Marcos 12 - Biblia Pume

Na̧rȩrea̧ ma̧ȩmi̧ dara̧ a̧ra̧ano̧a̧dejȩrȩ tjado jidaji̧ri̧ pio ji̧ri̧ chjiari

¹ Jabo Jechu judi cjiadiädëmȩrȩ pio yoa na̧rȩrea̧ ma̧ȩmi̧ dara̧ a̧de ni̧bä chjaorëremȩdejȩrȩ judio tjamo̧ yo̧ji̧ri̧ ütëti̧ pio ji̧ri̧iäpȩmo̧: —Danȩrȩ, pumȩ judi cjo̧ro̧rëremȩde. Ado uva quȩmȩ jurarea̧ oa goatämi̧ cjiamȩrȩ jëdano̧rëremȩdejȩ jibëa̧ tjado oa. Ado dabu oa chjadëri̧ cabëpa ëte uva to oa chjadëri̧ guadejȩ. Pio ju̧i̧ japa ëte dai oa chjadëri̧ tüdürëremȩdejȩ ta̧dë ana̧ra̧ pio ju̧ri̧ra̧. Ado tüdü ëte, puë ana̧ oa cjarea̧dejȩ ta̧dë ana̧rä uva ui oa chjadëri̧ boeapea̧ oa. Ado pio ju̧i̧ jëdano̧ ëte, uë tjamo̧ cjiamȩ jo̧ boi̧chji̧ oa cji̧därëremȩdejȩ peaja̧di. Jabechji̧ uë tjamo̧ri pio judiri ëteräpȩmo̧ chjadëri̧ dae cjiapea̧ oa cji̧därëremȩdejȩ. Ado ja̧di dari̧ japa ëte, jibëa̧ tjado oa ja̧bepatämi̧ cjiaji̧ri̧ pio ji̧ri̧ jida tänȩrëremȩdejȩrȩ, jibëa̧ mu̧i̧tjoi̧pe jäa̧ji̧ri̧ pio ji̧ri̧. Jabechji̧ pio judiro̧ chëre boapea̧ oa, uva pio oaiä chëre boapea̧ oa, ado pio jȩaiäpȩmo̧bo uva oa yürüpea̧ oa jida tänȩrëremȩdejȩrȩ. Ado ja̧di dari̧ japa ëte tjado ana̧mȩ pio judi baärëremȩde. Jachi tjamo̧ oa, ado cja̧rȩmo̧ chiri oa baärëremȩde pio ju̧ri̧pȩ cjo̧ro̧pea̧ oa.

² Ado japamitë chjätä ëte uva üdë joechjapea̧rä, jabechji̧ tjado ana̧mȩ pio judi jachiri pio judiri chjadürëremȩdejȩ jibëa̧ mu̧i̧tjoi̧ cja̧rȩmȩ oa. Jabechji̧ jibëa̧ tjadoräpȩ jäpea̧ oa, jibëa̧ uva pio ju̧i̧ mitëpea̧ oa, pio jȩaiäpȩmo̧ goa ma̧ne yürüpea̧ oa, chjadürëremȩdejȩ.

³ Jabo cjäri̧ madiro̧jo̧ȩ. Judi chjadüa̧ mu̧i̧tjoi̧ pio judi tjadoräpȩ go̧düdäräa̧rä, uva tjado oa jidaji̧ri̧ pio judiro̧ chjadëri̧ jeatärea̧ ji̧, chjuari̧ mitërëreji̧ri̧diro̧jo̧ȩ. Ado ma̧i̧ dari̧ bide cjaeäa̧diro̧jo̧ȩ ji̧dëri̧. Ado ja̧di dari̧ japa ëte baä tänȩa̧diro̧jo̧ȩ, eami̧ oa yürüdëji̧ri̧rȩ. Tjado ana̧mȩ pio ju̧i̧ ja̧ ba oa chjadëri̧ yürü chjadütärea̧ ji̧, mö̧na̧mȩrȩ baärëremȩde mu̧i̧tjoi̧ üdë.

⁴ Ja̧dëa ji̧ tjado ana̧mȩ judi ado cja̧rȩmo̧ mu̧i̧tjoi̧ oa chjadüa̧dejȩ. Jabo cjäri̧ madiro̧jo̧ȩ, peaja̧di ma̧i̧ dari̧ japea̧diro̧jo̧ȩ. Co ji̧ra̧ri̧ gu̧na̧ chjaoa̧diro̧jo̧ȩ jibëa̧ tjübë oa. Ado jiro mu̧i̧tjoi̧ oa idëri̧ cjia tänȩpea̧ ji̧ ya̧ea̧diro̧jo̧ȩ peaja̧di.

⁵ Ja̧dëa ji̧ tjado ana̧mȩ judi cjiadiädëmȩrȩ ado cja̧rȩmo̧ mu̧i̧tjoi̧ oa ano̧ mire chjadürëremȩdejȩ. Jabo cjäri̧ madiro̧jo̧ȩ, ja̧bo tänȩa̧diro̧jo̧ȩ. Ado ji̧ri̧ uëri mu̧i̧tjoi̧ ji̧ra̧ tjamo̧ oa a̧de chjadürëremȩdejȩrȩ tjado ana̧mȩ judi jabo cjäri̧ madiro̧jo̧ȩ, ja̧di maeari̧ japea̧diro̧jȩrȩ. Jabechji̧ o ji̧ri̧ ja̧bo tänȩa̧diro̧jȩrȩ. Ado o ji̧ri̧ goe chiari̧ bide cjaeäa̧diro̧jȩrȩ. Ma̧i̧ dari̧ japea̧diro̧jȩrȩ.

⁶ Ado ja̧dëa̧ ji̧ tjado ana̧mȩ judi jibëa̧ mu̧i̧tjoi̧ maea oa chadürërea̧ ji̧, 'Aja̧, ca̧ ja pio ju̧i̧mo̧i̧ ëbacuni̧da, ea tjamo̧cuni̧da, pio ju̧i̧ chjadütäremȩcuni̧da, ca̧ ja pio ju̧i̧ ba chia dapa jirodiro̧ju̧i̧da' quëna̧ jo̧rȩtamȩrȩ ano̧ mire chjadürëremȩdejȩ jënȩ nö̧ria̧ pio ju̧i̧.

⁷ Jabo cjäri̧ madiro̧jo̧ȩ, tjado jidaji̧ri̧ judiro̧ tjado ana̧mȩ pio ju̧i̧ ja̧ joja pio ju̧i̧ daea̧ oaiä järi tjamo̧pea̧dirȩ pio ju̧i̧ ja̧bo tänȩpea̧ oa. Pio ju̧i̧iä ni̧bä chjaorëreji̧ri̧dirȩ jibëa̧ dëbëti̧ra̧: "Danȩrȩ, tjado ana̧mȩ joja tara, jabechji̧ tjado ano̧ mire mitëpamȩ pio judide yodëje. Jabo a̧ro̧rȩ pio yoaje ja̧bo tänȩrä judi, jibëa̧remȩ tjado pio ju̧i̧ mitëpai̧ darea̧rȩ bucho ana̧. Aja̧, jaeibe. Ja̧bo tänȩtäro̧jo̧ȩ" yo̧a̧dirȩ.

⁸ Pio ju̧i̧iä chjuari̧ mitëa̧diro̧jo̧ȩ joja oa ja̧bo tänȩpea̧ oa. Ado ja̧bo tänȩ ëte tjado dairäpȩmo̧ aeno̧a̧diro̧jo̧ȩ pio ju̧i̧ ja̧ icjararemȩ oa —yo̧mȩrȩ ni̧bä chjaorëremȩdejȩrȩ Jechu judi na̧rȩrea̧ ma̧ȩmi̧ dara̧.

⁹ Ado ja̧dëa ji̧ Jechu judi tjamo̧ yo̧ji̧ri̧ judio pio ji̧ri̧ iëno̧ë ta̧rëa̧dejȩrȩ, ja̧di ta̧rëri̧ yo̧mȩrȩ: —Ado yaba̧ iëno̧ë ta̧rërequededibe —yo̧a̧dejȩrȩ—. Danȩrȩ, ¿yö̧ta dari̧ jo̧rȩtanȩrȩ mȩnȩro̧? Tjado ana̧mȩ judi pio jiro pumȩ chjadëdë pio ji̧ri̧ dadärärä, jibëa̧ tjado oa jidaji̧ri̧ pio ji̧ri̧iäpȩmo̧ dadärärä, ¿tjana̧ japatäremȩdejȩrȩ? Tjana̧ japadë, jabechji̧ chjaodëri̧ ja̧bo tänȩtäremȩdejȩrȩ. Tjamo̧ davä. Pio ju̧ri̧pȩ go̧düdärä ëte, jabechji̧ ja̧bo tänȩtäremȩdejȩrȩ. Ado ja̧dëa ji̧ ado cja̧rȩmo̧ pumȩ ji̧ri̧ ano̧ mire ja̧bepa tänȩtäremȩdejȩrȩ jibëa̧ uva tjado pio ju̧i̧ chjadëri̧ jidapea̧ oa —yo̧mȩrȩ yo̧rëremȩdejȩrȩ Jechu judi.

¹⁰ Ado ji̧dë u̧i̧ yo̧mȩrȩ ja̧di ta̧rëri̧ iëno̧ë ta̧rëa̧dejȩrȩ tjamo̧ yo̧ji̧ri̧ judio pio ji̧ri̧iäpȩmo̧ Jechu judi: —Danȩrȩ, mȩnȩro̧ Ütë tjamo̧ ja̧ ma̧ȩ oa ¿go̧ȩ ni̧bädëa̧nȩrȩ? Dëdë, pio yoa ma̧ȩ oa go̧ȩ ni̧bäa̧ jironȩrȩ. Pio yoa ma̧ȩ oa daba jironȩrȩ. Aja̧, ta̧rëchji̧vä: "Ta̧dë oa jiadarëreji̧ri̧diro̧jo̧ȩ jo̧ oa cji̧däji̧ri̧ pio judiro̧. Jabo judiro̧ jiadarërea̧ ta̧dë pio judi tjamo̧ goë chamȩ ta̧dëpea̧de.

¹¹ Ano̧mȩ pio judi tänȩa̧ oaiä, a̧dë chjäte ba chia tjamo̧pea̧de ta̧dë üdë. Ado Ano̧mȩ pio judi ja̧di dari̧ japea̧ oaiä, jabechji̧ ya yabë cjiami̧ dari̧ jo̧rȩtarea̧rȩ, ma̧ chiadëri̧ cjiaji̧ri̧rȩ." Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ Jechu judi no̧mȩ tjamo̧ri ja̧ go̧ȩpea̧ oa cjiarërea̧ ma̧ȩ oa yo̧a̧ ji̧.

¹² Jabo cjäri̧ madiro̧jo̧ȩ, judio tjamo̧ yo̧ji̧ri̧ judiro̧ pio jiro ma̧ȩ oa ta̧rëa̧ oaiä, 'Jabo cjäri̧ madiibëda, pio ibë chjiari ni̧bä jirodiibëda, na̧rȩrea̧ ma̧ȩmi̧ da üdë pio ibë chjiari na̧rȩrea̧dida, pio ibëiäpȩmo̧ aechide yo̧mi̧ dari̧ ni̧bädida' quëna̧ jo̧rȩtaji̧ri̧pea̧dirȩ. Ado pio ju̧i̧iä järiji̧ri̧ tjamo̧pea̧dirȩ Jechu pio ju̧i̧ mitëpea̧ oa, pio ju̧i̧ chaäpea̧ oa. Jabo ja̧di dari̧ japatärea̧ ji̧ chjaodëri̧ uapaji̧ri̧pea̧dirȩ pumȩ buba oaiä. Pio ju̧i̧iä eami̧ oa japarea̧ dadëji̧ri̧rȩ a̧dë baärëreji̧ri̧diro̧jo̧ȩ.

Chirirä cjo̧ro̧a̧ ba oa chiri ütë cjo̧ro̧mȩ pio ju̧i̧iäpȩmo̧ chëre oa yürüpea̧ pio ju̧i̧ chjiari iëno̧ë ta̧rërëreji̧ri̧diro̧jo̧ȩ Jechu ju̧i̧

¹³ Judio tjamo̧ yo̧ji̧ri̧ pio judiro̧ chjadüa̧ oa, pjaricheo judiro̧ orë, ado Erode pio ju̧i̧ eaji̧ri̧ judiro̧ orë, goëdepea̧diro̧jo̧ȩ Jechu ju̧i̧. 'Aja, oëra̧ dëbë yo̧pai̧ da jirodida, puërä cjatä tänȩmi̧ dari̧ japarea̧ daeji̧ri̧a̧ro̧ju̧i̧da, ado oëra̧ yo̧rä judi, tjamo̧ yo̧ji̧ri̧ pio ji̧ri̧ ja̧ dachoro aechide yo̧paa̧ro̧ju̧i̧da' quëna̧ jo̧rȩtaji̧ri̧rȩ goëdepea̧diro̧jo̧ȩ.

¹⁴ Ado pio ju̧i̧iäpȩ go̧düdäräji̧ri̧rȩ yo̧a̧diro̧jo̧ȩ: —Danȩ a̧ra̧ano̧mȩ, pio mȩa chjiari dabarea̧ro̧mȩ —yo̧a̧diro̧jo̧ȩ—. ‘Aja̧, judi a̧ra̧ano̧a̧ üdë, tjamo̧i̧ cjiari̧ cjiadida, Ütë tjamo̧ judi ütarë jo̧rȩta̧ pio ju̧i̧ chjiari coëma cjiari̧ a̧ra̧ano̧dida, ado pumȩ ütëbodärä oa cja̧rȩmȩ ba chia maeara̧ damȩrȩ a̧ra̧ano̧mȩdida, pumȩ judiro̧ pio jȩa chjiari jo̧rȩta̧ pio ju̧i̧ chjiari bücjüri̧ cjiadëmȩrȩ a̧ra̧ano̧mȩdida, ja̧di tara Ütë tjamo̧ ju̧i̧iäpȩmo̧ baämȩ no̧mi̧ da pio ju̧i̧ chjiari tjamo̧i̧ cjiari̧ a̧ra̧no̧dida' quëna̧ dabarea̧ro̧mȩ pio mȩa chjiari. Ado pio ju̧i̧iä ¿yö̧ta jo̧rȩtarenȩ mȩnȩ Domano ütë pio ju̧i̧iäpȩmo̧ ba ano̧pea̧ pio ju̧i̧ chjiari? ¿Jabo Checha pio ju̧i̧iäpȩmo̧ ba ano̧pea̧de, jabo ba ano̧dëpea̧de? ¿Yö̧ta japapea̧de? —yo̧ji̧ri̧rȩ iëno̧ë ta̧rëa̧diro̧jo̧ȩ Jechu ju̧i̧, judi oëra̧ ni̧bämȩmi̧ dari̧ dëbë yo̧pea̧ oa.

¹⁵ Jabo Jechu judi, judiro̧ u̧i̧pë iëno̧ë ta̧rëa̧ pio ju̧i̧ chjiari dabamȩrȩ yo̧ë ta̧rëa̧dejȩrȩ: —¿Jabo tjana̧pea̧ oa puërä cjatä tänȩmi̧ dari̧ japatämi̧ cjiarenȩro̧coe? Danȩrȩ, goa jana̧chji̧coe cja̧rȩmȩ chëre boi̧chji̧ oa. Datämi̧ cjiareconȩ —yo̧a̧dejȩrȩ.

¹⁶ Ado pio ju̧i̧iä yürüa̧diro̧jo̧ȩ chëre boi̧chji̧ oa, go̧ȩ i chëredë oa. Ado Jechu judi iëno̧ë ta̧rëa̧dejȩrȩ: —Ado chëre üdë, ¿chjia ja̧ dacho chiade? ¿Chjia ja̧ quȩ oa go̧ȩpea̧ oa chiade? —iëno̧ë ta̧rëa̧dejȩrȩ. Ado dëbë yo̧a̧diro̧jo̧ȩ: —Chjia ja̧dë, jabechji̧ Domaräpȩ cjo̧ro̧mȩ ütë pio ju̧i̧ ja̧ dacho chiade. Pio ju̧i̧ ja̧ quȩ üdë go̧ȩpea̧ oa chiade.

¹⁷ Ado ja̧dëa ji̧ Jechu judi dëbë yo̧a̧dejȩrȩ: —Ja̧dirä judi jabechji̧, Domaräpȩ cjo̧ro̧mȩ ütë pio ju̧i̧ ja̧ oa yürüpea̧ chiarenȩro̧jo̧ȩ pio ju̧i̧iäpȩmo̧. Ado Ütë tjamo̧ pio ju̧i̧ ja̧ pio ju̧i̧ yürüpea̧ chiarenȩro̧jo̧ȩ Ütë tjamo̧ pio ju̧i̧iäpȩmo̧ —dëbë yo̧mȩrȩ yo̧a̧dejȩrȩ Jechu judi. Ado Jechu judi ja̧di ta̧rëri̧ dëbë yo̧a̧ oaiä, jabechji̧ iëno̧ë ta̧rera̧pea̧ji̧ri̧ pio judiro̧ dëbë yo̧rea̧ dadëa̧diro̧jo̧ȩ jabo jabo ya yabë cjiaji̧ri̧rȩ ana̧ tjamo̧ri̧ jo̧rȩtaji̧ri̧pea̧diro̧jo̧ȩ, dacho bëremi̧ cjiaji̧ri̧rȩ.

'Bëdürea̧ decjiadida' quëna̧ji̧ri̧ pio judiro̧ u̧i̧pe u̧i̧pe iëno̧ë ta̧rërëreji̧ri̧diro̧jo̧ȩ Jechu ju̧i̧

¹⁸ Ja̧dëa ji̧ chaducheo judiro̧ orë peaja̧di goëdaera̧pea̧diro̧jo̧ȩ Jechu ju̧i̧. Ado Chaducheo judiro̧, ¿chjiadirȩ? Chjiadëdirȩ, jabechji̧ judio pio judiro̧dirȩ. Jabo danȩrȩ, ado cja̧rȩmo̧ jo̧rȩtarea̧ chiadirȩ. 'Aja̧, ja̧boa̧ji̧ri̧ pio judiro̧ ado chjereno̧ bëdürea̧ dadëpadiro̧da, jabechji̧ bucho ana̧ ja̧boa̧mi̧ ja̧boa̧ maeadiro̧da, bëdürea̧ decjia tara ja̧boa̧mi̧ ja̧boa̧ maeadiro̧da’ quëna̧ jo̧rȩtaji̧ri̧rȩ cjo̧ro̧rëreji̧ri̧dirȩ. Ado jiro pumȩ pio judiro̧ goëdepea̧diro̧jo̧ȩ Jechu pio ju̧i̧, ja̧di ta̧rëri̧ iëno̧ë ta̧rëji̧ri̧rȩ:

¹⁹ —Danȩ a̧ra̧ano̧mȩ, no̧mȩ tjamo̧ri ja̧ Moicherea̧ pio judi go̧ȩparëremȩde ibëa̧ pio ju̧i̧. Ado ja̧di ta̧rëri̧ go̧ȩparëremȩde: “Eami̧ pumȩ üi̧ judi jibëa̧ iei̧ pio ji̧ a̧dë ja̧borä judi, jibëa̧ bori̧ pio ji̧ri̧ nö̧ridë ëte ja̧boa̧rä judi, jabechji̧ pio ju̧i̧rea̧ ja̧ jadü pio judiro̧ cja̧rȩmȩrȩ ano̧ mire ëbatäremȩdejȩ. Ado ja̧boa̧mȩ pio judi jibëa̧ u̧ri̧ pio ji̧ri̧ ëbarea̧ dadëa̧räbo, jabechji̧ ja̧ omȩ pio ju̧i̧iä ëbamȩmi̧ dari̧ cjiadiäpade.” Aja̧ Jechu, ja̧di ta̧rëri̧ go̧ȩparëremȩde Moicherea̧ pio judi.

²⁰ Ado pio ju̧i̧iä iëno̧ë ta̧rërea̧ro̧mȩ. Danȩ, no̧mȩ judi cjo̧ro̧rëreji̧ri̧dirȩ 7 oari judiro̧, oti̧ maearë, cja̧rȩmȩ chuchuro jaraji̧ri̧ pio judiro̧. Ado yabomȩ pio judi, jabechji̧ ëbarëremȩdejȩ jibëa̧ iei̧ ji̧. Jabo cjäri̧ made, judi cja̧rȩmȩ oa nö̧ritärea̧ ji̧, bori̧ ji̧ri̧ nö̧ridë ëte a̧dë ja̧boa̧dejȩ.

²¹ Ja̧dëa ji̧ jibëa̧ omȩrea̧ pio judi ano̧ mire ëbarëremȩdejȩ iei̧ ji̧. Jabo pio ju̧i̧rea̧ ja̧ durimȩ pio judiborë a̧dë ja̧boa̧dejȩ iei̧ ji̧. Judiri ja̧ji̧ri̧ ji̧ri̧ nö̧ritärea̧ ji̧, nö̧ridë ëte a̧dë ja̧boa̧dejȩ peaja̧di. Ado pio ju̧i̧iä ado cja̧rȩmo̧rȩ, pio ju̧i̧rea̧ ja̧ durimȩ pio judi ano̧ mire ëbarëremȩdejȩ. Jabo cjäri̧ made, pio judiborë chjaodëri̧ a̧dë ja̧boa̧dejȩ iei̧ pio ji̧, jibëa̧ bori̧ ji̧ri̧ nö̧ridëmȩrȩ.

²² Aja̧, ja̧di ma, ja̧di ma ano̧ mire ëbarëreji̧ri̧dirȩ pio jiro oari pio judiro̧, 7rë. Ado judiro̧ cja̧rȩmȩrȩ jibëa̧ u̧ri̧ pio ji̧ri̧ nö̧ritärea̧ ji̧, jabechji̧ nö̧rirea̧ dadë maearë ja̧bo ga̧re baärëreji̧ri̧dirȩ. Ado judiro̧ ütëborë ja̧boa̧ duri oa, pio jiro iei̧ jini̧borë, ano̧ mire ëbarëreyi̧ iei̧ pio jini̧borë ja̧boa̧nȩ.

²³ Ado yaba̧ chjadëri̧ yo̧ibe. Bëdürea̧ dobearä, ja̧boa̧ji̧ri̧ judiro̧ ütëborë bëdürea̧ dabearä, ¿chjia ja̧ iei̧panȩ pio jiro iei̧ jini̧, 7 oari oa ano̧ mire ëbarëreyi̧ iei̧ pio jini̧? ¿Chjia tjamo̧de iei̧ tjamo̧ ëbapamȩ judi? —yo̧ji̧ri̧rȩ u̧i̧pe iëno̧ ta̧rëtarëreji̧ri̧diro̧jo̧ȩ Jechu ju̧i̧, judi puëräpȩ choë cjatämi̧ dari̧ cjiapea̧ oa.

²⁴ Ado Jechu judi pio jiro ma̧ȩ oa ta̧rëa̧ oaiä, dëbë yo̧a̧dejȩrȩ: —Cjäri̧ manȩrȩ, mȩnȩro̧ ja̧di dari̧ quëna̧ji̧ri̧rȩ cjo̧ro̧ oaiä, jabechji̧ oëra̧ jo̧rȩte chjaonȩrȩ mȩnȩro̧. Mȩnȩro̧ Ütërë go̧ȩpa tänȩrërea̧ ma̧ȩ pio ju̧i̧ coëma cjiari̧ dabadë tara, Ütë tjamo̧ ja̧ jauëchja pio ju̧i̧ chjiaribo dabadë tara, jabechji̧ oëra̧ jo̧rȩtanȩrȩ —yo̧a̧dejȩrȩ—.

²⁵ Danȩrȩ, ja̧borëreji̧ri̧ pio judiro̧ bëdüa̧rä ëbarea̧ dadëpadirȩ. Jabechji̧ judiro̧ bëdüa̧ pio judiri yurori ëbadëji̧ri̧rȩ cjo̧ro̧padirȩ, jabo a̧dëräji̧ri̧ mu̧i̧tjoi̧ pio judiro̧mi̧ dari̧ ano̧ mire cjiadiä mapadirȩ ëbarea̧ decjiari̧.

²⁶ ¿Jabo go̧ȩ ni̧bädëa̧nȩrȩ? Ütë tjamo̧ judi Moiche pio ju̧i̧iäpȩmo̧ ma̧ȩ yürürërea̧ ji̧, pumȩ judiro̧ bëdüpea̧ pio ju̧i̧ chjiari ma̧ȩ oa yürürërea̧ ji̧, tjaepadëmȩ tori pio judiri ma̧ȩ yürürërea̧ ji̧, ¿go̧ȩ ni̧bädëa̧nȩrȩ? Danȩrȩ, ja̧di ta̧rëri̧ ni̧bärëremȩdejȩ Moiche pio ju̧i̧iäpȩmo̧: "Aja̧, Abaraa̧ pio ju̧i̧ ja̧ Ütërequede. Icha pio ju̧i̧ ja̧ Ütërequede. Ado Jacobo pio ju̧i̧ ja̧ Ütërequede cüdë" yo̧mȩrȩ yo̧rëremȩdejȩ Moiche pio ju̧i̧iäpȩmo̧.

²⁷ Ado Ütë tjamo̧ judi yo̧rërea̧ ma̧ȩ üdë ¿tjana̧ yo̧diibe? Tjana̧ yo̧dë, danȩrȩ Moiche judi jabë cjo̧ro̧dëa̧rä ja̧borëreji̧ri̧dirȩ pio jiro pumȩ judiro̧. Jabo danȩrȩ, judiro̧ no̧mȩ tjamo̧ri ja̧ ja̧borërea̧räbo, pio ji̧ri̧rea̧ ja̧ icjararemȩ üdë no̧mȩ tjamo̧ri ja̧ ja̧borërea̧räbo, jabechji̧ cjo̧ro̧rea̧ chiaji̧ri̧rȩ cjo̧ro̧ maeadirȩ Ütë tjamo̧ pio ju̧i̧iä. Jabechji̧ cjo̧ro̧rea̧ chiaji̧ri̧ pio ji̧ri̧ ja̧ ütëde Ütë tjamo̧ judi. Cjo̧ro̧rea̧ chiadëji̧ri̧ pio ji̧ri̧ ja̧ ütëdëde jabo cjo̧ro̧rea̧ chiaji̧ri̧ pio ji̧ri̧ ja̧ ütëde, jabechji̧ pumȩ judiro̧ ütëborë pio ju̧i̧iä cjo̧ro̧rea̧ chia maea tara. Ado pio ju̧i̧iä cjäri̧ manȩrȩ, oëra̧ jo̧rȩta maeanȩrȩ bëdürea̧ pio ju̧i̧ chjiari —yo̧mȩrȩ ni̧bä chjaorëremȩdejȩrȩ Jechu judi Chaducheo pio ji̧ri̧iäpȩmo̧.

A̧dë chjäte ba chia ma̧ȩ üdë, ¿tjana̧de? yo̧mȩrȩ iëno̧ë ta̧rërëremȩdejȩ Jechu ju̧i̧ a̧ra̧ano̧mȩ judi

²⁸ Ado üi̧ judi, Moicherë go̧ȩparërea̧ ma̧ȩ oa a̧ra̧ano̧mȩ pio judi ta̧rërëremȩdejȩrȩ chaducheo ji̧ri̧ Jechu pio ju̧i̧ dëbë ni̧bätaji̧ri̧ oa. Ado Jechu judi pio ji̧ri̧iäpȩmo̧ chjadëri̧ dëbë yo̧a̧ oaiä, 'Aja̧, chjadëri̧ dëbë yo̧a̧diji̧ri̧da' quëna̧ jo̧rȩtarëremȩde. Pio ju̧i̧iä järëremȩde Jechu pio ju̧i̧iäpȩ peaja̧di iëno̧ë ta̧rëpea̧ oa. Ja̧di ta̧rëri̧ yo̧mȩrȩ iëno̧ë ta̧rëa̧dejȩ: —Danȩ, Moicherea̧ judi go̧ȩparërea̧ ma̧ȩ üdë ji̧ra̧ tjamo̧de. Jabechji̧ tüdüa̧mi̧ darä cjo̧ro̧pea̧ ma̧ȩ üdë ji̧ra̧ tjamo̧de. Jabo yo̧coe, ¿tjana̧ ma̧ȩde o ji̧ri̧ u̧i̧ ba chia tjamo̧mȩ ma̧ȩ pio judi? —iëno̧ë ta̧rëa̧dejȩ.

²⁹ Ado Jechu judi dëbë yo̧mȩrȩ yo̧a̧dejȩ: —Danȩ, o ji̧ri̧ u̧i̧ ba chia tjamo̧mȩ ma̧ȩ pio ju̧i̧ yo̧parequede. Danȩ, ta̧rëvä Moicherë icharaita pio ji̧ri̧iäpȩmo̧ yo̧rërea̧ ma̧ȩ oa: "Aja̧, Icharai pio judiri ja̧ji̧ri̧ pio ji̧ri̧ yo̧requededibe. Jabechji̧ ütëborë chjadëri̧ ta̧rëchji̧coe. Danȩrȩ, ibëa̧ Ano̧mȩ Ütë judi, Ano̧mȩ tjamo̧ pio judide. Ado cja̧rȩmo̧ decjiade.

³⁰ Ado dibëa̧ Ano̧mȩ Ütë pio ju̧i̧ ea tjamo̧chji̧jo̧ȩ, urëdi tjamo̧ oa jo̧rȩtaji̧ri̧rȩ. Dibëa̧ jo̧rȩtarea̧ chji̧ codëra̧, pënȩmi̧ dadë maeara̧ ea tjamo̧chji̧jo̧ȩ. Jabechji̧ dibëa̧ jo̧rȩtarea̧ ütëbora̧ eachji̧jo̧ȩ, dibëa̧ yadë maeara̧. Ado dibëa̧ tjo codëra̧ peaja̧di goae tarari̧ eachji̧jo̧ȩ. Jabechji̧ dibëa̧ ju chiarea̧ra̧ pio ju̧ri̧ra̧ ea tjamo̧chji̧jo̧ȩ mȩnȩro̧ nö̧tarä yuro.

³¹ Ado danȩrȩ, pio yoa ma̧ȩbo a̧de yo̧requededibe. Dibëa̧ pumȩ pio ji̧ri̧ peaja̧di ea tjamo̧chji̧jȩrȩ. Dibëa̧ i pio ju̧i̧ eami̧ eachji̧jȩrȩ." Aja̧, pio jiro ma̧ȩ üdë o ji̧ri̧ u̧i̧ a̧dë chjäte ba chia ma̧ȩde" yo̧mȩrȩ yo̧a̧dejȩ a̧ra̧ano̧mȩ ju̧i̧ Jechu judi.

³² Ado a̧ra̧ano̧mȩ judi pio jiro ma̧ȩ oa ta̧rëa̧ oaiä, ja̧di ta̧rëri̧ dëbë yo̧a̧dejȩ Jechu ju̧i̧: —Tjamo̧i̧ cjiari̧ yo̧a̧renȩ A̧ra̧ano̧mȩ. Aja̧, Ano̧mȩ Ütë pio judimo̧de. Ado cja̧rȩmo̧ ütë decjiade. Tjamo̧ri̧ yo̧a̧renȩ.

³³ Ado ca̧ Ütë oa, aja̧ davä, ea tjamo̧pea̧ chiareconȩ ca̧ yadë maeara̧. Ado ca̧ jo̧rȩtarea̧ chji̧ codëra̧ eapea̧ chiarereconȩ peaja̧di, pënȩmi̧ dara̧ earea̧ decjiari̧. Ado ca̧ tjo codëra̧ eapea̧ chiareconȩ peaja̧di, ca̧ jo̧rȩtarea̧ ütëbora̧. Aja̧, ca̧ ju chiarea̧ra̧ eapea̧ chiareconȩ cüdë nö̧tarä yuro. Ado ca̧ pumȩ pio ji̧ri̧, jabechji̧ ca̧ icjarami̧ da oa eapea̧ chiarequedejȩrȩ peaja̧di. Tjamo̧i̧ cjiari̧ yo̧a̧renȩ. Ado pio jiro ma̧ȩ yo̧a̧ri̧ oa ta̧rëdiäpea̧ üdë, jabechji̧ Ütë tjamo̧ pio ju̧i̧iäpȩmo̧ eami̧ oa cäë yürüpea̧ pio ju̧i̧ u̧i̧ ba chiade. Tjamo̧ davä. Gu̧na̧rea̧ mechjaräpȩ ju̧ri̧ eami̧ oa goe gu̧rori̧ cäë yürüpea̧ pio ju̧i̧ u̧i̧ ba chiade pio jiro ma̧ȩ oa ta̧rëdiäpea̧ üdë —yo̧mȩrȩ dëbë yo̧rëremȩdejȩ a̧ra̧ano̧mȩ judi Jechu pio ju̧i̧iäpȩmo̧.

³⁴ Ado Jechu judi, 'Aja̧, chjadëri̧ dëbë yo̧a̧dicoada' quëna̧ jo̧rȩtamȩrȩ dëbë yo̧a̧dejȩ: —Danȩ, tjamo̧ri̧ yo̧a̧renȩ. Ado pio ju̧i̧iä yo̧requedemȩ. Jabechji̧ Ütërë yo̧a̧ chja̧oeräpȩ yu̧a̧pea̧ ji̧ queri̧mi̧ daräpȩrenȩ —yo̧a̧dejȩ. Ado Jechu judi a̧ra̧ano̧mȩ pio ju̧i̧ ja̧di ta̧rëri̧ dëbë yo̧a̧ pio judiri yurori pumȩ ütëborë uapaji̧ri̧pea̧dirȩ ado chjereno̧ iëno̧ë ta̧rëpea̧ ji̧. Jabechji̧ cjapi maearë cjiadiärëreji̧ri̧dirȩ.

"Chjätä Tänȩmȩ judi ¿yö̧ta quȩmȩrimȩde?" iëno̧ë ta̧rërëreji̧ri̧diro̧jo̧ȩ

³⁵ Ado Jechu judi Ütë tjamo̧ ja̧ bëräpȩ a̧ra̧ano̧mȩrȩ pio jȩa chjiari iëno̧ë ta̧rëa̧dejȩrȩ ta̧rë chareji̧ri̧ pio ji̧ri̧: —Danȩrȩ, "Chjätä Tänȩmȩ pio judi Davirea̧ pio judiri ja̧mȩde" yo̧dirȩ Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧. Jabo ¿tjana̧ ju̧i̧iä ja̧di ta̧rëri̧ yo̧rea̧ dadirȩ judiro̧?

³⁶ Danȩrȩ, Tjo tjamo̧ pio judi jabërä ma̧ȩ yürürërea̧ oaiä, ja̧di ta̧rëri̧ go̧ȩparëremȩde Davirea̧ pio judi. Ta̧rëchji̧vä: “Ütë tjamo̧ judi yo̧a̧dejȩ ca̧ Ano̧mȩ ju̧i̧. Pio yi chavä ca̧ mu̧i̧ chjua cotoro, a̧dë chjäte ba chiaräpȩ ju̧ri̧. Jabechji̧ pio yi chatä earequedemȩ cüdë mȩa eadëji̧ri̧ pio ji̧ri̧ ütëbodärä oa boadäräa̧rä yuro.” Aja̧, ja̧di ta̧rëri̧ go̧ȩparëremȩde Davirea̧ judi.

³⁷ Jabo yo̧chji̧coe —yo̧a̧dejȩrȩ—. Ütërë mitëa̧ Chjätä Tänȩmȩ pio judi Davirea̧ pio judiri ja̧mȩrä judi, ¿tjana̧ ju̧i̧iä ‘ca̧ Ano̧mȩdida’ quëna̧ jo̧rȩtarëremȩde jibëa̧ri ja̧mȩ pio ju̧i̧ chjiari? Chjadëri̧ yo̧chji̧coe —yo̧mȩrȩ iëno̧ë ta̧rëa̧dejȩrȩ pumȩ ji̧ri̧ Jechu judi. Ado pumȩ bubarë, jabechji̧ goaeri̧ ta̧rë ja̧bo charëreji̧ri̧diro̧jo̧ȩ Jechu ju̧i̧.

Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ chjiari na̧e chiatä eamȩrȩ ni̧bä chjaorëremȩdejȩrȩ pumȩ ji̧ri̧ Jechu judi

³⁸ Ado Jechu judi a̧ra̧ano̧mȩrȩ yo̧a̧dejȩrȩ: —Na̧e chia tjamo̧chji̧vä Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ chjiari mȩnȩro̧ pio ji̧ri̧iä u̧i̧pea̧ oa cjiachea oa. Danȩrȩ, jibëa̧ chjibo chjacjiamȩ tjamo̧ oa, go̧a̧ti̧ oa ina̧ji̧ri̧rȩ oëra̧ti̧ oa tai̧pea̧ üdë, pumȩ judiro̧ ütëborë pio jibëiäpȩmo̧ chjadëri̧ jeapea̧ üdë, jabechji̧ goae tjamo̧dejȩrȩ. Jabechji̧ judiro̧ gatë tänȩrea̧ bëräpȩ järä, jabechji̧ pumȩ judiro̧ pio jibëiäpȩmo̧ ba chia daji̧ri̧rȩ jeatä eadiro̧jȩrȩ. Aja̧, ja̧di dari̧ japapea̧ ji̧ goae tjamo̧dejȩrȩ.

³⁹ Ado judiro̧ judiorë a̧doparea̧ bëräpȩ do chjätäpea̧ doro a̧doparä, jabechji̧ jënȩro̧ eami̧ charea̧räpȩ chjadëri̧ chatärea̧ ji̧, jabechji̧ ba chia tjamo̧räpȩ charea̧ jo̧rȩta maeadirȩ. Ado pumȩ judiro̧ juraji̧ri̧rȩ a̧doparä, peaja̧di ba chia tjamo̧räpȩ chatämi̧ cjiaji̧ri̧rȩ jo̧rȩta maeadirȩ.

⁴⁰ Ado danȩ, pio jiro oari judiro̧ chjai̧dëri̧ jape chjaodiro̧jȩrȩ oari chiarëreji̧ri̧ ivi pio ji̧ri̧iäpȩmo̧. Tjamo̧ davä. Pio ji̧ri̧iä ma̧i̧ dari̧ garü chjaodirȩ. Jibëa̧ bëremȩ oa, jibëa̧ chiriremȩ oa baë mitëdiro̧jo̧ȩ, pio ji̧ri̧ u̧i̧pe ni̧bäji̧ri̧rȩ. Jabo ja̧di dari̧ japaji̧ri̧borë ma̧ȩ go̧a̧ti̧ oa ni̧bäji̧ri̧rȩ ni̧bämi̧ dari̧ japadiro̧jo̧ȩ Ütë tjamo̧ ju̧i̧iä, pumȩ chjadëcji̧ quëna̧ japaji̧ri̧rȩ. Jabo cjäri̧ madejȩrȩ, judiro̧ ja̧di dari̧ japea̧ oaiä ji̧dë u̧i̧ ana̧ri̧ bape chjaopadejȩrȩ Ütë tjamo̧ judi —yo̧mȩrȩ ni̧bä chjaorëremȩdejȩrȩ Ütë tjamo̧ ja̧ bëräpȩ a̧dope cjiaji̧ri̧ pumȩ pio ji̧ri̧iäpȩmo̧ Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ chjiari.

Üi̧ chiarëreyi̧ iei̧ pio jini̧ o ji̧ri̧ u̧i̧ yürümi̧ dari̧ yürürëreyi̧nȩ chëre oa

⁴¹ Jechu judi Ütë tjamo̧ ja̧ bëräpȩ charëremȩde chëre yürürea̧ joë dëbëräpȩ ju̧ri̧, Ütë tjamo̧ ja̧ oa yürürea̧ joë dëbëräpȩ ju̧ri̧. Jabechji̧ yürüji̧ri̧ pio ji̧ri̧ dae charëremȩdejȩrȩ chëre ji̧ra̧ri̧ goaji̧ri̧ pio ji̧ri̧, jibëa̧ chëre oa joërä gatë chäji̧ri̧ pio ji̧ri̧.

⁴² Ja̧dëa ji̧ üi̧ chiarëreyi̧ iei̧ jini̧, chjö̧na̧i̧ti̧ oa cjäri̧ ja̧boyi̧ iei̧ pio jini̧ peaja̧di jäa̧nȩ chëre yürürea̧ joëräpȩ. Ado yo̧a̧ri̧ chëre bori̧ maea oa yürüa̧nȩ ba chia tjamo̧dë oa, jabëtari̧mi̧ oa.

⁴³ Ado pio ji̧ daea̧ oaiä jibëa̧ jadü pio ji̧ri̧iäpȩmo̧ yo̧rëremȩdejerȩ Jechu judi: —Goë daera̧chji̧vä —yo̧a̧dejȩrȩ—. Tjamo̧ri̧ yo̧requededibe. Pio jiro iei̧ jini̧ o ji̧ri̧ u̧i̧ yürümi̧ dari̧ yürüa̧nȩ. Tjamo̧ davä. O judiro̧ üteborë, joërä gatë chäji̧ri̧ pio judiro̧ yürümi̧ dari̧ yürüdëa̧nȩ jabo pio ji̧ri̧ u̧i̧ ji̧ra̧ri̧ yürümi̧ dari̧ yürüa̧nȩ chëre oa.

⁴⁴ O judiro̧, jabechji̧ chëre ji̧ra̧ tjamo̧ oa goaji̧ri̧rȩ yürüa̧dirȩ jabëtari̧mi̧mi̧ da oa, jabë ji̧ra̧ri̧ goaji̧ri̧rȩ. Yuropadäräri̧ yürüdëa̧dirȩ. Jabo pio jiro iei̧ jini̧ ja̧di dari̧ yürüdëa̧nȩ. Jabechji̧ cjiadiädëri̧ yürüa̧nȩ jibëa̧ chëre chjö̧na̧i̧ oa. Jënȩ jurarea̧ oa gatëpea̧ chëre chjö̧na̧i̧ oa, jënȩ china̧chjari̧ tutia̧ chëre chö̧na̧i̧ oa yürüa̧nȩ cjiadiädëri̧. Ja̧di dari̧ yürüdëa̧dirȩ o judiro̧. Ado pio ju̧i̧iä yo̧requededibe. O ji̧ri̧ u̧i̧ ji̧ra̧ri̧ yürümi̧ dari̧ yürüa̧nȩ pio iei̧ jini̧ —yo̧mȩrȩ ni̧bä chjaorëremȩde Jechu judi.