Marcos 6 - Biblia Pume

Nachareräpȩ cjo̧ro̧ji̧ri̧ judiro̧ jiadarëreji̧ri̧diro̧jo̧ȩ Jechu ju̧i̧

¹ Ado Jechu judi baärëremȩde Nachare quȩmȩ bë ma̧ri̧räpȩ, jënȩ ütëpea̧ bë ma̧ri̧räpȩ. Jibëa̧ jadü judiro̧ peaja̧di ëba baäa̧diro̧jo̧ȩ.

² Ado chjabado doro, järätä chjaparea̧ doro järëreji̧ri̧dirȩ judiorë a̧doparea̧ bëräpȩ. Ado Jechu judi pumȩ pio ji̧ri̧iäpȩmo̧ a̧ra̧ano̧pea̧ ji̧ taruparëremȩde. Ado Jechu judi a̧ra̧ano̧mȩ oa ta̧rëa̧ oaiä, jabechji̧ ya yabë cjiaji̧ri̧rȩ ana̧ri̧ jo̧rȩtaji̧ri̧pea̧dirȩ noi̧dërë. Ado jibëa̧ dëbëti̧ra̧ yo̧ji̧ri̧rȩ yo̧a̧dirȩ: —¿Jabo chjia oaiä dabapea̧de pio yodëje ja̧di dari̧ a̧ra̧ano̧pea̧ ji̧? ¿Chjiarë yürüa̧ oa a̧dë chjäte dabarea̧ goamȩpea̧de? ¿Ado yö̧ta dari̧ dabapea̧de jauëchja cjiari̧ japapea̧ ji̧?

³ Danȩrȩ, pio jiro üi̧ pio ju̧i̧ chjiari dabarea̧rȩ jabo. Jabomo̧ tora̧ ja̧bepamȩde pio judide. Maria joja pio judide. Ado ju̧i̧di ja̧ji̧ri̧ pio ji̧ri̧ peaja̧di dabarea̧ro̧jȩrȩ. Santiago pio ju̧i̧, Joche pio ju̧i̧, Juda pio ju̧i̧, Chimo̧ pio ju̧i̧ daba marea̧ro̧jȩrȩ. Ado ju̧i̧di ja̧ji̧ri̧ pio jini̧ro̧borë pio yoaiäpȩ cjo̧ro̧ni̧rȩ —yo̧rëreji̧ri̧dirȩ. Jabechji̧ Jechu ja̧ pumȩ judiro̧, 'Jabo cjäri̧ madida, pio ibë a̧ra̧ano̧rea̧mi̧dëdida, ba chiadëdida' quëna̧ jo̧rȩtaji̧ri̧rȩ badë darëreji̧ri̧diro̧jo̧ȩ, pio ju̧i̧iäpȩmo̧ quëna̧dëri̧ cjiaji̧ri̧rȩ.

⁴ Jabo Jechu judi yo̧a̧dejȩrȩ: —Danȩrȩ, pumȩ judiro̧ jibëa̧ chirirä ütëpea̧mȩ pio ju̧i̧ darä, Ütërë ea jana̧ chjadüa̧ oa ni̧bämȩ pio ju̧i̧ darä, jabechji̧ ba chia dadë madiro̧jo̧ȩ. Ado mȩnȩro̧ peaja̧di ba chia dadërenȩro̧coe. Ütërë ea jana̧ chjadüa̧ oa ni̧bämȩ oa ba chia dadërenȩro̧coe. Dibëa̧ chjarerä ütëpea̧mȩ oa, mȩnȩro̧ cjo̧ro̧mȩ bë ma̧ri̧räpȩ ütëpea̧mȩ oa, jabechji̧ ba chia dadërenȩro̧coe —yo̧mȩrȩ dëbë yo̧rëremȩdejȩrȩ.

⁵ Ado judiro̧ quëba̧ pio ju̧i̧iä, jabechji̧ Jechu judi jauëchja cjiari̧ japarea̧ dadëa̧de pio ju̧ri̧pȩ. Jabo o ji̧ri̧mo̧i̧ oa, yo̧a̧ri̧mo̧i̧ oa ga̧re taramȩrȩ chjaparȩrëremȩdejȩrȩ, jabo pio ji̧ri̧mo̧i̧. Ado judiri japadëa̧de.

⁶ Ado pumȩ judiro̧ pio jȩaiäpȩmo̧ quëna̧dëa̧ oaiä jabechji̧ ana̧ri̧ jo̧rȩtamȩpea̧de Jechu judi. Ja̧dëa ji̧ pio jiro chiriräpȩ chjätäti̧ cjiamȩrȩ bë ma̧ri̧ chjö̧na̧i̧ oa goëde järëremȩde pumȩ ji̧ri̧ a̧ra̧ano̧pea̧ oa.

Jechu judi chjadürëremȩdejȩrȩ jibëa̧ jadü ji̧ri̧, 12 oa

⁷ Ado Jechu judi jibëa̧ jadü pio ji̧ri̧, 12 oa, jabechji̧ pio jȩa nö̧ta a̧dopatä yo̧rëremȩdejȩrȩ. Ado a̧dopea̧ji̧ri̧ oa, tjamo̧ yo̧rea̧ oa yürürëremȩdejȩrȩ judiro̧ ira̧diä cjaeäji̧ri̧ pio ji̧ri̧ chjadëri̧ baä tänȩpea̧ oa. Aja̧, ja̧di dari̧ ja̧bepatä yo̧mȩrȩ chjadürëremȩdejȩrȩ yo̧a̧ri̧ra̧ jadü.

⁸ Ado yo̧a̧dejȩrȩ: —Jabechji̧ bë maearë cjiaji̧ri̧rȩ jätä earequededibe, mö̧na̧ji̧ri̧rȩ. Chja̧pe oa goa jädë machji̧vä. Ado dibëa̧ ma̧chi̧ra̧ joë oa peaja̧di chia jädë machji̧vä. Ado chëre peaja̧di goa jädëpea̧de. Jabechji̧ dibëa̧ tai̧rea̧ to pio ju̧i̧mo̧i̧ ara jächji̧vä.

⁹ Ado danȩrȩ, dibëa̧ ta joë oa go̧ioji̧ri̧rȩ jächji̧vä, jabo ado cja̧rȩmo̧ chjibo oa ano̧ mire ina̧pea̧ oa goa jädë machji̧vä —yo̧mȩrȩ yo̧rëremȩdejȩrȩ.

¹⁰ Ado ji̧dë u̧i̧ yo̧mȩrȩ a̧de yo̧a̧dejȩrȩ: —Danȩrȩ, mȩnȩro̧ eami̧ bë ma̧ri̧räpȩ järä, jabechji̧ dibë cjäri̧ri̧ cjia damȩ pio ju̧i̧ ja̧ bëräpȩ cjo̧ro̧chji̧vä pio jiro bë ma̧ri̧ri pio judiri a̧dë baäa̧rä yuro.

¹¹ Ado mȩnȩro̧ eami̧ bë ma̧ri̧räpȩ järä, jabo idëpȩ cjo̧ro̧ji̧ri̧ pumȩ judiro̧ dibë chjadëri̧ jeadërä judi, mȩnȩro̧ a̧ra̧ano̧a̧ pio ju̧i̧ ta̧rë ja̧bodëri̧ cjiarä judi, jabechji̧ a̧dë baächji̧jȩrȩ. Ado ji̧ri̧ ja̧ bë ma̧ri̧ri pio judiri go̧dürä, jabechji̧ dibëa̧ taräremȩ pio ju̧i̧ gu̧ro tänȩchji̧jo̧ȩ dabu pjo̧no̧i̧remȩ pio ju̧i̧, ta gu̧në pjo̧deji̧ri̧rȩ. Jabechji̧ dibëa̧ taräremȩ pio judi na̧rȩrea̧de pio ji̧ri̧iäpȩmo̧ uapai̧ dari̧ na̧rȩpea̧ oa. Jabechji̧ judiro̧ pio ju̧i̧ daea̧ oaiä, ‘Aja̧, Ütë tjamo̧ judi bape chjaopadiibëda' quëna̧ dabapadirȩ. Ado ja̧di dari̧ japa ëte, jabechji̧ a̧dë baächji̧jȩrȩ —yo̧mȩrȩ yo̧a̧dejȩrȩ Jechu judi.

¹² Ado Jechu pio ju̧i̧iä ta̧rë ëte järëreji̧ri̧dirȩ. "Chjere jo̧rȩtachji̧vä" yo̧ji̧ri̧rȩ a̧ra̧ano̧riä tai̧rëreji̧ri̧diro̧jȩrȩ pumȩ ji̧ri̧.

¹³ Ado yaröca chiaji̧ri̧ pumȩ pio ji̧ri̧ chjaparȩrëreji̧ri̧diro̧jȩrȩ. Ado gito ja̧boji̧ri̧ no̧i̧dë oa chjaparȩrëreji̧ri̧diro̧jȩrȩ peaja̧di. Jabechji̧ jibëa̧ daito oa yo̧ tocoi̧mi̧ra̧ joaji̧ri̧rȩ chjaparȩrëreji̧ri̧diro̧jȩrȩ.

Juan pio judi, go̧e cjaeä chudamȩ pio judi ja̧bo tänȩa̧ oa cjiarëremȩde

¹⁴ Ado Jechu pio ju̧i̧ chjiari ma̧ȩ üdë chjaodëri̧ baärëremȩde davä oëra̧ti̧ oa pumȩ judiro̧ ütëborë ta̧rërea̧mi̧ dari̧. Ado chiri ütë judi, Erode quȩmȩ pio judiborë goë ta̧rëmȩpea̧de Jechu pio ju̧i̧ chjiari, judi jauëchja cjiari̧ japea̧ pio ju̧i̧ chjiari. Ado pumȩ judiro̧ orëmo̧rȩ Jechu pio ju̧i̧ chjiari yo̧a̧ ji̧, jabechji̧ ja̧di ta̧rëri̧ yo̧rëreji̧ri̧dirȩ: —Aja̧, Juan pio judi jirode. Go̧e cjaeä chudarëremȩ pio judi jirode —yo̧a̧dirȩ. —Ja̧boa̧remȩrȩ bëdüa̧ oa cjia jirode yaba̧. Pio ju̧i̧iä dami̧ti̧ jauëchjari̧ japarea̧ dade —yo̧a̧dirȩ.

¹⁵ Ado o judiro̧ yo̧a̧dirȩ: —Aja̧, Eria quȩmȩ pio judi jirode —yo̧a̧dirȩ. Ado o judiro̧ yo̧a̧dirȩ: —Ütërë ea jana̧ chjadüa̧ oa ni̧bärëremȩ pio judi jirode. Ibëa̧ ütëti̧rea̧ pio judiro̧ cjo̧ro̧bearä judirä cjo̧ro̧rëremȩ pio judi jirode —yo̧a̧dirȩ o judiro̧.

¹⁶ Ado Erode judi pumȩ judiro̧ yo̧a̧ pio ju̧i̧ goë ta̧rëa̧ oaiä ana̧ri̧ jo̧rȩtamȩpea̧de Juan pio ju̧i̧ chjiari. 'Chia, chia, ja̧bo tänȩtea̧cuni̧da, pio cüdë tänȩa̧ oa guadia judi tjübë coto tänȩa̧diji̧da, jabo ado chjereno̧ bëdüa̧ oa cjia jirodida yaba̧, Jechu pio judi jirodida' quëna̧ jo̧rȩtamȩpea̧de, ana̧ri̧ jo̧rȩtamȩrȩ.

¹⁷ Aja̧, ja̧di dari̧ jo̧rȩtamȩpea̧de Erode judi Juan pio ju̧i̧ chjiari ta̧rëa̧ oaiä. Jabo danȩrȩ, mȩnȩro̧, pio yoa ma̧ȩ oa go̧ȩ ni̧bäji̧ri̧ pio judiro̧ chjadëri̧ dabapea̧ oa, jabechji̧ ütara̧mi̧ go̧ȩparequede. Danȩrȩ, Erode pio judirëremȩde Juan pio ju̧i̧ chaä tänȩa̧mȩ judi. Pio judi tänȩa̧ oa mitërëreji̧ri̧diro̧jo̧ȩ. Ado pio judi tänȩa̧ oa tabüa̧diro̧jo̧ȩ. Jabo Erode judi ja̧bo tänȩdëri̧ cjiarëremȩdejȩ Juan ju̧i̧. Ado pio ju̧i̧iä jabomo̧ chaä tänȩa̧dejȩ. Jabechji̧ o judiro̧ Juan ju̧i̧ ja̧bo tänȩchea oa ja̧di dari̧ japarëremȩde. Jabechji̧ Juan judi pio jȩaiäpȩmo̧ ji̧dë ma yo̧a̧ oaiäbo, jënȩ Ütë tjamo̧ ja̧ ma̧ȩ oa ta̧rë ja̧bodëa̧ pio ju̧i̧ chjiari yo̧ chjaoräbo, jabechji̧ ja̧botä eadëa̧dejȩ. Danȩrȩ, Erode judi baë ëbarëremȩdejȩ jibëa̧ omȩ ja̧ iei̧ pio ji̧, Felipe quȩmȩ ja̧ iei̧ pio ji̧. Erodia quȩyi̧ pio ji̧ baë ëbarëremȩdejȩ.

¹⁸ Ado Juan judi ji̧dë ma yo̧rëremȩdejȩ Erode pio ju̧i̧iäpȩmo̧ jibëa̧ omȩ ja̧ iei̧ pio ji̧ baë ëbadëtä. "Aja̧, ado cja̧rȩmo̧ ja̧ iei̧ pio ji̧ bae ëba̧ üdë china̧chjade" yo̧ chjaorëremȩdejȩ.

¹⁹ Pio ju̧i̧iä goëdëri̧ cjia tjamo̧pe bagarëreyi̧nȩjȩ Erodia pio jini̧. Aja̧, cjatäcjie jo̧rȩtarea̧ decjiari̧ goëdëri̧ cjiape bagarëreyi̧nȩ. Ado pio ju̧i̧iä ja̧bo tänȩtä ea tjamo̧rëreyi̧nȩjȩ Juan ju̧i̧, jabo cjäri̧ manȩ, eami̧ oa japarea̧ dadëa̧nȩ.

²⁰ Erode judi Juan pio ju̧i̧ uapamȩrȩ darërea̧ pio oaiä, jabechji̧ eami̧ oa japarea̧ dadëa̧nȩ. 'Jabechji̧ pumȩ chjadëdida, coëma cjiari̧ cjo̧ro̧dida' quëna̧ jo̧rȩtamȩrȩ darëremȩdejȩ. Ado pio ju̧i̧ uëri goaeri̧ ta̧rërëremȩdejȩ Erode judi Juan pio ju̧i̧. Tjamo̧ davä. Juan judi a̧ra̧ano̧a̧ ji̧, jabechji̧ goaeri̧ ta̧rëa̧dejȩ. Pio jȩaiäpȩmo̧ bücjüri̧ cjia jo̧rȩta tänȩa̧räbo, jabechji̧ goaeri̧ ta̧rërëremȩdejȩ. Tjamo̧ri̧ ta̧rë ja̧bodëa̧dejȩ, jabo jabechji̧ ta̧rëtämi̧ cjiamȩrȩ darëremȩdejȩ. Pio ju̧i̧iä chjadëri̧ jidarëremȩdejȩ, ado cja̧rȩmo̧rȩ eami̧ oa japarea̧mi̧dëri̧.

²¹ Jabo ja̧dëa ji̧ japamitë chjätä ëte, Erodia pio jini̧, dëdë, ja̧bo tänȩrea̧ darëreyi̧nȩjȩ Juan ju̧i̧. Jabechji̧ Erode judi ara̧ domȩ pio ju̧i̧iä, jibëa̧ ai̧rȩ pio jȩa ara̧ domȩ pio ju̧i̧iä, jabechji̧ airi̧ cjia ëba jurapea̧ oa a̧dopa tänȩrëremȩdejȩrȩ pumȩ no̧i̧dë oa, pumȩ ba chia oa. Pio jȩa a̧doji̧ri̧ pio ji̧ri̧, guadia ütë pio ji̧ri̧, Garirea chirirä tjamo̧ cjo̧ro̧ji̧ri̧ pio ji̧ri̧ ëba jurapea̧ oa a̧dopa tänȩrëremȩdejȩrȩ.

²² Ado ja̧dëa ji̧ Erodia pio ji̧ ja̧ jojabi pio ji̧ni̧ a̧doparea̧ jo̧ tjoräpȩ yu̧a̧yi̧rȩ goae tarari̧ bochegua bochegua cjiayi̧pea̧nȩ ütëborë dari̧. Ado Erode judi, pio jȩa nö̧ta a̧dopaji̧ri̧ pio judiro̧borë ma̧ chiadëri̧ cjia tjamo̧ji̧ri̧rȩ dae ja̧bo da marëreji̧ri̧diro̧jȩ bochegua chjaoyi̧ pio ji̧. Ado pio ju̧i̧iä Erode judi yo̧a̧dejȩ bocheguareyi̧ pio ji̧: —Damȩ, pio mȩa daea̧ oaiä, jabechji̧ ma̧ chiadëri̧ cjia tjamo̧pea̧a̧ro̧. Ja̧di tara yo̧cama̧. Mȩnȩ eami̧ cjo̧dëcoa. Chjadëri̧ yo̧coa. Mȩnȩ coa cjo̧dëa̧mi̧ tjamo̧ri̧ yürüpacama̧ —yo̧mȩrȩ yo̧a̧dejȩ bocheguayi̧reyi̧ ji̧.

²³ Ado ja̧di dari̧ yo̧ ëte, ma̧diä ma̧diä cjia tänȩdërea̧ ma̧ȩ maeara̧ a̧de yo̧a̧dejȩ peaja̧di, ma̧ȩ chjádë yürürea̧mi̧dë ma̧ȩra̧. Ado ja̧di dari̧ yo̧ ëte, ado yo̧a̧dejȩ: —Jabechji̧ mȩnȩ jo̧rȩta̧mi̧ cjo̧dëcoa. Ado ca̧ chiri oa earä judi, jabechji̧ yürütäremȩcama̧ tjomo̧mi̧. Jabechji̧ mȩnȩ jo̧rȩta̧mi̧ cjo̧dëcoa —yo̧mȩrȩ yo̧rëremȩdejȩ Erodia pio ji̧ ja jojabi pio ji̧iäpȩmo̧.

^24-25 Ado pio ju̧i̧ ta̧rëa̧ oaiä, jäeno̧a̧nȩjȩ jojini̧ pio ji̧iäpȩ. Ado iëno̧ë ta̧rëa̧nȩjȩ: —Ca̧ ai̧, ¿yö̧ta dëbë yo̧täreyi̧cuni̧ ütë oa? Ado dëbë yo̧yi̧rȩ yo̧a̧nȩjȩ joji̧ni̧ jini̧: —Yö̧tadë, jabechji̧ Juan pio ju̧i̧ ja̧ tjübë oa jëdërea̧ ana̧rä chjaodëri̧ ara jana̧tä eacama̧. Go̧ȩ cjaeä chudamȩ pio ju̧i̧ ja̧ tjübë oa ara jana̧tä eacama̧. Ja̧di ta̧rëri̧ dëbë yo̧eyi̧mu̧ni̧ ütë ju̧i̧iäpȩmo̧ —yo̧a̧nȩjȩ jojabi ji̧iäpȩmo̧. Ado Erodia ja̧ jojabi pio jini̧ chjaodëri̧ jäeno̧a̧nȩjȩ ütë pio ju̧i̧iäpȩ ado chjereno̧. Ado dëbë yo̧a̧nȩjȩ: —Danȩ, Juan pio ju̧i̧ ja̧ tjübë oa, go̧e cjaeä chudamȩ pio ju̧i̧ ja̧ tjübë oa chjaodëri̧ ara jana̧tä earequedemȩ jëdërea̧ ana̧rä —yo̧a̧nȩjȩ.

²⁶ Ado ütë judi pio jiro ma̧ȩ oa ta̧rëa̧ oaiä gito ana̧ri̧ jo̧rȩtamȩpea̧de. Jabechji̧ tjamo̧ri̧ ja̧bo tänȩdëri̧ cjiarëremȩdejȩ Juan ju̧i̧. Jabo ma̧ȩ chjádë yürürea̧mi̧dë ma̧ȩra̧ yo̧a̧ oaiä, pio jȩa nö̧ta a̧dopaji̧ri̧ pio ji̧ri̧ ja̧ ta̧ra̧ puërä yo̧a̧ oaiä, jabechji̧ eami̧ japarea̧ dadëa̧de.

²⁷ Pio ju̧i̧iä yo̧a̧dejȩ guadia oa Juan pio ju̧i̧ ja̧ tjübë oa ara jana̧tä jëdërea̧ ana̧rä. Ado pio ju̧i̧iä järëremȩde guadia judi chaärea̧ bëräpȩ. Ado Juan pio ju̧i̧ ja̧ tjübë oa tuti gu̧na̧dejȩ.

²⁸ Ado ja̧dëa ji̧ jëdërea̧ ana̧rä ara jana̧dejȩ iei̧ pëi̧ chja pio ji̧iäpȩmo̧. Ado jini̧ yüreno̧a̧nȩjȩ jibëa̧ ai̧ ji̧iäpȩmo̧. Ado Erodia jini̧ ja̧di dari̧ japea̧ oaiä, jabechji̧ Juan pio ju̧i̧ ja̧bo tänȩrea̧ darëreyi̧nȩjȩ.

²⁹ Ado Juan pio ja̧ jadü judiro̧ pio ju̧i̧ chjiari goë ta̧rëa̧ oaiä järëreji̧ri̧dirȩ pio ju̧i̧ ja̧ icjararemȩ oa mitëpea̧ oa, chjadëri̧ na̧ra̧pea̧ oa.

Jechu judi ëba jurarëremȩdejȩrȩ 5000 oari ji̧ri̧, jibëa̧ pumȩbo

³⁰ Ado japamitë chjätä ëte, Jechurë chjadüa̧ judiro̧ ado cuchupë ma̧na̧rëreji̧ri̧dirȩ. Oëra̧ti̧ oa a̧ra̧ano̧riä järëreji̧ri̧ pio judiro̧ ado chjereno̧ cuchupë ma̧na̧rëreji̧ri̧dirȩ Jechu pio ju̧i̧iäpȩ. Ado ana̧ri̧ ni̧bä chjaoa̧diro̧jo̧ȩ jënȩro̧ ja̧bepea̧ pio ju̧i̧ chjiari, jënȩro̧ a̧ra̧ano̧a̧ pio ju̧i̧ chjiari.

³¹ Ja̧dëa ji̧ Jechu judi yo̧a̧dejȩrȩ: —Danȩrȩ, pio yudiri go̧dütärȩ pumȩ decjiaräpȩ jäpea̧ oa, pio a̧ro̧rȩmo̧rȩ ëba cjiapea̧ oa, pio a̧ro̧rȩ chjadëri̧ järätä chjapapea̧ oa. Jabechji̧ pumȩ no̧i̧dërë pio ji̧ri̧iäpȩ ji̧dë ma go̧düdärä chjaoa̧ oaiä, pio ji̧ri̧ ji̧dë ma̧ tja̧reparȩa̧ oaiä, jabechji̧ chjadëri̧ ni̧bä chjaorea̧ dadëa̧dirȩ. Ado jibëa̧ jurarea̧ oa peaja̧di jurarea̧ dadëa̧dirȩ. Pio ju̧i̧iä yo̧a̧dejȩrȩ Jechu judi:

³² Ado Jechu judi yo̧a̧ oaiä, jabechji̧ bua̧diro̧jo̧ȩ uimo̧mȩ chara oa pumȩ decjiaräpȩ jäpea̧ oa.

³³ Jabo pumȩ no̧i̧dȩrë daea̧diro̧jȩrȩ charara̧ jäji̧ri̧ oa. 'Aja̧, Jechu judi jibëa̧ jadü pio ji̧ri̧ nö̧ta ja̧dira̧ baäa̧diro̧da' quëna̧ jo̧rȩtaji̧ri̧rȩ daea̧diro̧jȩrȩ. Pio ju̧i̧iä ui yuroro dëbë bagureno̧rëreji̧ri̧dirȩ Jechu judi jäpamȩräpȩmo̧. Jabechji̧ tara̧ bagureno̧a̧dirȩ pumȩ no̧i̧dërë pio jiro chirirä a̧rȩmȩ bë ma̧ri̧ri pio judiri. Aja̧, ado cja̧rȩmo̧ bë ma̧ri̧ri pio judiri, ado cja̧rȩmo̧ bë ma̧ri̧ri pio judiri̧ goae tarari̧ baguraji̧ri̧rȩ go̧düdärärëreji̧ri̧dirȩ pumȩ bubarë Jechu pio ju̧i̧ ja̧ yaboi̧.

³⁴ Ado Jechu judi charari pio judiri bira̧ ji̧ darëremȩdejȩrȩ pumȩ buba tjamo̧ oa. Cjäri̧ri̧ cjia tjamo̧mȩrȩ darëremȩdejȩrȩ. Ovejami̧ da maea oa, jibë jidamȩ decjiami̧ da maea oa daea̧dejȩrȩ. Pio ju̧i̧iä taruparëremȩde pio ji̧ri̧iäpȩmo̧ a̧ra̧ano̧pea̧ ji̧. Ma̧ȩ ji̧ra̧ oa a̧ra̧ano̧a̧dejȩrȩ.

³⁵ Ado gȩnȩpe järä, Jechu ja̧ jadü judiro̧ jäa̧diro̧jo̧ȩ Jechu ju̧i̧iäpȩ. Ado yo̧a̧diro̧jo̧ȩ: —Chia chia, bë ma̧ri̧ decjiaräpȩ cjiarea̧rȩ. Ado do üdë bira̧diibe.

³⁶ Jabërä baä tänȩjȩrȩ pumȩ ji̧ri̧ jibëa̧ jurarea̧ oa gatëpea̧ oa. Tjado ana̧mȩ pio ju̧i̧iä gatëpea̧ oa, bë ma̧ri̧räpȩ cjo̧ro̧ji̧ri̧ pio ji̧ri̧iä gatëpea̧ oa jabërä baä tänȩjȩrȩ. Jabechji̧ do decjiape jädiibe.

³⁷ Jabo Jechu judi dëbë yo̧a̧dejȩrȩ: —Pio mȩnȩro̧ jurarea̧ oa yürüchji̧jȩrȩ. Ado dëbë yo̧a̧diro̧jo̧ȩ: —Jabo cjäri̧ marea̧rȩ. Japarea̧ decjiade. ¿Yö̧ta dari̧ japatäreji̧ri̧cji̧vaa̧ro̧? Danȩ, 8 gupënȩ nö̧ta ja̧bepea̧ bara̧ gatërä judimo̧ nö̧tatäremȩde chëre üdë pio jiro pumȩ ja̧ oa chja̧pe oa gatëpea̧ ji̧. Jabo a̧ro̧rȩ, cjäri̧ marea̧rȩ, japarea̧mi̧dëde.

³⁸ Ado ja̧dëa ji̧ Jechu judi iëno̧ë ta̧rëa̧dejȩrȩ: —¿Na̧pai̧ chja̧pe goanȩrȩ mȩnȩro̧? Goëdechji̧vä chjadëri̧ ütarapea̧ oa. Ado jäeno̧a̧dirȩ ütarapea̧ oa. Ado Jechu ju̧i̧iäpȩ jana̧ji̧ri̧rȩ yo̧a̧diro̧jo̧ȩ: —Danȩ, cja̧ȩta̧ra̧ ichimo̧i̧ goarea̧rȩ chja̧pe oa. Ado pio ju̧i̧ uëri cho̧ oa yo̧a̧ri̧mo̧i̧ goarea̧rȩ. Jurarea̧ decjiade —yo̧a̧diro̧jo̧ȩ.

³⁹ Ja̧dëa ji̧ Jechu judi pumȩ ütëbodärä oa cärärä cha tänȩtä yo̧rëremȩdejȩrȩ jibëa̧ jadü ji̧ri̧. Jibëa̧ buba chari̧ cha tänȩtä, ado cja̧rȩmo̧ buba chari̧, ado cja̧rȩmo̧ buba chari̧ cha tänȩtä yo̧a̧dejȩrȩ.

⁴⁰ Pio ju̧i̧iä cha̧ji̧ri̧pea̧dirȩ pumȩ judiro̧. 50 pumȩ chiari̧, 100 pumȩ chiari̧ charëreji̧ri̧dirȩ jibëa̧ buba chari̧.

⁴¹ Ja̧dëa ji̧ Jechu judi mitëa̧dejȩ chja̧pe oa, cja̧ȩta̧ra̧ ichimo̧i̧ oa, cho̧ yo̧a̧ri̧ oa. Ado a̧dëräpȩmo̧ gatë damȩrȩ ni̧bärëremȩdejȩ jibëa̧ Ama̧i̧ ju̧i̧, ja̧di ta̧rëri̧ yo̧mȩrȩ: —Ama̧i̧, chjadëri̧ yürüa̧renȩibe —yo̧mȩrȩ ni̧bäa̧dejȩ. Ja̧dëa ji̧ chja̧pe oa mu̧i̧ quirëno̧ ëte, jabechi̧ yürüchärëremȩdejȩrȩ jibëa̧ jadü ji̧ri̧ pumȩ pio ji̧ri̧iäpȩmo̧ chjarapë yürüpea̧ oa. Ado cho̧ oa, yo̧a̧ri̧ oa peaja̧di chjarapë yürüa̧dejȩrȩ jibëa̧ jadü ji̧ri̧ pumȩ pio ji̧ri̧iäpȩmo̧ ano̧ mire chjarapë yürüpea̧ oa.

⁴² Ado pumȩ judiro̧ ütëborë jura̧dirȩ maipea̧rä yuro.

⁴³ Ja̧dëa ji̧ ütëborë mairi̧ jura̧ duri oa, Jechu ja̧ jadü judiro̧ boa̧diro̧jo̧ȩ cjiadiäa̧mȩ jurarea̧ pio ju̧i̧. Cho̧ go̧a̧ oa, chja̧pe pënȩ oa, boa̧dirȩ 12 taio tjuri cjiari̧.

⁴⁴ Ado chja̧pe oa juraji̧ri̧ oari judiro̧, 5 mil pumerëreji̧ri̧dirȩ. Ado ivi jini̧ro̧ peaja̧di jurarëreji̧ri̧ni̧rȩ bori̧borë.

Jechu judi ui uëmo̧i̧ tai̧rëremȩde chami̧rea̧mi̧dëri̧

⁴⁵ Ja̧dëa ji̧ Jechu judi yo̧rëremȩdejȩrȩ jibëa̧ jadü ji̧ri̧ tja oëräpȩ jätä charara̧. Jibëa̧ yaboi̧ jätä chjadüa̧dejȩrȩ Betaida quȩmȩ chiriräpȩmo̧ jënȩ pumȩ buba oa baä tänȩa̧ nö̧ta.

⁴⁶ Ado pumȩ ji̧ri̧ chjadü ëte ya̧mi̧räpȩ järëremȩde jibëa̧ Ama̧i̧ pio ju̧i̧ ni̧bäpea̧ oa.

⁴⁷ Ado charara̧ jäji̧ri̧ pio ji̧ri̧ gȩnȩpea̧dejȩrȩ tja tjoräpȩpea̧ji̧ri̧ oa. Jechu judi jabë chiriräpȩrä gȩnȩpea̧dejȩrȩ.

⁴⁸ Ado daea̧dejȩrȩ jibëa̧ jadü ji̧ri̧ tjätjäpë tai̧ji̧ri̧ oa, pjaepa dëbë jäji̧ri̧ oa. Ado ja̧dëa ji̧ jabë gȩnȩrä, dopapea̧ jabë querediädërä, Jechu judi järëremȩdejȩrȩ ui uëmo̧i̧ tai̧mȩrȩ. Jibëa̧ jadü pio ji̧ri̧ a̧dë chjätäparemȩdejȩrȩ,

⁴⁹ jabo daea̧diro̧jo̧ȩ. Ui uëmo̧i̧ tai̧mȩ oa daea̧diro̧jo̧ȩ. Ado pio ju̧i̧ daea̧ ji̧, 'tjana̧cjiavadi, tjo maearë jä jirodida' quëna̧ jo̧rȩtaji̧ri̧rȩ daea̧diro̧jo̧ȩ, a ama jäji̧ri̧rȩ.

⁵⁰ Pio ju̧i̧ daea̧ oaiä uapa tjamo̧ji̧ri̧pea̧dirȩ jibëa̧ chji̧ oa bücjüri̧ cjiaji̧ri̧rȩ. Jabo Jechu judi chjaodëri̧ yo̧a̧dejȩrȩ: —Bücjüri̧ cjiadëchji̧vä. Pio cüdërequede. Uapadëchji̧vä —yo̧a̧dejȩrȩ.

⁵¹ Ja̧dëa ji̧ bua̧de chararä. Ado chjaodëri̧ goepa mapea̧de pjaepa üdë. Ado pio ju̧i̧ daea̧ oaiä ana̧ri̧ jo̧rȩtaji̧ri̧pea̧dirȩ, ya yabë cjiaji̧ri̧rȩ.

⁵² Jabo judiro̧ chjadëri̧ jo̧rȩtatärea̧ ji̧, na̧e chiaji̧ri̧rȩ jo̧rȩtatärea̧ ji̧, 'Aja̧, jauëchjamȩdida, chjaodëri̧ jauëchja cjiari̧ japamȩdida' quëna̧ jo̧rȩtatärea̧ ji̧, ja̧di dari̧ jo̧rȩtadëa̧dirȩ. Jechu judi pumȩ buba oa ëba jurapea̧ ji̧ jauëchjari̧ cjiari̧ japea̧mȩ oa pea daea̧ji̧ri̧borë, jabechji̧ chjadëri̧ jo̧rȩtadëa̧dirȩ Jechu pio ju̧i̧ chjiari. Jabechji̧ jibëa̧ chji̧ üdë tuti carami̧ dari̧ cjiarëremȩde.

Jechu judi Genechareräpȩ gito ja̧boji̧ri̧ pio ji̧ri̧ chjaparȩrëremȩdejȩrȩ

⁵³ Tja oëräpȩ go̧düdäräji̧ri̧rȩ go̧düdärärëreji̧ri̧dirȩ Genechare quȩmȩ chiriräpȩ. Ado charari pio judiri biraji̧ri̧rȩ yurë cji̧deno̧a̧diro̧jo̧ȩ chara oa.

⁵⁴ Ado Jechu judi charari pio judiri jäa̧mȩ oa chjaodëri̧ daea̧diro̧jo̧ȩ pumȩ judiro̧. 'Aja̧, Jechu pio judidida' quëna̧ jo̧rȩtaji̧ri̧rȩ daea̧diro̧jo̧ȩ.

⁵⁵ Ado pio ju̧i̧iä oëra̧ti̧ oa jä cjieno̧rëreji̧ri̧dirȩ jibëa̧ chiri oa gito ja̧boji̧ri̧ pio ji̧ri̧ ara jäpea̧ oa Jechu pio ju̧i̧iäpȩ. 'Aja̧, pio ju̧ri̧pȩ jirodida' quëna̧ jo̧rȩtaji̧ri̧rȩ ara järëreji̧ri̧diro̧jȩrȩ bärera̧.

⁵⁶ Ado Jechu judi eami̧ chiriräpȩ jäa̧mi̧ nö̧ta, judi eami̧ bë ma̧ri̧räpȩ jäa̧mi̧ nö̧ta, jabechji̧ ara jäa̧ maeadiro̧jȩrȩ gito ja̧boji̧ri̧ ji̧ri̧ järea̧ no̧ro ju̧ri̧. Ado cjo̧dë chjaoa̧diro̧jo̧ȩ jibëa̧ chjibo oa ga̧re tarapea̧ ji̧. Ado ju̧i̧ ja̧ chjibo oa ga̧re taraji̧ri̧ pio judiro̧ ütëborë chjapea̧ oa cjo̧ro̧rëreji̧ri̧dirȩ.