Lucas 8 - Biblia Pume

Jechu ju̧i̧ a̧dorëreji̧ri̧ ivi jini̧ro̧ ja̧di quȩji̧ri̧ni̧rȩ

¹ Ado japamitë boi̧chji̧ chjätä ëte, Jechu judi oëra̧ti̧ oa chjätäti̧ cjiamȩrȩ bë ma̧ri̧ chjö̧na̧i̧ oa goëde järëremȩdejȩrȩ, bë ma̧ri̧ bori̧bo. Jabechji̧ a̧ra̧ano̧riä tai̧rëremȩde ma̧ȩ chjadëi̧ oa, Ütërë yo̧a̧ chja̧oerä cjo̧ro̧pea̧ ma̧ȩ pio ju̧i̧ chjiari. Ado jibëa̧ jadü judiro̧, 12rë peaja̧di ëba järëreji̧ri̧dirȩ pio ju̧i̧ nö̧ta.

² Ado ivi pio jini̧ro̧borë ëba järëreji̧ri̧ni̧ro̧jo̧ȩ. Chjapea̧ oa cjiareji̧ri̧ pio jini̧ro̧, yaröca chiareji̧ri̧ pio jini̧ro̧, gito oa tarareji̧ri̧ pio jini̧ro̧ peaja̧di ëba tai̧rëreji̧ri̧ni̧ro̧jo̧ȩ. Ado cja̧rȩmȩrȩ, Maria Madarena pio jini̧nȩ. Ado ca̧i̧ta̧ra̧ ichimo̧ yo̧a̧ri̧ yaröca chiareyi̧ i̧a chjaparȩrëremȩdejȩ Jechu judi.

³ Ado cja̧rȩmo̧ iei̧ jini̧, Juana quȩyi̧ pio jini̧nȩ. Cucha quȩmȩ pio ju̧i̧ ja̧ iei̧nȩ. Ado Cucha pio judi Erode ja̧ bë oa jidamȩrȩ cjo̧ro̧rëremȩde. Ado cja̧rȩmo̧ iei̧ jini̧ Chuchana quȩyi̧rëreyi̧nȩ. Aja̧, ado pio jiro ivi jini̧ro̧mo̧rȩdë jabo ji̧ra̧ tjamo̧rëreyi̧ni̧rȩ Jechu pio ju̧i̧ nö̧ta ëba tai̧rëreji̧ri̧ jini̧ro̧. Ado jini̧ro̧, jabechji̧ jibëa̧ra̧ pio ju̧ri̧ra̧ a̧dorëreji̧ri̧ni̧ro̧jo̧ȩ Jechu pio ju̧i̧, jibëa̧ jadü pio ji̧ri̧bo. Aja̧, a̧doa̧ni̧ro̧jȩrȩ judiro̧ jurapea̧ oa, judiro̧ chjadëri̧ cjo̧ro̧rea̧ dapea̧ oa.

Cho quiba chedemȩ pio ju̧i̧ chjiari a̧ra̧ano̧rëremȩde Jechu judi

⁴ Ado cja̧rȩmo̧ doremȩrä, Jechu judi na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ pumȩ buba oa, ado cja̧rȩmo̧ bëri, ado cja̧rȩmo̧ bëri go̧düdäräji̧ri̧ oa.

⁵ Ja̧di ta̧rëri̧ yo̧mȩrȩ ni̧bä chjaoa̧dejȩrȩ: —Danȩrȩ, pumȩ judi jibëa̧ tjadoräpȩ järëremȩde cho oa quiba chedepea̧ oa —yo̧a̧dejȩrȩ—. Ado cho oa quiba chedemȩrȩ aeno̧a̧dejȩ daburäpȩmo̧. Ado cho üdë orëmo̧rȩ cjatäa̧de pumȩrȩ järea̧ no̧ro, dabu chjua tjamo̧räpȩ ju̧ri̧. Ado chjaodëri̧ boë cjaeäa̧ oa cjiarëremȩde. Ado pua üdë chjaodëri̧ baë jurera̧pea̧dejȩ peaja̧di.

⁶ Ado cho üdë orë cjatäa̧de ta̧dë chiamȩ daburäpȩ, dabu ji̧ra̧ri̧ chiadëräpȩ. Ado chjaodëri̧ buiutea̧de cho üdë. Jabo cjäri̧ made, gägäari̧ cjitërea̧ dadëa̧ oaiä, jabechji̧ chjaodëri̧ gapea̧de.

⁷ Ado cho üdë orë cjatäa̧de o̧ chiamȩ cärä cjitëpai̧ daräpȩ. Ado cho üdë buiutea̧de jabo chiatärea̧ ji̧, chiadëa̧de o̧ cärä üdë ma̧i̧ dari̧ cjitëa̧ oaiä, ma̧i̧ dari̧ boa̧ oaiä.

⁸ Jabo orë cjatäa̧de dabu chjadëräpȩ. Ado buiu ëte, gägäari̧ cjitëmȩpea̧de. Ado cho chiamȩpea̧de. Aja̧, 100 cho chiamȩpea̧de cja̧rȩmȩ chorëremȩrȩ. Aja̧, ja̧di dari̧ chiamȩpea̧de dabu chjadëräpȩ cjitëa̧ oaiä —yo̧a̧dejȩrȩ. Ado Jechu judi pio jiro ma̧ȩ oa ni̧bä chjao ëte, to̧bari̧ yo̧rëremȩdejȩrȩ, ja̧di ta̧rëri̧ yo̧mȩrȩ: —Danȩrȩ, mȩnȩro̧ ta̧ra̧ puë chiami̧ dari̧ cjo̧ro̧rä judi, jabechji̧ chjadëri̧ acji cjaeä ta̧rëchji̧vä —yo̧rëremȩdejȩrȩ.

Jechu judi ni̧bä chjaorëremȩdejȩrȩ jënȩ pumȩ ji̧ri̧ na̧rȩrea̧ ma̧ȩmi̧ dara̧ a̧ra̧ano̧a̧ pio ju̧i̧ chjiari

⁹ Ja̧dëa ji̧ Jechu ja̧ jadü pio judiro̧ dabadëji̧ri̧rȩ iëno̧ë ta̧rërëreji̧ri̧diro̧jo̧ȩ pio jiro na̧rȩrea̧ ma̧ȩmi̧ da pio ju̧i̧ chjiari, tjadoro cho oa quiba chedemȩ pio ju̧i̧ chjiari. 'Aja̧, ¿tjana̧ yo̧rea̧ chiadida' quëna dabatämi̧ cjiaji̧ri̧rȩ iëno̧ë ta̧rëa̧diro̧jo̧ȩ.

¹⁰ Ado ja̧dëa ji̧ Jechu judi dëbë yo̧a̧dejȩrȩ: —Danȩrȩ ca̧ pumȩ, pio yoa ma̧ȩ oa pio dibëiäpȩmo̧ ma dabarea̧ yürüa̧didibe Ütë tjamo̧ judi —yo̧a̧dejȩrȩ—. Tjamo̧ davä. Jënȩ yo̧a̧ chja̧oerä cjo̧ro̧pea̧ pio ju̧i̧ chjiari goadia̧ oa cjiarëremȩ ma̧ȩ pio ju̧i̧ chjadëri̧ dabarea̧ yürüa̧didibe, jabo o ji̧ri̧iäpȩmo̧ dabarea̧ yürüdëa̧dejȩrȩ. Ado pio ju̧i̧iä na̧rȩrea̧ ma̧ȩmi̧ da maeara̧ ni̧bä chjaorequedejȩrȩ o ji̧ri̧. Ado cüdë ja̧di dari̧ ni̧bä chjaoa̧ oaiä, jabechji̧ Ütërë ea jana̧ chjadüa̧ oa ni̧bämȩ pio judi no̧mȩ tjamo̧ri ja̧ ni̧bärërea̧mi̧ cjiadiäpadirȩ. Ta̧rëchji̧vä ma̧ȩ oa: “Ado judiro̧ ji̧dë ma daräbo, jabechji̧ tjamo̧ri̧ dabaparea̧ dadëdirȩ. Ado judiro̧ ji̧dë ma ta̧rëräbo, peaja̧di acji cjaeä ta̧rërea̧ dadëdirȩ." Aja̧, ja̧di ta̧rëri̧ go̧ȩpea̧ oa cjiarëremȩde —yo̧a̧dejȩrȩ Jechu judi. Ado Jechu judi pumȩ pio ji̧ri̧iäpȩmo̧ na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaoa̧ oaiä, jabechji̧ tjamo̧i̧padäräa̧ oa cjiadiäa̧de no̧mȩ tjamo̧ri ja̧ go̧ȩpea̧ oa cjiarërea̧ ma̧ȩ üdë.

Jechu judi are iami̧ dari̧ daba tänȩrëremȩdejȩrȩ cho quiba chedemȩ pio ju̧i̧ chjiari

¹¹ Ado Jechu judi ji̧dë u̧i̧ yo̧mȩrȩ ja̧di ta̧rëri̧ yo̧rëremȩdejȩrȩ jibëa̧ jadü pio ji̧ri̧iäpȩmo̧: —Danȩrȩ, mȩnȩro̧ dabadëchea are iëmi̧dari̧ ni̧bä chjaoparequededibe na̧rȩrea̧ ma̧ȩmi̧ da pio ju̧i̧ chjiari, cho quiba chedemȩ pio ju̧i̧ chjiari —yo̧a̧dejȩrȩ—. Danȩrȩ, cho üdë Ütë tjamo̧ ja̧ ma̧ȩmi̧ dade.

¹² Ado pumȩ judiro̧ orë pumȩrȩ järea̧ no̧mi̧ dadirȩ. Jabechji̧ järea̧ no̧ro dabu chjua üdë jibëa̧ chji̧mi̧ dade. Ado pio jiro pumȩ judiro̧ Ütë tjamo̧ ja̧ ma̧ȩ oa ta̧rërä, jabechji̧ jibëa̧ chji̧rä chjadëri̧ chatärea̧ ji̧, cjäri̧ madejȩrȩ, Ichiae pio judi acji go̧düdärä ëte, chjaodëri̧ a̧dë jo̧rȩta tänȩdejȩrȩ Ütë tjamo̧ ja̧ ma̧ȩ pio ju̧i̧. Ado pio ju̧i̧iä judiro̧ quëna̧tärea̧ ji̧, judiro̧ chjätärea̧ datärea̧ ji̧, cjäri̧ madirȩ, chjätärea̧ dadëpadirȩ judiro̧ quëna̧dëa̧ tara.

¹³ Ado pumȩ judiro̧ orë ta̧dë chiamȩ dabumi̧ dadirȩ. Jabechji̧ ta̧dë chiamȩ dabu üdë, jibëa̧ chji̧mi̧ dade. Ado pio jiro pumȩ judiro̧, ta̧dë chiamȩ dabumi̧ da chji̧ chiaji̧ri̧ pio judiro̧, jabechji̧ Ütë tjamo̧ ja̧ ma̧ȩ oa ta̧rërä, dëdë, ma̧ chiadëri̧ cjiaji̧ri̧rȩ ta̧rëdiro̧jo̧ȩ chjaodëri̧. Jabo cjäri̧ madejȩrȩ, Ütë tjamo̧ ja̧ ma̧ȩ üdë jibëa̧ chji̧rä tacö̧ urëdi oa chiami̧ dari̧ cjiatärea̧ ji̧, jabomo̧ uëmo̧i̧ tacö̧mi̧ dari̧ jo̧rȩtadirȩ. Ja̧dëa ji̧ judiro̧ eami̧ chjai̧dë oa chjätärä, chjaodëri̧ putu jura̧ a̧dë chaji̧ri̧mi̧ dari̧ japadiro̧jo̧ȩ Ütë tjamo̧ ja̧ ma̧ȩ pio ju̧i̧.

¹⁴ Ado pumȩ judiro̧ orë o̧ cärä chiamȩ dabumi̧ dadirȩ. Jabechji̧ cärä chiamȩ dabu üdë jibëa̧ chji̧mi̧ dade. Ado pio jiro pumȩ judiro̧ Ütë tjamo̧ ja̧ ma̧ȩ oa ta̧rërä, cjäri̧ madirȩ, ba chia pio ju̧i̧mo̧i̧ jo̧rȩtatärea̧ ji̧, badëra̧ pio ju̧ri̧ra̧ boë cjaeämi̧ dari̧ jo̧rȩtadiro̧jo̧ȩ. Jabechji̧ judiro̧ pio yoa chirirä cjo̧ro̧pea̧ pio ju̧i̧ chjiari ana̧ri̧ jo̧rȩta̧ oaiä, jënȩro̧ bücjüri̧ cjia tjamo̧ji̧ri̧rȩ cjo̧ro̧a̧ oaiä, jënȩro̧ chëre ji̧ra̧ tjamo̧ oa boapea̧ pio ju̧i̧ ana̧ri̧ jo̧rȩte chjaoa̧ oaiä, jabechji̧ tuti chami̧ dari̧ japadejȩrȩ jibëa̧ chji̧ oa. Ado pio ju̧i̧iä chjaodëri̧ a̧dë jo̧rȩtadiro̧jo̧ȩ Ütë tjamo̧ ja̧ ma̧ȩ pio ju̧i̧. Jabechji̧ pio jiro ma̧ȩ üdë jibëa̧ chji̧rä chjadëri̧ chatärea̧ ji̧, cjäri̧ madejȩrȩ, tuti chami̧ dari̧ chade cho ji̧ra̧ tjamo̧ oa chiatärea̧ ji̧, üi̧padärämi̧ dari̧ cjo̧ro̧tärea̧ ji̧.

¹⁵ Ado pumȩ judiro̧ orë dabu chjadëmi̧ dadirȩ. Jabechji̧ dabu chjadë üdë jibëa̧ chji̧mi̧ dade. Ado pio jiro pumȩ judiro̧ Ütë tjamo̧ ja̧ ma̧ȩ oa ta̧rërä, bapë ta̧rëdiro̧jo̧ȩ. Quëna̧diro̧jo̧ȩ. Oëra̧ quëna̧dëri̧ cjiamȩ chji̧ra̧ quëna̧diro̧jo̧ȩ, ma̧ȩ pio ju̧i̧ chjuari̧ acji mitëmi̧ dari̧. Ado ütëchjai̧pe jämi̧ dari̧ cjo̧ro̧dirȩ. Cho ji̧ra̧ tjamo̧pe järea̧mi̧ dari̧ na̧rȩriä cjo̧ro̧dirȩ ma̧ chjua jo̧rȩtaji̧ri̧rȩ —yo̧mȩrȩ ni̧bä chjaoa̧dejȩrȩ.

Jechu judi na̧rȩrea̧ ma̧ȩmi̧ dara̧ ni̧bärëremȩde tataparea̧ pio ju̧i̧ chjiari, ju̧i̧ ja̧ ma̧ȩ pio ju̧i̧ chjiari

¹⁶ Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ na̧rȩrea̧ ma̧ȩmi̧ dara̧: —Danȩrȩ, eami̧ pumȩ judi tataparea̧ pio ju̧i̧ cjitëparȩrä, jabechji̧ canari boi̧dë yara̧ a̧de inë chji̧dädëdejȩ. Mo̧a̧rea̧ ëteräpȩ goadidëdejȩ. Cjäri̧ madejȩ, ja̧di dari̧ japadë madejȩ jabo mechjarä chjadëri̧ gatë cji̧dädejȩ chjadë maearä. Tjamo̧ davä. Bëräpȩ yu̧a̧ji̧ri̧ pumȩ pio judiro̧ ütëborë chjadëri̧ da mirerea̧mi̧ dari̧ gatë cji̧dädejȩ chjadë maearä.

¹⁷ Ado peaja̧dimi̧ dari̧ chjadë maearä cjiami̧ dari̧ cjiapade Ütë tjamo̧ ja̧ ma̧ȩ üdë. Jabechji̧ pio jiro ma̧ȩ üdë orë goadia̧ oa cjiami̧ dari̧ cjiarërea̧ ji̧, orë ütëborë chjadëri̧ dabarea̧mi̧dëri̧ cjiarërea̧ ji̧, jabechji̧ chjadë maearä cjiami̧ dari̧ cjiapade, mechjari pio judiri chjadëri̧ tatarea̧mi̧ dari̧.

¹⁸ Ado pio ju̧i̧iä na̧e chiatäreji̧ri̧nȩrȩ ca̧ ma̧ȩ oa chjadëri̧ dabapea̧ oa, chjadëri̧ ta̧rëdiäpea̧ oa. Jabechji̧ ta̧rëdiämȩ pio judi, jënȩ dabapea̧ pio ju̧i̧ ta̧rëdiämȩ pio judi, jabechji̧ ji̧dë u̧i̧ a̧de goamȩmi̧ dari̧ dabape jäpade, ji̧ra̧ tjamo̧ oa a̧de dabapadärärea̧mi̧ dari̧. Jabo pumȩ judi, jënȩ dabapea̧ pio ju̧i̧ ta̧rëdiädëmȩ pio judi, jabechji̧ ji̧dë u̧i̧ a̧de goamȩmi̧ dari̧ dabapatärea̧ ji̧, ja̧di dari̧ cjiadiärea̧ dadëpade, jabo jënȩ dabapatarërea̧ pio judi goarijäa̧ oa cjiapade ji̧dëri̧, jënȩ ji̧dë u̧i̧ dabape jätärea̧ ji̧. Pio ju̧i̧iä yo̧requededibe mȩnȩro̧ chjadëri̧ dabapatä, mȩnȩro̧ chjadëri̧ ta̧rëdiätä —yo̧mȩrȩ ni̧bä chjaorëremȩdejȩrȩ Jechu judi.

Jechu judi ni̧bärëremȩde pio ju̧i̧ ja̧ pumȩ tjamo̧ pio ji̧ri̧ chjiari

¹⁹ Ado Jechu judi ja̧di ta̧rëri̧ ni̧bä chjaoa̧ duri oa, jibëa̧ pumȩ pio judiro̧, pio jȩadi ja̧ji̧ri̧ pio judiro̧ goëdaera̧pea̧diro̧jo̧ȩ, arayi̧ pio jini̧borë. Jabo cjäri̧ madiro̧jo̧ȩ, pumȩ buba oaiä, Jechu pio ju̧i̧iäpȩ go̧düdärärea̧ dadëa̧dirȩ.

²⁰ Ado pio ju̧i̧iä o judiro̧ yo̧a̧diro̧jo̧ȩ: —Danȩ, na̧ pumȩ judiro̧, mȩadi ja̧ji̧ri̧ pio judiro̧ jana̧dirȩ. Dairäpȩ cjiadirȩ, ado datämi̧ cjiadiro̧mȩ —yo̧a̧diro̧jo̧ȩ.

²¹ Jabo Jechu judi dëbë yo̧a̧dejȩrȩ: —¿Chjia tjamo̧dirȩ ca̧ pumȩ judiro̧? Chjia tjamo̧dëdirȩ, jabechji̧ Ütë tjamo̧ ja̧ ma̧ȩ oa ta̧rë ëte ta̧rëdiäji̧ri̧ pio judiro̧dirȩ. Tjamo̧ davä. Coadi ja̧ji̧ri̧ tjamo̧ judiro̧, coadi ja̧ji̧ri̧ tjamo̧ jini̧ro̧, jabechji̧ Ütë tjamo̧ ja̧ ma̧ȩ oa ta̧rë ëte ta̧rëdiäji̧ri̧ pio judiro̧dirȩ. Pio judiro̧ tjamo̧dirȩ ca̧ pumȩ judiro̧ —yo̧mȩrȩ yo̧rëremȩdejȩrȩ Jechu judi jibëa̧ pumȩ tjamo̧ pio ji̧ri̧ chjiari.

Ma̧i̧ dari̧ pupuripea̧ ji̧ goepa ma cjia tänȩrëremȩde Jechu judi

²² Ado cja̧rȩmo̧ doremȩrä, Jechu judi yo̧rëremȩdejȩrȩ jibëa̧ jadü pio ji̧ri̧: —Danȩrȩ, tja oëräpȩmo̧ chjätätärȩ —yo̧a̧dejȩrȩ.

²³ Ado pio ju̧i̧iä bua̧diro̧jo̧ȩ chara oa. Ado judiro̧ tja oëräpȩ chjätäa̧ nö̧ta, Jechu judi mo̧a̧mȩpea̧de. Ado jachipadäräji̧ri̧ oa chjaodëri̧ pupuripamȩpea̧dejȩrȩ goae tarari̧. Ado gö̧ma̧ üdë ma̧i̧ dari̧ acji ma̧na̧ oaiä, chara tjoräpȩmo̧ ui mapea̧de chjaodëri̧, ui üdë aechja̧de aechja̧de cjia̧ oaiä. Ado pio ju̧i̧iä uapai̧ da tjamo̧ri̧ cjiadiäa̧ maeadirȩ.

²⁴ Ado jadü pio judiro̧ Jechu pio ju̧i̧ na̧rȩno̧ji̧ri̧rȩ yo̧a̧diro̧jo̧ȩ: —Ano̧mȩ, Ano̧mȩ, chami̧parea̧rȩ a̧ro̧rȩ ütëborë jemu̧i̧ ja̧borea̧mi̧ dari̧ —yo̧a̧diro̧jo̧ȩ Ado ja̧dëa ji̧ Jechu judi bëdüa̧rä, ya̧mȩmi̧ ta̧rëri̧ ni̧bäa̧dejȩ ma̧i̧ dari̧ pupuripamȩ ju̧i̧. Ado chjaodëri̧ chjadëpea̧de. Aja̧, chjaodëri̧ goepa ma cjiapea̧de.

²⁵ Ado ja̧dëa ji̧ iëno̧ë ta̧rëa̧dejȩrȩ Jechu judi: —Danȩrȩ, ¿tjana̧ ju̧i̧iä quëna̧dëa̧renȩro̧coe cüdë dibë chjadëri̧ a̧dopea̧ ji̧? Ado Jechu ja̧ jadü judiro̧ uapa tjamo̧ji̧ri̧pea̧dirȩ. Jabechji̧ Jechu judi tuti japea̧ pio ju̧i̧ irä daea̧ oaiä, ana̧ri̧ jo̧rȩtaji̧ri̧pea̧dirȩ, dacho bëremi̧ cjiami̧ dari̧. Ado jibëa̧ dëbëti̧ra̧ chia yo̧a̧dirȩ: —¿Jabo chjia tjamo̧de pio yodë üi̧ üdë? ¿Tjana̧ pumȩde? Jabechji̧ pumȩ chjami̧ dadëde. Jabechji̧ judi eami̧ oa yo̧ro, chia chia, pumȩ pio judiro̧mo̧rȩ ta̧rë japadëdiro̧jo̧ȩ, jabo pjaepamȩ pio judiborë ta̧rë ja̧bomi̧ dari̧ japadejȩ, gö̧ma̧borë —yo̧rëreji̧ri̧dirȩ, ana̧ tjamo̧ri̧ jo̧rȩtaji̧ri̧rȩ.

Jechu judi chjaparȩrëremȩdejȩ yaröca chiamȩ ju̧i̧

²⁶ Ado Jechu judi jibëa̧ jadü pio ji̧ri̧ nö̧ta charara̧ tai̧ji̧ri̧rȩ go̧düdärärëreji̧ri̧dirȩ Geracha quȩmȩ chiriräpȩ, Garirea tja oëräpȩ a̧rȩmȩ chiriräpȩ.

²⁷ Ado Jechu judi charari pio judiri go̧düa̧mȩ oa, chjaodëri̧ dëbëdiäa̧dejȩ yaröca chiamȩ üi̧ pio judi, yaröca ji̧ra̧ tjamo̧ oa chiamȩ üi̧ pio judi. Ado pio jiro üi̧ judi, bë ma̧ri̧rimȩ pio judi, jabechji̧ no̧mȩ tjamo̧ri ja̧ chjätemȩrȩ cjo̧ro̧rëremȩde dairäpȩ, bë decjiaräpȩ, bë ma̧ri̧ dairäpȩ. Jabechji̧ ta̧dë cjararäpȩ ju̧ri̧ cjo̧ro̧rëremȩde, ja̧boa̧ji̧ri̧ pio ji̧ri̧ idë a̧ra̧rea̧räpȩ ju̧ri̧.

^28-29 Ado babui̧ra̧ yaröca judiro̧ ma̧i̧ dari̧ boadärämi̧ dari̧ japarëreji̧ri̧diro̧jo̧ȩ pumȩ ju̧i̧. Ado pio ju̧i̧iä judi pumȩ pio ji̧ri̧iäpȩmo̧ eami̧ oa conȩdachea oa jidatarëreji̧ri̧diro̧jo̧ȩ o judiro̧. Pio ju̧i̧iä co ji̧ra̧ri̧ chatu chiamȩ chjiparari ca̧i̧ra̧ yuratarëreji̧ri̧diro̧jo̧ȩ jibëa̧ ichi oa. Ado jibëa̧ ta oa peaja̧di cji̧dätarëreji̧ri̧diro̧jo̧ȩ chjiparari pjatëra̧, itura̧. Jabo cjäri̧ madejȩrȩ, judiro̧ ja̧di dari̧ japea̧räbo, chjaodëri̧ tutupechia̧dejȩ chatu chiamȩ chjiparari ca̧i̧ pio ju̧i̧. Chjaodëri̧ yarecheno̧a̧dejȩ chjiparari pjatë oa, pënȩi̧ mape bagari̧. Ado ja̧dëa ji̧ bagureno̧rëremȩde chiri tjoräpȩmo̧, yaröca ja̧ chja̧oerämo̧ cjiamȩrȩ, boadäräa̧ oa cjiamȩrȩ. Jabo ja̧dëa ji̧ Jechu judi charari pio judiri go̧düa̧rä, chjaodëri̧ a ama cjiari̧ ëna̧diämȩpea̧de üi̧ üdë. Ado Jechu pio ju̧i̧ ja̧ dëbëräpȩ cjatäeno̧rëremȩde. Ado Jechu judi yo̧a̧dejȩ: —Danȩ, pumȩ ja̧ icjarari pio judiri go̧deno̧vä. Jabo yaröca üdë ma̧i̧ dari̧ ëna̧diäpea̧ ji̧ taruparëremȩde pumȩ ja̧ yara̧ pio ju̧ri̧ra̧. Ado goae tarari̧ ëna̧ quirati̧ cjiamȩrȩ ja̧di ta̧rëri̧ ira̧diä ni̧bärëremȩdejȩ Jechu ju̧i̧: —Jechu, ¿tjana̧ ju̧i̧iä tja̧reparȩra̧pea̧renȩque. 'Jabechji̧ a̧dë chjäte Ütë tjamo̧ ja̧ Jojadida' quëna̧ dabarequedemȩ. Jabo cjäri̧ri̧ cjia dacoe. Jabechji̧ mai̧ dari̧ conȩdadëcoe —yo̧rëremȩdejȩ, goae tarari̧ ëna̧diämȩrȩ.

³⁰ Ja̧dëa ji̧ Jechu judi iëno̧ë ta̧rëa̧dejȩ yaröca ju̧i̧: —¿Yö̧ta quȩmȩrenȩ? Ado yaröca üdë: —Yö̧ta quȩmȩdë, Buba quȩmȩrequede —yo̧mȩrȩ dëbë yo̧a̧dejȩ. Jabechji̧ yaröca noi̧dërë pumȩ ju̧i̧ ira̧diä cjaeäera̧rërea̧ oaiä, ja̧di ta̧rëri̧ dëbë yo̧a̧dejȩ Jechu ju̧i̧.

³¹ Ado yaröca pio judiro̧ ji̧dë ma yo̧tarëreji̧ri̧diro̧jo̧ȩ Jechu ju̧i̧ pio jibë a̧dë chjäte puë urëdiräpȩmo̧ chjadüdëtä, Ütë tjamo̧ ju̧i̧ jiadaji̧ri̧ pio ji̧ri̧ conȩdapea̧ puëräpȩmo̧.

³² Ado pio ju̧ri̧pȩ jachidëräpȩ aboea no̧i̧dërë gua gua arë jurarëreji̧ri̧dirȩ ya̧mi̧rä. Ado aboea pio ji̧ri̧iäpȩmo̧ ano̧ mire ira̧diä cjaeärea̧ yürütä ea tjamo̧ji̧ri̧rȩ cjo̧dë chjaorëreji̧ri̧diro̧jo̧ȩ Jechu pio ju̧i̧iä. Ado pio ju̧i̧iä aboea ji̧ri̧ ja̧ icjararä ano̧ mire ira̧diä cjaeärea̧ yürüa̧dejȩrȩ.

³³ Ado pio ju̧i̧ ta̧rëa̧ oaiä, pumȩ ja̧ icjarari pio judiri chjaodëri̧ a̧dë go̧deno̧a̧dirȩ aboea ja̧ icjararäpȩ ano̧ mire ira̧diä cjaeäpea̧ oa. Pio ju̧i̧iä aboea chjö̧na̧i̧rȩ cjarari̧ cjiaji̧ri̧pea̧dirȩ. Ado judiro̧ noi̧dë tjamo̧rȩ goae tarari̧ baguraji̧ri̧pea̧dirȩ ya̧mi̧ uëri pio judiri biraji̧ri̧rȩ. Ado ya̧mi̧ curë uë tjamo̧ri judiri choa choa ja̧bo marëreji̧ri̧dirȩ tjaräpȩ ju̧ri̧.

³⁴ Ado pio ju̧i̧ daea̧ oaiä, aboea jidareji̧ri̧ pio judiro̧ chjaodëri̧ bagureno̧a̧dirȩ bë ma̧ri̧rä cjo̧ro̧ji̧ri̧ pio ji̧ri̧iäpȩmo̧ ma̧ȩ yürüpea̧ oa, pio jiro chiriräpȩ cjo̧ro̧ji̧ri̧ pio ji̧ri̧bo daba tänȩpea̧ oa.

³⁵ Ado pio ji̧ri̧iä ta̧rëa̧ oaiä, goëdepea̧dirȩ chjadëri̧ dabapea̧ oa, irä dapea̧ oa. Ado judiro̧ go̧düdäräa̧rä, dadäräa̧diro̧jo̧ȩ Jechu pio ju̧i̧, ado yaröca ji̧ra̧ tjamo̧ oa chiaremȩ pio ju̧i̧bo dadäräa̧diro̧jo̧ȩ Jechu ja̧ yuroro chamȩ oa, chjadëri̧ jo̧rȩtapea̧mȩ oa, chjibo ina̧mȩpea̧mȩ oa. Ado uapaji̧ri̧pea̧dirȩ.

³⁶ Ado irä dareji̧ri̧ pio judiro̧, jabechji̧ ni̧bä chjaoa̧diro̧jȩrȩ pea godüdäräji̧ri̧ pumȩ ji̧ri̧ Jechu judi yaröca chiaremȩ pio ju̧i̧ chjaparȩa̧ pio ju̧i̧ chjiari.

³⁷ Ja̧dëa ji̧ Geracha quȩmȩ chirirä cjo̧ro̧ji̧ri̧ pio judiro̧, pio jiro chirirä oëra̧ti̧ oa cjo̧ro̧ji̧ri̧ pio judiro̧ yo̧tarëreji̧ri̧diro̧jo̧ȩ Jechu ju̧i̧ judi jibëa̧ chiriri pio judiri a̧dë baätä. Jabechji̧ ma̧i̧ da uaparea̧ üdë jibëa̧ chji̧ oa boadäräa̧ oaiä, jabechji̧ jibëa̧ chiriri pio judiri a̧dë baätä yo̧a̧diro̧jo̧ȩ. Ado pio ju̧i̧iä Jechu judi bua̧de chararä ado chjereno̧ cuchupë baäpea̧ oa.

³⁸ Ado yaröca chiaremȩ pumȩ pio judi yo̧tarëremȩde Jechu pio ju̧i̧ pio jȩa nö̧ta ëba cjiapea̧ oa jabo Jechu judi baä tänȩa̧dejȩ, ja̧di ta̧rëri̧ yo̧mȩrȩ:

³⁹ —Danȩ, ado chjereno̧ baävä na̧ bëräpȩ, na̧ pumȩiäpȩ —yo̧a̧dejȩ—. Ado mȩnȩ go̧düdäräa̧rä, jabechji̧ ni̧bä chjaojȩrȩ. Ütë tjamo̧ judi pio mȩa chjiari ana̧ri̧ tuti japea̧ pio ju̧i̧ chjiari ni̧bä chjaojȩrȩ —yo̧a̧dejȩ. Ado pio ju̧i̧ ta̧rëa̧ oaiä, yaröca chiaremȩ pio judi baäa̧de. Ado bë ma̧ri̧rä cjo̧ro̧ji̧ri̧ pio judiro̧ ütëborë chjadëri̧ ta̧rërea̧mi̧ ta̧rëri̧ ni̧bä chjaorëremȩdejȩrȩ Jechu judi pio jȩa chjiari tuti japea̧ pio ju̧i̧ chjiari.

Jechu judi bëdü tänȩrëremȩdejȩ ja̧boa̧yi̧ boi̧ pio ji̧, ado nö̧ri nö̧ripë tara cjiayi̧ pio ji̧ chjaparȩrëremȩdejȩ

⁴⁰ Ado Jechu judi ado chereno̧ cuchupë järëremȩde Garirea tja oëräpȩ, jënȩ järea̧ durimo̧i̧. Ado go̧düdäräa̧mȩ oa pumȩ bubarë chjadëri̧ jea̧diro̧jo̧ȩ. Jabechji̧ jidatarëreji̧ri̧diro̧jo̧ȩ.

⁴¹ Ado ja̧dëa ji̧ tjamo̧ yo̧mȩ judi, judiorë a̧doparea̧ bëräpȩ tjamo̧ yo̧mȩ pio judi, Jairo quȩmȩ pio judi peaja̧di pio ju̧ri̧pȩ go̧düdärärëremȩde. Ado judi Jechu pio ju̧i̧ daea̧ ji̧, jabechji̧ pio ju̧i̧ ja̧ dëbëräpȩ ju chatura̧ cjiadäräa̧mȩrȩ yabëtarëremȩdejȩ: —Danȩ, ca̧ jabi jini̧ ja̧bopea̧ ji̧ querediä tjamo̧nȩ —yo̧a̧dejȩ—. Jabechji̧ pio coadi ëba jäcoe ca̧ bëräpȩ pio ji̧ chjadëri̧ chjaparȩpea̧ oa —yo̧a̧dejȩ.

⁴² Jabechji̧ jibëa̧ jabi pio ji̧mo̧i̧ ëbarëremȩde, 12 ui goayi̧ i̧a, ja̧bopea̧ querediäyi̧ i̧a. Ado Jechu judi pio ju̧i̧ ta̧rëa̧ oaiä, ëba jäa̧dejȩ. Ado pumȩ no̧i̧dë tjamo̧rȩ peaja̧di ëba jäa̧diro̧jo̧ȩ. Ado tjoromȩ oa gi̧de ariä järëreji̧ri̧diro̧jo̧ȩ Jechu ju̧i̧.

⁴³ Ado peaja̧di ëba järëreyi̧nȩjȩ iei̧ jini̧, gito ja̧boyi̧ pio jini̧. Nö̧ri nö̧ripë tara cjiayi̧rȩ cjo̧ro̧rëreyi̧nȩ 12 ui nö̧ta. Ado chjapea̧ oa cjiatämi̧ cjiayi̧rȩ jä chjaotarëreyi̧nȩ chjaparȩji̧ri̧ pio ji̧ri̧räpȩ, jabo cjäri̧ madiro̧jȩ, a̧dodëa̧diro̧jȩ. Jini̧ cjatäcjiarea̧ datärea̧ ji̧, ji̧dë u̧i̧ tarayi̧pea̧nȩ.

⁴⁴ Ado pio jiro iei̧ jini̧ Jechu pio ju̧i̧ chjiari goë ta̧rëa̧ oaiä, peaja̧di cho̧rë järëreyi̧nȩjȩ. Ado pio ju̧i̧ ja̧ duri oa jäyi̧rȩ goadi ga̧re tara̧nȩjȩ ju̧i̧ ja̧ chjibo yuroi̧ oa. Ado chjaodëri̧ chjapea̧nȩ. Goe gu̧rodë mapea̧de.

⁴⁵ Ado ja̧dëa ji̧ Jechu judi chjaodëri̧ yo̧a̧de: —¿Chjiarë ga̧re tara̧dique? Jabo ütëborë dëbë yo̧a̧diro̧jo̧ȩ: —Cjäri̧ marea̧rȩ, ga̧re taradëa̧rea̧ro̧mȩ —yo̧a̧. Ado ja̧dëa ji̧ Pedro judi yo̧a̧dejȩ: —Danȩ Ano̧mȩ, mȩa tjoro tänȩa̧ji̧ri̧ pio judiro̧ no̧i̧dë tjamo̧dirȩ. Jabechji̧ gi̧de ae chjaoriä jä maeadiro̧mȩ.

⁴⁶ Jabo Jechu judi cjiadiädëmȩrȩ yo̧a̧de: —Dane, cja̧rȩmȩ üdë pio coa tjamo̧ri̧ ga̧re taratämi̧ cjiamȩrȩ ga̧re tara̧dique. 'Jabechji̧ jauëchja üdë ca̧ icjarari judiri go̧düa̧dida' quëna̧ tararemȩrequede pio yabo.

⁴⁷ Ja̧dëa ji̧ iei̧ pio jini̧, 'Cjäri̧ maquëda, ju̧i̧ ja̧ dachoro goadirea̧mi̧dëquëda' quëna̧ jo̧rȩta̧ oaiä, jabechji̧ chjaodëri̧ i ma̧na̧ gura cjiayi̧pea̧nȩ. Ado Jechu ja̧ dëbëräpȩ ju chatura̧ cjiadäräa̧nȩ. I ma̧na̧gura cjiayi̧rȩ, uapayi̧rȩ ju chatura̧ cjiadäräa̧nȩ. Ado ja̧dëa ji̧ pumȩ ütëborë ta̧rërea̧mi̧ dari̧ ütëbo oa yo̧a̧nȩjȩ Jechu ju̧i̧. Jënȩ ana̧ri̧ tara̧ pio ju̧i̧ chjiari, jënȩ ju̧i̧ ja̧ chjibo oa ga̧re tara̧ pio ju̧i̧ chjiari, ado jënȩ chjaodëri̧ chjapea̧ pio ju̧i̧ chjiaribo yo̧rëreyi̧nȩjȩ goadirea̧ decjiari̧.

⁴⁸ Ado ja̧dëa ji̧ Jechu judi dëbë yo̧a̧dejȩ: —Danȩ ca̧ jabi, mȩnȩ quëna̧ pio oaiä jabechji̧ chjapea̧ oa cjiadiäa̧mȩ. Jabechji̧ ma̧ chjupi̧ cjiari̧ jo̧rȩtayi̧rȩ baäje —yo̧mȩrȩ yo̧rëremȩdejȩ Jechu judi.

⁴⁹ Ado Jechu judi pio jiro iei̧ pio ji̧di jabë ni̧bäa̧ nö̧ta, go̧düdärärëremȩde Jairo ja̧ bëri pio judiri jana̧mȩ mu̧i̧tjoi̧ pio judi, judiorë a̧doparea̧ bëräpȩ tjamo̧ yo̧mȩ pio ju̧i̧ ja̧ mu̧i̧tjoi̧ üdë. Ado yo̧a̧dejȩ Jairo ju̧i̧, Jechu pio ju̧i̧ nö̧ta baämȩ oa: —Danȩ, na̧ jabi jini̧ ja̧boa̧nȩ —yo̧a̧dejȩ—. Jiro decjiapea̧nȩ yaba̧. Pio ju̧i̧iä ji̧dë ma tja̧reparȩdëtäremȩrenȩjo̧ȩ A̧ra̧ano̧mȩ ju̧i̧ —yo̧a̧dejȩ.

⁵⁰ Jabo Jechu judi pio ju̧i̧ ta̧rëa̧ oaiä, yo̧a̧dejȩ Jairo ju̧i̧, tjamo̧ yo̧mȩ pio ju̧i̧: —Danȩ, bücjüri̧ cjiadëvä —yo̧a̧dejȩ—. Jabomo̧ quëna̧vä. Jabechji̧ chjapea̧ oa cjiadiäpanȩ —yo̧a̧dejȩ.

⁵¹ Ja̧dëa ji̧ judiro̧ Jairo ja̧ bëräpȩ go̧düdäräa̧rä, jabechji̧ ütëbo oa yu̧a̧rea̧ yürüdëa̧dejȩrȩ Jechu judi, jabo yo̧a̧ri̧mo̧i̧ oa yu̧a̧rea̧ yürüa̧dejȩrȩ. Jabechji̧ jojabi pio ji̧ nö̧riji̧ri̧ pio ji̧ri̧, ado jibëa̧ jadü tjarari̧ oa yu̧a̧rea̧ yürüa̧dejȩrȩ. Aja̧, Pedro pio ju̧i̧, Juan pio ju̧i̧, ado Santiago pio ju̧i̧bo yu̧a̧rea̧ yürüa̧dejȩrȩ. O judiro̧ dairäpȩ cjiadiäa̧dirȩ.

⁵² Jabo Jechu judi pumȩ ji̧ra̧ oa jo̧ tjoräpȩ yu̧a̧rea̧ yürüdëa̧räbo, jabechji̧ ji̧ra̧rëreji̧ri̧dirȩ jabërä yu̧a̧reji̧ri̧ pio judiro̧. Ado judiro̧ ütëborë gito ana̧ri̧ jo̧rȩtaji̧ri̧rȩ earëreji̧ri̧dirȩ boi̧chji̧rea̧ pio ji̧ chjiari. Jabo Jechu judi yo̧a̧dejȩrȩ: —Eadëchji̧vä. Jabechji̧ tjamo̧ri̧ ja̧boa̧ ma ja̧didë jabomo̧ mo̧a̧ cjianȩ —yo̧a̧dejȩrȩ.

⁵³ Jabo pumȩ judiro̧ pio ju̧i̧ ta̧rëa̧ oaiä airi̧ cjiapea̧diro̧jo̧ȩ. 'Cjäri̧ madida, oëra̧ yo̧dida, jabechji̧ ja̧boa̧mi̧ ja̧boa̧ni̧da' quëna̧ jo̧rȩtaji̧ri̧rȩ ai̧ri̧ cjiapea̧diro̧jo̧ȩ.

⁵⁴ Jabo Jechu judi ja̧boa̧yi̧ pio ji̧ ja̧ ichi oa mitëmȩrȩ to̧bari̧ yo̧a̧dejȩ jibëa̧ ni̧bärea̧ ma̧ȩra̧: —Cjitëje iei̧ boi̧ —yo̧a̧dejȩ.

⁵⁵ Ado jibëa̧ tjo üdë baärëremȩrȩ ado chjereno̧ ma̧neno̧a̧dejȩ jibëa̧ icjararä. Ado pio ju̧i̧iä chjaodëri̧ cjiteno̧a̧nȩ iei̧ boi̧chji̧ jini̧. Ado tai̧yi̧pea̧nȩ. Ado pio ji̧iäpȩmo̧ jurarea̧ oa yürütä yo̧a̧dejȩrȩ o ji̧ri̧ Jechu judi.

⁵⁶ Ado nö̧riji̧ri̧ pio judiro̧ pio ji̧ irä daea̧ oaiä, pumȩpea̧yi̧ i̧a daea̧ oaiä, ana̧ri̧ jo̧rȩtaji̧ri̧pea̧dirȩ dacho bëremi̧ cjiaji̧ri̧rȩ, ya yabë cjiaji̧ri̧rȩ. Jabo Jechu judi to̧bari̧ yo̧a̧dejȩrȩ o ji̧ri̧iäpȩmo̧ yo̧chea oa, judi pio ji̧ chjaparȩa̧ pio ju̧i̧ chjiari yo̧chea oa.