Marcos 3 - Biblia Pume

Jechu judi chjaparȩrëremȩdejȩ ichi chjadëdëmȩ ju̧i̧

¹ Ado Jechu judi ado jämȩrȩ yu̧a̧rëremȩde judiorë a̧doparea̧ bëräpȩ. Ado pumȩ üdë, ichi chjerea̧mȩ pio judi peaja̧di a̧doparëremȩde.

² Ado peaja̧di a̧doparëreji̧ri̧dirȩ Jechu pio ju̧i̧iäpȩmo̧ aechide yo̧tämi̧ cjiaji̧ri̧ judiro̧. Ado judiro̧ a̧dë darea̧ decjiari̧ ütarë dae chjaorëreji̧ri̧diro̧jo̧ȩ Jechu ju̧i̧. 'Aja̧, ¿yö̧ta dari̧ japapadida, jabechji̧ järätä chjaparea̧ dorobo chjaparȩpai̧ dadiji̧da, ado ja̧di dari̧ japarä judi pio ju̧i̧iäpȩmo̧ aechide yo̧paa̧ro̧ju̧i̧da' quëna̧ jo̧rȩtaji̧ri̧rȩ ütarë dae chjaorëreji̧ri̧diro̧jo̧ȩ.

³ Ado Jechu judi yo̧a̧dejȩ ichi chjerea̧mȩ pio ju̧i̧iäpȩmo̧: —Danȩ, cjitëno̧vä. Ado jauëräpȩmo̧ jana̧vä pumȩ ja̧ dëbëräpȩ —yo̧a̧dejȩ.

⁴ Ado ichi chjerea̧mȩ judi pumȩ ja̧ dëbëräpȩ cjitë ëte, Jechu judi yo̧a̧dejȩrȩ pio jȩa dae chjaoji̧ri̧ ji̧ri̧: —Danȩrȩ, chjadëri̧ yo̧chji̧coe. Moicherë go̧ȩparërea̧ ma̧ȩ üdë, ¿yö̧ta yo̧diibe? Järätä chjaparea̧ doro, ¿yö̧ta dari̧ japapea̧de? ¿Chjai̧dëri̧ japapea̧de jabo chjadëri̧ japapea̧de? ¿Pumȩ ju̧i̧ ja̧bo tänȩpea̧, jabo pumȩ ju̧i̧ chjaparȩpea̧? ¿Yö̧ta dari̧ japapea̧? Chjadëri̧ yo̧chji̧coe —yo̧a̧dejȩrȩ. Jabo judiro̧ chjadëri̧ dëbë yo̧tärea̧ ji̧, cjapi maearë cjiadiärëreji̧ri̧dirȩ.

⁵ Ado Jechu judi jiro pumȩ ji̧ri̧iäpȩmo̧ oëra̧ti̧ oa gatë damȩrȩ ërecjiapea̧dejȩrȩ. Peaja̧di gitori̧ jo̧rȩtamȩrȩ daea̧dejȩrȩ judiro̧ chjuari̧ jiada̧ oaiä. Ja̧dëa ji̧ Jechu judi yo̧a̧dejȩ ichi chjadëdëmȩ ju̧i̧: —Ichi chjia oa tobovä. Ado judi ichi chjia oa toboa̧ oaiä, chjaodëri̧ chjapea̧de.

⁶ Jabo pjaricheo judiro̧ pio ju̧i̧ daea̧ oaiä chjaodëri̧ go̧deno̧a̧dirȩ a̧doparea̧ bëri judiri. Ado Erode quȩmȩ ütë pio ju̧i̧ eaji̧ri̧ pio ji̧ri̧ nö̧ta chjaodëri̧ a̧dopeno̧a̧dirȩ. Aja̧, Jechu pio ju̧i̧ ja̧bo tänȩpea̧ ji̧ ni̧bä chjaopea̧ oa a̧dopeno̧rëreji̧ri̧dirȩ.

Jechu judi chjaparȩrëremȩdejȩrȩ pumȩ ji̧ra̧ oa

⁷ Jechu judi, jibëa̧ jadüborë järëreji̧ri̧dirȩ Garirea tja yuroräpȩ. Ado pumȩ no̧i̧dë tjamo̧rȩ cho̧rë järëreji̧ri̧diro̧jo̧ȩ. Aja̧, Judea chiriri ado Garirea chiriri pio judiri cho̧rë jäa̧diro̧jo̧ȩ.

⁸ Jabechji̧ Jechu judi pumȩ ji̧ri̧ chjaparȩa̧ pio ju̧i̧ chjiari goë goë ta̧rëa̧ oaiä, cho̧rë järëreji̧ri̧diro̧jo̧ȩ. Ado Jerucharȩ bë ma̧ri̧ri judiri, ado Idumea chiriri judiri peaja̧di cho̧rë jäa̧diro̧jo̧ȩ. Ado bea Joroda̧ dorë cjitëmȩräpȩmo̧ a̧rȩmȩ chiriri pio judiri peaja̧di cho̧rë jäa̧diro̧jo̧ȩ. Ado Tiro quȩmȩ bë ma̧ri̧ri, ado Chido̧ quȩmȩ bë ma̧ri̧ri judiri peaja̧di cho̧rë jäa̧diro̧jo̧ȩ.

⁹ Ado pumȩ no̧i̧dë tjamo̧rȩ pio jȩaiäpȩmo̧ acji jana̧ oaiä, jabechji̧ jabërä yo̧rëremȩdejȩrȩ jibëa̧ jadü ji̧ri̧ uimo̧mȩ chara oa jätä. Jabechji̧ judi charari pio judiri a̧ra̧ano̧pea̧ oa, pumȩ bubarë pio jȩa gi̧de achea oa chara oa jätä yo̧a̧dejȩrȩ.

¹⁰ Ado Jechu judi pumȩ no̧i̧dë tjamo̧ oa chjaparȩa̧ oaiä, jabechji̧ gito ja̧boji̧ri̧ pio judiro̧ tjamo̧ri̧ ga̧re taratämi̧ cjiarëreji̧ri̧diro̧jo̧ȩ. Pio ju̧i̧iä ji̧dë ma cjacjarë yu̧a̧ji̧ri̧rȩ gi̧de ariärëreji̧ri̧dirȩ Jechu pio ju̧i̧iäpȩ jäpea̧ ji̧.

¹¹ Ado ira̧diä cjaeäji̧ri̧ judiro̧ Jechu pio ju̧i̧ daea̧ ji̧, pio ju̧i̧ ja̧ dëbëräpȩ daburo a̧rȩdärärëreji̧ri̧dirȩ. Ma̧i̧ dari̧ ëna̧ quirati̧ cjiaji̧ri̧rȩ a̧rȩdäräa̧dirȩ ja̧di ta̧rëri̧ yo̧ji̧ri̧rȩ: —Danȩ, Ütë tjamo̧ pio ju̧i̧ ja̧ Ja tjamo̧renȩ mȩnȩ —yo̧ji̧ri̧rȩ ma̧i̧ dari̧ ëna̧diäa̧dirȩ.

¹² Jabo Jechu judi to̧bari̧ yo̧rëremȩdejȩrȩ pio jȩa chjiari yo̧dëtä, pumȩ ji̧ri̧ pio jȩa chjiari daba tänȩdëtä.

Jechu judi 12 pumȩ oa mitërëremȩdejȩrȩ jënȩ chjadüpea̧ pio ji̧ri̧

¹³ Ji̧dë duri oa Jechu judi järëremȩde ya̧mi̧räpȩ. Ado jënȩ ea̧mi̧ yabërëremȩdejȩrȩ oari ji̧ri̧ pio jȩaiäpȩ jätä. Ado pio ju̧i̧iä jäa̧diro̧jo̧ȩ.

¹⁴ Ado ütëborë a̧dopea̧ oa cjiarä, Jechu judi mitërëremȩdejȩrȩ 12 oa, pio jȩa nö̧ta ëba cjiapea̧ oa. 'Coa iräji̧ri̧diro̧da, cüdë chjadüpea̧diro̧da, Ütë tjamo̧ ja̧ ma̧ȩ oa a̧ra̧ano̧pea̧ oa chjadüpaquiji̧ri̧da,

¹⁵ ado yaröca chiaji̧ri̧ pio ji̧ri̧ a̧dorea̧ yürüpaquiji̧ri̧da, ira̧diä cjaeäji̧ri̧ pio ji̧ri̧ baä tänȩrea̧ yürüpaquiji̧ri̧da' quëna̧ jo̧rȩtamȩrȩ darëremȩdejȩrȩ.

¹⁶ Ado Jechu judi mitëa̧ oari judiro̧, ja̧di quȩji̧ri̧dirȩ: Cja̧rȩmȩrȩ Chimo̧ quȩmȩde. Jabo Jechu judi a̧de quȩparëremȩdejȩ Pedro quȩra̧.

¹⁷ Ado cja̧rȩmo̧rȩ Santiago quȩmȩde. Ado ju̧i̧ ja̧ omȩ üdë Juan quȩmȩde. Chebedeo quȩmȩ pio ju̧i̧ ja̧ u̧ri̧dirȩ. Ado Jechu judi pio ji̧ri̧ a̧de quȩparëremȩdejȩrȩ “dörö eamȩmi̧ dadirȩ” yo̧mȩ quȩra̧ pio ju̧ri̧ra̧.

¹⁸ Ado cja̧rȩmo̧rȩ A̧däre quȩmȩde. Ado Felipe quȩmȩ oa peaja̧di mitërëremȩdejȩ, Batoromȩ quȩmȩ pio ju̧i̧bo. Ado Mateo quȩmȩ oa, Tomas quȩmȩ oa peaja̧di mitërëremȩdejȩrȩ. Ado Santiago quȩmȩ oa, Apjeo quȩmȩ pio ju̧i̧ ja̧ joja pio ju̧i̧bo mitërëremȩdejȩ. Ado Tadeo quȩmȩ oa peaja̧di mitërëremȩdejȩ. Ado Chimo̧ quȩmȩ pio ju̧i̧bo mitëa̧dejȩ. Domano ji̧ri̧ ea tjamo̧dëmȩ pio ju̧i̧, domano̧ ji̧ri̧ ea tjamo̧dërëreji̧ri̧ pio ji̧ri̧ nö̧ta ëba tai̧rëremȩ pio ju̧i̧bo mitërëremȩdejȩ Chimo̧ pio ju̧i̧.

¹⁹ Ado cjiadiämȩ oa, Juda Iscariote quȩmȩ pio ju̧i̧bo mitërëremȩdejȩ. Jechu ju̧i̧ eacji̧ quëna̧ japamȩ pio ju̧i̧, Jechu ju̧i̧ ja̧bo tänȩpaji̧ri̧ pio ji̧ri̧ a̧dopamȩ pio ju̧i̧bo mitërëremȩdejȩ. Aja̧, ja̧di quȩji̧ri̧dirȩ Jechu judi mitërërea̧ pumȩ judiro̧.

Teracabari̧ aechide yo̧rëreji̧ri̧diro̧jo̧ȩ Jechu ju̧i̧iäpȩmo̧

²⁰ Ado ja̧dëa ji̧ Jechu judi baärëremȩde jibëa̧ jadü pio ji̧ri̧ nö̧ta. Ado judiro̧ jura chatärea̧ ji̧, jura charea̧ dadëa̧dirȩ pumȩ no̧i̧dërë jana̧na̧ra̧ jana̧na̧ra̧ cjia̧ oaiä. Jamȩpai̧ dari̧ cjia tjamo̧rëreji̧ri̧dirȩ.

²¹ Ado Jechu ju̧i̧di ja̧ji̧ri̧ pio judiro̧, ado jȩa arayi̧ pio jini̧borë goëdepea̧diro̧jo̧ȩ Jechu ju̧i̧. Jabechji̧ judiro̧ ma̧ȩ ta̧rëa̧ oaiä, "Aja̧, pumȩ buba oaiä jurarea̧ dadëde" yo̧a̧ oa ta̧rëa̧ oaiä, "Cjarari̧ cjiape bagami̧ dari̧ cjiade" yo̧a̧ oa ta̧rëa̧ oaiä, jabechji̧ bücjüri̧ cjiaji̧ri̧rȩ goëdepea̧diro̧jo̧ȩ pio ju̧i̧ chjadëri̧ ëba baäpea̧ oa.

²² Ado pio jiro japamitërä, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, Jerucharȩ quȩmȩ bë ma̧ri̧ri judiri jana̧ji̧ri̧rȩ peaja̧di go̧düdärärëreji̧ri̧dirȩ Jechu pio ju̧i̧iäpȩ. Ado aechide yo̧rëreji̧ri̧diro̧jo̧ȩ ja̧di ta̧rëri̧ yo̧ji̧ri̧rȩ: "Jabo cjäri̧ made, Jechu judi ira̧diäa̧ oa cjiade. Bechebu quȩmȩ ütë pio ju̧i̧iä, yaröca pio ju̧i̧ ja̧ ütë pio ju̧i̧iä ira̧diä cjaeäa̧ oa cjiade" yo̧a̧dirȩ. "Ado pio jiro ütë judi japarea̧ yürüa̧rämo̧ yaröca pio ji̧ri̧ baä tänȩrea̧ dadejȩrȩ Jechu judi. Tjamo̧ davä, Bechebu judi jibëa̧ jauëchja oa yürüa̧rämo̧ baä tänȩrea̧ dadejȩrȩ yaröca pio ji̧ri̧, pumȩ ja̧ icjararä bëparërea̧ ji̧." Aja̧, ja̧di ta̧rëri̧ yo̧ji̧ri̧rȩ ma̧i̧ dari̧ aene ni̧bärëreji̧ri̧diro̧jo̧ȩ Jechu pio ju̧i̧iäpȩmo̧.

²³ Ado Jechu judi pio jȩaiäpȩmo̧ aechide yo̧a̧ji̧ri̧ pio ji̧ri̧ ta̧rëmȩrȩ yo̧a̧dejȩrȩ pio jȩaiäpȩ jana̧tä. Ado pio jȩaiäpȩ jana̧ji̧ri̧ oa ni̧bä chjaorëremȩdejȩrȩ na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaomȩrȩ: —Danȩrȩ, Ichiae judi jibëa̧ yaröca pio ji̧ri̧ baä tänȩdë madejȩrȩ. Jabechji̧ jibëa̧ jadüdirȩ. Jibëa̧ pumȩdirȩ. Ado pio ju̧i̧ ja̧ oa ja̧bepadirȩ. Baä tänȩrea̧mi̧dëdejȩrȩ. Jabechji̧ jibëa̧ pio ju̧i̧ dëbëpe chjaorea̧mi̧dëdejȩrȩ.

²⁴ Ado danȩrȩ, eami̧ chiriräpȩ cjo̧ro̧ji̧ri̧ pio judiro̧, cja̧rȩmȩ bubarä cjo̧ro̧ji̧ri̧ pio judiro̧ chjadëri̧ ëba cjo̧ro̧dërä judi, jabo ji̧dë ma goëdëri̧ cjia jo̧rȩtarä judi, judiro̧ jadüchiami̧ bubami̧ dari̧ cjiadiärä judi, cjäri̧ madirȩ, chjarapë baämi̧ dari̧ cjo̧ro̧padirȩ cja̧rȩmȩ bubarä cjo̧ro̧rërea̧ ji̧ —yo̧a̧dejȩrȩ—.

²⁵ Ado peaja̧di maeade pumȩ ja̧ bëräpȩ cjo̧ro̧ji̧ri̧ pio ji̧ri̧iä. Jabechji̧ judiro̧ jibëa̧ dëbëti̧ra̧ chia dëbëpe chjaomi̧ dari̧ japarä judi, jadüchiami̧ bubami̧ dari̧ cjo̧ro̧ji̧ri̧pea̧rä judi, peaja̧di chjaodëri̧ chjuchjupechäpai̧ dadirȩ davä pumȩ decjiape bagari̧.

²⁶ Ado Ichiae judi jibëa̧ mu̧i̧tjoi̧ pio ji̧ri̧ dëbëpe chjaorä judi, judiro̧ yo̧a̧ri̧ bubami̧ dari̧ cjiarä judi, jibëa̧ dëbëti̧ra̧ chia dëbëpe chjaorä judi, jabechji̧ dae järi̧ ja̧beparea̧mi̧dëdirȩ. Ado Ichiae ja̧ chja̧oerä cjo̧ro̧rea̧ üdë jabechji̧ yuropatäremȩde. Jabechji̧ jibëa̧ma̧i̧ ja̧beparea̧mi̧dëde. Jibëa̧ mu̧i̧tjoi̧ goadëmȩrȩ ja̧beparea̧mi̧dëde —yo̧mȩrȩ ni̧bä chjaorëremȩdejȩrȩ Jechu judi.

²⁷ Ado Jechu judi Ichiae pio ju̧i̧ chjiari ji̧dë u̧i̧ yo̧mȩrȩ ado cja̧rȩmo̧ na̧rȩrea̧ ma̧ȩmi̧ dara̧ ni̧bäa̧dejȩrȩ: —Danȩrȩ, garümȩ üdë ju chiamȩ tjamo̧mȩ pio ju̧i̧iä garütämi̧ cjiarä judi, jabechji̧ jabërä boadäräpea̧ chiadejȩ. Jabechji̧ jibëa̧ bëräpȩ acji yu̧a̧ ëte tabüpea̧ chiadejȩ bë ana̧mȩ pio ju̧i̧ eami̧ oa dëbëpe chjaochea. Ja̧di dari̧ japea̧rämo̧ chjö̧na̧i̧ oa baë goa baäpai̧ dadejȩ ju chiamȩ ja̧remȩ pio ju̧i̧ —yo̧a̧dejȩrȩ.

²⁸ Ado ja̧dëa ji̧ pio yoa ma̧ȩra̧ ade ni̧bä chjaorëremȩdejȩrȩ: —Danȩrȩ, pumȩ judiro̧ Ütë tjamo̧ ju̧i̧iäpȩmo̧ eami̧ti̧ chjai̧dë oa japarä judi, judiro̧ eami̧ti̧ chjai̧dë oa pio ju̧i̧iäpȩmo̧ ni̧bärä judi, jabechji̧ Ütë tjamo̧ judi duridëparȩpai̧ dadejȩrȩ, judiro̧ ano̧mirȩ jo̧rȩtamȩpea̧rä judi.

²⁹ Jabo eami̧ pumȩ üdë Tjo tjamo̧ pio ju̧i̧iäpȩmo̧ chjai̧dëri̧ ni̧bärä judi, jabechji̧ duridëparȩdëpadejȩ Ütë tjamo̧ judi. Jabechji̧ Tjo tjamo̧ pio ju̧i̧iäpȩmo̧ chjai̧dëri̧ ni̧bäa̧ üdë bucho ana̧ duridëparȩdërea̧de —yo̧a̧dejȩrȩ.

³⁰ Aja̧, ja̧di ta̧rëri̧ yo̧mȩrȩ yo̧rëremȩde Jechu judi pumȩ judiro̧ ma̧i̧ dari̧ yo̧a̧ pio ju̧i̧iä. Jabechji̧ Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧ yo̧a̧ oaiä, "Aja̧, Jechu judi Ichiae pio ju̧i̧ chiade, yaröca pio ju̧i̧ chiade' yo̧a̧ pio oaiä, jabechji̧ Jechu pio ju̧i̧ tjamo̧ri̧ A̧domȩ pio ju̧i̧ chjiari̧ chjai̧dëri̧ ni̧bärëreji̧ri̧dirȩ, Tjo tjamo̧ pio ju̧i̧ chjiari. Ado pio ju̧i̧iä ja̧di ta̧rëri̧ yo̧mȩrȩ dëbë yo̧rëremȩdejȩrȩ Jechu judi.

Jechu judi ni̧bärëremȩde jibëa̧ pumȩ tjamo̧ pio ji̧ri̧ chjiari

³¹ Ja̧dëa ji̧ Jechu ju̧i̧ arayi̧ pio jini̧ go̧düdärärëreyi̧nȩ Jechu ja̧ ayima̧i̧ pio ji̧ri̧ nö̧ta. Ado judiro̧ jo̧ dairäpȩ cjiaji̧ri̧rȩ ma̧ȩ yürürëreji̧ri̧diro̧jo̧ȩ go̧dütä.

³² Ado Jechu ja̧ yuroropȩ chaji̧ri̧ pumȩ pio judiro̧ yo̧a̧diro̧jo̧ȩ: —Danȩ, na̧ pumȩ judiro̧ goëdaera̧pea̧diro̧mȩ. Na̧ ai̧ jini̧, na̧ pumȩborë jana̧dirȩ. Dairäpȩdirȩ. Go̧dütä yo̧diro̧mȩ —yo̧a̧diro̧jo̧ȩ.

³³ Jabo Jechu judi dëbë yo̧a̧dejȩrȩ: —Danȩrȩ, ¿chjianȩ ca̧ ai̧ jini̧? ¿Chjiadirȩ ca̧ pumȩ judiro̧?

³⁴ Ja̧dëa ji̧ jibëa̧ yuroro chaji̧ri̧ pio ji̧ri̧ gatë damȩrȩ yo̧a̧dejȩrȩ: —Danȩrȩ, pio yinȩ ca̧ ai̧ jini̧. Ca̧ pumȩ judiro̧ pio yidirȩ.

³⁵ Eami̧ pumȩrȩ Ütë tjamo̧ ja̧ ma̧ȩrä cjo̧ro̧mȩ pio judi, jabechji̧ ca̧ pumȩde. Tjamo̧ davä. Ütë tjamo̧ ju̧i̧ ta̧rëdiäyi̧ pio jini̧ ca̧ ai̧nȩ. Ütë tjamo̧ ja̧ ma̧ȩ oa japayi̧ pio jini̧ ca̧ ayi̧ca̧i̧nȩ. Ütë tjamo̧ ja̧ ma̧ȩrä cjo̧ro̧ji̧ri̧ pio judiro̧dirȩ ca̧ pumȩ judiro̧ —yo̧mȩrȩ yo̧rëremȩdejȩrȩ Jechu judi jibȩa̧ pumȩ tjamo̧ pio ji̧ri̧ chjiari.