Marcos 5 - Biblia Pume

Yaröca chiamȩ pio ju̧i̧ chjaparȩrëremȩdejȩ Jechu judi

¹ Ado Jechu judi jibëa̧ jadü pio ji̧ri̧ nö̧ta tja oëräpȩ go̧düdärärëreji̧ri̧dirȩ, Geracha quȩmȩ chiriräpȩ.

² Ado Jechu judi charari pio judiri birarä, pumȩ judi, yaröca chiamȩ pumȩ pio judi chjaodëri̧ dëbëdiäa̧dejȩrȩ. Jabechji̧ ta̧dë cjararäpȩ ju̧ri̧ cjo̧ro̧rëremȩde, ja̧boa̧ji̧ri̧ pio ji̧ri̧ idë a̧ra̧rea̧räpȩ.

³ Pumȩ judiro̧ pio jiro üi̧ oa boadärätämi̧ cjiaji̧ri̧rȩ yuratarëreji̧ri̧diro̧jo̧ȩ ca̧i̧ chjuara̧. Jabo cjäri̧ madiro̧jo̧ȩ, chatu chiamȩ chjipararira̧ yurataräbo, jabechji̧ boadärärea̧ dadëa̧diro̧jo̧ȩ.

⁴ Co ji̧ra̧ri̧ yuratarëreji̧ri̧diro̧jo̧ȩ ichi oa, tabo. Jabo cjäri̧ made, pio jiro üi̧ üdë ma̧i̧ da ju chia̧ oaiä chjaodëri̧ tutupechärëremȩdejȩ ca̧i̧ oa, chatu chiamȩ chjiparari ca̧i̧ pio ju̧i̧bo. Ado jibëa̧ ta oa cji̧däa̧ ji̧, chjiparari pjatëra̧, itura̧ cji̧däa̧ ji̧, peaja̧di chjaodëri̧ yarecheno̧rëremȩdejȩ pënȩi̧ mape bagari̧. Tjamo̧ davä. Boadärämi̧dëri̧ cjiarëremȩde. Nö̧tadë marëreji̧ri̧diro̧jo̧ȩ chjadëri̧ boadäräpea̧ ji̧.

⁵ Ado pio jiro üi̧ üdë goae tjamo̧dëri̧ cjo̧ro̧rëremȩde. Doro, gȩnȩräbo ji̧dë ma a a ma cjiariä chjätäti̧ cjiarëremȩde ma̧i̧ dari̧ ëna̧diämȩrȩ. Ya̧mi̧räpȩ ju̧ri̧ oëra̧ti̧ oa chjätäti̧ cjiarëremȩde ta̧dë cjara ji̧ra̧räpȩ yu̧a̧mȩrȩ, ja̧boa̧ji̧ri̧ pio ji̧ri̧ are a̧ra̧rea̧räpȩ pio ju̧ri̧. Jibëa̧ i pio ju̧i̧ ta̧dë gaipara̧ pio ju̧ri̧ra̧ coachämȩrȩ tai̧rëremȩde, i oa goe baäri̧.

⁶ Ado yaröca chiamȩ pio judi jabë jachi cjiamȩrȩ dadäräa̧dejȩ Jechu ju̧i̧. Ado pio ju̧i̧iäpȩ chjaodëri̧ jäeno̧rëremȩdejȩ goae tarari̧ baguramȩrȩ. Ado Jechu ja̧ dëbëräpȩ ju̧ri̧ ju chatura̧ cjiadärärëremȩde uapamȩrȩ.

^7-8 Ja̧dëa ji̧ Jechu judi yo̧a̧dejȩ yaröca pio ju̧i̧: —Yaröcarenȩ. Pumȩ ja̧ icjarari pio judiri go̧deno̧vä —yo̧a̧dejȩ. Jabo yaröca üdë pumȩ ja̧ yara̧ ju̧ri̧ra̧ goae tarari̧ ëna̧ quirati̧ cjiamȩrȩ dëbë yo̧a̧dejȩ: —Jechu. A̧dë chjäte Ütë pio ju̧i̧ ja̧ jojarenȩ. ¿Tjana̧pea̧ oa tja̧reparȩra̧pea̧rema̧coe? Ma̧i̧ dari̧ conȩdadëcoe. Jabechji̧ Ütë tjamo̧ ja̧ dachoro yo̧ë cji̧dätä earequedemȩ mȩnȩ pio coaiäpȩmo̧ ma̧i̧ dari̧ conȩdachea oa —yo̧mȩrȩ ira̧diä ni̧bärëremȩdejȩ Jechu ju̧i̧ yaröca judi.

⁹ Ja̧dëa ji̧ Jechu judi iëno̧ë ta̧rëa̧dejȩ: —¿Yö̧ta quȩmȩrenȩ mȩnȩ? Ado yaröca üdë dëbë yo̧a̧dejȩ: —Yö̧ta quȩmȩdërequede, Buba quȩmȩrequede, a̧ro̧rȩ a̧dë chjäte ji̧ra̧ tara.

¹⁰ Ado yaröca üdë ji̧dë ma cjo̧dëtarëremȩdejȩ Jechu ju̧i̧iä jibë ado cja̧rȩmo̧ chiriräpȩmo̧ chjadüchea oa.

¹¹ Ado pio ju̧ri̧pȩ jachidëräpȩ, aboea no̧i̧dë tjamo̧rȩ gua gua jurarëreji̧ri̧dirȩ ya̧mi̧räpȩ ju̧ri̧.

¹² Ado yaröca judiro̧ cjo̧dëtaji̧ri̧rȩ yo̧a̧diro̧jo̧ȩ Jechu ju̧i̧: —Danȩ, chjadëri̧ chjadüibe aboea pio ji̧ri̧iäpȩmo̧. Pio ji̧ri̧ ano̧ mire ira̧diä cjaeätäreji̧ri̧rea̧ro̧jȩrȩ —yo̧a̧diro̧jo̧ȩ.

¹³ Ado Jechu judi yaröca pio ji̧ri̧ tänȩa̧ oaiä, a̧dë baärëreji̧ri̧diro̧jo̧ȩ pumȩ ju̧i̧ aboea pio ji̧ri̧ ano̧ mire ira̧diä cjaeäpea̧ oa. Pio ju̧i̧iä aboea chjö̧na̧i̧rȩ cjarari̧ cjiaji̧ri̧pea̧dirȩ. Ado goae tarari̧ baguraji̧ri̧rȩ bira̧dirȩ ya̧mi̧ri judiri. Ado ya̧mi̧ curë uë tjamo̧ri pio judiri cjatäji̧ri̧rȩ choa choa ja̧borëreji̧ri̧dirȩ tjaräpȩ. No̧i̧dë tjamo̧rȩ, 2000rë, chjö̧na̧i̧rȩ jemu̧i̧ ja̧boa̧ maeadirȩ, cja̧rȩmȩrȩ cjiadiädëri̧.

¹⁴ Ado pio ju̧i̧ daea̧ oaiä aboea jidareji̧ri̧ pio judiro̧ chjaodëri̧ bagureno̧a̧dirȩ pumȩ ji̧ri̧iäpȩmo̧ ma̧ȩ yürepea̧ oa. Chiriräpȩ cjo̧ro̧ji̧ri̧ oa, bë ma̧ri̧räpȩ cjo̧ro̧ji̧ri̧ oa ma̧ȩ yürepea̧ oa bagureno̧a̧dirȩ. Ado pumȩ judiro̧ ta̧rëa̧ oaiä, jäeno̧a̧dirȩ irä dapea̧ oa.

¹⁵ Ado Jechu pio ju̧i̧iäpȩ go̧düdäräa̧rä, daea̧diro̧jo̧ȩ pumȩ oa, yaröca buba oa chiaremȩ pio ju̧i̧. Chjadëri̧ chamȩ oa, ina̧mȩpea̧mȩ oa, chjadëri̧ jo̧rȩtamȩpea̧mȩ oa daea̧diro̧jo̧ȩ. Ado ana̧ri̧ jo̧rȩtaji̧ri̧rȩ daea̧diro̧jo̧ȩ jibëa̧ ya oa yabë cjiaji̧ri̧rȩ.

¹⁶ Ado ja̧dëa ji̧ irä dareji̧ri̧ pio ji̧ri̧iä ta̧rëji̧ri̧pea̧dirȩ pumȩ judiro̧. Yaröca buba oa chiaremȩ pio ju̧i̧ chjiari, aboea pio ju̧i̧ chjiari ta̧rëji̧ri̧pea̧dirȩ chjö̧na̧i̧ oa.

¹⁷ Ado ju̧ri̧pȩ cjo̧ro̧ji̧ri̧ judiro̧ pio jiro ma̧ȩ oa ta̧rëa̧ oaiä, jabechji̧ cjo̧dëtaji̧ri̧pea̧diro̧jo̧ȩ Jechu ju̧i̧ judi jibëa̧ chiriri pio judiri a̧dë baätä.

¹⁸ Pio ju̧i̧ ta̧rëa̧ oaiä, Jechu judi järëremȩdejȩ uimo̧mȩ chara oa buapea̧ oa. Ado buatamȩ oa, cjo̧dëtarëremȩdejȩ yaröca chiaremȩ üdë, ja̧di ta̧rëri̧ yo̧mȩrȩ: —Danȩ, pio mȩa nö̧ta tjamo̧ri̧ baätämi̧ cjiarequede —yo̧a̧dejȩ.

¹⁹ Jabo Jechu judi pio jȩa nö̧ta baä tänȩdëa̧dejȩ, jabo yo̧a̧dejȩ: —Danȩ, ado chjereno̧ baävä na̧ bëräpȩ, na̧ pumȩiäpȩ. Ado ni̧bä chjaojȩrȩ. Jabechji̧ Ano̧mȩ judi pio mȩa chjiari ana̧ri̧ tuti japea̧ pio ju̧i̧ chjiari ni̧bä chjaojȩrȩ. Judi pio mȩa cjäri̧ri̧ cjia daea̧ pio ju̧i̧ chjiari ni̧bä chjaojȩrȩ —yo̧mȩrȩ yo̧a̧dejȩ Jechu judi.

²⁰ Pio ju̧i̧iä yaröca chiaremȩ pio judi baärëremȩde Decapori quȩmȩräpȩ. Ado Jechu judi pio jȩa chjiari tuti japea̧ pio ju̧i̧ chjiari ni̧bä chjaorëremȩdejȩrȩ jibëa̧ pumȩ ji̧ri̧. Ado pumȩ judiro̧ pio ju̧i̧ ta̧rëa̧ oaiä, ana̧ri̧ jo̧rȩtaji̧ri̧pea̧dirȩ. '¿Yö̧ta dari̧ a̧doa̧cjivadiji̧' quëna̧ jo̧rȩtaji̧ri̧rȩ ana̧ri̧ jo̧rȩtaji̧ri̧pea̧dirȩ.

Nö̧ri nö̧ripë tara cjiayi̧ pio ji̧ chjaparȩ ëte, Jechu judi bëdü tänȩrëremȩdejȩ Jairo ja̧ jabi pio ji̧

²¹ Ado Jechu judi ado chereno̧ järëremȩde Garirea tja oëräpȩ, jënȩ jana̧rea̧ durimo̧i̧. Ado tja yuroräpȩ cjiamȩ oa tjoro tänȩrëreji̧ri̧diro̧jo̧ȩ pumȩ no̧i̧dërë.

²² Ado judiorë a̧doparea̧ bëräpȩ tjamo̧ yo̧mȩ pio judi, Jairo quȩmȩ pio judi peaja̧di pio ju̧ri̧pȩ go̧düdärärëremȩde. Ado judi Jechu pio ju̧i̧ daea̧ ji̧, ju chatura̧ cjiadäräa̧de pio ju̧i̧ ja̧ dëbëräpȩ.

²³ Ado cjo̧dëtamȩrȩ yo̧a̧dejȩ: —Danȩ, ca̧ jabi boi̧chji̧ jini̧ gito ja̧bo tjamo̧nȩ. Ja̧bopea̧ ji̧ querediänȩ. Cjäri̧ri̧ cjia dacoe. Chjadëri̧ jätä earequedemȩ. Jabechji̧ na̧ ichira̧ pio ju̧ri̧ra̧ ga̧re taratä earequedemȩ ca̧ jabi pio jini̧ ja̧bochea oa, cjatäcjiarea̧ dapea̧ oa —yo̧mȩrȩ yo̧rëremȩdejȩ Jechu ju̧i̧.

²⁴ Ado Jechu judi pio ju̧i̧ ta̧rëa̧ oaiä ëba järëremȩdejȩ. Ado pumȩ no̧i̧dë tjamo̧rȩ peaja̧di ëba jäa̧diro̧jo̧ȩ. Ado tjoromȩ oa gi̧de ariä järëreji̧ri̧diro̧jo̧ȩ Jechu ju̧i̧.

²⁵ Ado peaja̧di ëba järëreyi̧nȩjȩ iei̧ jini̧, gito ja̧boyi̧ pio jini̧. Ado pio jini̧ nö̧ri nö̧ripë tara cjiayi̧rȩ cjo̧ro̧rëreyi̧nȩ 12 ui nö̧ta.

²⁶ Ado tjamo̧ri̧ chjapea̧ oa cjiatämi̧ cjiayi̧rȩ jä chjaotarëreyi̧nȩ chjaparȩji̧ri̧ pio ji̧ri̧räpȩ, jabo cjäri̧ madiro̧jȩ, a̧dodëa̧diro̧jȩ. Jini̧ cjatäcjiarea̧ datärea̧ ji̧ ji̧dë u̧i̧ tarayi̧pea̧nȩ. Ado jibëa̧ chëreremȩ üdë, jabechji̧ jiro decjiapea̧de. Chjaparȩji̧ri̧ pio judiro̧ a̧dotea̧ ba oa yürüa̧ oaiä, jabechji̧ goarijäa̧dejȩ chëre üdë.

²⁷ Ado pio jiro iei̧ pio jini̧ Jechu pio ju̧i̧ chjiari goë ta̧rëa̧ oaiä, jabechji̧ cho̧rë järëreyi̧nȩjȩ. Ado pio ju̧i̧ ja̧ duri oa jäyi̧rȩ goadi ga̧re tara̧nȩjȩ ju̧i̧ ja̧ chjibo oa.

²⁸ 'Jaeboquëda, pio ju̧i̧ ja̧ chjibo oa ga̧re tararea̧ darä judi chjaodëri̧ chjapatäreyi̧quëda' quëna̧ jo̧rȩtayi̧rȩ ga̧re tara̧nȩjȩ.

²⁹ Ado goe baäri̧ cjo̧ro̧rërea̧ ji̧, chjaodëri̧ chjapea̧nȩ. Ado jini̧, 'Aja̧, pio jiro gito oa japamitë ana̧ri̧ tararërea̧ ji̧, bucho ana̧ chjapea̧ oa cjiaquëda yaba̧, ca̧ icjara üdë chjadëpea̧dida' quëna̧ jo̧rȩtayi̧pea̧nȩ.

³⁰ Ado Jechu judi pumȩ buba chjarerä jämȩrȩ tararëremȩde. 'Ä, jauëchja üdë ca̧ icjarari pio judiri pea go̧düa̧dida' quëna̧ jo̧rȩtamȩrȩ tararëremȩde iei̧ jini̧ chjapea̧ oaiä. Pio ju̧i̧iä chjaodëri̧ mȩmȩrȩpe cjiadiämȩrȩ iëno̧ë ta̧rëa̧dejȩrȩ pumȩ buba oa: —¿Chjiade ca̧ chjibo oa ga̧re tararemȩ judi?

³¹ Ado ju̧i̧ ja̧ jadü judiro̧ yo̧a̧diro̧jo̧ȩ: —Danȩ, pumȩ buba chjarerärene. Jabechji̧ gi̧de ae chjaoriä jä maeadiro̧mȩ. "¿Chjiade ca̧ chjibo oa ga̧re taramȩ judi?" iëno̧ë ta̧rërea̧mi̧dëde.

³² Jabo Jechu judi cjiadiädëmȩrȩ, oëra̧ti̧ oa mire damȩrȩ dae cjiarëremȩdejȩrȩ pumȩ ji̧ri̧ jibëa̧ chjibo oa mitëa̧mȩ pio ju̧i̧ dapea̧ oa.

³³ Ado iei̧ jini̧, 'Chjapea̧ oa cjiaquëda' quëna̧ jo̧rȩtayi̧ pio jini̧ jäa̧nȩjȩ Jechu pio ju̧i̧iäpȩ. Ado ju̧i̧ ja̧ dëbëräpȩ ju chatura̧ cjiadäräa̧nȩ. I ma̧na̧gura cjiayi̧rȩ, uapayi̧rȩ ju chatura̧ cjiadäräa̧nȩ. Ado ütëbo oa yo̧a̧nȩjȩ Jechu ju̧i̧. Jënȩ ana̧ri̧ tara̧ pio ju̧i̧ chjiari, jënȩ ju̧i̧ ja̧ chjibo oa ga̧re tara̧ pio ju̧i̧ chjiari yo̧a̧nȩjȩ goadirea̧ decjiari̧.

³⁴ Ado Jechu judi pio ji̧ ta̧rëa̧ oaiä, dëbë yo̧a̧dejȩ: —Damȩ ca̧ jabi, mȩnȩ quëna̧yi̧ tara, jabechji̧ chjapea̧ oa cjiamȩ. Ado yaba̧ jabechji̧, ma̧ chiadëri̧ cjiayi̧rȩ baävä. Chjapea̧ oa cjiayi̧rȩ baäje —yo̧a̧dejȩ.

³⁵ Ado Jechu judi iei̧ pio ji̧ ni̧bäa̧ nö̧ta go̧düdärärëreji̧ri̧dirȩ pumȩ judiro̧. Judiorë a̧doparea̧ bëräpȩ tjamo̧ yo̧mȩ pio ju̧i̧ ja̧ bëri pio judiri go̧düdäräa̧dirȩ ma̧ȩ yürüpea̧ oa. Ado yo̧a̧diro̧jo̧ȩ Jairo ju̧i̧: —Danȩ, na̧ jabi jini̧ ja̧boa̧nȩ. Jiro decjianȩ yaba̧. Pio ju̧i̧iä ji̧dë ma tja̧reparȩdëtäremȩrenȩjo̧ȩ A̧ra̧ano̧mȩ ju̧i̧ —yo̧a̧diro̧jo̧ȩ Jechu ju̧i̧.

³⁶ Jabo Jechu judi ta̧rë ja̧bodëa̧dejȩrȩ. Jabechji̧ yo̧a̧dejȩ tjamo̧ yo̧mȩ ju̧i̧: —Danȩ, bücjüri̧ cjiadëvä. Jabomo̧ quëna̧vä —yo̧a̧dejȩ.

³⁷ Ado Jechu judi ütëbo oa jä tänȩtärea̧ ji̧, jabechji̧ o ji̧ri̧mo̧i̧ jä tänȩrëremȩdejȩrȩ. Pedro pio ju̧i̧ jä tänȩa̧dejȩ, Santiago pio ju̧i̧bo. Ado Santiago ja̧ omȩ oa peaja̧di jä tänȩa̧dejȩ Juan pio ju̧i̧.

³⁸ Ado judiro̧ tjamo̧ yo̧mȩ pio ju̧i̧ ja̧ bëräpȩ go̧düdäräa̧rä, Jechu judi ma̧i̧ dari̧ gürë eari̧ cjiaji̧ri̧ oa darëremȩdejȩrȩ pumȩ buba oa. Ëcarami̧ dari̧ jo̧rȩtaji̧ri̧rȩ ejaro cjiaji̧ri̧ oa, ëna̧dië ëna̧dië ejaro cjiaji̧ri̧ oa ta̧rëa̧diro̧jȩrȩ.

³⁹ Ado Jairo ja̧ bëräpȩ yu̧a̧mȩrȩ iëno̧ë ta̧rëa̧dejȩrȩ Jechu judi: —¿Jabo tjana̧pea̧ oa gürë eari̧ cjiarenȩrȩ? ¿Tjana̧ ju̧i̧iä ejaro cjia maeanȩrȩ mȩnȩro̧? Danȩrȩ, iei̧ boi̧chji̧ jini̧ tjamo̧ri̧ ja̧bodëa̧nȩ jabomo̧ mo̧a̧ cjianȩ —yo̧a̧dejȩrȩ.

⁴⁰ Jabo pumȩ judiro̧ pio ju̧i̧ ta̧rëa̧ oaiä airi̧ cjiapea̧diro̧jo̧ȩ. Pio ju̧i̧iä Jechu judi ütëbo oa go̧dü tänȩa̧dejȩrȩ bëri pio judiri. Ado ja̧di dari̧ japa ëte, jäja pio ju̧i̧, arayi̧ pio ji̧bo ëba jämȩrȩ ëba jäa̧dejȩrȩ, jibëa̧ jadü tjarari̧bo oa. Pio ji̧ri̧mo̧i̧ ëba jämȩrȩ ëba jäa̧dejȩrȩ iei̧ boi̧chji̧rȩ a̧rȩmȩ jo̧ tjoräpȩ ju̧ri̧.

⁴¹ Ado Jechu judi ja̧boa̧yi̧ pio ji̧ ja̧ ichi oa mitëmȩrȩ yo̧a̧dejȩ jibëa̧ ni̧bärea̧ ma̧ȩra̧: —Tarita cumi̧ —yo̧a̧dejȩ. Ado pio jiro ma̧ȩ üdë, "Iei̧ boi̧chji̧ cjitëvä yo̧cama̧" yo̧rea̧ ma̧ȩde.

⁴² Ado Jechu judi pio jiro ma̧ȩ oa yo̧a̧ ji̧, chjaodëri̧ cjiteno̧a̧nȩ iei̧ boi̧chji̧ jini̧. Ado tai̧yi̧pea̧nȩ. Ado pio jiro iei̧ boi̧chji̧ pio jini̧ 12 ui goarëreyi̧nȩ. Ado pumȩ judiro̧ pio ji̧ irä daea̧ oaiä ana̧ri̧ jo̧rȩtaji̧ri̧pea̧dirȩ, ya yabë cjiaji̧ri̧rȩ.

⁴³ Jabo Jechu judi to̧bari̧ yo̧rëremȩdejȩrȩ o ji̧ri̧iäpȩmo̧ yo̧chea oa. Ado pio ju̧i̧ uëri jurarea̧ oa yürütä yo̧a̧dejȩrȩ pea bëdüa̧yi̧ pio ji̧iäpȩmo̧.