Marcos 14 - Biblia Pume

Tjamo̧ yo̧ji̧ri̧ pio judiro̧ järirëreji̧ri̧dirȩ Jechu pio ju̧i̧ acji mitëpea̧ ji̧

¹ Ado judio judiro̧ uëmo̧ a̧dë chjätärea̧ do pio ju̧i̧ jo̧rȩtaji̧ri̧rȩ a̧dopapea̧ ji̧ querediä tjamo̧rëremȩdejȩrȩ. Yo̧a̧ri̧ doi̧ maearë cjiadiärëremȩdejȩrȩ jënȩro̧ juraji̧ri̧rȩ a̧dopapea̧ ji̧. Ado uëmo̧ a̧dë chjätärea̧ do oa jo̧rȩtaji̧ri̧rȩ a̧dopea̧ ji̧, jabechji̧ judio judiro̧ pjuru chiamȩ chja̧pe oa juradërëreji̧ri̧diro̧jo̧ȩ. Aja̧, pio jiro doro, chjätärea̧ do üdë jabë tarupadëa̧rä, Jechu ju̧i̧ ja̧bo tänȩpea̧ pio chjiari ni̧bä chjaopea̧ oa a̧doparëreji̧ri̧dirȩ o ji̧ri̧ chjiari tjamo̧ goë tuti ja̧bepaji̧ri̧ judiro̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ nö̧ta. Jabechji̧ järi tjamo̧ji̧ri̧pea̧dirȩ Jechu ju̧i̧ goadi na̧e tai̧pea̧ oa, pio ju̧i̧ u̧i̧pa ëte mitëpea̧ oa.

² Pio ju̧i̧iä jibëa̧ dëbëti̧ra̧ chia yo̧a̧dirȩ, ja̧di ta̧rëri̧ ni̧bäji̧ri̧rȩ: —Jabo pumȩ judiro̧ juraji̧ri̧rȩ a̧doparä, mitëdëparea̧ro̧jo̧ȩ Jechu ju̧i̧. Jabo ji̧dë duri oa goadi mitëparea̧ro̧jo̧ȩ, pumȩ judiro̧ cjarari̧ cjiape jächea oa —yo̧a̧dirȩ.

Iei̧ jini̧ goaeri̧ pjȩa̧mȩ joarea̧ oa arë cjarärëreyi̧nȩjȩ Jechu ju̧i̧

³ Ado Jechu judi järëremȩde Betania quȩmȩ bë ma̧ri̧räpȩ, Chimo̧ quȩmȩ ja̧ bëräpȩ. Ado Chimo̧ judi jibëa̧ irä ma̧i̧ da co chiarërea̧ ji̧, chjapea̧ oa cjiamȩrȩ cjo̧ro̧rëremȩde. Ado Jechu judi mechjaräpȩ jurë cha̧ nö̧ta, o ji̧ri̧ ja̧ yuroro ëba jurë cha̧ nö̧ta, jabechji̧ yu̧a̧rëreyi̧nȩ iei̧ jini̧ ui goaeri̧ pjȩa̧ joarea̧ ba chia tjamo̧ oa goayi̧rȩ. Ado ui goaeri̧ pjȩa̧ maea oaiä, teracabara̧ a̧de mirea̧ oa cjiadëa̧ oaiä, jabechji̧ ba chia tjamo̧rëremȩde. Pio jiro joarea̧ oa goarëreyi̧nȩ dabu yocodë boi̧chji̧mi̧ darä, gürü ju go̧a̧ti̧ chiamȩ dabu yocodë boi̧chji̧mi̧ darä, ya decjiari̧ tutia̧ oa cjiamȩrä. Ado ja̧dëa ji̧ gürü oa yareno̧ ëte, arë cjareno̧a̧nȩjȩ Jechu ja̧ tjübërä.

⁴ Ado iei̧ jini̧ ja̧di dari̧ japea̧ oaiä o judiro̧ ërecjiapea̧dirȩ. Ado jibëa̧ dëbëti̧ra̧ chia yo̧a̧dirȩ: —¿Jabo tjana̧pea̧ ji̧ ja̧di dari̧ japea̧nȩ? Ja̧di dari̧ japea̧ oaiä badëri̧ cjiadiäa̧de joarea̧ ba chia tjamo̧remȩ üdë. ¿Tjana̧pea̧ ji̧ badëri̧ aeno̧a̧nȩjȩ?

⁵ Jabechji̧ gatë tänȩa̧täreyi̧nȩjȩ chëre ji̧ra̧ tjamo̧ oa mitëpea̧ oa. Jabechji̧ cja̧rȩmȩ ui codë oa ja̧bepea̧ baremȩde. Ado pio jiro chëre oa chjarapë yürüa̧täreyi̧nȩjȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Jabo cjäri̧ manȩ, ma̧i̧ dari̧ japea̧nȩ —yo̧rëreji̧ri̧dirȩ. Ado ja̧dëa ji̧ goae tarari̧ ya̧ea̧diro̧jȩ iei̧ ji̧.

⁶ Jabo Jechu judi tuti yo̧a̧dejȩrȩ: —¿Tjana̧pea̧ ji̧ goae tarari̧ ya̧renȩro̧jȩ. Jabo cjiachji̧jȩ. Cjapiri̧ cjiachji̧vä. Jabechji̧ chjadëri̧ japea̧ni̧que.

⁷ Danȩrȩ, ji̧dë ma ëba cjo̧ro̧padiro̧dibe chjö̧na̧i̧ti̧ oa cjäri̧ ja̧boji̧ri̧ judiro̧. Ado mȩnȩro̧ eami̧ doro pio ji̧ri̧iäpȩmo̧ a̧dorea̧ tararä judi, jabechji̧ a̧dopai̧ darenȩro̧jȩrȩ. Jabo ja̧didërequede cüdë. Jabechji̧ dibëa̧ chjarerä ji̧dë ma cjo̧ro̧dëparequede.

⁸ Jabo jabë cjo̧ro̧mȩ oa chjadëri̧ japea̧ni̧que pio jiro iei̧ jini̧ jënȩ nö̧tarä yuro. Jabechji̧ ca̧ icjara üdë chjadëri̧ na̧ra̧ oa cjiabëmi̧ jabërä chjadëri̧ jëdano̧mi̧ dari̧ arë cjaräa̧ni̧que pio jiro ui goaeri̧ pjȩa̧ joarea̧ oa.

⁹ Ado tjamo̧ri̧ yo̧requededibe. Ma̧ȩ chjadëi̧ üdë chiriräpȩti̧ oa a̧ra̧ano̧a̧ oa cjiarä, jabechji̧ jënȩ pio coa chjiari chjadëri̧ japea̧ pio ju̧i̧ ta̧rë mapadirȩ, pio ji̧iäpȩmo̧ chjadëri̧ jo̧rȩtapea̧ oa —yo̧mȩrȩ tuti yo̧rëremȩdejȩrȩ Jechu judi.

Juda Iscariote judi chjai̧dëri̧ japarëremȩdejȩ Jechu ju̧i̧

¹⁰ Jechu judi jibëa̧ jadü oa mitërërea̧ ji̧, 12 oa mitërërea̧ ji̧, jabechji̧ Juda Iscariote pio ju̧i̧bo mitërëremȩdejȩ. Ado pio judi goëdepea̧dejȩrȩ tjamo̧ goë tuti ja̧bepaji̧ri̧ pio ji̧ri̧ Jechu pio ju̧i̧ chjiari ni̧bä chjaopea̧ oa. Aja̧, Jechu pio ju̧i̧ goadi gatë tänȩpea̧ pio ju̧i̧ chjiari ni̧bä chjaopea̧ oa, pio ju̧i̧ ja̧bo tänȩtämi̧ cjiaji̧ri̧ pio ji̧ri̧iäpȩmo̧ goadi gatë tänȩpea̧ pio ju̧i̧ chjiari ni̧bä chjaopea̧ oa goëdepea̧dejȩrȩ.

¹¹ Ado Juda Iscariote judi yo̧a̧ pio ju̧i̧ ta̧rëa̧ oaiä ma̧ chiadëri̧ cjiaji̧ri̧pea̧dirȩ. Ado chëre oa pio ju̧i̧iäpȩmo̧ yürüpea̧ ji̧ yo̧ë cji̧däa̧diro̧jo̧ȩ. Ado pio judiri yurori järi tjamo̧mȩpea̧de Juda Icariote judi Jechu pio ju̧i̧ gatë tänȩpea̧ oa pio jȩa ja̧bo tänȩtämi̧ cjiaji̧ri̧ pio ji̧ri̧iäpȩmo̧.

Jechu judi jibëa̧ jadü pio ji̧ri̧ nö̧ta a̧doparëremȩde uëmo̧i̧ a̧dë chjätärea̧ do pio ju̧i̧ jo̧rȩtamȩrȩ

¹² Ado pea tarupea̧ do üdë ma̧na̧na̧ra̧rä, pjuru chiadëmȩ chja̧pe maea oa jurarea̧ do chjätäpea̧ do üdë pea tarupea̧ domȩ ju̧i̧iä, oveja pëi̧ chja oa goe gu̧rori̧ ja̧bo tänȩpea̧ japamitë üdë ma̧na̧na̧ra̧rä, uëmo̧ a̧dë chjätärea̧ dobo ma̧na̧na̧ra̧rä, jabechji̧ Jechu ja̧ jadü judiro̧ a̧doparea̧ pio ju̧i̧ jo̧rȩtaji̧ri̧rȩ iëno̧ë ta̧rërëreji̧ri̧diro̧jo̧ȩ ja̧di ta̧rëri̧ yo̧ji̧ri̧rȩ: —Danȩ, mȩnȩ jurapea̧ oa ¿tjana̧räpȩ jëdanȩ yürütä earenȩibe a̧ro̧rȩ uëmo̧ a̧dë chjätärea̧ do pio ju̧i̧ jo̧rȩtaji̧ri̧rȩ jurapea̧ oa? —iëno̧ë ta̧rëa̧diro̧jo̧ȩ.

¹³ Ado Jechu judi jibëa̧ jadü yo̧a̧ri̧ oa chjadümȩrȩ yo̧a̧dejȩrȩ: —Danȩrȩ, jächji̧vä bë ma̧ri̧räpȩ. Ado ui chiamȩ dabu yocodë oa aramȩ pio ju̧i̧ dëbëdiäeji̧ri̧renȩro̧jo̧ȩ. Pio ju̧i̧ cho̧rë jächji̧jo̧ȩ.

¹⁴ Jabechji̧ cho̧rë jächji̧jo̧ȩ judi jo̧räpȩ yu̧a̧rä yuro. Ado judi yu̧a̧pea̧ bë ano̧mȩ pio ju̧i̧ darä, yo̧chji̧jo̧ȩ: "Danȩ, A̧ra̧ano̧mȩ pio judi ja̧di ta̧rëri̧ iëno̧ë ta̧rëtä eadiibe pio mȩaiäpȩmo̧" yo̧eji̧ri̧renȩro̧jo̧ȩ. "¿Tjana̧räpȩde jo̧ tjo üdë cüdë ca̧ jadü pio ji̧ri̧ nö̧ta a̧dopapea̧ oa, uëmo̧ a̧dë chjätärea̧ do pio ju̧i̧ chjadëri̧ jo̧rȩtamȩrȩ jurapea̧ oa?" yo̧eji̧ri̧renȩro̧jo̧ȩ.

¹⁵ Ado pio ju̧i̧ ta̧rëa̧ oaiä, ëba buapadidibe jo̧ uëräpȩ yuro, ado cja̧rȩmo̧ cjo̧ro̧rea̧ iräpȩ yuro. Ado uëräpȩ bua̧rä, jabechji̧ jo̧ tjo ana̧ oa dae yo̧padidibe chjadëri̧ jëdano̧a̧ oa cjiamȩ oa, a̧ro̧rȩ chjadëri̧ jurapea̧ oa jëdano̧a̧ oa cjiamȩ oa. Jabechji̧ pio ju̧ri̧pȩ chjadëri̧ jëdanȩ yürüparenȩro̧ibe a̧ro̧rȩ jurapea̧ oa —yo̧mȩrȩ chjadüa̧dejȩrȩ Jechu judi.

¹⁶ Pio ju̧i̧iä jibëa̧ jadü yo̧a̧ri̧rȩ järëreji̧ri̧dirȩ bë ma̧ri̧räpȩ. Ado Jechu judi pio jibë yo̧a̧mi̧ daea̧diro̧jȩrȩ. Tjamo̧i̧ cjiari̧ yo̧a̧dejȩrȩ. Ado jo̧ tjo uëräpȩ chjadëri̧ go̧düdäräji̧ri̧rȩ jëdano̧rëreji̧ri̧diro̧jo̧ȩ jurarea̧ oa, uëmo̧ a̧dë chjätärea̧ do pio ju̧i̧ chjadëri̧ jo̧rȩtaji̧ri̧rȩ jurapea̧ oa.

¹⁷ Ado ja̧dëa ji̧ gȩnȩpea̧rä Jechu judi järëremȩde judiro̧ jabërä jëdano̧a̧ jo̧ tjoräpȩ ju̧ri̧. Jibëa̧ jadü pio ji̧ri̧ nö̧ta järëremȩde, 12 pio ji̧ri̧ nö̧ta.

¹⁸ Ado judiro̧ mechjaräpȩ jura cha̧ nö̧ta, Jechu judi yo̧a̧dejȩrȩ: —Danȩrȩ, tjamo̧ri̧ yo̧requededibe. Mȩnȩro̧ cja̧rȩmȩrȩ, pio coa nö̧ta juramȩ pio judi chjai̧dëri̧ japapadique, coa eadëji̧ri̧ pio judiro̧ mitërea̧mi̧ dari̧, pio coa mitërea̧mi̧ dari̧ —yo̧a̧dejȩrȩ.

¹⁹ Ado pio ju̧i̧ ta̧rëa̧ oaiä, gito ana̧ri̧ jo̧rȩtaji̧ri̧pea̧dirȩ. Ado ütëborë ano̧ mire yo̧ji̧ri̧rȩ iëno̧ iëno̧ ta̧rëa̧diro̧jo̧ȩ: —¿Pio mȩaiäpȩmo̧ chjai̧dëri̧ japapamȩ pio judidërequede cüdë? —yo̧ji̧ri̧rȩ iëno̧ë ta̧rëa̧diro̧jo̧ȩ.

²⁰ Jabo Jechu judi dëbë yo̧a̧dejȩrȩ: —Danȩrȩ, 12nȩrȩ, jabo mȩnȩro̧ cja̧rȩmȩrȩ, pio coa nö̧ta chja̧pe oa tachjarä chudamȩ pio judide pio coaiäpȩmo̧ chjai̧dëri̧ japapamȩ judi —yo̧a̧dejȩrȩ—.

²¹ Jabechji̧ Ütë tjamo̧ ja̧ ma̧ȩ üdë jabërä go̧ȩpea̧ oa cjiarërea̧mi̧ ja̧bo tänȩpadiro̧coe Pumȩrȩ Ara̧ Tjamo̧ pio ju̧i̧. Jabo pio jiro ma̧ȩ üdë go̧ȩpea̧ oa cjiaräbo, jabechji̧ pio coa chjai̧dëri̧ japamȩ pio ju̧i̧iäpȩmo̧ a̧dë chjäte uapai̧ dari̧ bape chjaorea̧ üdë acji cjatäpadejȩ davä, Pumȩrȩ Ara̧ Tjamo̧ pio ju̧i̧ goadi gatë tänȩpamȩ pio ju̧i̧iäpȩmo̧. Jabechji̧ ji̧dë u̧i̧ chjadëtäremȩde davä, jibëa̧ ai̧ jini̧ ju̧i̧ aradëa̧rä judi —yo̧mȩrȩ ni̧bä chjaoa̧dejȩrȩ Jechu judi.

Jibëa̧ icjara pio ju̧i̧ jo̧rȩtapea̧ oa yo̧rëremȩdejȩrȩ Jechu judi

²² Judiro̧ jura̧ nö̧ta Jechu judi chja̧pe oa mitërëremȩdejȩ. Ado Ütë tjamo̧ ju̧i̧iäpȩmo̧ ni̧bämȩrȩ yo̧a̧dejȩ: "Aja̧ Ama̧i̧, chjadëri̧ japea̧renȩibe pio yoa chja̧pe oa yürüa̧ oaiä." Ado ja̧di ta̧rëri̧ ni̧bä ëte, mu̧i̧ quirë yürürëremȩdejȩrȩ jibëa̧ jadü pio ji̧ri̧. Ado yo̧a̧dejȩrȩ: —Danȩrȩ, pio yoa mitëchji̧vä ca̧ icjarami̧ da oa —yo̧a̧dejȩrȩ.

²³ Ado ja̧di dari̧ japa ëte, mitërëremȩdejȩ uva ui chiamȩ ae jararea̧ oa. Ado jibëa̧ Ama̧i̧ pio ju̧i̧iäpȩmo̧ chjacjiamȩri̧ ni̧bä ëte, ëba goë yüre jara̧dejȩrȩ. Ütëborë jara̧dirȩ.

²⁴ Ado yo̧a̧dejȩrȩ: —Pio jiro uva ui üdë ca̧ goemi̧ dade. Ado cüdë ja̧boa̧rä, gu̧roa̧ oa cjiapade pumȩ no̧i̧dë tjamo̧ ja̧ oa. Ado ca̧ goe üdë, jabechji̧ chjadëri̧ na̧rȩdidibe Ütërë yo̧ë cji̧däa̧ ma̧ȩ peaja̧ pio ju̧i̧ chjiari. ‘Aja̧, Ütërë yo̧ë cji̧därërea̧mi̧ pumȩ no̧i̧dë tjamo̧rȩ duridëparȩa̧ oa cjiapadiro̧da, Jechu ja̧ goe pio oaiä duridëparȩa̧ oa cjiapadiro̧da' quëna̧rea̧mi̧ dari̧ na̧rȩpadidibe ca̧ goe üdë. Jarachji̧vä —yo̧a̧dejȩrȩ—.

²⁵ Ado danȩrȩ, uva ui oa ado judiri jaradëparequede yaba̧. Jabo japamitë ana̧ tjamo̧ chjätä ëte cjiadiärea̧ japamitërä, dëdë, ado chjereno̧ jarapareconȩ. Aja̧, Ütërë ütara̧ doro ado chjereno̧ jarapareconȩ, Ütërë yo̧a̧ chja̧oeräpȩ cjo̧ro̧rea̧ darä —yo̧a̧dejȩrȩ.

²⁶ Ja̧dëa ji̧ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ go̧a̧diro̧jo̧ȩ. Ado go̧a̧ duri oa, järëreji̧ri̧dirȩ Orivo quȩmȩ ya̧mi̧räpȩ.

Tjarari̧ co ma̧ȩ chjádë yürüpade Pedro judi Jechu pio ju̧i̧ chjiari

²⁷ Ja̧dëa ji̧ Jechu judi yo̧a̧dejȩrȩ jibëa̧ jadü ji̧ri̧: —Danȩrȩ, mȩnȩro̧ ütëborë a̧dë baäparenȩro̧coe. A̧dë bagureno̧parenȩro̧coe. Peaja̧dimi̧ ta̧rëri̧ go̧ȩpea̧ oa cjiarëremȩde Ütë tjamo̧ ja̧ ma̧ȩ üdë. Ta̧rëchji̧vä Ütë tjamo̧ judi yo̧a̧ pio ju̧i̧: "Pio cüdë tänȩa̧ oa ja̧bo tänȩpadiro̧jo̧ȩ oveja jidamȩ pio ju̧i̧. Ado pio ju̧i̧iä ovejami̧ darë chjö̧na̧i̧rȩ oëra̧ti̧ oa chjuchjupechäpadirȩ." Aja̧, ja̧di ta̧rëri̧ yo̧rëremȩde Ütë tjamo̧ judi mȩnȩro̧ pio coa a̧dë bagurapea̧ pio ju̧i̧ chjiari.

²⁸ Jabo danȩrȩ, cüdë ado chjereno̧ bëdüa̧rä, jabechji̧ dibëa̧ yabo jäparequede Garirearäpȩ. Ado pio ju̧ri̧pȩ dëbëdiäparenȩro̧coe —yo̧a̧dejȩrȩ.

²⁹ Ado Pedro judi to̧bari̧ dëbë yo̧a̧dejȩ: —Jabo cjäri̧ marequedemȩ, a̧dë bagureno̧dëparequedemȩ. O judiro̧ ütëborë mȩa a̧dë bagura̧räbo, jabechji̧ pio mȩa nö̧ta ëba cjiadiäparequede cüdë —yo̧a̧dejȩ.

³⁰ Ja̧dëa ji̧ Jechu judi dëbë yo̧a̧dejȩ: —Danȩ Pedro, tjamo̧i̧ cjiari̧ yo̧requedemȩ —yo̧a̧dejȩ—. Pio yaba̧ gȩnȩrä ocararo üi̧rȩ jabë yo̧a̧ri̧ co eadëa̧rä, jabechji̧ tjarari̧ co ma̧ȩ chjádë yürüparenȩ pio coa chjiari. Tjamo̧ davä. Pio coa dabadëcji̧ quëna̧ ni̧bämȩrȩ ma̧ȩ chjádë yürüparenȩ. "Cjäri̧ mareconȩ, Jechu pio ju̧i̧ tjamo̧ri̧ dabadëreconȩ" yo̧parenȩ —yo̧a̧dejȩ.

³¹ Jabo Pedro judi ji̧dë u̧i̧ to̧bari̧ yo̧mȩrȩ dëbë yo̧a̧dejȩ: —Cjäri̧ marequede cüdë. Ja̧di dari̧ yo̧dëtäremȩrequede. Pio mȩadi ja̧bo tänȩa̧räbo, jabechji̧ pio mȩa dabadëcji̧ quëna̧ yo̧dëtäremȩrequedejȩrȩ —yo̧a̧dejȩ. Ado Jechu ja̧ jadü o judiro̧ peaja̧di ta̧rëri̧ yo̧a̧diro̧jo̧ȩ.

Jechu judi Gechema̧ni̧räpȩ ni̧bärëremȩdejȩ jibëa̧ Ama̧i̧ ju̧i̧

³² Ja̧dëa ji̧ Jechu judi ëba järëremȩdejȩrȩ jibëa̧ jadü ji̧ri̧ Gechema̧ni̧ quȩmȩ tjadoräpȩ. Ado yo̧a̧dejȩrȩ jibëa̧ jadü ji̧ri̧: —Danȩrȩ, pio yi cjiadiächji̧vä cüdë idëpȩ jäa̧ nö̧ta, cüdë ca̧ Ama̧i̧ pio ju̧i̧ ni̧bäa̧ nö̧ta —yo̧a̧dejȩrȩ.

³³ Ado pio jȩa nö̧ta ëba jäpea̧ oa tjarari̧ oa yabëa̧dejȩrȩ. Pedro ju̧i̧, Santiago ju̧i̧, ado Juan ju̧i̧ yabëa̧dejȩrȩ. Ado ji̧dë u̧i̧ jachi chja oa jäa̧dirȩ. Ado Jechu judi a̧dë chjäte gitori̧ jo̧rȩtamȩpea̧de.

³⁴ Ado yo̧a̧dejȩrȩ tjarari̧ oa: —Acji cjaeämi̧ dari̧ boadique gitori̧ jo̧rȩta̧ pio judi. Ca̧ tjo üdë ja̧bopami̧ tarari̧ jo̧rȩtarequede. Pio yi cjiadiächji̧vä. Na̧e chiachji̧vä mo̧a̧rea̧ decjiari̧ —yo̧a̧dejȩrȩ.

³⁵ Ado Jechu judi ji̧dë u̧i̧ jachi chja oa jämȩrȩ toboe china̧därärëremȩde daburäpȩ. Ado jibëa̧ Ama̧i̧ pio ju̧i̧iä cjo̧dëmȩpea̧de pio jȩa chjiari tuti japatä, jënȩ a̧dë chjäte ana̧ri̧ tarachea oa. Aja̧, cjo̧dërëremȩdejȩ jibëa̧ Ama̧i̧ pio ju̧i̧iä pio judi jo̧rȩtami̧ tuti japapea̧ ji̧.

³⁶ Ja̧di ta̧rëri̧ yo̧mȩrȩ ni̧bäa̧dejȩ: "Ama̧i̧, ca̧ Ama̧i̧, a̧docoe. Jabechji̧ a̧dë chjäte jauëchjamȩrenȩ. Tjamo̧ tuti japamȩ pio judirenȩ. Ado jabechji̧, tuti japavä pio coa chjiari cüdë a̧dë chjäte ma̧i̧ dari̧ tarachea oa. Jabo cüdë jo̧rȩta̧mi̧ japadëvä, jabo pio mȩnȩ ütarë jo̧rȩta̧mi̧ japavä Ama̧i̧." Ja̧di ta̧rëri̧ yo̧mȩrȩ ni̧bäa̧dejȩ jibëa̧ Ama̧i̧ ju̧i̧.

³⁷ Ado ja̧di dari̧ ni̧bä ëte, ado chjereno̧ jäeno̧a̧dejȩrȩ jibëa̧ jadü ji̧ri̧iäpȩ, tjarari̧ oa. Ado mo̧a̧ cjiaji̧ri̧ oa darëremȩdejȩrȩ. Ado Pedro ju̧i̧ na̧rȩno̧ ëte yo̧a̧dejȩ: —Chia chia, chjaodëri̧ mo̧a̧mȩpea̧renȩ Chimo̧. ¿Cja̧rȩmȩ ora maea oa na̧e chiarea̧ dadëa̧nȩ?

³⁸ Jabechji̧ mo̧ë bëdüa̧ji̧ri̧mi̧ dari̧ jo̧rȩtachji̧vä. Ütë tjamo̧ ju̧i̧ ni̧bächji̧jo̧ȩ mȩnȩro̧ oëra̧diächea oa, chjai̧dë üdë dibë boadärämi̧ dari̧ japachea oa. Jabechji̧ coëma cjiari̧ cjo̧ro̧tämi̧ cjianȩrȩ dibëa̧ tjoro. Jabo dibëa̧ tjo üdë ju chiami̧ dari̧ cjiaräbo, jabechji̧ dibëa̧ icjara üdë ju chiami̧ dari̧ cjiadëde coëma cjiari̧ cjo̧ro̧pea̧ ji̧ —yo̧a̧dejȩ.

³⁹ Ado ja̧di ta̧rëri̧ yo̧ ëte ado jäa̧de Jechu judi jibëa̧ Ama̧i̧ pio ju̧i̧ ni̧bäpea̧ oa. Jënȩ ni̧bäa̧rea̧mi̧ ni̧bäa̧dejȩ ado.

⁴⁰ Ado japamitë chjätä ëte jibëa̧ jadü pio ji̧ri̧iäpȩ ado chjereno̧ cuchupë jäeno̧a̧ ji̧, ado mo̧a̧ji̧ri̧ oa daea̧dejȩrȩ. Judiro̧ mo̧a̧tämi̧ cjia̧ üdë boadäräa̧ oaiä, jabechji̧ na̧e chiarea̧ dadëa̧dirȩ. Ado Jechu judi ji̧ri̧ ni̧bä chjaoa̧ ji̧, jabechji̧ cjapiri̧ cjiadiäa̧dirȩ. Dëbë yo̧rea̧ dadëa̧diro̧jo̧ȩ.

⁴¹ Ado Jechu judi ado chjereno̧ jäeno̧a̧de jibëa̧ Ama̧i̧ ju̧i̧ ni̧bäpea̧ oa. Ado ni̧bä ëte ado chjereno̧ goëdepea̧dejȩrȩ jibëa̧ jadü ji̧ri̧. Ado mo̧a̧ cjiaji̧ri̧ oa daea̧dejȩrȩ ado chjereno̧. Ado yo̧a̧dejȩrȩ: —¿Ji̧dë ma mo̧a̧tämi̧ cjianȩrȩ mȩnȩro̧? ¿Ji̧dë ma järätä järätä mo̧a̧nȩrȩ mȩnȩro̧? Jabechji̧de yaba̧. Danȩrȩ, chjaodëri̧ acji jana̧padiro̧coe chjai̧dëri̧ japaji̧ri̧ judiro̧. Tjamo̧ davä. Pumȩrȩ Ara̧ Tjamo̧ pio ju̧i̧ acji jana̧padiro̧coe. Ado chjai̧dëri̧ japaji̧ri̧ pio ji̧ri̧iäpȩmo̧ yürüpadiro̧coe.

⁴² Jaechji̧ibe. Cjitëchji̧vä. Jätärȩ. Jabechji̧ pio coa mitëtä yürümȩ pio judi acji jana̧diibe. Jätärȩ —yo̧mȩrȩ yo̧rëremȩdejȩrȩ Jechu judi jibëa̧ jadü ji̧ri̧.

Mitërëreji̧ri̧diro̧jo̧ȩ Jechu ju̧i̧

⁴³ Ado Jechu judi jibëa̧ jadü pio ji̧ri̧ nö̧ta jabë ni̧bä chjaodärädëa̧rä, chjaodëri̧ acji jana̧rëremȩdejȩ Juda judi, Jechu ja̧ jadü cja̧rȩmȩrȩ. Jabechji̧ Jechu judi jibëa̧ jadü pio ji̧ri̧ pearä mitërërea̧ ji̧, 12 pumȩ ji̧ri̧ mitërëremȩdejȩrȩ, Juda pio ju̧i̧bo. Ado pio judi acji jana̧dejȩ Jechu ju̧i̧. Ado pio ju̧i̧ nö̧ta jana̧reji̧ri̧ pio judiro̧ ji̧ra̧ tjamo̧rëreji̧ri̧dirȩ. Araji̧ri̧rȩ acji jana̧rëreji̧ri̧diro̧jo̧ȩ. Tjapënȩ jujuai̧ oa, dëbëribo jo̧dë chiamȩ tjapënȩ oa araji̧ri̧rȩ, gu̧na̧rea̧ tobo araji̧ri̧rȩ acji jana̧rëreji̧ri̧diro̧jo̧ȩ. Tjamo̧ yo̧ji̧ri̧ pio judiro̧ chjadüa̧ oa acji jana̧diro̧jo̧ȩ. Ado tjamo̧ goë tuti ja̧bepaji̧ri̧ pio judiro̧borë, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë, ado judio ütëti̧ pio judiro̧borë chjadüa̧ oa acji jana̧diro̧jo̧ȩ.

⁴⁴ Juda judi, Jechu ju̧i̧ mitërea̧mi̧ dari̧ yürümȩ pio judi, jabërä ma̧ȩ yürürëremȩdejȩrȩ pio jȩa nö̧ta jana̧reji̧ri̧ pio ji̧ri̧: "Danȩrȩ, na̧rȩmi̧ dari̧ yürüparequededibe. Cüdë ya i̧bupea̧ pio judi mitëpea̧de. Pio judi ëba baäpea̧de. Pio judi chjadëri̧ jidapea̧de judi a̧dë cjarapachea oa." Aja̧, Ja̧di ta̧rëri̧ ma̧ȩ yürürëremȩdejȩrȩ Juda judi jabërä.

⁴⁵ Pio ju̧i̧iä Juda judi chjaodëri̧ jäeno̧a̧dejȩ Jechu pio ju̧i̧iäpȩ. Ado yo̧a̧dejȩ: —A̧ra̧ano̧mȩ. Ado ja̧di ta̧rëri̧ yo̧ ëte, ya i̧bua̧dejȩ.

⁴⁶ Ado ja̧dëa ji̧ chjaodëri̧ acji jana̧diro̧jo̧ȩ. Ado chjuari̧ mitërëreji̧ri̧diro̧jo̧ȩ.

⁴⁷ Jabo Jechu ja̧ jadü judi cja̧rȩmȩrȩ chjaodëri̧ coëno̧a̧dejȩ jibëa̧ coanarea̧ oa. Tjamo̧ davä. Tjamo̧ goë tuti ja̧bepamȩ ja̧ mu̧i̧tjoi̧ pio ju̧i̧ ja̧ ta̧ra̧ oa tuti gu̧na̧mȩrȩ goae tarari̧ tuti gu̧neno̧a̧dejȩ mu̧i̧ chjuari ja̧ ta̧ra̧ pio ju̧i̧, ta̧ra̧ cotope bagari̧.

⁴⁸ Ado Jechu judi jȩa acji jana̧ji̧ri̧ pio ji̧ri̧ iëno̧ë ta̧rëa̧dejȩrȩ: —¿Tjana̧ ju̧i̧iä ma̧i̧ da garü chjaomȩmi̧ da oa acji jana̧renȩro̧coe, pumȩ chjai̧dëmi̧ da oa? Jabechji̧ to araji̧ri̧rȩ acji jana̧renȩro̧coe, tjapënȩbo?

⁴⁹ Danȩrȩ, cüdë pio dibë nö̧ta Ütë tjamo̧ ja̧ bëräpȩ ju̧ri̧ doti̧mi̧ ëba cjiarä judirä, jabechji̧ peadë mitëa̧täreji̧ri̧renȩro̧coe cüdë tjamo̧ri̧ chjai̧dëri̧ japea̧rä judi. Jabo cjäri̧ marenȩro̧coe, jabechji̧ jabërä go̧ȩpea̧ oa cjiarërea̧ ma̧ȩ üdë tjamo̧i̧ cjiari̧ cjiadiäpea̧ oa, jabechji̧ mitërea̧ dadëa̧renȩro̧coe —yo̧mȩrȩ yo̧rëremȩdejȩrȩ Jechu judi.

⁵⁰ Ja̧dëa ji̧ Jechu ja̧ jadü judiro̧ ütëborë chjaodëri̧ a̧dë bagureno̧a̧diro̧jo̧ȩ jibëa̧ma̧i̧ cjiadiäri̧.

⁵¹ Jabo cja̧rȩmȩ pumȩrȩ, Jechu ja̧ jadüdërë, pea ütëpea̧mȩ üi̧ judi chjöchja ina̧rea̧ maeara̧ ina̧ oa cjiamȩrȩ cho̧rë jätea̧dejȩ Jechu ju̧i̧. Jabo pio ju̧i̧bo mitëtämi̧ cjiaji̧ri̧rȩ mitëtea̧diro̧jo̧ȩ,

⁵² jabo jibëa̧ chjöchja ina̧rea̧ pio ju̧i̧ a̧dë bagureno̧mȩrȩ a̧dë baäeno̧a̧dejȩrȩ i maearë.

Jechu pio ju̧i̧ cjia tänȩrëreji̧ri̧diro̧jo̧ȩ tjamo̧ yo̧ji̧ri̧ ja̧ dëbëräpȩ

⁵³ Jechu ju̧i̧ mitëa̧ji̧ri̧ pio judiro̧ ëba järëreji̧ri̧diro̧jo̧ȩ tjamo̧ goë tuti ja̧bepamȩ pio ju̧i̧ ja̧ bëräpȩ. Ju̧ri̧pȩ a̧dopea̧ oa cjiarëreji̧ri̧dirȩ tjamo̧ yo̧ji̧ri̧ judiro̧. Goë tuti ja̧bepaji̧ri̧ ütëborë, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, ado judio ütëti̧ pio judiro̧borë a̧dopea̧ oa cjiarëreji̧ri̧dirȩ.

⁵⁴ Ado Pedro judi, duriräpȩ cjiamȩrȩ jaerira̧ cho̧rë järëremȩdejȩrȩ tjamo̧ goë tuti ja̧bepamȩ pio ju̧i̧ ja̧ bëräpȩ yuro. Ado bë yuro oa tutia̧ oa cjiarëremȩde tutirea̧ uë tjamo̧ra̧. Ado Pedro judi tutirea̧ yari pio judiri yu̧ë chjätämȩrȩ järëremȩde cjo̧dëräpȩ ju̧ri̧ chapea̧ oa. Aja̧ judi chjöchja tara cjo̧dë yuroro chaji̧ri̧ pio ji̧ri̧ nö̧ta ëba charëremȩdejȩrȩ, joë ya jidaji̧ri̧ mu̧i̧tjoi̧ pio ji̧ri̧ nö̧ta.

⁵⁵ Ado tjamo̧ goë tuti ja̧bepaji̧ri̧ judiro̧, ado tjamo̧ ütarë yo̧ji̧ri̧ judio pio judiro̧ ütëborë iëno̧ iëno̧ ta̧rëtarëreji̧ri̧diro̧jȩrȩ pumȩ ji̧ra̧ oa Jechu pio ju̧i̧ chjiari. 'Aja̧, Jechu judi chjai̧dë oa japea̧rä judi, 'Aja̧, daba jirodiro̧da, ado pio ji̧ri̧iä ta̧rë ëte ja̧bo tänȩpai̧ daa̧ro̧ju̧i̧da' quëna̧ jo̧rȩtaji̧ri̧rȩ iëno̧ iëno̧ ta̧rëtarëreji̧ri̧diro̧jȩrȩ, jabo cjäri̧ madiro̧jo̧ȩ, Jechu pio ju̧i̧iäpȩmo̧ aechide yo̧rea̧ dadë marëreji̧ri̧diro̧jo̧ȩ.

⁵⁶ Jabechji̧ o judiro̧ no̧i̧dërë Jechu pio ju̧i̧ chjiari ma̧ȩ chjádë yürüa̧räbo, tjamo̧ yo̧ji̧ri̧ judiro̧ ta̧rë ja̧bodëa̧diro̧jȩrȩ jënȩro̧ cja̧rȩmȩ coëma cjiari̧ yo̧dëa̧ oaiä, yo̧a̧ri̧ ma̧ȩ ni̧bäji̧ri̧mi̧ dari̧ ni̧bäa̧ oaiä.

⁵⁷ Ado ja̧dëa ji̧ o judiro̧ peaja̧di ma̧ȩ chjádë ni̧bäa̧dirȩ Jechu pio ju̧i̧ chjiari. Ja̧di ta̧rëri̧ yo̧a̧dirȩ:

⁵⁸ —Aja̧, Jechu judi Ütë tjamo̧ ja̧ bë pio ju̧i̧ chjiari ni̧bäa̧mȩ oa ta̧rëa̧rea̧ro̧jo̧ȩ. "Aja̧, Ütë tjamo̧ ja̧ bë pio yoaje, pumȩ judiro̧ japea̧ pio ju̧i̧ iëchäpareconȩ. Ado tjarari̧ do chjätä ëte, jabechji̧ pumȩrȩ japadëa̧ oa cji̧deno̧pareconȩ ado cja̧rȩmo̧ oa" yo̧mȩ oa ta̧rëa̧rea̧ro̧jo̧ȩ —yo̧ji̧ri̧rȩ aechide yo̧a̧diro̧jo̧ȩ Jechu pio ju̧i̧iäpȩmo̧.

⁵⁹ Jabo pio judiro̧borë cja̧rȩmȩ coëma cjiari̧ yo̧dëa̧dirȩ. Jabechji̧ yo̧a̧ri̧ ma̧ȩ ni̧bäji̧ri̧mi̧ dari̧ ni̧bärëreji̧ri̧dirȩ chjarapë jo̧rȩtaji̧ri̧rȩ.

⁶⁰ Ja̧dëa ji̧ tjamo̧ goë tuti ja̧bepamȩ pio judi ütëbo ja̧ dëbëräpȩ cjitëmȩrȩ iëno̧ë ta̧rëa̧dejȩ Jechu ju̧i̧: —¿Yö̧ta dari̧ yo̧panȩ mȩnȩ? Danȩ, ta̧rëa̧nȩ judiro̧ yo̧a̧ pio ju̧i̧ chjiari, mȩnȩ chjai̧dëri̧ japea̧ pio ju̧i̧ chjiari. ¿Yö̧ta dari̧ yo̧panȩ mȩnȩ? Pio mȩaiäpȩmo̧ aechide ni̧bäa̧ji̧ri̧ pio ji̧ri̧iäpȩmo̧ ¿ba dëbë yo̧dëpanȩ? —iëno̧ë ta̧rëa̧dejȩ.

⁶¹ Jabo Jechu judi cjapiri̧ cjiadiärëremȩde. Dëbë yo̧dëa̧dejȩ. Ado tjamo̧ goë tuti ja̧bepamȩ pio judi ado chjereno̧ iëno̧ë ta̧rëa̧dejȩ: —Danȩ, ¿Chjätä Tänȩmȩ pio judidënȩ? ¿Pumȩrȩ chjacjiamȩri̧ ni̧bäa̧ Ütë pio ju̧i̧ ja̧ Jadënȩ? —iëno̧ë ta̧rëa̧dejȩ.

⁶² Ado Jechu judi dëbë yo̧a̧dejȩ: —Dëdë, pio judirequede —dëbë yo̧a̧dejȩ Jechu judi—. Ado a̧dë chjäte ba chia tjamo̧räpȩ chamȩ oa daparenȩro̧coe Pumȩrȩ Ara̧ Tjamo̧ pio ju̧i̧ a̧dëräpȩmȩ oa. Tjamo̧ davä. A̧dë chjäte jauëchjamȩ Ütë pio ju̧i̧ ja̧ mu̧i̧ chjuari chamȩ oa daparenȩro̧coe. Ado a̧dëri pio judiri go̧a̧ra̧ ërä ma̧na̧mȩ oa peaja̧di daparenȩro̧coe —yo̧mȩrȩ dëbë yo̧a̧dejȩ Jechu judi.

⁶³ Ado tjamo̧ goë tuti ja̧bepamȩ judi pio jiro ma̧ȩ oa ta̧rëa̧ oaiä, chjaodëri̧ mu̧i̧ quira̧dejȩ jibëa̧ chjibo oa, ana̧ri̧ jo̧rȩtamȩrȩ. Ado yo̧a̧dejȩrȩ tjamo̧ yo̧ji̧ri̧ pio ji̧ri̧iäpȩmo̧: —Danȩrȩ, irä ta̧rëa̧rea̧ro̧jo̧ȩ judi yo̧a̧ pio ju̧i̧. Ado pio ju̧i̧iä jabechji̧de yaba̧ —yo̧a̧de—. ‘Ado judiri ado cja̧rȩmo̧ pumȩ pio ju̧i̧ia a̧de ta̧rëpea̧ chia jiroa̧ro̧da’ quëna̧rea̧mi̧dëde. Jabechji̧ judi jibëa̧ yara̧ yo̧a̧ pio ju̧i̧ irä ta̧rëa̧ maearea̧rȩ.

⁶⁴ Ado mȩnȩro̧ irä ta̧rëa̧ oaiä, judi Ütë tjamo̧ pio ju̧i̧iäpȩmo̧ a̧dë chjäte chjai̧dëri̧ yo̧a̧ pio ju̧i̧ irä ta̧rëa̧ oaiä, ¿yö̧ta dari̧ jo̧rȩtanȩrȩ? Danȩrȩ, judi yo̧a̧ pio ju̧i̧ ta̧rëa̧ oaiä, "Aja̧, Ütë pio ju̧i̧ ja̧ Jarequede" yo̧a̧mȩ oa ta̧rëa̧ oaiä, judi ma̧ȩ chjádë oa ni̧bäa̧mȩ oa ta̧rëa̧ oaiä, ¿yö̧ta jo̧rȩtanȩrȩ. ¿Yö̧ta dari̧ japapea̧de Jechu pio ju̧i̧? Yo̧chji̧coe —yo̧rëremȩdejȩrȩ tjamo̧ yo̧ji̧ri̧ pio ji̧ri̧iäpȩmo̧ tjamo̧ goë tuti ja̧bepamȩ judi. Ado tjamo̧ yo̧ji̧ri̧ judiro̧ ütëborë cja̧rȩmȩ chji̧ chiami̧ dari̧ jo̧rȩtaji̧ri̧pea̧dirȩ Jechu pio ju̧i̧ chjiari. 'Aja̧, a̧dë chjäte chjai̧dëri̧ ni̧bäa̧dida, ja̧bopea̧ chiadida' quëna̧ jo̧rȩtaji̧ri̧rȩ yo̧rëreji̧ri̧diro̧jo̧ȩ.

⁶⁵ Ja̧dëa ji̧ o judiro̧ taruparëreji̧ri̧dirȩ Jechu pio ju̧i̧ a̧ra̧ a̧ra̧ pju̧i̧no̧pea̧ ji̧. Ado chjibo pënȩi̧ra̧ ina̧diro̧jo̧ȩ jibëa̧ dacho oa. Ado goae tarari̧ ano̧ mire cjae cjae gua̧diro̧jo̧ȩ. Ado iëno̧ë ta̧rëa̧diro̧jo̧ȩ Jechu ju̧i̧: —Aja̧, chjadëri̧ yo̧ibe. ¿Chjiade mȩa cjae cjae guamȩ judi? Ado ja̧dëa ji̧ Ütë tjamo̧ ja̧ bëräpȩ ja̧bepaji̧ri̧ mu̧i̧tjoi̧ pio judiro̧ ano̧ mire mitëa̧diro̧jo̧ȩ. Ado peaja̧di conȩdaji̧ri̧rȩ bide cjaeä chjaorëreji̧ri̧diro̧jo̧ȩ.

Pedro judi ma̧ȩ chjádë yürürëremȩde Jechu pio ju̧i̧ chjiari

⁶⁶ Ado Pedro judi jo̧ dairäpȩ tutia̧rä charëremȩde. Ado tjamo̧ goë tuti ja̧bepamȩ pio ju̧i̧ ja̧ mu̧i̧toi̧ pio jini̧ dae chjätäa̧nȩjȩ.

⁶⁷ Ado cjo̧dë yuroro chamȩ oa daea̧ ji̧, pio ju̧i̧ ja̧ dacho oa dëbë dayi̧rȩ yo̧rëreyi̧nȩjȩ: —Danȩ, pio mȩnȩborë Jechu pio ju̧i̧ ëba tai̧remȩrenȩ. Tjamo̧ davä. Nachare quȩmȩ bë ma̧ri̧ri pio judirimȩ pio ju̧i̧ ja̧ jadürenȩ —yo̧a̧nȩjȩ.

⁶⁸ Jabo Pedro judi ma̧ȩ chjádë yürümȩrȩ dëbë yo̧a̧dejȩ: —Cjäri̧ maquë. Mȩnȩ coa yo̧a̧ pio ju̧i̧, 'chjia ju̧i̧ chjiari yo̧ni̧coada' quëna̧ dabadëque. Pio jiro üi̧ oa dabadëcuni̧ cüdë —dëbë yo̧a̧dejȩ. Ado ja̧di ta̧rëri̧ yo̧ ëte Pedro judi a̧dë jäeno̧a̧dejȩ tutirea̧ yaräpȩmo̧. Ado ja̧dëa ji̧ ocararo üi̧ üdë chjaodëri̧ eamȩpea̧de.

⁶⁹ Jabo pio jiro iei̧ mu̧i̧tjoi̧ jini̧ pio idëpȩ ano̧ mire chamȩ oa peaja̧di daea̧nȩjȩ. Ado ji̧ ja̧ yuro cjiaji̧ri̧ oa peaja̧di yo̧a̧nȩjȩrȩ: —Danȩrȩ, pio üdëje Jechu pio ju̧i̧ ja̧ jadüde —yo̧a̧nȩjȩrȩ.

⁷⁰ Jabo Pedro judi ado dëbë yo̧a̧dejȩ: —Cjäri̧ maquë, ju̧i̧ ja̧ jadüdëquë —dëbë yo̧a̧dejȩ. Ado ji̧dë duri oa japamitë boi̧chji̧ chjätä ëte, Pedro pio ju̧i̧ nö̧ta cjiaji̧ri̧ pio judiro̧borë yo̧a̧diro̧jo̧ȩ: —Danȩ, Jechu ja̧ jadü pio judi tjamo̧renȩ. Ado Garirea chiriri pio judirimȩrenȩ ji̧dëri̧. Pio judirimȩmi̧ dari̧ ni̧bämȩrenȩ. Ja̧di tara, "Pio ju̧i̧ ja̧ jadüdërequede" yo̧rea̧mi̧dërenȩ —yo̧a̧diro̧jo̧ȩ.

⁷¹ Jabo ji̧dë ma Jechu ju̧i̧ dabadëcji̧ quëna̧ ni̧bämȩrȩ to̧bari̧ dëbë yo̧a̧dejȩrȩ: —Jaboti̧ri̧ yo̧renȩro̧coe. Danȩrȩ, tjamo̧ri̧ dabadëreconȩ. 'Jabechji̧ pio judidida' quëna̧ dabadë marequede —yo̧a̧dejȩrȩ—. Danȩrȩ, tjamo̧i̧ cjiari̧ yo̧mȩrȩ ma̧ȩ yürürequededibe teracabari̧ yo̧rea̧ decjiari̧. Ado ca̧ ma̧ȩ üdë coëma cjiari̧ baädërä judi, jabechji̧ bapë chjaotädique Ütë tjamo̧ judi —yo̧mȩrȩ dëbë yo̧rëremȩdejȩrȩ.

⁷² Ado chjaodëri̧ eamȩpea̧de ado ocararo üi̧ üdë. Cja̧rȩmȩ coi̧mo̧i̧ earërea̧ ji̧, ado chjereno̧ eamȩpea̧de. Ado pio ju̧i̧ ta̧rëa̧ oaiä, chjaodëri̧ jo̧rȩtamȩpea̧de Pedro judi Jechurë pio jȩaiäpȩmo̧ jabërä yo̧a̧rea̧ pio ju̧i̧: "Danȩ Pedro, pio yaba̧ gȩnȩrä ocararo üi̧rȩ jabë yo̧a̧ri̧ co eadëa̧rä, tjarari̧ co ma̧ȩ chjádë yürüparenȩ pio coa chjiari" yo̧a̧ ma̧ȩ pio ju̧i̧, "Pio coa dabadëcji̧ quëna̧ yo̧mȩrȩ ma̧ȩ chjádë yürüparenȩ pio coa chjiari" yo̧a̧ ma̧ȩ pio ju̧i̧ jo̧rȩtamȩpea̧de. Ado pio ju̧i̧iä Pedro judi a̧dë chjäte ana̧ri̧ jo̧rȩtamȩrȩ to̧bari̧ ejaro cjiamȩpea̧de.