Juan Ma̧ȩ 3 1 - Biblia Pume

Taruparea̧ Ma̧ȩ

¹ Danȩ Gaio, pio mȩa jo̧rȩtamȩrȩ go̧ȩpe chjadürequedemȩ, cüdë tjamo̧ri̧ ea̧ pio ju̧i̧. A̧doparea̧ tjamo̧ jidamȩ pio judimȩrȩ go̧ȩpe chjadürequedemȩ. ¿Jabënȩ? ¿Jabëti̧ cjianȩ? 'Jabë cjo̧ro̧ baä jirodida' quëna̧ jo̧rȩtamȩrȩ go̧ȩpe chjadürequedemȩ omȩ.

² Danȩ omȩ, mȩnȩ chjadëri̧ cjo̧ro̧rea̧ datä eamȩrȩ goë cjo̧dërequede pio mȩa chjiari, mȩnȩ chjari̧ doparea̧ datä. Jabechji̧ na̧ tjo üdë to̧bari̧ cjiami̧ dari̧ cjiatä eareconȩ, na̧ icjara oa peaja̧di.

^3-4 Danȩ, ado cja̧rȩmo̧ doremȩrä a̧ra̧ano̧riä tai̧ji̧ri̧ pio judiro̧ pio yoaiä go̧düna̧ra̧rä, ni̧bä chjaoa̧diro̧coe pio mȩa chjiari, mȩnȩ tjamo̧i̧ cjiari̧ baämȩ ma̧ȩ pio ju̧i̧ chjuari̧ mitëmi̧ dari̧ quëna̧ pio ju̧i̧ chjiari, mȩnȩ pio jiro ma̧ȩrä ji̧dë ma coëma cjiari̧ cjo̧ro̧a̧ pio ju̧i̧ chjiari. Ado pio ju̧i̧ ta̧rëa̧ oaiä, jabechji̧ a̧dë chjäte ma̧ chiadëri̧ cjiari̧ jo̧rȩtamȩpea̧requede omȩ. Danȩ, ca̧ jami̧ darenȩ. Ado mȩnȩ, ado o judiro̧ tjamo̧i̧ cjiari̧ cjo̧ro̧ji̧ri̧pea̧ pio ju̧i̧ chjiari ta̧rëa̧ oaiä, ca̧ u̧ri̧mi̧ da pio judiro̧ tjamo̧i̧ cjiari̧ baämȩ ma̧ȩrä cjo̧ro̧ji̧ri̧pea̧ pio ju̧i̧ chjiari ta̧rëa̧ oaiä, jabechji̧ ma̧ chiadëri̧ cjiari̧ jo̧rȩta tjamo̧requede.

Ütë tjamo̧ ja̧ oa ja̧bepaji̧ri̧ pio ji̧ri̧ jida̧ üdë ba chia tjamo̧de.

⁵ Danȩ omȩ Gaio, mȩnȩ a̧ra̧ano̧riä tai̧ji̧ri̧ pio ji̧ri̧ chjadëri̧ cjo̧ro̧rea̧ yürüa̧ oaiä, jabechji̧ Ütë tjamo̧ ja̧ oa chjadë tjamo̧ri̧ ja̧beparenȩ. Jabechji̧ mȩnȩ pio ji̧ri̧ cja̧rȩmȩ co dadëa̧räbo, ji̧dë ma a̧dorëremȩrenȩjȩrȩ. Chjadëri̧ jidarëremȩrenȩjȩrȩ.

⁶ Ado mȩnȩ chjadëri̧ a̧dorërea̧ pio judiro̧, jabechji̧ pio mȩa chjiari ni̧bä chjaoa̧diro̧ibe a̧ro̧rȩ quëna̧ji̧ri̧ maearë a̧dopë cjiaji̧ri̧ oa. Tjamo̧ davä. A̧ro̧rȩ pea a̧dopea̧rä, mȩnȩ pio ji̧ri̧iäpȩmo̧ eamȩrȩ a̧doa̧ ju̧i̧ chjiari ni̧bä chjaoa̧diro̧ibe. Ado danȩ ca̧ omȩ, judiro̧ ado chjereno̧ na̧ bëräpȩ go̧düdärärä, jabechji̧ ado chjereno̧ chjadëri̧ a̧dojȩrȩ jurarea̧ra̧, eami̧ti̧ra̧. Jabechji̧ judiro̧ chjadëri̧ a̧ra̧ano̧riä baäpea̧ oa, ji̧dë ma a̧dojȩrȩ omȩ, pio ji̧ri̧ chjadëri̧ chjadüpea̧ oa. Jabechji̧ mȩnȩ ja̧di dari̧ japea̧ üdë goae tjamo̧de Ütë tjamo̧ pio ju̧i̧iä.

⁷ Jabechji̧ Jechu Quiricho pio ju̧i̧ chjiari ma̧ȩ oa a̧ra̧ano̧pea̧ oa tai̧dirȩ, jabo quëna̧dëji̧ri̧ pio ji̧ri̧iä eami̧ oa mitëdë madirȩ. Tjamo̧ davä. Quiricho pio ju̧i̧ quëna̧dëji̧ri̧ pio ji̧ri̧iä chëre oa, ado jurarea̧ oa mitëdë madirȩ.

⁸ Ado pio ju̧i̧iä quëna̧ji̧ri̧ pio judiro̧ chjadëri̧ a̧dotäreji̧ri̧rea̧ro̧jȩrȩ pio jiro pumȩ pio ji̧ri̧. Tjamo̧ davä. Ütë tjamo̧ ja̧ ma̧ȩ oa a̧ra̧ano̧riä tai̧ji̧ri̧ pio ji̧ri̧, jabechji̧ jurarea̧ra̧, chërera̧, eami̧ti̧ra̧ a̧dotäreji̧ri̧rea̧ro̧jȩrȩ, coëma cjiari̧ japaji̧ri̧rȩ. Jabechji̧ pio ji̧ri̧ chjadëri̧ a̧doa̧ oaiä, pio ji̧ri̧ nö̧ta jadü cjiami̧ dari̧ ëba ja̧beparea̧ro̧jȩrȩ ca̧ omȩ, tjamo̧i̧ cjiari̧ baämȩ ma̧ȩ üdë a̧ra̧ano̧a̧ oa cjiapea̧ oa.

Juan judi ni̧bärëremȩde Diotepe pio ju̧i̧ chjiari, ado Diametrio pio ju̧i̧ chjiaribo.

⁹ Danȩ Gaio, Ütë tjamo̧ ja̧ oa ja̧bepaji̧ri̧ pio ji̧ri̧ chjadëri̧ a̧dopea̧ pio ju̧i̧ chjiari ma̧ȩ oa go̧ȩpe chjadürëremȩrequededibe pio mȩa nö̧ta a̧dopaji̧ri̧ pio ji̧ri̧iäpȩmo̧. Jabo pio dibë nö̧ta a̧dopamȩ judi, Diotepe quȩmȩ pio judi, cjäri̧ madique, jibëa̧ chji̧rämo̧ jo̧rȩtamȩrȩ ja̧bepade, ado pio ju̧i̧iä ta̧rë japadëri̧ cjiadique. ‘Jabechji̧ Juan judi tjamo̧ yo̧rea̧ chiadëmȩdida, Juan ja̧ chja̧oerä cjiadëquëda, jabo pio cüdëmo̧rȩ tjamo̧ yo̧mȩrȩ ja̧bepatäremȩquëda’ quëna̧ jo̧rȩtade. Ado pio ju̧i̧iä jiadadique.

¹⁰ Ado ja̧di tara omȩ, cüdë pio ju̧ri̧pȩ go̧düdäräa̧rä, jabechji̧ chjadë maearä cjiami̧ dari̧ ni̧bä chjaoparequededibe judi chjai̧dëri̧ japea̧ pio ju̧i̧ chjiari. Tjamo̧ davä. Quëna̧ji̧ri̧ ütëbo oa ni̧bä chjaoparequededibe. Danȩ, Diotepe pio judi ji̧dë ma ma̧ȩ chjádë yürüde pio ibë chjiari. Jabechji̧ pumȩ judiro̧ pio ibëiäpȩmo̧ badë dapea̧ oa, pio ibëiäpȩmo̧ aechide yo̧pea̧ oa, ma̧ȩ chjádë yürümȩde. Ado pio ju̧i̧ uëri a̧dodëri̧ cjiadejȩrȩ Ütë tjamo̧ ja̧ ma̧ȩ oa a̧ra̧ano̧riä tai̧ji̧ri̧ pio ji̧ri̧. Jabechji̧ pio ji̧ri̧ chjadëri̧ a̧dotärea̧ ji̧, a̧dodëdejȩrȩ. Ado pio ju̧i̧ uëri tuti chi̧dëeadejȩrȩ a̧dorea̧ taraji̧ri̧ pio ji̧ri̧. Jabechji̧ judiro̧ a̧dotärea̧ ji̧, judiro̧ chjadëri̧ yürütärea̧ ji̧, cjäri̧ madejȩrȩ, a̧dorea̧ yürüdëdejȩrȩ. Jabo Diotepe judi a̧dorea̧ yürüdëa̧räbo, jabechji̧ o judiro̧ a̧dorëreji̧ri̧diro̧jȩrȩ a̧ra̧ano̧ji̧ri̧ pio ji̧ri̧. Pio ju̧i̧ jiadaji̧ri̧rȩ a̧dorëreji̧ri̧diro̧jȩrȩ jibëa̧ra̧ pio ju̧ri̧ra̧. Jabo cjäri̧ madejȩrȩ, judiro̧ pio ji̧ri̧ a̧doa̧ oaiä Diotepe pio judi dairäpȩ tutimi̧ dari̧ japarëremȩdejȩrȩ judiro̧ quëna̧ji̧ri̧ ji̧ri̧ nö̧ta ëba a̧doparea̧mi̧dëri̧. Cjäri̧ made ca̧ omȩ, a̧dë chjäte ma̧i̧ dari̧ japamȩde. Ado pio ju̧i̧iä cuchu chiadëri̧ ni̧bä chjaoparequededibe davä, judi chjai̧dëri̧ japea̧ pio ju̧i̧ chjiari, cüdë pio ju̧ri̧pȩ go̧düdäräa̧rä.

¹¹ Danȩ ca omȩ, pio jiro pumȩ oa, chjai̧dëri̧ japamȩ pio ju̧i̧, jabechji̧ cho̧rëdiädëjo̧ȩ jabo chjadëri̧ japamȩ pio ju̧i̧mo̧i̧ cho̧rëdiäjo̧ȩ. Jabechji̧ chjadëri̧ japamȩ judi na̧rȩde jënȩ Ütë tjamo̧ pio ju̧i̧iä ado nö̧ria̧ oa cjiapea̧ pio ju̧i̧ chjiari. Jabo chjai̧dëri̧ japamȩ pio judi na̧rȩde jënȩ Ütë tjamo̧ pio ju̧i̧ jabë dabadëa̧ pio ju̧i̧ chjiari.

¹² Danȩ omȩ, pumȩ ütëborë chjadëri̧ ni̧bädirȩ ibëa̧ omȩ pio ju̧i̧ chjiari, Demetrio quȩmȩ pio ju̧i̧ chjiari. Jabechji̧ judi ji̧dë ma chjadëri̧ jape chjaoa̧ oaiä, ‘Aja̧, tjamo̧i̧ cjiari̧ baämȩ ma̧ȩrä cjo̧ro̧ tjamo̧dida’ quëna̧ jo̧rȩtaji̧ri̧rȩ dae chjaodiro̧jo̧ȩ. Ado peaja̧dimi̧ dari̧ jo̧rȩtarequede pio ju̧i̧ chjiari. Ado pio ju̧i̧iä peaja̧dimi̧ ta̧rëri̧ ni̧bärequede ca̧ yara̧ ibëa̧ omȩ pio ju̧i̧ chjiari. Ado cüdë ni̧bäa̧ üdë, ‘jabechji̧ coëma cjiari cjiadida’ quëna̧ dabarenȩque omȩ.

¹³ Ma̧ȩ ji̧ra̧ tjamo̧ oa go̧ȩpe chjadütaremȩrequedemȩ omȩ, jabo cjäri̧ marequede, pio jiro ma̧ȩ oa go̧ȩpe chjadüdëri̧ cjiarequedemȩ yaba̧.

¹⁴ Jabo jabechji̧ japamitë ana̧dë chjätä ëte, ‘irä daemȩcuni̧da’ quëna̧ jo̧rȩtarequedemȩ. Ado judirä dëbë dae chaji̧ri̧rȩ ana̧ri̧ ni̧bä chjaoparea̧rȩ.

¹⁵ Danȩ omȩ, Ütë tjamo̧ pio judi yürüa̧ oa, ma̧ chjupi̧ cjiari̧ jo̧rȩtariä cjo̧ro̧tänȩ. Ado danȩ omȩ, ibëa̧ oti̧ judiro̧, pio yoaiä cjo̧ro̧ji̧ri̧ pio judiro̧ cjäri̧ri̧ cjia jo̧rȩtaji̧ri̧rȩ jearea̧ chjadüdiro̧mȩ. Ado pio mȩa nö̧ta cjo̧ro̧ji̧ri̧ pio ji̧ri̧bo cjäri̧ri̧ cjia jo̧rȩtaji̧ri̧rȩ jearea̧ chjadürea̧ro̧jȩrȩ. Aja̧ omȩ, pio ju̧i̧mo̧i̧ ma̧ȩ oa go̧ȩpe chjadürequedemȩ. Jabechji̧ cjo̧ro̧ cjiaibe. Na̧ omȩ.