Lucas 5 - Biblia Pume

Jechu judi ëna̧diärëremȩdejȩrȩ jibëa̧ jadü ji̧ri̧ pio jȩa cho̧rë jätä

¹ Ado cja̧rȩmo̧ doremȩrä, Jechu judi Genachare quȩmȩ tja yuroro cjiamȩrȩ a̧ra̧ano̧rërea̧ ji̧, pumȩ bubarë gi̧de ariä baärëreji̧ri̧dirȩ Jechu ja̧ yuro oa, Ütë tjamo̧ ja̧ ma̧ȩ oa tjamo̧ri̧ ta̧rëtämi̧ cjiaji̧ri̧rȩ.

² Ado Jechu judi ui yuroro pjurëmȩ oa darëremȩdejȩ yo̧a̧ri̧ chara oa, pumȩ chiadëmȩ chara oa. Jabechji̧ cho̧ mu̧i̧reji̧ri̧ pio judiro̧ a̧dë jäa̧diro̧jo̧ȩ jibëa̧ chara oa jibëa̧ cho̧ mu̧i̧rea̧ bäre pio ju̧i̧ chjadëri̧ joapea̧ oa. Ado chara üdë cja̧rȩmȩrȩ Chimo̧ ja̧rëremȩde.

³ Ado Jechu judi pio ju̧i̧ ja̧ chararä buamȩrȩ yo̧rëremȩdejȩ Chimo̧ ju̧i̧ chara oa jachi chjaräpȩ ano̧ mire pjurë tänȩtä. Ado pio ju̧i̧iä jabechji̧, chararä chamȩrȩ a̧ra̧ano̧rëremȩdejȩrȩ pumȩ buba oa.

⁴ Ado ja̧dëa ji̧ pumȩ ji̧ri̧ a̧ra̧ano̧a̧ duri oa, Jechu judi yo̧a̧dejȩ Chimo̧ ju̧i̧: —Danȩ, cjücjürü tjamo̧räpȩ ano̧ mire jävä yaba̧ mȩnȩ pio ju̧ri̧pȩ ano̧ mire aeno̧pea̧ oa dibëa̧ cho̧ mu̧i̧rea̧ bäre oa, mȩnȩ pio idëpȩ cho̧ chjadëri̧ mu̧i̧pea̧ oa.

⁵ Jabo Chimo̧ judi dëbë yo̧a̧dejȩ: —Danȩ Ano̧mȩ, gȩnȩ yoa ana̧ri̧ mu̧i̧ chjaoreji̧ri̧rea̧rȩ, jabo cjäri̧ marea̧rȩ, cho̧ mu̧i̧dë mareji̧ri̧rea̧rȩ. Jabo mȩnȩ coa yo̧ tara, jabechji̧ ado chjereno̧ jäparequede cho̧ mu̧i̧rea̧ bäre oa ado aeno̧pea̧ oa —dëbë yo̧a̧dejȩ.

⁶ Ja̧dëa ji̧ judiro̧ cjücjüroräpȩ go̧düdäräa̧rä, ado jibëa̧ mu̧i̧rea̧ bäre oa ado chjereno̧ aeno̧a̧rä, cjäri̧ made, a̧dë chjäte ji̧ra̧ri̧ cjiamȩ cho̧ üdë mitëa̧ oaiä, quiquiri chiapea̧ ji̧ taruparëremȩde bäre üdë.

⁷ Jabo jibëa̧ jadü judiro̧ ado cja̧rȩmo̧ chararäji̧ri̧ pio ji̧ri̧iäpȩmo̧ ëna̧diäa̧ oaiä, jabechji̧ chjaodëri̧ jäȩno̧a̧dirȩ chjadëri̧ a̧dopea̧ oa. Jabo cjäri̧ made jabo. Cho̧ ji̧ra̧ tjamo̧ oa mu̧i̧a̧ oaiä, jabechji̧ yo̧a̧ri̧ chara üdë chami̧pai̧ dari̧ cjiarëremȩde.

^8-10 Ado Chimo̧ Pedro judi cho̧ ji̧ra̧ tjamo̧ oa daea̧ oaiä, jabechji̧ ana̧ tjamo̧ri̧ jo̧rȩtamȩpea̧de, pio jȩa nö̧ta ëba cjiaji̧ri̧ pio judiro̧borë. Tjamo̧ davä. Jibëa̧ jadü judiro̧, Santiago pio judi, ado Juan pio judi, Chebedeo quȩmȩ pio ju̧i̧ ja̧ u̧ri̧ pio judiro̧ peaja̧di ana̧ tjamo̧ri̧ jo̧rȩtaji̧ri̧pea̧dirȩ. Jabechji̧ Pedro judi cho̧ ji̧ra̧ oa daea̧ oaiä, 'jabo cjäri̧ maquëda, a̧dë chjäte jauëchjamȩdida, Ütë tjamo̧ ja̧ jauëchjara̧ japamȩdida, jabo cüdë pumȩ chjai̧dëquëda' quëna̧ jo̧rȩta̧ oaiä, jabechji̧ idëri̧ cjiapea̧ bagamȩrȩ Jechu ja̧ yaboräpȩ cjatärëremȩde, ju chatura̧ cjiadiäa̧mȩrȩ. Ado ja̧di ta̧rëri̧ yo̧a̧dejȩ: —Danȩ Ano̧mȩ, chja jabechji̧ a̧dë jachipadäräcoe. Jabechji̧ chjai̧dë oa jape chjaomȩrȩ cjo̧ro̧requede cüdë. Pio mȩa nö̧ta tjamo̧ri̧ ëba cjiarea̧mi̧dërequedemȩ —yo̧a̧dejȩ. Jabo Jechu judi dëbë yo̧a̧dejȩ Chimo̧ pio ju̧i̧: —Danȩ, uapadëvä —yo̧a̧dejȩ—. Pio yaba̧ domȩri ja̧ mȩnȩ cho̧ maea oa mu̧i̧rërea̧ ji̧, jabechji̧ pumȩ pio ji̧ri̧ ano̧ mire mu̧i̧riä tai̧mi̧ dari̧ japa tänȩparequedemȩ —yo̧a̧dejȩ.

¹¹ Ado judiro̧ tja yuroro pea go̧düdäräa̧rä, jabechji̧ jibëa̧remȩ chjö̧na̧i̧ oa a̧dë baäji̧ri̧rȩ cho̧rë järëreji̧ri̧diro̧jo̧ȩ Jechu pio ju̧i̧.

Jechu judi chjaparȩrëremȩdejȩ ma̧i̧ da co chiamȩ ju̧i̧

¹² Ado cja̧rȩmo̧ doremȩrä, Jechu judi bë ma̧ri̧ boi̧chji̧rä tai̧rërea̧ ji̧, dëbëdiärëremȩdejȩ pumȩ ju̧i̧, ma̧i̧ da co chiamȩ pio ju̧i̧, jibëa̧ icjara nö̧tai̧ oa co chiamȩpea̧mȩ pio ju̧i̧. Ado pumȩ judi Jechu pio ju̧i̧ daea̧rä, ju chatura̧ tjätjäpë china̧därärëremȩde jibëa̧ daito oa daburäpȩ yuro. Ado pio jȩa chjaparȩtä eamȩrȩ ja̧di ta̧rëri̧ yo̧tarëremȩdejȩ: —Ano̧mȩ, mȩnȩ ca̧ co oa chjaparȩtämi̧ cjiarä judi, jabechji̧ chjaodëri̧ chjaparȩpai̧ darenȩque, co chja maeari̧ —yo̧a̧dejȩ.

¹³ Ado Jechu judi ichipe cjiamȩrȩ ga̧re tara̧dejȩ co chiamȩ ju̧i̧. Ado yo̧a̧dejȩ: —Aja̧, chjaparȩtämi̧ cjiarequedemȩ —yo̧a̧dejȩ—. Jabechji̧ chjapea̧ oa cjiavä. Ado pumȩ üdë chjaodëri̧ chjapea̧ oa cjiarëremȩde, i chjadë tjamo̧pe järea̧mi̧ dari̧.

¹⁴ Ado ja̧dëa ji̧ ja̧di ta̧rëri̧ yo̧a̧dejȩ Jechu judi: —Danȩ, cjapiri̧ cjiavä cüdë mȩa chjaparȩa̧ pio ju̧i̧ chjiari. Jabechji̧ eami̧ oa yo̧dë majȩrȩ, jabo tjamo̧i̧ jävä pumȩ pio ji̧ri̧ chjiari goë tuti ja̧bepamȩ pio ju̧i̧iäpȩ, pio judi chjadëri̧ ütarë dapea̧ oa, na̧ i chjadëpea̧mȩ pio ju̧i̧ chjadëri̧ ütarë dapea̧ oa. Ado danȩ, Moiche judi go̧ȩparërea̧mi̧ goa jätäremȩrenȩ gu̧na̧rea̧ mechjaräpȩ chjadëri̧ yürüpea̧ oa. Danȩ, ma̧i̧ da co chiaremȩ pio judi chjapea̧ oa cjiarä yürüpea̧ pio ju̧i̧ chjadëri̧ goa jäpea̧de, ütara̧mi̧ yürüpea̧de. Ado ja̧di dari̧ japea̧ oaiä, jabechji̧ chjadëri̧ na̧rȩemȩrenȩjȩrȩ pumȩ ji̧ri̧iäpȩmo̧, mȩnȩ chjadëri̧ chjapea̧ pio ju̧i̧ chjiari. Aja̧, jävä —yo̧a̧dejȩ Jechu judi.

¹⁵ Jabo Jechu judi pumȩ ju̧i̧ cjapiri̧ baätä yo̧a̧räbo, cjäri̧ made, cjapiri̧ baädërëremȩde, jabo Jechu judi pio jȩa chjaparȩa̧ pio ju̧i̧ chjiari ana̧ri̧ ni̧bä chjaorëremȩde. Ado pumȩ judiro̧ goë ta̧rëa̧ pio ju̧i̧iä ji̧dë u̧i̧ jo̧ȩra̧pe baärëremȩde Jechu pio ju̧i̧ chjiari ma̧ȩ üdë oëra̧ti̧ oa. Ado pio ju̧i̧iä pumȩ bubarë ta̧rera̧pea̧diro̧jo̧ȩ. Ado gito ja̧boji̧ri̧ pio judiro̧ go̧düdärä chjaorëreji̧ri̧dirȩ peaja̧di chjapea̧ oa cjiapea̧ oa.

¹⁶ Jabo pumȩ judiro̧ jana̧diä jana̧diä cjia̧räbo, jabechji̧ babui̧ra̧ jädiärëremȩde Jechu judi pumȩ decjiaräpȩ jibëa̧ma̧i̧ cjiapea̧ oa, Ütë tjamo̧ pio ju̧i̧ ni̧bäpea̧ oa.

Jechu judi chjaparȩrëremȩdejȩ ju chjererea̧ dadëmȩ pio ju̧i̧

¹⁷ Ado cja̧rȩmo̧ doremȩrä, Jechu judi pumȩ ja̧ bërä a̧ra̧ano̧a̧rä, pjaricheo judiro̧ pio ju̧i̧ ja̧ queri̧räpȩ dae charëreji̧ri̧diro̧jo̧ȩ, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë. Jabechji̧ pio jiro oari judiro̧ oëra̧ti̧ a̧rȩmȩ bë ma̧ri̧ri pio judiri go̧düdärärëreji̧ri̧dirȩ. Tjamo̧ davä. Garirea̧ quȩmȩ chiriri pio judiri, Jerucharȩ bë ma̧ri̧ri pio judiri, ado Judea quȩmȩ chiriri pio judiri go̧düdäräa̧dirȩ. Ado Jechu ja̧ queri̧räpȩ dae charëreji̧ri̧diro̧jo̧ȩ. Ado pio jiro japamitërä, Ano̧mȩ Ütë pio judi jibëa̧ jauëchja oa ana̧ri̧ yürürëremȩdejȩ Jechu ju̧i̧, judi pumȩ pio ji̧ri̧ chjadëri̧ chjaparȩrea̧mi̧ dari̧.

¹⁸ Ado pumȩ judiro̧ chjaodëri̧ ara go̧düdärärëreji̧ri̧diro̧jo̧ȩ tai̧dëmȩ pio ju̧i̧, ju chjererea̧ dadëmȩ pio ju̧i̧. Jibëa̧ tjae mo̧a̧rea̧rä ara jäji̧ri̧rȩ ara go̧düdäräa̧dirȩ. Ado bërä yu̧a̧tärea̧ ji̧, Jechu pio ju̧i̧iäpȩ chjadëri̧ ara yu̧a̧tärea̧ ji̧,

¹⁹ cjäri̧ madirȩ, pumȩ buba oaiä yu̧a̧rea̧ dadë marëreji̧ri̧dirȩ, pumȩ no̧i̧dërë tuti cjia̧ pio oaiä. Ado pio ju̧i̧iä jo̧ dairi pio judiri bua̧diro̧jo̧ȩ jo̧ uëräpȩ. Ado a̧rüa̧ cotori pio judiri cjürëri̧ japa ëte bira tänȩrëreji̧ri̧diro̧jo̧ȩ ju chjererea̧ dadëmȩ pio ju̧i̧ Jechu judi cjiamȩ dëbëräpȩ. Tjamo̧ davä. Jibëa̧ tjae mo̧a̧rea̧rä baramȩ oa uëri pio judiri bira tänȩa̧diro̧jo̧ȩ pumȩ buba tjoräpȩ, Jechu ja̧ yaboi̧räpȩ tjamo̧i̧.

²⁰ Ado Jechu judi bira tänȩji̧ri̧ pio ji̧ri̧ ja̧ chji̧rä cjacjarë damȩrȩ dabarëremȩde judiro̧ pio jȩaiäpȩmo̧ chjuari̧ quëna̧ pio ju̧i̧ chjiari, judiro̧, 'Aja̧, tai̧dëmȩ pio ju̧i̧ chjaodëri̧ chjaparȩpai̧ dadiji̧da’ quëna̧ pio ju̧i̧ chjiari. Ado pio ju̧i̧iä yo̧a̧dejȩ tai̧dëmȩ pio ju̧i̧: —Danȩ ca̧ pumȩ, mȩnȩ chjai̧dëri̧ japea̧ üdë duridëparȩa̧ oa cjiade —yo̧a̧dejȩ.

²¹ Jabo pjaricheo judiro̧ pio ju̧i̧ ta̧rëa̧ oaiä, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë pio jiro ma̧ȩ oa ta̧rëa̧ oaiä, goae tjamo̧dërëremȩdejȩrȩ. Ado ja̧di ta̧rëri̧ ni̧bäji̧ri̧pea̧dirȩ jibëa̧ dëbëti̧ra̧ chia: —Jabo cjäri̧ made pio yüdëje. Ütë tjamo̧ pio ju̧i̧iäpȩmo̧ chjai̧dëri̧ japamȩmi̧ dari̧ ni̧bäde. Jabechji̧ Ütë tjamo̧ pio judicji̧ quëna̧ japamȩmi̧ dari̧ ni̧bäde. Jabechji̧ Ütë tjamo̧ pio judimo̧rȩ chjai̧dë oa duridëparȩpai̧ dadejȩ. Jabo pio yodëje, cjäri̧ made, duridëparȩrea̧mi̧dëde. Jabo duridëparȩrea̧mi̧dëräbo, jabechji̧ duridëparȩmȩmi̧ dari̧ ni̧bämȩde. 'Yö̧ta dari̧ jo̧rȩtacjivadi, pio cüdëborë Ütë tjamo̧ pio judiquëda' quëna̧ jirode. Jaboti̧ri̧ ni̧bämȩde —yo̧ji̧ri̧pea̧dirȩ jibëa̧ dëbëti̧ra̧ chia.

²² Jabo Jechu judi dabarëremȩde judiro̧ pio jȩa chjiari jo̧rȩta̧ pio ju̧i̧ chjiari. Ado pio ju̧i̧iä ja̧di ta̧rëri̧ yo̧mȩrȩ iëno̧ë ta̧rëa̧jȩrȩ: —Danȩrȩ, ¿tjana̧ ju̧i̧iä ana̧ri̧ jo̧rȩtanȩrȩ cüdë yo̧a̧ pio ju̧i̧ chjiari? —iëno̧ë ta̧rëa̧dejȩrȩ—.

²³ Danȩrȩ, ¿tjana̧ tjamo̧de pio coaiä jamȩpai̧ da tjamo̧ üdë? Jabo tai̧dëmȩ judi chjai̧dëri̧ japea̧ pio ju̧i̧ duridëparȩpea̧ üdë, jabo tai̧dëmȩ pio ju̧i̧ chjaparȩpea̧ üdë. ¿Tjana̧ tjamo̧de pio coaiä jamȩpai̧ da tjamo̧ üdë? ¿Yö̧ta dari̧ jo̧rȩtanȩrȩ mȩnȩro̧? —iëno̧ë ta̧rëa̧dejȩrȩ—. Danȩrȩ, eami̧ pumȩ ja̧ chjai̧dë pio ju̧i̧ duridëparȩpea̧ üdë, dëdë, chjao tjamo̧de. Ado tai̧dai̧ damȩ pio ju̧i̧ chjaparȩpea̧ üdë peaja̧di chjao tjamo̧de. Ji̧mo̧ baäde. Jabechji̧ a̧dë chjäte jauëchjamȩ Ütë pio ju̧i̧iämo̧i̧ chjaparȩrea̧mi̧ dade tai̧dëmȩ judi. Ado peaja̧di a̧dë chjäte jauëchjamȩ Ütë pio ju̧i̧iämo̧i̧ duridëparȩa̧ oa cjiarea̧mi̧ dade.

²⁴ Ado yaba̧, mȩnȩro̧ pio coaiäpȩmo̧ coëma cjiari̧ jo̧rȩtapea̧ oa, jabechji̧ chjadëri̧ na̧rȩparequededibe —yo̧a̧dejȩrȩ—. 'Aja̧, Pumȩrȩ Ara̧ Tjamo̧ judi Ano̧mȩ pio judi tjamo̧dida, chjai̧dë pio ju̧i̧ duridëparȩrea̧ chiamȩdida, Ütë tjamo̧ pio judi yürüa̧ oa chjai̧dë oa duridëparȩrea̧ chiamȩ pio judidida, chiriräpȩti̧ oa cjo̧ro̧ji̧ri̧ pio ji̧ri̧ duridëparȩrea̧ chiamȩdida' quëna̧rea̧mi̧ dari̧ chjadëri̧ na̧rȩparequededibe —yo̧a̧dejȩrȩ Jechu judi. Ado ja̧di ta̧rëri̧ yo̧ ëte, Jechu judi yo̧a̧dejȩ tai̧dëmȩ pio ju̧i̧iäpȩmo̧: —Cjitëvä yaba̧. Na̧ tjae mo̧a̧rea̧ oa mitë ëte, mu̧i̧ baävä na̧ bëräpȩ. Chjapea̧ oa cjiarenȩ —yo̧a̧dejȩ.

²⁵ Ado tai̧dërëremȩ pio judi chjaodëri̧ cjitëno̧a̧ ëte, jibëa̧ tjae mo̧a̧rea̧ oa mitëno̧a̧ ëte, baärëremȩde jibëa̧ bëräpȩ, Ütë tjamo̧ pio ju̧i̧iäpȩmo̧ chjacjiamȩri̧ ni̧bämȩrȩ.

²⁶ Ado pumȩ judiro̧ Jechurë ja̧di dari̧ japea̧mȩ oa irä daea̧ oaiä, yaa yabë cjiaji̧ri̧rȩ ana̧ri̧ jo̧rȩtaji̧ri̧pea̧dirȩ jibëa̧ chji̧ oaiä idëguami̧ tarari̧. Ado Ütë tjamo̧ pio ju̧i̧iäpȩmo̧ chjacjiamȩrȩ jo̧rȩtaji̧ri̧rȩ yo̧a̧dirȩ: —Chia chia, a̧ro̧rȩ ja̧di dari̧ japamȩ oa cja̧rȩmȩ co dadërërea̧ ji̧, irä daea̧rea̧rȩ yaba̧ tjaoëpai̧ da oa, ado cja̧rȩmo̧ darea̧ oa. Aja̧, ja̧di ta̧rëri̧ yo̧rëreji̧ri̧dirȩ, judiro̧ irä darërea̧ pio ju̧i̧ chjiari.

Jechu judi ëna̧diärëremȩdejȩ Devi pio ju̧i̧, Mateo pio ju̧i̧

²⁷ Ja̧dëa ji̧ ji̧dë duri oa Jechu judi pio jiro bë ma̧ri̧ri pio judiri go̧düa̧rä, darëremȩdejȩ pumȩ ju̧i̧, domano̧ ja̧ ütëti̧ pio ji̧ri̧ ja̧ oa chëre boamȩ pio ju̧i̧, Devi quȩmȩ pio ju̧i̧. Aja̧, chëre boarea̧ jo̧ boi̧chji̧rä chamȩ oa darëremȩdejȩ. Ado Jechu judi yo̧a̧dejȩ: —Cho̧rë jana̧coe ca̧ jadüpe bagarea̧mi̧ dari̧.

²⁸ Ado Devi judi pio ju̧i̧ ta̧rëa̧ oaiä, chjaodëri̧ cjitëno̧rëremȩde. Ado jibëa̧remȩ chjö̧na̧i̧ oa a̧dë baämȩrȩ cho̧rë jäa̧dejȩ.

²⁹ Ado ji̧dë duri oa jibëa̧ bëräpȩ ju̧ri̧, Devi pio judi jurarea̧ ji̧ra̧ tjamo̧ oa yürürëremȩdejȩrȩ Jechu pio ju̧i̧ ja̧ oa, jibëa̧ jadü ja̧bo. Ado peaja̧di ëba jura charëreji̧ri̧diro̧jȩrȩ Devi pio ju̧i̧ nö̧ta ëba ja̧bepaji̧ri̧ pio judiro̧, domano ja̧ ütëti̧ pio ji̧ri̧ ja̧ oa chëre boaji̧ri̧ pio judiro̧.

³⁰ Jabo pjaricheo judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë ma̧ȩ goae tjamo̧dëra̧ ni̧bä chjaoji̧ri̧pea̧diro̧jȩrȩ Jechu ja̧ jadü pio ji̧ri̧iäpȩmo̧. —Jabo cjäri̧ manȩrȩ, a̧dë chjäte ma̧i̧ dari̧ japanȩrȩ —yo̧a̧diro̧jȩrȩ—. Danȩrȩ, ¿tjana̧ japatä ëba jura charenȩro̧jȩrȩ domano̧ ja̧ oa chëre boaji̧ri̧ pio ji̧ri̧ nö̧ta, ma̧i̧ da chjai̧dëri̧ japaji̧ri̧ pio ji̧ri̧ nö̧ta? —iëno̧ë ta̧rëa̧diro̧jȩrȩ.

³¹ Jabo Jechu judi, judiro̧ iëno̧ë ta̧rëa̧ pio ju̧i̧ chjiari dabamȩrȩ ja̧di ta̧rëri̧ dëbë yo̧a̧dejȩrȩ, na̧rȩrea̧ ma̧ȩmi̧ dara̧ ni̧bämȩrȩ: —Danȩrȩ, chjari̧ dopaji̧ri̧ pio judiro̧ ‘chjaparȩmȩ pio ju̧i̧iäpȩ jäpaquëda, pio coa a̧dorea̧ chiamȩ pio ju̧i̧iäpȩ jätäremȩquëda’ quëna̧ jo̧rȩtadë madirȩ —yo̧a̧dejȩrȩ—. Jabo ja̧didëdirȩ gito ja̧boji̧ri̧ judiro̧. Jabechji̧ judiro̧ gito ja̧bo tara, ‘Aja̧, chjaparȩmȩ pio ju̧i̧iäpȩ jätäremȩquëda, coa a̧dorea̧ chiamȩ pio ju̧i̧iäpȩ jätäremȩquëda’ quëna̧ jo̧rȩtadirȩ —yo̧a̧dejȩrȩ—.

³² Danȩrȩ, ‘coëma cjiari̧ cjo̧ro̧quëda, chjai̧dëri̧ japadëmȩrȩ cjo̧ro̧quëda’ quëna̧ji̧ri̧ pio ji̧ri̧ ëna̧diäera̧padëa̧requedejȩrȩ jabo jabechji̧, 'chjai̧dëri̧ japamȩrȩ cjo̧ro̧mȩquëda' quëna̧ji̧ri̧ pio ji̧ri̧ ëna̧diäera̧pea̧requedejȩrȩ —yo̧a̧dejȩrȩ Jechu judi. Tjamo̧ davä. ‘Chjai̧dëri̧ japamȩquëda, tjamo̧ri̧ ano̧ mire jo̧rȩtapea̧ chiaquëda’ quëna̧ji̧ri̧ pio ji̧ri̧ a̧doera̧pea̧requedejȩrȩ. Pio ji̧ri̧ mitëpea̧ oa ma̧na̧requede cüdë. Ado pio ju̧i̧iä jabechji̧ chjai̧dë oa japaji̧ri̧ pio ji̧ri̧iäpȩrea̧rȩ —yo̧mȩrȩ ni̧bä chjaorëremȩdejȩrȩ Jechu judi, 'pumȩ chjadëquëda, chjai̧dë oa japadëmȩrȩ dopaquëda' quëna̧ji̧ri̧ pio ji̧ri̧iäpȩmo̧.

Pjaricheo judiro̧ Jechurë a̧ra̧ano̧a̧ pio ju̧i̧ ta̧rë ja̧botärea̧ ji̧, jurarea̧ oa jiadapea̧ pio ju̧i̧ chjiari peaja̧ oa mitëmi̧ dari̧ ano̧ mire jo̧rȩtatärea̧ ji̧, cjäri̧ madirȩ, no̧mȩ ja̧ maea oa chjuari̧ mitëmi̧ dari̧ jo̧rȩtarëreji̧ri̧dirȩ

³³ Ado cja̧rȩmo̧ doremȩrä, o judiro̧ ja̧di ta̧rëri̧ yo̧rëreji̧ri̧diro̧jo̧ȩ Jechu ju̧i̧: —Danȩ, Juan pio ju̧i̧ ja̧ jadü judiro̧, uirä chudamȩ pio ju̧i̧ ja̧ jadü pio judiro̧ jo̧rȩta̧mi̧ jiadadiro̧jo̧ȩ jurarea̧ pio ju̧i̧ —yo̧a̧diro̧jo̧ȩ—. Jabechji̧ juratärea̧ ji̧, jiadadiro̧jo̧ȩ tjaoërä Ütë tjamo̧ pio ju̧i̧ ana̧ri̧ jo̧rȩtapea̧ oa, jurarea̧ pio ju̧i̧iä oëra̧diächea oa. Ado peaja̧di dari̧ japadirȩ pjaricheo ja̧ jadü judiro̧. Jabo danȩ, na̧ jadü pio judiro̧borë japatärea̧ ji̧, japadë madirȩ. ¿Tjana̧ japea̧ ju̧i̧iä japadë madirȩ judiro̧? —iëno̧ë ta̧rëa̧diro̧jo̧ȩ Jechu ju̧i̧.

³⁴ Ado Jechu judi pio ji̧ri̧ ta̧rëa̧ oaiä, dëbë yo̧a̧dejȩrȩ na̧rȩrea̧ ma̧ȩmi̧ dara̧ pio ju̧ri̧ra̧. Aja̧, iei̧ pea ëbamȩmi̧ darë yo̧mȩrȩ ja̧di ta̧rëri̧ ni̧bä chjaorëremȩdejȩrȩ, pio jȩa chjiari ni̧bämȩrȩ: —Tjana̧ japea̧ ju̧i̧iädë, danȩrȩ, pumȩ judi jibëa̧ iei̧ ji̧ pea ëba̧rä, jabechji̧ pumȩ judiro̧ a̧dopapadirȩ airi̧ cjia airi̧ cjia jurapea̧ oa —yo̧a̧dejȩrȩ—. Ado pea ëbamȩ judi pio ji̧ri̧di ëba a̧dopea̧ oaiä, jabechji̧ jurarea̧ pio ju̧i̧ jiadaji̧ri̧rȩ ëba a̧doparea̧mi̧dëde. Jabechji̧ jurapea̧de. Ana̧ri̧ jo̧rȩtadëpea̧de jabo ma̧ chiadëri̧ cjiaji̧ri̧rȩ a̧dopapea̧de. Ëba airi̧ cjiaji̧ri̧rȩ jurapea̧de. Ja̧di tara yo̧requededibe —yo̧a̧dejȩrȩ—. Danȩrȩ, üi̧ judi jibëa̧ iei̧ pio ji̧ pea ëba̧rä, jabechji̧ jurarea̧ pio ju̧i̧ jiadaji̧ri̧rȩ a̧dopadëpea̧de.

³⁵ Jabo cjäri̧ made, pea ëbamȩ üi̧ pio judi baë goa baäa̧ oa cjiarä, jȩa eadëji̧ri̧ pio ji̧ri̧iä baë goa baäa̧ oa cjiarä, dëdë, jibëa̧ pumȩ judiro̧ jurarea̧ pio ju̧i̧ a̧dë jo̧rȩtapadiro̧jo̧ȩ judiro̧ odai̧ dari̧ jo̧rȩta̧ oaiä. Aja̧, pio jiro japamitërä, dëdë, jurarea̧ pio ju̧i̧ jiadapai̧ dadiro̧jo̧ȩ —yo̧mȩrȩ dëbë yo̧rëremȩdejȩrȩ Jechu judi pio jȩa goë daera̧pea̧ji̧ri̧ pio ji̧ri̧iäpȩmo̧.

³⁶ Ado Jechu judi ji̧dë u̧i̧ ni̧bämȩrȩ a̧de ni̧bä chjaorëremȩdejȩrȩ ado cja̧rȩmo̧ na̧rȩrea̧ ma̧ȩmi̧ dara̧, judiro̧ jibëa̧ ma̧ȩ peaja̧rä ano̧ mire cjo̧ro̧pea̧ oa, judiro̧ oëra̧ quëna̧chea oa, ütëti̧rea̧ pio judiro̧ yo̧rërea̧ ma̧ȩrä tüdüa̧ oa cjiami̧ dari̧ cjiachea oa. Aja̧, ja̧di ta̧rëri̧ yo̧rëremȩdejȩrȩ: —Danȩrȩ, eami̧ pumȩ üdë chjibo no̧mȩ ja̧ oa, co chiamȩ chjibo oa goë cara̧rä judi, jabechji̧ pjaranera chjibo coto peaja̧ra̧ pio ju̧ri̧ra̧ goë cararea̧mi̧dëde. Goë chi̧därea̧mi̧dëde. Jabechji̧ pjaranera chjibo coto peaja̧ üdë uira̧ joa oaiä, cjäri̧ made, boi̧chji̧pe jäde. Ado tocoi̧ boi̧chji̧pe jäa̧ oaiä, ado chjereno̧ quiquiri chiapai̧ dade no̧mȩ ja̧ chjiboremȩ üdë. Pio ju̧i̧iä ja̧di dari̧ japarea̧mi̧dëde. Peaja̧ra̧ goë cararea̧mi̧dëde no̧mȩ ja̧ üdë —yo̧a̧dejȩrȩ.

³⁷ Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ: —Ado danȩrȩ, bino quȩmȩ ërü üdë, pea japea̧mȩ judi, jabechji̧ joë no̧mȩ ja̧rä boeadëpea̧de. Tjamo̧ davä. Joë no̧mȩ ja̧rä, chivo ira̧ japea̧ oa cjiamȩ joë no̧mȩ ja̧rä boeadëpea̧de. Jabechji̧ joë no̧mȩ ja̧rä boearä judi, cjäri̧ made, ërü üdë ma̧i̧ dari̧ ö̧da oaiä, popë chiapai̧ dade chjuadëpe baga̧ oaiä. Jabechji̧ ërü decjiari̧ popë chiapai̧ dade.

³⁸ Ja̧di tara ërü peaja̧ üdë joë peaja̧rämo̧ chö̧ra̧pea̧de chjadëri̧ boeapea̧ oa. Ja̧di dari̧ chö̧ra̧ oaiämo̧i̧ popë chiadëpade joë üdë, ado ërü üdë daburo aeno̧a̧ oa cjiadëpade —yo̧a̧dejȩrȩ—.

³⁹ Ado pio yoa ma̧ȩbo a̧de yo̧requededibe —yo̧a̧dejȩrȩ—. Danȩrȩ, no̧mȩ ja̧ ërü oa goaraji̧ri̧ judiro̧, jabechji̧ ërü peaja̧ oa jaradëri̧ cjiadiro̧jo̧ȩ. "Jabechji̧ no̧mȩ ja̧ üdë goaede" yo̧dirȩ —yo̧a̧dejȩrȩ Jechu judi. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ Jechu judi pjaricheo pio ji̧ri̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧bo.