Lucas 10 - Biblia Pume

Jechu judi jibëa̧ jadü 72 ji̧ra̧ oa ni̧bä chjao ëte, chjadürëremȩdejȩrȩ

¹ Ja̧dëa ji̧ Ano̧mȩ Jechu judi jibëa̧ jadü 12 oa pearä mitërërea̧ ji̧, jabechji̧ a̧de mitërëremȩde 72 jadü ji̧ri̧. Ado ja̧dëa ji̧ jadü chia maea oa chjadürëremȩdejȩrȩ jënȩ jäpea̧räpȩ ju̧ri̧, pio judiro̧ yabochja jäpea̧ oa. Jabechji̧ jënȩ jäpea̧ bë ma̧ri̧ nö̧tai̧ oa jabërä jätä yo̧mȩrȩ chjadürëremȩdejȩrȩ.

² Jabo ji̧ri̧ chjadübea yaboi̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ: —Danȩrȩ, Ütë tjamo̧ ja̧ ma̧ȩ oa quëna̧pai̧ daji̧ri̧ pio judiro̧ ji̧ra̧ tjamo̧dirȩ —yo̧a̧dejȩrȩ—. Jabechji̧ joechjapea̧mȩ jurarea̧mi̧ dadirȩ. Jabo cjäri̧ madiro̧jo̧ȩ, jabepaji̧ri̧ pio judiro̧ nö̧tadëdiro̧jo̧ȩ pio jiro jurarea̧mi̧ da oa mitëpea̧ ji̧. Ado pio ju̧i̧iä babui̧ra̧ jëreeaji̧ri̧rȩ goë cjo̧dëchji̧vä Ano̧mȩ pio ju̧i̧iä. Aja̧, Ano̧mȩ pio ju̧i̧iä, mitëpea̧ jurarea̧mi̧ da pio ju̧i̧ ja̧ Ano̧mȩ pio ju̧i̧iä babui̧ra̧ goë cjo̧dëtä yo̧requededibe, judi ja̧bepaji̧ri̧ ji̧ra̧ tjamo̧ oa chjadütä, joechjapea̧mȩ jurarea̧mi̧ da pio ju̧i̧ mitëpaji̧ri̧ pio ji̧ri̧ —yo̧a̧dejȩrȩ.

³ Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ jënȩ chjadüpea̧ pio ji̧ri̧: —Danȩrȩ ca̧ pumȩ, uapai̧ da tjamo̧räpȩ chjadürequededibe ja̧bepapea̧ oa —yo̧a̧dejȩrȩ—. Tjamo̧ davä, oveja bori̧mi̧ da maea oa chjadürequededibe ja̧bepapea̧ oa, aure chjuaji̧ri̧mi̧ da pio ji̧ri̧ ja̧ chjarerä cjo̧ro̧ji̧ri̧ pio ji̧ri̧ a̧dopea̧ oa.

⁴ Ado mȩnȩro̧ järä, jabechji̧ chëre oa boarea̧ goa jädëchji̧vä. Ado dibëa̧ ma̧chi̧ra̧ joë oa peaja̧di chia jädëchji̧vä. Ado ano̧ mire go̧iopea̧ ta joë oa peaja̧di goa jädëchji̧vä. Ado danȩrȩ, mȩnȩro̧ järea̧ no̧ro eami̧ oa dëbëdiärä, jabechji̧ japamitë ana̧ri̧ ni̧bä chjaoji̧ri̧rȩ jeadë machji̧jȩrȩ jabo cüdë dibë yo̧a̧ pio ju̧i̧ jëreeaji̧ri̧mi̧ dari̧ jächji̧vä.

⁵ Ado mȩnȩro̧ eami̧ bëräpȩ yu̧a̧rä, jabechji̧, “ma̧ chjupi̧ cjiari̧ jo̧rȩtarea̧ yürütädidibe Ütë tjamo̧ judi pio yoa bërä cjo̧ro̧ji̧ri̧ pio ji̧ri̧” yo̧eji̧ri̧nȩrȩ.

⁶ Ado pio jiro pumȩ judiro̧ dibë chjadëri̧ ëba cjo̧ro̧rea̧ yürürä judi, jabechji̧ ma̧ chjupi̧ cjiari̧ jo̧rȩtarea̧ yürüpadejȩrȩ Ütë tjamo̧ judi. Jabo judiro̧ dibë chjadëri̧ ëba cjo̧ro̧rea̧ yürüdërä judi, jabechji̧ Ütë tjamo̧ judi ja̧di dari̧ jo̧rȩtarea̧ yürüdëpadejȩrȩ. Ado mȩnȩro̧ pea yu̧a̧rä yo̧rërea̧ ma̧ȩ üdë, jabechji̧ badëpe bagami̧ dari̧ cjiapadejȩrȩ. Jabechji̧ Ütë tjamo̧ judi pio ji̧ri̧iäpȩmo̧ ja̧di dari̧ jo̧rȩtarea̧ yürütärea̧ ji̧, yürüdëpadejȩrȩ —yo̧a̧dejȩrȩ—.

⁷ Ado Jechu judi jënȩ chjadüpea̧ pio ji̧ri̧ ji̧dë u̧i̧ yo̧a̧ oaiä, jabechji̧ pio yoa ma̧ȩbo a̧de yo̧rëremȩdejȩrȩ: —Ado danȩrȩ, mȩnȩro̧ eami̧ bë ma̧ri̧räpȩ go̧düdäräa̧rä, jabechji̧ dibë a̧dotämi̧ cjiaji̧ri̧ pio ji̧ri̧ ja̧ bëräpȩ cjiadiächji̧vä ano̧ mire cjo̧ro̧rea̧ decjiari̧ —yo̧a̧dejȩrȩ—. Jabechji̧ pio ju̧ri̧pȩ cjiadiächji̧vä mȩnȩro̧ pio jiro bë ma̧ri̧ri pio judiri a̧dë baäa̧rä yuro. Ado judiro̧ dibë yürüa̧ jurarea̧ pio ju̧i̧, jabechji̧ jurachji̧jo̧ȩ. Jabechji̧ pio ji̧ri̧iäpȩmo̧ a̧ra̧ano̧a̧ ba oa, chjadëri̧ ëba jurapea̧ chiadiro̧dibe.

⁸ Ja̧di tara mȩnȩro̧ eami̧ bë ma̧ri̧räpȩ go̧düdäräa̧rä, pumȩ judiro̧ pio dibë chjadëri̧ jearä judi, dibë chjadëri̧ darä judi, jabechji̧ chjadëri̧ jurachji̧vä judiro̧ dibë yürüa̧ jurarea̧ pio ju̧i̧.

⁹ Ado danȩrȩ, gito ja̧boji̧ri̧ pio ji̧ri̧, jabechji̧ chjaparȩchji̧jȩrȩ. Ado ja̧di ta̧rëri̧ yo̧täreji̧ri̧renȩro̧jȩrȩ: "Aja̧, Ütërë yo̧a̧ chja̧oerä cjo̧ro̧pea̧ japamitë üdë ma̧na̧pea̧ ji̧ querediä tjamo̧diibe” yo̧ji̧ri̧rȩ a̧ra̧ano̧eji̧ri̧renȩro̧jȩrȩ.

¹⁰ Jabo danȩrȩ, eami̧ bë ma̧ri̧räpȩ cjo̧ro̧ji̧ri̧ judiro̧ pio dibë chjadëri̧ dadërä judi, pio dibë chjadëri̧ jeadërä judi, jabechji̧ a̧dë baächji̧jȩrȩ. Jabo a̧dë baäbea yaboi̧, jabechji̧ bë ma̧ri̧ tjamo̧i̧ baämȩ no̧ro cjiachji̧vä. Ado ja̧di ta̧rëri̧ yo̧chji̧jȩrȩ:

¹¹ "Danȩrȩ, mȩnȩro̧ pio ibëiä ma̧ȩ ta̧rëdëri̧ cjia tara, jabechji̧ baärea̧rȩ. Jabo baäbea yaboi̧, jabechji̧ na̧rȩrea̧ro̧dibe. Aja̧, gu̧ro tänȩrea̧ro̧jo̧ȩ dabu pjo̧no̧i̧remȩ oa ibëa̧ ta joëri pio judiri. Tjamo̧ davä. Ta joë oa gu̧në pjo̧deji̧ri̧rȩ gu̧ro tänȩrea̧ro̧jo̧ȩ dibëa̧ bë ma̧ri̧rä cjiaremȩ dabu pjo̧no̧i̧ pio ju̧i̧ pio dibë chjadëri̧ na̧rȩpea̧ oa. Jabechji̧ mȩnȩro̧ pio ju̧i̧ daea̧ oaiä, ‘Aja̧, na̧rȩdiro̧ibëda, a̧ro̧rȩ jiada̧ oaiä Ütë tjamo̧ pio judi tänȩa̧ oa bape chjaoa̧ oa cjiapaa̧ro̧da’ quëna̧ dabapea̧ oa na̧rȩrea̧ro̧dibe. Ado danȩrȩ, mȩnȩro̧ dabadëchea oa, pio yoa ma̧ȩ oa a̧de yo̧rea̧ro̧dibe. Danȩrȩ, Ütërë yo̧a̧ chja̧oerä cjo̧ro̧pea̧ japamitë üdë ma̧na̧na̧ra̧pea̧ ji̧ querediä tjamo̧diibe. Chjadëri̧ jo̧rȩtachji̧vä." Aja̧ ca̧ pumȩ, ja̧di ta̧rëri̧ yo̧ji̧ri̧rȩ yo̧parenȩro̧jȩrȩ pumȩ ji̧ri̧ judiro̧ dibë chjadëri̧ dadërä judi, judiro̧ dibë chjadëri̧ jeadërä judi.

¹² Ado tjamo̧i̧ cjiari̧ yo̧requededibe. Pio jiro bë ma̧ri̧rä cjo̧ro̧ji̧ri̧ pio judiro̧, jabechji̧ uapai̧ da tjamo̧ri̧ bape chjaoa̧ oa cjo̧ro̧padirȩ jiada̧ ba oa. Jabechji̧ bape chjaorea̧ do üdë ma̧na̧na̧ra̧rä, o pio ji̧ri̧iä ji̧dë u̧i̧ ma̧i̧ dari̧ bape chjaoa̧ oa cjiapadirȩ. Jabechji̧ Chodomaräpȩ cjo̧ro̧rëreji̧ri̧ pio ji̧ri̧iä, Gomoraräpȩ cjo̧ro̧rëreji̧ri̧ pio ji̧ri̧iä ji̧dë u̧i̧ uapai̧ dari̧ bape chjaoa̧ oa cjiapadirȩ pio jiro bë ma̧ri̧räpȩ cjo̧ro̧ji̧ri̧ pio judiro̧ —yo̧mȩrȩ ni̧bä chjaorëremȩdejȩrȩ Jechu judi, jënȩ chjadüpea̧ pio ji̧ri̧.

Ano̧ mire jo̧rȩtadëri̧ cjiaji̧ri̧ pio judiro̧ bape chjaoa̧ oa cjiapadirȩ

¹³ Ado Jechu judi ji̧dë u̧i̧ ni̧bä chjaomȩrȩ uapai̧ ta̧rëri̧ yo̧ë cji̧därëremȩdejȩrȩ ano̧ mire jo̧rȩtadëri̧ cjiaji̧ri̧ ji̧ri̧, pio ji̧ri̧iäpȩmo̧ irä ni̧bämȩmi̧ ja̧di dari̧: —Pio mȩnȩro̧, Corachi̧ quȩmȩ bë ma̧ri̧räpȩ cjo̧ro̧ji̧ri̧ pio judiro̧, uapai̧ da tjamo̧ri̧ cjo̧ro̧nȩrȩ —yo̧a̧dejȩrȩ—. Ado Bechaida quȩmȩ bë ma̧ri̧räpȩ cjo̧ro̧ji̧ri̧ pio judiro̧borë uapai̧ da tjamo̧ri̧ cjo̧ro̧nȩrȩ. Jabechji̧ ma̧i̧ dari̧ bape chjaorea̧ üdë pio dibëiäpȩmo̧ acji cjatäpadidibe a̧dë chjäte uapai̧ dari̧. Jabechji̧ cüdë dibë ji̧ra̧ tjamo̧ oa na̧rȩa̧räbo, ano̧ mire jo̧rȩtadëa̧nȩrȩ. Jabo danȩrȩ, cüdë Tiro quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧ ja̧di dari̧ na̧rȩa̧rä judi, chjaodëri̧ ano̧ mire jo̧rȩtaji̧ri̧pe baga̧täreji̧ri̧dirȩ. Ado cüdë Chido̧ quȩmȩ bë ma̧ri̧räpȩ cjo̧ro̧ji̧ri̧ pio ji̧ri̧iäpȩmo̧ ja̧di dari̧ na̧rȩa̧rä judi, peaja̧di chjaodëri̧ ano̧ mire jo̧rȩtaji̧ri̧pe baga̧täreji̧ri̧dirȩ. Tjamo̧ davä. Gito ana̧ri̧ jo̧rȩta̧täreji̧ri̧dirȩ jënȩro̧ chjai̧dëri̧ japea̧ pio ju̧i̧ chjiari. Jabechji̧ cjo̧dë gu̧bë maearäpȩ chaji̧ri̧rȩ, ma̧i̧ da töcamȩ ina̧rea̧ra̧ ano̧ mire ina̧ji̧ri̧rȩ japea̧täreji̧ri̧dirȩ. Aja̧, chjadëri̧ na̧rȩpea̧ oa, jënȩro̧ chjai̧dëri̧ japea̧ pio ju̧i̧ chjiari gitori̧ jo̧rȩta̧ pio ju̧i̧ chjadëri̧ na̧rȩpea̧ oa ja̧di dari̧ japea̧täreji̧ri̧dirȩ —yo̧a̧dejȩrȩ.

¹⁴ Jabo cjäri̧ manȩrȩ mȩnȩro̧ —yo̧a̧dejȩrȩ—. Mȩnȩro̧ ano̧ mire jo̧rȩtadëri̧ cjia̧ oaiä, ji̧dë u̧i̧ bape chjaoa̧ oa cjiapanȩrȩ ütara̧ doro. Jabechji̧ Tiro quȩmȩräpȩ cjo̧ro̧ji̧ri̧ pio ji̧ri̧iä, ado Chido̧ quȩmȩräpȩ cjo̧ro̧ji̧ri̧ pio ji̧ri̧iä ji̧dë u̧i̧ bape chjaoa̧ oa cjiapanȩrȩ —yo̧a̧dejȩrȩ Jechu judi.

¹⁵ Ado ji̧dë u̧i̧ yo̧mȩrȩ ja̧di ta̧rëri̧ ano̧ mire ni̧bärëremȩdejȩrȩ ado cja̧rȩmo̧ bë ma̧ri̧räpȩ cjo̧ro̧ji̧ri̧ pio ji̧ri̧: —Ado mȩnȩro̧, Capanau̧ quȩmȩ bë ma̧ri̧räpȩ cjo̧ro̧ji̧ri̧ pio judiro̧, ¿yö̧ta dari̧ jo̧rȩtanȩrȩ mȩnȩro̧? Yö̧ta dari̧ jo̧rȩtadë, jabechji̧ oëra̧ jo̧rȩta jironȩrȩ. ‘Jaeboquëda, a̧ro̧rȩ pumȩ chjadë tara, a̧dëräpȩ cjiapea̧ oa cjitë tänȩpa jirodiibëda, ado a̧ro̧rȩ pio ju̧ri̧pȩ go̧düdäräa̧rä, jabechji̧ chjacjiamȩri̧ ni̧bäpa jirodiro̧ibëda’ ¿quëna̧ jo̧rȩtadënȩrȩ? Dëdë, peaja̧di dari̧ jo̧rȩtanȩrȩ pio dibë chjiari jabo cjäri̧ manȩrȩ, oëra̧ jo̧rȩtanȩrȩ. Ja̧boa̧ji̧ri̧ pio ji̧ri̧iäpȩ aeno̧a̧ oa cjiapanȩrȩ, mȩnȩro̧ chjuari̧ jiada̧ pio ju̧i̧iä —yo̧mȩrȩ ni̧bä chjaorëremȩdejȩrȩ Jechu judi uapai̧ da tjamo̧ri̧ bape chjaoa̧ oa cjiapaji̧ri̧ pio ji̧ri̧iäpȩmo̧, pio ji̧ri̧iäpȩmo̧ irä ni̧bämȩmi̧ dari̧.

¹⁶ Ja̧dëa ji̧ pio yoa ma̧ȩbo a̧de yo̧rëremȩdejȩrȩ jibëa̧ jadü ji̧ri̧ Jechu judi: —Danȩrȩ, eami̧ pumȩ üdë pio dibë ta̧rë ja̧borä judi, mȩnȩro̧ a̧ra̧ano̧a̧ pio ju̧i̧ ta̧rë ja̧borä judi, jabechji̧ pio coabo ta̧rë ja̧bodique —yo̧a̧dejȩrȩ—. Ado eami̧ pumȩ üdë pio dibë jiadarä judi, pio coabo jiadadique. Ado eami̧ pumȩ üdë pio coa jiadarä judi, jabechji̧ Ütë tjamo̧ pio ju̧i̧bo jiadadejȩ, coa chjadürëremȩ pio ju̧i̧ —yo̧mȩrȩ ni̧bä chjaorëremȩdejȩrȩ.

Jechurë chjadürërea̧ jadü pio judiro̧ 72rë ado chjereno̧ ma̧na̧rä, ni̧bä chjaorëreji̧ri̧dirȩ judiro̧ ja̧bepea̧ pio ju̧i̧ chjiari

¹⁷ Ado Jechurë chjadüa̧ jadü pio judiro̧, 72rë ado chjereno̧ ma̧na̧rä, ma̧ chiadëri̧ cjiaji̧ri̧rȩ ni̧bä chjaorëreji̧ri̧diro̧jo̧ȩ Jechu ju̧i̧, ja̧di ta̧rëri̧ yo̧ji̧ri̧rȩ: —Danȩ Ano̧mȩ, pumȩ judiro̧ chjadëri̧ ta̧rëdiäa̧diro̧ibe. Ado yaröca pio judiro̧borë ta̧rëdiäa̧diro̧ibe —yo̧a̧diro̧jo̧ȩ—. Tjamo̧ davä. A̧ro̧rȩ na̧ quȩrä pio ji̧ri̧iäpȩmo̧ to̧bari̧ yo̧a̧ oaiä, mȩnȩ pio ibëiäpȩmo̧ tjamo̧ yo̧rea̧ yürüa̧ oaiä, jabechji̧ chjadëri̧ ta̧rëdiäa̧ maeadiro̧ibe —yo̧a̧diro̧jo̧ȩ.

¹⁸ Ado Jechu judi dëbë yo̧a̧dejȩrȩ: —Aja̧, ta̧rëdiäa̧diro̧dibe yaröca judiro̧. Ado dibë ta̧rëdiäa̧ ji̧, jabechji̧ Ichiae pio ju̧i̧ daea̧reconȩ. A̧dëri pio judiri cjatämȩ oa, bërepe chjaomȩ üdë a̧dëri pio judiri cjatämi̧ dari̧ cjatämȩ oa daea̧reconȩ. Jabechji̧ cüdë pio dibëiäpȩmo̧ tjamo̧ yo̧rea̧ pio ju̧i̧ yürüa̧ oaiä, jabechji̧ pio mȩnȩro̧borë boadäräa̧renȩro̧jo̧ȩ Ichiae pio ju̧i̧, pio ju̧i̧ ja̧ mu̧i̧tjoi̧ pio ji̧ri̧bo.

¹⁹ Tjamo̧ davä ca̧ pumȩ, cüdë pio dibëiäpȩmo̧ tjamo̧ yo̧rea̧ pio ju̧i̧ yürüa̧requededibe Ichiae pio ju̧i̧ chjadëri̧ boadäräpea̧ oa, pio ju̧i̧ ja̧ jauëchja oa chjadëri̧ dëbëpe chjaopea̧ oa. Ado cüdë ja̧di dari̧ yürüa̧ oaiä, jabechji̧ po oa boë cjaeäräbo, chjai̧dë oa chjätädëpanȩrȩ, chjia ara boë cjaeäräbo. Jabechji̧ cüdë dibë ca̧ tjamo̧ yo̧rea̧ oa yürüa̧ oaiä, jabechji̧ eami̧ üdë dibë gitori̧ japarea̧ dadëpadidibe. Aja̧, chjadëri̧ yürüa̧requededibe.

²⁰ Jabo danȩrȩ ca̧ pumȩ, yaröca judiro̧ pio dibë ta̧rëdiäa̧ pio ju̧i̧iä ma̧ chiadëri̧ cjiari̧ jo̧rȩtarea̧ daräbo, jabechji̧ ji̧dë u̧i̧ ma̧ chiadëri̧ cjiari̧ jo̧rȩtatäreji̧ri̧nȩrȩ dibëa̧ quȩ üdë a̧dëräpȩ ju̧ri̧ go̧ȩpea̧ oa cjia tara —yo̧mȩrȩ ni̧bä chjaorëremȩdejȩrȩ.

Jechu judi ma̧ chiadëri̧ cjiamȩrȩ ni̧bärëremȩdejȩ jibëa̧ Ama̧i̧ ju̧i̧ bori̧mi̧ dari̧ jo̧rȩtaji̧ri̧ pio ji̧ri̧ chjiari

²¹ Ado pio jiro japamitërä Jechu judi jibëa̧ jadü ji̧ri̧iä, 72 pio ji̧ri̧iä pea ta̧rëa̧ oaiä, judiro̧ japarea̧ daea̧ pio ju̧i̧ chjiari ta̧rëa̧ oaiä, jabechji̧ ma̧ chiadëri̧ cjia tjamo̧mȩpea̧de Tjo tjamo̧ pio judi tänȩa̧ oaiä. Ado ma̧ chiadëri̧ cjiamȩrȩ ni̧bä chjaorëremȩdejȩ jibëa̧ Ama̧i̧ ju̧i̧, ja̧di ta̧rëri̧ yo̧mȩrȩ: —Ama̧i̧, Ano̧mȩ tjamo̧renȩ —yo̧a̧dejȩ—. Jabechji̧ a̧dë Ano̧mȩ pio judirenȩ. Ado dabu Ano̧mȩ tjamo̧renȩ peaja̧di. Ado jabechji̧ ma̧ chiadëri̧ cjiamȩrȩ jo̧rȩtarequedemȩ Ama̧i̧ mȩnȩ chjadëri̧ japea̧ tara, mȩnȩ bori̧mi̧ dari̧ jo̧rȩtaji̧ri̧ pio ji̧ri̧iäpȩmo̧ dabaparea̧ yürüa̧ tara. Tjamo̧ davä. Bori̧mi̧ dari̧ jo̧rȩtaji̧ri̧ pio ji̧ri̧iäpȩmo̧ na̧ ma̧ȩ oa dabaparea̧ yürüa̧renȩjȩrȩ Ama̧i̧. Jabo dai chirirä ja̧ jo̧rȩtarea̧ maeara̧ jo̧rȩtatämi̧ cjiaji̧ri̧ pio ji̧ri̧ dabaparea̧ yürüdëa̧renȩjȩrȩ. Jabechji̧ oëra̧ quëna̧ji̧ri̧ pio ji̧ri̧, 'jaeboquëda, ca̧ea̧ ma̧na̧ri̧ jo̧rȩta̧ pio ju̧i̧iä dami̧ti̧ oa dabapapai̧ daquëda' quëna̧ji̧ri̧ pio ji̧ri̧ dabaparea̧ yürüdëa̧renȩjȩrȩ, jabo ji̧dëri̧ na̧ ma̧ȩ üdë goadia̧ oa cjiami̧ dari̧ cjiade pio ji̧ri̧iä. Aja̧ Ama̧i̧, goadia̧ oa cjiami̧ dari̧ cjiade pio mȩnȩ tänȩa̧ oaiä. Ado ja̧di dari̧ japarea̧ üdë jabechji̧ goaedimȩ. Jabechji̧ mȩnȩ ütarë jo̧rȩta̧mi̧ dabarea̧ yürümȩrenȩ. Ado pio ju̧i̧iä ma̧ chiadëri̧ cjiamȩrȩ jo̧rȩtarequedemȩ. Ja̧ditäde —yo̧mȩrȩ ni̧bärëremȩdejȩ jibëa̧ Ama̧i̧ ju̧i̧iäpȩmo̧ Jechu judi, bori̧mi̧ dari̧ jo̧rȩtaji̧ri̧ pio ji̧ri̧ chjiari.

²² Ja̧dëa ji̧ Jechu judi ado ni̧bärëremȩdejȩrȩ jibëa̧ jadü ji̧ri̧, 72 oa. Ja̧di ta̧rëri̧ yo̧mȩrȩ ni̧bä chjaoa̧dejȩrȩ: —Danȩrȩ ca̧ pumȩ, tjamo̧ yo̧rea̧ yürüa̧dique ca̧ Ama̧i̧ judi chjö̧na̧i̧därärë ca̧ chja̧oerämo̧ cjiarea̧mi̧ dari̧ —yo̧a̧dejȩrȩ—. Aja̧, ca̧ Ama̧i̧ pio judi chjadëri̧ dabadique. O judiro̧ tjamo̧ri̧ dabadëdiro̧coe jabo ca̧ Ama̧i̧ pio judimo̧rȩ tjamo̧ri̧ dabadique. Ado cüdë peaja̧di tjamo̧ri̧ dabareconȩ ca̧ Ama̧i̧ pio ju̧i̧. O judiro̧ tjamo̧ri̧ dabadë madiro̧jo̧ȩ jabo cüdë, dëdë, tjamo̧ri̧ dabareconȩ. Ado cüdë mitëa̧ pio ji̧ri̧bo daba tänȩparequedejȩrȩ ca̧ Ama̧i̧ pio ju̧i̧ —yo̧a̧dejȩrȩ.

²³ Ja̧dëa ji̧ Jechu judi jibëa̧ jadü pio ji̧ri̧ nö̧ta cjiadiäa̧ ji̧, pio judiro̧mo̧rȩ cjiadiäa̧ ji̧, jabechji̧ pio ji̧ri̧iäpȩmo̧ mire damȩrȩ ni̧bä chjaorëremȩdejȩrȩ: —Danȩrȩ, Ütë tjamo̧ pio judi chjadëri̧ jape chjaodidibe —yo̧a̧dejȩrȩ—. Jabechji̧ mȩnȩro̧ pio coa irä daea̧ tara, cüdë japea̧ pio ju̧i̧ irä daea̧ tara, jabechji̧ chjadëri̧ jape chjaodidibe.

²⁴ Jabechji̧ Ütërë ea jana̧ chjadüa̧ oa ni̧bärëreji̧ri̧ pio judiro̧ irä datämi̧ cjia tjamo̧rëreji̧ri̧diro̧coe, chiri ütë cjo̧ro̧rëreji̧ri̧ pio judiro̧borë. Tjamo̧ davä. Pio mȩnȩro̧ coa irä da̧mi̧ dari̧ datämi̧ cjia tjamo̧rëreji̧ri̧diro̧coe. Jabo cjäri̧ madiro̧coe, datämi̧ cjiaji̧ri̧borë dadëa̧diro̧coe. Jabechji̧ cüdë jabë birë ma̧na̧dëa̧ tara, irä darea̧ dadëa̧diro̧coe. Ado mȩnȩro̧ coa irä ta̧rëa̧mi̧ dari̧ peaja̧di ta̧rëtämi̧ cjia tjamo̧rëreji̧ri̧diro̧coe. Jabo ta̧rëtämi̧ cjiaji̧ri̧borë, cjäri̧ madirȩ, irä ta̧rërea̧ dadëa̧diro̧coe. Jabo pio mȩnȩro̧ coa irä darea̧ dapea̧ oa, pio mȩnȩro̧ coa irä ta̧rërea̧ dapea̧ oa, jabechji̧ chjadëri̧ yürürëremȩdidibe Ütë tjamo̧ judi. Aja̧, pio ju̧i̧ yo̧tämi̧ cjiarequededibe —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Na̧rȩrea̧ ma̧ȩmi̧ da oa ni̧bä chjaorëremȩdejȩrȩ Jechu judi Chamariaräpȩ cjo̧ro̧mȩ pio ju̧i̧ chjiari

²⁵ Ado cja̧rȩmo̧ doremȩrä, tjamo̧ri̧ dabamȩ judi, Moicherë go̧ȩparërea̧ ma̧ȩ oa tjamo̧ a̧ra̧ano̧mȩ pio judi iëno̧ë ta̧rërëremȩdejȩ Jechu ju̧i̧. Jabechji̧ Jechu pio ju̧i̧ ütarami̧ dari̧ japapea̧ oa, puëräpȩ choë cjätämi̧ dari̧ cjiadiä tänȩpea̧ oa, iëno̧ë ta̧rëa̧dejȩ, chjadëri̧ jo̧rȩtadëmȩrȩ. Ja̧di ta̧rëri̧ yo̧mȩrȩ iëno̧ë ta̧rëa̧dejȩ: —A̧ra̧ano̧mȩ —yo̧a̧dejȩ—. ¿Tjana̧ oa japatäremȩrequede cüdë bucho ana̧ cjo̧ro̧rea̧ dapea̧ oa? Pio ju̧i̧ chjadëri̧ yo̧coe —yo̧a̧dejȩ.

²⁶ Ado Jechu judi dëbë yo̧a̧dejȩ: —¿Tjana̧ yo̧diibe tüdüa̧mi̧ darä cjo̧ro̧pea̧ ma̧ȩ üdë? Moicherë go̧ȩparërea̧ ma̧ȩ üdë ¿tjana̧ yo̧diibe —dëbë yo̧a̧dejȩ.

²⁷ Ado pumȩ üdë dëbë yo̧a̧dejȩ: —Tjana̧ yo̧dë, jabechji̧ ibëa̧ Ano̧mȩ Ütë pio ju̧i̧ ea tjamo̧pea̧de urëdi tjamo̧ oa jo̧rȩtaji̧ri̧rȩ. Aja̧, ibëa̧ jo̧rȩtarea̧ chji̧ codëmi̧ dara̧ pio ju̧ri̧ra̧ eapea̧de, chji̧ pënȩmi̧ dadë maeara̧. Aja̧, a̧ro̧rȩ nö̧tarä yuro eapea̧de, ibëa̧ yadë maeara̧. Jabechji̧ ibëa̧ tjo codëmi̧ dara̧ pio ju̧ri̧ra̧ eapea̧de. Tjamo̧ davä. Ibëa̧ icjara oa nȩmȩparea̧ decjiari̧, ibëa̧ icjara oa ja̧bopea̧ oa yürürea̧mi̧ dari̧ ea tjamo̧pea̧de ibëa̧ tjo codëmi̧ dara̧ pio ju̧ri̧ra̧. Ado ibëa̧ bë queri̧ cjo̧ro̧mȩ pio ju̧i̧, jabechji̧ ibëa̧ i pio ju̧i̧ eami̧ eapea̧de. Aja̧, pio jiro ma̧ȩ oa ta̧rëdiäpea̧de —yo̧mȩrȩ dëbë yo̧a̧dejȩ pumȩ üi̧ üdë Jechu pio ju̧i̧iäpȩmo̧.

²⁸ Ado Jechu judi dëbë yo̧a̧dejȩ: —Aja̧, coëma cjiari̧ dëbë yo̧a̧renȩque. Ado pio ju̧i̧iä yo̧requedemȩ. Jabechji̧ ja̧di dari̧ japamȩrȩ cjo̧ro̧vä, mënȩ yo̧a̧mi̧ —yo̧a̧dejȩ.

²⁹ Jabo pio jiro üi̧ üdë, Moicherë go̧ȩparërea̧ ma̧ȩ oa a̧ra̧ano̧mȩ pio judi dabarëremȩde pio jȩa chjiari. 'Aja̧, ca̧ pumȩ pio ji̧ri̧mo̧i̧ eaquiji̧ri̧da, jabo o ji̧ri̧ tjamo̧ri̧ eadëqui̧ji̧ri̧da, ca̧ pumȩdë pio ji̧ri̧ tjamo̧ri̧ eadëquiji̧ri̧da, jabechji̧ judiodë tara eadëquiji̧ri̧da, ado cüdë ja̧di dari̧ eadëpea̧ üdë jabechji̧ jirodida' quëna̧ jo̧rȩtarëremȩde, coëma cjiari̧ jo̧rȩtadëmȩrȩ. Ado ja̧di dari̧ jo̧rȩtamȩrȩ dëbë yo̧a̧dejȩ Jechu ju̧i̧: —¿Jabo tjana̧ pumȩ pio ji̧ri̧ chjiari yo̧de ma̧ȩ üdë? "Na̧ i pio ju̧i̧ eami̧ eajȩrȩ pumȩ ji̧ri̧" yo̧a̧ ji̧, ¿chjia tjamo̧ pio ji̧ri̧iäpȩmo̧ eapea̧de? Chjadëri̧ yo̧coe —dëbë yo̧mȩrȩ iëno̧ë ta̧rëa̧dejȩ Jechu ju̧i̧, a̧dë chiquimi̧ dari̧ japatämi̧ cjiamȩrȩ.

³⁰ Jabo Jechu judi dëbë yo̧mȩrȩ ni̧bä chjaoa̧dejȩ pio jiro üi̧ oa. Aja̧, na̧rȩrea̧ ma̧ȩmi̧ dara̧ pio ju̧ri̧ra̧ dëbë yo̧a̧dejȩ pio ju̧i̧ chjadëri̧ daba tänȩpea̧ oa: —Danȩ, judiorë järëremȩde —yo̧a̧dejȩ—. Jerucharȩ bë ma̧ri̧ri pio judiri go̧dümȩrȩ järëremȩde Jerico quȩmȩ bë ma̧ri̧räpȩmo̧. Jabo cjäri̧ madiro̧jo̧ȩ, garüji̧ri̧ pio judiro̧ chjaodëri̧ acji bagura̧diro̧jo̧ȩ. Ado pio ju̧i̧ goae tarari̧ cjae cjae gua ëte, goe chiari̧ japa ëte, baë mitëa̧diro̧jo̧ȩ jibëa̧ chjiboremȩ chjö̧na̧i̧ oa. Ado chjaodëri̧ ja̧bopai̧ dari̧ cjiamȩ oa a̧dë baäa̧diro̧jo̧ȩ järea̧ no̧ yuroro a̧rȩmȩ oa, ma̧i̧ da co chiamȩ oa.

³¹ Ja̧dëa ji̧ japamitë chjätä ëte, judio judi, o ji̧ri̧ chjiari goë tuti ja̧bepamȩ pio judi chjätärëremȩde pio ju̧ri̧pȩ, pumȩrȩ a̧rȩmȩ no̧räpȩ ju̧ri̧. Jabo daburo a̧rȩmȩ pio ju̧i̧ chjadëri̧ a̧dotärea̧ ji̧, cjäri̧ madejȩ, daimo̧ a̧dë chjätärëremȩde, a̧rȩmȩ pio ju̧i̧iäpȩ chjätädëri̧ cjiamȩrȩ.

³² Ja̧dëa ji̧ ji̧dë duri oa ji̧dë u̧i̧ japamitë chjätä ëte, ado cja̧rȩmo̧rȩ chjätärërëmȩde, Devi pio judiri ja̧mȩ üdë, Ütë tjamo̧ ja̧ bëräpȩ a̧domȩ pio judi. Jabo pio judi chjadëri̧ a̧dotärea̧ ji̧, cjäri̧ madejȩ, pio judiborë damȩrȩ daimo̧ a̧dë chjätärëremȩdejȩ, a̧rȩmȩ ja̧ queri̧räpȩ chjätädëri̧ cjiamȩrȩ.

³³ Jabo ja̧dëa ji̧ ji̧dë u̧i̧ japamitë chjätä ëte, Chamariaräpȩ cjo̧ro̧mȩ pio judiborë chjätärëremȩde. Ado pio jiro judio oa daea̧ ji̧, ja̧bopea̧ querediä tjamo̧mȩ oa daea̧ ji̧, jabechji̧ cjäri̧ri̧ cjiamȩrȩ daea̧dejȩ. Jabechji̧ judio judiro̧ Chamariaräpȩ cjo̧ro̧ji̧ri̧ pio ji̧ri̧ badë dae chjaoräbo, jabechji̧ a̧dotämi̧ cjiamȩrȩ daea̧dejȩ.

³⁴ Ado pio ju̧i̧iä a̧doa̧dejȩ. Jibëa̧ co ji̧ra̧ oa joarëremȩdejȩ yo̧ra̧, uva ui cho̧ro̧ cho̧ro̧ara̧ peaja̧di. Ado ja̧di dari̧ japa ëte, jibëa̧ co oa chjibo cotora̧ chjadëri̧ puri ëte, bua tänȩrëremȩdejȩ jibëa̧ buroro. Ado ja̧di dari̧ japa ëte, ëba baärëremȩdejȩ mo̧a̧rea̧ bëräpȩ, chëre yürüa̧ ba oa mo̧a̧rea̧ bëräpȩ. Ado pio ju̧ri̧ chjadëri̧ jidarëremȩdejȩ.

³⁵ Ado ja̧dëa ji̧ dopea̧rä Chamariaräpȩ cjo̧ro̧mȩ pio judi yürüa̧dejȩ bë ana̧mȩ pio ju̧i̧iäpȩmo̧ yo̧a̧ri̧ chëre oa, parata chëre oa. Ado yo̧a̧dejȩ: —Danȩ, chjadëri̧ jidajo̧ȩ co chiamȩ pio ju̧i̧. Ado cüdë yürüa̧ chëre üdë nö̧tadërä judi, jabechji̧ a̧de ba ano̧parequedemȩ cüdë ado chjätärä. Jabechji̧ chjadëri̧ jidajo̧ȩ —yo̧a̧dejȩ. Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩ Jechu judi a̧ra̧ano̧mȩ oa, Moicherë go̧ȩparërea̧ ma̧ȩ oa a̧ra̧ano̧mȩ pio ju̧i̧.

³⁶ Ado ja̧dëa ji̧ Jechu judi iëno̧ë ta̧rëa̧dejȩ, jënȩ pea ni̧bä chjaoa̧ pio ju̧i̧ chjiari: —Danȩ, tjarari̧rëreji̧ri̧dirȩ chjätäa̧ji̧ri̧ judiro̧. Jabo yo̧coe, ¿Chjia tjamo̧rëremȩde judio pio ju̧i̧ tjamo̧ri̧ eamȩ judi? ¿Chjia tjamo̧rëremȩde garüji̧ri̧ pio ji̧ri̧iä gu̧na̧ oa cjiarëremȩ pio ju̧i̧ eamȩ judi? —iëno̧ë ta̧rëa̧dejȩ.

³⁷ Ado a̧ra̧ano̧mȩ judi: —Chjiadëde, jabechji̧ pio ju̧i̧iäpȩmo̧ cjäri̧ri̧ cjia daea̧mȩ pio judide —dëbë yo̧a̧dejȩ. Ja̧dëa ji̧ Jechu judi a̧de yo̧a̧dejȩ: —Jabechji̧ peaja̧dimi̧ dari̧ japamȩrȩ cjo̧ro̧vä —yo̧a̧dejȩ.

Jechu judi goëdepea̧dejȩ Marta pio ji̧, Maria pio ji̧bo

³⁸ Ado Jechu judi, jibëa̧ jadüborë ji̧dë u̧i̧ jachi oa järërea̧ ji̧, bë ma̧ri̧ boi̧chji̧räpȩ yu̧a̧rëreji̧ri̧dirȩ. Ado Marta quȩyi̧ iei̧ pio jini̧ jibëa̧ bëräpȩ jana̧tä yo̧a̧nȩjȩrȩ.

³⁹ Ado Marta jini̧ yo̧a̧ oaiä, jabechji̧ jäa̧dirȩ pio ji̧ ja̧ bëräpȩ. Ado yu̧a̧mȩrȩ taruparëremȩde Jechu judi a̧ra̧ano̧pea̧ ji̧. Ado Marta ja̧ duriyi̧ jini̧, Maria quȩyi̧ pio jini̧, jabechji̧ Jechu ja̧ yuroräpȩ ta̧rë chayi̧rȩ ta̧rë ja̧borëreyi̧nȩ judi a̧ra̧ano̧a̧ pio ju̧i̧.

⁴⁰ Jabo Marta jini̧ peaja̧di ta̧rë chatärea̧ ji̧, ta̧rë chadëa̧nȩ jabo jurarea̧ oa jëdano̧pea̧ pio ju̧i̧mo̧i̧ jo̧rȩtarëreyi̧nȩ. Ado pio ju̧i̧iä jäeno̧a̧nȩjȩ Jechu pio ju̧i̧iäpȩ. Ado yo̧a̧nȩjȩ: —Danȩ Ano̧mȩ, ¿bücjüri̧ cjiadënȩ pio coa chjiari? —iëno̧ë ta̧rëa̧nȩjȩ—. Danȩ, ca̧ oyi̧ jini̧ pio coa chjadëri̧ a̧dotärea̧ ji̧, jurarea̧ pio ju̧i̧ chjadëri̧ jëdano̧pea̧ ji̧ a̧dotärea̧ ji̧, a̧dodë mani̧que. Chja ja̧di yo̧je pio coa a̧dotä cüdë ca̧ea̧ma̧i̧ ja̧bepachea oa —yo̧a̧nȩjȩ.

⁴¹ Jabo Jechu judi dëbë yo̧a̧dejȩ: —Damȩ Marta, ca̧ jadü. Chjadëri̧ ta̧rëcoa —yo̧a̧dejȩ—. Jabechji̧ dami̧ti̧ oa jo̧rȩte chjaoyi̧rȩ bücjüri̧ cjia tjamo̧mȩ.

⁴² Jabo damȩ, cja̧rȩmȩ pio ju̧i̧mo̧i̧ bücjüri̧ cjiatäreyi̧mȩ jabo. Jabechji̧ cüdë a̧ra̧ano̧a̧ pio ju̧i̧ chjadëri̧ dabapapea̧ pio ju̧i̧mo̧i̧ jo̧rȩtatäreyi̧mȩ. Damȩ Marta, na̧ oyi̧ jini̧, jabechji̧ ji̧dë u̧i̧ ba chia oa mitëa̧ni̧. Ado pio ju̧i̧iä tja̧reparȩrea̧mi̧dëquiji̧ —yo̧mȩrȩ yo̧rëremȩdejȩ Marta ji̧iäpȩmo̧ Jechu judi.