Marcos 15 - Biblia Pume

Pirato judi, domano ütë pio judi iëno̧ë ta̧rëtea̧dejȩ Jechu ju̧i̧

¹ Peadai̧ tjamo̧ro tjamo̧ ütarë yo̧ji̧ri̧ judio pio judiro̧ jëreeaji̧ri̧rȩ a̧doparëreji̧ri̧dirȩ Jechu pio ju̧i̧ chjiari ni̧bä chjaopea̧ oa. Aja̧, tjamo̧ goë tuti ja̧bepaji̧ri̧ pio judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, ado judio ütëti̧ pio judiro̧borë, tjamo̧ ütaraji̧ri̧ ütëborë a̧dopeno̧rëreji̧ri̧dirȩ Jechu pio ju̧i̧ chjiari ni̧bä chjaopea̧ oa. Ado a̧dopeno̧a̧ ëte, Jechu pio ju̧i̧ tabü ëte ëba järëreji̧ri̧diro̧jo̧ȩ Pirato pio ju̧i̧iäpȩ, domano tjamo̧ cjo̧ro̧mȩ pio ju̧i̧iäpȩ. Ado yürüa̧diro̧jo̧ȩ pio ju̧i̧iäpȩmo̧.

² Ja̧dëa ji̧ Pirato judi iëno̧ë ta̧rëa̧dejȩ: —Danȩ, ¿judio pio ji̧ri̧ ja̧ ütëdënȩ? —iëno̧ë ta̧rëa̧dejȩ. Ado Jechu judi dëbë yo̧a̧dejȩ: —Dëdë, mȩnȩ pio coa chjiari yo̧a̧ pio judirequede.

³ Ado tjamo̧ goë tuti ja̧bepaji̧ri̧ pio judiro̧ Jechu pio ju̧i̧iäpȩmo̧ ana̧ri̧ aechide yo̧ chjaorëreji̧ri̧diro̧jo̧ȩ Pirato ja̧ dëbëräpȩ.

⁴ Pio ju̧i̧ ta̧rëa̧ ju̧i̧iä Pirato judi ado iëno̧ë ta̧rëtea̧dejȩ Jechu ju̧i̧: —Danȩ, judiro̧ pio mȩaiäpȩmo̧ ana̧ri̧ aechide yo̧a̧ pio ju̧i̧ ¿ta̧rëdënȩ? Ma̧i̧ dari̧ yo̧dirȩ pio mȩa chjiari. Judiro̧ yo̧a̧ pio ju̧i̧ chjiari ¿dëbë yo̧dëri̧ cjiarenȩque? —iëno̧ë ta̧rëtea̧dejȩ.

⁵ Jabo Jechu judi, jabechji̧ cjapiri̧ cjiadiäa̧de. Dëbë yo̧dëa̧dejȩ Pirato ju̧i̧. Ado pio ju̧i̧iä Pirato judi ana̧ri̧ jo̧rȩtamȩpea̧de, ya yabë cjiamȩrȩ.

Ja̧bo tänȩpea̧ oa yürürëremȩdejȩ Jechu ju̧i̧ Pirato judi

⁶ Ado judio judiro̧ ui nö̧ta uëmo̧i̧ a̧dë chjätärea̧ do chjätäpea̧ doro, Pirato judi cja̧rȩmȩ pumȩ oa go̧dü tänȩrëremȩdejȩ chaärea̧ jo̧räpȩ cjo̧ro̧rëremȩ oa. Aja̧, judio judiro̧ pio jȩaiä cjo̧dëa̧mi̧ go̧dü tänȩrëremȩdejȩ cja̧rȩmȩ oa, jënȩ ji̧dë ma japariärërea̧mi̧.

⁷ Ado pio jiro japamitërä, Baraba quȩmȩ pio judi chaäa̧ oa cjo̧ro̧rëremȩde jibëa̧ jadü pio ji̧ri̧ nö̧ta. Jabechji̧ judiro̧ domano pio ji̧ri̧ dëbëpe chjaoa̧ oaiä, domano pio ji̧ri̧ ja̧bo tänȩa̧ oaiä, jabechji̧ chaäa̧ oa cjo̧ro̧rëreji̧ri̧dirȩ.

⁸ Ado judio judiro̧ bubarë järëreji̧ri̧dirȩ Pirato pio ju̧i̧iä cjo̧dëpea̧ oa, jënȩro̧ ui nö̧ta cjo̧dëriärërea̧mi̧. Cja̧rȩmȩ oa, chaäa̧ oa cjo̧ro̧mȩ pio ju̧i̧ cjo̧dëpea̧ oa jäa̧dirȩ.

^9-10 Jabo Pirato judi, tjamo̧ goë tuti ja̧bepaji̧ri̧ pio ji̧ri̧ chjiari na̧e chiarëremȩde. 'Aja̧, Jechu pio ju̧i̧ quëbaji̧ri̧rȩ jo̧rȩtadiro̧da, tjamo̧ goë tuti ja̧bepaji̧ri̧ pio judiro̧ quëbaji̧ri̧rȩ jo̧rȩtadiro̧ju̧i̧da, pumȩ bubarë Jechu pio ju̧i̧ ea tjamo̧ tara, quëbaji̧ri̧rȩ jo̧rȩtadiro̧ju̧i̧da, ado pio ju̧i̧iä ja̧bo tänȩtämi̧ cjiadiro̧ju̧i̧da' quëna̧ jo̧rȩtarëremȩde. Pio ju̧i̧iä judio bubarë pio jȩaiäpȩ a̧dopea̧ ji̧, jabechji̧ Jechu pio ju̧i̧ chjiari iëno̧ë ta̧rëa̧dejȩrȩ ja̧di ta̧rëri̧ yo̧mȩrȩ: —Danȩrȩ, ¿Jechu pio ju̧i̧, judio ja̧ ütë pio ju̧i̧ go̧dü tänȩtä eadërenȩro̧coe? —iëno̧ë ta̧rëa̧dejȩrȩ Pirato judi.

¹¹ Jabo judio ja̧ ütëti̧ pio judiro̧ jabërä järi tjamo̧rëreji̧ri̧dirȩ pumȩ pio ji̧ri̧ ano̧ mire jo̧rȩta tänȩpea̧ ji̧, Baraba pio ju̧i̧mo̧i̧ jo̧rȩtaji̧ri̧rȩ cjo̧dëpea̧ ji̧. “Aja̧, pio ju̧i̧mo̧i̧ cjo̧dëpea̧de Pirato ju̧i̧iä, jabo Jechu pio ju̧i̧ ja̧bo tänȩpea̧de” yo̧ji̧ri̧rȩ bape chjao ni̧bärëreji̧ri̧diro̧jȩrȩ pumȩ ji̧ri̧.

¹² Ja̧di tara Pirato judi iëno̧ë ta̧rëa̧dejȩrȩ: —Jabo ja̧dirä judi, ¿tjana̧ japatä earenȩro̧coe Jechu pio ju̧i̧? Danȩrȩ, mȩnȩro̧ pearä pio ju̧i̧ chjiari yo̧a̧ ji̧, jabechji̧ "Jechu judi judio ja̧ ütëde" yo̧rëreji̧ri̧nȩrȩ. Ja̧di tara iëno̧ë ta̧rëquededibe. Danȩrȩ, ¿tjana̧ japatäremȩrecone Jechu pio ju̧i̧? —iëno̧ë ta̧rëa̧dejȩrȩ.

¹³ Ado goae tarari̧ ëna̧diäji̧ri̧rȩ dëbë yo̧ chjaoa̧diro̧jo̧ȩ: —Toro cji̧de ja̧bo tänȩjo̧ȩ —dëbë yo̧ji̧ri̧rȩ ëna̧diäa̧diro̧jo̧ȩ.

¹⁴ Jabo Pirato judi dëbë yo̧a̧dejȩrȩ: —Jabo cjäri̧ made, toro ja̧bo tänȩrea̧mi̧dëde. Danȩrȩ, chjadëri̧ yo̧chji̧coe. ¿Tjana̧ chjai̧dë oa japea̧de? —iëno̧ë ta̧rëtea̧dejȩrȩ Pirato judi. Jabo pumȩ judiro̧ ta̧rë ja̧bodëa̧diro̧jo̧ȩ. Jabechji̧ ji̧dë u̧i̧ goae tarari̧ ëna̧diäji̧ri̧rȩ yo̧ chjaoa̧diro̧jo̧ȩ: —Toro cji̧de ja̧bo tänȩjo̧ȩ! —ëna̧diäa̧diro̧jo̧ȩ.

¹⁵ Ado Pirato judi pumȩ bubarë pio jȩaiäpȩmo̧ ba chia datä ea tjamo̧ tara, jabechji̧ go̧dü tänȩrëremȩdejȩ Baraba pio ju̧i̧, jënȩro̧ cjo̧dëa̧mi̧. Jabo Jechu pio ju̧i̧ goae tarari̧ bide cjaeä tänȩrëremȩdejȩrȩ guadia pio ji̧ri̧. Ja̧dea̧ ji̧ i jujuai̧ go̧a̧ti̧ra̧ pio ju̧ri̧ra̧ ji̧ra̧ri̧ co bide cjaeäa̧diro̧jo̧ȩ putu ju go̧a̧ oa. Ado ja̧dëa ji̧ Jechu pio ju̧i̧ bide cjaeäa̧ duri oa ado cja̧rȩmo̧ guadia pio ji̧ri̧iäpȩmo̧ yürürëreji̧ri̧diro̧jȩrȩ toro cji̧de ja̧bo tänȩpea̧ oa.

¹⁶ Ado guadia judiro̧ Jechu pio ju̧i̧ ëba jäa̧diro̧jo̧ȩ Pirato ja̧ bë tjoräpȩmo̧. Ado guadia orë a̧de a̧dopea̧diro̧jȩrȩ pio ju̧ri̧pȩ.

¹⁷ Ado ina̧rea̧ coë coëara̧ ina̧ tänȩrëreji̧ri̧diro̧jo̧ȩ Jechu ju̧i̧, domano ütëmi̧ darë ina̧rea̧mi̧ dara̧. Ado ja̧dëa̧ ji̧ o̧ chiamȩ to ca̧i̧mi̧ dara̧ pio ju̧ri̧ra̧ jëdano̧ ëte, yua tänȩrëreji̧ri̧diro̧jo̧ȩ. Domano ütërë yuami̧ dari̧ cjiapea̧ oa yua tänȩa̧diro̧jo̧ȩ.

¹⁸ Ado ja̧dëa ji̧ goaeri̧ chjaocjiaji̧ri̧rȩ ba chia dacji̧ quëna̧ japarëreji̧ri̧diro̧jo̧ȩ ütëmi̧ da oa. Aja̧, ja̧di dari̧ japarëreji̧ri̧diro̧jo̧ȩ, ja̧di ta̧rëri̧ yo̧ji̧ri̧rȩ: —Aja̧ bucho ana̧ cjo̧ro̧täde judio ja̧ ütë üdë —yo̧ji̧ri̧rȩ chjaocjiarëreji̧ri̧diro̧jo̧ȩ 'ütëdida' quëna̧dëji̧ri̧rȩ.

¹⁹ Ado tora̧ co ji̧ra̧ri̧ gu̧na̧ cjaeäa̧diro̧jo̧ȩ jibëa̧ tjübë oa. Ado a̧ra̧ a̧ra̧ pju̧i̧no̧a̧diro̧jo̧ȩ peaja̧di. Ado pio ju̧i̧ ja̧ dëbëräpȩ ju̧ri̧ ju chatura̧ ano̧ mire cjiadäräji̧ri̧rȩ chjacjiamȩri̧ jo̧rȩtacji̧ quëna̧ chjaocjia̧diro̧jo̧ȩ peaja̧di.

²⁰ Ado Jechu pio ju̧i̧ airi̧ cjia airi̧ cjia chjaocjia̧ duri oa, a̧ra̧ a̧ra̧ ni̧bäa̧ duri oa, mu̧i̧ cjüëano̧a̧diro̧jo̧ȩ ina̧rea̧ coëcoëa oa. Ado jibëa̧ chjibo pio ju̧i̧ ano̧ mire ina̧diro̧jo̧ȩ ado chjereno̧. Ja̧dëa ji̧ yabo ëba jäa̧diro̧jo̧ȩ toro cji̧de ja̧bo tänȩpea̧ oa.

Toro cji̧de ja̧bo tänȩrëreji̧ri̧diro̧jo̧ȩ Jechu ju̧i̧

²¹ Ado Jechu pio ju̧i̧ ëba jäji̧ri̧rȩ dëbëdiärëreji̧ri̧diro̧jo̧ȩ Chimo̧ quȩmȩ ju̧i̧, Chirenȩ quȩmȩ chiriräpȩ cjo̧ro̧mȩ pio ju̧i̧. Aja̧, chiri tjori pio judiri go̧düna̧ra̧mȩ oa dëbëdiäa̧diro̧jo̧ȩ Chimo̧ ju̧i̧, Areja̧doro ja̧ jäja pio ju̧i̧, Dupjo ja̧ jäja pio ju̧i̧. Ado pio ju̧i̧ ano̧ mire ara jä tänȩrëreji̧ri̧diro̧jo̧ȩ to oa, guadia judiro̧ Jechu ju̧i̧ cji̧däpea̧ to pio ju̧i̧. Jiadarea̧ decjiari̧ tänȩa̧diro̧jo̧ȩ.

²² Ado ji̧dë u̧i̧ jachi oa jäji̧ri̧rȩ ëba järëreji̧ri̧diro̧jo̧ȩ Jechu ju̧i̧ Gogota quȩmȩ ya̧mi̧räpȩ yuro. Ado Gogota yo̧rea̧ üdë, jabechji̧ "tjübë ju" yo̧rea̧de. Pio ju̧ri̧pȩ ëba jäa̧diro̧jo̧ȩ.

²³ Ado ju̧ri̧pȩ go̧düdäräa̧mȩ oa vino̧ quȩmȩ ërü oa yürütea̧diro̧jo̧ȩ Jechu ju̧i̧. Aja̧, mira quȩmȩ chjaparȩrea̧ra̧ mirea̧ oa cjiamȩ jararea̧ oa yürütea̧diro̧jo̧ȩ. Jabechji̧ jënȩ toro a̧dë chjäte gitoi̧ dari̧ tarachea oa yürütea̧diro̧jo̧ȩ, jabo cjäri̧ madejȩ, jaradëa̧dejȩ.

²⁴ Ja̧dëa ji̧ toro cji̧därëreji̧ri̧diro̧jo̧ȩ Jechu ju̧i̧. Chjiparari̧ra̧ pio ju̧ri̧ra̧ cjacjarë cjae gu̧na̧diro̧jo̧ȩ toro. Ado ja̧dëa ji̧ uëräpȩmo̧ cjiari̧ cjitë tänȩa̧diro̧jo̧ȩ. Ado ja̧di dari̧ japa ëte, guadia judiro̧ chjarapë mitërëreji̧ri̧diro̧jo̧ȩ Jechu pio ju̧i̧ ja̧ chjiboremȩ oa. Ja̧dëa ji̧ guadia pio judiro̧ quȩ chiamȩ ta̧dë oa mitë oaiä, jabechji̧ chjaocjiaji̧ri̧pea̧dirȩ cja̧rȩmȩrȩ Jechu pio ju̧i̧ ja̧ chjiboremȩ oa mitëpea̧ oa.

²⁵ Dorë pea uëpea̧rä toro cji̧däa̧diro̧jo̧ȩ, a las 9.

²⁶ Ado Jechu pio ju̧i̧ toro cji̧därërea̧ ji̧, jabechji̧ Jechu ja̧ tjübë uërä ju̧ri̧ to pjatë oa cjae gu̧na̧rëreji̧ri̧diro̧jo̧ȩ ma̧ȩ chiamȩ oa, jënȩ chjai̧dëri̧ japea̧ pio ju̧i̧ chjiari ma̧ȩ oa. Ado ja̧di ta̧rëri̧ go̧ȩpea̧ oa cjiarëremȩde ma̧ȩ üdë. "Aja̧, Judio pio ji̧ri̧ ja̧ ütëde" yo̧mȩ ma̧ȩra̧ go̧ȩpea̧ oa cjiarëremȩde.

^27-28 Ado Jechu pio ju̧i̧ toro cji̧därërea̧ ji̧, peaja̧di yo̧a̧ri̧ oa toro cji̧däa̧diro̧jȩrȩ garüji̧ri̧ pio ji̧ri̧. Cja̧rȩmȩ oa cji̧däa̧diro̧jo̧ȩ Jechu pio ju̧i̧ ja̧ cja̧ȩta̧ra̧räpȩmo̧. Ado cja̧rȩmo̧ oa cji̧däa̧diro̧jo̧ȩ cja̧ȩta̧ra̧ pënȩräpȩmo̧. Aja̧, pio ji̧ri̧ ja̧ tjoro cji̧däa̧ oa cjiarëremȩde Jechu judi.

²⁹ Ado pumȩ judiro̧ toro cji̧däa̧ pio ju̧i̧ dae chjätärërea̧ ji̧, airi̧ cjiaji̧ri̧pea̧diro̧jo̧ȩ jibëa̧ tjübë oa pacho cürëji̧ri̧rȩ. Ado goae tarari̧ ëna̧diäji̧ri̧rȩ ya̧e chjaorëreji̧ri̧diro̧jo̧ȩ ja̧di ta̧rëri̧ yo̧ji̧ri̧rȩ: —Chia chia, pio judirenȩ. "Aja̧, Ütë tjamo̧ ja̧ bë oa ado chjereno̧ cji̧däpai̧ darequede" yo̧remȩ pio judirenȩ. "Aja̧, iëchädärä ëte ado chjereno̧ cji̧däpai̧ darequede tjarari̧ doi̧mo̧i̧ chjätä ëte" yo̧remȩ pio judirenȩ. Jabo cjäri̧ marenȩ japarea̧mi̧dërenȩ.

³⁰ Jaeibe. Mȩnȩ na̧ea̧ ma̧na̧ri̧ japarea̧ darä judi, na̧ea̧ ma̧na̧ri̧ chjätärea̧ darä judi, jabechji̧ tori pio judiri biravä —yo̧ji̧ri̧rȩ ya̧e chjaorëreji̧ri̧diro̧jo̧ȩ Jechu ju̧i̧.

³¹ Peaja̧di ta̧rëri̧ ya̧rëreji̧ri̧diro̧jo̧ȩ tjamo̧ goë tuti ja̧bepaji̧ri̧ pio judiro̧, Moicherë go̧ȩparërea̧ ma̧ȩ oa a̧ra̧ano̧ji̧ri̧borë. Jabechji̧ dae dae airi̧ cjia ya̧e chjaorëreji̧ri̧diro̧jo̧ȩ, pio ju̧i̧ badë badë daji̧ri̧rȩ. Ado jibëa̧ dëbëti̧ra̧ chia ni̧bäji̧ri̧rȩ ja̧di ta̧rëri̧ aechide ni̧bärëreji̧ri̧dirȩ, Jechu pio ju̧i̧iäpȩmo̧ ya̧ji̧ri̧rȩ: —Jabo danȩrȩ, o ji̧ri̧ chjadëri̧ chjätä tänȩrëremȩdejȩrȩ jabo cjäri̧ made, jibëa̧ ma̧na̧ri̧ japea̧ oaiä chjätärea̧mi̧dëde.

³² Jabechji̧ Ütërë chjadüa̧ Chjätä Tänȩmȩ tjamo̧rä judi, Icharai pio judiri ja̧ji̧ri̧ ja̧ ütë tjamo̧rä judi, jabechji̧ jibëa̧ ma̧na̧ri̧ japea̧ oaiä biratäremȩde yaba̧ tori pio judiri. Ado a̧ro̧rȩ ja̧di dari̧ japamȩ oa darä judi, jabechji̧ quëna̧täreji̧ri̧rea̧ro̧jo̧ȩ —ya̧ji̧ri̧rȩ ni̧bäa̧dirȩ jibëa̧ dëbëti̧ra̧ chia airi̧ cjiaji̧ri̧rȩ. Ado Jechu pio ju̧i̧ nö̧ta toro cji̧däa̧ oa cjiaji̧ri̧ pio judiro̧borë ma̧ȩ goaedëti̧ra̧ ya̧e chjaorëreji̧ri̧diro̧jo̧ȩ.

Jechu judi ja̧boa̧de

³³ Ado dorë tjomo̧ro chjadëri̧ da mirerërea̧ ji̧ chjaodëri̧ bagönȩ mape bagarëremȩde chiri nö̧tai̧ oa do üdë chjiaräpȩmo̧diäa̧rä yuro, a la 3pea̧rä yuro.

³⁴ Ado a las 3, dorë chjiaräpȩmo̧diäa̧rä Jechu judi goae tarari̧ ëna̧diärëremȩde jibëa̧ ni̧bärea̧ ma̧ȩra̧ pio ju̧ri̧ra̧: —Eroi, Eroi, ¿dema chabatani? —yo̧mȩrȩ ëna̧diäa̧de. Ado pio ji̧ro ma̧ȩ oa yo̧a̧ üdë: "Ca̧ Ütë, ca̧ Ütë. ¿Tjana̧ ju̧i̧iä a̧dë jachipadäräa̧renȩque?" yo̧rea̧ ma̧ȩde.

³⁵ Ado o judiro̧, Jechu ja̧ queri̧räpȩ dae cjiaji̧ri̧ pio judiro̧ ta̧rëa̧diro̧jo̧ȩ ja̧di ta̧rëri̧ ni̧bäa̧mȩ oa. Ado yo̧a̧dirȩ: —Danȩrȩ, Eria quȩmȩrea̧ pio ju̧i̧ jo̧rȩtamȩrȩ ëna̧diäta jirodejȩ.

³⁶ Ado cja̧rȩmȩ pumȩrȩ bagureno̧a̧de ui yu̧i̧mȩ cjodocjodoa oa mitëno̧pea̧ oa. Ado bino quȩmȩ ërü cho̧ro̧cho̧ro̧a oa chudarëremȩdejȩ. Ado ja̧dëa ji̧ toro yura ëte, Jechu ja̧ yaräpȩmo̧ goë yürütea̧dejȩ jarapea̧ oa jabo cjäri̧ madejȩ, jaradëa̧dejȩ. Ja̧dëa ji̧ pio jiro pumȩ üdë yo̧a̧dejȩrȩ pumȩ ji̧ri̧iäpȩmo̧: —Jabë jëreeadëchji̧vä —yo̧a̧dejȩrȩ. Danȩrȩ, Eria quȩmȩrea̧ pio judi jana̧pai̧ dadejȩ Jechu pio ju̧i̧ a̧dopea̧ oa. Jabechji̧ tori pio judiri bira tänȩpea̧ oa jana̧pai̧ dadejȩ. Jabechji̧ jëreeadëchji̧jo̧ȩ —yo̧rëreji̧ri̧dirȩ o judiro̧.

³⁷ Ja̧dëa ji̧ Jechu judi goae tarari̧ ëna̧diä ëte, ja̧boa̧de jȩoadëpe jämȩrȩ.

³⁸ Ado chjaodëri̧ tutia̧ oa cjiadiärëremȩde a̧dë chjäte china̧chja jo̧ tjo oa tuti märärea̧ chjibo coto üdë Ütë tjamo̧ ja̧ bëräpȩ. Jibëa̧ ma̧na̧ri̧ uëri pio judiri ëteräpȩmo̧ mu̧i̧ quirë tutia̧ oa cjiadiäa̧de yo̧a̧ri̧ pënȩpe järi̧.

³⁹ Ado domano̧ guadia ütë judi, Jechu ja̧ dëbëräpȩ dae cjiamȩ pio judi, jabechji̧ irä daea̧dejȩ Jechu ju̧i̧ ja̧boa̧mȩ oa. Ado irä damȩrȩ ja̧di ta̧rëri̧ yo̧rëremȩde: —Pio jiro üi̧ üdë, Ütë tjamo̧ pio ju̧i̧ ja̧ Joja tjamo̧remȩde —yo̧mȩrȩ yo̧a̧de Jechu pio ju̧i̧ chjiari.

⁴⁰ Ado ivi jini̧ro̧ orë jachi chjaräpȩ dae cjiaji̧ri̧rȩ dae cjiarëreji̧ri̧ni̧ro̧jo̧ȩ Jechu ju̧i̧. Ado pio ji̧ri̧ nö̧ta cjiarëreyi̧nȩ Maria Madarena quȩyi̧ pio jini̧. Ado Santiago pio ju̧i̧ ja̧ jojini̧borë cjiarëreyi̧nȩ, Joche pio ju̧i̧ ja̧ jojini̧ pio jini̧. Ado Charomȩ quȩyi̧ pio jini̧borë cjiarëreyi̧nȩ.

⁴¹ Jabechji̧ pio jiro ivi jini̧ro̧ cho̧rë järëreji̧ri̧ni̧ro̧jo̧ȩ Jechu ju̧i̧ Garirearäpȩ cjo̧ro̧rëremȩ oa. Ado chjadëri̧ a̧dorëreji̧ri̧ni̧ro̧jo̧ȩ. Ado pio jiro ivi pio ji̧ri̧ nö̧taji̧ri̧ jini̧ro̧ ji̧ra̧ tjamo̧rëreji̧ri̧ni̧rȩ. Aja̧, Jechu pio ju̧i̧ nö̧ta jana̧rëreji̧ri̧ni̧rȩ Jerucharȩräpȩmo̧.

Jechu ja̧ icjara pio ju̧i̧ ta̧dë cjararä are a̧ra̧rëreji̧ri̧diro̧jo̧ȩ na̧ra̧mi̧ dari̧

⁴² Jechu judi ja̧borërea̧ do üdë, jëdano̧rea̧ dorëremȩde. Ado "jëdano̧rea̧ do" yo̧a̧ ji̧, ¿tjana̧ yo̧rea̧de? Tjana̧ yo̧dë, jabechji̧ järätä chjaparea̧ do pio ju̧i̧ ja̧ yaboi̧ baämȩ do pio ju̧i̧ chjiari yo̧rea̧de. Ado jëdano̧rea̧ doro, jabechji̧ judio judiro̧ jabërä chjadëri̧ jëdano̧rëreji̧ri̧dirȩ järätä chjaparea̧ doro chjadëri̧ järätä chjapapea̧ oa.

⁴³ Ado pio jiro doro ji̧tärä, Joche quȩmȩ üdë uapadëmȩrȩ goëdepea̧dejȩ Pirato ju̧i̧ Jechu ja̧ icjara pio ju̧i̧ cjo̧dëpea̧ oa, chjadëri̧ idë arapea̧ oa. Pio jiro üi̧ üdë Arimatea quȩmȩ bë ma̧ri̧ pio judirimȩrëremȩde. Tjamo̧ yo̧mȩrȩ cjo̧ro̧rëremȩde. Ado ba chia da marëreji̧ri̧diro̧jo̧ȩ judio judiro̧. Ado judi, Ütërë yo̧a̧ chja̧oeräpȩ cjo̧ro̧rea̧ üdë ma̧na̧na̧ra̧pea̧ ji̧ jidatamȩrȩ cjo̧ro̧rëremȩ pio judi, jabechji̧ goëdepea̧dejȩ Pirato ju̧i̧.

⁴⁴ Ado Pirato judi Jechurë ja̧boa̧ pio ju̧i̧ ta̧rëa̧ oaiä, ya yabë cjiamȩrȩ ana̧ri̧ jo̧rȩtamȩpea̧de. Pio ju̧i̧iä yo̧ chjadürëremȩdejȩ jibëa̧ guadia ütë pio ju̧i̧ pio jȩaiäpȩ jana̧tä. Pio ju̧i̧iä chjadëri̧ ta̧rëpea̧ oa, jabechji̧ yo̧ chjadürëremȩdejȩ. Ado iëno̧ë ta̧rëa̧dejȩ: —Danȩ, ¿tjamo̧ri̧ ja̧boa̧de Jechu judi? —iëno̧ë ta̧rëa̧dejȩ.

⁴⁵ Ado guadia ütë pio judi dëbë yo̧a̧ oaiä, 'jabechji̧ jabo̧a̧dida, Jechu judi ja̧boa̧dida' quëna̧ jo̧rȩtamȩpea̧de. Ado pio ju̧i̧iä Pirato judi Jechu ja̧ icjararemȩ pio ju̧i̧ mitërea̧ yürürëremȩdejȩ Joche pio ju̧i̧.

⁴⁶ Ado Joche judi chjibo coto ana̧ oa gatëa̧ oa goarëremȩde. Ado Jechu ja̧ icjararemȩ pio ju̧i̧ bira tänȩ ëte, jabechji̧ joë purirëremȩdejȩ chjibo cotora̧ chjadëra̧, go̧a̧ti̧ra̧ pio ju̧ri̧ra̧. Ado ja̧di dari̧ japa ëte, jabechji̧ ta̧dë cjararä ju̧ri̧ idë a̧ra̧rëremȩdejȩ. Pio jiro ta̧dë cjara üdë cja̧rȩmȩ ana̧ri̧ cjarea̧ oa cjiarëremȩde jo̧ tjomi̧ dari̧. Ado Jechu ja̧ icjararemȩ pio ju̧i̧ ta̧dë cjararä ju̧ri̧ idë a̧ra̧ ëte, jabechji̧ ta̧dë ana̧ tjamo̧ra̧ pio ju̧ri̧ra̧ chjadëri̧ tuti cara̧dejȩ joë ya oa, eami̧rȩ yu̧a̧rea̧mi̧dëri̧.

⁴⁷ Ado Maria Madarena pio jini̧, ado cja̧rȩmo̧ Joche quȩmȩ pio ju̧i̧ ja jojini̧borë, Maria pio jini̧, jabechji̧ irä darëreji̧ri̧ni̧ro̧jo̧ȩ Jechu ja̧ icjararemȩ oa ta̧dë cjararä idë a̧ra̧ ji̧.