Lucas 1 - Biblia Pume

Taruparea̧ Ma̧ȩ

^1-3 Danȩ Tiopjiro, pumȩ ba chia tjamo̧mȩ oa go̧ȩpe chjadürequedemȩ. ¿Jabënȩ? ¿Jabë cjo̧ro̧ cjianȩ? 'Jabë cjo̧ro̧ cjia jirodida' quëna̧ jo̧rȩtamȩrȩ go̧ȩpe chjadürequedemȩ omȩ. Danȩ, pumȩ no̧i̧dërë peadëri ja̧ go̧ȩparëreji̧ri̧dirȩ Jechu pio ju̧i̧ chjiari, judi ibëa̧ chjarerä japarërea̧ pio ju̧i̧ chjiari. Ma̧ȩ ji̧ra̧ tjamo̧ oa go̧ȩparëreji̧ri̧dirȩ. Jabo jibëa̧ ma̧na̧ri̧ dabaji̧ri̧rȩ go̧ȩpadëa̧dirȩ jabo irä darëreji̧ri̧ pio ji̧ri̧iämo̧i̧ ta̧rë ëte go̧ȩparëreji̧ri̧dirȩ. Tjamo̧ davä. Jechu pio ju̧i̧iä peadëri ja̧ irä dabaparëreji̧ri̧ pio ji̧ri̧iä ta̧rë ëte go̧ȩparëreji̧ri̧dirȩ pio ibë chjadëri̧ daba tänȩpea̧ oa. Ado pio cüdëborë peadëri ja̧ chjadëri̧ dabapea̧ oaiä, irä darëreji̧ri̧ pio ji̧ri̧iä peaja̧di chjadëri̧ iëno̧ iëno̧ ta̧rëa̧ oaiä, 'jaeboquëda, pio cüdëborë chjadëri̧ go̧ȩparea̧mi̧ daquëda, pio cüdëborë Jechu pio ju̧i̧ chjiari coëma cjiari̧ ütara̧mi̧ go̧ȩpatäremȩquëda' quëna̧ jo̧rȩtamȩpea̧mȩrȩ go̧ȩpe chjadürequedemȩ Tiopjiro.

⁴ Jabechji̧ mȩnȩ tjamo̧ri̧ dabapea̧ oa, mȩnȩ ta̧rëa̧ pio ju̧i̧ chjiari baebaeami̧ dari̧ jo̧rȩtachea oa, jabechji̧ chjadëri̧ ütara̧mi̧ go̧ȩpe chjadürequedemȩ, mȩnȩ tjamo̧ri̧ dabapea̧ oa, 'Aja̧, coëma cjiari̧ dabaquëda' quëna̧ jo̧rȩtarea̧ dapea̧ oa.

Jabërä ma̧ȩ yürürëremȩde a̧dërimȩ mu̧i̧tjoi̧ üdë Juan pio ju̧i̧ chjiari, go̧ȩ cjaeä chudapamȩ pio ju̧i̧ chjiari

⁵ Erode quȩmȩ pio judi Judea quȩmȩ chiriräpȩ ütëmȩrȩ cjo̧ro̧rërea̧ ji̧, jabechji̧ Chacaria quȩmȩ pio judi cjo̧ro̧rëremȩde, judiomȩrȩ. Ütë tjamo̧ ja̧ bëräpȩ ja̧bepamȩrȩ cjo̧ro̧rëremȩde, o ji̧ri̧ chjiari goë tuti ja̧bepamȩrȩ. Ado Abia quȩmȩ pio judiri ja̧ji̧ri̧ pio ji̧ri̧ nö̧ta ja̧bepamȩrȩ cjo̧ro̧rëremȩde, Abia quȩmȩ bubarä. Ado Chacaria ja̧ iei̧ pio jini̧, Ichabe quȩyi̧rëreyi̧nȩ. Ado judiro̧ yo̧a̧ri̧borë pearä cjo̧ro̧rëremȩ goë tuti ja̧bepamȩ pio judiri ja̧ji̧ri̧rȩ cjo̧ro̧rëreji̧ri̧dirȩ, Aro̧ quȩmȩrea̧ pio judiri ja̧ji̧ri̧rȩ. Tjamo̧ davä. Aro̧ quȩmȩrea̧ pio judiri ja̧yi̧rȩ cjo̧ro̧rëreyi̧nȩ, tjamo̧ goë tuti ja̧bepamȩ pio judiri ja̧yi̧rȩ.

⁶ Ado judiro̧ yo̧a̧ri̧borë coëma cjiari̧ cjo̧ro̧rëreji̧ri̧dirȩ Ütë tjamo̧ pio ju̧i̧iä. Jabechji̧ järi tjamo̧rëreji̧ri̧dirȩ Ano̧mȩ ja̧ ma̧ȩ oa ta̧rëdiäpea̧ ji̧. Tjamo̧ davä. Tüdüa̧mi̧ darä cjo̧ro̧pea̧ ma̧ȩ chjö̧na̧i̧ oa ta̧rëdiäpea̧ ji̧ järi tjamo̧rëreji̧ri̧dirȩ, pumȩ judiro̧ pio jibëiäpȩmo̧ aechide yo̧rea̧mi̧dëri̧.

⁷ Jabo judiro̧ jibëa̧ u̧ri̧ ëbatärea̧ ji̧, cjäri̧ madirȩ, ëbadë marëreji̧ri̧dirȩ. Jabechji̧ Ichabe pio jini̧ bo mai tänȩrea̧mi̧dë tara, judiro̧ pea ëbari ja̧ bo mai tänȩrea̧mi̧dë tara, jabechji̧ ëbadë marëreji̧ri̧dirȩ. Ado pio ju̧i̧iä jibëa̧ u̧ri̧ ji̧ri̧ nö̧rirea̧ dadëji̧ri̧rȩ ütama̧i̧ tjamo̧pe bagarëreji̧ri̧dirȩ.

⁸ Ado cja̧rȩmȩ doremȩrä, Chacaria judi, goë tuti ja̧bepamȩ pio judi ja̧beparëremȩde Ütë tjamo̧ ja̧ oa jibëa̧ bëräpȩ ju̧ri̧. Jabechji̧ ado cja̧rȩmo̧ bubarë ja̧beparërea̧ ji̧, Abia quȩmȩ pio judiri ja̧ji̧ri̧ pio judiro̧ ano̧ mireriä ja̧bepaji̧ri̧pea̧dirȩ pio jiro chemanarä. Ado pio ju̧i̧iä Chacaria pio judi yu̧a̧rëremȩde Ütë tjamo̧ ja̧ oa ja̧bepapea̧ oa.

⁹ Jabo jibëa̧ ma̧na̧ri̧ jo̧rȩtamȩrȩ yu̧a̧dëa̧de, jabo mitëa̧ oa cjiamȩrȩ yu̧a̧rëremȩde goë tuti ja̧bepaji̧ri̧ pio judiro̧ quȩ chiamȩ mitërea̧ ta̧dë oa mitëa̧ oaiä. Jabechji̧ judiro̧ japariärërea̧mi̧ japariärëreji̧ri̧dirȩ. Ado Chacaria pio ju̧i̧ ja̧ quȩ oa mitëa̧ oaiä, jabechji̧ yu̧a̧rëremȩde Ano̧mȩ ja̧ bëräpȩ. Aja̧, goaeri̧ pjȩa̧mȩ cäarea̧ pio ju̧i̧ cäapea̧ oa yu̧a̧rëremȩde.

¹⁰ Ado judi jo̧ tjoräpȩ cäa̧ nö̧ta, no̧i̧dë tjamo̧rëreji̧ri̧dirȩ dairäpȩ cjiadiäa̧ji̧ri̧ judiro̧, Ütë tjamo̧ pio ju̧i̧iäpȩmo̧ chjacjiamȩri̧ ni̧bäji̧ri̧ pio judiro̧.

¹¹ Ado Chacaria judi Ütë tjamo̧ ja̧ bërä cäa̧ nö̧ta, a̧dërimȩ mu̧i̧tjoi̧ pio judi chjaodëri̧ idëparëremȩdejȩ. Tjamo̧ davä. Ano̧mȩ judi a̧dëri pio judiri chjadüa̧ mu̧i̧tjoi̧ pio judi chjaodëri̧ idëparëremȩde, cäarea̧ mechja cotoräpȩ ju̧ri̧.

¹² Ado Chacaria judi, cjäri̧ madejȩ, pio ju̧i̧ daea̧ oaiä, chjaodëri̧ boadärärëremȩdejȩ uaparea̧ üdë. I ma̧na̧ gura jämȩrȩ darëremȩdejȩ.

¹³ Jabo mu̧i̧tjoi̧ üdë yo̧a̧dejȩ: —Danȩ Chacaria, uapadëvä —yo̧a̧dejȩ—. Ütë tjamo̧ judi ta̧rë ja̧boa̧dimȩ. Mȩnȩ pio ju̧i̧iä bo pio ju̧i̧ chjiari cjo̧dëa̧ pio ju̧i̧ chjadëri̧ ta̧rë ja̧boa̧dimȩ. Ado pio ju̧i̧iä na̧ iei̧ pio jini̧ arapanȩ —yo̧a̧dejȩ—. Tjamo̧ davä. Na̧ iei̧ pio jini̧, Ichabe quȩyi̧ pio jini̧ üi̧ boi̧ oa arapanȩ mȩnȩ pio ju̧i̧iä cjo̧dëa̧mi̧. Ado danȩ, na̧ iei̧ jini̧ pio ju̧i̧ ara̧rä, jabechji̧ Juan quȩra̧ quȩpapea̧ chiarenȩ.

¹⁴ Ado a̧dë chjäte ma̧ chiadëri̧ cjiaparenȩ na̧ iei̧ jini̧ ara̧ pio ju̧i̧iä. Ado mȩnȩmo̧rȩdë jabo no̧i̧dërë ma̧ chiadëri̧ cjia tjamo̧padirȩ peaja̧di judi ara̧ oa cjiarä.

¹⁵ Ado Ano̧mȩ judi na̧ ja oa darä, 'jabechji̧ pumȩ ba chia tjamo̧dida’ quëna̧ jo̧rȩtamȩrȩ dapadejȩ. Ado danȩ, na̧ ja pio judi cjo̧ro̧a̧ nö̧ta, jabechji̧ bino quȩmȩ ërü oa jaradëmȩrȩ cjo̧ro̧pade. Jabechji̧ eami̧ ërü oa jaradëmȩrȩ cjo̧ro̧pade. Jabechji̧ china̧chjapade pio ju̧i̧iä. Ado pio ju̧i̧iä jaradëpea̧de. Ado danȩ, na̧ ja judi Tjo tjamo̧ ja̧ chja̧oerä cjo̧ro̧pade judi jabë ara̧dëri ja̧.

¹⁶ Ado na̧ ja pio judi a̧ra̧ano̧a̧ oaiä, Icharai pio judiri ja̧ji̧ri̧ pio judiro̧ no̧i̧dërë ano̧ mire jo̧rȩtapadirȩ, jënȩro̧ chjai̧dëri̧ japea̧ pio ju̧i̧ putu jura̧ a̧dë chami̧ dari̧. Tjamo̧ davä. Judiro̧ Juan pio ju̧i̧ ta̧rë ja̧boa̧ oaiä, jabechji̧ jibëa̧ Ano̧mȩ Ütë pio ju̧i̧ ado chjereno̧ chjacjiamȩri̧ jo̧rȩtapadiro̧jo̧ȩ.

¹⁷ Jabechji̧ Ano̧mȩ pio judi birë ma̧na̧bea yaboi̧ tarupapade na̧ ja judi a̧ra̧ano̧pea̧ ji̧. Ado judi a̧ra̧ano̧pea̧ oa tarupë ma̧na̧rä, jabechji̧ oëadëmȩmi̧ dari̧ a̧ra̧ano̧pade. Jibëa̧ ju chiarea̧ra̧ a̧ra̧ano̧dëpade jabo Ütë tjamo̧ pio judi yürüa̧ ju chiarea̧ra̧ pio ju̧ri̧ra̧ a̧ra̧ano̧pade. Jabechji̧ Eria quȩmȩrea̧ pio judimi̧ dari̧ a̧ra̧ano̧mȩrȩ cjo̧ro̧pade. Tjamo̧ davä. No̧mȩ tjamo̧ri ja̧ cjo̧ro̧rëremȩ pio judimi̧ dari̧, Eria quȩmȩrea̧ pio judimi̧ dari̧ a̧ra̧ano̧pade, Ütërë ea jana̧ chjadüa̧ oa ni̧bärëremȩ pio judimi̧ dari̧. Jabechji̧ na̧ ja pio judi a̧ra̧ano̧a̧rä, pumȩ judiro̧ chjadëri̧ jëdano̧rea̧ dapadirȩ. Jabechji̧ u̧ri̧ ëbaji̧ri̧ pio judiro̧ chjadëri̧ jëdano̧rea̧ dapadirȩ jibëa̧ u̧ri̧ pio ji̧ri̧ nö̧ta, judiro̧ ado chjereno̧ ori̧ bagari̧ ëba cjo̧ro̧rea̧mi̧ dari̧. Ado judi a̧ra̧ano̧a̧rä, peaja̧di ta̧rëdiädëri̧ cjiareji̧ri̧ pio judiro̧ ado chjereno̧ ta̧rë ja̧bopadiro̧jȩrȩ coëma cjiari̧ cjo̧ro̧ji̧ri̧ pio ji̧ri̧. Tjamo̧ davä. Pio judi a̧ra̧ano̧a̧ oaiä, Ütë tjamo̧ ja̧ ma̧ȩ oa ta̧rëdiädëri̧ cjiareji̧ri̧ pio judiro̧ ado chjereno̧ ta̧rë ja̧bopadiro̧jo̧ȩ a̧dëri dabarea̧ pio ju̧i̧, coëma cjiari̧ cjo̧ro̧ji̧ri̧ pio judiro̧ ni̧bäa̧ duri pio ju̧i̧. Aja̧ Chacaria, ja̧di ta̧rëri̧ a̧ra̧ano̧pade na̧ ja pio judi. Ja̧di dari̧ a̧ra̧ano̧pade ütëborë chjadëri̧ jëdano̧a̧ oa cjiapea̧ oa, pumȩ judiro̧ jibëa̧ Ano̧mȩ pio ju̧i̧ chjadëri̧ jidataji̧ri̧rȩ cjo̧ro̧pea̧ oa —yo̧mȩrȩ ni̧bä chjaorëremȩdejȩ Chacaria ju̧i̧ a̧dërimȩ mu̧i̧tjoi̧ pio judi.

¹⁸ Jabo Chararia judi pio ju̧i̧ ta̧rëa̧ oaiä, ja̧di ta̧rëri̧ iëno̧ë ta̧rëa̧dejȩ mu̧i̧tjoi̧ pio ju̧i̧: —Jabo cjäri̧ marequede, ¿yö̧ta dari̧ tjamo̧ri̧ dabarea̧ daparequede mȩnȩ coa yo̧a̧ pio ju̧i̧ chjiari? Jabechji̧ peadëri ja̧ ütama̧i̧ tjamo̧pea̧requede cüdë. Ado ca̧ iei̧ pio jini̧borë ütai̧pea̧nȩ. Bo nö̧rirea̧mi̧dëpea̧nȩ. Ado pio ju̧i̧iä cjäri̧ marea̧rȩ, tjamo̧ri̧ bo nö̧rirea̧mi̧dëpea̧rea̧rȩ —dëbë yo̧a̧dejȩ.

¹⁹ Jabo a̧dërimȩ mu̧i̧tjoi̧ pio judi dëbë yo̧a̧dejȩ: —Danȩ, Gabriel quȩmȩ pio judirequede cüdë. Ado Ütë tjamo̧ pio ju̧i̧ ja̧ dëbëräpȩ cjiaremȩrȩ ma̧ȩ yürera̧pea̧requedemȩ. Jabechji̧ pio judi chjadüa̧dique cüdë pio mȩaiäpȩmo̧ ma̧ȩ chjadë oa yürüpea̧ oa na̧ ja pio ju̧i̧ chjiari.

²⁰ Jabo yaba̧ mȩnȩ pio coa quëna̧dëa̧ tara, jabechji̧ ya cotomi̧ dari̧ cjiadiäparenȩ, boi̧chji̧ pio judi ara̧rä yuro. Tjamo̧ davä. Na̧ ja judi ara̧rä yuro eami̧ oa ni̧bärea̧ dadëparenȩ. Jabo mȩnȩ quëna̧dëa̧räbo, jabechji̧ mȩa yo̧a̧ pio ju̧i̧ japadäräpade Ütë tjamo̧ judi jënȩ ütara̧ japamitërä. Ado ja̧dëa ji̧ ji̧dë duri oa na̧ ja pio judi ara̧ oa cjiarä, jabechji̧ ado chjereno̧ ni̧bärea̧ daparenȩ —yo̧mȩrȩ yo̧rëremȩdejȩ a̧dërimȩ mu̧i̧tjoi̧ judi.

²¹ Ado Chacaria judi Ütë tjamo̧ ja̧ bëräpȩ cjia̧ nö̧ta, dairäpȩ cjiadiäa̧ji̧ri̧ pio judiro̧ jidatarëreji̧ri̧diro̧jo̧ȩ. '¿Jabo tjana̧ ju̧i̧iä japamitë ana̧ri̧ cjiadiäa̧dida’ quëna̧ jo̧rȩtaji̧ri̧rȩ jidatarëreji̧ri̧diro̧jo̧ȩ.

²² Ado ja̧dëa ji̧ japamitë chjätä ëte judi go̧düa̧rä, judi jidatareji̧ri̧ pio ji̧ri̧iäpȩmo̧ chjadëri̧ ni̧bätärea̧ ji̧, cjäri̧ madejȩrȩ, ni̧bärea̧ dadëa̧dejȩrȩ jabomo̧ ichi maeara̧ na̧rȩrëremȩdejȩrȩ. Ado pio ju̧i̧ daea̧ oaiä, ‘jabo cjäri̧ madida, ni̧bärea̧ chiadëmȩpea̧dida, jabechji̧ Ütë tjamo̧ pio judi darämi̧ cjia tänȩa̧ jirodiji̧da, Ütë ja̧ bërä ju̧ri̧ darämi̧ cjia tänȩa̧ jirodiji̧da’ quëna̧ jo̧rȩtaji̧ri̧rȩ daea̧diro̧jo̧ȩ.

²³ Ado ja̧dëa ji̧ Ütë tjamo̧ ja̧ bëräpȩ ja̧beparea̧ japamitë üdë goarijäa̧rä, ja̧beparea̧ chemana üdë goarijäa̧rä, jabechji̧ ado chjereno̧ baärëremȩde Chacaria judi.

²⁴ Ado japamitë boi̧chji̧ chjätä ëte, jibëa̧ iei̧ pio jini̧ bomai̧yi̧pea̧nȩ. Tjamo̧ davä. Jibëa̧ iei̧ pio jini̧, Ichabe pio jini̧ boma̧i̧pea̧nȩ bo maidëyi̧rȩ cjo̧ro̧rërea̧ ji̧. Ado pio ju̧i̧iä jibëa̧ bëräpȩ cjiadiärëreyi̧nȩ 5 gupënȩ nö̧ta.

²⁵ Ado ja̧di ta̧rëri̧ yo̧rëreyi̧nȩ: "A̧dë chjäte chjadëri̧ japea̧dique Ano̧mȩ pio judi" yo̧a̧nȩ. "Jabechji̧ cüdë idëri̧ cjiayi̧rȩ cjo̧ro̧rërea̧ ji̧, cüdë bomaipe bagarea̧ dadëa̧ oaiä idëri̧ cjiayi̧rȩ cjo̧ro̧rërea̧ ji̧, jabechji̧ chjadëri̧ cjo̧ro̧yi̧pea̧requede yaba̧. Ado pio ju̧i̧iä yo̧requede." Aja̧, ja̧di ta̧rëri̧ yo̧rëreyi̧nȩ Ichabe pio jini̧ a̧dë chjäte ma̧ chiadëri̧ cjiayi̧rȩ.

Jechu judi arapea̧ pio ju̧i̧ chjiari jabërä ma̧ȩ yürürëremȩde a̧dërimȩ mu̧i̧tjoi̧ pio judi

²⁶ Ichabe jini̧ 6 gupënȩ bo maiyi̧pea̧rä, jënȩ bomaiyi̧pea̧ri ja̧ 6 gupënȩ goayi̧pea̧rä, Ütë tjamo̧ judi chjadürëremȩde jibëa̧ mu̧i̧tjoi̧ pio ju̧i̧ Nachare quȩmȩ bë ma̧ri̧räpȩ. Tjamo̧ davä. Chjadürëremȩdejȩ Gabriel pio ju̧i̧ Garirea quȩmȩ chirirä cjiamȩ bë ma̧ri̧räpȩ ju̧ri̧.

²⁷ Üi̧rȩ cja̧rȩmȩ co ëba mo̧a̧dëa̧ iei̧ pio ji̧iäpȩmo̧ chjadürëremȩdejȩ Maria quȩyi̧ pio ji̧iäpȩmo̧. Jabechji̧ yürë cji̧däa̧ oa cjiarëreyi̧nȩ Joche pio ju̧i̧, ütë Davirea̧ pio judiri ja̧mȩ pio ju̧i̧. Pio ju̧i̧ ja̧ iei̧payi̧rȩ yürë cji̧däa̧ oa cjiarëreyi̧nȩ.

²⁸ Ado Gabriel judi pio ji̧iäpȩ cjiadäräa̧mȩrȩ yo̧rëremȩdejȩ: —Damȩ iei̧, ma̧ chiadëri̧ cjiaje —yo̧a̧dejȩ—. Jabechji̧ Ano̧mȩ pio judi a̧dë chjäte cjäri̧ri̧ cjia dadima̧. Pio mȩadimȩdi —yo̧a̧dejȩ.

²⁹ Jabo Maria jini̧ pio jiro ma̧ȩ oa ta̧rëa̧rä, ana̧ri̧ jo̧rȩtayi̧pea̧nȩ. '¿Jabo tjana̧ yo̧cjivadicoa, ¿tjana̧ ju̧i̧iä ja̧di ta̧rëri̧ yo̧cjivadicoada a̧dërimȩ mu̧i̧tjoi̧ üdë' quëna̧ jo̧rȩtayi̧pea̧nȩ, ana̧ri̧ jo̧rȩtayi̧rȩ.

³⁰ Jabo Gabriel judi yo̧a̧dejȩ: —Dame Maria, uapadëje. Jabechji̧ Ütë tjamo̧ pio judi cjäri̧ri̧ cjia da tjamo̧dima̧.

³¹ Jabechji̧ bomaiyi̧rȩ cjiadiäpamȩ, ado japamitë chjätä ëte, üi̧ boi̧ oa arapamu̧ni̧. Ado Jechu quȩra̧ quȩpapamu̧ni̧.

³² Ado ba chia tjamo̧padi. 'Jabechji̧ a̧dë chjäte Ütë pio ju̧i̧ ja̧ Jadida' quëna̧ jo̧rȩtaji̧ri̧rȩ yo̧padiro̧ju̧i̧. Ado pio ju̧i̧ uëri jibëa̧ tarurea̧ pio judi chiri ütëmȩrȩ cjo̧ro̧rërea̧mi̧ cjo̧ro̧padi peaja̧di, charea̧ ba chia tjamo̧ro chamȩrȩ. Tjamo̧ davä. Ano̧mȩ Ütë pio judi tänȩa̧ oaiä jibëa̧ tarurea̧ Davi pio judi ütëmȩrȩ cjo̧ro̧rërea̧mi̧ cjo̧ro̧padi peaja̧di, chiri ütë tjamo̧ cjo̧ro̧mȩpe bagapea̧ oa, Icharai pio judiri ja̧ji̧ri̧ pio ji̧ri̧ ja̧ chiri ütë tjamo̧ cjo̧ro̧mȩpe bagapea̧ oa.

³³ Tjamo̧ davä. Pio ji̧ri̧ ja̧ chiri ütëmȩrȩ bucho ana̧ ütëmȩrȩ cjiapadi, a̧dë chjäte tjamo̧ yo̧mȩrȩ —yo̧a̧dejȩ.

³⁴ Jabo Maria jini̧ iëno̧ë ta̧rëa̧dejȩ a̧dërimȩ mu̧i̧tjoi̧ pio ju̧i̧: —Jabo danȩ, ¿yö̧ta dari̧ ararea̧ daparequede? —iëno̧ë ta̧rëa̧nȩjȩ—. Jabechji̧ üi̧rȩ cja̧rȩmȩ co ëba mo̧a̧dëa̧ oa cjo̧ro̧requede cüdë.

³⁵ Jabo a̧dërimȩ mu̧i̧tjoi̧ pio judi dëbë yo̧a̧dejȩ: —Damȩ, Tjo tjamo̧ pio judi cjiana̧ra̧padima̧, mȩnȩ a̧dë chjäte jauëchjamȩ Ütë pio ju̧i̧ ja̧ chja̧oerä cjiarea̧mi̧ dari̧, pio mȩa bomai tänȩrea̧mi̧ dari̧ —yo̧a̧dejȩ—. Ado pio ju̧i̧iä mȩnȩ arapea̧ boi̧chji̧ üdë, jabechji̧ a̧dë chjäte tatachjamȩrȩ cjiadiäpadi, chjai̧dë oa chiarea̧ decjiamȩrȩ. Ado pumȩ judiro̧ chjadëri̧ yo̧padiro̧ju̧i̧. 'A̧ja̧, Ütë tjamo̧ ja̧ Jojadida' quëna̧ jo̧rȩtaji̧ri̧rȩ yo̧padiro̧ju̧i̧.

^36-37 Jabo damȩ, mȩnȩ pio yoa ma̧ȩ oa ta̧rëa̧ oaiä, 'cjäri̧ maquëda, bo maipe bagarea̧mi̧dëquëda' quëna̧ jo̧rȩtapai̧ da jiromȩ, jabo Ütë tjamo̧ pio judi chjaodëri̧ tänȩpai̧ dadima̧. Damȩ, na̧ jaiei̧ pio jini̧borë bomaiyi̧pea̧ni̧ peadëri ja̧. Tjamo̧ davä. Ichabe pio jini̧ bomaiyi̧pea̧ni̧ 6 gupënȩri ja̧. Ütai̧pea̧yi̧borë, bomaipe bagarea̧mi̧dëyi̧borë bo maipea̧ni̧ jibëa̧ üi̧ pio ju̧i̧iä Ütë tjamo̧ pio judi tänȩa̧ oa. Ado peaja̧di tänȩpai̧ dadima̧, mȩnȩ üi̧ pio ju̧i̧ nö̧ta ëba mo̧a̧dëräbo. Jabechji̧ japarea̧mi̧dë pio ju̧i̧ chjaodëri̧ japapai̧ dadiji̧ Ütë tjamo̧ judi. Eami̧ oa japarea̧ decjiaräbo, jabechji̧ Ütë tjamo̧ pio judi chjaodëri̧ japapai̧dadi davä, 'pio ju̧i̧mo̧i̧ japarea̧mi̧dëdida' quëna̧rea̧ decjiari̧ —yo̧mȩrȩ yo̧rëremȩdejȩ a̧dërimȩ mu̧i̧tjoi̧ pio judi Maria pio ji̧iäpȩmo̧.

³⁸ Ado Maria jini̧ pio jiro ma̧ȩ oa ta̧rëa̧ oaiä, ja̧di ta̧rëri̧ dëbë yo̧rëreyi̧nȩjȩ a̧dërimȩ mu̧i̧tjoi̧ pio ju̧i̧: —Ano̧mȩ pio ju̧i̧ ja̧ mu̧i̧tjoi̧requede —yo̧a̧nȩjȩ—. Ado jabechji̧ mȩnȩ coa yo̧a̧mi̧ japatädique. Mȩnȩ coa yo̧a̧mi̧ tjamo̧i̧padäräa̧ oa cjiatädique —yo̧a̧nȩjȩ. Ado ja̧dëa ji̧ a̧dërimȩ mu̧i̧tjoi̧ pio judi a̧dë cjaraparëremȩdejȩ.

Maria jini̧ goëde järëreyi̧nȩjȩ jibëa̧ jaiei̧ pio ji̧, Ichabe pio ji̧

³⁹ Ado do ji̧ra̧dë chjätä ëte, Maria jini̧ jëreeayi̧rȩ järëreyi̧nȩ Judea quȩmȩ chiriräpȩ, ya̧mi̧ ji̧ra̧ chiamȩ chirirä cjiamȩ bë ma̧ri̧räpȩ.

⁴⁰ Chacariarë cjo̧ro̧mȩräpȩ järëreyi̧nȩ. Ado jibëa̧ bëräpȩ yu̧a̧däräa̧yi̧rȩ jearëreyi̧nȩ Ichabe pio ji̧.

⁴¹ Ado Ichabe jini̧ Maria ja̧ ma̧ȩ oa ta̧rëa̧rä, ji̧ ja̧ ma̧cä joërämȩ pio judi chjaodëri̧ cjüdücjüdüparëremȩdejȩ. Ado Ichabe pio jini̧ Tjo tjamo̧ ja̧ chja̧oerä chjaodëri̧ cjiadiäyi̧pea̧nȩ.

⁴² Ado to̧bari̧ yo̧yi̧rȩ ja̧di ta̧rëri̧ yo̧rëreyi̧nȩjȩ Maria pio ji̧iäpȩmo̧: —Damȩ, Ütë tjamo̧ pio judi a̧dë chjäte chjadëri̧ japea̧dima̧ —yo̧a̧nȩjȩ—. Jabechji̧ na̧ Ja pio ju̧i̧iä, o ji̧ri̧ u̧i̧ chjadëri̧ japea̧dima̧. Ado pio ju̧i̧ uëri chjadëri̧ japea̧diji̧ na̧ Ja pio ju̧i̧ peaja̧di, na̧ u̧i̧ja̧ma̧cä joërämȩ pio ju̧i̧.

⁴³ Ado pio coabo chjadëri̧ japea̧dicoa. Jabechji̧ ca̧ Ano̧mȩ pio ju̧i̧ ja̧ ai̧ pio jini̧ coa goëdaera̧pea̧ oaiä, ado cüdë ca̧ Ano̧mȩ ja̧ joji̧ri̧ pio ji̧ irä da oaiä, jabechji̧ chjadëri̧ japea̧dicoa.

⁴⁴ Ado pio ju̧i̧iä mȩnȩ coa jea̧rä, cüdë na̧ ma̧ȩ pio ju̧i̧ ta̧rëa̧rä, jabechji̧ ca̧ u̧i̧ja̧ ma̧cä joërämȩ boi̧chji̧ pio judi ma̧ chiadëri̧ cjiamȩrȩ cjüdücjüdüparemȩdicoa pio yabo.

⁴⁵ Ado ma̧ chiadëri̧ cjia tjamo̧ tänȩtädima̧ Ütë tjamo̧ judi mȩnȩ chjaodëri̧ quëna̧yi̧pea̧ tara judi mȩa yo̧a̧ pio ju̧i̧. Tjamo̧ davä. Ano̧mȩ judi jibëa̧ mu̧i̧tjoi̧ pio ju̧i̧iä yo̧a̧ pio ju̧i̧ chjaodëri̧ ta̧rë ja̧boa̧ tara, judi pio mȩa chjiari yo̧a̧ pio ju̧i̧ chjaodëri̧ quëna̧yi̧pea̧ tara, jabechji̧ ma̧ chiadëri̧ cjia tänȩtädima̧ —yo̧yi̧rȩ ni̧bä chjaorëreyi̧nȩjȩ Maria ji̧ Ichabe jini̧.

Maria jini̧ chjacjiamȩri̧ jo̧rȩtayi̧rȩ ni̧bärëreyi̧nȩ, Ütë tjamo̧ pio ju̧i̧iäpȩmo̧ jo̧rȩtayi̧rȩ

⁴⁶ Ado Maria jini̧ pio ji̧ ta̧rëa̧ oaiä, Ichabe pio jini̧ yo̧a̧ pio ju̧i̧ ta̧rëa̧ oaiä, jabechji̧ ja̧di ta̧rëri̧ yo̧yi̧pea̧nȩ, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtayi̧rȩ: "Ca̧ chji̧ra̧ jo̧rȩtayi̧rȩ chacjiamȩri̧ jo̧rȩtayi̧pea̧quë Ano̧mȩ pio ju̧i̧" yo̧a̧nȩ.

⁴⁷ "Ado ca̧ tjo üdë a̧dë chjäte ma̧ chiadëri̧ cjiari̧ jo̧rȩtadi coa Chjätä Tänȩmȩ Ütë pio ju̧i̧iä.

⁴⁸ Jabechji̧ pio judi a̧dë chjäte chjamȩrȩ daea̧dicoa jibëa̧ mu̧i̧tjoi̧ ba chia tjamo̧dëyi̧ oa. Ado pio ju̧i̧iä ba chia jo̧rȩtapadiro̧coa pumȩ judiro̧. Tjamo̧ davä. Ji̧dë duri oa ano̧ mire cjo̧ro̧paji̧ri̧ pio judiro̧ ütëborë ba chia jo̧rȩtapadiro̧coa, ‘Ütë tjamo̧ judi chjadëri̧ japea̧diji̧da' quëna̧ jo̧rȩtaji̧ri̧rȩ.

⁴⁹ Jabechji̧ a̧dë chjäte ju chiamȩ Ütë judi tatachja tjamo̧di, chjai̧dë oa chiadëmȩrȩ. Ado pio coa a̧dë chjäte chjadëri̧ japea̧di" ni̧bäyi̧rȩ ni̧bärëreyi̧nȩ Maria jini̧.

⁵⁰ Ado ji̧dë u̧i̧ ni̧bäyi̧rȩ ja̧di ta̧rëri̧ a̧de yo̧rëreyi̧nȩ: "Jabechji̧ pio jȩaiäpȩmo̧ uapaji̧ri̧rȩ ba chia jo̧rȩtaji̧ri̧ pio ji̧ri̧ cjäri̧ri̧ cjia dae chjaodiji̧ri̧. Aja̧, pio ji̧ri̧ a̧do chjaodiji̧ri̧, pio judiri ja̧ji̧ri̧ pio ji̧ri̧bo, ado pio judiri ja̧ji̧ri̧ ja̧ u̧ri̧ pio ji̧ri̧bo. Jabechji̧ ji̧dë ma cjäri̧ri̧ cjiamȩrȩ dadiji̧ri̧.

⁵¹ Ado jibëa̧ ju chiarea̧ oa ana̧ri̧ na̧rȩmȩrȩ oëra̧ti̧ oa baä tänȩdiji̧ri̧ jibëa̧ chji̧rämo̧ jo̧rȩtaji̧ri̧ pio ji̧ri̧. Tjamo̧ davä. ‘Ba chia tjamo̧quëda' quëna̧ jo̧rȩtaji̧ri̧ pio ji̧ri̧, 'o ji̧ri̧iä ji̧dë u̧i̧ ba chiaquëda’ quëna̧ jo̧rȩtaji̧ri̧ pio ji̧ri̧ oëra̧ti̧ oa baä tänȩdiji̧ri̧ chjuchjupechä baärea̧mi̧ dari̧.

⁵² Jabechji̧ chiri ütë cjo̧ro̧ji̧ri̧ pio ji̧ri̧, 'ba chia tjamo̧a̧ro̧da' quëna̧ji̧ri̧ pio ji̧ri̧, jabechji̧ ütë cjatä tänȩdiji̧ri̧. Jabo tjaoëpai̧ dari̧ jo̧rȩtaji̧ri̧ pio ji̧ri̧, 'ba chiadëquëda' quëna̧ji̧ri̧ pio ji̧ri̧ ba chia tjamo̧parȩdiji̧ri̧, ba chia tjamo̧räpȩ ano̧ mire cha tänȩrea̧mi̧ dari̧.

⁵³ Ado ta̧mȩcho̧ ja̧boji̧ri̧ pio ji̧ri̧ chjadëri̧ yürüdiji̧ri̧, jabo ji̧ra̧ri̧ goaji̧ri̧ pio ji̧ri̧, jabechji̧ ichi maea oa baä tänȩdiji̧ri̧" yo̧rëreyi̧nȩ Maria jini̧, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtayi̧rȩ.

^54-55 Ado ji̧dë u̧i̧ ni̧bäyi̧rȩ ja̧di ta̧rëri̧ a̧de ni̧bärëreyi̧nȩ: "Jabechji̧ a̧ro̧rȩ pio ju̧i̧ ja̧ mu̧i̧tjoi̧a̧ro̧. Icharai pio judiri ja̧ji̧ri̧ pio judiro̧a̧ro̧. Ado pio ju̧i̧iä cjäri̧ri̧ cjiamȩrȩ a̧dodiibë. Jabechji̧ judi ibëa̧ ütëti̧rea̧ pio ji̧ri̧iäpȩmo̧ pearä yo̧ë cji̧därërea̧ pio ju̧i̧ jo̧rȩtadëpe bagadëa̧ oaiä, judi Abaraa̧ pio ju̧i̧iäpȩmo̧ yo̧ë cji̧därërea̧ pio ju̧i̧ jo̧rȩtadëpe bagadëa̧ oaiä, jabechji̧ ji̧dë ma cjäri̧ri̧ cjiamȩrȩ a̧do maeadiibë bucho ana̧." Aja̧ ja̧di ta̧rëri̧ yo̧yi̧rȩ yo̧rëreyi̧nȩ Maria jini̧.

⁵⁶ Ado Maria jini̧, jabechji̧ Ichabe pio ji̧ ja̧ bëräpȩ cjo̧ro̧rëreyi̧nȩ tjarari̧ gupënȩ nö̧ta. Ado pio jiro japamitë üdë goarijäa̧rä, jabechji̧ ado chjereno̧ baärëreyi̧nȩ jȩa nö̧rimȩ pio ju̧i̧ ja̧ bëräpȩ, jënȩ ütëparërea̧räpȩ.

Pio yoa ma̧ȩ üdë Juan judi ara̧ oa cjiarërea̧ pio ju̧i̧ chjiari ma̧ȩde. Aja̧, uirä chudarëremȩ pio ju̧i̧ chjiari ma̧ȩde

⁵⁷ Ado Ichabe jini̧ arapea̧ japamitë üdë ma̧na̧na̧ra̧rä, üi̧ boi̧ oa ararëreyi̧nȩjȩ.

⁵⁸ Ado jibëa̧ bë queri̧ cjo̧ro̧ji̧ri̧ pio judiro̧ pio ju̧i̧ chjiari ta̧rëa̧ oaiä, Ano̧mȩ judi pio ji̧iäpȩmo̧ üi̧ boi̧ oa cjäri̧ri̧ cjiamȩrȩ yürüa̧ pio ju̧i̧ chjiari ta̧rëa̧ oaiä, jabechji̧ Ichabe pio ji̧ nö̧ta ëba ma̧ chiadëri̧ cjia tjamo̧rëreji̧ri̧dirȩ.

⁵⁹ Ado japamitë chjätä ëte boi̧chji̧ üdë 8 do goamȩpea̧rä, jabechji̧ budorëreji̧ri̧diro̧jo̧ȩ, icharaita pio judiro̧ Ütë ja̧ ma̧ȩrä japariärërea̧mi̧. Ado ja̧dëa ji̧ jäjäa ja̧ quȩra̧ pio ju̧ri̧ra̧ quȩpatämi̧ cjiarëreji̧ri̧diro̧jo̧ȩ, pio ju̧ri̧pȩ cjo̧ro̧ji̧ri̧ pio judiro̧ japariärërea̧mi̧.

⁶⁰ Jabo Ichabe jini̧ yo̧rëreyi̧nȩjȩrȩ: —Cjäri̧ made, jäjäa ja̧ quȩra̧ quȩpadëpea̧de jabo Juan quȩra̧ quȩpapea̧de —yo̧a̧nȩjȩrȩ.

⁶¹ Jabo dëbë yo̧a̧diro̧jȩ: —Jabo cjäri̧ madiro̧, na̧ pumȩ judiro̧ pio jiro quȩ chiadë madiro̧. Cja̧rȩmȩrȩ pio jiro quȩ chiadë madi. Ado pio ju̧i̧iä Juan yo̧mȩ quȩra̧ pio ju̧ri̧ra̧ quȩparea̧mi̧dëdi —yo̧a̧diro̧jȩ.

⁶² Ja̧dëa ji̧ boi̧chji̧ pio ju̧i̧ nö̧rimȩ pio ju̧i̧iä chjadëri̧ dabapea̧ oa, jibëa̧ ichira̧ pio ju̧ri̧ra̧ na̧rȩji̧ri̧rȩ ni̧bärëreji̧ri̧diro̧jo̧ȩ joja ja̧ quȩ pio ju̧i̧ chjiari. 'Jabechji̧ nö̧rimȩ pio judi, 'Aja̧, pio jiro quȩra̧ quȩpatämi̧ cjiadiji̧da' quëna̧ dabapea̧ oa japarëreji̧ri̧diro̧jo̧ȩ.

⁶³ Ado judiro̧ jibëa̧ ichira̧ na̧rȩa̧ oaiä, jabechji̧ chjadëri̧ go̧ȩpapea̧ oa pio jȩaiäpȩ goa jana̧tä dëbë na̧rȩa̧dejȩrȩ jibëa̧ ichira̧. Ado judiro̧ goa jana̧ ëte, chjaodëri̧ taruparëremȩde go̧ȩpapea̧ ji̧. Ado ja̧di dari̧ go̧ȩparëremȩde. “Aja̧, quȩpapareconȩ ca̧ ja oa. Juan yo̧mȩ quȩra̧ pio ju̧ri̧ra̧ quȩpapareconȩ.” Aja̧, ja̧di dari̧ go̧ȩparëremȩde pumȩ judiro̧ chjadëri̧ dabarea̧mi̧ dari̧. Ado judiro̧ pio ju̧i̧ go̧ȩ ni̧bäa̧ oaiä, ütëborë ana̧ri̧ jo̧rȩtaji̧ri̧pea̧dirȩ, '¿tjana̧ ju̧i̧iä jibëa̧ pumȩ ja̧ quȩdëra̧ quȩpacjivadiji̧?' quëna̧ jo̧rȩtaji̧ri̧rȩ.

⁶⁴ Ado Chacaria judi ni̧bädëmȩpe bagarërea̧ ji̧, jabechji̧ ado chjereno̧ ni̧bämȩpea̧de chjaodëri̧. Ado taruparëremȩde Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧ ji̧.

⁶⁵ Ado queri̧ cjo̧ro̧ji̧ri̧ pio judiro̧ ütëbodärärë ana̧ tjamo̧ri̧ jo̧rȩtaji̧ri̧pea̧dirȩ, dacho bëremi̧ cjiami̧ dari̧, ya yabëcjiami̧ dari̧. Ado chjaodëri̧ baärëremȩde ma̧ȩ üdë bë nö̧tai̧ oa, Judea quȩmȩ chiri oa nö̧tai̧ oa, chirirä chamȩ ya̧mi̧räpȩ cjo̧ro̧ ji̧ri̧ ja̧ bë nö̧tai̧ oa.

⁶⁶ Ado pio jiro ma̧ȩ oa ta̧rëa̧ji̧ri̧ pio judiro̧ ana̧ri̧ jo̧rȩtaji̧ri̧pea̧dirȩ. ‘Chia chia, pio jiro boi̧chji̧ üdë, ¿tjana̧ oa japapamȩrȩ cjo̧ro̧pacjivadida, jabechji̧ ba chia tjamo̧ oa ja̧bepapa jirodida’ quëna̧ jo̧rȩtaji̧ri̧pea̧dirȩ. Jabechji̧ Ano̧mȩ ja̧ jauëchja üdë boi̧chji̧ pio ju̧i̧iäpȩmo̧ tjamo̧ri̧ cjiana̧ra̧ oaiä, jabechji̧ ja̧di dari̧ jo̧rȩtarëreji̧ri̧dirȩ pumȩ judiro̧ Chacaria joja pio ju̧i̧ chjiari.

Chacaria judi chacjiamȩri̧ ni̧bärëremȩdejȩ Ütë tjamo̧ pio ju̧i̧ jibëa̧ ja pio ju̧i̧ chjiari

⁶⁷ Ado ja̧dëa ji̧ Chacaria judi jibëa̧ ja oa quȩpea̧rä, Tjo tjamo̧ pio ju̧i̧ ja̧ chja̧oerä cjiadiämȩpea̧de. Jabechji̧ Tjo tjamo̧ pio judi cjiana̧ra̧ pio ju̧i̧iä, chjaodëri̧ ni̧bämȩpea̧de Ütërë ea jana̧ chjadüa̧ ma̧ȩ pio ju̧i̧. Ado ja̧di ta̧rëri̧ ni̧bämȩpea̧de:

⁶⁸ "Jabechji̧ Ano̧mȩ pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ ni̧bätäro̧jo̧ȩ, Icharai pio judiri ja̧ji̧ri̧ ja̧ Ütë pio ju̧i̧iäpȩmo̧" yo̧rëremȩde. "Jabechji̧ jibëa̧ pumȩ pio ibëiäpȩmo̧ cjäri̧ri̧ cjiamȩrȩ a̧doera̧pea̧diibe a̧ro̧rȩ jare chjadüa̧ oa cjiami̧ dari̧ cjiapea̧ oa.

⁶⁹ Jabechji̧ ibë Chjätä Tänȩmȩ pio ju̧i̧, a̧dë chjäte ju chiamȩ pio ju̧i̧ chjadüa̧diibe Ütë tjamo̧ judi, Davirea̧ pio judiri ja̧mȩ pio ju̧i̧. Tjamo̧ davä. Ütë tjamo̧ ja̧ mu̧i̧tjoi̧ pio judiri ja̧mȩ pio ju̧i̧, Icharaita pio ji̧ri̧ ja̧ ütërëremȩ pio judiri ja̧mȩ pio ju̧i̧ chjadëri̧ chjadüa̧diibe pio ibë chjätärea̧ yürüpea̧ oa —yo̧rëremȩde Chacaria judi.

⁷⁰ Ado Chacaria judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩde: —Jabechji̧ chjadüa̧diibe yaba̧ Ütë tjamo̧ judi. Aja̧, no̧mȩ tjamo̧ri̧ ja̧ cjo̧ro̧rëreji̧ri̧ pio judiro̧ jabërä jibëa̧ yara̧ ni̧bärërea̧mi̧, Ütërë ea jana̧ chjadüa̧ oa ni̧bäji̧ri̧ pio judiro̧ jabërä ni̧bärërea̧mi̧ chjadüa̧diibe yaba̧ Ütë tjamo̧ judi.

⁷¹ Jabechji̧ a̧ro̧rȩ boadäräa̧ oa cjiachea oa, ibë eadëji̧ri̧ pio ji̧ri̧ ja̧ chja̧oerä cjo̧ro̧chea oa, jabechji̧ chjadëri̧ chjadüa̧diibe yaba̧, a̧ro̧rȩ o ji̧ri̧ ja̧ ërecjia̧ chja̧oerä cjo̧ro̧chea oa.

⁷² Jabechji̧ Ütë tjamo̧ judi jo̧rȩtadëpe bagadërëremȩde. Tjamo̧ davä. Ibëa̧ ütëti̧rea̧ pio ji̧ri̧iäpȩmo̧ cjäri̧ri̧ cjia jo̧rȩtamȩrȩ daea̧ oaiä, jabechji̧ jënȩ pio ji̧ri̧iäpȩmo̧ yo̧ë cji̧därërea̧ pio ju̧i̧ jo̧rȩtadëpe bagadërëremȩde.

⁷³ Tjamo̧ davä. Jënȩ ibëa̧ taru Abaraa̧rea̧ pio ju̧i̧ yo̧ë cji̧därërea̧ pio ju̧i̧, jënȩ ano̧ mire jo̧rȩtarea̧ decjiari̧ yo̧ë cji̧därërea̧ ji̧, jabechji̧ jo̧rȩtadëpe bagadërëremȩde.

⁷⁴ Pio ibë go̧dü tänȩpea̧ ji̧, ibë eadëji̧ri̧ pio ji̧ri̧ ja̧ chja̧oerä cjo̧ro̧chea oa go̧dü tänȩpea̧ ji̧ jo̧rȩtadëpe bagadërëremȩde jabo chjadëri̧ jo̧rȩtarëremȩde. Aja̧, a̧ro̧rȩ Ütë ja̧ oa uapadëji̧ri̧rȩ ja̧bepë yürüpea̧ oa chjadëri̧ chjadüa̧diibe a̧dë jo̧rȩtadëmȩrȩ.

⁷⁵ Tjamo̧ davä. A̧ro̧rȩ pio ju̧i̧ ja̧ oa china̧chjari̧ tutia̧ oa cjiami̧ dari̧ cjo̧ro̧pea̧ oa, a̧ro̧rȩ coëma cjiari̧ cjo̧ro̧ji̧ri̧rȩ ja̧bepë yürüpea̧ oa go̧dü tänȩra̧pea̧diibe, a̧ro̧rȩ ja̧di dari̧ cjo̧ro̧pea̧ oa a̧ro̧rȩ ja̧boa̧rä yuro —yo̧mȩrȩ yo̧rëremȩde Chacaria judi Tjo tjamo̧ ja̧ chja̧oerä cjiamȩrȩ.

⁷⁶ Ado Chacaria judi ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩde jibëa̧ ja pio ju̧i̧iäpȩmo̧, pea quȩpea̧ oa cjiamȩ pio ju̧i̧iäpȩmo̧: —Ado yaba̧ ni̧bärequedemȩ ca̧ ja boi̧chji̧ oa, Juan quȩmȩ pio ju̧i̧ —yo̧a̧dejȩ. —Danȩ ca̧ ja, a̧dë chjäte Ano̧mȩ pio ju̧i̧ ja̧ oa ja̧bepapamȩrȩ cjo̧ro̧parenȩ. Ado pio ju̧i̧iä pumȩ judiro̧, "Aja̧, Ütërë ea jana̧ chjadüa̧ oa ni̧bämȩ pio judide" yo̧padirȩ pio mȩa chjiari. Jabechji̧ mȩnȩ Ano̧mȩ pio ju̧i̧ ja̧ oa ja̧bepapa tara, pio ju̧i̧ ja̧ oa no̧ oa jabërä jëdano̧mȩmi̧ dari̧ ja̧bepapa tara, mȩnȩ Ano̧mȩ pio ju̧i̧ ja̧ yaboi̧ ja̧bepapa tara, jabechji̧ ja̧di ta̧rëri̧ yo̧padirȩ pio mȩa chjiari.

⁷⁷ Aja̧ ca̧ ja, ni̧bä chjaoparenȩjȩrȩ Ano̧mȩ pio ju̧i̧ ja̧ pumȩ pio ji̧ri̧. Judiro̧ chjätärea̧ dapea̧ oa, judiro̧ chjai̧dëri̧ japea̧ pio judi duridëparȩa̧ oa cjiapea̧ oa, ni̧bä chjaoparenȩjȩrȩ ca̧ ja.

⁷⁸ Jabechji̧ Ütë tjamo̧ judi pio ibëiäpȩmo̧ ma̧ chjua jo̧rȩtamȩrȩ cjäri̧ri̧ cjia da tara, jabechji̧ cja̧rȩmȩ oa chjadüpadiibe. Tjamo̧ davä. Judi ibë bücjüi̧ idamȩmi̧ dari̧ cjäri̧ri̧ cjia da tara, chjamȩrȩ cjäri̧ri̧ cjia da tara, cja̧rȩmȩ oa chjadüpadiibe a̧dëri pio judiri, a̧ro̧rȩ chjätärea̧ dapea̧ oa. Jabechji̧ do üdë peadai̧rä a̧dëri pio judiri cjitëmi̧ dari̧ ma̧na̧padiibe Ano̧mȩ judi a̧ro̧rȩ pea chjami̧ dari̧ cjo̧ro̧rea̧ dapea̧ oa do peaja̧mi̧ darä.

⁷⁹ Jabechji̧ pumȩ judiro̧ damirerea̧ dapea̧ oa, bagönȩrä dae chami̧ dari̧ cjiaji̧ri̧ pio judiro̧ damirerea̧ dapea̧ oa, ja̧bopea̧ chja̧oerä cjo̧ro̧ji̧ri̧ pio judiro̧ tatami̧ darä cjo̧ro̧rea̧ dapea̧ oa, jabechji̧ dorë cjitëmi̧ dari̧ ma̧na̧padiibe Ano̧mȩ judi, pio ibë chjadëri̧ yabo ëba baämi̧ dari̧ japapea̧ oa, a̧ro̧rȩ ütëborë no̧ tjamo̧mi̧ darä cjo̧ro̧rea̧ dapea̧ oa, a̧ro̧rȩ ma̧ chjupi̧ cjiari̧ cjo̧ro̧rea̧ dapea̧ oa —yo̧mȩrȩ ni̧bä chjaorëremȩdejȩ Chacaria judi, jibëa̧ ja pio ju̧i̧iäpȩmo̧, Ütërë ea jana̧ chjadüa̧ oa ni̧bämȩrȩ.

⁸⁰ Ado japamitë chjätä ëte, Juan judi üi̧padärarëremȩde. Ado Ütë tjamo̧ pio ju̧i̧ ta̧rëdiäpea̧ ji̧ järi tjamo̧mȩrȩ cjo̧ro̧rëremȩde, Ütë tjamo̧ pio ju̧i̧iäpȩmo̧ chjuari̧ quëna̧mȩrȩ. Ado chiri tjoräpȩ ju̧ri̧ cjo̧ro̧rëremȩde. Jabechji̧ pio ju̧ri̧pȩ cjo̧ro̧rëremȩde judi Icharai pio judiri ja̧ji̧ri̧ pio ji̧ri̧iäpȩmo̧ tarupë araano̧a̧rä yuro.