Marcos 13 - Biblia Pume

Ütë tjamo̧ ja̧ bë pio ju̧i̧ iëchäpadiro̧jo̧ȩ

¹ Ado Jechu judi Ütë tjamo̧ ja̧ bëri judiri go̧düa̧ ji̧, jibëa̧ jadü cja̧rȩmȩrȩ ni̧bä chjaorëremȩdejȩ Ütë tjamo̧ ja̧ bë pio ju̧i̧ chjiari: —Danȩ A̧ra̧ano̧mȩ, ta̧dë ana̧ tjamo̧ra̧ cji̧däa̧ oa cjiade Ütë tjamo̧ ja̧ bë üdë. Tjamo̧ davä, bë üdë boi̧dë tjamo̧rȩ cji̧däa̧ oa cjiade chjadëri̧ —yo̧a̧dejȩ.

² Ado Jechu judi dëbë yo̧a̧dejȩ: —Tjamo̧ri̧ yo̧renȩ. Ütë tjamo̧ ja̧ bë üdë boi̧dë tjamo̧de. Jabo danȩ, iëchäa̧ oa cjia mapade. Cja̧rȩmȩ ta̧dë üdë jibëa̧ jadüremȩrä charea̧mi̧dëri̧ cjia mapade. Jabechji̧ daburäpȩmo̧ aeno̧a̧ oa cjiapa maeade ütëborë —dëbë yo̧a̧dejȩ Jechu judi.

'Aja̧, cjiadiärea̧ japamitë üdë ma̧na̧na̧ra̧pea̧ ji̧ querediädiibëda yaba̧' quëna̧pea̧ oa ni̧bä chjaorëremȩdejȩrȩ Jechu judi

³ Ado Jechu judi Orivo quȩmȩ ya̧mi̧ oa bua baäa̧ duri oa, chadärärëremȩde Ütë tjamo̧ ja̧ bë dëbëräpȩ, jachi tjamo̧dëräpȩ. Ado ju̧ri̧pȩ chamȩ oa jibëa̧ jadü judiro̧ orë iëno̧ë ta̧rërëreji̧ri̧diro̧jo̧ȩ. Aja̧, Pedro judi, Santiago judi, Juan judi, ado A̧däre judi jibëa̧ma̧i̧ cjiaji̧ri̧rȩ iëno̧ë ta̧rërëreji̧ri̧diro̧jo̧ȩ, ja̧di ta̧rëri̧ yo̧ji̧ri̧rȩ:

⁴ —Danȩ, chjadëri̧ yo̧ibe mȩnȩ pea̧ yo̧a̧ pio ju̧i̧ chjiari. Danȩ, mȩnȩ Ütë tjamo̧ ja̧ bë pio ju̧i̧ chjiari pio yabo yo̧a̧ ji̧, jabechji̧ chjadëri̧ yo̧ibe. ¿Naparä iëchäa̧ oa cjiapade? Ado bë üdë iëchäpea̧ ji̧ querediä tjamo̧ro, ¿tjana̧ na̧rȩrea̧ oa daparea̧rȩ? Cjiadiärea̧ japamitë üdë ma̧na̧ querediärä ¿tjana̧ na̧rȩrea̧ oa daparea̧rȩ? A̧ro̧rȩ chjadëri̧ ütarë jo̧rȩtapea̧ oa chjadëri̧ yo̧ibe —yo̧rëreji̧ri̧diro̧jo̧ȩ.

⁵ Ado Jechu judi ja̧di ta̧rëri̧ yo̧mȩrȩ dëbë yo̧a̧dejȩrȩ: —Danȩrȩ, na̧e chia tjamo̧chji̧vä eami̧ pumȩ üdë pio dibë u̧i̧pachea oa —yo̧a̧dejȩrȩ—.

⁶ Jabechji̧ ji̧dë duri oa no̧i̧dë tjamo̧rȩ go̧düdäräpadirȩ pio cüdëcji̧ quëna̧ japaji̧ri̧rȩ, pio coa daede japaji̧ri̧rȩ. "Aja̧, Ütërë mitëa̧ Chjätä Tänȩmȩ pio judi tjamo̧requede" yo̧padiro̧dibe. Ado no̧i̧dërë u̧i̧pea̧ oa cjia̧ oaiä ta̧rë ja̧bopadiro̧jȩrȩ. Pio ju̧i̧iä yo̧requededibe ca̧ jadü. Na̧e chjiachji̧vä.

⁷ Ado danȩrȩ pio judirä japamitë chjätä ëte, mȩnȩro̧ babui̧ra̧ goë goë ta̧rërä, "Aja̧, pio jiro chiriräpȩ cjo̧ro̧ji̧ri̧ judiro, ibëa̧ chiri queri̧räpȩ cjo̧ro̧ji̧ri̧ pio judiro̧ jibëa̧ dëbëti̧ra̧ chia acji tai̧ chjaovedirȩ" yo̧a̧ oa ta̧rërä, jabechji̧ ana̧ri̧ jo̧rȩtadëchji̧vä. Ado pumȩrȩ yo̧a̧ oa ta̧rërä, "Aja̧, jachiti̧ oa a̧rȩmȩ chiriräpȩ cjo̧ro̧ji̧ri̧ pio judiro̧ o ji̧ri̧iäpȩmo̧ ja̧bo tänȩpea̧ oa acji go̧düdärärëreji̧ri̧vedirȩ" goë goë yo̧a̧ oa ta̧rërä, peaja̧di bücjüri̧ cjiadëchji̧vä. Jabechji̧ ja̧di dari̧ japapadirȩ. Jabo judiro̧ ja̧di dari̧ acji tai̧ chjaoräbo, jabë pjärämȩde cjiadiäa̧ japamitë üdë. Jabë ma̧na̧na̧ra̧dëa̧didibe —yo̧a̧dejȩrȩ.

⁸ Jabechji̧ cja̧rȩmȩ chiriräpȩ cjo̧ro̧ji̧ri̧ judiro̧ acji jä chjaopadiro̧jȩrȩ ado cja̧rȩmo̧ chiriräpȩ cjo̧ro̧ji̧ri̧ pio ji̧ri̧iäpȩmo̧ —yo̧a̧dejȩrȩ—. Ado chiri ütë ja̧ chja̧oerä cjo̧ro̧ji̧ri̧ pio judiro̧, jabechji̧ acji jä chjaopadiro̧jȩrȩ ado cja̧rȩmo̧ chiri ütë ja̧ chja̧oerä cjo̧ro̧ji̧ri̧ pio ji̧ri̧iäpȩmo̧. Aja̧, ja̧di ma, ja̧di ma jape chjaopadirȩ. Ado judirä judirä oëra̧ti̧ oa a̧rȩmȩ chiri üdë, jabechji̧ a̧dë chjäte ma̧i̧ dari̧ jö̧nö̧jö̧nö̧a maeari̧ cjiapade ja̧di dari̧ cjiadërea̧ ji̧. Ado peaja̧di chiri üdë chjadëri̧ yürürërea̧ ji̧, jurarea̧ oa chjadëri̧ yürürërea̧ ji̧, jurarea̧ yürüdëpe bagapade. Ado ta̧mȩcho̧ ja̧bo tjamo̧ji̧ri̧rȩ cjo̧ro̧padirȩ pumȩ judiro̧. Aja̧, ja̧di dari̧ tarupapade gito ana̧ri̧ tarapea̧ üdë cjiadiärea̧ japamitërä. Ado chiri üdë ja̧di dari̧ cjiarä, jabechji̧ boi̧chji̧ pio ju̧i̧ arapayi̧mi̧ dari̧ cjiapade. Danȩrȩ iei̧ jini̧ arapea̧ querediärä, jabechji̧ jaerira̧ tarupadejȩ gito üdë acärä. Peaja̧dimi̧ dari̧ cjiapade. Jaerira̧ tarupapade a̧dë chjäte ma̧i̧ dari̧ japapea̧ ji̧ —yo̧mȩrȩ ni̧bä chjaorëremȩdejȩrȩ Jechu judi.

⁹ Ado ji̧dë u̧i̧ yo̧mȩrȩ a̧de yo̧a̧dejȩrȩ: —Danȩrȩ, mȩnȩro̧ dabadëchea oa yo̧requededibe mȩnȩro̧ na̧e chiaji̧ri̧rȩ cjo̧ro̧pea̧ oa. Jabechji̧ o judiro̧ goëdëri̧ cjiapai̧ dadiro̧dibe. Ado dibë chjuari̧ mitë ëte ëba jäpai̧ dadiro̧dibe tjamo̧ ütaraji̧ri̧ pio ji̧ri̧iäpȩ. Ado aechide yo̧pai̧ dadiro̧dibe. Tjamo̧ davä. Mȩnȩro̧ ca̧ ma̧ȩrä cjo̧ro̧ tara aechide yo̧pai̧ dadiro̧dibe tjamo̧ yo̧ji̧ri̧ pio ji̧ri̧ ja̧ dachoro. Ado judiorë a̧doparea̧ bëräpȩ gitoi̧ dari̧ bide cjaeäpai̧ dadiro̧dibe peaja̧di. Jabechji̧ mȩnȩro̧ ca̧ mu̧i̧tjoi̧ tara, chiri ütë cjo̧ro̧ji̧ri̧ pio ji̧ri̧ ja̧ dëbëräpȩ cjiadärä tänȩpai̧ dadiro̧dibe. Jabo danȩrȩ, pio ji̧ri̧ ja̧ dëbëräpȩ cjiarä, pio coa chjiari chjadëri̧ ni̧bärea̧ dapanȩrȩ pio ji̧ri̧iäpȩmo̧.

¹⁰ Jabechji̧ cjiadiärea̧ japamitë üdë ma̧na̧na̧ra̧bea yaboi̧ a̧ra̧ano̧a̧ oa cjiapea̧ chiade ma̧ȩ chjadëi̧ üdë chiriräpȩti̧ oa cjo̧ro̧ji̧ri̧ pumȩ pio judiro̧ ütëbodärärë ta̧rërea̧mi̧ dari̧.

¹¹ Jabo danȩrȩ, ana̧ri̧ jo̧rȩtadëchji̧vä —yo̧a̧dejȩrȩ—. Jabechji̧ judiro̧ dibë chjuari̧ mitërä, tjamo̧ ütaraji̧ri̧ pio ji̧ri̧iäpȩ ëba jäpea̧ oa mitërä, jabërä ana̧ri̧ jo̧rȩtadëchji̧vä. ‘Chia chia, pio judiro̧ coa iëno̧ iëno̧ ta̧rërä judi, ¿yö̧ta dari̧ dëbë yo̧täremȩcjivaquiji̧ri̧?' quëna̧ jo̧rȩtadëchji̧vä jabërä. Jabechji̧ mȩnȩro̧ pio ji̧ri̧ ja̧ dëbëräpȩ cjiarä, dëbë ni̧bärea̧ yürüpadidibe Tjo tjamo̧ pio judi. Aja̧, pio judide davä dibëa̧ yarä ni̧bäpamȩ judi. Pio ju̧i̧iä yo̧requededibe. Jabechji̧ bücücjüri̧ cjiadëchji̧vä.

¹² Danȩrȩ ca̧ jadü, pio jiro japamitërä, coa eadëji̧ri̧ pio judiro̧ coa eadërërea̧mi̧ eadëpadiro̧dibe peaja̧di. Ado pio ju̧i̧iä quëna̧dëji̧ri̧ judiro̧ orë, jibëa̧ pumȩ pio ji̧ri̧iäpȩmo̧ goëdëri̧ cjiapadiro̧jȩrȩ —yo̧a̧dejȩrȩ—. Ado ja̧dëa̧ ji̧ yürüpadiro̧jȩrȩ jibë eadëji̧ri̧ pio ji̧ri̧iäpȩmo̧. Tjamo̧ davä, quëna̧ji̧ri̧ pio ji̧ri̧ ja̧bo tänȩpea̧ oa, jabechji̧ pio jibëdi ja̧ji̧ri̧ pio judiro̧ yürüpadiro̧jȩrȩ. Ado nö̧riji̧ri̧ judiro̧ orë peaja̧di dari̧ japapadiro̧jȩrȩ jibëa̧ u̧ri̧ pio ji̧ri̧. Tjamo̧ davä. Jibëa̧ u̧ri̧ judiro̧ pio coaiäpȩmo̧ quëna̧ji̧ri̧pea̧ oaiä, quëna̧ji̧ri̧ pio ji̧ri̧ ja̧bo tänȩtämi̧ cjiaji̧ri̧ pio ji̧ri̧iäpȩmo̧ yürüpadiro̧jȩrȩ peaja̧di. Ado u̧ri̧ judiro̧ orë peaja̧di dari̧ japapadiro̧jȩrȩ jibë nö̧riji̧ri̧ pio ji̧ri̧. Peaja̧di ja̧bo tänȩpea̧ oa yürüpadiro̧jȩrȩ

¹³ Jabechji̧ mȩnȩro̧ pio coaiäpȩmo̧ quëna̧ji̧ri̧pea̧ tara, mȩnȩro̧ pio coa cho̧rë ma̧na̧mi̧ dari̧ quëna̧ji̧ri̧pea̧ tara, jabechji̧ ütëborë goëdëri̧ cjia dapadiro̧dibe. Jabo danȩrȩ, go̧dürea̧ yürüparequededibe. Jabechji̧ mȩnȩro̧ pio coa ji̧dë ma chjuari̧ quëna̧ji̧ri̧rȩ cjo̧ro̧ oaiä, mȩnȩro̧ ma̧i̧ da chjai̧dë oa chjätäräbo ma̧ chjua jo̧rȩtaji̧ri̧rë cjo̧ro̧ oaiä, jabechji̧ go̧dürea̧ yürüparequededibe —yo̧mȩrȩ ni̧bä chjaorëremȩdejȩrȩ jibëa̧ jadü 4 oa Jechu judi cjiadiärea̧ japamitë pio ju̧i̧ chjiari.

¹⁴ Ado Jechu judi ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ: —Danȩrȩ ca̧ jadü, pio jiro japamitërä judirä, cja̧rȩmȩrȩ, a̧dë chjäte chjadëdë pumȩ pio judi cjiapade a̧dë chjäte china̧chja jo̧ tjoräpȩ ju̧ri̧. Jabechji̧ Ütë tjamo̧ ja̧ bë oa chjadëdëparȩmȩ pio judide. Ütë tjamo̧ pio ju̧i̧iä a̧dë chjäte goaedëti̧ pio judide. Ado mȩnȩro̧ pio jiro pumȩ chjadëdë tjamo̧ oa darä, a̧dë chjäte china̧chja jo̧ tjoräpȩ cjiarea̧mi̧dëmȩ oa darä, jabechji̧ na̧e chia tjamo̧pe bagatäreji̧ri̧nȩrȩ —yo̧a̧dejȩrȩ—. Jabechji̧ ja̧di dari̧ darä, Judea chiriräpȩji̧ri̧ pio mȩnȩro goae tarari̧ bagureno̧täreji̧ri̧ni̧rȩ ya̧mi̧räpȩmo̧. Pio yoa ma̧ȩ oa go̧ȩ ni̧bämȩ judi na̧e chia tjamo̧pe jämȩrȩ go̧ȩ ni̧bätädejȩ.

¹⁵ Ado eami̧ pumȩ üdë a̧dë chjäte chjai̧dëri̧ japamȩ pumȩ pio ju̧i̧ chjiari ma̧ȩ oa ta̧rërä, jibëa̧ jo̧ dairäpȩ cjiamȩrȩ ta̧rërä judi, jabechji̧ jibëa̧ jo̧ tjoräpȩmo̧ yu̧a̧dëtäremȩde. Jibëa̧ goë oa mitëno̧pea̧ oa yu̧a̧dëtäremȩde, jabo jabechji̧ goae tarari̧ bagureno̧täremȩde ya̧mi̧räpȩmo̧.

¹⁶ Ado eami̧ pumȩ üdë jibëa̧ tjadori pio judiri pio jiro pumȩ pio ju̧i̧ chjiari ta̧rërä judi, jabechji̧ jibëa̧ bëräpȩmo̧ chjibo oa mitëno̧pea̧ oa jäcjiëno̧dë matäremȩde, jabo jabechji̧ goae tarari̧ bagureno̧täremȩde peaja̧di ya̧mi̧räpȩmo̧.

¹⁷ Ado danȩrȩ, pio jiro japamitërä judirä goae tjamo̧dëpadejȩrȩ davä bo ma̧iji̧ri̧ pio ji̧ri̧. Ado bori̧ ji̧ri̧ chuchu yürüji̧ri̧ pio ji̧ri̧bo goae tjamo̧dëpadejȩrȩ. Jabechji̧ pio jiini̧ro̧ bori̧ ji̧ri̧ ëba tara, bo mai tara, jabechji̧ goae tjamo̧dëpadejȩrȩ jachi oa bagurapea̧ ji̧.

¹⁸ Ado pio ju̧i̧iä goë cjo̧dëtäreji̧ri̧renȩro̧jo̧ȩ Ütë tjamo̧ pio ju̧i̧iä chjöchja tjamo̧ro bagura tänȩchea oa.

¹⁹ Pio jiro doro jabechji̧, a̧dë chjäte gitoi̧ dari̧ cjo̧ro̧padirȩ pumȩ judiro̧. Judiro̧ cja̧rȩmȩ co ja̧di dari̧ taradërërea̧ ji̧ a̧dë chjäte ana̧ri̧ tarapadirȩ. Tjamo̧ davä. Ütë tjamo̧ judi dabu oa pearä pareapea̧ri ja̧ ja̧di dari̧ cja̧rȩmo̧ co taradëa̧dirȩ. Ado judiri taradëpadirȩ peaja̧di.

²⁰ Jabo pio jiro do üdë, pumȩrȩ ana̧ri̧ taraparea̧ do üdë ji̧ra̧ tjamo̧rä judi, jabechji̧ pumȩ judiro̧ ütëborë ja̧bo ga̧rȩ baä matäreji̧ri̧dirȩ cja̧rȩmȩrȩ chjätärea̧mi̧dëri̧. Pio ju̧i̧iä Ano̧mȩ pio judi tuti japapade pumȩ judiro̧ do ji̧ra̧ri̧ tarachea oa. Jabechji̧ judi ja̧di dari̧ quëna̧dëa̧rä judi, 'Aja̧, cüdë mitëa̧ pumȩ pio judiro̧ ana̧ri̧ tarachea oa, jabechji̧ tuti japatäremȩquëda, judiro̧ do ji̧ra̧ri̧ tarachea oa tuti japatäremȩquëda' quëna̧dëa̧rä judi, jabechji̧ ja̧bo ga̧rȩ baä matäreji̧ri̧dirȩ —yo̧mȩrȩ yo̧a̧dejȩrȩ Jechu judi.

²¹ Ado ji̧dë u̧i̧ yo̧mȩrȩ a̧de yo̧rëremȩdejȩrȩ Jechu judi: —Ado pio jiro japamitërä judirä eami̧ pumȩ üdë yo̧rä judi, 'Aja̧, dachji̧jo̧ȩ. Pio judide Chjätä Tänȩmȩ judi, Ütë tjamo̧ judi mitëa̧ pio judide' yo̧rä judi, jabechji̧ ta̧rë ja̧bodëtäreji̧ri̧renȩro̧jo̧ȩ. Ado cja̧rȩmo̧rȩ yo̧rä judi, 'Aja̧, idëpȩde Chjätä Tänȩmȩ judi' yo̧rä judi, peaja̧di ta̧rë ja̧bodëtäreji̧ri̧renȩro̧jo̧ȩ.

²² Danȩrȩ, no̧i̧dë tjamo̧padirȩ davä teracabari̧ japaji̧ri̧ judiro̧. Chjätä Tänȩmȩcji̧ quëna̧ japaji̧ri̧rȩ u̧i̧papadirȩ. Ado o judiro̧, Ütërë ea jana̧ chjadüa̧ oa ni̧bäji̧ri̧cji̧ quëna̧ japaji̧ri̧ pio judiro̧borë u̧i̧papadirȩ. Aja̧, na̧rȩrea̧ ji̧ra̧ri̧ chiaji̧ri̧rȩ na̧rȩ chjaopadirȩ jauëchja cjiari̧ japaji̧ri̧rȩ. Ana̧ri̧ japaji̧ri̧rȩ u̧i̧papadiro̧jȩrȩ pumȩ ji̧ri̧. Ado Ütë tjamo̧ ja̧ u̧ri̧ pio ji̧ri̧ tjamo̧ri̧ u̧i̧parea̧ darä judi, peaja̧di pio ji̧ri̧bo u̧i̧papai̧ dadiro̧jȩrȩ.

²³ Pio ju̧i̧iä na̧e chiachji̧vä. Jabërä yo̧a̧requededibe mȩnȩro̧ dabadëchea oa —yo̧mȩrȩ ni̧bä chjaoa̧dejȩrȩ jibëa̧ jadü 4 oa Jechu judi.

Pumȩrȩ Ara̧ Tjamo̧ pio judi ma̧na̧pade ado chjereno̧

^24-25 Ado ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ Jechu judi: —Danȩrȩ, cüdë pio yabo yo̧a̧ chjai̧dë pio judi chjätäa̧rä, a̧dë i chjö̧na̧i̧ oa jö̧nö̧jö̧nö̧a mari̧ cjia tänȩpadejȩ Ütë tjamo̧ judi. Ado a̧dëräpȩ baramȩ üdë jibëa̧ no̧romo̧ baärërea̧ ji̧, jabechji̧ oëra̧ti̧ oa ano̧ mire cjiapade. Ado do üdë chjadëri̧ tatatärea̧ ji̧, cjäri̧ made, tatadëpade. Ado gupënȩ üdë tatatärea̧ ji̧, peaja̧di tatadëpade. Ado büë üdë, jabechji̧ a̧dëri pio judiri cjatäpade.

²⁶ Ado ja̧dëa ji̧ uë tjamo̧ri pio judiri biramȩ oa dapadiro̧coe Pumȩrȩ Ara̧ Tjamo̧ pio ju̧i̧. Aja̧, ma̧i̧ dari̧ tata cjiamȩ oa, go̧a̧ra̧ ërä birë ma̧na̧mȩ oa dapadiro̧coe a̧dë chjäte jauëchjamȩ oa, ma̧i̧ dari̧ tatamȩ oa.

²⁷ Ado ja̧dëa ji̧ a̧dëriji̧ri̧ mu̧i̧tjoi̧ pio ji̧ri̧ chjadüparequedejȩrȩ chiri cotoi̧räpȩ yuro tai̧pea̧ ji̧. Aja̧, chjiaräpȩmo̧, taruräpȩmo̧, dairäpȩmo̧, oëräpȩmo̧ chjadüparequedejȩrȩ a̧dë chjäte jachiti̧ oa cja̧rȩmȩ chirirë cjiadiädëri̧. Aja̧, chiriräpȩti̧ oa jätä eamȩrȩ chjadüparequedejȩrȩ Ütërë mitëa̧ pumȩ ütëbo oa a̧dopa tänȩpea̧ oa —yo̧mȩrȩ ni̧bä chjaoa̧dejȩrȩ Jechu judi.

²⁸ Ado Jechu judi ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ jibëa̧ jadü ji̧ri̧ na̧rȩrea̧ ma̧ȩmi̧ dara̧ igera quȩmȩ to pio ju̧i̧ chjiari: —Danȩrȩ ca̧ jadü, ütarë dachji̧vä igera to pio ju̧i̧. Jabechji̧ to a̧ pio oaiä tu ji̧ra̧ri̧ chiape jäde, to pjö̧da üdë buiurea̧mi̧ dari̧. Ado pio ju̧i̧iä yo̧requededibe. Jabechji̧ tjo go̧düa̧rä, to pjö̧da chiapea̧rä, jabechji̧ jo̧no̧pea̧ ji̧ querediä tjamo̧diibëda’ quëna̧ daba darenȩro̧jo̧ȩ.

²⁹ Ado peaja̧dimi̧ dari̧ ütarë datäreji̧ri̧nȩrȩ cüdë dibë yo̧a̧ pio ju̧i̧ chjiari —yo̧a̧dejȩrȩ—. Danȩrȩ, cüdë dibë ni̧bä chjaoa̧ üdë chjätäa̧rä, 'Aja̧, querediä tjamo̧dida, Jechu judi ma̧na̧pea̧ ji̧ querediä tjamo̧dida' quëna̧ jo̧rȩtaji̧ri̧rȩ ütarë daea̧ oaiä, jabechji̧ tjamo̧ri̧ daba dapanȩrȩ.

³⁰ Ado pio ju̧i̧iä tjamo̧i̧ cjiari̧ yo̧requededibe —yo̧a̧dejȩrȩ—. Danȩrȩ, cüdë dibë pea̧ ni̧bä chjaoa̧ pio judi chjö̧na̧i̧rȩ tjamo̧i̧padäräa̧ oa cjiapade. Ado cjiadiäa̧ japami̧tërä irä dapaji̧ri̧ judiro̧, cüdë yo̧a̧ chjö̧na̧i̧ oa irä dapaji̧ri̧ pio judiro̧ orë jabë ja̧bodëa̧rä tjamo̧i̧padäräa̧ oa cjiapade. Tjamo̧ri̧ yo̧requededibe.

³¹ Danȩrȩ, a̧dë üdë bucho ana̧ cjiadëpade. Ado dabu üdë, peaja̧di bucho ana̧ cjiadëpade. Jabo ca̧ ma̧ȩ üdë bucho ana̧ cjiapade. Jabechji̧ tjamo̧i̧padäräa̧ oa cjiapade cüdë dibë ni̧bä chjaoa̧ üdë —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧, jadüchiami̧ oa, pio ji̧ri̧mo̧i̧ oa.

³² Ado ji̧dë u̧i̧ yo̧mȩrȩ a̧de yo̧a̧dejȩrȩ Jechu judi: —Danȩrȩ, eami̧ pumȩ judi cüdë ma̧na̧pea̧ pio ju̧i̧ chjiari dabadëde. 'Aja̧, pio jiro doro ma̧na̧padiibëda, do üdë yirä ma̧na̧pa jirodiibëda' quëna̧ dabarea̧mi̧dëde. A̧dëräpȩ cjiaji̧ri̧ mu̧i̧tjoi̧ pio judiro̧ peaja̧di dabadë madirȩ. Ado pio cüdëborë dabadërequede cüdë. Ja Tjamo̧mȩborë dabadërequede. Jabechji̧ ca̧ Ama̧i̧ pio judimo̧rȩ dabade.

³³ Ja̧di tara na̧e chia tjamo̧chji̧vä. Mo̧ë bëdüa̧ji̧ri̧mi̧ dari̧ cjo̧ro̧chji̧vä. 'Pio jiro doro ma̧na̧padiibëda' quëna̧rea̧mi̧dë tara, jabechji̧ ji̧dë ma na̧e chia tjamo̧chji̧vä.

³⁴ Danȩrȩ, na̧rȩrea̧ ma̧ȩmi̧ da oa ni̧bäparequededibe. Ta̧rëchji̧vä. Bë ana̧mȩ judi jachiti̧ oa baärä judi, jibëa̧ mu̧i̧tjoi̧ ji̧ra̧ oa a̧dë baärä judi, peaja̧di chjadëri̧ ütarë yo̧padejȩrȩ jënȩ baäbea yaboi̧. Cja̧rȩmȩ oa, ado cja̧rȩmo̧ oa chjadëri̧ ütarë yo̧padejȩrȩ. Jabechji̧ jibëa̧ ja̧beparea̧ oa ütarami̧ ja̧bepapea̧ oa, jabechji̧ chjadëri̧ ütarë yo̧padejȩrȩ ütëbo oa. Ado yu̧a̧rea̧ joë yaräpȩ tjamo̧ jidamȩ pio ju̧i̧bo chjadëri̧ ütarë yo̧padejȩ judi na̧e chia tjamo̧mȩrȩ jidatä, pio jënȩ ado chjereno̧ ma̧na̧pea̧ ji̧ jidatä.

³⁵ Ado peaja̧dimi̧ ta̧rëri̧ yo̧requededibe dibë. Jabechji̧ chjaocjiami̧ dari̧ cjo̧ro̧rea̧ decjiari̧ na̧e chia tjamo̧ji̧ri̧rȩ cjo̧ro̧chji̧vä. Jabechji̧ mȩnȩro̧ daba quëna̧dërä ma̧na̧parequede. Bë ana̧mȩ pio judimi̧ dari̧ ma̧na̧parequede ja̧bepaji̧ri̧ judiro̧ daba quëna̧dërä. Aja̧, gȩnȩpea̧rä ma̧na̧pai̧ darequede. Ado gȩnȩ tjomo̧ro peaja̧di ma̧na̧pai̧ darequede peaja̧di. Ado jabë gȩnȩrä dopapea̧ querediärä ma̧na̧pai̧ darequede peaja̧di. Ado peadai̧rä peaja̧di ma̧na̧pai̧ darequede.

³⁶ Ado pio ju̧i̧iä jabechji̧, na̧e chia tjamo̧chji̧vä. Eami̧ doro ma̧na̧pai̧ darequededibe. Ado mo̧a̧ cjiami̧ dari̧ cjiaji̧ri̧ oa dadärädëri̧ cjiarequededibe.

³⁷ Ja̧di tara yo̧requededibe ado. Na̧e chiachji̧vä. Pio jiro ma̧ȩ üdë ütëbodärä ja̧de —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧, jadüchiami̧ oa Jechu judi.