Lucas 9 - Biblia Pume

Jechu judi jibëa̧ jadü pio ji̧ri̧, 12 oa chjadürëremȩdejȩrȩ a̧ra̧ano̧pea̧ oa, chjaparȩpea̧ oa

¹ Ado cja̧rȩmo̧ doremȩrä Jechu judi jibëa̧ jadü pio judiro̧ pio jȩa nö̧ta a̧dopatä yo̧rëremȩdejȩrȩ, 12 oa. Ado judiro̧ a̧dopea̧rä, tjamo̧ yo̧rea̧ oa yürürëremȩdejȩrȩ judiro̧ pio ju̧i̧ ja̧ oa chjadëri̧ ja̧bepapea̧ oa. Tjamo̧ davä. Ira̧diä cjaeäji̧ri̧ pio ji̧ri̧ baä tänȩpea̧ oa, dami̧ti̧ gito oa ja̧boji̧ri̧ pio ji̧ri̧ chjaparȩpea̧ oa, ju chiarea̧ yürüa̧dejȩrȩ, judiro̧ eami̧ti̧ tararea̧ oa taraji̧ri̧ pio ji̧ri̧ cjatäcjiarea̧ yürüpea̧ oa.

² Aja̧, chjadüa̧dejȩrȩ Ütërë yo̧a̧ chja̧oerä cjo̧ro̧pea̧ ma̧ȩ pio ju̧i̧ chjiari a̧ra̧ano̧pea̧ oa, gito ja̧boji̧ri̧ pio ji̧ri̧ chjaparȩpea̧ oa.

³ Ado ji̧ri̧iäpȩmo̧ ni̧bä chjaomȩrȩ ja̧di ta̧rëri̧ yo̧rëremȩdejȩrȩ: —Danȩrȩ, mȩnȩro̧ järä, jabechji̧ eami̧ oa goa jädë machji̧vä —yo̧a̧dejȩrȩ—. Jabechji̧ dibëa̧ tjätjäpë tai̧rea̧ to oa, ma̧chi̧ra̧ joë oa, chja̧pe oa, chëre oa goa jädë machji̧vä. Ado peaja̧di ano̧ mire ina̧rea̧ oa goa jädëpea̧de.

⁴ Ado mȩnȩro̧ eami̧ bë ma̧ri̧räpȩ go̧düdäräa̧rä, mȩnȩro̧ eami̧ bërä cjo̧ro̧pea̧ oa yu̧a̧rä, jabechji̧ pio ju̧ri̧pȩ cjiadiächji̧vä mȩnȩro̧ pio jiro bë ma̧ri̧ri pio judiri a̧dë baäa̧rä yuro.

⁵ Ado danȩrȩ ca̧ pumȩ, pio dibë chjadëri̧ japadërä judi, mȩnȩro̧ ado cja̧rȩmo̧ bë ma̧ri̧räpȩ go̧düdärärä dibë chjadëri̧ cjo̧ro̧ tänȩdërä judi, pio dibë chjadëri̧ jeadëri̧ cjiarä judi, jabechji̧ a̧dë baächji̧jȩrȩ —yo̧a̧dejȩrȩ—. Tjamo̧ davä. A̧dë baächji̧jȩrȩ cjiadiärea̧ decjiari̧. Ado mȩnȩro̧ baärä, jabechji̧ dibëa̧ taräremȩ pio ju̧i̧ gu̧ro tänȩchji̧jo̧ȩ dabu pjo̧no̧i̧remȩ pio ju̧i̧, ta gu̧në pjo̧deji̧ri̧rȩ. Jabechji̧ dibëa̧ taräremȩ pio judi na̧rȩrea̧de pio ji̧ri̧ uapai̧ dari̧ na̧rȩpea̧ oa. Jabechji̧ judiro̧ pio ju̧i̧ daea̧ oaiä, ‘Aja̧, Ütë tjamo̧ judi bape chjaopadiibëda' quëna̧ dabapadirȩ. Pio ju̧i̧iä ja̧di dari̧ japapea̧de mȩnȩro̧ baäbea yaboi̧ —yo̧a̧dejȩrȩ.

⁶ Ado Jechu judi pio ji̧ri̧ chjadü ëte, ma̧ȩ yürü ëte, jabechji̧ go̧düji̧ri̧rȩ a̧ra̧ano̧riä tai̧rëreji̧ri̧dirȩ oëra̧ti̧ oa cjiamȩ bë ma̧ri̧rä. Jabechji̧ Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ oa to̧bari̧ ni̧bä chjaoji̧ri̧rȩ tai̧rëreji̧ri̧dirȩ, gito ja̧boji̧ri̧ pio ji̧ri̧ chjö̧na̧i̧ oa chjaparȩji̧ri̧rȩ.

Erode A̧tipa quȩmȩ pio judi Jechurë jauëchja cjiari̧ jape chjaoa̧ pio ju̧i̧ chjiari ta̧rëa̧ oaiä, ana̧ri̧ jo̧rȩtarëremȩde, 'chjiacjivadida' quëna̧ jo̧rȩtamȩrȩ

^7-8 Ado pumȩ judiro̧ Jechu pio ju̧i̧ daea̧ ji̧, pio ju̧i̧ chjiari tjamo̧ri̧ dabadëji̧ri̧rȩ daea̧ ji̧, jabechji̧ ado cja̧rȩmo̧rämi̧ cjiaji̧ri̧rȩ darëreji̧ri̧diro̧jo̧ȩ. Ado pio ju̧i̧iä o judiro̧, 'Aja̧, uirä chudarëremȩ pio judipamȩ jirodida, Juan pio judi jirodida, ja̧boa̧ oa cjiarëremȩ pio judi bëdüa̧ jirodida' quëna̧ jo̧rȩtaji̧ri̧rȩ daea̧diro̧jo̧ȩ. Ado o judiro̧ Jechu pio ju̧i̧ daea̧ ji̧, 'jabechji̧ no̧mȩ tjamo̧ri ja̧ cjo̧ro̧rëremȩ pio judi jirodida, Ütërë ea jana̧ chjadüa̧ oa ni̧bärëremȩ pio judi jirodida, Eria quȩmȩ pio judi jirodida' quëna̧ jo̧rȩtaji̧ri̧rȩ darëreji̧ri̧diro̧jo̧ȩ. Ado o judiro cja̧rȩmo̧rämi̧ cjiarëreji̧ri̧diro̧jo̧ȩ. 'Aja̧, Ütërë ea jana̧ chjadüa̧ oa ni̧bämȩrëremȩ pio judida, ado cja̧rȩmo̧ jirodida, jabechji̧ ja̧boa̧ oa cjiarëremȩrȩ bëdüa̧ jirodiibëda yaba̧' quëna̧ jo̧rȩtaji̧ri̧rȩ daea̧diro̧jo̧ȩ. Ado pio jiro pumȩ judiro̧ Jechu pio ju̧i̧ chjiari yo̧a̧ ma̧ȩ üdë, jabechji̧ chjaodëri̧ baärëremȩde oëra̧ti̧ oa, pumȩ judiro̧ ütëborë ta̧rërea̧mi̧ dari̧. Ado chiri ütë cjo̧ro̧mȩ pio judiborë goë ta̧rërëremȩde, Erode A̧tipa quȩmȩ pio judi. Ado pio ju̧i̧iä ana̧ tjamo̧ri̧ jo̧rȩtamȩpea̧de, chji̧ goaera̧ jo̧rȩtarea̧mi̧dëri̧. Jabechji̧ jënȩ jabërä Juan pio ju̧i̧ ja̧bo tänȩtä yo̧a̧ oaiä, jabechji̧ ana̧ tjamo̧ri̧ jo̧rȩtamȩpea̧de. Ado pio ju̧i̧iä ja̧di ta̧rëri̧ yo̧a̧dejȩrȩ pio jȩa a̧doji̧ri̧ pio ji̧ri̧:

⁹ —Danȩrȩ, pio cüdë ja̧bo tänȩa̧reconȩ Juan pio ju̧i̧. Ado pio ju̧i̧iä, 'jabechji̧ Juan pio judi jirodida' quëna̧rea̧mi̧dëde —yo̧a̧dejȩrȩ—. Jabechji̧ pio cüdë tänȩa̧ oa guadia pio judi tjübë coto tänȩrëremȩdejȩ. Jabo danȩrȩ, cüdë Juan pio ju̧i̧ ja̧bo tänȩa̧rä judi, ¿chjia tjamo̧de ado cja̧rȩmo̧ üdë? ¿Chjiade ji̧dë ma jauëchja cjiari̧ japamȩ pio judi? —iëno̧ë ta̧rëa̧dejȩrȩ. Ado pio ju̧i̧iä ji̧dë ma järirëremȩde Erode A̧tipa judi Jechu pio ju̧i̧ irä dapea̧ oa.

Jechu judi pumȩ buba tjamo̧ oa jauëchja cjiari̧ ëba jurarëremȩdejȩrȩ

¹⁰ Ado japamitë chjätä ëte, Jechurë chjadüa̧ pio judiro̧ ado cuchupë ma̧na̧rëreji̧ri̧dirȩ. Jechu pio judi chjadüa̧ oa oëra̧ti̧ oa a̧ra̧ano̧riä järëreji̧ri̧ pio judiro̧ ado chjereno̧ cuchupë ma̧na̧rëreji̧ri̧dirȩ Jechu pio ju̧i̧iäpȩ. Ado ana̧ri̧ ni̧bä chjaoa̧diro̧jo̧ȩ jënȩro̧ japea̧ pio ju̧i̧ chjiari. Ado ja̧dëa ji̧ Jechu judi jibëa̧ jadü pio ji̧ri̧iä ta̧rë ëte, ëba jäa̧dejȩrȩ Bechaida quȩmȩ bë ma̧ri̧räpȩ. Jabechji̧ judiro̧ jibëa̧ma̧i̧ ëba cjiapea̧ oa, pio ji̧ri̧mo̧i̧ ëba jäa̧dejȩrȩ, o ji̧ri̧ a̧dë jämȩrȩ.

¹¹ Jabo judiro̧ jibëa̧ma̧i̧ chjadëri̧ a̧doparea̧ datärea̧ ji̧, cjäri̧ madirȩ, japarea̧ dadëa̧dirȩ. Jabechji̧ japamitȩ chjätä ëte pumȩ bubarë cho̧rë järëreji̧ri̧diro̧jo̧ȩ. 'Aja̧, Jechu judi jibëa̧ jadü pio ji̧ri̧ nö̧ta ja̧dira̧ baäa̧diro̧da' quëna̧ dabaji̧ri̧pea̧ oaiä, jabechji̧ cho̧rë järëreji̧ri̧diro̧jo̧ȩ. Ado ja̧dëa ji̧ judiro̧ Jechu pio ju̧i̧iäpȩ go̧düdäräa̧ji̧ri̧ oa, jabechji̧ chjadëri̧ jea̧dejȩrȩ. Jibëa̧ma̧i̧ cjiatämi̧ cjiaräbo, jabechji̧ chjadëri̧ jea̧dejȩrȩ. Ado ja̧dëa ji̧ Ütërë yo̧a̧ chja̧oerä cjo̧ro̧pea̧ pio ju̧i̧ chjiari a̧ra̧ano̧rëremȩdejȩrȩ. Ado gito ja̧boji̧ri̧ pio ji̧ri̧ peaja̧di chjaparȩrëremȩdejȩrȩ.

¹² Ado do decjiape baga̧rä, jibëa̧ jadü pio judiro̧ 12rë jäa̧diro̧jo̧ȩ Jechu pio ju̧i̧iäpȩ. Ado yo̧a̧diro̧jo̧ȩ: —Jabo danȩ, baä tänȩjȩrȩ pumȩ buba oa. Jabechji̧ jibëa̧ jurarea̧ oa gatëpea̧ oa, jënȩro̧ mo̧a̧rea̧räpȩ dapea̧ oa, baä tänȩjȩrȩ. Jabechji̧ jurarea̧ decjiaräpȩrea̧rȩ. Chiri tjoräpȩrea̧rȩ —yo̧a̧diro̧jo̧ȩ.

¹³ Jabo Jechu judi dëbë yo̧a̧dejȩrȩ: —Jabechji̧ pio mȩnȩro̧ jurarea̧ oa yürüchji̧jȩrȩ —yo̧a̧dejȩrȩ. Jabo judiro̧ dëbë yo̧a̧diro̧jo̧ȩ: —Jabo cjäri̧ marea̧rȩ, japarea̧ decjiade —yo̧a̧diro̧jo̧ȩ—. Jabomo̧ cja̧rȩichimo̧ chja̧pe maea oa goarea̧rȩ, yo̧a̧ri̧ cho̧ oa peaja̧di. Nö̧tadë made. ¿Jabo yö̧ta jo̧rȩtarenȩ? ¿Gatërea̧ bëräpȩ jäeno̧tä earenȩibe a̧ro̧rȩ pio jiro pumȩ buba ja̧ oa gatë yürüpea̧ oa? —iëno̧ë ta̧rëa̧diro̧jo̧ȩ.

¹⁴ Jabechji̧ pumȩ no̧i̧dë tjamo̧rëreji̧ri̧dirȩ. Oari judiro̧ 5 mil pumȩrëreji̧ri̧dirȩ. Ado pio ji̧ri̧ uëri ivi pio jini̧ro̧borë a̧doparëreji̧ri̧ni̧rȩ, bori̧bo. Ado pio ju̧i̧iä jabechji̧ a̧dë chjäte ji̧ra̧ tjamo̧rëreji̧ri̧dirȩ. Jabo ja̧dëa ji̧ Jechu judi yo̧a̧dejȩrȩ: —Danȩrȩ ca̧ jadü, jabechji̧ cha tänȩchji̧jȩrȩ. Jabechji̧ jibëa̧ buba chari̧, 50 pumȩ chiari̧ cha tänȩchji̧jȩrȩ. Jabechji̧ ado cja̧rȩmo̧ buba chari̧, ado cja̧rȩmo̧ buba chari̧ cha tänȩchji̧jȩrȩ.

¹⁵ Ado pio ju̧i̧iä chaji̧ri̧pea̧dirȩ pumȩ judiro̧.

¹⁶ Ja̧dëa ji̧ Jechu judi mitërëremȩdejȩrȩ chja̧pe cja̧rȩichimo̧ oa, ado yo̧a̧ri̧ cho̧ oa. Ado a̧dëräpȩmo̧ gatë damȩrȩ chjacjiamȩri̧ jo̧rȩtamȩrȩ ni̧bäa̧dejȩ Ütë tjamo̧ ju̧i̧, 'chjadëri̧ yürüa̧diibëda' quëna̧ jo̧rȩtamȩrȩ. Ja̧dëa ji̧ chja̧pe oa, ado cho̧ oa mu̧i̧ quirë yürüa̧dejȩrȩ jibëa̧ jadü pio ji̧ri̧iäpȩmo̧, judiro̧ chjarapë yürüpea̧ oa pumȩ pio ji̧ri̧iäpȩmo̧.

¹⁷ Ado judiro̧ chjarapë yürü ëte, jabechji̧ jura̧dirȩ pumȩ judiro̧ ütëborë, jënȩro̧ maipea̧rä yuro. Ja̧dëa ji̧ judiro̧ ütëborë mairi̧ jura̧ duri oa jurarea̧ pënȩ oa boa ëte, cjiadiäa̧mȩ jurarea̧ oa boa ëte, jabechji̧ 12 taio tjuri cjia oa boa̧ oa goarëreji̧ri̧dirȩ.

Pedro judi tjamo̧i̧ cjiari̧ yo̧rëremȩde Jechu pio ju̧i̧ chjiari

¹⁸ Ado cja̧rȩmo̧ doremȩrä Jechu judi a̧dë järëremȩdejȩrȩ pumȩ buba ji̧ri̧ jibëa̧ Amai̧ pio ju̧i̧ nö̧ta ni̧bäpea̧ oa, jibëa̧ jadü pio ji̧ri̧ nö̧ta ëba cjiapea̧ oa. Ado ja̧dëa ji̧ iëno̧ë ta̧rëa̧dejȩrȩ: —Danȩrȩ —yo̧a̧dejȩrȩ—, ¿tjana̧ yo̧dirȩ pumȩ judiro̧ pio coa chjiari? ¿Chjia tjamo̧rämi̧ cjiadiro̧coe?

¹⁹ Ado dëbë yo̧a̧diro̧jo̧ȩ: —Chjia tjamo̧rämi̧ cjiadë, jabechji̧ o judiro̧ Juan pio judirämi̧ cjiadiro̧mȩ, uirä go̧ȩ cjaeä chudarëremȩ pio judi. Ado o judiro̧, ‘Aja̧, Eria pio judipamȩ jirodida’ quëna̧ jo̧rȩtadiro̧mȩ. Ado o judiro̧, ‘A̧ja̧, Ütërë ea jana̧ chjadüa̧ oa ni̧bämȩ pio judipamȩ jirodida, no̧mȩ tjamo̧ri ja̧ cjo̧ro̧rëreji̧ri̧ pio ji̧ri̧ ja̧ jadüpamȩ jirodida, ja̧borëremȩrȩ bëdüa̧ jirodiibëda' quëna̧ jo̧rȩtadiro̧mȩ —yo̧a̧diro̧jo̧ȩ.

²⁰ Ja̧dëa ji̧ Jechu judi iëno̧ë ta̧rëa̧dejȩrȩ: —Ado mȩnȩro̧, ¿yö̧ta dari̧ jo̧rȩtarenȩro̧coe? ¿Chjia tjamo̧rämi̧ cjiarenȩro̧coe coa? Ado Pedro judi dëbëmȩrȩ yo̧a̧dejȩ: —Chjia tjamo̧rämi̧ cjiadë, ‘jabechji̧ Ütërë mitëa̧ Chjätä Tänȩmȩ pio judi tjamo̧dida’ quëna̧ jo̧rȩtaji̧ri̧rȩ darea̧ro̧mȩ —yo̧mȩrȩ dëbë yo̧a̧dejȩ.

²¹ Ado Pedro judi ja̧di ta̧rëri yo̧a̧ oaiä, jabechji̧ pio jȩa chjiari cjapiri̧ cjiatä yo̧a̧dejȩrȩ jibëa̧ jadü ji̧ri̧ Jechu judi, judiro̧ eami̧ oa pio jȩa chjiari yo̧chea oa. Jabechji̧ ‘Ütërë mitëa̧ Chjätä Tänȩmȩ pio judidida’ quëna̧ jo̧rȩtaji̧ri̧rȩ yo̧chea oa, cjapiri̧ cjiatä yo̧a̧dejȩrȩ.

²² Ja̧dëa ji̧ ja̧di ta̧rëri̧ yo̧mȩrȩ a̧de yo̧a̧dejȩrȩ: —Danȩrȩ, Pumȩrȩ Ara̧ Tjamo̧ pio judi dami̧ti̧ chjai̧dë oa chjätäpea̧ chiade —yo̧a̧dejȩrȩ—. Jabechji̧ judio tjamo̧ yo̧ji̧ri̧ pio judiro̧, ado o ji̧ri̧ chjiari tjamo̧ goë tuti ja̧bepaji̧ri̧ pio judiro̧, ado Moicherë go̧ȩparea̧ ma̧ȩ oa a̧ra̧ano̧ji̧ri̧ pio judiro̧ jiada mapadiro̧coe —yo̧a̧dejȩrȩ—. Ado ja̧bo tänȩa̧ oa cjiaparequede ji̧dëri̧. Jabo danȩrȩ, tjarari̧ do chjätä ëte, ado chjereno̧ bëdüparequede —yo̧mȩrȩ ni̧bä chjaorëremȩdejȩrȩ pio jȩa chjiari.

²³ Ja̧dëa ji̧ Jechu judi ütëbo oa yo̧a̧dejȩrȩ: —Jabechji̧ eami̧ pumȩ judi pio coa cho̧rë jana̧tämi̧ cjiarä judi, jabechji̧ jënȩ jibëa̧ jo̧rȩtarea̧ maeara̧ jo̧rȩtarërea̧ ji̧, ca̧ jo̧rȩtarea̧ maeara̧ ano̧ mire jo̧rȩtapea̧ chiade —yo̧a̧dejȩrȩ—. Tjamo̧ davä. Eami̧ pumȩ judi pio coa cho̧rë jana̧tämi̧ cjiarä judi, jabechji̧ jȩa ja̧bopea̧ to pio ju̧i̧ doti̧mi̧ aramȩmi̧ dari̧ cjo̧ro̧pea̧ chiade. Jabechji̧ pio coa ta̧rëdiäpea̧ chiadique uapai̧ daräbo, o judiro̧ pio jȩaiäpȩmo̧ ja̧bo tänȩpai̧ daräbo.

²⁴ Jabechji̧ eami̧ pumȩ üdë jibëa̧ chji̧rämo̧ jo̧rȩtamȩrȩ cjo̧ro̧mȩ pio judi, jibëa̧ i pio ju̧i̧ ji̧dë ma jidatämi̧ cjiamȩrȩ cjo̧ro̧mȩ pio judi, cjäri̧ made, tjamo̧ri̧ cjo̧ro̧rea̧ dadëpade. Jabo eami̧ pumȩ judi ca̧ ma̧ȩ pio ju̧i̧ ji̧dë ma ta̧rëdiämȩrȩ cjo̧ro̧mȩ pio judi, pio jȩa ja̧bo tänȩpai̧ daräbo chjuari̧ quëna̧mȩrȩ cjo̧ro̧mȩ pio judi, jabechji̧ tjamo̧ri̧ cjo̧ro̧rea̧ dapade, bucho ana̧ cjo̧ro̧rea̧ damȩrȩ.

²⁵ Jabo eami̧ pumȩ judi dai chirirä ja̧ pio ju̧i̧ a̧dë chjäte ji̧ra̧ri̧ goamȩrȩ ja̧borä judi, dami̧ti̧ ba chia oa boa ëte ja̧borä judi, jabechji̧ a̧doa̧ oa cjiadëpade jibëa̧ tjo üdë. Tjamo̧ davä. Jënȩ dami̧ti̧ oa boa̧ pio ju̧i̧iä a̧doa̧ oa cjiadëpade.

²⁶ Ado danȩrȩ, eami̧ pumȩ judi pio coa chjiari idëri̧ cjiarä judi, ca̧ ma̧ȩ pio ju̧i̧iä idëri̧ cjiarä judi, peaja̧di ba dëbë idëri̧ cjiamȩrȩ cjiadiäparequede pio ju̧i̧ chjiari cüdë ma̧na̧rä. Tjamo̧ davä. Danȩrȩ, Pumȩrȩ Ara̧ Tjamo̧ pio judirequede cüdë. Ado pio cüdë ma̧na̧rä, cüdë ca̧ chjacjiamȩrea̧ jauëchja oa ana̧ri̧ na̧rȩmȩrȩ ma̧na̧rä, cüdë ca̧ Ama̧i̧ pio ju̧i̧ ja̧ tatarea̧ra̧ pio ju̧ri̧ra̧ ma̧na̧rä, jabechji̧ pio cüdëborë idëri̧ cjiamȩrȩ cjiaparequede pio jȩa chjiari, cüdë a̧dëriji̧ri̧ mu̧i̧tjoi̧ ja̧ tatarea̧rä ma̧na̧rä —yo̧mȩrȩ ni̧bä chjaorëremȩdejȩrȩ.

Jechu judi na̧rȩrëremȩdejȩrȩ jibëa̧ jauëchja oa

²⁷ Ado Jechu judi ji̧dë u̧i̧ yo̧mȩrȩ ja̧di ta̧rëri̧ ni̧bä chjaorëremȩdejȩrȩ: —Danȩrȩ, chjadëri̧ ta̧rëchji̧coe cüdë dibë tjamo̧ri̧ yo̧ tara —yo̧a̧dejȩrȩ—. Pio mȩnȩro̧ orë jabë ja̧bodëa̧rä, pio yi cjiaji̧ri̧ pio judiro̧ orë jabë ja̧bodëa̧rä, jabechji̧ irä daparenȩro̧coe a̧dë chjäte tatari̧ cjiamȩ oa, tjamo̧ yo̧mȩpea̧mȩ oa —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

²⁸ Ado japamitë chjätä ëte, dabadëde jabo cja̧ȩta̧ra̧ ichiri tjarari̧ do chjätäa̧ jirode. Ado pio judirä, Jechu judi ëba buarëremȩdejȩrȩ jibëa̧ jadü pio ji̧ri̧, tjarari̧ oa. Ya̧mi̧ uë tjamo̧räpȩ ju̧ri̧ ëba bua̧dejȩrȩ Ütë tjamo̧ pio ju̧i̧ ni̧bäpea̧ oa. Pedro pio ju̧i̧, Juan pio ju̧i̧, ado Santiago pio ju̧i̧bo ëba buarëremȩde. Aja̧, pio jiro pumȩ ji̧ri̧ ëba bua̧dejȩrȩ.

²⁹ Ado Jechu judi jibëa̧ Ama̧i̧ pio ju̧i̧di ni̧bäa̧ nö̧ta, jabechji̧ pio ju̧i̧ ja̧ chama̧cho üdë tjaoëpai̧ da tjamo̧pe bagarëremȩde, dorë tatami̧ dari̧. Ado ju̧i̧ ja̧ chjibo üdë ma̧i̧ dari̧ a̧dë chjäte bërëbërëai̧pe baga̧de, ma̧i̧ dari̧ tatape bagari̧.

³⁰ Ado pio ju̧i̧ ja̧ yuroro chjaodëri̧ idëpea̧dirȩ yo̧a̧ri̧ pumȩ judiro̧. Aja̧, Eria pio judi, ado Moiche pio judiborë ëba cjiarëreji̧ri̧diro̧jo̧ȩ. Ado Jechu pio ju̧i̧ nö̧ta ni̧bä chjaoa̧diro̧jo̧ȩ.

³¹ Jabechji̧ tatari̧ cjia tjamo̧ji̧ri̧rȩ ni̧bärëreji̧ri̧diro̧jo̧ȩ judi pio yoa chiri oa a̧dë baäpea̧ pio ju̧i̧ chjiari, judi Jerucharȩräpȩ japadäräpea̧ pio ju̧i̧ chjiari, judi japamitë boi̧chji̧ chjätä ëte baäpea̧ pio ju̧i̧ chjiari.

³² Jabo cjäri̧ madirȩ, Pedro judi ado o judiro̧ goae tarari̧ mo̧a̧rëreji̧ri̧dirȩ. Jabo ja̧dëa ji̧ judiro̧ bëdüa̧rä, a̧dë chjäte tatari̧ cjiamȩ oa daea̧diro̧jo̧ȩ Jechu pio ju̧i̧. Ado pio jȩa nö̧ta ëba cjiaji̧ri̧ pio ji̧ri̧bo daea̧diro̧jȩrȩ oari yo̧a̧ri̧ oa.

³³ Ado jiro oari judiro̧ baäpea̧ ji̧ tarupea̧rä, Pedro judi chjadëri̧ jo̧rȩtadëmȩrȩ chjaodëri̧ yo̧eno̧a̧dejȩ Jechu ju̧i̧: —Danȩ Ano̧mȩ, jabechji̧ chjadë tjamo̧de a̧ro̧rȩ pio yi tara. Jabechji̧ tjarari̧ jo̧ bori̧ oa cji̧deno̧täreji̧ri̧rea̧rȩ. Pio na̧ea̧ oa, Moiche ja̧ oa, ado Eria ja̧ oa peaja̧di —yo̧a̧dejȩ.

³⁴ Jabo Pedro judi ja̧di ta̧rëri̧ ni̧bäa̧ nö̧ta, a̧dë chjäte tatari̧ cjiamȩ go̧a̧ra̧ ë üdë birana̧ra̧rëremȩdejȩrȩ ji̧ri̧ ja̧ uëräpȩ. Ado ina̧mi̧ dari̧ japea̧dejȩrȩ. Ado go̧a̧ra̧ üdë pio ji̧ri̧ tjoro tänȩa̧ oaiä, jabechji̧ uapaji̧ri̧pea̧dirȩ.

³⁵ Ado go̧a̧ra̧ ë tjori pio judiri ni̧bämȩ oa ta̧rëa̧diro̧jo̧ȩ, ja̧di ta̧rëri̧ ni̧bämȩ oa: —Pio yodëje ca̧ Jadiquȩ. Cüdë mitëa̧ pio judidiquȩ. Ado pio ju̧i̧iä jabechji̧, ta̧rë ja̧bochji̧jo̧ȩ —yo̧mȩrȩ ni̧bärëremȩde ni̧bämȩ judi.

³⁶ Ado ni̧bämȩ judi ni̧bädäräa̧rä, jabechji̧ Jechu pio judimo̧rȩ cjiadiärëremȩde, jibëa̧ma̧i̧mȩrȩ. Ado jibëa̧ jadü pio judiro̧ tjarari̧rȩ chjaodëri̧ yo̧tärea̧ ji̧, judiro̧ irä daea̧ pio ju̧i̧ chjaodëri̧ yo̧tärea̧ ji̧, judiro̧ irä ta̧rëa̧ pio ju̧i̧ chjaodëri̧ yo̧tärea̧ ji̧, jabechji̧ cjapiri̧ cjiarëreji̧ri̧dirȩ, pumȩ pio ji̧ri̧iäpȩmo̧ yo̧dëji̧ri̧rȩ.

Jechu judi ira̧diä cjaeäa̧mȩ pio ju̧i̧ baä tänȩrëremȩdejȩ üi̧ pëi̧ ja̧ icjararä bëparërea̧ ji̧

³⁷ Ado dopea̧rä, judiro̧ ya̧mi̧ uëri pio judiri bira̧ duri oa, pumȩ bubarë dëbëdiärëreji̧ri̧diro̧jo̧ȩ Jechu ju̧i̧.

³⁸ Ado pumȩ chjarerä cjiamȩ pio judi cja̧rȩmȩrȩ to̧bari̧ ëna̧diäa̧dejȩ: —A̧ra̧ano̧mȩ, cjäri̧ri̧ cjia dajo̧ȩ ca̧ ja oa. Jabechji̧ pio ju̧i̧mo̧i̧ ëbarequede —yo̧a̧dejȩ—.

³⁹ Ado danȩ, yaröca üdë babui̧ra̧ boadärä chjaodejȩ cjarari̧ cjiape bagarea̧mi̧ dari̧, goae tarari̧ a a ma cjia chjaori̧. Jabechji̧ pio ju̧i̧ ma̧i̧ dari̧ i ma̧na̧gura chjaomȩrȩ bübürepë chjao tänȩdejȩ icjara nö̧tai̧ oa co chiape bagari̧, pjuru üdë jibëa̧ yari pio judiri go̧dürea̧mi̧ dari̧ —yo̧a̧dejȩ—. Tjaoërämo̧dë jabo ji̧dë ma jape chjaodejȩ ca̧ ja oa japamitë ana̧ri̧ pio ju̧i̧ tjamo̧ri̧ a̧dë baädëri̧ cjiamȩrȩ.

⁴⁰ Jabechji̧ na̧ jadü pio ji̧ri̧ cjo̧dëtea̧requedejȩrȩ jabo cjäri̧ madiro̧jo̧ȩ, icjararä ira̧diä cjaeämȩ pio ju̧i̧ baä tänȩrea̧ dadëa̧diro̧jo̧ȩ —yo̧a̧dejȩ jäjäa judi—.

⁴¹ Ado Jechu judi pio ju̧i̧ ta̧rëa̧ oaiä, ado pumȩ judiro̧ no̧i̧dërë pio jȩaiäpȩmo̧ tjamo̧ri̧ quëna̧dëji̧ri̧ oa daea̧ oaiä, jabechji̧ to̧bari̧ yo̧rëremȩdejȩrȩ: —Jabo cjäri̧ manȩrȩ, pio yaba̧mȩ yoaiä cjo̧ro̧ji̧ri̧ pio mȩnȩro̧ chjadëri̧ jo̧rȩtarea̧ chiadëji̧ri̧ti̧nȩrȩ —yo̧a̧dejȩrȩ—. Ji̧dë ma chjai̧dëri̧ jape chjaonȩrȩ. Jaboti̧ri̧ baä jiadarenȩro̧coe. ¿Napai̧rä yuro chjuari̧ jiadaparenȩro̧coe? ¿Napai̧rä yuro jidatapea̧ chiarequededibe mȩnȩro̧ quëna̧pea̧ ji̧? ¿Napai̧ japamitë ëba cjiapea̧ chiarequededibe, mȩnȩro̧ chjadëri̧ quëna̧pea̧ oa —yo̧mȩrȩ yo̧a̧dejȩrȩ ütëbo oa. Ado Jechu judi pumȩ pio ji̧ri̧iäpȩmo̧ to̧bari̧ yo̧ ëte, jabechji̧ yo̧a̧dejȩ yaröca chiamȩ ja̧ jäjäa pio ju̧i̧iäpȩmo̧: —Danȩ, ëba jana̧jo̧ȩ na̧ ja pio ju̧i̧ jauëräpȩmo̧ —yo̧a̧dejȩ.

⁴² Ado ju̧i̧ ja̧ joja judi, üi̧ pëi̧ chja pio judi Jechu pio ju̧i̧iäpȩmo̧ jäa̧ ji̧, jabechji̧ chjaodëri̧ idë cürëa̧dejȩ daburäpȩmo̧ yaröca üdë. Ado ma̧i̧ dari̧ conȩda̧dejȩ ana̧ri̧ bübürepe chjaori̧. Jabo Jechu judi ya̧mi̧ ta̧rëri̧ yo̧a̧dejȩ yaröca pio ju̧i̧. Ado chjaodëri̧ a̧dë go̧deno̧a̧dejȩ. Ado pëi̧ chja pio judi chjaodëri̧ chjapea̧ oa cjiadiäa̧de. Ado ja̧dëa ji̧ Jechu judi ado chjereno̧ yürüa̧dejȩ jäja pio ju̧i̧.

⁴³ Ado pumȩ judiro̧ Jechurë japea̧ pio ju̧i̧ daea̧ oaiä, 'jabechji̧ Ütë tjamo̧ judi jauëchja tjamo̧dida' quëna̧ jo̧rȩtaji̧ri̧rȩ ana̧ri̧ jo̧rȩtaji̧ri̧pea̧dirȩ, dacho bëremi̧ cjiami̧ dari̧. Ado pumȩ judiro̧ Jechurë japea̧ pio ju̧i̧ chjiari ana̧ri̧ jo̧rȩta̧ oaiä, judiro̧ ya yabë cjiami̧ dari̧ jo̧rȩta̧ oaiä, Jechu judi yo̧a̧dejȩrȩ jibëa̧ jadü ji̧ri̧:

Jechu judi ja̧bopea̧ pio ju̧i̧ chjiari ado ni̧bärëremȩdejȩrȩ jibëa̧ jadü ji̧ri̧

⁴⁴ —Chjadëri̧ ta̧rë ja̧bochji̧coe a̧dë jo̧rȩtarea̧mi̧dëri̧ —yo̧a̧dejȩrȩ—. Danȩrȩ, o judiro̧ yürüpadiro̧coe Pumȩrȩ Ara̧ Tjamo̧ pio ju̧i̧ tjamo̧ yo̧ji̧ri̧ pio ji̧ri̧iäpȩmo̧ —yo̧a̧dejȩrȩ—. Pio coa ja̧bo tänȩtämi̧ cjiaji̧ri̧ pio ji̧ri̧iäpȩmo̧ yürüpadiro̧coe mitërea̧mi̧ dari̧ —yo̧a̧dejȩrȩ.

⁴⁵ Jabo Jechu ja̧ jadü pio judiro̧, cjäri̧ madiro̧jo̧ȩ, tjamo̧ri̧ bapë ta̧rëdëa̧diro̧jo̧ȩ judi pio jibëiäpȩmo̧ ni̧bä chjaoa̧ ji̧. Jabechji̧ goadia̧ oa cjiami̧ dari̧ cjiarëremȩde judiro̧ tjamo̧ri̧ ta̧rërea̧mi̧dëri̧. Ado judi yo̧a̧ pio ju̧i̧ chjiari iëno̧ë ta̧rëtärea̧ ji̧, chjadëri̧ dabapea̧ oa iëno̧ë ta̧rëtärea̧ ji̧, cjäri̧ madirȩ, uaparëreji̧ri̧dirȩ pio ju̧i̧ iëno̧ë ta̧rëpea̧ ji̧.

O ji̧ri̧ u̧i̧ ba chiaji̧ri̧ pio ji̧ri̧ chjiari ni̧bärëremȩde Jechu judi

⁴⁶ Ado Jechu ja̧ jadü pio judiro̧ taruparëreji̧ri̧dirȩ goae tarari̧ dëbë ni̧bätapea̧ ji̧. 'Jabechji̧ pio cüdë o ji̧ri̧iä ji̧dë u̧i̧ ba chiaquëda' quëna̧taji̧ri̧rȩ ni̧bä chjaorëreji̧ri̧dirȩ, goae tarari̧ dëbë ni̧bätaji̧ri̧rȩ.

⁴⁷ Jabo Jechu judi jibëa̧ chji̧räpȩmo̧ cjacjarë daba damȩrȩ dabarëremȩde judiro̧ jo̧rȩta̧ pio ju̧i̧ chjiari. Ado pio ju̧i̧iä pumȩ boi̧chji̧ oa jibëa̧ yuroro cjia tänȩa̧dejȩ.

⁴⁸ Ado ja̧dëa ji̧ yo̧a̧dejȩrȩ: —Danȩrȩ, eami̧ pumȩ üdë pio cüdëmi̧ dari̧ japarä judi, pio yoa pumȩ boi̧chji̧ oa cjäri̧ri̧ cjiamȩrȩ jearä judi, ba chiadëmȩmi̧ damȩ pio ju̧i̧ cjäri̧ri̧ cjiamȩrȩ jearä judi, jabechji̧ pio coabo cjäri̧ri̧ cjia dami̧ dari̧ jeadique. Ado eami̧ pumȩ üdë pio coa cjäri̧ri̧ cjia damȩrȩ jearä judi, pio coa chjadüa̧mȩ pio ju̧i̧bo cjäri̧ri̧ cjia dami̧ dari̧ jeadejȩ. Tjamo̧ davä —yo̧a̧dejȩrȩ—. Pio coabo cjäri̧ri̧ cjia dami̧ dari̧ jeamȩ pio judi, ca̧ Ama̧i̧ pio ju̧i̧bo cjäri̧ri̧ cjia dami̧ dari̧ jeadejȩ. Jabechji̧ eami̧ pumȩ üdë, ‘Aja̧, bo maquëda, o ji̧ri̧iä ji̧dë u̧i̧ ba chiadëquëda jabo o judiro̧ pio coa u̧i̧ ba chiadiro̧da, jabechji̧ ba chiadëmȩquëda’ quëna̧rä judi, jabechji̧ ba chia tjamo̧dida' quëna̧ jo̧rȩtamȩrȩ dapadejȩ Ütë tjamo̧ pio judi.

Coa dëbëpe chjaodëmȩ judi, jabechji̧ chjadëri̧ a̧dodique yo̧de Jechu judi

⁴⁹ Ja̧dëa ji̧ Juan judi, Jechu ja̧ jadü pio judi yo̧a̧dejȩ Jechu ju̧i̧iäpȩmo̧: —Ano̧mȩ, ado cja̧rȩmo̧ pumȩ oa daea̧rea̧ro̧jo̧ȩ ira̧diä cjaeämȩ pio ju̧i̧ baä tänȩa̧mȩ oa. Aja̧, na̧ jadüdë oa daea̧rea̧ro̧jo̧ȩ na̧ quȩrä baä tänȩa̧mȩ oa. Jabo pio ibë nö̧tadëmȩ tara, ibëa̧ bubarädëmȩ tara, jabechji̧ tja̧reparea̧rea̧ro̧jo̧ȩ —yo̧a̧dejȩ.

⁵⁰ Jabo Jechu judi jibëa̧ jadü pio ji̧ri̧iäpȩmo̧ dëbë yo̧a̧dejȩrȩ: —Jabo cjäri̧ manȩro̧jo̧ȩ, tja̧reparȩdëa̧täreji̧ri̧renȩro̧jo̧ȩ. Chja jabechji̧ japatäde. Jabechji̧ dibë dëbëpe chjaodëmȩ pio judi, jabechji̧ pio dibëdi ja̧bepamȩmi̧ dade. Pio ju̧i̧iä tja̧reparȩdëa̧täreji̧ri̧renȩro̧jo̧ȩ —yo̧a̧dejȩrȩ.

Chamaria quȩmȩräpȩ cjo̧ro̧ji̧ri̧ judiro̧ jiadadiro̧jo̧ȩ Jechu pio ju̧i̧

⁵¹ Ado Jechu judi a̧dëräpȩmo̧ baäpea̧ do üdë querediärä, Ütë tjamo̧ judi Jechu pio ju̧i̧ ado chjereno̧ a̧dëräpȩ baä tänȩpea̧ querediärä, 'jabechji̧ Jerucharȩräpȩ tjamo̧ri̧ jäpaquëda' quëna̧ jo̧rȩtamȩrȩ järëremȩde pio jiro bë ma̧ri̧räpȩ, 'jädaemȩ jiroquëda' quëna̧rea̧ decjiari̧.

⁵² Ado Jechu judi Chamaria quȩmȩ chirirä cjiamȩ bë ma̧ri̧ boi̧chji̧räpȩmo̧ jämȩrȩ jabërä chjadürëremȩdejȩrȩ jibëa̧ jadü ji̧ri̧ pio jiro bë ma̧ri̧ boi̧chji̧räpȩ jabërä jätä. Aja̧, jabërä jätä, pio jȩa chjiari ma̧ȩ yüre jätä chjadüa̧dejȩrȩ pio judiro̧ chjö̧na̧i̧rȩ jabërä chjadëri̧ jëdano̧a̧ oa goapea̧ oa.

⁵³ Jabo ju̧ri̧pȩ cjo̧ro̧ji̧ri̧ pio judiro̧, cjäri̧ madiro̧jo̧ȩ, Jechu pio ju̧i̧ chjadëri̧ yu̧a̧rea̧ yürüdëa̧diro̧jo̧ȩ. Chjadëri̧ jearea̧ dadëa̧diro̧jo̧ȩ. Jabechji̧ judi Jerucharȩräpȩ jäparëremȩ tara, ado Chamariaräpȩ cjo̧ro̧ji̧ri̧ pio judiro̧ judio pio ji̧ri̧ tjamo̧ri̧ eadë tara, jabechji̧ yu̧a̧rea̧ yürüdërëreji̧ri̧diro̧jo̧ȩ.

⁵⁴ Jabo Santiago judi, Juan judi pio ju̧i̧ daea̧ oaiä, Jechu pio ju̧i̧ jiadaji̧ri̧ pio ji̧ri̧ daea̧ oaiä, jabechji̧ yo̧a̧diro̧jo̧ȩ Jechu pio ju̧i̧: —Ano̧mȩ, ¿yö̧ta dari̧ japatä earenȩibe? —iëno̧ë ta̧rëa̧diro̧jo̧ȩ—. ¿Jabo cjo̧dë üdë a̧dëri pio judiri pio ji̧ri̧iäpȩmo̧ acji cjatä tänȩtä earenȩibe judiro̧ tjaepe bagari̧? —iëno̧ë ta̧rëa̧.

⁵⁵ Jabo Jechu judi pio ji̧ri̧iäpȩmo̧ mire damȩrȩ to̧bari̧ chi̧dëea̧dejȩrȩ ja̧di dari̧ japapea̧ ji̧ jo̧rȩtadëtä.

⁵⁶ Ado judiri ano̧ mire järëreji̧ri̧dirȩ ado cja̧rȩmo̧räpȩ, ado cja̧rȩmo̧ bë ma̧ri̧räpȩ.

Chjao tjamo̧de Jechu pio ju̧i̧ cho̧rë jäpea̧ üdë

⁵⁷ Ado judiro̧ ado cja̧rȩmo̧räpȩmo̧ jäa̧ nö̧ta, jabechji̧ cja̧rȩmȩ pumȩrȩ yo̧a̧dejȩ Jechu ju̧i̧, ja̧di ta̧rëri̧ yo̧mȩrȩ: —Danȩ, mȩnȩ eami̧räpȩ järä, jabechji̧ ji̧dë ma cho̧rë jäparequedemȩ —yo̧a̧dejȩ.

⁵⁸ Jabo Jechu judi dëbë yo̧a̧dejȩ: —Danȩ, tjamo̧ri̧ cho̧rë jana̧tämi̧ cjiarenȩque? Danȩ ca̧ pumȩ, bë goadërequede. Jabo oariro pio judiro̧, dëdë jibëa̧ mo̧a̧rea̧räpȩ goadirȩ. Ado pua judiro̧ peaja̧di jibëa̧ mo̧a̧rea̧räpȩ goadirȩ. Jabo cüdë ca̧ mo̧a̧rea̧ oa tjamo̧ri̧ goadërequede. Jabechji̧ Pumȩrȩ Ara̧ Tjamo̧mȩborë mö̧na̧requede cüdë. Ado pio ju̧i̧iä iëno̧ë ta̧rërequedemȩ ado. ¿Tjamo̧ri̧ cho̧rë jana̧tämi̧ cjiarenȩque bë goadëmȩ ju̧i̧? Danȩ, mȩnȩ pio coa cho̧rë jana̧rä judi, jabechji̧ pio yoa chiri oa chjätäti̧ cjiamȩmi̧ dari̧ cjo̧ro̧parenȩ pio cüdëmi̧ dari̧, mo̧a̧rea̧räpȩ dadëmȩrȩ —yo̧mȩrȩ nibärëremȩdejȩ.

⁵⁹ Ado Jechu judi pio ju̧i̧ ni̧bäa̧ duri oa, peaja̧di yo̧a̧dejȩ ado cja̧rȩmo̧ oa: —Cho̧rë jana̧coe —yo̧a̧dejȩ. Ado pumȩ üdë dëbë yo̧a̧dejȩ: —Aja̧, cho̧rë jätämi̧ cjiarequedemȩ jabo jabërequede jabo. Cüdë mȩa cho̧rë jäbea yaboi̧, chja ja̧di järea̧ yürücoe coa nö̧rimȩ pio ju̧i̧ na̧ra̧pea̧ oa. Jabo jabëde jabo. Jabë ja̧bodëa̧de. Jabo judi ja̧boa̧rä, na̧ra̧tämi̧ cjiareconȩ. Ado pio ju̧i̧ na̧ra̧ duri oa, dëdë, cho̧rë jätämi̧ cjiarequedemȩ —yo̧mȩrȩ yo̧a̧dejȩ, chjarapë jo̧rȩtamȩrȩ.

⁶⁰ Jabo Jechu judi dëbë yo̧a̧dejȩ: —Chja ja̧di ja̧boa̧mi̧ dari̧ cjiaji̧ri̧ pio judiro̧, cjo̧ro̧rea̧ chiadëji̧ri̧ pio judiro̧ na̧ra̧eji̧ri̧diro̧jo̧ȩ. Jabo mȩnȩ, jabechji̧ Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ oa a̧ra̧ano̧e jävä —yo̧a̧dejȩ Jechu judi.

⁶¹ Ado ja̧dëa ji̧ ado cja̧rȩmo̧ üdë peaja̧di yo̧a̧dejȩ Jechu ju̧i̧: —Aja̧ Ano̧mȩ, peaja̧di pio mȩa cho̧rë jätämi̧ cjiarequede jabo jabërequede. Jabechji̧ cüdë jäbea yaboi̧, goëde jätämi̧ cjiarequedejȩrȩ ca̧ pumȩ ji̧ri̧ pio ji̧ri̧ chjadëri̧ jeapea̧ oa.

⁶² Jabo Jechu judi dëbë yo̧a̧dejȩ: —Danȩ, chjara chia jo̧rȩtamȩ pio judi, Ütë tjamo̧ ja̧ oa ja̧beparea̧mi̧dëde. Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ oa a̧ra̧ano̧rea̧mi̧dëde. Danȩ, na̧rȩrea̧ ma̧ȩmi̧ da oa ni̧bä chjaotämi̧ cjiarequedemȩ —yo̧a̧dejȩ—. Danȩ, tjado oa cabëpamȩ pio judi, bacara̧ jibëa̧ tjado oa cabëpamȩ pio judi, jabechji̧ ji̧dë ma duriräpȩmo̧ mire dae chjaodëtäremȩde jabo yaboräpȩmo̧ ma ütarë damȩrȩ ja̧bepatäremȩde. Ado peaja̧dimi̧ dari̧ ja̧bepatäremȩde Ütë tjamo̧ ja̧ oa ja̧bepamȩ pio judi. Jabechji̧ jënȩ a̧dë ma̧na̧ pio ji̧ri̧ chjiari ji̧dë ma bücjüri̧ cjiari̧ jo̧rȩtadëtäremȩde jabo jabechji̧, yaboräpȩmo̧ ütarë dami̧ dari̧ ja̧bepatäremȩde. —Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩ Jechu judi.