Lucas 4 - Biblia Pume

Ichiae judi chjai̧dëri̧ japa tänȩtarëremȩdejȩ Jechu ju̧i̧

¹ Ja̧dëa ji̧ Jechu judi, Tjo tjamo̧ ja̧ chja̧oerä cjiamȩrȩ go̧dürëremȩde bea Joroda̧ yuroro a̧rȩmȩ chiriri pio judiri. Ado Tjo tjamo̧ pio judi yabo ëba jämi̧ dari̧ jä tänȩrëremȩdejȩ chiri tjoräpȩ ju̧ri̧, pumȩ decjiaräpȩ ju̧ri̧.

² Ado ju̧ri̧pȩ Ichiae judi chjai̧dëri̧ japa tänȩtarëremȩdejȩ Jechu pio ju̧i̧. Tjamo̧ davä. Japamitë nö̧ta, 40 do nö̧ta, 40 gȩnȩ nö̧ta chjai̧dëri̧ japa tänȩtarëremȩdejȩ. Ado pio jiro japamitë nö̧ta, jabechji̧ juradëmȩrȩ cjo̧ro̧rëremȩde. Ado pio ju̧i̧iä pio jiro japamitë chjätäa̧rä, jabechji̧ ana̧ri̧ tararëremȩde ta̧mȩcho̧ pio ju̧i̧.

³ Ado judirä Ichiae pio judi ni̧bäpea̧ oa acji go̧düdärärëremȩdejȩ. Ado yo̧a̧dejȩ: —Danȩ, mȩnȩ Ütë tjamo̧ ja̧ Jojarä judi, jabechji̧ na̧ jauëchjara̧ pio ju̧ri̧ra̧ chja̧pepe järi̧ yo̧jo̧ȩ pio yoa ta̧dë oa, mȩnȩ jurapea̧ oa —yo̧a̧dejȩ.

⁴ Jabo Jechu judi dëbë yo̧a̧dejȩ: —Cjäri̧ made, ja̧di dari̧ japëno̧rea̧mi̧dëde. Jabechji̧ ja̧di ta̧rëri̧ go̧ȩpea̧ oa cjiade ma̧ȩ üdë. Ta̧rëvä: "Dai oa cjiamȩ chja̧pe pio ju̧i̧iämo̧i̧ cjo̧ro̧rea̧mi̧dëde. Jabechji̧ nö̧tadëde, jabo Ütë tjamo̧ ja̧ yari pio judiri go̧düa̧mȩ ma̧ȩrämo̧ cjo̧ro̧rea̧mi̧ dade." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Ado pio ju̧i̧iä ja̧di dari̧ japarea̧mi̧dëde —dëbë yo̧a̧dejȩ Jechu judi Ichiae pio ju̧i̧iäpȩmo̧.

⁵ Jabo Ichiae judi cjiadiädëmȩrȩ uë tjamo̧räpȩ yuro ëba järëremȩdejȩ Jechu ju̧i̧. Ado pio judiri goë mitëmȩrȩ na̧rȩrëremȩdejȩ chiriräpȩti̧ oa cjo̧ro̧ji̧ri̧ ütëti̧ pio ji̧ri̧, jënȩro̧ chiri ütëti̧ji̧ri̧rȩ cjo̧ro̧mȩräpȩ. Tjamo̧ davä. Jënȩro̧ tjamo̧ yo̧ji̧ri̧rȩ cjo̧ro̧mȩräpȩ, jënȩro̧ a̧dë chäte chjacjiamȩri̧ cjo̧ro̧mȩräpȩ na̧rȩrëremȩdejȩ, pio ji̧ri̧ ja̧ chja̧oerä cjo̧ro̧ji̧ri̧ maea oa. Aja̧, chjadë maeari̧ na̧rȩrëremȩdejȩ chjaodëri̧.

⁶ Ado chjö̧na̧i̧ oa goë na̧rȩa̧ duri oa, ja̧di ta̧rëri̧ yo̧a̧dejȩ Jechu ju̧i̧ Ichiae judi: —Danȩ, pio jiro pumȩ pio ji̧ri̧ ja̧ ütë tänȩpai̧ darequedemȩ —yo̧a̧dejȩ—. Pio jiro ütëti̧ pio judiro̧ tjamo̧ yo̧ji̧ri̧rȩ cjo̧ro̧rërea̧ ji̧, chjacjiamȩri̧ cjo̧ro̧rërea̧ ji̧, pio mȩamo̧ ano̧ mire ütëmȩrȩ cjo̧ro̧ tänȩpai̧ darequedemȩ. Jabechji̧ judiro̧ ca̧ chja̧oerämo̧ cjo̧ro̧rërea̧ ji̧, na̧ chja̧oerämo̧ ano̧ mire cjo̧ro̧ tänȩpai̧ darequedejȩrȩ. Jabechji̧ ja̧di dari̧ japapai̧ darequede Ütë tjamo̧ pio judi coa japarea̧ yürüa̧ tara. Jabechji̧ judiro̧ ca̧ea̧ ma tara, cüdë jo̧rȩtami̧ japapai̧ darequede.

⁷ Ja̧di tara yo̧requedemȩ. Jabechji̧ pio mȩa ano̧ mire ütëmȩrȩ cjo̧ro̧ tänȩparequedemȩ, mȩnȩ pio coaiäpȩmo̧ chjacjiamȩri̧ jo̧rȩtarä judi —yo̧a̧dejȩ.

⁸ Jabo Jechu judi dëbë yo̧a̧dejȩ: —Jabo cjäri̧ marequedemȩ, ja̧di dari̧ japarea̧mi̧dëde. Jabechji̧ ja̧di ta̧rëri̧ go̧ȩpea̧ oa cjiade ma̧ȩ üdë: "Dibëa̧ Ano̧mȩ Ütë pio ju̧i̧iäpȩmo̧ ma chjacjiamȩri̧ jo̧rȩtapea̧de, ado pio ju̧i̧ ja̧ maea oa ja̧bepariä cjo̧ro̧pea̧de." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Ado pio ju̧i̧iä pio mȩaiäpȩmo̧ chjacjiamȩri̧ jo̧rȩtarea̧mi̧dëde —dëbë yo̧a̧dejȩ.

⁹ Jabo Ichiae judi cjiadiädëmȩrȩ ëba järëremȩdejȩ Jechu ju̧i̧ Ütë tjamo̧ ja̧ bë ma̧ri̧räpȩ ju̧ri̧, Jerucharȩräpȩ ju̧ri̧. Ado Ütë tjamo̧ ja̧ bë uë tjamo̧räpȩ ju̧ri̧ cjia tänȩrëremȩdejȩ jo̧ pacho ina̧räpȩ ju̧ri̧. Ado ja̧dëa ji̧ ja̧di ta̧rëri̧ yo̧mȩrȩ yo̧rëremȩdejȩ Ichiae judi: —Danȩ, mȩnȩ Ütë tjamo̧ pio ju̧i̧ ja̧ Joja tjamo̧rä judi, jabechji̧ daburäpȩmo̧ chiquivä —yo̧a̧dejȩ—.

¹⁰ Jabechji̧ go̧ȩpea̧ oa cjiarëremȩde ma̧ȩ üdë mȩnȩ chjadëri̧ jida̧ oa cjiapea̧ pio ju̧i̧ chjiari. "Aja̧, Ütë tjamo̧ judi yürüa̧ mu̧i̧tjoi̧ pio judiro̧ chjadëri̧ jidapadiro̧mȩ" yo̧mȩ ma̧ȩ üdë go̧ȩpea̧ oa cjiade.

¹¹ Ado pio yoa ma̧ȩbo go̧ȩpea̧ oa cjiade ji̧dëri̧. "Jibëa̧ mu̧i̧tjoi̧ pio judiro̧ jibëa̧ ichira̧ idapadiro̧mȩ mȩnȩ ta̧dëräpȩ ju̧ri̧ ju chjichji cjatächea oa, mȩnȩ gitoi̧ dari̧ tarachea oa." Aja̧, ja̧di ta̧rëri̧ go̧ȩpea̧ oa cjiade ma̧ȩ üdë peaja̧di. Pio ju̧i̧iä jabechji̧ daburäpȩmo̧ chiquivä —yo̧a̧dejȩ Jechu ju̧i̧ Ichiae judi.

¹² Jabo Jechu judi ja̧di ta̧rëri̧ dëbë yo̧a̧dejȩ: —Jabo danȩ, ja̧di ta̧rëri̧ yo̧diibe ma̧ȩ üdë peaja̧di. "Jabechji̧ dibëa̧ Ano̧mȩ Ütë pio ju̧i̧ ütarami̧ dari̧ japadëchji̧jo̧ȩ. 'Aja̧, ¿napai̧rä yuro jidapadicoada Ütë tjamo̧ judi, ¿napai̧rä yuro a̧dopadicoada, cüdë ca̧ea̧ ma̧na̧ri̧ jo̧rȩtamȩrȩ japarä judi, judi yo̧dëa̧ pio ju̧i̧ japarä judi, ¿napai̧rä yuro jidapadicoada’ quëna̧ jo̧rȩtaji̧ri̧rȩ ütarami̧ dari̧ japadë matäreji̧ri̧rea̧ro̧jo̧ȩ Ütë tjamo̧ ju̧i̧" yo̧diibe ma̧ȩ üdë. Ado pio ju̧i̧iä cjäri̧ marequede, daburäpȩmo̧ chiquidëparequede jabechji̧ —yo̧a̧dȩjȩ Jechu judi.

¹³ Ja̧dëa ji̧ Ichiae judi Jechu pio ju̧i̧ chjai̧dëri̧ japa tänȩtea̧ duri oa, u̧i̧parea̧ ma̧ȩ ji̧ra̧ra̧ u̧i̧patea̧ ji̧ japadäräa̧ duri oa, jabechji̧ a̧dë baärëremȩdejȩ Jechu ju̧i̧. 'Jabechji̧ ji̧dë duri oa ado chjereno̧ chjai̧dëri̧ japa tänȩtapacuni̧da' quëna̧ jo̧rȩtamȩrȩ a̧dë baärëremȩdejȩ.

Jechu judi taruparëremȩde ja̧bepapea̧ ji̧ Garirea quȩmȩ chiriräpȩ ju̧ri̧

¹⁴ Ja̧dëa ji̧ Jechu judi, Tjo tjamo̧ ja̧ chja̧oerä cjiamȩrȩ ado chjereno̧ baärëremȩde Garirea quȩmȩ chiriräpȩ. Ado pio jiro chiri oëra̧ti̧ oa cjo̧ro̧ji̧ri̧ pio judiro̧ chjaodëri̧ goë ta̧rëji̧ri̧pea̧dirȩ Jechu pio ju̧i̧ chjiari.

¹⁵ Ado babui̧ra̧ a̧ra̧ano̧rëremȩde judiorë a̧doparea̧ bëräpȩ. Ado pumȩ judiro̧ ütëborë chjacjiamȩri̧ ni̧bärëreji̧ri̧dirȩ pio ju̧i̧ chjiari.

Jiadarëreji̧ri̧diro̧jo̧ȩ Jechu ju̧i̧ Nachareräpȩ ju̧ri̧

¹⁶ Ado Jechu judi Nachare quȩmȩ bë ma̧ri̧räpȩ go̧düdäräa̧rä, jënȩ boi̧chji̧rä cjo̧ro̧rërea̧ bë ma̧ri̧räpȩ go̧düdäräa̧rä, jabechji̧ jënȩ japariärërea̧mi̧ järëremȩde judiorë a̧doparea̧ bëräpȩ Chabado doro. Ado a̧dopea̧ oa cjiarä, cjitërëremȩde go̧ȩ ni̧bäpea̧ oa, Ütërë no̧mȩ tjamo̧ri ja̧ go̧ȩpa tänȩrërea̧ ma̧ȩ pio ju̧i̧ go̧ȩ ni̧bäpea̧ oa.

¹⁷ Ado ma̧ȩ oa, go̧ȩ i go̧a̧ti̧ oa, puria̧ oa cjiamȩ pio ju̧i̧ yürürëremȩdejȩ yürümȩ judi. Tjamo̧ davä. Ichaia quȩmȩrea̧ pio judi go̧ȩparërea̧ ma̧ȩ pio ju̧i̧, Ütërë ea jana̧ chjadüa̧ oa ni̧bämȩ pio judi go̧ȩpea̧ duri pio ju̧i̧ yürüa̧dejȩ go̧ȩ ni̧bäpea̧ oa. Ado Jechu judi go̧ȩ i go̧a̧ti̧ oa jare ëte, dadäräa̧de jënȩ go̧ȩ ni̧bätämi̧ cjia̧ pio ju̧i̧. Ado pio yoa ma̧ȩ oa go̧ȩ ni̧bärëremȩde:

¹⁸ "Ano̧mȩ pio ju̧i̧ ja̧ Tjo üdë cjiana̧ra̧dique. Jabechji̧ mitëa̧dique Ütë tjamo̧ ja̧ ma̧ȩ chjadëi̧ pio ju̧i̧ a̧ra̧ano̧pea̧ oa. Aja̧, chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧, cja̧rȩmȩ co ma̧ȩ oa ta̧rëdëji̧ri̧ pio ji̧ri̧iäpȩmo̧ a̧ra̧ano̧pea̧ oa mitëa̧dique. Ado chjadüa̧dique peaja̧di cüdë chjadëri̧ yo̧pea̧ oa chaäa̧ oa cjiami̧ dari̧ cjo̧ro̧ji̧ri̧ pio ji̧ri̧ chjiari. Jabechji̧ pio jiro pumȩ judiro̧ chaäa̧ oa cjiami̧ dari̧ cjiarërea̧ ji̧, jabechji̧ go̧dürea̧ yürüpadejȩrȩ Ütë tjamo̧ pio judi. Ado pio ju̧i̧ a̧ra̧ano̧era̧pea̧requede. Aja̧, da cotomi̧ dari̧ cjiaji̧ri̧ pio judiro̧ ado chjereno̧ chjadëri̧ damirerea̧ dapea̧ oa, conȩda̧ oa cjiareji̧ri̧ pio judiro̧ chjadëri̧ jare chjadüa̧ oa cjiami̧ dari̧ cjiapea̧ oa, jabechji̧ chjadüa̧dique a̧ra̧ano̧pea̧ oa.

¹⁹ Aja̧, chjadüa̧dique pumȩ pio judiro̧ chjadëri̧ dabapea̧ oa. 'Aja̧, ma̧na̧diibëda, pio jiro japamitë üdë ma̧na̧diibëda, Ano̧mȩ judi pio ibëiäpȩmo̧ cjäri̧ri̧ cjia dapea̧ japamitë üdë ma̧na̧diibëda' quëna̧ dabapea̧ oa chjadüa̧dique Ütë tjamo̧ judi." Aja̧, ja̧di ta̧rëri̧ ni̧bämȩrȩ go̧ȩ ni̧bärëremȩde Jechu judi Ichaia quȩmȩrea̧ pio judi jabërä go̧ȩparërea̧ ma̧ȩ pio ju̧i̧.

²⁰ Ado go̧ȩ ni̧bä ëte, ado chjereno̧ purirëremȩdejȩ ma̧ȩ chiamȩ go̧ȩ i go̧a̧ti̧ oa, ado judiri ado chjereno̧ yürüa̧dejȩ pio jȩaiäpȩmo̧ yürüa̧mȩ pio ju̧i̧iäpȩmo̧. Ado judiorë a̧doparea̧ bëräpȩ a̧dopaji̧ri̧ pio judiro̧ ütëbodärärë cjoai̧tä cjoai̧tä darëreji̧ri̧diro̧jo̧ȩ.

²¹ Ja̧dëa ji̧ Jechu judi taruparëremȩde pio ji̧ri̧iäpȩmo̧ ni̧bä chjaopea̧ ji̧. Ja̧di ta̧rëri̧ yo̧mȩrȩ ni̧bä chjaorëremȩdejȩrȩ: —Danȩrȩ, cüdë dibë pio jiro ma̧ȩ oa go̧ȩ ni̧bäa̧ oaiä, jabechji̧ tjamo̧i̧ cjiari̧ cjiadiäa̧de pio yaba̧ domȩ üdë. Tjamo̧ davä. Cüdë dibë go̧ȩ ni̧bäa̧ ma̧ȩ üdë pio coaiä tjamo̧i̧padäräpea̧ ji̧ tarupea̧de —yo̧mȩrȩ ni̧bä chjaorëremȩdejȩrȩ pumȩ ji̧ri̧ Jechu judi.

²² Ado pumȩ judiro̧ Jechu pio ju̧i̧ chjiari pearä ni̧bä chjaoa̧ ji̧, jabechji̧ chjacjiamȩri̧ ni̧bä marëreji̧ri̧dirȩ pio ju̧i̧ chjiari. Aja̧, jibëa̧ ma̧ȩ oa goae tjamo̧ oa ta̧rëa̧ oaiä, pio jibë a̧domȩ ma̧ȩ oa ta̧rë ja̧boa̧ oaiä, jabechji̧ chjacjiamȩri̧ ni̧bärëreji̧ri̧dirȩ, dacho bëremi̧ cjiami̧ dari̧ jo̧rȩtaji̧ri̧rȩ. Jabo ja̧dëa ji̧ o judiro̧, cjäri̧ madiro̧jo̧ȩ, ano̧ mire jo̧rȩtaji̧ri̧pea̧ji̧ri̧rȩ ja̧di ta̧rëri̧ iëno̧ë ta̧rërëreji̧ri̧dirȩ Jechu pio ju̧i̧ chjiari: —Jabo pio jiromȩ üdë, ¿jabechji̧ Joche quȩmȩ pio ju̧i̧ ja̧ jojadëde? Dëdë, pio judide. Ado dabarea̧ro̧jo̧ȩ. Jabo cjäri̧ made jabo, ¿yö̧ta dari̧ dabamȩpea̧de? —yo̧a̧dirȩ. Aja, ja̧di ta̧rëri̧ yo̧ji̧ri̧rȩ ni̧bäji̧ri̧pea̧dirȩ pumȩ judiro̧ Jechurë ütëparërea̧räpȩ cjo̧ro̧ji̧ri̧ pio judiro̧, judi boi̧chji̧rä cjo̧ro̧rërea̧räpȩ cjo̧ro̧ji̧ri̧ pio judiro̧.

²³ Ado pio ju̧i̧iä jauëchja cjiari̧ na̧rȩtä eaji̧ri̧pea̧diro̧jo̧ȩ. Tjamo̧ davä. Judiro̧ Jechu pio ju̧i̧ ba chia dadëa̧ oaiä, 'jabomo̧ Joche pio ju̧i̧ ja̧ joja maeadida' quëna̧ jo̧rȩta̧ oaiä, 'ta̧rë ja̧borea̧mi̧dëdida' quëna̧ jo̧rȩta̧ oaiä, jabechji̧ jauëchja cjiari̧ na̧rȩtä earëreji̧ri̧diro̧jo̧ȩ pio jȩa chjiari chjadëri̧ na̧rȩpea̧ oa. Jabo Jechu judi pio ji̧ri̧ chjiari dabamȩrȩ ja̧di ta̧rëri̧ yo̧a̧dejȩrȩ: —Danȩrȩ, cüdë Joche pio ju̧i̧ ja̧ joja tara, ado mȩnȩro̧ pio coa chjiari oëra̧ jo̧rȩta tara, 'Aja̧, jabomo̧ teracabadida' quëna̧ jo̧rȩta tara, jabechji̧ na̧rȩrea̧ oa japatä yo̧pai̧ da jirorenȩro̧coe. "Aja̧, japaibe, na̧rȩno̧ibe" yo̧pai̧ danȩrȩ. "Aja̧, mȩnȩ ado cja̧rȩmo̧ bë ma̧ri̧räpȩ jauëchja cjiari̧ japarërea̧mi̧ japeno̧ibe pio yoaiäpȩ peaja̧di" yo̧pai̧ danȩrȩ. "Aja̧, Capanau̧ quȩmȩ bë mari̧räpȩ ju̧ri̧ jauëchja cjiari̧ japarërea̧mi̧ japeno̧ibe" yo̧pai̧ danȩrȩ. "Jabechji̧ no̧mȩri ja̧ yo̧mȩbea judi yo̧rërea̧ ma̧ȩ pio ju̧i̧bo yo̧pai̧ darenȩro̧coe: "Aja̧, mȩnȩ tjamo̧ri̧ jauëchja cjiari̧ chjaparȩmȩrä judi, jabechji̧ na̧ea̧ ma̧na̧ri̧ japea̧ oaiä chjapea̧ oa cjiavä" yo̧mȩ ma̧ȩ pio ju̧i̧ yo̧pai̧ darenȩro̧coe peaja̧di, na̧rȩrea̧ oa datämi̧ cjiaji̧ri̧rȩ.

²⁴ Jabo tjamo̧ri̧ yo̧requededibe. Eami̧ pumȩ judi, Ütërë ea jana̧ chjadüa̧ oa ni̧bämȩ pio judi, jabechji̧ ba chiadëde jënȩ ütëparërea̧ bë ma̧ri̧räpȩ. Tjamo̧ davä. Eami̧ pumȩ judi Ütërë ea jana̧ chjadüa̧ oa ni̧bämȩ pio judi jënȩ ütëparërea̧ bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧ a̧ra̧ano̧pea̧ oa järä judi, cjäri̧ madiro̧jo̧ȩ, ba chia dadëpadiro̧jo̧ȩ. Ado peaja̧di ba chia dadërenȩro̧coe coa. Ta̧rë ja̧bodëri̧ cjiarenȩro̧coe —yo̧a̧dejȩrȩ Jechu judi.

²⁵ Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩrȩ Nachareräpȩ cjo̧ro̧ji̧ri̧ pio ji̧ri̧, jënȩ ütëparërea̧ bë ma̧ri̧räpȩ cjo̧ro̧ji̧ri̧ pio ji̧ri̧: —Ado peaja̧dirëremȩde Eria pio ju̧i̧iä. Ado pio ju̧i̧iä judio ja̧ chjarerä jauëchja cjiari̧ japatärea̧ ji̧, cjäri̧ made, ado cja̧rȩmo̧räpȩ järëremȩde, jibëa̧ pumȩ judiro̧ pio jȩaiäpemo̧ ba chia dadëa̧ oaiä. Ado mȩnȩro̧ pio ju̧i̧ chjiari tjamo̧ri̧ dabadëchea oa, jabechji̧ pio yoa ma̧ȩbo a̧de ta̧rëchji̧vä —yo̧a̧dejȩrȩ—. Danȩrȩ, no̧mȩ judi Eria quȩmȩrea̧ pio judi cjo̧ro̧rä judirä, Ütërë ea jana̧ chjadüa̧ oa ni̧bämȩ pio judi jabë cjo̧ro̧rä judirä, jabechji̧ cjüdëpea̧de. Tjarari̧ ui, ado tjomo̧ra̧ a̧de cjüdë marëremȩde ado pio ju̧i̧iä jurarea̧ decjiapea̧de chiri nö̧tai̧ oa. Ado pio jiro japamitërä ji̧ra̧ tjamo̧rëreji̧ri̧ni̧rȩ oari chiarëreji̧ri̧ ivi pio jini̧ro̧ Icharairäpȩ ju̧ri̧. Ado jurarea̧ decjiapea̧ oaiä, jabechji̧ ta̧mȩcho̧ ja̧boji̧ri̧rȩ cjo̧ro̧ marëreji̧ri̧ni̧rȩ.

²⁶ Jabo Eria judi pio jiro ivi cja̧rȩmȩ oa a̧dotärea̧ ji̧, pio ji̧ri̧ cja̧rȩmȩ oa jurarea̧ra̧ a̧dotärea̧ ji̧, cjäri̧ made, judiodë iei̧ pio ji̧ a̧dopea̧ oa chjadürëremȩdejȩ Ütë tjamo̧ judi. Tjamo̧ davä. Judiodë pio ji̧iäpȩ chjadürëremȩdejȩ, Chareta quȩmȩ bë ma̧ri̧räpȩ cjo̧ro̧yi̧ pio ji̧iäpȩ, Chido̧ quȩmȩ bë ma̧ri̧ boi̧dë queri̧räpȩ cjo̧ro̧yi̧ pio ji̧iäpȩ, pio ji̧mo̧ chjadëri̧ a̧dopea̧ oa.

²⁷ Ado danȩrȩ, pio yoa ma̧ȩbo a̧de yo̧requededibe. Danȩrȩ, Ericheo quȩmȩ pio judi cjo̧ro̧rä judirä, Ütërë ea jana̧ chjadüa̧ oa ni̧bämȩ pio judi cjo̧ro̧rä judirä, jabechji̧ Icharairäpȩ ju̧ri̧ ji̧ra̧ tjamo̧rëreji̧ri̧dirȩ ma̧i̧ da co chiaji̧ri̧ judio judiro̧. Jabo cjäri̧ madejȩrȩ, Ericheo judi pio ji̧ri̧ cja̧rȩmȩ oa chjaparȩtärea̧ ji̧, chjaparȩdëa̧dejȩrȩ, jabo ado cja̧rȩmo̧ pumȩ pio ju̧i̧ chjaparȩrëremȩdejȩ, judiodë pio ju̧i̧. Jabechji̧ judio pio ji̧ri̧ a̧dë jo̧rȩtami̧ dari̧ ado cja̧rȩmo̧ oa chjaparȩrëremȩdejȩ, Nama̧ quȩmȩ pio ju̧i̧, Chiria quȩmȩ chiriräpȩ cjo̧ro̧mȩ pio ju̧i̧. Ado danȩrȩ, peaja̧dimi̧ dari̧ cjianȩrȩ mȩnȩro̧. Pio mȩnȩro̧borë quëna̧dërenȩro̧coe. Pio mȩnȩro̧borë pio coa ba chia dadërenȩro̧coe. Ado pio ju̧i̧iä jabechji̧, eami̧ oa na̧rȩdëparequededibe cüdë. Pio dibë na̧rȩtärea̧ ji̧, dibëa̧ dachoro jauëchja cjiari̧ japatärea̧ ji̧, cjäri̧ marequede, japadëpaquede —yo̧mȩrȩ ni̧bä chjaorëremȩdejȩrȩ Jechu judi.

²⁸ Jabo cjäri̧ madiro̧jo̧ȩ, pumȩ judiro̧ pio ju̧i̧ ta̧rëa̧ oaiä, judiorë a̧doparea̧ bëräpȩ ta̧rë chaji̧ri̧ pio judiro̧ pio ju̧i̧ ta̧rëa̧ oaiä, chjaodëri̧ ma̧ cjüëtü tjamo̧ri̧ jo̧rȩtaji̧ri̧pe bagarëreji̧ri̧dirȩ, ërecjia tjamo̧ji̧ri̧rȩ.

²⁹ Ado jo̧ȩra̧pe cjitë ëte, acji bagura̧diro̧jo̧ȩ Jechu pio ju̧i̧. Ado pio ju̧i̧ chjuari̧ acji mitë ëte, ëba jäa̧diro̧jo̧ȩ curë uë tjamo̧räpȩ ju̧ri̧ Jechu pio ju̧i̧ ëteräpȩmo̧ idë cürëpea̧ oa.

³⁰ Jabo cjäri̧ madiro̧jo̧ȩ, Jechu pio ju̧i̧ ja̧bo tänȩtärea̧ ji̧, eami̧ oa japarea̧ dadëa̧diro̧jo̧ȩ. Jabechji̧ Jechu judi pio ji̧ri̧ ja̧ chjarerä chjätämȩrȩ chjaodëri̧ a̧dë baärëremȩdejȩrȩ.

Yaröca judiro̧ uapaji̧ri̧rȩ da maeadiro̧jo̧ȩ Jechu ju̧i̧

³¹ Ja̧dëa ji̧ Jechu judi järëremȩde Garirea quȩmȩ chiriräpȩ ju̧ri̧. Ado pio jiro chirirä cjiamȩ bë ma̧ri̧ oa jämȩrȩ go̧düdärärëremȩde Capanau̧ quȩmȩ bë ma̧ri̧räpȩ. Ado judiorë a̧doparea̧ bëräpȩ jämȩrȩ a̧ra̧ano̧rëremȩde judiorë järätä chjaparea̧ doro.

³² Ado judi a̧ra̧ano̧a̧rä, jabechji̧ ya yabë cjiami̧ dari̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ. Jabechji̧ tjamo̧ yo̧mȩmi̧ darë a̧ra̧ano̧mȩ oa ta̧rëa̧diro̧jo̧ȩ, uapadëmȩrȩ a̧ra̧ano̧mȩ oa.

³³ Ado judiorë a̧doparea̧ bëräpȩ ju̧ri̧rëremȩde yaröca chiamȩ üi̧ judi. Ado yaröca pio judi goae tarari̧ ëna̧diämȩrȩ ja̧di ta̧rëri̧ ira̧diä ni̧bärëremȩdejȩ Jechu ju̧i̧:

³⁴ —Aja, Jechu pio judirenȩ. Nachare quȩmȩ bë ma̧ri̧rimȩ pio judirenȩ —yo̧a̧dejȩ—. Jabo jabechji̧, a̧dë jachipadäräeno̧ibe. ¿Tjana̧pea̧ oa tja̧reparȩra̧pea̧renȩibe? ¿Goarijä tänȩrea̧mi̧ dari̧ conȩdaera̧pea̧renȩibe? Danȩ, tjamo̧ri̧ dabarequede pio mȩa chjiari. 'Jabechji̧ Ütë tjamo̧ pio judi china̧chjari̧ tutia̧ pio judidida' quëna̧ dabarequede —yo̧a̧dejȩ.

³⁵ Jabo Jechu judi yaröca pio ju̧i̧ ni̧bädärärea̧ yürüdëmȩrȩ to̧bari̧ tuti yo̧a̧dejȩ: —Cjapiri̧ cjiavä —yo̧a̧dejȩ—. Ado pumȩ ja̧ icjarari pio judiri a̧dë go̧düjo̧ȩ —yo̧a̧dejȩ. Ado Jechu judi ja̧di ta̧rëri̧ yo̧a̧rä, yaröca üdë tänȩa̧ oaiä chjaodëri̧ idë cürëmi̧ dari̧ japarëremȩdejȩ pumȩ ju̧i̧ daburäpȩmo̧, pumȩ ütëbodärärë dari̧. Ado judiri eami̧ oa japadëmȩrȩ a̧dë go̧düeno̧a̧dejȩ.

³⁶ Ado pumȩ judiro̧ pio ju̧i̧ daea̧ oaiä, ana̧ri̧ jo̧rȩtaji̧ri̧pea̧dirȩ, dacho bëremi̧ cjiami̧ dari̧. Ado jibëa̧ dëbëti̧ra̧ chia yo̧ji̧ri̧rȩ yo̧a̧dirȩ: —¿Jabo tjana̧ ma̧ȩra̧ ni̧bämȩde pio jiro üi̧ üdë? Tjana̧ ma̧ȩra̧dë, jabechji̧ tjamo̧ yo̧mȩ ja̧ ma̧ȩra̧ ni̧bämȩde, ma̧ȩ jauëchjara̧ pio ju̧ri̧ra̧. Ado pio ju̧i̧iä jabechji̧, yaröca pio judiro̧borë ta̧rë japadiro̧jo̧ȩ. Pio ju̧i̧iä jabechji̧, pio judi yo̧a̧ oaiä, chjaodëri̧ a̧dë cjarapea̧dejȩ yaröca pio judi pumȩ ju̧i̧ —yo̧a̧dirȩ.

³⁷ Ado Jechu pio ju̧i̧ chjiari ma̧ȩ üdë chjaodëri̧ chjuchjupechä baärëremȩde pio jiro chiri nö̧tai̧ oa, bë ma̧ri̧ nö̧tai̧ oa baämȩrȩ.

Jechu judi Chimo̧ pio ju̧i̧ ja̧ cjäna̧ pio ji̧ chjaparȩrëremȩdejȩ, pumȩ no̧i̧dë tjamo̧bo

³⁸ Ado Jechu judi judiorë a̧doparea̧ bëri pio judiri go̧düa̧ duri oa, järëremȩde Chimo̧ pio ju̧i̧ ja̧ bëräpȩ. Ado ju̧ri̧pȩ yu̧a̧däräa̧rä, daea̧dejȩ Chimo̧ pio ju̧i̧ ja̧ cjö̧na̧ pio ji̧, ma̧i̧ dari̧ taipa ja̧boyi̧ pio ji̧. Ado pio ju̧i̧iä cjo̧dëa̧diro̧jo̧ȩ Jechu ju̧i̧, pio ji̧ chjadëri̧ chjaparȩtä.

³⁹ Ado pio ju̧i̧iä pio ji̧ ja̧ yuroro dae cjiamȩrȩ to̧bari̧ yo̧rëremȩdejȩ chjaparȩtä, tjamo̧ yo̧mȩmi̧ darë. Ado chjaodëri̧ chjapea̧ oa cjiadiärëreyi̧nȩ, taipa ja̧bodëyi̧pe bagarea̧mi̧ dari̧. Ado pio ju̧i̧iä chjaodëri̧ cjitërëreyi̧nȩ, ado jurarea̧ oa chumë yürüyi̧pea̧nȩjȩrȩ.

⁴⁰ Ado ja̧dëa ji̧ do üdë bira̧rä, pumȩ judiro̧ ëba go̧düdärä marëreji̧ri̧diro̧jȩrȩ jibëa̧ pumȩ ji̧ri̧, gito ja̧bo taraji̧ri̧ pio ji̧ri̧ Jechu pio ju̧i̧iäpȩ. Ado judiro̧ dami̧ti̧ gito oa tararäbo, jabechji̧ chjaodëri̧ chjapea̧ oa cjia marëreji̧ri̧dirȩ Jechu pio judi jibëa̧ ichira̧ ga̧re tara̧ oaiä.

⁴¹ Pumȩ no̧i̧dërë yaröca chiarëreji̧ri̧dirȩ. Jabo Jechu judi yo̧a̧ oaiä, chjaodëri̧ a̧dë go̧dürëreji̧ri̧diro̧jȩrȩ. Tjamo̧ davä. A̧dë go̧dürëreji̧ri̧diro̧jȩrȩ, "Ütë tjamo̧ pio ju̧i̧ ja̧ Jarenȩ" yo̧ji̧ri̧rȩ. Jabo cjäri̧ madejȩrȩ jabo. Yaröca judiro̧ pio jȩa chjiari tjamo̧ri̧ daba̧ tara, 'Ütërë mitëa̧ Chjätä Tänȩmȩ pio judi tjamo̧dida' quëna̧ daba̧ tara, jabechji̧ Jechu judi ji̧ra̧ri̧ ni̧bärea̧ yürüdëa̧dejȩrȩ, jabo jabechji̧ ya̧mi̧ ta̧rëri̧ yo̧mȩrȩ cjapiri̧ cjia tänȩ marëremȩdejȩrȩ.

Pumȩ ütëbodäräti̧ oa jo̧rȩtamȩrȩ birë ma̧na̧rëremȩde Jechu judi, cja̧rȩmȩ pumȩ pio ji̧ri̧mo̧i̧ jo̧rȩtadëmȩrȩ

⁴² Dopea̧rä peadai̧ tjamo̧ro, Jechu judi järëremȩde pumȩ decjiaräpȩ Ütë tjamo̧ pio ju̧i̧ nö̧ta ni̧bäpea̧ oa. Ado judi decjia nö̧ta, no̧i̧dërë na̧tarëreji̧ri̧diro̧jo̧ȩ. Ado japamitë chjätä ëte pio ju̧i̧ dadäräa̧rä, pio jibë a̧dë baädëtä yo̧taji̧ri̧rȩ yo̧rëreji̧ri̧diro̧jo̧ȩ.

⁴³ Jabo Jechu judi dëbë yo̧a̧dejȩrȩ: —Cjäri̧ marequededibe, ma̧ȩ chjadëi̧ pio ju̧i̧ a̧ra̧ano̧pea̧ chiarequede —yo̧a̧dejȩrȩ—. Tjamo̧ davä. Ütërë yo̧a̧ chja̧oerä cjo̧ro̧pea̧ pio ju̧i̧ chjiari ma̧ȩ chjadëi̧ pio ju̧i̧ a̧ra̧ano̧pea̧ chiarequede oëra̧ti̧ oa cjiamȩ bë ma̧ri̧ oa peaja̧di. Jabechji̧ ja̧di dari̧ japatä eamȩrȩ chjadürëremȩdique Ütë tjamo̧ judi. Ado pio ju̧i̧iä pio dibëmo̧i̧ ëba cjiarea̧mi̧dërequededibe —yo̧a̧dejȩrȩ. Aja̧, ja̧di ta̧rëri̧ yo̧mȩrȩ dëbë yo̧rëremȩdejȩrȩ Jechu judi.

⁴⁴ Ado pio ju̧i̧iä jabechji̧, oëra̧ti̧ oa tai̧mȩrȩ a̧ra̧ano̧rëremȩde judiorë a̧doparea̧ bë ji̧ra̧räpȩ, Judea quȩmȩ chirirä cjiamȩ a̧doparea̧ bë ji̧ra̧räpȩ.