Marcos 10 - Biblia Pume

Pumȩ judiro̧ jibëa̧ iei̧ pio ji̧ ëbapea̧ pio ju̧i̧ chjiari a̧ra̧ano̧rëremȩde Jechu judi

¹ Ado Jechu judi Capenau quȩmȩ bë ma̧ri̧ri pio judiri go̧düa̧ ji̧, Judea quȩmȩ chiriräpȩ baärëremȩde Joroda̧ quȩmȩ bea oëräpȩ. Ado ju̧ri̧pȩ go̧düdäräa̧mȩ oa pumȩ bubarë jäa̧diro̧jo̧ȩ. Ado Jechu judi a̧ra̧ano̧ chjaorërea̧mi̧ a̧ra̧ano̧a̧dejȩrȩ.

² Ado pjaricheo judiro̧ orëmo̧rȩ peaja̧di go̧düdärärëreji̧ri̧dirȩ Jechu pio ju̧i̧ ütarë ta̧rëpea̧ oa. Jabechji̧, Jechu pio ju̧i̧ ütarë ta̧rëtämi̧ cjiaji̧ri̧rȩ daea̧diro̧jo̧ȩ. 'Aja̧, a̧ro̧rȩ pio ju̧i̧ iëno̧ë ta̧rërä judi, oëra̧ dëbë yo̧pai̧ dadiibëda, ado oëra̧ dëbë yo̧rä judi, jabechji̧ tjamo̧ cjo̧ro̧ji̧ri̧ pio ji̧ri̧ ja̧ dëbëräpȩ aechide yo̧pai̧ daa̧ro̧ju̧i̧da' quëna̧ jo̧rȩtaji̧ri̧rȩ iëno̧ë ta̧rëa̧diro̧jo̧ȩ, ja̧di ta̧rëri̧ yo̧ji̧ri̧rȩ: —Danȩ, üi̧ judi jibëa̧ iei̧ ji̧ ano̧rä judi, ¿jabechji̧dëde? ¿Yö̧ta yo̧diibe Moicherë go̧ȩparërea̧ ma̧ȩ üdë? —yo̧ji̧ri̧rȩ iëno̧ë ta̧rëa̧diro̧jo̧ȩ Jechu ju̧i̧.

³ Ado Jechu judi dëbë yo̧mȩrȩ ba dëbë iëno̧ë ta̧rëa̧dejȩrȩ: —¿Jabo yö̧ta yo̧mȩrȩ ma̧ȩ yürürëremȩdidibe Moiche judi?

⁴ Ado pjaricheo judiro̧ dëbë yo̧a̧diro̧jo̧ȩ: —Yö̧ta yo̧dë, jabechji̧ üi̧ judi jibëa̧ iei̧ ji̧ ano̧tämi̧ cjiarä judi, jabechji̧ ano̧pai̧ dadejȩ. Jibëa̧ iei̧ pio ji̧iäpȩmo̧ ano̧rea̧ go̧ȩ i pio ji̧ go̧ȩpa ëte yürürä judi, dëdë, ano̧pai̧ dadejȩ. Ja̧di ta̧rëri̧ go̧ȩparëremȩdiibe Moiche judi —dëbë yo̧a̧diro̧jo̧ȩ.

⁵ Jabo Jechu judi dëbë yo̧mȩrȩ yo̧a̧dejȩrȩ: —Jabo cjäri̧ madirȩ, dibëa̧ ütëti̧rea̧ pio judiro̧ Ütë tjamo̧ ja̧ ma̧ȩ oa chjuari̧ jiada̧ oaiämo̧i̧ pio jiro ma̧ȩ oa yürürëremȩdidibe Moiche judi. Ado peaja̧di jiadaji̧ri̧nȩrȩ pio mȩnȩro̧.

⁶ Jabo danȩrȩ, pearä judirä Ütë tjamo̧ judi chjö̧na̧i̧ oa pareaparërea̧ ji̧, pumȩ pio ji̧ri̧ pareaparërea̧ ji̧, jabechji̧ 'üi̧ oa, ado iei̧ i̧a pareapea̧dejȩrȩ.

⁷ Ja̧di tara üi̧ judi jibëa̧ iei̧ ji̧ ëbarä, jabechji̧ a̧dë baätäremȩdejȩrȩ jibë nö̧riji̧ri̧ pio ji̧ri̧.

⁸ Ado üi̧ judi jibëa̧ iei̧ ji̧ ëbarä, jabechji̧ cja̧rȩmȩ pumȩmi̧ dari̧ cjiadirȩ.' Ja̧di tara judiro̧ yo̧a̧ri̧rȩ cjiarërea̧ ji̧, jabechji̧ cja̧rȩmȩpea̧dirȩ. Ado Ütë tjamo̧ judi yo̧a̧ri̧ pumȩmi̧ daji̧ri̧ oa darërea̧ ji̧, jabechji̧ cja̧rȩmȩpea̧ji̧ri̧ oa dadejȩrȩ.

⁹ Ja̧di tara yo̧requededibe. Dibëa̧ jadü pio ji̧ ano̧rea̧mi̧dëde. Ado chjereno̧ yo̧a̧ri̧ pumȩmi̧ dari̧ cjo̧ro̧rea̧mi̧dënȩrȩ. Jabechji̧ cja̧rȩmȩpea̧ji̧ri̧ oa dadidibe Ütë tjamo̧ judi, yo̧a̧ri̧ pumȩmi̧ dadëji̧ri̧ oa —yo̧mȩrȩ dëbë yo̧rëremȩdejȩrȩ pjaricheo ji̧ri̧ Jechu judi.

¹⁰ Ado ji̧dë duri oa, jënȩro̧ cjo̧ro̧mȩ jo̧ tjoräpȩ yu̧a̧ ji̧, Jechu ja̧ jadü judiro̧ iëno̧ë ta̧rëa̧diro̧jo̧ȩ judi ni̧bä chjaoa̧ pio ju̧i̧ chjiari.

¹¹ Ado Jechu judi ja̧di ta̧rëri̧ yo̧mȩrȩ dëbë yo̧a̧dejȩrȩ: —Danȩrȩ, eami̧ üi̧ judi jibëa̧ iei̧ ji̧ ano̧rä judi, ado cja̧rȩmo̧ iei̧ ji̧ ano̧ mire ëbapea̧ oa ano̧rä judi, jabechji̧ chjai̧dëri̧ japade jënȩ pearä ëbarërea̧ pio ji̧iäpȩmo̧.

¹² Ado eami̧ iei̧ jini̧ jibëa̧ üi̧ oa ano̧rä judi, ado cja̧rȩmo̧ üi̧ pio ju̧i̧ ano̧ mire ëbapea̧ oa ano̧rä judi, peaja̧di chjai̧dëri̧ japanȩ pearä ëbarërea̧ üi̧ pio ju̧i̧iäpȩmo̧ —yo̧mȩrȩ ni̧bä chjaorëremȩdejȩrȩ Jechu judi.

Jechu judi cjäri̧ri̧ cjia darëremȩdejȩrȩ bori̧ ji̧ri̧

¹³ Ado pumȩ judiro̧ ëba järëreji̧ri̧diro̧jȩrȩ jibëa̧ bori̧ ji̧ri̧ Jechu pio ju̧i̧iäpȩ pio ju̧i̧ ga̧re tarapea̧ oa. Jabo Jechu ja̧ jadü judiro̧ to̧bari̧ tuti yo̧a̧diro̧jȩrȩ jibëa̧ bori̧ ji̧ri̧ ëba jana̧dëtä.

¹⁴ Ado Jechu judi pio ju̧i̧ daea̧ oaiä, ërecjiape jämȩrȩ yo̧a̧dejȩrȩ: —Chja jabechji̧ ëba jana̧tädiro̧coe bori̧ ji̧ri̧. Tja̧reparȩdëchji̧jȩrȩ. Jabechji̧ pio jiro bori̧mi̧ darë yu̧a̧rea̧ dapadirȩ Ütërë yo̧a̧ chja̧oerä. Chja jabechji̧ jana̧tädiro̧coe —yo̧a̧dejȩrȩ—.

¹⁵ Tjamo̧ yo̧dërequedemȩ jabo tjamo̧i̧ cjiari̧ yo̧requedibe. Danȩrȩ, eami̧ pumȩ judi bori̧ pio judiro̧ quëna̧mi̧ dari̧ quëna̧dërä judi, Ütë tjamo̧ ju̧i̧ quëna̧dërä judi, jabechji̧ Ütërë yo̧a̧ chja̧oeräpȩ yu̧a̧rea̧ dadëpade —yo̧a̧dejȩrȩ.

¹⁶ Ado ja̧dëa ji̧ mitërëremȩdejȩrȩ bori̧ ji̧ri̧. Ado ida̧dejȩrȩ. Ado pio ji̧ri̧ chjiari goë cjo̧dërëremȩde jibëa̧ Ama̧i̧ pio ju̧i̧iä.

Chëre ji̧ra̧ri̧ goamȩ judi ni̧bä chjaorëremȩdejȩ Jechu pio ju̧i̧ nö̧ta

¹⁷ Ado Jechu judi jënȩ cjiamȩri pio judiri pea go̧düa̧mȩ oa, pio jȩaiäpȩ bagureno̧rëremȩdejȩ pumȩ üi̧ judi. Ado ju̧i̧ ja̧ dëbëräpȩ ju chatura̧ cjiadärämȩrȩ iëno̧ë ta̧rëa̧dejȩ: —Danȩ A̧ra̧ano̧mȩ, pumȩ chjadërenȩ mȩnȩ. Ado pio ju̧i̧iä iëno̧ë ta̧rërequedemȩ. ¿Tjana̧ chjadë oa japatäremȩrequede cüdë bucho ana̧ cjo̧ro̧rea̧ dapea̧ oa? Yo̧coe —yo̧a̧dejȩ.

¹⁸ Ado Jechu judi dëbë yo̧mȩrȩ iëno̧ë ta̧rëa̧dejȩ: —¿Tjana̧ ju̧i̧iä "pumȩ chjadërenȩ" yo̧a̧renȩque? Danȩ, chjadëmȩ judi jabomo̧ cja̧rȩmȩde. Ütë tjamo̧ pio judimo̧de.

¹⁹ Ado mȩnȩ yabo yo̧a̧ ji̧, "¿Tjana̧ oa japatäremȩrequede cüdë bucho ana̧ cjo̧ro̧rea̧ dapea̧ oa?" yo̧a̧ ji̧, jabechji̧ pio ju̧i̧ chjiari dëbë yo̧parequedemȩ yaba̧. Danȩ, ichi chjö̧na̧i̧ ma̧ȩ pio ju̧i̧ dabarenȩ. Ja̧di ta̧rëri̧ yo̧diibe ma̧ȩ üdë: "Ado cja̧rȩmo̧ pumȩ oa ja̧bo tänȩdëvä. Ado cja̧rȩmo̧ ja̧ iei̧ ji̧ baë ëba mo̧a̧dëvä. Garüdëvä. Teracabari̧ aechide yo̧dëvä chjai̧dëri̧ japadëmȩ pio ju̧i̧iäpȩmo̧. Ma̧ȩ chjádë yürüdëvä. Pumȩ pio ji̧ri̧iä ji̧dë u̧i̧ boapea̧ oa u̧i̧padëvä. Ado mȩa nö̧riji̧ri̧ pio ji̧ri̧ ba chia dajȩrȩ." Aja̧, pio jiro ma̧ȩ chö̧na̧i̧ oa dabarenȩ mȩnȩ —yo̧mȩrȩ yo̧a̧dejȩ pumȩ üi̧ oa Jechu judi.

²⁰ Ado pumȩ üi̧ judi pio ju̧i̧ ta̧rëa̧ oaiä, dëbë yo̧a̧dejȩ: —Danȩ A̧ra̧ano̧mȩ, pio jiro ma̧ȩ chjö̧na̧i̧ oa nö̧tadäräri̧ ta̧diämȩrȩ japadäräa̧requede cüdë boi̧chji̧ri ja̧.

²¹ Ado pio ju̧i̧ ta̧rëa̧ oaiä, Jechu judi ea tjamo̧mȩrȩ darëremȩdejȩ üi̧ oa. Ado jibëa̧ dachoräpȩmo̧ dëbë damȩrȩ yo̧a̧dejȩ: —Jabo danȩ, jabë pjärämȩde cja̧rȩmȩrȩ —yo̧a̧dejȩ—. Jabechji̧ mȩnȩ jabëdiärea̧ decjiari̧ cjo̧ro̧tämi̧ cjiarä judi, jabechji̧ na̧ea̧ pio ju̧i̧ chjö̧na̧i̧ oa gatë tänȩchäeno̧täremȩrenȩ. Ado pio jiro chëre chjö̧na̧i̧ oa yürütäremȩrenȩjȩrȩ chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧. Ado mȩnȩ ja̧di dari̧ japarä judi, jabechji̧ a̧dëräpȩ ju̧ri̧ a̧dë chjäte ba chia pio ju̧i̧ goaparenȩ. Ado danȩ, ja̧di dari̧ japa ëte, jabechji̧ cho̧rë jana̧coe —yo̧a̧dejȩ Jechu judi.

²² Ado pio jiro üi̧ judi pio jiro ma̧ȩ oa ta̧rëa̧ oaiä, cjäri̧ made, gito ana̧ri̧ jo̧rȩtamȩpea̧de. Jabechji̧ a̧dë chjate ji̧ra̧ri̧ goamȩrȩ cjo̧ro̧a̧ oaiä, gito ana̧ri̧ jo̧rȩtamȩrȩ baärëremȩde.

²³ Ado Jechu judi jibëa̧ jadü pio ji̧ri̧iäpȩmo̧ ano̧ mire damȩrȩ yo̧a̧dejȩrȩ: —Danȩrȩ, chjao tjamo̧de chëre ji̧ra̧ri̧ goamȩ judi Ütërë yo̧a̧ chja̧oerä yu̧a̧pea̧ üdë —yo̧a̧dejȩrȩ.

²⁴ Ado Jechu ja̧ jadü judiro̧ pio jiro ma̧ȩ oa ta̧rëa̧ oaiä ana̧ri̧ jo̧rȩtaji̧ri̧pea̧dirȩ, ya yabë cjiaji̧ri̧rȩ. 'Jabechji̧ Ütë tjamo̧ judi chëre ji̧ra̧ri̧ goaji̧ri̧ pio ji̧ri̧ cjäri̧ri̧ cjia tjamo̧ darämi̧ cjiadiji̧ri̧da' quëna̧ jo̧rȩtarëreji̧ri̧dirȩ. Jabo Jechu judi ado yo̧a̧dejȩrȩ: —Danȩrȩ ca̧ u̧ri̧, Ütërë yo̧a̧ chja̧oerä yu̧a̧pea̧ ji̧ chjao tjamo̧de pumȩ pio ji̧ri̧iä.

²⁵ Jabechji̧ cameyo putu chucu judi cararea̧ cjararä yu̧ë chjätäpea̧ pio ju̧i̧iä ji̧dë u̧i̧ chjaotäremȩde chëre ji̧ra̧ri̧ goamȩ pio judi Ütërë yo̧a̧ chja̧oeräpȩ yu̧a̧pea̧ üdë —yo̧a̧dejȩrȩ.

²⁶ Ado Jechu ja̧ jadü judiro̧ pio jiro ma̧ȩ oa ta̧rëa̧ oaiä, ji̧dë u̧i̧ ana̧ri̧ jo̧rȩtaji̧ri̧pea̧dirȩ, dacho bërëmi̧ cjiami̧ dari̧. Ado jibëa̧ dëbëti̧ra̧ chia iëno̧ë ta̧rëa̧dirȩ: —Jabo ja̧dirä judi, ¿chjiadirȩ tjamo̧ri̧ chjätärea̧ dapaji̧ri̧ judiro̧? —iëno̧ë ta̧rëa̧dirȩ.

²⁷ Jabo Jechu judi jibëa̧ jadü pio ji̧ri̧iäpȩmo̧ dëbë damȩrȩ yo̧a̧dejȩrȩ: —Danȩrȩ, tjamo̧ri̧ yo̧requededibe. Chjätärea̧ üdë pumȩ pio ji̧ri̧iä, dëdë, chjao tjamo̧de. Jabechji̧ japarea̧mi̧dëde. Jabo chjao tjamo̧dëde Ütë tjamo̧ pio ju̧i̧iä. 'Jabechji japarea̧mi̧dëdida' quëna̧dëmȩde. Dëdë, pumȩ judiro̧ jibëa̧ ma̧na̧ri̧ japea̧ oaiä chjätärea̧mi̧dëdirȩ, jabo Ütë tjamo̧ pio judi tuti japea̧ oaiä, dëdë, chjätärea̧ dapai̧ dadirȩ —yo̧a̧dejȩrȩ.

²⁸ Ja̧dëa ji̧ Pedro judi yo̧a̧dejȩ: —Danȩ, a̧ro̧rȩ ibëa̧remȩ chjö̧na̧i̧ oa a̧dë ma̧na̧rea̧ro̧jo̧ȩ pio mȩa cho̧rë jana̧pea̧ oa. Ado a̧ro̧rȩ ja̧di dari̧ japea̧ oaiä, ¿yö̧ta dari̧ jo̧rȩtamȩrȩ dapadiibe Ütë tjamo̧ judi? —iëno̧ë ta̧rëa̧dejȩ Jechu ju̧i̧.

²⁹ Ado Jechu judi dëbë yo̧a̧dejȩrȩ: —Tjamo̧ri̧ yo̧requededibe. Eami̧ pumȩ judi jibëa̧ pumȩ pio ji̧ri̧ a̧dë baärä judi, ma̧ȩ chjadëi̧ pio ju̧i̧ a̧ra̧ano̧pea̧ oa a̧dë baärä judi, jabechji̧ chjadëri̧ ba ano̧a̧ oa cjiadiäpade. Tjamo̧ davä. Jibëa̧ bë oa a̧dë baärä judi, jibëa̧ oti̧ pio ji̧ri̧ a̧dë baärä judi, jȩa nö̧rimȩ pio ju̧i̧, jȩa arayi̧ pio ji̧ a̧dë baärä judi, jibëa̧ u̧ri̧ pio ji̧ri̧, jibëa̧ chiri pio ju̧i̧ a̧dë baärä judi, ca̧ea̧ pio ju̧i̧ ja̧bepapea̧ oa a̧dë baärä judi, jabechji̧ pio yoa chirirä cjo̧ro̧a̧ nö̧ta a̧dë chjäte ji̧ra̧ra̧ pio ju̧ri̧ra̧ ba ano̧a̧ oa cjiapade. Ado pio ju̧i̧ uëri ma̧na̧pamȩ japamitërä bucho ana̧ cjo̧ro̧rea̧ dapade peaja̧di.

³⁰ Jabechji̧ judi cja̧rȩmȩ jo̧ pio ju̧i̧mo̧i̧ goarërea̧ ji̧, 100 jo̧ ano̧ mire goapade. Ado jibëa̧ oti̧ ji̧ra̧ tjamo̧dë oa ëbarërea̧ ji̧, jabechji̧ a̧dë chjäte ji̧ra̧ tjamo̧ oa ano̧ mire ëbapade. Ado danȩrȩ, jibëa̧ ama̧i̧ ju̧i̧, jibëa̧ ai̧ ji̧ ëbarërea̧ ji̧, jabechji̧ a̧dë chjäte ji̧ra̧ tjamo̧ oa ano̧ mire ëbapadejȩrȩ. Tjamo̧ davä. Jibëa̧ oti̧ pio ji̧ri̧, jibëa̧ u̧ri̧ pio ji̧ri̧ ëbarërea̧ ji̧, a̧dë chjäte ji̧ra̧ tjamo̧ oa ano̧ mire ëbapadejȩrȩ. Ado jënȩ goa̧ chiri pio ju̧i̧mo̧i̧ goarërea̧ ji̧, cja̧rȩmȩ chiri pio ju̧i̧mo̧i̧ goarërea̧ ji̧, jabechji̧ chiri no̧i̧dë tjamo̧ oa ano̧ mire goapade. Jabo ji̧rari̧ goamȩborë, jabechji̧ conȩda̧ oa cjo̧ro̧pade judi quëna̧mȩ tara. Jabo ji̧dë duri oa Ütë tjamo̧ pio ju̧i̧iäpȩ ano̧ mire cjo̧ro̧mȩpea̧rä, jabechji̧ bucho ana̧ cjo̧ro̧rea̧ dapade —yo̧a̧dejȩrȩ Jechu judi.

³¹ Ado Jechu judi ji̧dë u̧i̧ yo̧mȩrȩ a̧de yo̧a̧dejȩrȩ: —Danȩrȩ, pio yaba̧mȩ yoaiä cjo̧ro̧ji̧ri̧ judiro̧ orë yabo baäji̧ri̧mi̧ dari̧ cjo̧ro̧dirȩ, jabo o judiro̧ duriräpȩmo̧ cjiadiämi̧ dari̧ cjo̧ro̧dirȩ. Jabo ji̧dë duri oa japamitë chjätä ëte, yabo baäji̧ri̧mi̧ dari̧ cjo̧ro̧ji̧ri̧ pio judiro̧, jabechji̧ duriräpȩmo̧ cjiadiämi̧ dari̧ ano̧ mire cjo̧ro̧padirȩ. Ado duriräpȩmo̧ cjiadiämi̧ dari̧ cjo̧ro̧ji̧ri̧ pio judiro̧, jabechji̧ yabo baäji̧ri̧mi̧ dari̧ ano̧ mire cjo̧ro̧padirȩ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧.

Jënȩ ja̧bopea̧ pio ju̧i̧ chjiari ado yo̧rëremȩdejȩrȩ Jechu judi

³² Jechu judi, jibëa̧ jadüborë Jerucharȩ bë ma̧ri̧räpȩmo̧ baärëreji̧ri̧dirȩ. Ado Jechu judi yabo baäa̧de. Ado jibëa̧ jadü judiro̧ ana̧ri̧ jo̧rȩtaji̧ri̧rȩ cho̧rë baärëreji̧ri̧diro̧jo̧ȩ. Aja̧, 'Jechu judi Jerucharȩräpȩ baädida, ado ju̧ri̧pȩ jȩa eadëji̧ri̧ pio judiro̧ ji̧ra̧diro̧da' quëna̧ jo̧rȩtaji̧ri̧rȩ ya yabë cjiaji̧ri̧rȩ cho̧rë baärëreji̧ri̧dirȩ. Ado pumȩ judiro̧ orë, jabechji̧ uapaji̧ri̧rȩ cho̧rë baärëreji̧ri̧diro̧jo̧ȩ. Ado Jechu judi jibëa̧ jadü pio ji̧ri̧iäpȩmo̧ ma ado chjereno̧ ni̧bä chjaotämi̧ cjiamȩrȩ a̧dë jäa̧diro̧jȩrȩ o ji̧ri̧. Ado jibëa̧ma̧i̧pea̧ji̧ri̧ oa ado ni̧bä chjaorëremȩdejȩrȩ 12 oa. Jënȩ gitori̧ tarapea̧ pio ju̧i̧ chjiari ni̧bä chjaoa̧dejȩrȩ, ja̧di ta̧rëri̧ yo̧mȩrȩ:

³³ —Danȩrȩ, Jerucharȩ bë ma̧ri̧räpȩ baärea̧rȩ. Ado pio ju̧ri̧pȩ coa eadëji̧ri̧ pio judiro̧ yürüpadiro̧coe tjamo̧ goë tuti ja̧bepaji̧ri̧ pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧. Ja̧di dari̧ japapadiro̧coe Pumȩrȩ Ara̧ Tjamo̧ pio ju̧i̧. Ado pio ji̧ri̧ ja̧ dëbëräpȩmȩ oa aechide yo̧padiro̧coe. Ado tjamo̧ yo̧ji̧ri̧ pio judiro̧ pio coa chiari ütarë ta̧rë ëte, 'Aja̧, ja̧bo tänȩpea̧dida' quëna̧ jo̧rȩtaji̧ri̧rȩ yürüpadiro̧coe judiodë pio ji̧ri̧iäpȩmo̧ pio coa ja̧bo tänȩpea̧ oa.

³⁴ Jabo coa ja̧bo tänȩbea yaboi̧, jabechji̧ airi̧ cjiaji̧ri̧rȩ chjaocjiapadiro̧coe. A̧ra̧ a̧ra̧ pjui̧no̧padiro̧coe. Gito tjamo̧ri̧ bide cjaeäpadiro̧coe. Ado ja̧di dari̧ japa ëte, ja̧bo tänȩpadiro̧coe. Jabo tjarari̧ do chjätä ëte ado chjereno̧ bëdüparequede —yo̧mȩrȩ ni̧bä chjaorëremȩdejȩrȩ jënȩ ja̧bopea̧ pio ju̧i̧ chjiari jibëa̧ jadü pio ji̧ri̧iäpȩmo̧.

Jechu judi dëbë yo̧rëremȩdejȩ Juan ju̧i̧, Santiago pio ju̧i̧bo

³⁵ Ja̧dëa ji̧ Chjebedeo ja̧ u̧ri̧ judiro̧, Juan pio judi, ado Santiagoborë jäeno̧a̧diro̧jo̧ȩ Jechu ja̧ queri̧räpȩ. Ado yo̧a̧diro̧jo̧ȩ: —Danȩ A̧ra̧ano̧mȩ, a̧ro̧rȩ pio mȩaiä cjo̧dëa̧mi̧ japatä earea̧ro̧mȩ —yo̧a̧diro̧jo̧ȩ.

³⁶ Ado Jechu judi iëno̧ë ta̧rëa̧dejȩrȩ: —¿Jabo yö̧ta dari̧ japatä earenȩro̧coe? —iëno̧ë ta̧rëa̧dejȩrȩ.

³⁷ Ado dëbë yo̧a̧diro̧jo̧ȩ Jechu ju̧i̧: —Danȩ, mȩnȩ tjamo̧ yo̧mȩrȩ cjo̧ro̧mȩpea̧rä, mȩnȩ ba chia tjamo̧räpȩ chamȩpea̧rä, jabechji̧ na̧ yuroro dëbë charea̧ yürütä earea̧ro̧mȩ pio ibëiäpȩmo̧. Aja̧, a̧ro̧rȩ cja̧rȩmȩrȩ cja̧ȩta̧ra̧räpȩmo̧ chapea̧ oa, ado cja̧rȩmo̧rȩ cja̧ȩta̧ra̧ pënȩräpȩmo̧ chapea̧ oa yürütä earea̧ro̧mȩ —yo̧a̧diro̧jo̧ȩ.

³⁸ Jabo Jechu judi pio ju̧i̧ ta̧rëa̧ oaiä, dëbë yo̧a̧dejȩrȩ: —Jabo cjäri̧ manȩrȩ, chjadëri̧ jo̧rȩtaji̧ri̧rȩ cjo̧dëdërenȩro̧coe. Danȩrȩ, japamitë boi̧chji̧ chjätä ëte, ma̧i̧ dari̧ conȩdapadiro̧coe. Ado ja̧di dari̧ japa ëte, ja̧bo tänȩpadiro̧coe ji̧dëri̧. Ado mȩnȩro̧, ¿yö̧ta dari̧ jo̧rȩtanȩrȩ? 'Jaeboquëda, Jechu pio ju̧i̧ conȩda̧mi̧ conȩdapai̧ dadiro̧ibëda, Jechu pio ju̧i̧ ja̧bo tänȩmi̧ ja̧bo tänȩpai̧ dadiro̧ibëda, jabo jabechji̧dida' ¿quëna̧ jo̧rȩtanȩrȩ? —iëno̧ë ta̧rëa̧dejȩrȩ.

³⁹ Ado judiro̧ dëbë yo̧ji̧ri̧rȩ yo̧a̧diro̧jo̧ȩ: —Dëdë, peaja̧di jo̧rȩtarea̧rȩ. Ado Jechu judi dëbë yo̧a̧dejȩrȩ: —Jabechji̧de ado ja̧di, pio coa conȩda̧mi̧ conȩdapadiro̧dibe peaja̧di. Ado pio coa ja̧bo tänȩmi̧ ja̧bo tänȩpadiro̧dibe peaja̧di.

⁴⁰ Jabo danȩrȩ, mȩnȩro̧ pio yabo cjo̧dëa̧ pio ju̧i̧ chjiari japarea̧ dadërequede jabo. Jabechji̧ cüdë tjamo̧ yo̧mȩrȩ cjo̧ro̧mȩpea̧rä, ca̧ yuroropȩ ju̧ri̧ dëbë cha tänȩrea̧ goadërequede. Cüdë cha tänȩmȩ tjamo̧dërequede. Ütë tjamo̧ pio judide. Pio judi mitëa̧ pio judiro̧ dëbë chapadirȩ ca̧ yuroräpȩ ju̧ri̧ —yo̧mȩrȩ dëbë yo̧a̧dejȩrȩ Jechu judi.

⁴¹ Ado pio jiro jadü judiro̧ yo̧a̧ri̧rȩ Jechu pio ju̧i̧iä cjo̧dëa̧ pio ju̧i̧ chjiari ta̧rëa̧ oaiä, Juan judi, Santiago judi cjo̧dëa̧ pio ju̧i̧ chjiari ta̧rëa̧ oaiä, jabechji̧ Jechu ja̧ jadü judiro̧ 10rë erecjiape järëreji̧ri̧diro̧jȩrȩ.

⁴² Ado pio ju̧i̧iä Jechu judi ütëbo oa yo̧a̧dejȩrȩ pio jȩa nö̧ta a̧dopatä. Ado yo̧a̧dejȩrȩ: —Danȩrȩ, dabanȩrȩ judiodë pio ji̧ri̧ chjiari. Aja̧, judiodë ütëti̧ pio ji̧ri̧ chjiari, judiodë tjamo̧ yo̧ji̧ri̧ pio ji̧ri̧ chjiari dabanȩrȩ. Jabechji̧ jibëa̧ maea oa jo̧rȩtadirȩ, jibëa̧ chja̧oerä cjo̧ro̧ji̧ri̧ pio ji̧ri̧iäpȩmo̧ cjäri̧ri̧ cjia darea̧ decjiari̧. Ado jibëa̧ chja̧oerämo̧ cjo̧ro̧dëri̧ cjiaji̧ri̧ pio ji̧ri̧bo ta̧rëdiä tänȩtadiro̧jȩrȩ, pio jibë jiade ta̧rërea̧ decjiari̧. Ado guardia tjamo̧ yo̧ji̧ri̧ pio judiro̧borë ta̧rëdiä tänȩtadiro̧jȩrȩ pumȩ ji̧ri̧, tüdüa̧mi̧ darä cjo̧ro̧ tänȩji̧ri̧rȩ. Ado jibë jiadaji̧ri̧ ji̧ri̧ jabechji̧ chjaodëri̧ conȩdapai̧ dadiro̧jȩrȩ. Aja̧ ja̧di dari̧ cjo̧ro̧dirȩ judiodë ütëti̧ pio judiro̧.

⁴³ Jabo danȩrȩ, ja̧di dari̧ jo̧rȩtaji̧ri̧rȩ cjo̧ro̧dëtäreji̧ri̧nȩrȩ, jabo jabechji̧ tjaoëpai̧ dari̧ cjo̧ro̧täreji̧ri̧nȩrȩ. Pio ju̧i̧iä yo̧requededibe —yo̧a̧dejȩrȩ—. Eami̧ pumȩ judi tjamo̧ yo̧mȩmi̧ dari̧ cjo̧ro̧tämi̧ cjiarä judi, jabechji̧ jibëa̧ pumȩ pio ji̧ri̧ ja̧ mu̧i̧tjoi̧mi̧ dari̧ cjo̧ro̧täremȩde, pio ji̧ri̧ ja̧ oa ja̧bepë yürümȩrȩ.

⁴⁴ Ado eami̧ pumȩ üdë yaboräpȩ baämȩmi̧ dari̧ cjo̧ro̧tämi̧ cjiarä judi, jabechji̧ ütëbo ja̧ mu̧i̧tjoi̧mi̧ dari̧ cjo̧ro̧täremȩde.

⁴⁵ Danȩrȩ, Pumȩrȩ Ara̧ Tjamo̧ pio judirequede. Jabo danȩrȩ, pumȩ judiro̧ pio coa a̧dopea̧ oa biradëa̧requede jabo jabechji̧, pio cüdë o ji̧ri̧iäpȩmo̧ chjadëri̧ a̧dopea̧ oa bira̧requede. Pio ju̧i̧iä ca̧ icjara pio yoa yürüparequede pumȩ pio ji̧ri̧ chjiari ano̧ mire ja̧bopea̧ oa, judiro̧ chjai̧dëri̧ japea̧ pio ju̧i̧ chjiari tuti ba ano̧pea̧ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jechu judi chjaparȩrëremȩdejȩ Batimeo quȩmȩ ju̧i̧, da cotomȩ pio ju̧i̧

⁴⁶ Jechu judi jibëa̧ jadüborë go̧düdärärëreji̧ri̧irȩ Jerico quȩmȩ bë ma̧ri̧räpȩ. Ado pio jiro bë ma̧ri̧ri pio judiri go̧düji̧ri̧ oa pumȩ bubarë cho̧rë järëreji̧ri̧diro̧jȩrȩ. Ado cjo̧ro̧rëremȩde Batimeo quȩmȩ judi, da cotomȩ judi. Timeo quȩmȩ jojarë cjo̧ro̧rëremȩde. Ado järea̧ no̧ yuroro chamȩrȩ cjo̧dë chjaorëremȩdejȩrȩ pumȩ pio ji̧ri̧iä chëre oa.

⁴⁷ Ado judi pumȩ pio ji̧ri̧iä ta̧rëa̧ oaiä, "Aja̧, Jechu judi, Nachare quȩmȩ bë ma̧ri̧rimȩ pio judi chjätäde" yo̧a̧ oa ta̧rëa̧ oaiä, jabechji̧ taruparëremȩde goae tarari̧ ëna̧diäpea̧ ji̧: —Jechu. Davi pio judiri ja̧mȩ pio ju̧i̧ yo̧requedemȩ. Jabechji̧ cjäri̧ri̧ cjia dacoe —yo̧mȩrȩ to̧bari̧ ëna̧diäa̧dejȩ.

⁴⁸ Jabo o judiro̧ cjapiri̧ cjiatä yo̧tarëreji̧ri̧diro̧jo̧ȩ jabo cjäri̧made. Batimeo judi pio ji̧ri̧ ta̧rë ja̧bodëmȩrȩ ji̧dë u̧i̧ goaetarari̧ ëna̧diämȩpea̧de: —Aja̧, Davi pio judiri ja̧mȩ pio ju̧i̧ yo̧requedemȩ. Cjäri̧ri̧ cjia dacoe —ëna̧diäa̧de.

⁴⁹ Ado Jechu judi cjiadärämȩrȩ yo̧a̧dejȩrȩ pumȩ ji̧ri̧: —Ëna̧diächji̧jo̧ȩ judi pio jauëräpȩmo̧ jana̧tä. Pio ju̧i̧iä ëna̧diäa̧diro̧jo̧ȩ. Ado yo̧a̧diro̧jo̧ȩ: —Ma̧ chiadëri̧ cjiavä. Cjitëvä. Jabechji̧ ëna̧diädimȩ. Jävä —yo̧a̧diro̧jo̧ȩ.

⁵⁰ Ado da cotomȩ pio judi chjaodëri̧ cjitëno̧rëremȩde. Ado jibëa̧ chjöchja ina̧rea̧ pio ju̧i̧ mu̧i̧ cürëmȩrȩ a̧dë jäeno̧a̧dejȩ Jechu pio ju̧i̧iäpȩ.

⁵¹ Ja̧dëa ji̧ Jechu judi iëno̧ë ta̧rëa̧dejȩ: —Danȩ, ¿tjana̧ oa japatä earenȩque mȩnȩ? Ado da cotomȩ judi dëbë yo̧a̧dejȩ: —Danȩ a̧ra̧ano̧mȩ, ado chjereno̧ damirerea̧ yürücoe.

⁵² Ado Jechu judi yo̧a̧dejȩ: —Jabechji̧ baävä. Mȩnȩ quëna̧ tara, jabechji̧ chjaparea̧ oa cjiarenȩ —yo̧a̧dejȩ. Ado chjaodëri̧ damȩpea̧de Batimeo judi. Aja̧, judi dadërërea̧ ji̧, chjaodëri̧ damȩpea̧de. Ado cho̧rë järëremȩdejȩ Jechu ju̧i̧ no̧ro jämȩ oa.