Lucas 6 - Biblia Pume

Pjaricheo judiro̧ Jechurë a̧ra̧ano̧a̧ pio ju̧i̧ ta̧rë ja̧botärea̧ ji̧, judi järätä chjaparea̧ do pio ju̧i̧ chjiari peaja̧ oa mitëmi̧ dari̧ ano̧ mire jo̧rȩtatärea̧ ji̧, cjäri̧ madirȩ, no̧mȩ ja̧ maea oa chjuari̧ mitëmi̧ dari̧ jo̧rȩtarëreji̧ri̧dirȩ, Jechu pio ju̧i̧ ji̧dë ma jiadaji̧ri̧rȩ

¹ Ado judirä, Jechu judi järätä chjaparea̧ doro, tjado oa yu̧ë chjätärëremȩde jibëa̧ jadü pio ji̧ri̧ nö̧ta. Ado jibëa̧ jadü pio judiro̧ ta̧mȩcho̧ ja̧boa̧ oaiä, jabechji̧ chjaodëri̧ yarëno̧a̧diro̧jo̧ȩ cho chiamȩ joë pio ju̧i̧. Ado mu̧i̧ yarëno̧ ëte, mu̧i̧ ia̧diro̧jo̧ȩ joë oa. Ado taruparëreji̧ri̧dirȩ jurapea̧ ji̧.

² Jabo pjaricheo judiro̧ pio ji̧ri̧ daea̧ oaiä, yo̧a̧diro̧jo̧ȩ Jechu ju̧i̧: —Jabo danȩ, na̧ jadü judiro̧ tüdüa̧mi̧ darä cjo̧ro̧pea̧ ma̧ȩrä chjadëri̧ cjo̧ro̧tärea̧ ji̧, järätä chjaparea̧ doro chjadëri̧ cjo̧ro̧tärea̧ ji̧, jabechji̧ china̧chja pio ju̧i̧ japadirȩ —yo̧a̧diro̧jo̧ȩ—. Jabechji̧ tjadoro ja̧bepadirȩ jurarea̧ oa mitëa̧ oaiä. Ado järätä chjaparea̧ doro ja̧beparea̧mi̧dëde. Jabechji̧ china̧chja do oaiä, jurarea̧ cho oa mitërea̧mi̧dëde —yo̧a̧diro̧jo̧ȩ.

³ Ado Jechu judi dëbë yo̧a̧dejȩrȩ pjaricheo pio ji̧ri̧iäpȩmo̧: —Danȩrȩ, ¿Ütë tjamo̧ ja̧ ma̧ȩ oa go̧ȩ ni̧bädëa̧nȩrȩ? —iëno̧ë ta̧rëa̧dejȩrȩ—. Davi quȩmȩrea̧ pio judi japarërea̧ pio ju̧i̧ chjiari ¿go̧ȩ ni̧bädëa̧nȩrȩ? Judi jibëa̧ jadü pio ji̧ri̧ nö̧ta japarërea̧ pio ju̧i̧ chjiari, judiro̧ ta̧mȩcho̧ ja̧bo tjamo̧ji̧ri̧rȩ japarërea̧ pio ju̧i̧ chjiari ¿go̧ȩ ni̧bädëa̧nȩrȩ? —iëno̧ë ta̧rëa̧dejȩrȩ—.

⁴ Danȩrȩ, Davirea̧ pio judi ta̧mȩcho̧ ja̧bomȩrȩ dëbëdiärea̧ jo̧räpȩ yu̧a̧rëremȩde. Ado china̧chja oa mitërëremȩdejȩ chja̧pe oa. Tjamo̧ davä. Chja̧pe oa jurapea̧ oa, Ütë tjamo̧ ja̧ oa china̧chjari̧ tutia̧ oa cjiaremȩ chja̧pe pio ju̧i̧ jurapea̧ oa mitërëremȩde, o ji̧ri̧ chjiari goë tuti ja̧bepaji̧ri̧ pio ji̧ri̧ ja̧ oa china̧chjari̧ tutia̧ oa cjiaremȩ chja̧pe pio ju̧i̧. Ado jurarea̧ china̧chja pio ju̧i̧ mitë ëte, go̧dürëremȩde jibëa̧ jadü pio ji̧ri̧iäpȩ, pio ji̧ri̧ nö̧ta ëba jurapea̧ oa. Ado judi juradëpea̧ pio ju̧i̧ jura̧räbo, tüdüa̧mi̧ darä cjo̧ro̧pea̧ ma̧ȩ pio ju̧i̧ ta̧rëdiädëa̧räbo, jabechji̧ eami̧ chjai̧dë oa chjätädërëremȩde —yo̧a̧dejȩrȩ—.

⁵ Ado danȩrȩ, järätä chjaparea̧ do Ano̧mȩ pio judirequede. Tjamo̧ davä. Pumȩrȩ Ara̧ Tjamo̧ pio judi järätä chjaparea̧ do Ano̧mȩ pio judirequede. Jabechji̧ pio cüdërequede järätä chjaparea̧ do oa tjamo̧ri̧ yo̧mȩ judi. Ado pio ju̧i̧iä jabechji̧, pio cüdë tjamo̧requede ütarë yo̧mȩ judi pumȩ judiro̧ järätä chjaparea̧ do oa japapea̧ pio ju̧i̧ chjiari —yo̧mȩrȩ ni̧bä chjaorëremȩdejȩrȩ Jechu judi pjaricheo pio ji̧ri̧iäpȩmo̧ järätä chjaparea̧ doro ja̧bepapea̧ pio ju̧i̧ chjiari.

Jechu judi ji̧dë ma a̧ra̧ano̧dejȩrȩ pumȩ ji̧ri̧ järätä chjaparea̧ do pio ju̧i̧ chjiari, jënȩro̧ jabë ta̧rëdëa̧ ma̧ȩ peaja̧ pio ju̧i̧ chjiari

⁶ Ado cja̧rȩmo̧ doremȩrä, järätä chjaparea̧ doremȩrä, Jechu judi a̧ra̧ano̧rëremȩde judiorë a̧doparea̧ bëräpȩ. Ado pumȩ üdë, ichi chjereamȩ pio judi, peaja̧di a̧doparëremȩde.

⁷ Ado pjaricheo judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë a̧dë darea̧ decjiari̧ ütarë dae chjaorëreji̧ri̧diro̧jo̧ȩ Jechu pio ju̧i̧, järi tjamo̧ji̧ri̧rȩ. 'Yö̧ta dari̧ japapadida, jabechji̧ järätä chjaparea̧ dorobo chjaparȩpai̧ da jirodiji̧da, pio ju̧i̧iäpȩmo̧ aechide yo̧rea̧mi̧ dari̧ japapai̧ dadiji̧da' quëna̧ jo̧rȩtaji̧ri̧rȩ ütarë dae cjiarëreji̧ri̧diro̧jo̧ȩ.

⁸ Jabo Jechu judi judiro̧ chjai̧dëri̧ jo̧rȩta̧ pio ju̧i̧ chjiari dabamȩrȩ ja̧di ta̧rëri̧ yo̧a̧dejȩ ichi chjerea̧mȩ pio ju̧i̧iäpȩmo̧: —Danȩ, pio yi cjiera̧vä —yo̧a̧dejȩ. Ado ichi chjerea̧mȩ pio judi pio ju̧ri̧pȩ järëremȩde Jechu ja̧ yuroro dae cjiapea̧ oa.

⁹ Ja̧dëa ji̧ Jechu judi yo̧a̧dejȩrȩ jȩa dae chjaoji̧ri̧ pio ji̧ri̧iäpȩmo̧: —Danȩrȩ, chjadëri̧ yo̧chji̧coe —yo̧a̧dejȩrȩ—. ¿Yö̧ta yo̧diibe Moicherë go̧ȩparërea̧ ma̧ȩ üdë? Järätä chjaparea̧ doro, ¿yö̧ta japapea̧de? ¿Jabo chjai̧dëri̧ japapea̧, jabo chjadëri̧ japapea̧? ¿Jabo pumȩ ju̧i̧ ja̧bo tänȩpea̧, jabo pumȩ ju̧i̧ chjaparȩpea̧? ¿Yö̧ta japapea̧? Chjadëri̧ yo̧chji̧coe —yo̧mȩrȩ yo̧a̧dejȩrȩ Jechu judi.

¹⁰ Jabo judiro̧ chjadëri̧ dëbë yo̧tärea̧ ji̧, cjäri̧ madiro̧jo̧ȩ, cjapi maearë cjiadiäa̧dirȩ. Ja̧dëa ji̧ Jechu judi pio jiro pumȩ ütëbo oa ano̧ mire dëbë gatë damȩrȩ yo̧a̧dejȩ ichi chjerea̧mȩ ju̧i̧: —Na̧ ichi chjia oa tobovä. Ado judi ichi chjia oa toboa̧ oaiä, chjaodëri̧ chjapea̧de.

¹¹ Jabo pjaricheo judiro̧ pio ju̧i̧ daea̧ oaiä, chjaodëri̧ a̧dë chjäte ërecjiaji̧ri̧pea̧dirȩ, cjarari̧ cjiape bagami̧ dari̧. Ado pio ju̧i̧iä ni̧bäji̧ri̧pea̧dirȩ jibëa̧ dëbëti̧ra̧ chia Jechu pio ju̧i̧ ja̧bo tänȩpea̧ pio ju̧i̧ chjiari.

Jechu judi 12 pumȩ oa mitërëremȩdejȩrȩ, jënȩ chjadüpea̧ pio ji̧ri̧

¹² Ado pio jiro japamitërä, Jechu judi ya̧mi̧ uëräpȩ ju̧ri̧ järëremȩde Ütë tjamo̧ pio ju̧i̧ ni̧bäpea̧ oa. Ado gȩnȩ yoa ni̧bärëremȩdejȩ.

¹³ Ado dopea̧rä judi ya̧mi̧ri pio judiri bira ëte, ma̧ȩ chjadüa̧dejȩrȩ jibëa̧ jadü ütëbo oa pio jȩaiäpȩ jätä. Ado ja̧dëa ji̧ ütëborë a̧dopea̧ oa cjiarä, judiro̧ noi̧dërë a̧dopea̧ oa cjiarä, Jechu judi mitërëremȩdejȩrȩ 12 maea oa, jënȩ chjadüpea̧ pumȩ pio ji̧ri̧.

¹⁴ Ado Jechu judi mitërërea̧ pio judiro̧ ja̧di quȩji̧ri̧dirȩ: Aja̧, cja̧rȩmȩ üdë Chimo̧ quȩmȩde. Jabo ji̧dë duri oa japamitë chjätä ëte, Jechu judi ano̧ mire quȩparëremȩdejȩ Pedro yo̧mȩ quȩra̧. Aja̧, pio judide cja̧rȩmȩrȩ. Ado cja̧rȩmo̧ üdë A̧däre quȩmȩde. Chimo̧ pio ju̧i̧ ja̧ omȩde. Ado cja̧rȩmo̧ üdë Santiago quȩmȩde. Ado Juan, Felipe, ado Bartolome quȩji̧ri̧dirȩ o judiro̧.

¹⁵ Ado cja̧rȩmo̧ üdë Mateo quȩmȩde. Ado cja̧rȩmo̧ üdë Santiago quȩmȩde. Alfeo quȩmȩ pio ju̧i̧ ja̧ joja pio judide. Ado Chimo̧ quȩmȩ judi, ado cja̧rȩmo̧de, ado cja̧rȩmo̧ Chimo̧de. Aja̧, järi tjamo̧rëremȩde domano̧ pio ji̧ri̧ dëbëpe chjaopea̧ ji̧. Jabechji̧ pio judiro̧ Israelita pio ji̧ri̧ ja̧ chiri oa boana̧ra̧rërea̧ oaiä, jabechji̧ järi tjamo̧rëremȩde pio ji̧ri̧ dëbëpe chjaopea̧ ji̧.

¹⁶ Ado cja̧rȩmo̧ üdë Judas quȩmȩde. Santiago quȩmȩ pio ju̧i̧ ja̧ jojade. Ado cja̧rȩmo̧ üdë Judas Iscariote quȩmȩde. Aja̧, Jechu pio ju̧i̧iäpȩmo̧ chjai̧dëri̧ japapamȩ pio judide. Tjamo̧ davä. Jechu pio ju̧i̧ ja̧bo tänȩtämi̧ cjiaji̧ri̧ pio ji̧ri̧iäpȩmo̧ yürüpamȩ pio judide. Aja̧, ja̧di quȩji̧ri̧dirȩ Jechu judi mitërërea̧ pio judiro̧, jënȩ chjadüpea̧ oa mitërërea̧ pio judiro̧.

Pumȩ buba oa a̧ra̧ano̧rëremȩdejȩrȩ Jechu judi.

¹⁷ Ado Jechu judi jibëa̧ jadü pio ji̧ri̧di ya̧mi̧ri pio judiri bira̧rä, chiri pjatë marä cjiarëreji̧ri̧dirȩ, chiri boi̧dërä. Ado pio ju̧ri̧pȩ pumȩ noi̧dë tjamo̧rȩ cjiarëreji̧ri̧dirȩ peaja̧di, pio jȩa cho̧rë jäji̧ri̧ pio judiro̧. Jabechji̧ Jerucharȩ pio judiriji̧ri̧ judiro̧, ado Judea quȩmȩ chiririji̧ri̧ pio judiro̧ peaja̧di go̧düdärärëreji̧ri̧dirȩ noi̧dërë. Ado ui ana̧ yuroriji̧ri̧ pio judiro̧, Chido̧ quȩmȩ bë ma̧ri̧ queri̧räpȩ cjo̧ro̧ji̧ri̧ pio judiro̧, ado Tiro quȩmȩ bë ma̧ri̧räpȩ cjo̧ro̧ji̧ri̧ pio judiro̧ peaja̧di go̧düdärärëreji̧ri̧dirȩ. Aja̧, pumȩ bubarë cjiarëreji̧ri̧dirȩ pio jiro chiri pjatërä.

¹⁸ Jabechji̧ Jechu pio ju̧i̧ ta̧re järëreji̧ri̧diro̧jo̧ȩ. Ado gito ja̧boji̧ri̧ pio judiro̧ chjaparȩa̧ oa cjiapea̧ oa go̧düdäräa̧dirȩ. Ado yaröca chiaji̧ri̧ pio judiro̧borë chjaparȩa̧ oa cjiapea̧ oa go̧düdäräa̧dirȩ.

¹⁹ Ado pumȩ ütëbodärärë ga̧re taratarëreji̧ri̧diro̧jo̧ȩ Jechu pio ju̧i̧ chjadëri̧ chaparȩa̧ oa cjiapea̧ oa. Jabechji̧ ga̧re tara̧ oaiä, chjapea̧ oa cjiarëreji̧ri̧dirȩ jibëa̧ jauëchja pio oaiä. Ado Jechu judi, jabechji̧ pumȩ ütëbodärä oa chjaparȩrëremȩdejȩrȩ, cja̧rȩmȩrȩ a̧dë cjiadiädëri̧.

Jechu judi a̧ra̧ano̧rëremȩdejȩrȩ jibëa̧ jadü ji̧ri̧

²⁰ Ja̧dëa ji̧ Jechu judi jibëa̧ jadü pio ji̧ri̧iäpȩmo̧ gatë damȩrȩ ja̧di ta̧rëri̧ yo̧rëremȩdejȩrȩ: —Danȩrȩ, mȩnȩro̧ quëna̧rä judi, ‘Aja̧, chjö̧na̧i̧ti̧ oa cjäri̧ ja̧bomȩmi̧ dari̧ cjiaquëda’ quëna̧rä judi, jabechji̧ Ütërë chjadëri̧ a̧doa̧ oa cjianȩrȩ. Tjamo̧ davä. Mȩnȩro̧ quëna̧rä judi, ‘Aja̧, ibëa̧ ma̧na̧ri̧ japarea̧ decjiaa̧ro̧da jabo Ütë tjamo̧ pio judi tuti japea̧ pio ju̧i̧iämo̧i̧ cjo̧ro̧rea̧mi̧ dadida' quëna̧rä judi, jabechji̧ Ütërë chjadëri̧ a̧doa̧ oa cjianȩrȩ. Ado mȩnȩro̧ ja̧di dari̧ quëna̧ oaiä, jabechji̧ Ütërë yo̧a̧ chja̧oerä cjo̧ro̧rea̧ dapanȩrȩ.

²¹ —Ado danȩrȩ, mȩnȩro̧ Ütë tjamo̧ ja̧ ma̧ȩ oa ji̧dë ma ta̧rëdiätämi̧ cjiarä judi, jabechji̧ chjadëri̧ a̧dopadidibe Ütë tjamo̧ judi. Jabechji̧ Ütë tjamo̧ ja̧ ma̧ȩ oa tjamo̧ri̧ ta̧rëdiätämi̧ cjiamȩ judi, mairi̧ jurami̧ dari̧ cjo̧ro̧rea̧ dade, chji̧ goae tjamo̧ra̧ jo̧rȩtarea̧ damȩrȩ. —Ado mȩnȩro̧ gitori̧ jo̧rȩtarä judi, jabechji̧ ji̧dë duri oa a̧dë chjäte ma̧ chiadëri̧ cjiari̧ jo̧rȩtarea̧ dapanȩrȩ.

²² Ado danȩrȩ, o judiro̧ pio dibëiäpȩmo̧ goëdëri̧ cjia darä, jabechji̧ chjadëri̧ a̧doa̧ oa cjiapanȩrȩ Ütë tjamo̧ pio ju̧i̧iä. Tjamo̧ davä. Mȩnȩro̧ pio coaiäpȩmo̧ quëna̧ oaiä goëdëri̧ cjia daea̧ oa cjiarä judi, badë daea̧ oa cjiarä judi, dairäpȩ tutia̧ oa cjiami̧ dari̧ jiada̧ oa cjiarä judi, jabechji̧ chjadëri̧ a̧dopadidibe Ütë tjamo̧ judi. Jabechji̧ o judiro̧ pio coa quëna̧ oaiä ma̧ȩ goaedëti̧ra̧ ya̧ea̧ oa cjiarä judi, 'Aja̧, pumȩ chjadëdërenȩ Pumȩrȩ Ara̧ Tjamo̧ pio ju̧i̧ cho̧rë jämȩ tara' yo̧a̧ oa ta̧rëji̧ri̧rȩ cjo̧ro̧rä judi, jabechji̧ chjadëri̧ a̧dopadidibe Ütë tjamo̧ judi.

²³ Jabechji̧ o judiro̧ pio dibë ja̧di dari̧ conȩda̧ oaiä, jabechji̧ a̧dë chjäte ba chia tjamo̧ra̧ ba ano̧a̧ oa cjiapanȩrȩ a̧dëräpȩ ju̧ri̧. Pio ju̧i̧iä jabechji̧, chji̧ goae tjamo̧ra̧ jo̧rȩtaji̧ri̧rȩ a̧dë chjäte ma̧ chiadëri̧ cjiari̧ jo̧rȩtachji̧vä ichira̧ pio ju̧ri̧ra̧ goae tarari̧ bideji̧ri̧mi̧ dari̧, goae tarari̧ ëna̧diäji̧ri̧mi̧ dari̧. Ado danȩrȩ, peaja̧dimi̧ dari̧ conȩda̧ oa cjiarëreji̧ri̧dirȩ Ütërë ea jana̧ chjadüa̧ oa ni̧bäji̧ri̧ pio judiro̧. Tjamo̧ davä. Pio dibë ma̧i̧ dari̧ japaji̧ri̧ pio ji̧ri̧ ja̧ ütëti̧rea̧ pio judiro̧ peaja̧di dari̧ japarëreji̧ri̧diro̧jȩrȩ. Pio ju̧i̧ a̧dë jo̧rȩtadëtäreji̧ri̧nȩrȩ —yo̧mȩrȩ ni̧bä chjaorëremȩdejȩrȩ Jechu judi.

A̧dë chjäte uapai̧ darea̧ üdë acji cjatäpadejȩrȩ pumȩ ji̧ri̧

²⁴ Ado ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩrȩ Jechu judi: —Jabo mȩnȩro̧, chëre ji̧ra̧ tjamo̧ oa goaji̧ri̧ pio judiro̧, cjäri̧ manȩrȩ, a̧dë chjäte mai̧ da oa chjätäpanȩrȩ dibëa̧ pio ju̧i̧mo̧i̧ jo̧rȩta tara. Aja̧, dibëa̧ pio ju̧i̧mo̧i̧ jo̧rȩta tara, mȩnȩro̧, 'jaeboquëda, ca̧ chëre pio ju̧i̧iä ji̧dë ma chjadëri̧ cjo̧ro̧rea̧ dapaquëda, jabechji̧ jabëdiärea̧mi̧dëri̧ cjo̧ro̧paquëda' quëna̧ jo̧rȩta tara, jabechji̧ a̧dë chjäte mai̧ da oa chjätäpanȩrȩ. Chja jabechji̧de ado ja̧di, pio yoa chirirämo̧ ma̧ chiadëri̧ cjiari̧ jo̧rȩtarea̧ dapanȩrȩ. Jabo ji̧dë duri oa ma̧ chiadëri̧ cjiari̧ jo̧rȩtarea̧ dadëpanȩrȩ —yo̧a̧dejȩrȩ—.

²⁵ Ado mȩnȩro̧, pio yaba̧mȩ oa ji̧dë ma mairi̧ jurami̧ dari̧ cjo̧ro̧ji̧ri̧ pio judiro̧, 'jabechji̧ jabëdiärea̧ decjiari̧ cjo̧ro̧mȩquëda' quëna̧ji̧ri̧ pio judiro̧, cjäri̧ manȩrȩ, a̧dë chjäte chjai̧dë pio ju̧i̧ chjätäpanȩrȩ. Tjamo̧ davä. Ta̧mȩcho̧ ja̧boji̧ri̧mi̧ dari̧ cjiadiäpanȩrȩ, dami̧ti̧ oa jabëdiäji̧ri̧rȩ —yo̧a̧dejȩrȩ—. Ado yaba̧mȩ yoaiä airi̧ cjia airi̧ cjia cjo̧ro̧mi̧ dari̧ cjo̧ro̧ji̧ri̧ pio judiro̧, cjäri̧ manȩrȩ, a̧dë chjäte chjai̧dë oa chjätäpanȩrȩ. Tjamo̧ davä. Mȩnȩro̧ ji̧dë ma airi̧ cjia airi̧ cjia cjo̧ro̧mi̧ dari̧ cjo̧ro̧rërea̧ ji̧, jabechji̧ a̧dë chjäte gitori̧ jo̧rȩtaji̧ri̧rȩ ano̧ mire cjo̧ro̧panȩrȩ, ana̧ri̧ ejaro cjiaji̧ri̧rȩ.

²⁶ —Danȩrȩ, pio mȩnȩro̧ a̧ra̧ano̧ji̧ri̧ pio judiro̧, ¿yö̧ta dari̧ jo̧rȩtanȩrȩ? Yö̧ta dari̧dë, jabechji̧ pumȩ judiro̧ pio dibë chjiari chjacjiamȩri̧ ni̧bätä eaji̧ri̧rȩ a̧ra̧ano̧nȩrȩ. Ado danȩrȩ, mȩnȩro̧ dabadëchea oa, chjadëri̧ yo̧requededibe. Pumȩ judiro̧ pio jibë chjiari chjacjiamȩri̧ ni̧bätä eaji̧ri̧rȩ a̧ra̧ano̧ji̧ri̧ pio judiro̧, jabechji̧ oëra̧ a̧ra̧ano̧ji̧ri̧ pio judiro̧dirȩ. Ado peaja̧dirëreji̧ri̧dirȩ no̧mȩ cjo̧ro̧rëreji̧ri̧ judiro̧, Ütërë ea jana̧ chjadüa̧ oa ni̧bäji̧ri̧cji̧ quëna̧ japarëreji̧ri̧ pio judiro̧. Jabechji̧ o judiro̧ pio jibë chjiari ji̧dë ma chjacjiamȩri̧ ni̧bätä ea marëreji̧ri̧diro̧jȩrȩ. Ado dibëa̧ ütëti̧rea̧ judiro̧ pio ji̧ri̧ chjiari na̧e chiatärea̧ ji̧, chjacjiamȩri̧ ni̧bärëreji̧ri̧diro̧jȩrȩ jiro ma̧ȩ chjádë yürüji̧ri̧ pio ji̧ri̧. Jabo danȩrȩ, mȩnȩro̧ oëra̧ a̧ra̧ano̧ji̧ri̧ pio judiro̧ a̧dë chjäte ma̧i̧ da oa chjätäpanȩrȩ. Ado pio ju̧i̧iä peaja̧di dari̧ japapadiibe. Jabechji̧ a̧dë chjäte uapai̧ darea̧ üdë acji cjatäpadidibe pio dibë —yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.

Ea tjamo̧täreji̧ri̧rea̧ro̧jȩrȩ ibë eadëji̧ri̧ pio ji̧ri̧

²⁷ Ado ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ pumȩ ji̧ri̧ Jechu judi: —Jabo pio coa tjamo̧ri̧ ta̧rëdiätämi̧ cjiaji̧ri̧ pio ji̧ri̧iäpȩmo̧ ja̧di ta̧rëri̧ yo̧requededibe —yo̧a̧dejȩrȩ—. Danȩrȩ, dibë eadëji̧ri̧ pio ji̧ri̧bo eaji̧ri̧rȩ cjo̧ro̧chji̧jȩrȩ. Jabechji̧ chjadëri̧ japachji̧jȩrȩ dibë goëdëri̧ cjia daji̧ri̧ pio ji̧ri̧.

²⁸ Ado eami̧ pumȩ üdë mȩa ërecjiamȩrȩ irä a̧ra̧a̧ra̧ jiärä judi, Ütë tjamo̧ ja̧ ërecjia̧ üdë pio mȩaiäpȩmo̧ acji cjatätä eamȩrȩ a̧ra̧a̧ra̧ jiärä judi, jabechji̧ Ütë tjamo̧ pio ju̧i̧iä goë cjo̧dëchji̧vä pio ju̧i̧ chjiari, judi pio ju̧i̧iäpȩmo̧ chjadëri̧ japatä. Ado dibë conȩdaji̧ri̧ pio ji̧ri̧ chjiari goë cjo̧dëchji̧vä peaja̧di.

²⁹ Ado eami̧ pumȩ üdë dibëa̧ chama̧cho oa bide cjaeärä judi, jabechji̧ ano̧ mire ja̧ȩpë yürüchji̧jo̧ȩ ca̧ȩta̧ra̧rimȩ ja̧ chamachobo cjae bidepea̧ oa. Ado eami̧ üdë dibëa̧ dai oa ina̧rea̧ oa baë mitërä judi, jabechji̧ mitërea̧ yürüjo̧ȩ. Ado pio ju̧i̧ uëri dibëa̧ chjibobo mitërea̧ yürüjo̧ȩ.

³⁰ Jabechji̧ eami̧ pumȩ üdë pio mȩaiä eami̧ oa cjo̧dërä judi, jabechji̧ yürüchji̧jo̧ȩ. Ado eami̧ pumȩ üdë dibëa̧ pio ju̧i̧ baë mitërä judi, jabechji̧ ado chjereno̧ yürüpea̧ oa cjo̧dëdëchji̧jo̧ȩ. Chja jabechji̧ dibëa̧ pio ju̧i̧ goamȩrȩ cjo̧ro̧täde.

³¹ Ado danȩrȩ, ¿yö̧ta dari̧ japatä eanȩro̧jȩrȩ dibëa̧ pumȩ ji̧ri̧ pio dibëiäpȩmo̧? Yö̧ta dari̧dë, jabechji̧ pio dibëiäpȩmo̧ chjadëri̧ japatä ea jirorenȩro̧jȩrȩ. Ado judiro̧ pio dibëiäpȩmo̧ chjadëri̧ japatä earä judi, peaja̧di chjadëri̧ japatäreji̧ri̧renȩro̧jȩrȩ pio ji̧ri̧iäpȩmo̧ —yo̧mȩrȩ ni̧bä chjaorëremȩdejȩrȩ.

³² Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ pumȩ ji̧ri̧ Jechu judi: —Danȩrȩ, mȩnȩro̧ pio dibë eaji̧ri̧ pio ji̧ri̧iäpȩmo̧ maea oa earä judi, ¿tjana̧ ju̧i̧iä 'chjadëri̧ na̧rȩdiro̧da' quëna̧ jo̧rȩtaji̧ri̧rȩ datäreji̧ri̧diro̧dibe pumȩ judiro̧? Chjao ma ja̧didë. Peaja̧di dari̧ japa maeadirȩ Ütë tjamo̧ ju̧i̧ jiadaji̧ri̧ judiro̧. Peaja̧di eadiro̧jȩrȩ pio jibëiäpȩmo̧ eaji̧ri̧ pio ji̧ri̧.

³³ Ado danȩrȩ, pio yoa ma̧ȩbo iëno̧ë ta̧rërequededibe. Mȩnȩro̧ chjadëri̧ japarä judi, pio dibëiäpȩmo̧ chjadëri̧ japaji̧ri̧ pio ji̧ri̧iäpȩmo̧ maea oa chjadëri̧ japarä judi, ¿tjana̧ ju̧i̧iä 'chjadëri̧ na̧rȩdiro̧da' quëna̧ jo̧rȩtaji̧ri̧rȩ datäreji̧ri̧diro̧dibe pumȩ judiro̧? Peaja̧di dari̧ japa maeadirȩ Ütë tjamo̧ ju̧i̧ jiadaji̧ri̧ judiro̧. Peaja̧di chjadëri̧ japadiro̧jȩrȩ pio jibëiäpȩmo̧ chjadëri̧ japaji̧ri̧ pio ji̧ri̧iäpȩmo̧. Ja̧di tara yo̧requededibe. Mȩnȩro̧ pio ji̧ri̧iäpȩmo̧ maea oa chjadëri̧ ba dëbë japarä, pio dibëiäpȩmo̧ chjadëri̧ japaji̧ri̧ pio ji̧ri̧iäpȩmo̧ maea oa chjadëri̧ japarä judi, 'jabechji̧ judiro̧ ja̧di dari̧ japea̧ ba oa ba ano̧pea̧ chiaquiji̧ri̧da' quëna̧ jo̧rȩtamȩrȩ dadëpadidibe Ütë tjamo̧ judi.

³⁴ Ado mȩnȩro̧ pio ji̧ri̧iäpȩmo̧ ma chëre oa eoparä judi, pio dibë ado chjereno̧ chjadëri̧ ba ano̧rea̧ chiaji̧ri̧ pio ji̧ri̧iäpȩmo̧ ma eoparä judi, ¿tjana̧ ju̧i̧iä chjadëri̧ japadiro̧da' quëna̧ jo̧rȩtamȩrȩ datäremȩdidibe Ütë tjamo̧ judi? ¿Tjana̧ ju̧i̧iä ba ano̧täremȩdidibe mȩnȩro̧ ja̧di dari̧ japea̧ ba oa? Peaja̧di dari̧ japadirȩ Ütë tjamo̧ ju̧i̧ jiadaji̧ri̧ judiro̧. Peaja̧di dari̧ eopadiro̧jȩrȩ pio jibëiäpȩmo̧ ado chjereno̧ chjadëri̧ ba ano̧rea̧ chiaji̧ri̧ pio ji̧ri̧. Cjäri̧ madidibe ca̧ pumȩ, Ütë tjamo̧ ja̧ pumȩdë pio judiro̧ cjo̧ro̧mi̧ dari̧ cjo̧ro̧a̧ ba oa ba ano̧dëpadidibe.

³⁵ Jabechji̧ tjaoëpai̧ dari̧ cjo̧ro̧pea̧de. Jabechji̧ tjamo̧ri̧ eachji̧jȩrȩ dibë eadëji̧ri̧ pio ji̧ri̧. Aja̧, yadë maeara̧ eachji̧jȩrȩ. Jabechji̧ chjadëri̧ japachji̧jȩrȩ. Ado eopachji̧jȩrȩ peaja̧di. 'Jabechji̧ ado chjereno̧ chjadëri̧ ba ano̧padicoada' quëna̧dëji̧ri̧rȩ eopachji̧jȩrȩ. Jabechji̧ mȩnȩro̧ ja̧di dari̧ japea̧ oaiä, a̧dë chjäte ji̧ra̧ra̧ pio ju̧ri̧ra̧ ba ano̧a̧ oa cjiapanȩrȩ a̧dëräpȩ ju̧ri̧. Tjamo̧ davä. Mȩnȩro̧ a̧dë chjäte Ütë pio ju̧i̧ ja̧ u̧ri̧mi̧ dari̧ cjo̧ro̧a̧ oaiä, dibë eadëji̧ri̧ pio ji̧ri̧ chjadëri̧ a̧doa̧ oaiä, jabechji̧ a̧dë chjäte Ütë pio judi japami̧ dari̧ japapanȩrȩ. ¿Ado yö̧ta dari̧ japade Ütë tjamo̧ judi? Yö̧ta dari̧dë, jabechji̧ chjai̧dëri̧ japaji̧ri̧ pio ji̧ri̧iäpȩmo̧bo chjadëri̧ japadejȩrȩ. 'Ütë tjamo̧ judi chjadëri̧ yürüa̧dicoada' quëna̧dëji̧ri̧ pio ji̧ri̧iäpȩmo̧bo chjadëri̧ japadejȩrȩ. Tjamo̧ davä. Pio ji̧ri̧iäpȩmo̧bo chjamȩrȩ yürüdejȩrȩ Ütë tjamo̧ judi. Ado mȩnȩro̧ dibë eadëji̧ri̧ pio ji̧ri̧ chjadëri̧ japarä, jabechji̧ a̧dë chjäte Ütë pio judimi̧ dari̧ japanȩrȩ, pio ju̧i̧ ja̧ u̧ri̧mi̧ daji̧ri̧rȩ.

³⁶ Ado pio ju̧i̧iä yo̧requededibe. Ibëa̧ Ama̧i̧ judi pumȩ pio ji̧ri̧iäpȩmo̧ cjäri̧ri̧ cjia dami̧ dari̧ cjäri̧ri̧ cjia dapea̧ chiarenȩro̧jȩrȩ peaja̧di —yo̧mȩrȩ ni̧bä chjaorëremȩdejȩrȩ Jechu judi.

‘Pio jiro pumȩ judiro̧ chjai̧dëdiro̧da’ quëna̧ji̧ri̧rȩ aechide yo̧dëpea̧de yo̧mȩrȩ ni̧bä chjaorëremȩdejȩrȩ Jechu judi

³⁷ Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ pumȩ ji̧ri̧, ja̧di ta̧rëri̧ yo̧mȩrȩ: —Danȩrȩ, dibëa̧ pumȩ pio ji̧ri̧ badë daji̧ri̧rȩ chjai̧dëri̧ ni̧bädëchji̧vä pio ji̧ri̧ chjiari, Ütë tjamo̧ judi pio dibë ütarë bape chjaochea oa. 'Jabechji̧ chjai̧dëdiro̧da, bape chjaopea̧ maeadiro̧da' quëna̧ dadëchji̧jȩrȩ, Ütë tjamo̧ judi pio dibë chjiari peaja̧dimi̧ dari̧ japachea oa. Ado pio dibëiäpȩmo̧ chjai̧dëri̧ japea̧ ji̧ri̧ pio ji̧ri̧ duridëparȩmi̧ dari̧ japachji̧jȩrȩ, Ütë tjamo̧ judi pio dibë peaja̧di duridëparȩmi̧ dari̧ japapea̧ oa.

³⁸ Ado cjäri̧ ja̧boji̧ri̧ pio ji̧ri̧iäpȩmo̧ chjadëri̧ yürüchji̧jȩrȩ. Jabechji̧ Ütë tjamo̧ judi pio dibëiäpȩmo̧ chjadëri̧ yürüpea̧ oa, chjadëri̧ yürüchji̧jȩrȩ. Jabechji̧ mȩnȩro̧ o ji̧ri̧iäpȩmo̧ chjadëri̧ yürüa̧ oaiä, chacoro cö̧a̧ chjaomi̧ dari̧ yürüpadidibe Ütë tjamo̧ judi pio dibëa̧ pio ju̧i̧. Tjamo̧ davä. Tjuri cjiari̧ cö̧a̧mi̧ dari̧, ichira̧ chjuari̧ acji cjaeä cö̧a̧mi̧ dari̧ yürüpadidibe, mu̧i̧ mu̧i̧ gua cö̧a̧mi̧ dari̧ japamȩrȩ, mu̧i̧ mu̧i̧ goë bira tänȩmi̧ dari̧ japamȩrȩ. Ado a̧dë chjäte ji̧ra̧ oaiä, jabechji̧ daburäpȩmo̧ gu̧romi̧ dari̧ yürüpadidibe. Tjamo̧ davä ca̧ pumȩ, ja̧di dari̧ yürüpadidibe Ütë tjamo̧ judi mȩnȩro̧ o ji̧ri̧iäpȩmo̧ chjadëri̧ yürüa̧ oaiä. Jabechji̧ mȩnȩro̧ o ji̧ri̧iäpȩmo̧ yürüa̧ pio ju̧i̧ ütarë da ëte, yürüpadidibe pio dibëiäpȩmo̧. Ja̧dirä judi, mȩnȩro̧ o ji̧ri̧iäpȩmo̧ nȩmȩpadëji̧ri̧rȩ yürürä judi, peaja̧dimi̧ dari̧ yürüpadidibe Ütë tjamo̧ judi —yo̧mȩrȩ ni̧bä chjaorëremȩdejȩrȩ Jechu judi pumȩ ji̧ri̧.

³⁹ Ja̧dëa ji̧ Jechu judi na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaorëremȩdejȩrȩ judiro̧ da cotoji̧ri̧ pio judiro̧mi̧ dari̧ cjiachea oa, tjamo̧ yo̧ji̧ri̧ judio pio judiro̧mi̧ dari̧ cjiachea oa. —Danȩrȩ, da cotomȩ judi ado cja̧rȩmo̧ da cotomȩ pio ju̧i̧ yabo dariä baärea̧mi̧dëde. Jabechji̧ da cotomȩ pio judi ado cja̧rȩmo̧ da cotomȩ pio ju̧i̧ yabo dariä baärä judi, cjäri̧ madirȩ, yo̧a̧ri̧borë puërä choë cjatäpai̧ datäreji̧ri̧dirȩ. Danȩrȩ, pio cüdërequede dibë a̧ra̧ano̧mȩ judi. Pio coamo̧i̧ cho̧rë jana̧täreji̧ri̧renȩro̧coe.

⁴⁰ Danȩrȩ ca̧ pumȩ, dabanȩrȩ dabapaji̧ri̧ pio ji̧ri̧ chjiari. Jabechji̧ pio jibë a̧ra̧ano̧mȩ pio ju̧i̧iä ji̧dë u̧i̧ dabadë madirȩ, jabo a̧ra̧ano̧mȩ pio judi ji̧dë u̧i̧ dabamȩde. Jabo judiro̧ a̧ra̧ano̧mȩ pio ju̧i̧iä chjö̧na̧i̧ oa dabaji̧ri̧pea̧rä, jabechji̧ a̧ra̧ano̧mȩ pio judimi̧ dari̧ a̧ra̧ano̧rea̧ dapadirȩ. Ado pio ju̧i̧iä jabechji̧, pio coaiämo̧i̧ dabapatäreji̧ri̧nȩrȩ da cotoji̧ri̧ pio judiro̧mi̧ dari̧ cjiachea oa —yo̧mȩrȩ ni̧bä chjaorëremȩdejȩrȩ.

⁴¹ Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Danȩrȩ ca̧ pumȩ, ¿tjana̧ ju̧i̧iä ana̧ri̧ jo̧rȩtanȩrȩ dibëa̧ omȩ judi chjai̧dëri̧ japea̧ pio ju̧i̧ chjiari, jabo dibëa̧ chjai̧dë pio ju̧i̧ a̧dë jo̧rȩte chjaonȩrȩ? Jabechji̧, mȩnȩro̧ ma̧i̧ da chjai̧dë oa japea̧ pio ju̧i̧ chjiari chjadëri̧ jëdano̧tärea̧ ji̧, japadë manȩrȩ, jabo dibëa̧ omȩ judi tocoi̧mi̧ oëra̧diäa̧ pio ju̧i̧iä ana̧ri̧ jo̧rȩtanȩrȩ.

⁴² Jabechji̧ mȩnȩro̧ ana̧ri̧ oëra̧diäa̧ pio ju̧i̧iä, ado mȩnȩro̧ chjadëri̧ jëdano̧dëa̧ oaiä, jabechji̧ dibëa̧ omȩ pio ju̧i̧ tjamo̧ri̧ a̧dorea̧mi̧dërenȩro̧jo̧ȩ. Tjamo̧ davä, dibëa̧ omȩ pio ju̧i̧ yo̧rea̧mi̧dëde. "Danȩ omȩ, mȩnȩ no̧dë oa jämi̧ dari̧ cjo̧ro̧chea oa, jabechji̧ pio mȩa chjadëri̧ a̧dorea̧ yürücoe" yo̧rea̧mi̧dëde. Cjäri̧ manȩrȩ, coëma cjiari̧ cjo̧ro̧cji̧ quëna̧ japaji̧ri̧nȩrȩ. Jabechji̧ mȩnȩro̧ dibëa̧ omȩ pio ju̧i̧ tjamo̧ri̧ a̧dotämi̧ cjiarä judi, judi tocoi̧mi̧ oëra̧diäa̧ pio ju̧i̧ chjiari tjamo̧ri̧ a̧dotämi̧ cjiarä judi, jabechji̧ mȩnȩro̧ ana̧ri̧ oëra̧diäa̧ pio ju̧i̧ chjadëri̧ jëdano̧täreji̧ri̧nȩrȩ yabochja. Ado ja̧dëa ji̧ mȩnȩro̧ chjai̧dëri̧ japea̧ pio ju̧i̧ chjiari chjadëri̧ jëdano̧ ëte, dëdë, dibëa̧ omȩ pio ju̧i̧ a̧dopai̧ darenȩro̧jo̧ȩ peaja̧di —yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.

Jurarea̧ to pio ju̧i̧ chjiari dabarea̧ darea̧rȩ jurarea̧ pio ju̧i̧ ütarë daea̧ oaiä

⁴³ Ado Jechu judi cjiadiädëmȩrȩ ja̧di ta̧rëri̧ yo̧mȩrȩ a̧de ni̧bä chjaorëremȩdejȩrȩ pume ji̧ri̧ na̧rȩrea̧ ma̧ȩmi̧ dara̧: —Danȩrȩ, eami̧ to üdë chjadërä judi, jabechji̧ jurarea̧ chjadëdë oa chiarea̧mi̧dëde. Ado eami̧ to üdë chjadëdërä judi, jabechji̧ jurarea̧ chjadë oa chiarea̧mi̧dëde. Jabechji̧ teracaba jurarea̧ maea oa chiade.

⁴⁴ Ado pio ju̧i̧iä jurarea̧ pio ju̧i̧ ütarë daea̧ oaiä, 'Aja̧, pio jiro todida' quëna̧ dabarea̧ darea̧rȩ. Jabechji̧ igera quȩmȩ jurarea̧ pio ju̧i̧ boatämi̧ cjiamȩ pio judi, jabechji̧ oro oro pio ju̧i̧iä täarea̧mi̧dëde jabo igera to pio ju̧i̧iämo̧i̧ täarea̧mi̧ dade. Ado peaja̧dide uva pio ju̧i̧iä. Uva quȩmȩ jurarea̧ oa täapamȩ judi, jabechji̧ oro oro pio ju̧i̧iä täadëpade, jabo uva to pio ju̧i̧iämo̧i̧ täarea̧ dapade. Pio ju̧i̧ dabanȩrȩ.

⁴⁵ Ado danȩrȩ, —yo̧a̧dejȩrȩ—, peaja̧dide pumȩ pio ji̧ri̧iä. Jabechji̧ pumȩ chjadë judi jibëa̧ chji̧ra̧ chjadë pio ju̧i̧ jo̧rȩtariä cjo̧ro̧a̧ oaiä, jabechji̧ chjadë pio judi tjuri cjiami̧ dari̧ cjiade jibëa̧ chji̧ oaiä. Ado pio ju̧i̧iä judi ni̧bärä, jabechji̧ jibëa̧ chji̧ri pio judiri cjitëmȩ pio ju̧i̧ ni̧bäde chjadë pio ju̧i̧mo̧i̧. Jabo pumȩ chjai̧dë üdë, chjai̧dëri̧ ni̧bäde. Jabechji̧ jibëa̧ chji̧ra̧ chjai̧dë pio ju̧i̧ jo̧rȩtariä cjo̧ro̧a̧ oaiä, chjadëdë pio judi tjuri cjiami̧ dari̧ cjiade jibëa̧ chji̧ pio oaiä. Ado pio ju̧i̧iä judi ni̧bärä, jabechji̧ jibëa̧ chji̧ri pio judiri cjitëmȩ pio ju̧i̧ ni̧bäde chjadëdë pio ju̧i̧. Jabechji̧ eami̧ pumȩ üdë jënȩ jo̧rȩta̧ pio ju̧i̧ japamȩde. Jënȩ jo̧rȩta̧ pio ju̧i̧ ni̧bämȩde —yo̧mȩrȩ ni̧bä chjaorëremȩdejȩrȩ Jechu judi.

Bë oa eami̧räpȩ cji̧dädëpea̧de jabo chjua tjamo̧ro cji̧dämi̧ japapea̧de yo̧mȩrȩ a̧ra̧ano̧rëremȩde Jechu judi

⁴⁶ Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Danȩrȩ, eami̧ pumȩ judi, jabechji̧ jibëa̧ ano̧mȩ pio ju̧i̧ ja̧ ma̧ȩrä chjadëri̧ cjo̧ro̧täremȩde. Jabo danȩrȩ, ¿tjana̧ ju̧i̧iä Ano̧mȩ yo̧renȩro̧coe coa? Jabechji̧ mȩnȩro̧ pio coaiäpȩmo̧ Ano̧mȩ yo̧rea̧mi̧dërenȩro̧coe ca̧ ma̧ȩ oa ta̧rëdiädë tara.

⁴⁷ Jabo danȩrȩ, ca̧ ma̧ȩ oa ta̧rë ëte ta̧rëdiämȩ pio ju̧i̧ chjiari dabadëchea oa, jabechji̧ na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaoparequededibe —yo̧a̧dejȩrȩ—.

⁴⁸ Danȩrȩ, ca̧ ma̧ȩ oa ta̧rë ëte ta̧rëdiämȩ pio judi, jabechji̧ jibëa̧ bë oa cji̧dämȩmi̧ dade. Jabechji̧ dabu uëmo̧i̧ cji̧dädëdejȩ, jabo urëdi oa jäe ëte, ta̧dë urëdi oa jäe ëte are cji̧dädejȩ taru a̧rȩmȩ chjadërä. Ado jibëa̧ bë oa cji̧däa̧ goa̧rä, jabechji̧ chjua tjamo̧ri̧ cjiade. Ado goae tarari̧ pupuripea̧räbo, ituri̧ cjüea̧räbo, dürü chjö̧na̧i̧rȩ cjücjürü tjamo̧pe baga̧räbo, jabechji̧ chjua tjamo̧ri̧ cjiade. Ca̧mȩ üdë goae tarari̧ acji jana̧räbo, ma̧i̧ da ui gö̧ma̧ boi̧dërë acji jana̧räbo, jabechji̧ chjua tjamo̧ri̧ cjiade, jaejaeape järea̧ decjiari̧. Jabechji̧ chjaodëri̧ arëgoëa̧ oa cjiatärea̧ ji̧, chjaodëri̧ arë aea̧ oa cjiatärea̧ ji̧, jabechji̧ chjuari̧ cjiade bë üdë ta̧dë pio ju̧i̧iä cjare ëte cji̧däa̧ oa cjia oaiä.

⁴⁹ Jabo ca̧ ma̧ȩ oa ta̧rë ëte ta̧rëdiädëmȩ pio judi, jabechji̧ jibëa̧ bë oa dabu nȩgȩ maräpȩ cji̧dämȩmi̧ dade, taru a̧rȩmȩ decjiarä. Aja̧, pio jiro üi̧ üdë jibëa̧ bë oa dabu nȩgȩrä cji̧dädejȩ. Ado bë üdë cji̧däa̧ oa goa̧rä, jabechji̧ goae tarari̧ pupuripea̧dejȩ. Ado ituri̧ cjüea̧dejȩ peaja̧di, dürü chjö̧na̧i̧rȩ cjücjürü tjamo̧pe bagarea̧mi̧ dari̧. Jabo cjäri̧ madejȩ, jibëa̧ bë üdë chjadëri̧ cji̧däa̧ oa cjiaräbo, jabechji̧ chjuari̧ cjiadiädëa̧de. Jabechji̧ ca̧mȩ üdë goae tarari̧ ca̧ea̧ oaiä, ma̧i̧ da gö̧ma̧ üdë bëräpȩmo̧ acji jana̧ oaiä, jabechji̧ cjiadiädëa̧de. Jabechji̧ chjaodëri̧ areia̧ oa cjiadiäa̧de. Jabechji̧ taru a̧rȩmȩ chjadërä cji̧däa̧ oa cjiatärea̧ ji̧, chjadërä cji̧däa̧ oa cjiadëa̧de. Ado pio ju̧i̧iä pjatë mape baga̧de bë üdë. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ Jechu judi jibëa̧ ma̧ȩ oa ta̧rë ëte ta̧rëdiämȩ pio ju̧i̧ chjiari, ado jibëa̧ ma̧ȩ oa ta̧rë ëte ta̧rëdiädëmȩ pio ju̧i̧ chjiari.