Marcos 4 - Biblia Pume

Na̧rȩrea̧ ma̧ȩmi̧ dara̧ a̧ra̧ano̧rëremȩdejȩrȩ cho quiba chidemȩ pio ju̧i̧ chjiari

¹ Ado Jechu judi, Garirea tja yuroräpȩmȩrȩ ado taruparëremȩde a̧ra̧ano̧pea̧ ji̧. Ado pumȩ no̧i̧dë tjamo̧rȩ chjaodëri̧ go̧düdärä chjaorëreji̧ri̧dirȩ, Jechu pio ju̧i̧ tjoro tänȩji̧ri̧rȩ. Pio ju̧i̧iä Jechu judi buarëremȩdejȩ uirä pjurëmȩ chara oa ano̧ mire chapea̧ oa. Ado chararä chamȩrȩ a̧ra̧ano̧rëremȩdejȩrȩ pumȩ ji̧ri̧, tja yuroropȩ a̧dopë cjiaji̧ri̧ oa.

² Na̧rȩrea̧ ma̧ȩmi̧ dara̧ pio ju̧ri̧ra̧ a̧ra̧ano̧a̧dejȩrȩ ma̧ȩ ji̧ra̧ra̧, ja̧di ta̧rëri̧ yo̧mȩrȩ:

³ —Ta̧rëchji̧coe. Pumȩ judi jibëa̧ tjadoräpȩ järëremȩde cho oa quiba chedepea̧ oa.

⁴ Ado cho oa quiba chedemȩrȩ aeno̧a̧dejȩ daburäpȩmo̧. Ado cho üdë, orëmo̧rȩ cjatäa̧de pumȩrȩ järea̧ no̧ro, dabu chjuaräpȩ. Ado pua üdë chjaodëri̧ jurera̧pea̧dejȩ.

⁵ Ado cho üdë, orë cjatäa̧de ta̧dë chiamȩ daburäpȩ, dabu ji̧ra̧ri̧ chiadëräpȩ. Ado dabu ji̧ra̧dë oaiä, jabomo̧ uëmo̧i̧ a̧rȩa̧ oaiä chjaodëri̧ buiua̧de cho üdë.

⁶ Jabo tacö̧ üdë urëdi tacö̧tärea̧ ji̧ tacö̧rea̧ dadëa̧de. Pio ju̧i̧iä chjaodëri̧ gapea̧de toi̧ üdë cjüëtüri̧ mo̧ë oaiä.

⁷ Ado cho üdë, orë cjatäa̧de o̧ chiamȩ cärä maräpȩ. Buiua̧de, jabo jurarea̧ oa chjadëri̧ chiatärea̧ ji̧, chiadëa̧de o̧ cärä üdë ma̧i̧ dari̧ boa̧ oaiä.

⁸ Jabo orë cjatäa̧de dabu chjadëräpȩ. Ado buiu ëte gägäari̧ cjitëa̧de. Ado cho chiamȩpea̧de. Orë 30 cho chiamȩpea̧de cja̧rȩmȩ chorëremȩrȩ. Ado orë 60 cho chiamȩpea̧de cja̧rȩmȩ chorëremȩrȩ. Ado orë 100 cho chiamȩpea̧de cja̧rȩmȩ chorëremȩrȩ. Ja̧di dari̧ chiamȩpea̧de dabu chjadëräpȩ cjitëa̧ oaiä —yo̧mȩrȩ a̧ra̧ano̧rëremȩdejȩrȩ Jechu judi na̧rȩrea̧ ma̧ȩmi̧ dara̧ pio ju̧ri̧ra̧.

⁹ Ado ji̧dë u̧i̧ yo̧mȩrȩ a̧de yo̧a̧dejȩrȩ Jechu judi: —Danȩrȩ, mȩnȩro̧ ta̧ra̧ puë chiami̧ dari̧ cjo̧ro̧rä judi, jabechji̧ chjadëri̧ acji cjaeä ta̧rëchji̧vä —yo̧rëremȩdejȩrȩ.

¿Tjana̧pea̧ oa na̧rȩrea̧ ma̧ȩmi̧ dara̧ a̧ra̧ano̧rëremȩde Jechu judi?

¹⁰ Jechu judi pumȩ ji̧ri̧ ni̧bäa̧ duri oa a̧dë baärëremȩdejȩrȩ. Ado ja̧dëa ji̧ jibëa̧ma̧i̧diäa̧mȩ oa Jechurë chjadüa̧ judiro̧, 12rë, ado pio ju̧i̧ cho̧rë jäji̧ri̧ pio judiro̧borë iëno̧ë ta̧rëa̧diro̧jo̧ȩ: —Danȩ, ¿tjana̧ yo̧rea̧de? Mȩnȩ pio yabo a̧ra̧ano̧a̧ üdë, na̧rȩrea̧ ma̧ȩmi̧ dara̧ a̧ra̧ano̧a̧ üdë ¿tjana̧ yo̧rea̧de? —iëno̧ë ta̧rëa̧diro̧jo̧ȩ.

¹¹ Ado Jechu judi dëbë yo̧mȩrȩ yo̧a̧dejȩrȩ: —Danȩrȩ, pio yoa ma̧ȩ oa pio dibëiäpȩmo̧ ma dabarea̧ yürüa̧didibe Ütë tjamo̧ judi. Aja̧, goadia̧ oa cjiarëremȩ ma̧ȩ pio ju̧i̧ pio dibëiäpȩmo̧ ma dabarea̧ yürüa̧didibe. Tjamo̧ davä. Jënȩ ütarë jo̧rȩta̧ pio ju̧i̧ chjiari, jënȩ yo̧a̧ chja̧oerä cjo̧ro̧pea̧ pio ju̧i̧ chjiari pio dibëiäpȩmo̧ ma dabarea̧ yürüa̧didibe, o ji̧ri̧iäpȩmo̧dë. Ja̧di tara na̧rȩrea̧ ma̧ȩmi̧ da maeara̧ a̧ra̧ano̧requedejȩrȩ o ji̧ri̧.

¹² Ado cüdë ja̧di dari̧ ni̧bä chjaoa̧ oaiä, jabechji̧ Ütërë ea jana̧ chjadüa̧ oa ni̧bämȩ pio judi no̧mȩ tjamo̧ri ja̧ ni̧bärërea̧mi̧ cjiadiäpadirȩ pumȩ judiro̧. Ta̧rëchji̧vä: “Jabechji̧ cüdë japea̧ pio ju̧i̧ irä dae chjaoji̧ri̧borë tjamo̧ri̧ dabaparea̧ dadëdirȩ. Ado cüdë a̧ra̧ano̧a̧ ma̧ȩ oa irä ta̧rë chjaoji̧ri̧borë peaja̧di acji cjaeä ta̧rërea̧ dadëdirȩ. Jabo judiro̧ ja̧dimi̧ dari̧ cjiadërä judi, dëdë, ano̧ mire jo̧rȩtatäreji̧ri̧dirȩ chjaodëri̧ duridëparȩa̧ oa cjiapea̧ oa." Aja̧, ja̧di ta̧rëri̧ yo̧mȩrȩ yo̧rëremȩdejȩrȩ Jechu judi jibëa̧ jadü ji̧ri̧.

Jechu judi daba tänȩrëremȩdejȩrȩ cho quiba chidemȩ pio ju̧i̧ chjiari

¹³ Ja̧dëa ji̧ Jechu judi iëno̧ë ta̧rëa̧dejȩrȩ jibëa̧ jadü ji̧ri̧: "Danȩrȩ, cho quiba chedemȩ pio ju̧i̧ chjiari ma̧ȩ oa ¿bapë ta̧rëdëa̧nȩrȩ? Ado jiro na̧rȩrea̧ ma̧ȩmi̧ da oa bapë ta̧rëdëa̧rä judi, ¿yö̧ta dari̧ bapë ta̧rëpanȩrȩ cüdë ji̧dë duri oa ado cja̧rȩmo̧ na̧rȩrea̧ ma̧ȩmi̧ dara̧ a̧ra̧ano̧rä judi?

¹⁴ Danȩrȩ, cho oa quiba chedemȩ judi Ütë tjamo̧ ja̧ ma̧ȩ oa a̧ra̧ano̧mȩmi̧ dade. Ado cho üdë Ütë tjamo̧ ja̧ ma̧ȩmi̧ dade.

¹⁵ Ado pumȩrȩ järea̧ no̧ro dabu chjua üdë, jabechji̧ pumȩ chji̧mi̧ dade. Ado jiro pumȩ judiro̧, dabu chjuami̧ da chji̧ chiaji̧ri̧ pio judiro̧ Ütë tjamo̧ ja̧ ma̧ȩ oa ta̧rërä, jibëa̧ chji̧rä buiumi̧ dari̧ cjiatärea̧ ji̧, jabechji̧ buiudë made. Jabechji̧ Ichiae judi chjaodëri̧ acji go̧düdäräa̧ oaiä, Ütë tjamo̧ ja̧ ma̧ȩ oa baë mitë ëte baë goa baämi̧ dari̧ japea̧ oaiä buiudë made" yo̧mȩrȩ yo̧rëremȩdejȩrȩ Jechu judi.

¹⁶ Ado ji̧dë u̧i̧ yo̧mȩrȩ a̧de yo̧a̧dejȩrȩ: —Ado ta̧dë chiamȩ dabu üdë peaja̧di pumȩ chji̧mi̧ dade. Ado pio jiro pumȩ judiro̧, ta̧dë chiamȩ dabumi̧ da chji̧ chiaji̧ri̧ pio judiro̧ Ütë tjamo̧ ja̧ ma̧ȩ oa ta̧rërä, ma̧ chiadëri̧ cjiaji̧ri̧rȩ ta̧rëdiro̧jo̧ȩ.

¹⁷ Jabo Ütë tjamo̧ ja̧ ma̧ȩ üdë jibëa̧ chji̧rä tacö̧ urëdi oa chiami̧ dari̧ cjiadëa̧ oaiä, jabechji̧ japamitë boi̧chji̧ maea oa jo̧rȩtadiro̧jo̧ȩ. Ja̧dëa ji̧ judiro̧ eami̧ chjai̧dë oa chjätärä judi, eami̧ pumȩrȩ pio jibëiäpȩmo̧ conȩda̧rä judi, judiro̧ Ütë tjamo̧ ja̧ ma̧ȩ oa quëna̧ji̧ri̧pea̧ oaiä conȩda̧rä judi, cjäri̧ madirȩ, chjaodëri̧ putu jura̧ a̧dë chaji̧ri̧mi̧ dari̧ japadiro̧jo̧ȩ Ütë tjamo̧ ja̧ ma̧ȩ oa. Aja̧, ja̧di dari̧ japadirȩ —yo̧a̧dejȩrȩ.

¹⁸ Ado ji̧dë u̧i̧ yo̧mȩrȩ, a̧de ni̧bä chjaorëremȩdejȩrȩ ja̧di ta̧rëri̧ yo̧mȩrȩ: —Ado o̧ cärä chiamȩ dabu üdë peaja̧di pumȩ chji̧mi̧ dade. Ado pio jiro pumȩ judiro̧, o̧ cärä chiamȩ dabumi̧ da chji̧ chiaji̧ri̧ judiro̧ Ütë tjamo̧ ja̧ ma̧ȩ oa ta̧rërä,

¹⁹ ba chia pio ju̧i̧mo̧i̧ jo̧rȩtatärea̧ ji̧, jabechji̧ badëra̧ pio ju̧ri̧ra̧ boë cjaeämi̧ dari̧ jo̧rȩtadiro̧jo̧ȩ. Jabechji̧ judiro̧ pio yoa chirirä cjo̧ro̧pea̧ pio ju̧i̧ chjiari ana̧ri̧ jo̧rȩta̧ oaiä, judiro̧ bücjüri̧ cjia tjamo̧ji̧ri̧rȩ cjo̧ro̧a̧ oaiä, judiro̧ chëre ji̧ra̧ tjamo̧ oa boapea̧ pio ju̧i̧ ana̧ri̧ jo̧rȩte chjaoa̧ oaiä, jabechji̧ tuti chami̧ dari̧ japadejȩrȩ jibëa̧ chji̧ oa. Pio ju̧i̧iä a̧dë jo̧rȩtadiro̧jo̧ȩ Ütë tjamo̧ ja̧ ma̧ȩ oa. Pio jiro ma̧ȩ üdë jibëa̧ chji̧rä chjadëri̧ chatärea̧ ji̧, cjäri̧ made, tuti chami̧ dari̧ chade cho ji̧ra̧ tjamo̧ oa chiatärea̧ ji̧ —yo̧a̧dejȩrȩ.

²⁰ Ado Jechu judi ji̧dë u̧i̧ yo̧mȩrȩ dabu chjadë pio ju̧i̧ chjiari a̧de ni̧bä chjaorëremȩdejȩrȩ: —Ado dabu chjadë üdë, peaja̧di pumȩ chji̧mi̧ dade. Ado pio jiro pumȩ judiro̧, dabu chjadëmi̧ da chji̧ chiaji̧ri̧ pio judiro̧ Ütë tjamo̧ ja̧ ma̧ȩ oa ta̧rërä, jabechji̧ bapë ta̧rëdiro̧jo̧ȩ. Quëna̧diro̧jo̧ȩ. Ado ütëchjai̧pe jämi̧ dari̧ cjo̧ro̧dirȩ. Cho ji̧ra̧ tjamo̧pe järea̧mi̧ dari̧ na̧rȩriä cjo̧ro̧dirȩ. O judiro̧ jabëtari̧mi̧ chiami̧ dari̧ na̧rȩdirȩ. Ado o judiro̧ ji̧dë u̧i̧ chiaji̧ri̧mi̧ dari̧ na̧rȩdirȩ. Ado o judiro̧ ji̧ra̧ tjamo̧ oa chiaji̧ri̧mi̧ dari̧ na̧rȩdirȩ —yo̧mȩrȩ daba tänȩrëremȩdejȩrȩ Jechu judi cho quiba chidemȩ pio ju̧i̧ chjiari.

Tataparea̧ pio ju̧i̧ chjiari na̧rȩrea̧ ma̧ȩmi̧ dara̧ ni̧bärëremȩdejȩrȩ Jechu judi

²¹ Ja̧dëa ji̧ Jechu judi iëno̧ë ta̧rëa̧dejȩrȩ: —Danȩrȩ, mȩnȩro̧ tataparea̧ pio ju̧i̧ go̧dü tänȩ ëte cjitëparȩrä judi, ¿tjana̧ japapea̧de? ¿Canari ana̧ra̧ pio ju̧ri̧ra̧ ina̧pea̧de? Charea̧ ëterä mu̧i̧ idäpea̧de? Cjäri̧ made, ja̧di dari̧ japarea̧mi̧dëde. Jabechji̧ uëräpȩ gatë cji̧däpea̧de ütëborë chjadëri̧ darea̧mi̧ dari̧.

²² Danȩrȩ, goadia̧ oa cjia̧ üdë japamitë chjätä ëte, jabechji̧ chjadë maearä cjiami̧ dari̧ cjiapade. Ado goadi yo̧a̧ üdë, ütara̧ doro ütëborë ta̧rërea̧mi̧ dari̧ cjiadiäpade.

²³ Mȩnȩro̧ ta̧ra̧ puë chiaji̧ri̧mi̧ dari̧ cjo̧ro̧rä judi jabechji̧ chjadëri̧ acji cjaeä ta̧rëchji̧vä —yo̧a̧dejȩrȩ.

²⁴ Ado Jechu judi ji̧dë u̧i̧ yo̧mȩrȩ a̧de yo̧a̧dejȩrȩ: —Danȩrȩ, mȩnȩro̧ pio coaiä ta̧rëa̧ pio ju̧i̧ urëdi chari̧ jo̧rȩtachji̧vä dibëa̧ chji̧ra̧. Chjadëri̧ ta̧rëdiächji̧jo̧ȩ. Jabechji̧ mȩnȩro̧ ca̧ ma̧ȩ oa ta̧rëdiäji̧ri̧rȩ cjo̧ro̧rä judi, jabechji̧ ji̧dë u̧i̧ a̧de goaji̧ri̧mi̧ dari̧ dabape jäpanȩrȩ.

²⁵ Jabechji̧ ta̧rëdiämȩ pio judi, jënȩ dabapea̧ pio ju̧i̧ ta̧rëdiämȩ pio judi, jabechji̧ ji̧dë u̧i̧ a̧de goamȩmi̧ dari̧ dabape jäpade, ji̧ra̧ tjamo̧ oa a̧de dabapadärärea̧mi̧ dari̧. Jabo pumȩ judi, jënȩ dabapea̧ pio ju̧i̧ ta̧rëdiädëmȩ pio judi, ji̧dë u̧i̧ a̧de goamȩmi̧ dari̧ dabapatärea̧ ji̧ ja̧di dari̧ dabaparea̧ dadëpade, jabo jënȩ dabapatarërea̧ pio judi goarijäa̧ oa cjiapade ji̧dëri̧ —yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.

Buiu baämȩ cho pio ju̧i̧ chjiari yo̧rëremȩdejȩrȩ Jechu judi

²⁶ Ado Jechu judi ji̧dë u̧i̧ yo̧mȩrȩ ni̧bä chjaoa̧dejȩrȩ: —Danȩrȩ, Ütë tjamo̧rȩ yo̧a̧ chja̧oerä cjo̧ro̧pea̧ üdë ja̧dimi̧ dari̧ cjiade. Danȩrȩ, tjado ana̧mȩ judi cho oa quiba chidede jibëa̧ tjadoräpȩ.

²⁷ Ado cho üdë japamitë chjätä ëte, jabechji̧ buiu baäde. Tjado ana̧mȩ judi doro ja̧bepea̧ nö̧ta, gȩnȩrä mo̧a̧ nö̧ta, jabechji̧ cjitëde choremȩ üdë. Ado tjado ana̧mȩ üdë, 'Aja̧, ja̧di dari̧ buiudida, cho üdë ja̧di dari̧ cjitëdida' quëna̧ dabarea̧ decjiari̧ cjitëde to üdë.

²⁸ Jabechji̧ dabu pio oaiä buiude. Dabu pio oaiä pjö̧da chiari̧ cjitëde to boi̧chji̧ üdë. Ado japamitë chjätä ëte cho pio ju̧i̧ chiapade.

²⁹ Ado ja̧dëa ji̧ joechjapea̧rä, jurarea̧ oa mitërea̧mi̧ dapea̧rä, jabechji̧ tjado ana̧mȩ pio judi mitëpadejȩ cho ji̧ra̧ tjamo̧ oa. Ado danȩrȩ, peaja̧dimi̧ dari̧ cjiade Ütërë yo̧a̧ chja̧oerä cjo̧ro̧pea̧ üdë —yo̧mȩrȩ yo̧rëremȩdejȩrȩ Jechu judi.

Motacha quȩmȩ cho pio ju̧i̧ chjiari na̧rȩrea̧ ma̧ȩmi̧ dara̧ a̧ra̧ano̧rëremȩdejȩrȩ Jechu judi

³⁰ Ado Jechu judi ado ni̧bä chjaorëremȩdejȩrȩ pumȩ buba pio ji̧ri̧iäpȩmo̧, ja̧di ta̧rëri̧ yo̧mȩrȩ: —Danȩrȩ, Ütërë yo̧a̧ chja̧oerä cjo̧ro̧pea̧ japamitë üdë ¿tjana̧mi̧ dade? ¿Tjana̧ na̧rȩrea̧ ma̧ȩmi̧ dara̧ ni̧bä chjaotäremȩrequededibe pio ju̧i̧ chjiari?

³¹ Tjana̧ na̧rȩrea̧ ma̧ȩmi̧ dara̧dë, jabechji̧ motacha quȩmȩ cho pio ju̧i̧ chjiari na̧rȩrea̧ ma̧ȩmi̧ dara̧ ni̧bä chjaotäremȩrequededibe. Danȩrȩ, Ütërë yo̧a̧ chja̧oerä cjo̧ro̧pea̧ japamitë üdë motacha chomi̧ dade.

³² Tjamo̧ davä. Eami̧rȩ pio jiro cho boi̧chji̧ oa ponȩrä, buiude. Jabo boi̧chji̧remȩrȩ cjitë ëte ana̧ tjamo̧pe jäde. Tjamo̧ davä. Eami̧ to pio ju̧i̧iä, tjadoro cjo̧ro̧mȩ jurarea̧ to pio ju̧i̧iä ji̧dë u̧i̧ ana̧pe bagade. Ado to üdë a̧na̧pea̧rä, jabechji̧ puarë to chja̧oerä chjadëri̧ joëparea̧ dadirȩ. Ado danȩrȩ, peaja̧dimi̧ dari̧ cjiade Ütërë yo̧a̧ chja̧oerä cjo̧ro̧pea̧ üdë —yo̧a̧dejȩrȩ.

³³ Ja̧di dari̧ yo̧mȩrȩ a̧ra̧ano̧rëremȩdejȩrȩ pumȩ ji̧ri̧ Jechu judi pio jiro na̧rȩrea̧ ma̧ȩmi̧ dara̧ pio ju̧ri̧ra̧. Aja̧, pumȩ judiro̧ nö̧tarä yuro a̧ra̧ano̧rëremȩdejȩrȩ.

³⁴ Danȩrȩ, Jechu judi pumȩ buba oa a̧ra̧ano̧a̧mi̧ nö̧ta, jabechji̧ na̧rȩrea̧ ma̧ȩmi̧ dari̧ a̧ra̧ano̧ marëremȩdejȩrȩ. Jabo jibëa̧ jadü maea oa a̧ra̧ano̧a̧rä, jabechji̧ chjö̧na̧i̧ oa dabapa tänȩmȩrȩ a̧ra̧ano̧rëremȩdejȩrȩ, na̧rȩrea̧ ma̧ȩmi̧ dara̧ a̧ra̧ano̧dëmȩrȩ.

Ma̧i̧ dari̧ pupuripamȩ pio ju̧i̧ tuti japea̧dejȩ Jechu judi

³⁵ Ado ji̧dë duri oa dorë pea bira̧rä, Jechu judi yo̧a̧dejȩrȩ jibëa̧ jadü ji̧ri̧: —Danȩrȩ, tja oëräpȩ chjätätärȩ.

³⁶ Ado Jechu judi chamȩ chararä buaji̧ri̧rȩ a̧dë järëreji̧ri̧diro̧jȩrȩ pumȩ buba oa tja oëräpȩ jäpea̧ oa. Ado o judiro̧ jibëa̧ charara̧ peaja̧di ëba jäa̧diro̧jȩrȩ.

³⁷ Ado chjaodëri̧ pupuripamȩpea̧dejȩrȩ goae tarari̧. Ado gö̧ma̧ üdë ma̧i̧ dari̧ acji ma̧na̧ oaiä, ui üdë aechja̧de aechja̧de baäa̧ oaiä, jabechji̧ chara tjoräpȩmo̧ ui mapea̧de chjaodëri̧. Ado pio ju̧i̧iä tarupea̧de chami̧pea̧ ji̧.

³⁸ Ado Jechu judi, jabechji̧ chara apëräpȩ ju̧ri̧ tjae a̧rȩ mo̧a̧rëremȩde. Ado jibëa̧ jadü judiro̧ jäeno̧a̧diro̧jo̧ȩ na̧rȩno̧pea̧ oa. Ado yo̧a̧diro̧jo̧ȩ: —Danȩ A̧ra̧ano̧mȩ, ¿bücjüri̧ cjiadënȩ pio ibë chjiari? Chjaodëri̧ chami̧pai̧ darea̧rȩ. Jemu̧i̧ ja̧bopai̧ darea̧rȩ —yo̧a̧diro̧jo̧ȩ.

³⁹ Ado ju̧i̧ ta̧rëa̧ oaiä Jechu judi cjitërëremȩde. Ado tuti yo̧mȩrȩ ya̧mȩmi̧ ta̧rëri̧ ni̧bäa̧dejȩ ma̧i̧ dari̧ pupuripamȩ ju̧i̧, gö̧ma̧ pio ju̧i̧: —Pjaepadë cjiavä. Janäpadë cjiavä —yo̧a̧dejȩ. Ado chjaodëri̧ chjadëpea̧de. Goepapea̧de.

⁴⁰ Ja̧dëa ji̧ Jechu judi iëno̧ë ta̧rëa̧dejȩrȩ jibëa̧ jadü ji̧ri̧: —¿Jabo tjana̧ ju̧i̧iä uapaji̧ri̧pea̧nȩrȩ? ¿Mȩnȩro̧ pio coaiäpȩmo̧ jabë tjamo̧ri̧ quëna̧dërenȩro̧coe? —iëno̧ë ta̧rëa̧dejȩrȩ. Jabo cjäri̧ madiro̧jo̧ȩ, dëbë yo̧dëa̧diro̧jo̧ȩ.

⁴¹ Jabechji̧ ana̧ri̧ jo̧rȩtaji̧ri̧rȩ uapaji̧ri̧pe bagarëreji̧ri̧dirȩ jënȩro̧ pea daea̧ pio ju̧i̧iä. Ado jibëa̧ dëbëti̧ra̧ chia yo̧ji̧ri̧pea̧dirȩ, ja̧di ta̧rëri̧ yo̧ji̧ri̧rȩ: —¿Chjia tjamo̧de pio yodë üi̧ üdë? ¿Tjana̧ pumȩde? Jabechji̧ pumȩ chjami̧ dadëde. Jabechji̧ judi eami̧ oa yo̧ro ta̧rë japa maeadiro̧jo̧ȩ. Aja̧, pumȩ pio judiro̧mo̧rȩdë, jabo pjaepamȩ pio judiborë ta̧rë ja̧bomi̧ dari̧ japadejȩ, gö̧ma̧borë —yo̧rëreji̧ri̧dirȩ jibëa̧ dëbëti̧ra̧ chia, ana̧ tjamo̧ri̧ jo̧rȩtaji̧ri̧rȩ.