja̧di dari̧ a̧ra̧ano̧a̧ oaiä, 'Aja̧, jabechji̧dida, cüdë pio coa nö̧riji̧ri̧ pio ji̧ri̧ a̧dodërä judi, jabechji̧dida' quëna̧ jo̧rȩtaji̧ri̧pe jädirȩ pumȩ judiro̧.

¹³ Jabo cjäri̧ marenȩrȩ, dibëa̧ ütëti̧rea̧rȩ a̧de a̧ra̧ano̧rërea̧ pio ju̧i̧mo̧i̧ jo̧rȩtaji̧ri̧rȩ a̧ra̧ano̧ chjaoa̧ oaiä, jabechji̧ Ütë tjamo̧ ja̧ ma̧ȩ pio ju̧i̧ badëparȩmi̧ dari̧ japarenȩro̧jo̧ȩ. Aja̧, ja̧di dari̧ jape chjaorenȩrȩ ma̧ȩ ji̧ra̧ tjamo̧ra̧ —yo̧mȩrȩ ni̧bä chjaorëremȩdejȩrȩ pjaricheo ji̧ri̧ Jechu judi.

¿Tjana̧de pumȩ ji̧ri̧ chjai̧dëparȩmȩ judi?

¹⁴ Ja̧dëa ji̧ Jechu judi ado ma̧ȩ yu̧rürëremȩdejȩrȩ pumȩ buba oa pio jȩaiäpȩ jana̧tä. Ado a̧dopaji̧ri̧ oa yo̧rëremȩdejȩrȩ: —Mȩnȩro̧ ütëborë acji cjaeä ta̧rëchji̧coe. Pio yoa ma̧ȩ oa chjadëri̧ bapë ta̧rëtä earequededibe, urëdi oa jo̧rȩtarea̧mi̧ dari̧.

¹⁵ Danȩrȩ, eami̧ pumȩ üdë igȩrȩ chiamȩrȩ jura̧ oaiä pumȩ chjadëdëpe jädëde Ütë tjamo̧ ju̧i̧iä. Tjamo̧ davä. Eami̧ pumȩ üdë, jënȩ jura̧ pio ju̧i̧iä chjadëdëpe jädë made, jabo jibëa̧ chji̧ri pio judiri cjitëmȩ pio ju̧i̧iämo̧i̧ chjadëdëpe jäde.

¹⁶ Chjadëri̧ acji cjaeä ta̧rëchji̧coe ta̧ra̧ puë chiaji̧ri̧mi̧ dari̧ —yo̧mȩrȩ yo̧a̧dejȩrȩ pumȩ ji̧ri̧.

¹⁷ Ja̧dëa ji̧ Jechu judi pumȩ ji̧ri̧ a̧dë jämȩrȩ yu̧a̧rëremȩde bërä. Ado jibëa̧ jadü judiro̧ iëno̧ë ta̧rëa̧diro̧jo̧ȩ jënȩ pea a̧ra̧ano̧a̧ pio ju̧i̧ chjiari.

¹⁸ Ado Jechu judi dëbë yo̧mȩrȩ yo̧a̧dejȩrȩ: —Chia chia, ¿pio mȩnȩro̧borë tjamo̧ri̧ bapë ta̧rëdëa̧renȩro̧coe? "Pumȩ judi, jënȩ eami̧ jurarea̧ oa jura̧ pio ju̧i̧iä chjadëdëpe jädëde Ütë tjamo̧ pio ju̧i̧iä," yo̧a̧rea̧ ma̧ȩ pio ju̧i̧ chjiari ¿chjadëri̧ dabadënȩrȩ?

¹⁹ Danȩrȩ, a̧ro̧rȩ eami̧ jurarea̧ oa jura̧ ji̧, jabechji̧ ibëa̧ chji̧räpȩmo̧ biradëde jabo ibëa̧ acäräpȩmo̧ ma bira̧de. Ado japamitë chjätäa̧rä, jabechji̧ ibëa̧ icjarari pio judiri go̧düde bucho ana̧ —yo̧a̧dejȩrȩ. Ado Jechu judi ja̧di ta̧rëri̧ yo̧a̧ oaiä, 'jabechji̧ jurarea̧ chjö̧na̧i̧rȩ chja jabechji̧ jurapea̧dida, china̧chjadë madida' quëna̧pea̧ oa a̧ra̧ano̧rëremȩde.

²⁰ Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de yo̧a̧dejȩrȩ jibëa̧ jadü ji̧ri̧: —Danȩrȩ, dibëa̧ chji̧ri pio judiri cjitëmȩ pio ju̧i̧iä chjadëdëpe jänȩrȩ mȩnȩro̧.

²¹ Jabechji̧ dibëa̧ chji̧ri pio judiri cjitëde chjai̧dëri̧ jo̧rȩtarea̧ üdë. Aja̧, eami̧ti̧ chjai̧dë oa japarea̧ üdë, jabechji̧ pumȩ chji̧ri pio judiri cjitëmȩde. Tjamo̧ davä. Iei̧ a̧dë chjäte goaramȩrȩ cjo̧ro̧rea̧ üdë, üi̧ oa a̧dë chjäte goarayi̧rȩ cjo̧ro̧rea̧ üdë, garürea̧ üdë, pumȩ pio ju̧i̧ ja̧bo tänȩpea̧ üdë, cja̧rȩmo̧ ja̧ iei̧ ji̧ bae ëba mo̧a̧pea̧ üdë, cja̧rȩmo̧ ja̧ üi̧ oa baë ëba mo̧a̧pea̧ üdë, jabechji̧ pumȩ ja̧ chji̧ri pio judiri cjitë maeade.

²² Ado o ji̧ri̧ ja̧ pio ju̧i̧ dae ja̧bo dae ja̧bo darea̧ üdë, chjai̧dë oa japarea̧ üdë, o ji̧ri̧iäpȩmo̧ u̧i̧parea̧ üdë, ma̧i̧ da idi̧ da oa japarea̧ üdë, nȩmȩparea̧ üdë, teracabari̧ quëbamȩrȩ jo̧rȩtarea̧ üdë, ibëa̧ chji̧rämo̧ jo̧rȩtarea̧ üdë, chji̧ cotomi̧ dari̧ jo̧rȩtarea̧ üdë, o ji̧ri̧iäpȩmo̧ poë aechide yo̧rea̧ üdë,

²³ jabechji̧ pumȩ ja̧ chji̧ri pio judiri cjitë maeade. Ado pio ju̧i̧iä chjadëdëpe jäde pumȩ üdë Ütë tjamo̧ pio ju̧i̧iä —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧.

Jechu judi a̧dorëremȩdejȩ iei̧ ji̧ judiodëyi̧ oa

²⁴ Ja̧dëa ji̧ Jechu judi Garirea quȩmȩ chiriri pio judiri go̧dümȩrȩ baärëremȩde Tiro quȩmȩ bë ma̧ri̧ yuroro a̧rȩmȩ chiriräpȩ. Ado jibëa̧ma̧i̧tämi̧ cjiamȩrȩ goadi yu̧a̧tarëremȩde bërä, jabo cjäri̧ made, goadirea̧ dadëa̧de.

²⁵ Jabechji̧ iei̧ jini̧ ta̧rëa̧ oaiä, "Aja̧, Jechu judi jana̧de" yo̧a̧ oa ta̧rëa̧ oaiä, jabechji̧ chjaodëri̧ goëdepea̧nȩjȩ. Ado pio jiro iei̧ jini̧ ëbarëreyi̧nȩjȩ jojabi boi̧ ji̧, yaröca chiayi̧ ji̧. Ado Jechu ja̧ dëbëräpȩyi̧rȩ ju chatura̧ cjiadäräa̧nȩ.

²⁶ Ado pio jiro iei̧ jini̧, jabechji̧ judiodërëreyi̧nȩ, jabo Chiropjeni̧chia quȩmȩ chiriri pio judirirëreyi̧nȩ. Jabo judiodëyi̧borë Jechu pio ju̧i̧iä cjo̧dëa̧nȩjȩ jojabi pio ji̧ chjaparȩtä, yaröca pio ju̧i̧ baä tänȩtä.

²⁷ Jabo Jechu judi iei̧ ji̧ dëbë yo̧a̧ ji̧, na̧rȩrea̧ ma̧ȩmi̧ dara̧ pio ju̧ri̧ra̧ dëbë yo̧a̧dejȩ. Judio quȩ oa yo̧tärea̧ ji̧, pumȩ bori̧ pio ji̧ri̧ chjiari yo̧mȩrȩ dëbë yo̧a̧dejȩ na̧rȩrea̧ ma̧ȩmi̧ dara̧. Ja̧di ta̧rëri̧ dëbë yo̧a̧dejȩ: —Damȩ, bori̧ pio ji̧ri̧ yabochja jura tänȩpea̧di ba chia tjamo̧ tara. Jabechji̧ judiro̧ jurapea̧ pio ju̧i̧ aure pio ji̧ri̧iäpȩmo̧ baë yürürea̧mi̧dëdi. Ja̧di dari̧ japea̧ üdë jabechji̧ ma ja̧didë —yo̧mȩrȩ dëbë yo̧a̧dejȩ iei̧ ji̧, judiodë pio ji̧.

²⁸ Jabo iei̧ jini̧ pio jȩaiäpȩmo̧ chjadëri̧ a̧dotä ea̧ oaiä, judiodëbo chjadëri̧ a̧dotä ea̧ oaiä, jabechji̧ cjiadiädëyi̧rȩ dëbë yo̧a̧nȩjȩ Jechu ju̧i̧iäpȩmo̧: —Aja̧ Ano̧mȩ, dabarequede, jabo danȩ, bori̧ judiro̧ mechjaräpȩ jura̧ ji̧, jabechji̧ aure pio judiro̧borë juradirȩ. Mechja ëteräpȩ cjiaji̧ri̧rȩ juradiro̧jo̧ȩ daburo cjatäa̧mȩ jurarea̧ pio ju̧i̧ —dëbë yo̧a̧nȩjȩ.

²⁹ Ado pio ju̧i̧iä Jechu judi dëbë yo̧a̧dejȩ: —Chjadëri̧ yo̧a̧mȩcoa. Mȩnȩ ja̧di dari̧ dëbë yo̧a̧ oaiä, jabechji̧ bücjüri̧ cjiadëyi̧rȩ baäje. Jabechji̧ na̧ jabi pio ji̧ chjapea̧ oa cjiayi̧ ji̧ dadäräpamȩji̧, yaröca chiadëyi̧pea̧yi̧ oa —yo̧mȩrȩ dëbë yo̧a̧dejȩ Jechu judi.

³⁰ Ado ja̧dëa ji̧ pio jiro iei̧ jini̧ jibëa̧ bëräpȩ baäa̧ ji̧, jabechji̧ chjapea̧yi̧ oa dadäräa̧nȩjȩ jojabi ji̧. Aja̧, mo̧a̧rea̧räpȩ a̧rȩyi̧ oa, janö̧padëyi̧rȩ a̧rȩyi̧ oa, daea̧nȩjȩ, yaröca chiadëyi̧ oa.

Jechu judi chjaparȩrëremȩdejȩ ta̧ra̧ cotomȩ ju̧i̧

³¹ Jechu judi Tiro quȩmȩ bë ma̧ri̧ yuroro a̧rȩmȩ chiriri pio judiri go̧dümȩrȩ, dae chjätärëremȩde Chido̧ quȩmȩ bë ma̧ri̧ yuroro a̧rȩmȩ chiri oa. Ado Decapori quȩmȩräpȩ chjätämȩrȩ go̧düdärärëremȩde Garirea quȩmȩ tjaräpȩ.

³² Ado Jechu judi pio idëpȩ go̧düdäräa̧mȩ oa pumȩ judiro̧ ëba jäa̧diro̧jo̧ȩ ta̧ra̧ cotomȩ ju̧i̧, chjadëri̧ ni̧bädëmȩ pio ju̧i̧. Jabechji̧ Jechu judi pio jiro üi̧ oa jibëa̧ ichira̧ ga̧re taratä eaji̧ri̧rȩ cjo̧dëa̧diro̧jo̧ȩ, chjaparȩtä.

³³ Ado Jechu judi pumȩ buba oa a̧dë jätämi̧ cjiamȩrȩ a̧dë järëremȩdejȩrȩ ta̧ra̧ cotomȩ pio ju̧i̧ nö̧ta. Ja̧dëa ji̧ jibëa̧ ichi chjiara̧ pio ju̧ri̧ra̧ pu̧ra̧dejȩ pio ju̧i̧ ja̧ ta̧ra̧ puërä. Ado jibëa̧ ichi chjiarä pju̧i̧no̧ ëte, ga̧re tara̧dejȩ ju̧i̧ ja̧ tjopono̧ oa.

³⁴ Ja̧dëa ji̧ Jechu judi a̧dëräpȩmo̧ gatë damȩrȩ acji jȩo̧a̧de. Ado yo̧a̧dejȩ pumȩ oa: 'epjata'. Ado 'epjata' yo̧area̧ üdë, jabechji̧ 'are iavä' yo̧rea̧ ma̧ȩde. Aja̧, pio ju̧i̧ yo̧a̧dejȩ Jechu judi.

³⁵ Ado chjaodëri̧ ta̧rëmȩpea̧de. Ado chjadëri̧ ni̧bämȩpea̧de peaja̧di.

³⁶ Ado pumȩ judiro̧ pio ju̧i̧ chjiari o ji̧ri̧iäpȩmo̧ yo̧chea oa, jabechji̧ cjapiri̧ cjiatä yo̧a̧dejȩrȩ Jechu judi. Jabo ji̧ri̧iäpȩmo̧ to̧bari̧ yo̧ chjaoa̧räbo, jabechji̧ ji̧dë ma yo̧rëreji̧ri̧dirȩ Jechu pio ju̧i̧ chjiari, judi japea̧ pio ju̧i̧ chjiari.

³⁷ Ado goë ta̧rëji̧ri̧ judiro̧ ütëborë pio ju̧i̧ ta̧rëa̧ oaiä ana̧ri̧ jo̧rȩtaji̧ri̧pea̧dirȩ, ya yabë cjiaji̧ri̧rȩ. 'Chia chia, judi japea̧ üdë, chjadë tjamo̧ maeadida, ta̧ra̧ cotomȩ pio ju̧i̧ chjadëri̧ ta̧rë tänȩmȩdida, ni̧bädëmȩ pio ju̧i̧ peaja̧di chjadëri̧ ni̧bä tänȩmȩdida' quëna̧ jo̧rȩtaji̧ri̧rȩ ana̧ri̧ ni̧bä chjaorëreji̧ri̧dirȩ pio ju̧i̧ chjiari.