Marcos 11 - Biblia Pume

Jechu judi yu̧a̧därärëremȩde Jerucharȩ bë ma̧ri̧räpȩ

¹ Ado Jechu judi pio jȩa nö̧ta jäji̧ri̧ judiro̧ Jerucharȩ bë ma̧ri̧ queri̧räpȩ go̧düdäräa̧rä, Orivo quȩmȩ ya̧mi̧räpȩ go̧düdäräa̧rä, Betage quȩmȩ bë ma̧ri̧ boi̧chji̧räpȩ go̧düdärärëreji̧ri̧dirȩ, Betania quȩmȩ bë ma̧ri̧ boi̧chji̧räpȩbo. Ado pio judiri jibëa̧ jadü yo̧a̧ri̧ oa yabo jätä eamȩrȩ chjadürëremȩdejȩrȩ Jechu judi.

² Ja̧di ta̧rëri̧ yo̧mȩrȩ chjadüa̧dejȩrȩ: —Danȩrȩ, ji̧dë u̧i̧ yabo jächji̧vä bë ma̧ri̧ boi̧chji̧räpȩ yuro. Ado ju̧ri̧pȩ go̧düdärä ëte, chjaodëri̧ daeji̧ri̧renȩro̧jo̧ȩ buro pëi̧ chja oa, yura̧ oa cjiamȩ oa. Pumȩrȩ cja̧rȩmȩ co buadëa̧ burode. Jabechji̧ jare ëte, mu̧i̧ ma̧na̧chji̧jo̧ȩ.

³ Ado eami̧ pumȩrȩ pio dibëiä iëno̧ë ta̧rërä judi, "¿Jabo tjana̧pea̧ oa jare ëte mu̧i̧ baärenȩro̧jo̧ȩ buro oa?" iëno̧ë ta̧rërä judi, jabechji̧ ja̧di ta̧rëri̧ dëbë yo̧chji̧jo̧ȩ: "Danȩ, Ano̧mȩ pio judi chjadüa̧ oa jana̧rea̧ro̧jo̧ȩ buro oa. Eadejȩ" yo̧ji̧ri̧rȩ dëbë yo̧eji̧ri̧renȩro̧jo̧ȩ. Ado pio ju̧i̧ ta̧rë oaiä, jabechji̧ mu̧i̧ ma̧na̧rea̧ yürüpadidibe —yo̧mȩrȩ yo̧a̧dejȩrȩ Jechu judi.

⁴ Ado Jechu judi yo̧a̧mi̧ järëreji̧ri̧dirȩ. Ado ju̧ri̧pȩ go̧düdärä ëte, daea̧diro̧jo̧ȩ buro pëi̧ chja oa. Pumȩ ja̧ bë dairäpȩmȩ oa, yu̧a̧rea̧ joë ya yuroro yura̧ oa cjiamȩ oa daea̧diro̧jo̧ȩ. Ado buro oa jareno̧a̧ ji̧

⁵ iëno̧ ta̧rëa̧diro̧jȩrȩ queri̧räpȩ dae cjiaji̧ri̧ judiro̧: —¿Tjana̧ japea̧ oa jareno̧nȩrȩ pio jiro buro oa?

⁶ Ado Jechu judi yo̧a̧mi̧ dëbë yo̧a̧ oaiä, jabechji̧ mu̧i̧ baärea̧ yürürëreji̧ri̧diro̧jȩrȩ.

⁷ Ado buro pëi̧ chja pio ju̧i̧ mu̧i̧ jäa̧diro̧jo̧ȩ Jechu pio ju̧i̧iäpȩ. Ado ja̧dëa̧ ji̧ jibëa̧ jadü judiro̧ jibëa̧ chjibora̧ pio ju̧ri̧ra̧ tjae yürüa̧diro̧jo̧ȩ buro ja̧ putu ju oa Jechu judi buë chapea̧ oa. Ado ja̧dëa ji̧ Jechu judi buë cha̧dejȩ.

⁸ Ado pumȩ no̧i̧dërë pjatë a̧rȩri̧ mu̧i̧ mu̧i̧ a̧ra̧rëreji̧ri̧diro̧jo̧ȩ jibëa̧ chjibo oa järea̧ no̧ro. Ado o judiro̧ jäeno̧a̧dirȩ chiriräpȩ udimi̧ da oa budopea̧ oa. Ado pio ju̧ri̧ra̧ peaja̧di tjaea̧diro̧jo̧ȩ no̧ oa. Ja̧di dari̧ japarëreji̧ri̧dirȩ Jechu pio ju̧i̧ ba chia jo̧rȩta̧ tara.

⁹ Ado Jechu ja̧ yaboi̧räpȩ jäji̧ri̧rȩ goae tarari̧ ëna̧diä ëna̧diä ni̧bärëreji̧ri̧dirȩ duriräpȩ jäji̧ri̧borë. Ja̧di ta̧rëri̧ ëna̧diä ni̧bärëreji̧ri̧dirȩ: —Chjacjiamȩri̧ ni̧bätäro̧jo̧ȩ Ütë tjamo̧ pio ju̧i̧iäpȩmo̧. Ado chjadëri̧ japatädejȩ pio yoaje, jënȩ chjadüa̧ pio ju̧i̧.

¹⁰ Aja̧, chjadëri̧ japatädejȩ Ütë tjamo̧ judi ibëa̧ Ütëmȩ pio yoa. Jabechji̧ ibëa̧ tarurea̧ Davi pio judi ütëmȩrȩ cjo̧ro̧rërea̧ ji̧, pio yodëborë ano̧ mire ütëmȩrȩ cjo̧ro̧pade. Ado pio ju̧i̧iä a̧dë uë tjamo̧räpȩ cjiamȩ Ütë tjamo̧ pio judiborë a̧dë chjäte chjacjiamȩri̧ ni̧bäa̧ oa cjiatäde —ëna̧diä ëna̧diäji̧ri̧rȩ ni̧bärëreji̧ri̧dirȩ, Jechu pio ju̧i̧iäpȩmo̧ ba chia jo̧rȩtaji̧ri̧rȩ.

¹¹ Ado Jechu judi Jerucharȩräpȩ go̧düdärämȩrȩ tjamo̧i̧ järëremȩde Ütë tjamo̧ ja̧ bëräpȩ. Ado bë tjoräpȩ yu̧a̧mȩrȩ oëra̧ti̧ oa daeno̧ ëte, jabechji̧ ado chjereno̧ go̧dürëremȩde dorë biraremȩ tara. Ado järëremȩde Betania quȩmȩ bë ma̧ri̧ boi̧chji̧räpȩ ju̧ri̧ jibëa̧ jadü pio ji̧ri̧ nö̧ta, 12 pio ji̧ri̧ nö̧ta.

Jechu judi gaparȩrëremȩdejȩ to oa jurarea̧ chiadë tara

¹² Ado dopea̧rä judiro̧ Betania quȩmȩ bë ma̧ri̧ boi̧chji̧ri pio judiri go̧düa̧ ji̧, Jechu judi ta̧mȩcho̧ ja̧borëremȩde.

¹³ Ado jachi chja cjiamȩ to oa daea̧dejȩ igera quȩmȩ to oa, jurarea̧ to oa. Pjö̧da ji̧ra̧ri̧ chiamȩ oa daea̧dejȩ. 'Ado jurarea̧ chiapamȩ jirodida' quëna̧ jo̧rȩtamȩrȩ jätea̧dejȩ. Jabo cjäri̧ made, to pjö̧da maea oa chiarëremȩde. Jabë chiarea̧ gupënȩdë oaiä, jabechji̧ jurarea̧ decjiarëremȩde.

¹⁴ Ado pio ju̧i̧iä yo̧a̧de Jechu judi: —Pio yaba̧ domȩri ja̧ pio jiro to üdë jurarea̧ chiadëpade bucho ana̧. Ado ja̧di ta̧rëri̧ yo̧mȩ oa ta̧rërëreji̧ri̧diro̧jo̧ȩ jibëa̧ jadü judiro̧.

Jechu judi go̧dü tänȩrëremȩdejȩrȩ gatë tänȩji̧ri̧ pio ji̧ri̧ Ütë tjamo̧ ja̧ bëri pio judiri

¹⁵ Judiro̧ Jerucharȩräpȩ go̧düdäräa̧ ji̧, Jechu judi yu̧a̧rëremȩde Ütë tjamo̧ ja̧ bëräpȩ. Ado yu̧a̧ ëte baä tänȩrëremȩdejȩrȩ gatë tänȩji̧ri̧ pio ji̧ri̧. Goe gu̧rori̧ cäë yürüpea̧ oa gatë tänȩji̧ri̧ pio ji̧ri̧, ba uëri boaji̧ri̧ pio ji̧ri̧ baä tänȩrëremȩdejȩrȩ. Ado gatëji̧ri̧ pio ji̧ri̧bo baä tänȩa̧dejȩrȩ. Ado chëre oa ano̧ mireji̧ri̧ pio ji̧ri̧ ja̧ mechja chjö̧na̧i̧ oa baë arë cürëa̧dejȩ. Ado jotoco pua oa gatë ta̧nȩji̧ri̧ pio ji̧ri̧ ja̧ charea̧ oa baë arë cürëa̧dejȩ peaja̧di. Aja̧, ja̧di dari̧ japarëremȩde Jechu judi Ütë tjamo̧ ja̧ bëräpȩji̧ri̧ oa.

¹⁶ Ado peaja̧di eami̧ pumȩ oa, Ütë tjamo̧ ja̧ bëräpȩ gatë tänȩpea̧ oa ara chjätämȩ pio ju̧i̧, jabechji̧ eami̧ oa ara chjätä tänȩdëa̧dejȩ Jechu judi. Jabechji̧, mö̧na̧mȩrȩ chjätä tänȩa̧dejȩ.

¹⁷ Ado ja̧di dari̧ japa ëte, Jechu judi taruparëremȩde a̧ra̧ano̧pea̧ ji̧. Ja̧di ta̧rëri̧ yo̧mȩrȩ a̧ra̧ano̧a̧dejȩrȩ: —Danȩrȩ, ja̧di ta̧rëri̧ go̧ȩpea̧ oa cjiade ma̧ȩ üdë, Ütë tjamo̧ pio judi yo̧rërea̧ ma̧ȩ üdë: "Danȩrȩ, ca̧ bë üdë, pio coaiäpȩmo̧ ni̧bäpea̧ bëde pumȩ ütëbodärä ja̧ oa'. Aja̧, ja̧di ta̧rëri̧ yo̧rëremȩdiibe Ütë tjamo̧ judi. Jabo cjäri̧ manȩrȩ, mȩnȩro̧ ma̧i̧ dari̧ japea̧ oaiä, garüji̧ri̧ pio ji̧ri̧ ja̧ a̧doparea̧ bëmi̧ dapea̧de —yo̧mȩrȩ yo̧a̧dejȩrȩ Jechu judi.

¹⁸ Ado Jechu judi Ütë tjamo̧ ja̧ bëräpȩ ja̧di dari̧ japea̧ pio judiri yurori järi tjamo̧pea̧dirȩ tjamo̧ yo̧ji̧ri̧ pio judiro̧ pio ju̧i̧ ja̧bo tänȩpea̧ ji̧. Tjamo̧ davä. O ji̧ri̧ chjiari tjamo̧ goë tuti ja̧bepaji̧ri̧ pio judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, ado judio ütëti̧ pio judiro̧borë ja̧di dari̧ jo̧rȩtaji̧ri̧pea̧dirȩ, Jechu pio ju̧i̧ tjamo̧ri̧ ja̧bo tänȩtämi̧ cjiaji̧ri̧rȩ. Jabo eami̧ oa japatärea̧ ji̧, japarea̧ dadëa̧dirȩ pumȩ buba oaiä. Aja̧, pumȩ no̧i̧dërë ta̧rë ja̧bo chjaorëreji̧ri̧diro̧jo̧ȩ Jechu ju̧i̧. Pio ju̧i̧iä uaparëreji̧ri̧diro̧jo̧ȩ.

¹⁹ Ado pio jiro doro gȩnȩpea̧rä, Jechu judi, jibëa̧ jadüborë pio jiro bë ma̧ri̧ri judiri go̧dürëreji̧ri̧dirȩ.

Eami̧ pumȩ judi, Ütë tjamo̧ ju̧i̧ chjuari̧ quëna̧mȩrȩ cjo̧dëmȩ pio judi, jabechji̧ badëri̧ cjo̧dëdëpade

²⁰ Ado dopea̧rä, no̧ro jäji̧ri̧rȩ ado darëreji̧ri̧diro̧jo̧ȩ igera quȩmȩ to oa, jurarea̧ chiadëremȩ to oa. Ga tjamo̧pea̧mȩ oa, tacö̧borë gapea̧mȩ oa daea̧diro̧jo̧ȩ.

²¹ Ado pio ju̧i̧ daea̧ oaiä, chjaodëri̧ jo̧rȩtamȩpea̧de Pedro judi Jechu judi pedi yo̧a̧ pio ju̧i̧. Ja̧dëa ji̧ yo̧a̧dejȩ Jechu ju̧i̧: —Danȩ A̧ra̧ano̧mȩ, mȩnȩ igera quȩmȩ to pio ju̧i̧ chjiari yo̧a̧ oaiä, jabechji̧ a̧dë chjäte gapea̧de —yo̧a̧dejȩ.

²² Ado Jechu judi dëbë yo̧mȩrȩ yo̧a̧dejȩrȩ jibëa̧ jadü ütëbo oa: —Danȩrȩ, mȩnȩro̧ Ütë tjamo̧ pio ju̧i̧ chjuari̧ quëna̧ji̧ri̧rȩ cjo̧dërä judi, peaja̧dimi̧ dari̧ japarea̧ dapai̧ danȩrȩ.

²³ Jabo chjuari̧ quëna̧pea̧ chiarenȩro̧jo̧ȩ oëra̧ quëna̧rea̧ decjiari̧, 'Aja̧, Ütë tjamo̧ judi tjamo̧ri̧ japarea̧mi̧dëdida' quëna̧rea̧ decjiari̧. Tjamo̧ri̧ yo̧requededibe. Eami̧ pumȩ judi Ütë tjamo̧ ju̧i̧ chjuari̧ quëna̧mȩrȩ cjo̧dërä judi, 'Jaebodida, ju chiamȩdida, a̧dë chjäte jauëchjamȩdida, cüdë cjo̧dëa̧mi̧ japarea̧ chiadida' quëna̧ jo̧rȩtamȩrȩ cjo̧dërä judi, jabechji̧ jënȩ yo̧a̧mi̧ japapai̧ dade. Jabechji̧ pio jiro ya̧mi̧ oa yo̧rä judi: "Aja̧, pio idëpȩ ano̧ mire chavä ui ana̧räpȩ ju̧ri̧' yo̧rä judi, jabechji̧ ano̧ mire chapai̧ dade, jënȩ yo̧a̧mi̧.

²⁴ Ja̧di tara yo̧requededibe. Eami̧ pumȩ judi Ütë tjamo̧ pio ju̧i̧ chjuari̧ quëna̧mȩrȩ cjo̧dërä judi, 'Aja̧, Ütë tjamo̧ judi ta̧rë ja̧bodicoada, cüdë cjo̧dëa̧mi̧ japapai̧ dadida, cüdë cjo̧dëa̧mi̧ yürüpai̧ dadicoada' quëna̧ jo̧rȩtamȩrȩ cjo̧dërä judi, jabechji̧ jënȩ cjo̧dëa̧mi̧ yürüpai̧ dadejȩ.

^25-26 Jabo mȩnȩro̧ Ütë tjamo̧ pio ju̧i̧iä cjo̧dërä, ado cja̧rȩmo̧ pumȩ pio ju̧i̧iäpȩmo̧ ma̧ cjüëtüri̧ jo̧rȩtaji̧ri̧rȩ cjo̧dërä judi, pio mȩaiäpȩmo̧ chjai̧dëri̧ japea̧ oaiä pio ju̧i̧iäpȩmo̧ ërecjiaji̧ri̧rȩ cjo̧dërä judi, jabechji̧ yabochja cjatäcjie jo̧rȩtapea̧de. Tjamo̧ davä. Pio mȩaiäpȩmo̧ chjai̧dëri̧ japea̧mȩ pio ju̧i̧ duridëparȩmi̧ dari̧ a̧dë jo̧rȩtapea̧de yabochja. Aja̧, ja̧di dari̧ japapea̧de davä, dibëa̧ Ama̧i̧ judi, a̧dëräpȩ cjiamȩ pio judi pio dibë peaja̧di chjadëri̧ duridëparȩpea̧ oa, mȩnȩro̧ chjai̧dëri̧ japea̧ pio ju̧i̧ duridëparȩpea̧ oa peaja̧di dari̧ japapea̧de. Aja̧, ja̧di dari̧ japapea̧de Ütë tjamo̧ pio ju̧i̧iä cjo̧dëbea yaboi̧ —yo̧mȩrȩ ni̧bä chjaorëremȩdejȩrȩ.

Tjamo̧ yo̧ji̧ri̧ judio pio judiro̧ iëno̧ë ta̧rërëreji̧ri̧diro̧jo̧ȩ Jechu ju̧i̧ jënȩ gatë tänȩji̧ri̧ pio ji̧ri̧ baä tänȩpea̧ pio ju̧i̧ chjiari

²⁷ Ado Jechu judi jibëa̧ jadüborë Ütë tjamo̧ ja̧ bëräpȩ jätämi̧ cjiaji̧ri̧rȩ ado chjereno̧ go̧düdärärëreji̧ri̧dirȩ Jerucharȩräpȩ. Ado Jechu judi Ütë tjamo̧ ja̧ bë yuroro tai̧mȩ oa go̧düdäräa̧diro̧jo̧ȩ tjamo̧ yo̧ji̧ri̧ judio pio judiro̧. Aja, o ji̧ri̧ chjiari tjamo̧ goë tuti ja̧bepaji̧ri̧ judiro̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧, ado ütëti̧ pio judiro̧borë go̧düdäräa̧diro̧jo̧ȩ.

²⁸ Ado ja̧di ta̧rëri̧ iëno̧ë ta̧rëa̧diro̧jo̧ȩ: —¿Chjia ja̧ ma̧ȩrä go̧dü tänȩremȩrenȩjȩrȩ gatë tänȩji̧ri̧ pio ji̧ri̧ Ütë tjamo̧ ja̧ bëri pio judiri? ¿Chjiarë chjadüa̧ oa ja̧di dari̧ japamȩpea̧renȩ mȩnȩ? —iëno̧ë ta̧rëa̧diro̧jo̧ȩ.

²⁹ Jabo Jechu judi dëbë yo̧tärea̧ ji̧ ja̧di ta̧rëri̧ yo̧a̧dejȩrȩ: —Pio cüdëborë iëno̧ë ta̧rëparequededibe. Ado mȩnȩro̧ chjadëri̧ dëbë yo̧rä judi, peaja̧di chjadëri̧ dëbë yo̧parequededibe. Aja̧, pio ju̧i̧ ja̧ ma̧ȩrä yo̧mȩrȩ chjadëri̧ dëbë yo̧parequededibe mȩnȩro̧ chjadëri̧ dëbë yo̧rä judi —yo̧a̧dejȩrȩ—. Aja̧ chjadëri̧ yo̧chji̧coe yaba̧.

³⁰ ¿Chjia ja̧ ma̧ȩrä go̧ȩ cjaeä chudarea̧ darëremȩde Juan judi? Jabo Ütë tjamo̧ ja̧ ma̧ȩrä, jabo pumȩ ja̧ ma̧ȩrä? Chjadëri̧ yo̧chji̧coe —yo̧mȩrȩ ba dëbë iëno̧ë ta̧rëreremȩdejȩrȩ Jesus judi.

³¹ Ado judiro̧ Jechu pio ju̧i̧iä ta̧rëa̧ oaiä, chjaodëri̧ taruparëreji̧ri̧dirȩ jibëa̧ dëbëti̧ra̧ chia ni̧bä chjaopea̧ ji̧ ja̧di ta̧rëri̧ yo̧ji̧ri̧rȩ: —Danȩrȩ, a̧ro̧rȩ dëbë yo̧rä judi, "Aja̧, Juan judi Ütë tjamo̧ pio ju̧i̧ ja̧ ma̧ȩrä go̧ȩ cjaeä chudarëremȩde" dëbë yo̧rä judi, cjäri̧ madiibe, pio ibëiäpȩmo̧ dëbë yo̧pai̧ dadiibe: "Jabo Ütë tjamo̧ ja̧ ma̧ȩrä chudarä judi, ¿tjana̧ ju̧i̧iä Juan ju̧i̧ quëna̧dëa̧renȩro̧jo̧ȩ?" yo̧pai̧ dade.

³² Jabo a̧ro̧rȩ yo̧rä judi, "Aja̧, pumȩ ja̧ ma̧ȩrä go̧ȩ cjaeä chudarëremȩde" dëbë yo̧rä judi, peaja̧di uapai̧ dade pumȩ pio ji̧ri̧iä" yo̧ji̧ri̧rȩ ni̧bä chjaoa̧dirȩ jibëa̧ dëbëti̧ra̧ chia. Jabechji̧ pumȩ judiro̧ noi̧dëti̧rȩ ba chia jo̧rȩta marëreji̧ri̧diro̧jo̧ȩ Juan ju̧i̧. 'Aja̧, Ütërë ea jana̧ chjadüa̧ oa ni̧bämȩdida, Ütë tjamo̧ ja̧ ma̧ȩrä go̧ȩ cjaeä chudamȩdida' quëna̧ jo̧rȩtarëreji̧ri̧diro̧jo̧ȩ. Ado pio ju̧i̧iä jabechji̧ uaparëreji̧ri̧dirȩ Jechu pio ju̧i̧ dëbë yo̧pea̧ ji̧.

³³ Ado pio ju̧i̧iä ja̧di ta̧rëri̧ dëbë yo̧a̧diro̧jo̧ȩ Jechu ju̧i̧: —Cjäri̧ marea̧rȩ, 'pio ju̧i̧ ja̧ ma̧ȩrä goe cjaeä chudarëremȩdida' quëna̧ dabadërea̧rȩ —yo̧a̧diro̧jo̧ȩ—. Ado pio ju̧i̧ ta̧rëa̧ oaiä, Jechu judi dëbë yo̧a̧dejȩrȩ: —Danȩrȩ, mȩnȩro̧ coa chjadëri̧ dëbë yo̧dë tara, peaja̧di chjadëri̧ yo̧dëparequededibe. "Aja̧, pio ju̧i̧ ja̧ ma̧ȩrä japarequede" yo̧tärea̧ ji̧, jabechji̧ yo̧dëparequededibe —yo̧a̧dejȩrȩ.