Lucas 3 - Biblia Pume

Juan judi, Ichabe pio ji̧ ja̧ joja pio judi pumȩ ji̧ri̧ uirä ji̧dë ma go̧e cjaeä chudamȩ pio judi a̧ra̧ano̧ chjaorëremȩdejȩrȩ pumȩ ji̧ri̧

¹ Juan pio judi pea a̧ra̧ano̧mȩpea̧rä, Checha Tiberio quȩmȩ pio judi ütëmȩrȩ cjo̧ro̧rëremȩde Domaräpȩ ju̧ri̧. Chiri ji̧ra̧ tjamo̧ oa, domano̧ judiro̧ boarërea̧ chiri ji̧ra̧ tjamo̧ oa jidamȩrȩ cjo̧ro̧rëremȩde, 14 uiri ja̧ chiri ütë cjo̧ro̧mȩrȩ. Ado Juan pio judi pea a̧ra̧ano̧mȩpea̧rä, Ponchio Pirato pio judi chiri ütëmȩrȩ cjo̧ro̧rëremȩde Judea quȩmȩ chiriräpȩ. Ado Erode quȩmȩ pio judi ütëmȩrȩ cjo̧ro̧rëremȩde Garirea quȩmȩ chiriräpȩ. Ado ju̧i̧di ja̧mȩ pio judi, Felipe quȩmȩ pio judi, peaja̧di ütëmȩrȩ cjo̧ro̧rëremȩde. Jabechji̧ Iturea quȩmȩ chirirä cjo̧ro̧ji̧ri̧ pio judiro̧, ado Taraconitide quȩmȩ chiriräpȩ cjo̧ro̧ji̧ri̧ pio judiro̧borë Felipe pio ju̧i̧ ja̧ chja̧oerä cjo̧ro̧ marëreji̧ri̧dirȩ. Ado judirä Dichania judi ütëmȩrȩ cjo̧ro̧rëremȩde Abirene quȩmȩ chiriräpȩ. Aja̧, ja̧di dari̧ cjo̧ro̧rëreji̧ri̧dirȩ pio jiro ütëti̧ judiro̧ Juan pio judi pea a̧ra̧ano̧mȩpea̧rä.

² Ado judirä, Ana̧ pio judi, ado Caipa pio judiborë tjamo̧ goë tuti ja̧bepaji̧ri̧rȩ cjo̧ro̧rä judirä, jabechji̧ Ütë tjamo̧ pio judi ma̧ȩ yürürëremȩdejȩ Juan pio ju̧i̧, Chacaria quȩmȩ pio ju̧i̧rea̧ ja̧ joja pio ju̧i̧, chiri tjoräpȩ cjo̧ro̧rëremȩ pio ju̧i̧.

³ Ado Ütë tjamo̧ judi pio jȩaiäpȩmo̧ ma̧ȩ yürüa̧ oaiä, jabechji̧ oëra̧ti̧ oa tai̧mȩrȩ a̧ra̧ano̧riä järëremȩde pumȩ pio ji̧ri̧ chjadëri̧ a̧ra̧ano̧pea̧ oa. Tjamo̧ davä. Bea Joroda̧ yuro oa, bea ca̧ȩta̧ra̧ri ja̧ yurori peaja̧di a̧ra̧ano̧riä tai̧rëremȩde. Ado ja̧di ta̧rëri̧ yo̧mȩrȩ ji̧dë ma yo̧rëremȩdejȩrȩ pumȩ ji̧ri̧: —Danȩrȩ, mȩnȩro̧ duridëparȩa̧ oa cjiatämi̧ cjiarä judi, mȩnȩro̧ Ütë tjamo̧ pio ju̧i̧iäpȩmo̧ chjai̧dëri̧ japea̧ ba oa duridëparȩa̧ oa cjiatämi̧ cjiarä judi, jabechji̧ ano̧ mire jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari —yo̧a̧dejȩrȩ—. Jabechji̧ chjai̧dë pio ju̧i̧ japë ano̧chji̧vä. Ado mȩnȩro̧ ja̧di dari̧ japea̧rä, mȩnȩro̧ Ütë tjamo̧ pio ju̧i̧iä, 'Aja̧, duridëparȩrea̧ dapaquëda' quëna̧ji̧ri̧pea̧rä, jabechji̧ yo̧chji̧coe. Ado uirä go̧e cjaeä chudaparequededibe —yo̧mȩrȩ a̧ra̧ano̧riä tai̧rëremȩde Juan judi.

⁴ Ado Ichaia quȩmȩrea̧ pio judi jabërä go̧ȩparëremȩde Juan pio ju̧i̧ chjiari, ja̧di ta̧rëri̧ go̧ȩpamȩrȩ: "Danȩrȩ, cja̧rȩmȩ pumȩ üdë, chiri tjo maearäpȩ ju̧ri̧ to̧bari̧ ëna̧diämȩ pio judi ja̧di ta̧rëri̧ yo̧mȩrȩ ëna̧diäpadejȩrȩ pumȩ ji̧ri̧: 'Aja̧, Ano̧mȩ pio judi ma̧na̧pea̧ üdë querediäde. Pio ju̧i̧iä jabechji̧, chjadëri̧ jëdano̧mi̧ dari̧ japachji̧vä, no̧ coëmape bagarea̧mi̧ dari̧, judi chjadëri̧ ma̧na̧rea̧mi̧ dari̧.

⁵ Jabechji̧ puë decjiape bagami̧ dari̧ jëdano̧pea̧de no̧ üdë, coëmape bagarea̧mi̧ dari̧. Ado ma̧i̧ da cocho chiarä judi, jabechji̧ no̧ chjadëpe jämi̧ dari̧ jëdano̧pea̧de peaja̧di, no̧ üdë chjadëri̧ baäpea̧ oa. Ado no̧ üdë tairä judi, coëma cjiaparȩpea̧de.

⁶ Ado ja̧dëa ji̧ ja̧di dari̧ chjadëri̧ jëdano̧a̧ oa cjiarä, jabechji̧ chiriräpȩti̧ oa cjo̧ro̧ji̧ri̧ pumȩ pio judiro̧ ütëbodärärë chjadëri̧ jo̧rȩtarea̧ dapadirȩ. 'Jabechji̧ Ütë tjamo̧ judi ja̧di dari̧ chjätärea̧ yürüpadiibëda' quëna̧ jo̧rȩtarea̧mi̧ dari̧ yürüpadejȩrȩ.'" Aja̧, ja̧di ta̧rëri̧ yo̧mȩrȩ ni̧bä chjaorëremȩde Ichaia quȩmȩrea̧ judi jabërä Juan pio ju̧i̧ chjiari, judi Chjätä Tänȩmȩ ja̧ oa no̧ oa chjadëri̧ jëdano̧mi̧ dari̧ japapea̧ pio ju̧i̧ chjiari.

⁷ Jabo pumȩ no̧i̧dërë Juan pio ju̧i̧iäpȩ go̧düdäräa̧rä, pio jibë uirä go̧e cjaeä chudatä eaji̧ri̧rȩ go̧düdäräa̧rä, jabechji̧ to̧bari̧ yo̧rëremȩdejȩrȩ. 'Jabechji̧ o judiro̧ jabomo̧ quëna̧ji̧ri̧mi̧ dari̧ cjo̧ro̧diro̧da, ano̧ mire jo̧rȩtacji̧ quëna̧ japa maeadiro̧da' quëna̧ jo̧rȩtamȩrȩ darëremȩdejȩrȩ. Ado pio ju̧i̧iä ja̧di ta̧rëri̧ yo̧ chjaorëremȩdejȩrȩ to̧bari̧: —Jabo cjäri̧ manȩrȩ, mȩnȩro̧ orë oëra̧ jo̧rȩtanȩrȩ —yo̧a̧dejȩrȩ—. 'Jaeboquëda, cüdë uirä go̧ȩ cjaeä chuda̧ oa cjia̧ oaiä, jabechji̧ Ütë tjamo̧ judi bape chjaodëpadicoada, cüdë chuda̧ oa cjia̧ oaiä pio ju̧i̧ ja̧ ërecjia̧ üdë pio coaiäpȩmo̧ acji cjatädëpadicoada' quëna̧ jo̧rȩtanȩrȩ. Jabo ¿chjia oaiä ta̧rëa̧ oaiä ja̧di dari̧ quëna̧ji̧ri̧pea̧nȩrȩ mȩnȩro̧? Pio coaiä ja̧di ta̧rëri̧ ta̧rëdëa̧nȩrȩ, jabo ja̧di ta̧rëri̧ yo̧requededibe yaba̧. Danȩrȩ, jabomo̧ ë chiamȩ po pio judiri ja̧ji̧ri̧mi̧ dari̧ cjianȩrȩ, ado ma̧i̧ da gärimȩmi̧ da üdë acji ma̧na̧ oaiä, jabechji̧ goae tarari̧ coë jämi̧ dari̧ bageno̧tämi̧ cjianȩrȩ, Ütë ja̧ ërecjia̧ pio ju̧i̧ tarachea oa. Jabo cjäri̧ manȩrȩ, mȩnȩro̧ quëna̧cji̧ quëna̧ japaji̧ri̧rȩ go̧ȩ cjaeä chuda̧ pio ju̧i̧iä Ütë ja̧ ërecjia̧ pio ju̧i̧ a̧dë bagarea̧ dadëpanȩrȩ.

⁸ Ado pio ju̧i̧iä yo̧requededibe. Jabechji̧ chjadëri̧ ano̧ mire jo̧rȩtachji̧vä. Ado chjadëri̧ ano̧ mire jo̧rȩta ëte, mȩnȩro̧ chjai̧dëri̧ japea̧ pio ju̧i̧ chjiari chjadëri̧ ano̧ mire jo̧rȩta ëte, jabechji̧ chjadëri̧ na̧rȩriä cjo̧ro̧chji̧vä jurarea̧mi̧ da oa, chacha oa chia bararea̧mi̧ dari̧. Jabo oëra̧ jo̧rȩtadëchji̧vä pio dibë chjiari —yo̧a̧dejȩrȩ—. ‘Chja jabechji̧ cüdë Abaraa̧rea̧ pio judiri ja̧mȩ tara, Ütë tjamo̧ pio ju̧i̧iä ba chia tjamo̧quëda, jabechji̧ pio judiri ja̧mȩ tara, Ütë ja̧ ërecjiarea̧ üdë pio coaiäpȩmo̧ tjamo̧ri̧ acji cjatädëpadicoada’ quëna̧ jo̧rȩtadëchji̧vä. Jabechji̧ Abaraa̧rea̧ pio judiri ja̧mȩborë bape chjaoa̧ oa cjiapai̧ danȩrȩ davä, mȩnȩro̧ ano̧ mire quëna̧dërä judi —yo̧a̧dejȩrȩ—. Danȩrȩ, mȩnȩro̧, 'Aja̧, ba chia tjamo̧a̧ro̧da' quëna jo̧rȩta maeanȩrȩ jabo cjäri̧ manȩrȩ, ba chia tjamo̧dënȩrȩ. Jabechji̧ Ütë tjamo̧ judi pumȩ ji̧ri̧ jëdano̧tämi̧ cjiarä judi, jabechji̧ pio yi chamȩ ta̧dëra̧ pio ju̧ri̧ra̧ jëdano̧pai̧ dadejȩrȩ chjaodëri̧. Tjamo̧ davä. Ütë tjamo̧ judi pumȩ ji̧ri̧ jëdano̧tämi̧ cjiarä judi, Abaraa̧rea̧ pio judiri ja̧ji̧ri̧ pumȩ pio ji̧ri̧ jëdano̧tämi̧ cjiarä judi, jabechji̧ pio yi chamȩ ta̧dëra̧ pio ju̧ri̧ra̧ tjamo̧ri̧ jëdano̧pai̧ dadejȩrȩ davä, jënȩ ja̧di dari̧ japarea̧ jo̧rȩtarä judi. Ado pio ju̧i̧iä jabechji̧, 'ba chiaa̧ro̧da' quëna̧dëchji̧vä jabo jabechji̧, Abaraa̧rea̧ pio judiri ja̧ji̧ri̧borë ano̧ mire jo̧rȩtatäreji̧ri̧nȩrȩ mȩnȩro̧ bape chjaoa̧ oa cjiachea oa —yo̧a̧dejȩrȩ—.

⁹ Jabechji̧ pio dibëiäpȩmo̧ acji cjatäpamȩ bape chjaorea̧ üdë jibëmi̧ dade. Ado pio jiro jibëmi̧ da üdë chjaodëri̧ acji cjatäpai̧ dadidibe davä pio yaba̧. Jabechji̧ teracaba tomi̧ da pio ju̧i̧ chjaodëri̧ tuti de ano̧mi̧ dari̧ cjiapea̧ oa, jurarea̧ chiadëmȩ tomi̧ da pio ju̧i̧ tuti de ano̧mi̧ dari̧ cjiapea̧ oa, acji cjatäpai̧ dadidibe Ütë ja̧ ërecjiarea̧ üdë chjaodëri̧. Ado dea̧ duri oa, jabechji̧ cjo̧dëra̧ acjürüpea̧de —yo̧mȩrȩ ni̧bä chjaorëremȩdejȩrȩ Juan judi pumȩ ji̧ri̧iäpȩmo̧.

¹⁰ Ado pumȩ buba judiro̧ iëno̧ë ta̧rëa̧diro̧jo̧ȩ: —¿Jabo tjana̧ oa japatäreji̧ri̧rea̧rȩ Ütë tjamo̧ ja̧ ërecjiarea̧ üdë pio ibëiäpȩmo̧ acji cjatächea oa?

¹¹ Ado Juan judi dëbë yo̧a̧dejȩrȩ: —Tjana̧ oa japadë, jabechji̧ mȩnȩro̧ yo̧a̧ri̧ chjibo oa goarä judi, jabechji̧ cja̧rȩmȩ chjibo oa yürüchji̧jo̧ȩ cjäri̧ ja̧bomȩ pio ju̧i̧iäpȩmo̧. Ado mȩnȩro̧ jurarea̧ goarä judi, jabechji̧ ëba jurachji̧jȩrȩ ta̧mȩcho̧ ja̧boji̧ri̧ pio ji̧ri̧ —dëbë yo̧a̧dejȩrȩ.

¹² Ado ja̧dëa ji̧ domano̧ ja̧ oa chëre boaji̧ri̧ pio judiro̧, ji̧dë u̧i̧ ba uëri baë cjo̧dëji̧ri̧ pio judiro̧borë uirä go̧e cjaeä chuda̧ oa cjiera̧pea̧dirȩ. Ado Juan pio ju̧i̧iäpȩ go̧düdäräji̧ri̧rȩ peaja̧di ta̧rëri̧ iëno̧ë ta̧rëa̧diro̧jo̧ȩ: —Ado a̧ro̧rȩ a̧ra̧ano̧mȩ, ¿tjana̧ oa japatäreji̧ri̧rea̧rȩ Ütë tjamo̧ ja̧ ërecjiarea̧ üdë pio ibëiäpȩmo̧ acji cjatächea oa?

¹³ Ado Juan judi dëbë yo̧a̧dejȩrȩ: —Tjana̧ oa japadë, jabechji̧ mȩnȩro̧ pumȩ pio ji̧ri̧iä domano̧ ja̧ oa chëre oa boarä, jabechji̧ ütëti̧ judiro̧ ütara̧ pio ju̧i̧mo̧i̧ boapea̧de, ba uëri a̧de boarea̧ decjiari̧. Ja̧di dari̧ japachji̧vä —yo̧a̧dejȩrȩ.

¹⁴ Ado guadia judiro̧ orë peaja̧di iëno̧ë ta̧rëa̧diro̧jo̧ȩ: —Ado a̧ro̧rȩ, guadia pio judiro̧, ¿tjana̧ oa japatäreji̧ri̧rea̧rȩ Ütë ja̧ ërecjia̧ chja̧oerä cjo̧ro̧chea oa? —iëno̧ë ta̧rëa̧. Ado Juan judi dëbë yo̧a̧dejȩrȩ: —Tjana̧ oa japadë, danȩrȩ, teracabari̧ yo̧dëchji̧jȩrȩ pumȩ ji̧ri̧. "Aja̧, mȩnȩ pio coa chëre oa yürüdërä judi, jabechji̧ goe chia maeari̧ gu̧na̧parequedemȩ" uapai̧ dari̧ yo̧ë cji̧dädë matäreji̧ri̧nȩrȩ. "Aja̧, mȩnȩ pio coa chëre oa yürüdërä judi, jabechji̧ tjamo̧ ütaraji̧ri̧ pio ji̧ri̧iäpȩ ëba jäparequedemȩ pio mȩa aechide yo̧pea̧ oa, pio judiro̧ mȩa ma̧i̧ dari̧ japapea̧ oa" yo̧dë matäreji̧ri̧nȩrȩ pumȩ ji̧ri̧. Jabo danȩrȩ, mȩnȩro̧ ja̧bepea̧ ba oa ma̧ chiadëri̧ cjiachji̧vä, 'tjamo̧ri̧ nö̧tadëdida' quëna̧rea̧ decjiari̧ —yo̧mȩrȩ ni̧bä chjaoremȩdejȩrȩ guadia ji̧ri̧ Juan judi.

¹⁵ Ado pio jiro japamitërä pumȩ judiro̧ ütëborë ana̧ri̧ jo̧rȩtarëreji̧ri̧dirȩ Chjätä Tänȩmȩ pio ju̧i̧ chjiari. Tjamo̧ davä. 'Ütërë mitëa̧ Chjätä Tänȩmȩ pio judi ma̧na̧pea̧ ji̧ querediä tjamo̧ jirodida, ado Juan pio judi Chjätä Tänȩmȩpamȩ jirodida' quëna̧ jo̧rȩtaji̧ri̧rȩ iëno̧ë ta̧rërëji̧ri̧diro̧jo̧ȩ.

¹⁶ Jabo Juan judi ja̧di ta̧rëri̧ dëbë yo̧a̧dejȩrȩ: —Cjäri̧ marequede —yo̧a̧dejȩrȩ—. Ütërë mitëa̧ Chjätä Tänȩmȩ pio judidërequede. Jabechji̧ ui maeara̧ go̧e cjaeä chjudarequededibe jabo ca̧ea̧ duri oa chjaodëri̧ ma̧na̧pamȩ pio judi, jabechji̧ pio coa u̧i̧ ba chiamȩde. Pio coa u̧i̧ ju chiamȩde. Jabomo̧ mu̧i̧tjoi̧requede cüdë. Nö̧tadëreconȩ ma̧na̧pamȩ ju̧i̧. Jabechji̧ a̧dë chjäte ba chiamȩde. Ado a̧dë chjäte ba chiamȩ tara, jabechji̧ jibëa̧ ta joë cä pio ju̧i̧ mu̧i̧ jare yürüpea̧ ji̧ nö̧tadë marequede. Boi̧chji̧mi̧ darequede. Borequede. Ado danȩrȩ, pio judi ma̧na̧rä, Tjo tjamo̧ra̧ pio ju̧ri̧ra̧ go̧ȩ cjaeä chudapadidibe o ji̧ri̧. Jabo o ji̧ri̧, cjo̧dëra̧ pio ju̧ri̧ra̧ go̧ȩ cjaeä chudapadidibe.

¹⁷ Jabechji̧ yo̧a̧ri̧ bubape bagari̧ tutipadejȩrȩ pumȩ ji̧ri̧. Coëma cjiari̧ cjo̧ro̧ji̧ri̧ pio judiro̧ jibëa̧ buba cjiapea̧ oa tutipadejȩrȩ. Ado coëma cjiari̧ cjo̧ro̧dëji̧ri̧ pio ji̧ri̧ peaja̧di tutipadejȩrȩ jibëa̧ buba cjiapea̧ oa. Jabechji̧ tirigo emi̧ da oa pjaepa oaiä, boa chami̧ dari̧ japapadejȩrȩ pumȩ ji̧ri̧. Ado ja̧dëa ji̧ chomi̧ daji̧ri̧ pio ji̧ri̧ chjadëri̧ a̧dopa tänȩpadejȩrȩ chjadëri̧ jidapea̧ oa, chjadëri̧ boeapea̧ oa. Jabo tirigo emi̧ daji̧ri̧ pio ji̧ri̧, jabechji̧ pio ji̧ri̧ caäpadejȩrȩ. Tjamo̧ davä. Coëma cjiari̧ cjo̧ro̧dëji̧ri̧ pio ji̧ri̧ cäapadejȩrȩ ja̧bodëmȩ cjo̧dëra̧ pio ju̧ri̧ra̧, ja̧bo tänȩrea̧mi̧dëmȩ cjo̧dëra̧ pio ju̧ri̧ra̧ —yo̧mȩrȩ ni̧bä chjaorëremȩdejȩrȩ Juan judi.

¹⁸ Ado Juan judi ma̧ȩ ji̧ra̧ tjamo̧ra̧ pio ju̧ri̧ra̧ a̧de yo̧mȩrȩ ana̧ri̧ ni̧bä chjaorëremȩdejȩrȩ pumȩ ji̧ri̧ ma̧ȩ chjadëi̧ pio ju̧i̧. Jabechji̧ uapai̧ ta̧rëri̧ yo̧ë cji̧dämȩrȩ ni̧bä chjaorëremȩdejȩrȩ peaja̧di.

¹⁹ Ado peaja̧di ütëborë ta̧rëri̧ aechide yo̧mȩmi̧ dari̧ ni̧bä chjaorëremȩde Erode A̧tipa quȩmȩ pio ju̧i̧ chjiari, Garirea quȩmȩ chiriräpȩ cjo̧ro̧ji̧ri̧ pio ji̧ri̧ ja̧ ütë pio ju̧i̧ chjiari. Jabechji̧ Erode judi china̧chja pio ji̧ baë mitëa̧ oaiä, jibëa̧ omȩ ja̧ iei̧ pio ji̧ baë ëba̧ oaiä, jabechji̧ aechide yo̧mi̧ dari̧ ni̧bärëremȩde, Erodia quȩyi̧ pio ji̧ baë mitëa̧ pio ju̧i̧iä. Ado pio ju̧i̧mo̧i̧ ni̧bädëa̧de jabo judi o oa chjai̧dëri̧ japea̧ pio ju̧i̧ chjiaribo ni̧bärëremȩde.

²⁰ Ado pio ju̧i̧iä Erode judi chaä tänȩrëremȩdejȩ Juan ju̧i̧. Ado Juan pio ju̧i̧ chaäa̧ oaiä, jabechji̧ ji̧dë u̧i̧ chjai̧dëri̧ japamȩpea̧de.

Juan judi uirä go̧e cjaeä chudarëremȩdejȩ Jechu pio ju̧i̧

²¹ Jabo Erode judi Juan pio ju̧i̧ chaärea̧ bëräpȩ jabë tuti tänȩdëa̧rä, jabechji̧ pumȩ buba oa uirä go̧e cjaeä chudarëremȩdejȩrȩ. Ado Jechu pio ju̧i̧bo chuda̧dejȩ. Ado Jechu judi chuda̧ oa cjiarërea̧ ji̧, jabechji̧ ni̧bärëremȩdejȩ jibëa̧ Ama̧i̧ pio ju̧i̧ nö̧ta. Ado pio ju̧i̧ nö̧ta ni̧bäa̧rä, a̧dë üdë areia̧ oa cjiarëremȩde.

²² Ado Tjo tjamo̧ pio judi a̧dëri pio judiri birana̧ra̧rëremȩdejȩ. Tjamo̧ davä. Birana̧ra̧rëremȩdejȩ jotoco puami̧ dari̧. Ado chjaodëri̧ ta̧rërëreji̧ri̧diro̧jo̧ȩ a̧dëri pio judiri ni̧bämȩ oa. Aja̧, ja̧di ta̧rëri̧ yo̧a̧mȩ oa ta̧rëa̧diro̧jo̧ȩ: —Ea tjamo̧requedemȩ ca̧ Ja. Ma̧ chiadëri̧ cjia tjamo̧mȩrȩ darequedemȩ —yo̧mȩrȩ yo̧rëremȩde Ama̧i̧ tjamo̧ judi jibëa̧ Ja pio ju̧i̧ chjiari, judi uiri pio judiri pea go̧dürërea̧ ji̧.

Jechu pio ju̧i̧ ja̧ taru pio judiro̧ ütara̧ oa cjiarëreji̧ri̧dirȩ

²³ Ado Jechu judi 30 ui goamȩpea̧rä, taruparëremȩde pumȩ pio ji̧ri̧ a̧ra̧ano̧pea̧ ji̧. Ado pumȩ judiro̧ Jechu pio ju̧i̧ chjiari ni̧bäa̧rä, 'Aja̧, Joche pio ju̧i̧ ja̧ jojadida, pio judi nö̧ria̧diji̧da' quëna̧ jo̧rȩta marëreji̧ri̧dirȩ, oëra̧ jo̧rȩtaji̧ri̧rȩ. Jabo judiro̧ oëra̧ jo̧rȩta̧räbo, jabechji̧ jabomo̧ ütëparȩrëremȩdejȩ Joche judi. Nö̧ridërëremȩdejȩ. Ado Joche judi, jabechji̧ Eri quȩmȩ pio ju̧i̧ ja̧ jojarëremȩde.

²⁴ Ado Eri pio judi, Mata quȩmȩ pio ju̧i̧ ja̧ jojarëremȩde. Ado Mata pio judi Devi quȩmȩ pio ju̧i̧ ja̧ jojarëremȩde. Ado Devi judi, Mequi quȩmȩ pio ju̧i̧ ja̧ jojarëremȩde. Ado Mequi judi, Jani quȩmȩ pio ju̧i̧ ja̧ jojarëremȩde. Ado Jani judi, Joche pio ju̧i̧ ja̧ jojarëremȩde.

²⁵ Ado Joche judi Matatia quȩmȩ pio ju̧i̧ ja̧ jojarëremȩde. Ado Matatia judi, Amo quȩmȩ pio ju̧i̧ ja̧ jojarëremȩde. Ado Amo̧ judi, Nau quȩmȩ pio ju̧i̧ ja̧ jojarëremȩde. Ado Nau judi, Echi quȩmȩ pio ju̧i̧ ja̧ jojarëremȩde. Ado Echi judi, Nagai quȩmȩ pio ju̧i̧ ja̧ jojarëremȩde.

²⁶ Ado Nagai judi, Mato quȩmȩ pio ju̧i̧ ja̧ jojarëremȩde. Ado Mato judi, Matatia pio ju̧i̧ ja̧ jojarëremȩde. Ado Matatia judi, Chemei quȩmȩ pio ju̧i̧ ja̧ jojarëremȩde. Ado Chemei judi, Jocheco quȩmȩ pio ju̧i̧ ja̧ jojarëremȩde. Ado Jocheco judi, Joida quȩmȩ pio ju̧i̧ ja̧ jojarëremȩde.

²⁷ Ado Joida judi, Joana quȩmȩ pio ju̧i̧ ja̧ jojarëremȩde. Ado Joana judi, Decha pio ju̧i̧ ja̧ jojarëremȩde. Ado Decha judi, Chorobabe quȩmȩ pio ju̧i̧ ja̧ jojarëremȩde. Ado Chorobabe judi, Charate quȩmȩ pio ju̧i̧ ja̧ jojarëremȩde. Ado Charate judi, Neri quȩmȩ pio ju̧i̧ ja̧ jojarëremȩde.

²⁸ Ado Neri judi, Mequi quȩmȩ pio ju̧i̧ ja̧ jojarëremȩde. Ado Mequi judi, Adi quȩmȩ pio ju̧i̧ ja̧ jojarëremȩde. Ado Adi judi, Cocha̧ quȩmȩ pio ju̧i̧ ja̧ jojarëremȩde. Ado Cocha̧ judi, Eramada̧ quȩmȩ pio ju̧i̧ ja̧ jojarëremȩde. Ado Eramada̧ judi Eri quȩmȩ pio ju̧i̧ ja̧ jojarëremȩde.

²⁹ Ado Eri judi, Jechu quȩmȩ pio ju̧i̧ ja̧ jojarëremȩde. Ado Jechu judi, Erieche quȩmȩ pio ju̧i̧ ja̧ jojarëremȩde. Ado Erieche judi, Jori quȩmȩ pio ju̧i̧ ja̧ jojarëremȩde. Ado Jori judi, Matata quȩmȩ pio ju̧i̧ ja̧ jojarëremȩde. Ado Matata judi, Devi quȩmȩ pio ju̧i̧ ja̧ jojarëremȩde.

³⁰ Ado Devi judi, Chimeo̧ quȩmȩ pio ju̧i̧ ja̧ jojarëremȩde. Ado Chimeo̧ judi, Juda quȩmȩ pio ju̧i̧ ja̧ jojarëremȩde. Ado Juda judi, Joche pio ju̧i̧ ja̧ jojarëremȩde. Ado Joche judi, Jonama quȩmȩ pio ju̧i̧ ja̧ jojarëremȩde. Ado Jonama judi, Eriaqui̧ quȩmȩ pio ju̧i̧ ja̧ jojarëremȩde.

³¹ Ado Eriaqui̧ judi, Merea quȩmȩ pio ju̧i̧ ja̧ jojarëremȩde. Ado Merea judi, Mena quȩmȩ pio ju̧i̧ ja̧ jojarëremȩde. Ado Mena judi, Matata quȩmȩ pio ju̧i̧ ja̧ jojarëremȩde. Ado Matata judi, Nata̧ quȩmȩ pio ju̧i̧ ja̧ jojarëremȩde.

³² Ado Nata̧ judi, Davi quȩmȩ pio ju̧i̧ ja̧ jojarëremȩde. Ado Davi judi, Jeche quȩmȩ pio ju̧i̧ ja̧ jojarëremȩde. Ado Jeche judi, Obe quȩmȩ pio ju̧i̧ ja̧ jojarëremȩde. Ado Obe judi, Bocho quȩmȩ pio ju̧i̧ ja̧ jojarëremȩde. Ado Bocho judi, Chera quȩmȩ pio ju̧i̧ ja̧ jojarëremȩde. Ado Chera judi, Nacho̧ quȩmȩ pio ju̧i̧ ja̧ jojarëremȩde.

³³ Ado Nacho̧ judi Aminada quȩmȩ pio ju̧i̧ ja̧ jojarëremȩde. Ado Aminada judi, Adimi̧ quȩmȩ pio ju̧i̧ ja̧ jojarëremȩde. Ado Adimi̧ judi, Ani quȩmȩ pio ju̧i̧ ja̧ jojarëremȩde. Ado Ani judi, Echoro̧ quȩmȩ pio ju̧i̧ ja̧ jojarëremȩde. Ado Echoro̧ judi, Pjare quȩmȩ pio ju̧i̧ ja̧ jojarëremȩde. Ado Pjare judi Juda quȩmȩ pio ju̧i̧ ja̧ jojarëremȩde.

³⁴ Ado Juda judi, Jacobo quȩmȩ pio ju̧i̧ ja̧ jojarëremȩde. Ado Jacobo judi, Icha quȩmȩ pio ju̧i̧ ja̧ jojarëremȩde. Ado Icha judi, Abaraa̧ pio ju̧i̧ ja̧ jojarëremȩde. Ado Abaraa̧ judi, Tera quȩmȩ pio ju̧i̧ ja̧ jojarëremȩde. Ado Tera judi, Nao quȩmȩ pio ju̧i̧ ja̧ jojarëremȩde.

³⁵ Ado Nao judi, Cherugo quȩmȩ pio ju̧i̧ ja̧ jojarëremȩde. Ado Cherugo judi, Dagau quȩmȩ pio ju̧i̧ ja̧ jojarëremȩde. Ado Dagau judi, Pere quȩmȩ pio ju̧i̧ ja̧ jojarëremȩde. Ado Pere judi, Ebe quȩmȩ pio ju̧i̧ ja̧ jojarëremȩde. Ado Ebe judi, Chera quȩmȩ pio ju̧i̧ ja̧ jojarëremȩde.

³⁶ Ado Chera judi, Caina̧ quȩmȩ pio ju̧i̧ ja̧ jojarëremȩde. Ado Caina̧ judi, Arajada quȩmȩ pio ju̧i̧ ja̧ jojarëremȩde. Ado Arajada judi, Che quȩmȩ pio ju̧i̧ ja̧ jojarëremȩde. Ado Che judi, Noe quȩmȩ pio ju̧i̧ ja̧ jojarëremȩde. Ado Noe judi, Dameque quȩmȩ pio ju̧i̧ ja̧ jojarëremȩde.

³⁷ Ado Dameque judi, Matucharȩ quȩmȩ pio ju̧i̧ ja̧ jojarëremȩde. Ado Matucharȩ judi, Eno̧ quȩmȩ pio ju̧i̧ ja̧ jojarëremȩde. Ado Eno̧ judi, Jere quȩmȩ pio ju̧i̧ ja̧ jojarëremȩde. Ado Jere judi, Majarare quȩmȩ pio ju̧i̧ ja̧ jojarëremȩde. Ado Majarare judi, Caina̧ quȩmȩ pio ju̧i̧ ja̧ jojarëremȩde. Ado Caina̧ judi, Eno̧ quȩmȩ pio ju̧i̧ ja̧ jojarëremȩde.

³⁸ Ado Eno̧ judi, Che quȩmȩ pio ju̧i̧ ja̧ jojarëremȩde. Ado Che judi, Ada̧ quȩmȩ pio ju̧i̧ ja̧ jojarëremȩde. Ado Ada̧ judi, Ütë tjamo̧ pio judi pareapea̧ oa cjiarëremȩde.