Lucas 7 - Biblia Pume

Jechu judi chjaparȩrëremȩdejȩ domano̧ ja̧ guadia ja̧ mu̧i̧tjoi̧ pio ju̧i̧

¹ Jechu judi pumȩ ji̧ri̧ ni̧bä chjaoa̧ duri oa ado chjereno̧ baärëremȩde Capanau̧ quȩmȩ bë ma̧ri̧räpȩ jibëa̧ jadü pio ji̧ri̧ nö̧ta.

² Ado pio jiro japamitërä pio ju̧ri̧pȩrëremȩde domano̧ guadia ütë üdë, judiodërë. Ado pio judi ëbarëremȩde jibëa̧ mu̧i̧tjoi̧ pio ju̧i̧, jënȩ tjamo̧ri̧ ba chia daea̧ pio ju̧i̧. Ado mu̧i̧tjoi̧ pio judi gito oa ana̧ri̧ tara̧ oaiä, jabechji̧ ja̧bopea̧ ji̧ querediä tjamo̧mȩpea̧de.

³ Ado pio ju̧i̧ä guadia ütë pio judi Jechu pio ju̧i̧ chjiari goë ta̧rëa̧ oaiä, jabechji̧ ma̧ȩ chjadürëremȩdejȩrȩ judio ütëti̧ pio ji̧ri̧, o ji̧ri̧. Jabechji̧ Jechu judi pio jȩaiäpȩ jana̧tä yo̧mȩrȩ yo̧ chjadüa̧dejȩrȩ. Aja̧, jënȩ ea̧ mu̧i̧tjoi̧ pio ju̧i̧ chjaparȩra̧tä eamȩrȩ yo̧ chjadüa̧dejȩrȩ chjadëri̧ ma̧ȩ yürütä.

⁴ Ado ja̧dëa ji̧ pio jiro judio ütëti̧ pio judiro̧ Jechurë cjiamȩräpȩ go̧düdäräa̧rä, yo̧tarëreji̧ri̧diro̧jo̧ȩ guadia ütë pio ju̧i̧ chjiari, pio ju̧i̧ ja̧ mu̧i̧tjoi̧ ju̧i̧ chjadëri̧ a̧dotä. Aja̧, ja̧di ta̧rëri̧ yo̧ji̧ri̧rȩ yo̧a̧diro̧jo̧ȩ Jechu pio ju̧i̧: —Jabechji̧ pio jiro guadia ütë pio judi chjadëri̧ japea̧ ba oa a̧dotäremȩremo̧nȩ —yo̧a̧diro̧jo̧ȩ—.

⁵ Jabechji̧ judiodëmȩborë judio pio ji̧ri̧ ea tjamo̧dejȩrȩ. Jabechji̧ pio judide a̧ro̧rȩ a̧doparea̧ bë oa cji̧de yürüa̧mȩ judi. Tjamo̧ davä. Judiorë a̧doparea̧ bë oa cji̧de yürürëremȩ pio judide. Ado pio ju̧i̧iä jabechji̧, chjadëri̧ a̧dotäremȩremo̧nȩ —yo̧ji̧ri̧rȩ yo̧a̧diro̧jo̧ȩ Jechu ju̧i̧ judio ütëti̧ pio judiro̧.

⁶ Ado Jechu judi pio ji̧ri̧iä ta̧rëa̧ oaiä, jabechji̧ pio ji̧ri̧ nö̧ta järëremȩde. Jabo judiro̧ guadia ütërë cjo̧ro̧mȩräpȩ jabë go̧düdärädëa̧rä, guadia ütë pio judi jȩnȩ ma̧ȩ chjadütea̧ pio ju̧i̧ chjiari chjaodëri̧ ano̧ mire jo̧rȩtamȩpea̧de. 'Jabechji̧ Jechu judi ca̧ bëräpȩ jana̧pea̧ chiadida quëna̧dëcuni̧da yaba̧' quëna̧ jo̧rȩtamȩpea̧de. Pio ju̧i̧iä jibëa̧ jadü ji̧ri̧, o ji̧ri̧ pio jȩaiäpȩ jana̧tä yo̧ chjadüa̧dejȩrȩ. Ado yo̧a̧dejȩrȩ: —Danȩrȩ jächji̧vä Jechu pio ju̧i̧ dëbëdiäpea̧ oa. Ado mȩnȩro̧ pio ju̧i̧ dëbëdiäa̧rä, jabechji̧ ja̧di ta̧rëri̧ yo̧chji̧jo̧ȩ: "Danȩ Ano̧mȩ, bücjüri̧ cjiadëvä ca̧ bë oa jana̧pea̧ ji̧" yo̧eji̧ri̧renȩro̧jo̧ȩ. "Jabechji̧ mȩnȩ ca̧ bëräpȩ yu̧a̧pea̧ ji̧ nö̧tadërequede.

⁷ Ado cüdë pio mȩa dëbëdiäpea̧ oa jätärea̧ ji̧, cjäri̧ marequede, ja̧di dari̧ japapea̧ ji̧ tjamo̧ri̧ nö̧tadë marequede. Tjamo̧ davä. Pio mȩaiäpȩ jäpea̧ ji̧ nö̧tadërequede. Jabomo̧ ma̧ȩ yürüvä mȩnȩ cjiamȩri pio judiri ca̧ mu̧i̧tjoi̧ pio judi chjaparȩa̧ oa cjiapea̧ oa.

⁸ Peaja̧di dari̧ japarequede cüdë. Danȩ, cüdë ma̧ȩ yürüa̧ oaiä, ta̧rëdiädiro̧coe ca̧ mu̧i̧tjoi̧ judiro̧, ado coa u̧i̧ ba chiaji̧ri̧ pio ji̧ri̧ ja̧ ma̧ȩrä japarequede pio cüdë. Danȩ, guadia ütërequede jabo o judiro̧ coa u̧i̧ ba chiadirȩ. Pio ji̧ri̧ ja̧ chja̧oerä cjo̧ro̧requede. Jabo ji̧ri̧ ja̧ chja̧oerä cjo̧ro̧mȩborë, peaja̧di ütërequede cüdë. Tjamo̧ yo̧mȩrequede. Ado pio ju̧i̧iä cüdë eami̧ oa yo̧a̧ oaiä, japa maeadirȩ. Tjamo̧ davä. Ca̧ guadia mu̧i̧tjoi̧ oa jana̧tä yo̧rä judi, chjaodëri̧ jana̧dique. Ado cja̧rȩmo̧ oa jätä yo̧rä judi, peaja̧di chjaodëri̧ jäde. Ado cja̧rȩmo̧ oa ja̧di dari̧ japatä yo̧rä judi, peaja̧di chjaodëri̧ japadejȩ, cüdë yo̧a̧mi̧. Jabechji̧ cüdë ma̧ȩ yürüa̧ oaiä japa maeadirȩ. Ado peaja̧di dari̧ japa jirorenȩ Ano̧mȩ. Pio mȩnȩ yo̧a̧mi̧ ta̧rë japa jirodirȩ na̧ pumȩ judiro̧. Ado pio ju̧i̧iä yo̧requedemȩ. Jabomo̧ ma̧ȩ yürüvä mȩnȩ ca̧ mu̧i̧tjoi̧ üdë pio yaba̧ chjaodëri̧ chjapea̧ oa cjiapea̧ oa" yo̧eji̧ri̧renȩro̧jo̧ȩ Jechu pio ju̧i̧ —yo̧mȩrȩ yo̧rëremȩdejȩ jibëa̧ jadü pio ji̧ri̧iäpemo̧ guadia ütë pio judi.

⁹ Ado ja̧dëa ji̧ guadia ütë pio ju̧i̧ ja̧ jadü judiro̧ Jechu pio ju̧i̧ dëbëdiäa̧rä, chjö̧na̧i̧ oa yo̧a̧diro̧jo̧ȩ pio jibë chjadüa̧mȩ pio judi yo̧a̧mi̧. Ado Jechu judi pio jiro ma̧ȩ oa ta̧rëa̧ oaiä, goaeri̧ ta̧rëa̧dejȩ guadia ütërë yo̧ chjadüa̧ pio ju̧i̧. Ado ma̧ chiadëri̧ cjiamȩrȩ jo̧rȩtamȩpea̧de. ‘Chia chia, chjaodëri̧ quëna̧mȩpea̧dicoada, judiodëborë chjuari̧ quëna̧dicoada’ quëna̧ jo̧rȩtamȩpea̧de guadia ütë pio ju̧i̧ chjiari ta̧rëa̧ oaiä. Ado pio ju̧i̧iä mȩmȩrȩpe cjiadiärëremȩde Jechu judi pio jȩa cho̧rë jäji̧ri̧ pio ji̧ri̧ dëbë dapea̧ oa, pumȩ buba pio ji̧ri̧ tocoi̧mi̧ ni̧bä chjaopea̧ oa. Ado ja̧di ta̧rëri̧ ni̧bärëremȩdejȩrȩ: —Tjamo̧i̧ cjiari̧ yo̧requededibe —yo̧a̧dejȩrȩ—. Danȩrȩ, pio jiro guadia ütë üdë Icharai pio judiri ja̧dëmȩborë, jabechji̧ chjuari̧ quëna̧dique. ‘Jauëchjadida’ quëna̧dique. Jabo pio judimi̧ dari̧ quëna̧mȩ oa jabë dadärädëa̧requede pio yoaiä, Icharai pio judiri ja̧ji̧ri̧ pio ji̧ri̧iä —yo̧a̧dejȩrȩ.

¹⁰ Ado ja̧dëa ji̧ guadia ütë pio ju̧i̧ ja̧ jadü judiro̧ ado chjereno̧ baädäräa̧ ji̧, jabechji̧ chjapea̧ oa cjiamȩ oa dadäräa̧diro̧jo̧ȩ guadia ja̧ mu̧i̧tjoi̧ pio ju̧i̧.

Jechu judi üi̧ chiarëreyi̧ pio ji̧ ja̧ jarea̧ pio ju̧i̧ ado chjereno̧ bëdü tänȩrëremȩdejȩ

¹¹ Ado japamitë boi̧chji̧ chjätä ëte, Jechu judi järëremȩde Nai quȩmȩräpȩ jibëa̧ jadü pio ji̧ri̧ nö̧ta. Ado pumȩ bubarë ëba järëreji̧ri̧diro̧jo̧ȩ.

¹² Ado Jechu judi Nai quȩmȩ bë ma̧ri̧räpȩ go̧düdäräa̧rä, bë ma̧ri̧rä yu̧a̧rea̧ joë ya queri̧räpȩ go̧düdäräa̧rä, pea ja̧boa̧mȩ pio ju̧i̧ ara go̧dürëreji̧ri̧diro̧jo̧ȩ pumȩ judiro̧, üi̧ pëi̧ chja pio ju̧i̧rea̧ ja̧ icjara oa. Jabechji̧ üi̧ chiarëreyi̧ ja̧ joja pio ju̧i̧ ja̧ icjara oa go̧dü tänȩa̧diro̧jo̧ȩ. Aja̧, pio ju̧i̧mo̧i̧ ëbarëreyi̧nȩjȩ. Ado pumȩ bubarë ëba jäa̧diro̧jȩ.

¹³ Ado Jechu judi ja̧boa̧mȩ ja̧ ai̧ pio ji̧ daea̧ ji̧, cjäri̧ri̧ cjia daea̧dejȩ. Ado yo̧a̧dejȩ: —Ejaro cjiadëvä.

¹⁴ Ja̧dëa ji̧ jäa̧dejȩ icjararë a̧rȩmȩräpȩ, to pjatërä a̧rȩmȩräpȩ. Ado to pjatë oa ga̧re tara̧ oaiä, cjiadiäa̧dirȩ icjara oa ara jäa̧ji̧ri̧ judiro̧. Ado ja̧dëa ji̧ Jechu judi yo̧a̧dejȩ ja̧boa̧mȩ ju̧i̧: —Danȩ üi̧ pëi̧ chja, pio mȩa yo̧requedemȩ. Jabechji̧ cjitëvä.

¹⁵ Ado ja̧dëa ji̧ chjaodëri̧ cjitërëremȩde üi̧ pëi̧ chja üdë, ado taruparëremȩde ni̧bäpea̧ ji̧. Ado ja̧dëa ji̧ Jechu judi ado chjereno̧ yürüa̧dejȩ jojini̧ pio ji̧iäpȩmo̧.

¹⁶ Ado pumȩ judiro̧ pio ju̧i̧ daea̧ oaiä, uapea̧ üdë ana̧ri̧ boadärärëremȩdejȩrȩ jibëa̧ chji̧ oa. Ado Ütë tjamo̧ pio ju̧i̧iäpȩmo̧ chjacjiamȩri̧ ni̧bäji̧ri̧pea̧diro̧jo̧ȩ. —Aja̧, a̧dë chjäte ju chiamȩ üdë, Ütërë ea jana̧ chjadüa̧ oa ni̧bämȩ pio judi ibëa̧ chjarerä cjiamȩpea̧de —yo̧ji̧ri̧rȩ chjacjiamȩri̧ ni̧bärëreji̧ri̧diro̧jo̧ȩ—. Aja̧, Ütë tjamo̧ pio judi a̧doera̧pea̧diibe pio yaba̧ domȩ oa —yo̧a̧dirȩ.

¹⁷ Ado Jechu pio ju̧i̧ chjiari ma̧ȩ üdë, jabechji̧ oëra̧ti̧ oa baäeno̧rëremȩde Judea quȩmȩ chiri nö̧tai̧ oa, ado Judea yuroro a̧rȩmȩ chiri nö̧tai̧ oa peaja̧di.

Jechu judi a̧ra̧ano̧rëremȩde jënȩ ja̧bepea̧ pio ju̧i̧ chjiari, uirä chudamȩ Juan judi ja̧bepea̧ pio ju̧i̧ chjiari

¹⁸ Ado Juan ja̧ jadü pio judiro̧ Jechurë japarërea̧ pio ju̧i̧ chjiari chjö̧na̧i̧ oa chjadëri̧ ta̧rë tänȩrëreji̧ri̧diro̧jo̧ȩ Juan pio ju̧i̧, uirä chudamȩ pio ju̧i̧.

¹⁹ Ado pio ju̧i̧iä ado cja̧rȩmo̧ doremȩrä, Juan judi pio jibëa̧ jadü yo̧a̧ri̧ oa pio jȩaiäpȩ jana̧tä yo̧ chjadüa̧dejȩrȩ. Aja̧, chaärea̧ bëräpȩ tutia̧ oa cjiamȩ oa jana̧tä yo̧ chjadüa̧dejȩrȩ. Ado pio jȩaiäpȩ jana̧ji̧ri̧ oa chjadüa̧dejȩrȩ Ano̧mȩ Jechu pio ju̧i̧iäpȩ pio ju̧i̧iä chjadëri̧ ta̧rëpea̧ oa. 'A̧ja̧, a̧ro̧rȩ jidatarërea̧ Chjätä Tänȩmȩ pio judi tjamo̧dida, jabo judidëdida, jabo ado cja̧rȩmo̧ oa jidatapea̧dida' quëna̧ dabapea̧ oa chjadüa̧dejȩrȩ jibëa̧ mu̧i̧tjoi̧ pio ji̧ri̧ chjadëri̧ iëno̧ë ta̧rëpea̧ oa, chjadëri̧ dabapea̧ oa.

²⁰ Ado Juan ja̧ jadü judiro̧ yo̧a̧ri̧rȩ Jechu pio ju̧i̧ dadäräa̧rä, ja̧di ta̧rëri̧ yo̧rëreji̧ri̧diro̧jo̧ȩ: —Danȩ, Juan judi, uirä chudamȩ pio judi chjadüa̧diibe pio mȩa chjadëri̧ iëno̧ë ta̧rëpea̧ oa —yo̧a̧diro̧jo̧ȩ—. Aja̧, chjadëri̧ yo̧ibe. ¿A̧ro̧rȩ jidatarërea̧ pio judidënȩ? ¿Ütërë mitëa̧ Chjätä Tänȩmȩ pio judidënȩ, jabo ado cja̧rȩmo̧ oa jidatapea̧? Chjadëri̧ yo̧ibe —yo̧ji̧ri̧rȩ yo̧a̧diro̧jo̧ȩ Jechu pio ju̧i̧.

²¹ Ado judiro̧ Jechu pio ju̧i̧ iëno̧ë ta̧rëa̧rä, judiro̧ pio ju̧i̧ nö̧ta ëba cjia̧rä, jabechji̧ chjaparȩrëremȩdejȩrȩ pumȩ no̧i̧dë oa, judiro̧ irä dae cjiarea̧mi̧ dari̧. Jabechji̧ gito ja̧boji̧ri̧ pio ji̧ri̧, eami̧ oa taraji̧ri̧ pio ji̧ri, yaröca chiaji̧ri̧ pio ji̧ri̧ chjaparȩrëremȩdejȩrȩ. Ado da cotorëreji̧ri̧ pio ji̧ri̧ ado chjereno̧ darea̧mi̧ dari̧ chjaparȩrëremȩdejȩrȩ peaja̧di.

²² Ado ja̧dëa ji̧ ja̧di dari̧ japa ëte, ja̧di ta̧rëri̧ dëbë yo̧a̧dejȩrȩ pio jȩa goëdaera̧pea̧ji̧ri̧ pio ji̧ri̧: —Danȩrȩ, ado chjereno̧ carupë baäeno̧chji̧vä Juan pio ju̧i̧iäpȩmo̧ chjadëri̧ ta̧rë tänȩpea̧ oa —yo̧a̧dejȩrȩ—. Mȩnȩro̧ pio coaiä ta̧rëa̧ pio ju̧i̧ chjiari ta̧rë tänȩpea̧ oa, mȩnȩro̧ irä daea̧ pio ju̧i̧ chjiari chjadëri̧ ni̧bä chjaopea̧ oa, cuchupë baächji̧vä. Jabechji̧ dacho cotorëreji̧ri̧ pio judiro̧ chjadëri̧ daji̧ri̧pea̧dirȩ. Ado ma̧i̧ da co chiarëreji̧ri̧ pio judiro̧ chjaparȩa̧ oa cjiaji̧ri̧pea̧dirȩ. Ado tai̧rea̧ chiadërëreji̧ri̧ pio judiro̧ chjadëri̧ tai̧rea̧ daji̧ri̧pea̧dirȩ. Ado ta̧ra̧ cotorëreji̧ri̧ pio judiro̧ chjadëri̧ ta̧rërea̧ chiaji̧ri̧pea̧dirȩ. Ado ja̧boa̧reji̧ri̧ pio judiro̧ bëdü ëte, cjo̧ro̧ji̧ri̧pea̧dirȩ ado chjereno̧. Ado chjö̧na̧i̧ti̧ oa cjäri̧ ja̧boji̧ri̧ pio judiro̧ ma̧ȩ chjadëi̧ pio ju̧i̧ ta̧rëdërërea̧ ji̧, jabechji̧ cüdë a̧ra̧ano̧a̧ pio ju̧i̧ ano̧ mire ta̧rëji̧ri̧pea̧dirȩ yaba̧. Aja̧, pio ju̧i̧ chjiari ta̧rë tänȩchji̧jo̧ȩ Juan pio ju̧i̧ —yo̧a̧dejȩrȩ—. Jabechji̧ cüdë chjö̧na̧i̧ oa japea̧ pio ju̧i̧ chjadëri̧ ni̧bä chjaochji̧jo̧ȩ, mȩnȩro̧ daea̧ pio ju̧i̧. Jabechji̧ judi dabadëchea oa, chjadëri̧ tärȩ tänȩchji̧jo̧ȩ.

²³ Ado danȩrȩ, pio yoa ma̧ȩbo a̧de yo̧chji̧jo̧ȩ Juan pio ju̧i̧ —yo̧a̧dejȩrȩ—. "Danȩ Juan, pio coa chjiari oëra̧ jo̧rȩtadëmȩ pio judi, jabechji̧ ma̧ chiadëri̧ cjia tjamo̧mȩrȩ cjo̧ro̧pade. Jabechji̧ eami̧ pumȩ üdë pio coa chjiari oëra̧ jo̧rȩtadëmȩrȩ quëna̧rä judi, ‘Aja̧ Quiricho pio judi tjamo̧dida, ma̧diä cjia tänȩdëpadicoada, jabo pio judi tjamo̧dida, ado pio ju̧i̧iä ado cja̧rȩmo̧ oa jidatadëpea̧dida yaba̧’ quëna̧ jo̧rȩtarä judi, jabechji̧ ma̧ chiadëri̧ cjia tjamo̧mȩrȩ cjo̧ro̧pade." Aja̧, pio ju̧i̧ ma̧ȩbo a̧de yo̧eji̧ri̧renȩro̧jo̧ȩ Juan pio ju̧i̧ —yo̧mȩrȩ dëbë ni̧bä chjaoa̧dejȩrȩ Juan ja̧ jadü pio ji̧ri̧iäpȩmo̧ Jechu judi. Jabechji̧ Juan judi, uirä go̧e cjaeä chudarëremȩ pio judi pio jȩa chjiari dabadëchea oa, ja̧di ta̧rëri̧ ni̧bä chjaorëremȩdejȩrȩ Jechu judi, judi chjadëri̧ ta̧rë tänȩpea̧ oa.

²⁴ Ado Juan pio ju̧i̧ ja̧ jadü judiro̧ baäa̧ duri oa, Jechu judi pumȩ buba oa ni̧bämȩrȩ taruparëremȩde Juan pio ju̧i̧ chjiari ni̧bä chjaopea̧ ji̧. Ado ja̧di ta̧rëri̧ yo̧mȩrȩ ni̧bä chjaoa̧dejȩrȩ: —Danȩrȩ, no̧mȩ judi, mȩnȩro̧ chiri tjo maearäpȩ järërea̧ ji̧, uirä chudamȩ pio ju̧i̧iäpȩ järërea̧ ji̧, ¿tjana̧pea̧ oa järëreji̧ri̧nȩrȩ? —iëno̧ë ta̧rëa̧dejȩrȩ—. Ano̧ mire jo̧rȩte chjaomȩ pio ju̧i̧, yo̧a̧ri̧ ya chiami̧ dari̧ ni̧bämȩ pio ju̧i̧ goëdepea̧ oa ¿jäa̧nȩrȩ?

²⁵ ¿Jabo tjana̧ oa tjamo̧ri̧ dapea̧ oa jäa̧nȩrȩ? ¿Chjia tjamo̧ oa dapea̧ oa jäa̧nȩrȩ? ¿Chjibo chjacjiamȩ tjamo̧ oa ina̧mȩ pio ju̧i̧ dapea̧ oa jäa̧nȩrȩ? Jabo cjäri̧ manȩrȩ, chjacjiamȩri̧ ina̧ oa cjiamȩ pio ju̧i̧ dapea̧ oa jädëa̧ jironȩrȩ. Jabechji̧ pio jiro chjibo chjacjiamȩ oa ina̧ji̧ri̧ pio judiro̧ chiri ütërë cjo̧ro̧mȩräpȩ cjo̧ro̧ maeadirȩ. Pumȩ decjiaräpȩ cjo̧ro̧dë madirȩ. Jabechji̧ pio ji̧ri̧ dapea̧ oa jädëa̧ jironȩrȩ mȩnȩro̧. Jabo pio ji̧ri̧ dapea̧ oa jädëa̧rä judi, ¿chjia tjamo̧ oa dapea̧ oa jäa̧nȩrȩ?

²⁶ Yo̧chji̧coe. ¿Tjana̧ ju̧i̧iä jäa̧nȩrȩ Juan pio ju̧i̧iäpȩ? Ütërë ea jana̧ chjadüa̧ oa ni̧bämȩ pio ju̧i̧ dapea̧ oa ¿jäa̧nȩrȩ? Dëdë, pio ju̧i̧ tjamo̧ri̧ jo̧rȩtaji̧ri̧rȩ jäa̧nȩrȩ. Jabechji̧ Juan judi Ütërë ea jana̧ chjadüa̧ oa ni̧bämȩde. Ado o ji̧ri̧iä ji̧dë u̧i̧ ba chiade ji̧dëri̧. Tjamo̧ davä. Ütërë ea jana̧ chjadüa̧ oa ni̧bärëreji̧ri̧ pio ji̧ri̧iä ji̧dë u̧i̧ ba chiade. Jabechji̧ yo̧a̧ri̧ ja̧beparea̧ oa goarëremȩde. Jabechji̧ Ütërë ea jana̧ chjadüa̧ duri oa ni̧bäpea̧ pio ju̧i̧mo̧i̧ ja̧bepadërëremȩde, jabo a̧de ja̧beparea̧ ba chia tjamo̧ oa goarëremȩde peaja̧di.

²⁷ Ado judi a̧de ja̧bepapea̧ pio ju̧i̧ chjiari jabërä go̧ȩpea̧ oa cjiarëremȩde ma̧ȩ üdë. Tjamo̧ davä. Jabërä Ütë tjamo̧ judi pio coa ni̧bärërea̧ ji̧, jabechji̧ Juan judi pio coa chjiari japapea̧ pio ju̧i̧ chjiari ni̧bärëremȩdique, judi no̧mi̧ da oa jëdane yürüpea̧ pio ju̧i̧ chjiari. Aja̧, ta̧rëchji̧vä ma̧ȩ oa, Ütë tjamo̧ judi coa ni̧bärërea̧ ma̧ȩ oa Juan pio ju̧i̧ chjiari. “Danȩ, ca̧ mu̧i̧tjoi̧ pio ju̧i̧ chjadüpareconȩ na̧ yaboi̧. Jabechji̧ mȩnȩ jäpea̧ no̧mi̧ da pio ju̧i̧ jabërä chjadëri̧ jëdano̧mi̧ dari̧ japapea̧ oa, na̧ yaboi̧ chjadüpareconȩ.” Aja̧, ja̧di ta̧rëri̧ yo̧mȩrȩ ni̧bärëremȩdique Ütë tjamo̧ judi jabërä Juan pio ju̧i̧ chjiari.

²⁸ Ado Juan pio ju̧i̧ chjiari ji̧dë u̧i̧ ni̧bäparequededibe. Jabechji̧ eami̧ pumȩ üdë, eami̧ chirirä cjo̧ro̧rëremȩ pumȩ üdë, no̧mȩ tjamo̧ri ja̧ cjo̧ro̧rëremȩ pumȩ üdë, jabechji̧ Juan pio ju̧i̧iä ji̧dë u̧i̧ ba chiadë madirȩ jabo o ji̧ri̧iä ji̧dë u̧i̧ ba chiade Juan pio judi. Jabo danȩrȩ, Juan judi pumȩ ütëbo pio ji̧ri̧iä ji̧dë u̧i̧ ba chiaräbo, jabechji̧ Ütërë yo̧a̧ chja̧oerä cjo̧ro̧ji̧ri̧ pio judiro̧ Juan pio ju̧i̧iä ji̧dë u̧i̧ ba chia maeadirȩ. Tjamo̧ davä. Eami̧ pumȩ üdë, ba chiadëmȩmi̧ damȩ pumȩ pio judiborë Ütërë yo̧a̧ chja̧oerä cjo̧ro̧rä judi, jabechji̧ Juan pio ju̧i̧iä ji̧dë u̧i̧ ba chia maeade —yo̧mȩrȩ ni̧bä chjaorëremȩdejȩrȩ Jechu judi pumȩ ji̧ri̧ Juan pio ju̧i̧ chjiari.

²⁹ Ado Jechu judi Juan pio ju̧i̧ chjiari ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Ado pumȩ judiro̧ ütëborë Juan judi a̧ra̧ano̧a̧ maȩ pio ju̧i̧ tjamo̧ri̧ ta̧rë ja̧borëreji̧ri̧diro̧jo̧ȩ, domano̧ ja̧ oa chëre boaji̧ri̧ pio judiro̧borë. Jabechji̧ pio judiro̧ tjamo̧rëreji̧ri̧dirȩ Juan pio ju̧i̧iä go̧e cjaeä chuda̧ oa cjiarëreji̧ri̧ judiro̧. Jabechji̧ judiro̧ quëna̧ oaiä, 'Aja̧, Ütë tjamo̧ judi coëma cjiari̧ japamȩdida, ado jënȩ pio ibë chjiari ütarë jo̧rȩtarërea̧ üdë peaja̧di coëma cjiadida' quëna̧ jo̧rȩta̧ oaiä, jabechji̧ go̧ȩ cjaeä chuda̧ oa cjiarëreji̧ri̧dirȩ Juan pio ju̧i̧iä.

³⁰ Jabo cjäri̧ madirȩ, pjaricheo pio judiro̧, ado Moicherë go̧ȩparërea̧ ma̧ȩ oa tjamo̧ri̧ dabaji̧ri̧ pio judiro̧ jiadarëreji̧ri̧dirȩ. Tjamo̧ davä. Ütërë pio jibë chjiari chjadëri̧ japea̧ pio ju̧i̧, judi pio jibë chjiari ütarë jo̧rȩtarërea̧ pio ju̧i̧ jiadarëreji̧ri̧diro̧jo̧ȩ. Ado pio ju̧i̧iä jiada̧diro̧jo̧ȩ Juan pio ju̧i̧, uirä go̧e cjaeä chuda̧ oa cjiadëri̧ cjiaji̧ri̧rȩ —yo̧a̧dejȩrȩ.

³¹ —Ado pio jiro pumȩ judiro̧ Ütërë pio jibë chjiari ütarë jo̧rȩtarërea̧ pio ju̧i̧ jiada̧ tara, pio yaba̧mȩ yoaiä cjo̧ro̧ji̧ri̧ pio judiro̧ jiada̧ tara, ¿yö̧ta dari̧ yo̧mȩrȩ chjadëri̧ na̧rȩtäremȩrequededibe pio ji̧ri̧ chjiari?

³² Yö̧ta dari̧dë, jabechji̧ bori̧mi̧ dari̧ cjo̧ro̧dirȩ. Gatë tänȩrea̧ bë ji̧ra̧räpȩ ju̧ri̧ chjaocjiaji̧ri̧ bori̧mi̧ dadirȩ. Ado chji̧ goaera̧ jo̧rȩtaji̧ri̧rȩ chjaocjiatärea̧ ji̧, cjäri̧ madirȩ, jibëa̧ jadü pio ji̧ri̧iäpȩmo̧ idëri̧ cjia tänȩ chjaodiro̧jȩrȩ, ya̧ji̧ri̧rȩ. Danȩrȩ, ja̧dimi̧ ta̧rëri̧ ni̧bädirȩ: —Cjäri̧ manȩrȩ, a̧ro̧rȩ yo̧a̧mi̧ japadë manȩrȩ —yo̧diro̧jȩrȩ—. A̧ro̧rȩ yo̧ro, "Aja̧, airi̧ cjiaji̧ri̧rȩ go̧a̧tärȩ" yo̧ro, cjäri̧ marenȩro̧ibe, chjadëri̧ jadü cjiadë marenȩro̧ibe. Ado a̧ro̧rȩ "gitori̧ jo̧rȩtaji̧ri̧mi̧ dari̧ chjaocjiatärȩ" yo̧ro, peaja̧di chjari̧ jadü cjiadë marenȩro̧ibe. Jabechji̧ mȩnȩro̧ pio ibë nö̧ta chjadëri̧ chjaocjiatärea̧ ji̧, japadë manȩrȩ. Ado pio ju̧i̧iä "chjai̧dënȩrȩ” ya̧ji̧ri̧rȩ ni̧bädiro̧jȩrȩ jibëa̧ jadü pio ji̧ri̧iäpȩmo̧ ma̧ȩ goaedëra̧ pio ju̧ri̧ra̧ —yo̧a̧dejȩrȩ.

³³ —Aja̧, ja̧di ta̧rëri̧ ma̧ȩ goaedëra̧ ni̧bädirȩ bori̧ judiro̧. Ado peaja̧dimi̧ dari̧ ni̧bä chjaonȩrȩ pio mȩnȩro̧ —yo̧a̧dejȩrȩ Jechu judi—. Danȩrȩ, uirä chudarëremȩ pio ju̧i̧ chjiari, Juan pio ju̧i̧ chjiari ma̧ȩ goaedëra̧ ni̧bä chjaonȩrȩ, pio coa chjiaribo. Jabechji̧ Juán judi jënȩ jo̧rȩta̧mi̧ jurarea̧ pio ju̧i̧ jiadamȩrȩ cjo̧ro̧rëremȩdejȩ Ütë tjamo̧ pio ju̧i̧ ana̧ri̧ jo̧rȩtapea̧ oa, jurarea̧ pio oaiä oëra̧diächea oa. Ado ërü oa peaja̧di jaradë marëremȩdejȩ. Jabo judi eami̧ oa japadëa̧räbo, cjäri̧ marenȩro̧jo̧ȩ, “Yaröca chiade” yo̧rëreji̧ri̧nȩrȩ pio ju̧i̧ chjiari. Ma̧ȩ goaedëra̧ yo̧rëreji̧ri̧nȩro̧jo̧ȩ, bori̧ pio judiro̧ ya̧mi̧ dari̧.

³⁴ Ado peaja̧di ta̧rëri̧ yo̧nȩrȩ pio coa chjiari, Pumȩrȩ Ara̧ Tjamo̧ pio ju̧i̧ chjiari —yo̧a̧dejȩrȩ—. Jabechji̧ cüdë tjaoëpai̧ dari̧ cjo̧ro̧räbo, Juan pio judi japarërea̧mi̧ japadëräbo, jurarea̧ oa jiadamȩrȩ cjo̧ro̧dëräbo, jabechji̧ ma̧ȩ goaedëti̧ra̧ ni̧bänȩrȩ pio coa chjiari peaja̧di. Jabechji̧ ado cja̧rȩmo̧ doremȩrä cüdë mairi̧ jura̧ ji̧, “cjäri̧ made, ma̧i̧ dari̧ japamȩde” yo̧ chjaoa̧nȩrȩ. “Jurarea̧ goaramȩde. A̧dë chjäte ji̧ra̧ oa juramȩde” yo̧a̧nȩrȩ. Ado cüdë jara̧ oaiä, “Ërü yu̧i̧mȩde” yo̧a̧nȩrȩ. Jabechji̧ bori̧mi̧ dari̧ chjaodëri̧ aechide yo̧a̧renȩro̧coe. Ado cüdë o pio ji̧ri̧ nö̧ta ëba cha̧ oaiä, “Aja̧, ma̧i̧ da chjai̧dëri̧ japaji̧ri̧ pio ji̧ri̧ ja̧ jadüde” yo̧a̧nȩrȩ. “Domano̧ ja̧ chëre oa boaji̧ri̧ pio ji̧ri̧ ja̧ irämȩde” yo̧a̧nȩrȩ.

³⁵ Jabo mȩnȩro̧ pio ibë chjiari ji̧dë ma ma̧ȩ goaedëti̧ra̧ ni̧bä chjaoa̧räbo, jabechji̧ pumȩ no̧i̧dërë chjadë pio ju̧i̧ na̧rȩji̧ri̧rȩ cho̧rëdiädiro̧ibe —yo̧a̧dejȩrȩ Jechu judi—. Tjamo̧ davä. Juan judi ado pio cüdëborë tjaoëpai̧ dari̧ jo̧rȩtariä cjo̧ro̧a̧ oaiä, a̧dëri pio judiri ma̧na̧mȩ jo̧rȩtarea̧ra̧ pio ju̧ri̧ra̧ jo̧rȩtariä cjo̧ro̧a̧ oaiä, 'jabechji̧ coëma cjiari̧ cjo̧ro̧diro̧da, cho̧rëdiärea̧mi̧ dari̧ cjo̧ro̧diro̧da’ quëna̧ jo̧rȩtaji̧ri̧rȩ cho̧rëdiädiro̧ibe, chjadë maea oa na̧rȩji̧ri̧rȩ —yo̧mȩrȩ ni̧bä chjaorëremȩdejȩrȩ Jechu judi, pjaricheo ji̧ri̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧bo.

Jechu judi goaeri̧ pjȩa̧mȩ joarea̧ ba chia tjamo̧ra̧ pio ju̧ri̧ra̧ arë cjaräa̧ oa cjiarëremȩde chjai̧dëri̧ japayi̧ iei̧ pio ji̧iä.

³⁶ Ado pjaricheo judi cja̧rȩmȩrȩ yabërëremȩdejȩ Jechu ju̧i̧ pio jȩa nö̧ta ëba jätä jibëa̧ bëräpȩ jurapea̧ oa. Ado pio ju̧i̧iä järëremȩde Jechu judi. Ado chadärä ëte, juramȩpea̧de.

³⁷ Ado pio jiro bë ma̧ri̧räpȩ ju̧ri̧ cjo̧ro̧rëreyi̧nȩ iei̧ pio jini̧, oarirë chëre yürüa̧ ba oa ëba mo̧a̧ chjaorëreyi̧ iei̧ pio jini̧. Jabo pio jiro iei̧ jini̧ Jechu pio ju̧i̧ chjiari goë ta̧rëa̧ oaiä, "Aja̧, pio jiro pjaricheorë cjo̧ro̧mȩräpȩ jura chade" yo̧a̧ oa ta̧rëa̧ oaiä, jabechji̧ jäa̧nȩ, ui goaeri̧ pjȩa̧mȩ joarea̧ ba chia tjamo̧ oa goayi̧rȩ. Tjamo̧ davä. Joë ba chia tjamo̧rä, ta̧dëra̧ japea̧ oa cjiamȩ joërä goayi̧rȩ jäa̧nȩ.

³⁸ Ado bëräpȩ yu̧a̧ ëte, Jechu ja̧ duriräpȩ cjiayi̧pea̧nȩ. Ado ja̧dëa ji̧ ejaro cjiayi̧rȩ ju chatura̧ cjiadäräa̧nȩ. Ado Jechu ja̧ taräpȩmo̧ gu̧roa̧de jibëa̧ da ui üdë ejaro cjia̧ oaiä. Ado ja̧dëa ji̧ jibëa̧ ta oa gaüparȩpea̧ oa, bubëgua̧nȩjȩ jibëa̧ cö̧ra̧. Ado ja̧dëa ji̧ Jechu ja̧ ta oa goaeri̧ pjȩa̧mȩ joarea̧ oa arë cjaräyi̧rȩ ji̧dë ma ya i̧bu chjaorëreyi̧nȩjȩ jibëa̧ ta oa.

³⁹ Jabo pjaricheo judi pio ji̧ daea̧ oaiä, Jechu ju̧i̧ jibëa̧ bëräpȩ jurera̧tä yabëa̧mȩ pio judi chjö̧na̧i̧ oa daea̧ oaiä, ana̧ri̧ jo̧rȩtamȩpea̧de. 'Jabo cjäri̧ madida, pio jiro üi̧ üdë Ütërë ea jana̧ chjadüa̧ oa ni̧bämȩrȩ tjamo̧ri̧ cjo̧ro̧a̧rä judi, 'jabechji̧ pio jiro iei̧ pio ji̧ chjiari chjadëri̧ dabatäremȩdida, pio jȩa ga̧re tarayi̧ pio ji̧ chjiari na̧e chiatäremȩdida, jabechji̧ chjai̧dëri̧ japayi̧ iei̧ pio jini̧ni̧da quëna̧täremȩdida' quëna̧ jo̧rȩtamȩrȩ darëremȩdejȩ Jechu ju̧i̧.

⁴⁰ Jabo Jechu judi 'ja̧di dari̧ jo̧rȩtadida' quëna̧ dabamȩrȩ yo̧a̧dejȩ: —Danȩ Chimo̧ —yo̧a̧dejȩ pjaricheo pio ju̧i̧iäpȩmo̧—. Ni̧bä chjaotämi̧ cjiarequedemȩ —yo̧a̧dejȩ. Ado Chimo̧ judi dëbë yo̧a̧dejȩ: —Aja̧, goë jaevä. Ni̧bä chjaocoe.

⁴¹ Ja̧dëa ji̧ Jechu judi pio yoa ma̧ȩ oa ni̧bä chjaorëremȩdejȩ, na̧rȩrea̧ ma̧ȩmi̧ dara̧: —Danȩ, chëre oa eopamȩrȩ cjo̧ro̧mȩ pio judi eoparëremȩdejȩ chëre oa yo̧a̧ri̧ pumȩ ji̧ri̧ —yo̧a̧dejȩ—. Cja̧rȩmȩ oa eoparëremȩdejȩ 500 chëre oa, ji̧ra̧ tjamo̧ oa. Ado cja̧rȩmo̧ oa 50 chëre maea oa eoparëremȩdejȩ.

⁴² Jabo judiro̧ ado chjereno̧ chjadëri̧ ba ano̧tärea̧ ji̧, cjäri̧ madiro̧jo̧ȩ, ba ano̧rea̧ dadëa̧diro̧jo̧ȩ. Ado pio ju̧i̧iä eopamȩ pio judi, jabechji̧ ba eadërëremȩdejȩrȩ chëre oa. "Aja̧, jabechji̧de ado ja̧di. Mȩnȩro̧ bacjia̧ üdë jabechji̧de ado ja̧di" yo̧mȩrȩ duridëparȩmi̧ dari̧ japarëremȩdejȩ jënȩro̧ bacjia̧ pio ju̧i̧. Ado pio ju̧i̧iä jabechji̧ pio jiro oari judiro̧, 'Aja̧, ado chjereno̧ ba ano̧pea̧ chiacuni̧da' quëna̧rea̧mi̧dëri̧ cjo̧ro̧ji̧ri̧pea̧dirȩ, bacjiadëji̧ri̧rȩ —yo̧mȩrȩ ni̧bä chjaoa̧dejȩ Jechu judi na̧rȩrea̧ ma̧ȩmi̧ dara̧. Ja̧dëa ji̧ Chimo̧ pio ju̧i̧ iëno̧ë ta̧rëa̧dejȩ: —Danȩ, ¿chjia tjamo̧de ji̧dë u̧i̧ ma̧ chiadëri̧ cjiapamȩ judi? ¿Jabomo̧ jabëtari̧mi̧ bacjiaremȩ pio judi, jabo ji̧ra̧ tjamo̧ oa bacjiaremȩ pio judi? ¿Ado chjia tjamo̧de chëre oa eoparemȩ pio ju̧i̧iäpȩmo̧ ji̧dë u̧i̧ eapamȩ judi? ¿Jabomo̧ jabëtari̧mi̧ bacjiaremȩ pio judi, jabo ji̧ra̧ tjamo̧ oa bacjiaremȩ pio judi? —yo̧mȩrȩ iëno̧ë ta̧rëa̧dejȩ Chimo̧ ju̧i̧ Jechu judi.

⁴³ Ado Chimo̧ judi dëbë yo̧a̧dejȩ: —Ji̧dë u̧i̧ ji̧ra̧ri̧ bacjiaremȩ pio judi ji̧dë u̧i̧ eamȩrȩ daea̧ jirodejȩ, ji̧dë u̧i̧ duridëparȩa̧ oa cjiamȩ pio judi. —Aja̧, tjamo̧ri̧ yo̧a̧nȩ —yo̧a̧dejȩ Jechu judi.

⁴⁴ Ja̧dëa ji̧ Jechu judi iei̧ pio ji̧iäpȩmo̧ dapea̧ oa mȩmȩrȩpamȩrȩ yo̧a̧dejȩ Chimo̧ ju̧i̧: —Danȩ, pio yi̧a iei̧ pio ji̧, pio yi ju chatura̧ cjiadäräa̧yi̧ pio ji̧ dajȩ —yo̧a̧dejȩ—. Jabechji̧ pio mȩnȩ coa chjadëri̧ yürütärea̧ ji̧, na̧ bëräpȩ go̧düna̧ra̧mȩ oa ui ca̧ ta oa joapea̧ oa yürütärea̧ ji̧, dabu pjo̧no̧ oa chiadëpe bagari̧ joapea̧ oa yürütärea̧ ji̧, cjäri̧ marenȩque, yürüdëa̧renȩque. Jabo pio jiro iei̧ pio yi̧në jibëa̧ da uira̧ pio ju̧ri̧ra̧ joë yürüa̧ni̧que ca̧ ta oa. Ado bubëgua̧ni̧que jibëa̧ cö̧ra̧ ji̧dëri̧.

⁴⁵ Ado cüdë jana̧rä, cjäri̧ marenȩque, ca̧ chama̧choro i̧budëa̧renȩque, jabo pio yi̧në iei̧ pio i̧në ca̧ ta oa i̧bu chjao ano̧dëa̧nȩ cüdë jana̧ri ja̧.

⁴⁶ Ado danȩ Chimo̧, mȩnȩ arë cjarätärea̧ ji̧, cüdë pea jana̧mȩ oa Orivo quȩmȩ yo̧ra̧ pio ju̧ri̧ra̧ ca̧ tjübë oa chjadëri̧ arë cjarätärea̧ ji̧, cjäri̧ marenȩque, eami̧ oa japadëa̧renȩque, jabo pio yi̧në iei̧ pio i̧në ca̧ ta oa arë cjaräa̧ni̧que goaeri̧ pjȩa̧mȩ joarea̧ ba chia tjamo̧ra̧.

⁴⁷ Ado pio ju̧i̧iä yo̧requedemȩ Chimo̧: Danȩ, pio yi̧në iei̧ inë, jabechji̧ jënȩ jana̧ pio judiri yurori ji̧dë ma na̧rȩnȩ davä jënȩ pio coaiäpȩmo̧ tjamo̧ri̧ eapea̧ pio ju̧i̧ chjiari. Jabechji̧ jënȩ co ji̧ra̧ tjamo̧ri̧ chjai̧dëri̧ japea̧ üdë duridëparȩa̧ oa cjia tara, jabechji̧ ana̧ri̧ na̧rȩni̧que davä jënȩ pio coaiäpȩmo̧ ana̧ri̧ eapea̧ pio ju̧i̧ chjiari. Jabo ado cja̧rȩmo̧ üdë, 'Aja̧, jabomo̧ yo̧a̧ri̧mo̧i̧ co chjai̧dëri̧ japea̧quëda, co ji̧ra̧ri̧ chjai̧dëri̧ japadëa̧quëda' quëna̧mȩ pio judi, 'jabechji̧ jabëtari̧mi̧ maea oa duridëparȩa̧dicoada' quëna̧ jo̧rȩta̧de. Ado pio ju̧i̧iä jabëtari̧mi̧ maeari̧ na̧rȩde jënȩ pio coa eapea̧ pio ju̧i̧ chjiari.

⁴⁸ Ja̧dëa ji̧ Jechu judi yo̧a̧dejȩ iei̧ ji̧: —Mȩnȩ chjai̧dëri̧ japea̧ üdë duridëparȩa̧ oa cjiadi.

^49-50 Jabechji̧ mȩnȩ quëna̧yi̧ tara, jabechji̧ chjätärea̧ daea̧mȩ. Ado pio ju̧i̧iä yo̧cama̧, jabechji̧ ma̧ chjupi̧ cjiari̧ jo̧rȩtayi̧rȩ baäje —yo̧a̧dejȩ. Jabo mechjaräpȩ jurë chaji̧ri̧ oari pio judiro̧ pio ju̧i̧ ta̧rëa̧ oaiä, ja̧di ta̧rëri̧ yo̧ji̧ri̧pea̧dirȩ jibëa̧ dëbëti̧ra̧ chia: —¿Jabo chjiacjivadi pio yodëje? Ütë tjamo̧ pio judimo̧de chjai̧dë oa duridëparȩmȩ judi jabo pio yodëje chjai̧dë oa duridëparȩmȩmi̧ dari̧ ni̧bämȩde. Jabo cjäri̧ made, ma̧i̧ dari̧ ni̧bämȩde —yo̧ji̧ri̧rȩ ni̧bärëreji̧ri̧dirȩ jibëa̧ dëbëti̧ra̧ chia, ana̧ri̧ jo̧rȩtaji̧ri̧rȩ.