Juan Ma̧ȩ 2 1 - Biblia Pume

Jearea̧ Ma̧ȩ

¹ Damȩ, pio mȩa jo̧rȩtamȩrȩ go̧ȩpe chjadücama̧ ca̧ oyi̧. ¿Jabëmȩ? Jabë cjo̧ro̧ cjiamȩ? Jabë cjo̧ro̧ cjia jironi̧da’ quëna̧ jo̧rȩtamȩrȩ go̧ȩpe chjadücama̧. Damȩ, a̧doparea̧ tjamo̧ jidamȩ pio judiquë. Ado pio judimȩrȩ ma̧ȩ oa go̧ȩpe chjadücama̧ mitëa̧ oa cjiayi̧ iei̧ pio ji̧. Aja̧, pio mȩa go̧ȩpe chjadücama̧, na̧ u̧ri̧ pio ji̧ri̧bo, mȩnȩ nö̧ria̧ pio ji̧ri̧bo. Damȩ, ea tjamo̧cama̧. Ado cüdëmo̧rȩdë jabo tjamo̧i̧ cjiari̧ baämȩ ma̧ȩ pio ju̧i̧ quëna̧ji̧ri̧ pio judiro̧ ütëborë ea tjamo̧diro̧ma̧ peaja̧di.

² Jabechji̧ eaa̧ro̧ma̧ tjamo̧i̧ cjiari̧ baämȩ ma̧ȩ üdë ibëa̧ chji̧rä cha tara, pio jiro ma̧ȩ üdë bucho ana̧ pio ibë nö̧ta cjia tara.

³ Ibëa̧ Ama̧i̧ Ütë pio judi, ado Joja pio judiborë, Jechu Quiricho pio judiborë ji̧dë ma cjäriri̧ cjia daji̧ri̧rȩ a̧dotädiro̧ibë, a̧ro̧rȩ ma̧ chjupi̧ cjiari̧ jo̧rȩtarea̧mi̧ dari̧. Aja̧, ja̧di dari̧ japatädiibë tjamo̧i̧ cjiari̧ baämȩ ma̧ȩrä cjo̧ro̧ji̧ri̧ pio ji̧ri̧, jibëa̧ dëbëti̧ra̧ chia eaji̧ri̧ pio ji̧ri̧.

Tjamo̧i̧ cjiari̧ baämȩ ma̧ȩrä cjo̧ro̧pea̧de, ibëa̧ dëbëti̧ra̧ chia eaji̧ri̧rȩ.

⁴ Damȩ ca̧ oyi̧, ma̧ chiadëri̧ cjia tjamo̧quë. Jabechji̧ na̧ u̧ri̧ judiro̧ orë tjamo̧i̧ cjiari̧ baämȩ ma̧ȩrä ji̧dë ma cjo̧ro̧ji̧ri̧ oa irä daea̧quiji̧ri̧. Jabechji̧ ibëa̧ Ama̧i̧ Ütë pio judi yo̧a̧mi̧ cjo̧ro̧diro̧, ji̧dë ma coëma cjiari̧ cjo̧ro̧ji̧ri̧rȩ. Ado pio ju̧i̧iä ma̧ chiadëri̧ cjia tjamo̧quë pio judiro̧ ja̧di dari̧ cjo̧ro̧ oaiä.

⁵ Jabo damȩ ca̧ oyi̧, pio yoa ma̧ȩ oa tjamo̧ri̧ ni̧bämi̧ dari̧ go̧ȩpe chjadütämi̧ cjiacama̧ a̧ro̧rȩ ibëa̧ dëbëti̧ra̧ chia tjamo̧ri̧ eapea̧ oa. Ma̧ȩ peaja̧dëdi jabo a̧ro̧rȩ peadëri ja̧ ta̧rërërea̧ ma̧ȩ pio judidi.

⁶ Ado a̧ro̧rȩ pio jiro ma̧ȩrä eaji̧ri̧rȩ cjo̧ro̧ro, jabechji̧ Ütë tjamo̧ judi ibë yo̧a̧ pio ju̧i̧ ta̧rëdiäji̧ri̧rȩ cjo̧ro̧paa̧ro̧. Ado pio ju̧i̧iä jabechji̧, ibëa̧ pumȩ pio ji̧ri̧ ea tjamo̧ji̧ri̧rȩ cjo̧ro̧paa̧ro̧ Ütë tjamo̧ judi pearä judirä yo̧rërea̧mi̧.

⁷ Damȩ oyi̧, u̧i̧paji̧ri̧ pio judiro̧ noi̧dëti̧rȩ chiriräpȩti̧ oa a̧ra̧ano̧riä tai̧diro̧ pumȩ ji̧ri̧ u̧i̧pe ni̧bäpea̧ oa, tjamo̧i̧ cjiari̧ baädëmȩ ma̧ȩ pio ju̧i̧ a̧ra̧ano̧pea̧ oa. Jabechji̧ judiro̧ Jechu pio ju̧i̧ chjiari coëma cjiari̧ quëna̧tärea̧ ji̧, oëra̧ quëna̧diro̧. ‘Jabechji̧ pumȩpea̧dida, icjara chiapea̧dida’ quëna̧ji̧ri̧rȩ jo̧rȩtatärea̧ ji̧, oëra̧ quëna̧ji̧ri̧rȩ u̧i̧pe a̧ra̧ano̧ chjaodiro̧ji̧ri̧ pumȩ pio ji̧ri̧ Jechu pio ju̧i̧ chjiari. Jabechji̧ peadëri ja̧ Jechu Quiricho pio ju̧i̧ dëbëpe chjaoji̧ri̧ pio judiro̧diro̧.

⁸ Ado pio ju̧i̧iä na̧e chia tjamo̧pea̧ chiamȩ oyi̧ pio jiro oëra̧ a̧ra̧ano̧ji̧ri̧ pio ji̧ri̧ chjiari, mȩnȩ pio ji̧ri̧iä u̧i̧pea̧ oa cjiachea oa. Jabechji̧ mȩnȩ ja̧bepea̧ üdë badëri̧ cjiadiächea oa, a̧ro̧rȩ pio mȩa nö̧ta Ütë tjamo̧ ja̧ oa ji̧mo̧ ja̧bepea̧ üdë badëri̧ cjiadiächea oa, jabechji̧ na̧e chia tjamo̧pea̧ chiamȩ mȩnȩ nö̧tadäräri̧ ba ano̧a̧ oa cjiapea̧ oa.

⁹ Jabo eami̧ pumȩ üdë quëna̧rä judi, ‘Cjäri̧ madida, Quiricho judi a̧ra̧ano̧rërea̧ üdë nö̧tadëdida, jabechji̧ judi a̧ra̧ano̧a̧ pio ju̧i̧ uëri baämȩ ma̧ȩ pio ju̧i̧ quëna̧pea̧ chiaquëda’ quëna̧rä judi, cjäri̧ madi, Ütë tjamo̧ pio ju̧i̧ nö̧ta jädü cjiarea̧ chiadëdi. Jabo eami̧ pumȩ üdë, Quiricho judi a̧ra̧ano̧a̧ ma̧ȩrä cjo̧ro̧mȩ pio judi, jabechji̧ Ama̧i̧ tjamo̧ pio ju̧i̧ nö̧ta jadü cjiarea̧ chiadi, Joja pio ju̧i̧ nö̧tabo.

¹⁰ Ado damȩ, eami̧ pumȩ üdë na̧ bëräpȩ go̧düdärärä judi, mȩnȩro̧ a̧dopamȩ bëräpȩ go̧düdärärä judi, ado pio jiro ma̧ȩ oa a̧ra̧ano̧dërä judi, jabo cja̧rȩmo̧ ma̧ȩ oa a̧ra̧ano̧mȩrȩ go̧düdärärä judi, jabechji̧ yu̧a̧rea̧ yürüdëju̧i̧. Ado peaja̧di cjäri̧ri̧ cjiayi̧rȩ jeadëju̧i̧.

¹¹ Jabechji̧ pio ju̧i̧ jeamȩ pio judi, cjäri̧ madi, pio ju̧i̧ nö̧ta ëba ja̧bepamȩmi̧ dari̧ cjiadiädi. Pio ju̧i̧iä jabechji̧ jeadëju̧i̧.

¹² Dame ca̧ oyi̧, cüdë mȩa ma̧ȩ go̧a̧ti̧ tjamo̧ oa go̧ȩpe chjadütärea̧ ji̧, cüdë mȩa ji̧dë u̧i̧ ni̧bä chjaomi̧ dari̧ go̧ȩpe chjadütärea̧ ji̧, cjäri̧ maquë, pio yoamo̧i̧ ma̧ȩ boi̧chji̧ maea oa go̧ȩpe chjadücama̧ yaba̧. Jabo cüdë pio mȩaiäpȩ järea̧ darä judi, jabechji̧ pio mȩa irä damȩrȩ ana̧ri̧ ni̧bä chjaopacama̧, a̧ro̧rȩ yo̧a̧ri̧borë jabëdiärea̧ decjiari̧ ëba ma̧ chiadëri̧ cjiari̧ jo̧rȩtapea̧ oa.

¹³ Damȩ, na̧ oyi̧ pio ji̧ ja̧ u̧ri̧ pio judiro̧ mȩa cjäri̧ri̧ cjia jo̧rȩtaji̧ri̧rȩ jearea̧ chjadüdiro̧ma̧. Aja̧, pio ju̧i̧mo̧i̧ ma̧ȩ oa go̧ȩpe chjadücama̧. Na̧ omȩ.