Juan Ma̧ȩ 1 5 - Biblia Pume

Boadärärea̧mi̧ dari̧ cjo̧ro̧rea̧ darea̧rȩ Ütë tjamo̧ pio ju̧i̧iäpȩmo̧ chjuari̧ quëna̧ pio ju̧i̧iä.

¹ Eami̧ pumȩ üdë Jechu pio ju̧i̧ chjiari quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Tjamo̧ davä. Eami̧ pumȩ üdë coëma cjiari̧ quëna̧rä judi, ‘Aja̧, Jechu judi Ütërë mitëa̧ Chjätä Tänȩmȩ pio judi tjamo̧dida, Ütë tjamo̧ judi a̧dëri pio judiri chjadürërea̧ pio judi tjamo̧dida’ quëna̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiade, pio ju̧i̧ ja̧ pumȩpe bagarea̧mi̧ dari̧. Ado danȩrȩ ca̧ oti̧, a̧ro̧rȩ ju̧i̧ ea tjamo̧rä judi, ibë ado nö̧ria̧ oa cjia tänȩa̧mȩ pio ju̧i̧ ea tjamo̧rä judi, peaja̧di ea tjamo̧rea̧ro̧jȩrȩ ado nö̧ria̧ oa cjiaji̧ri̧ pio ji̧ri̧iäpȩmo̧.

² Jabechji̧ a̧ro̧rȩ Ütë tjamo̧ pio ju̧i̧ tjamo̧ri̧ earä judi, a̧ro̧rȩ Ütë tjamo̧ ja̧ ma̧ȩ oa ta̧rëdiäji̧ri̧rȩ cjo̧ro̧rä judi, jabechji̧ Ütë tjamo̧ pio ju̧i̧iä ado nö̧ria̧ oa cjiaji̧ri̧ pio ji̧ri̧bo tjamo̧ri̧ eaparea̧ro̧jȩrȩ.

³ Jabechji̧ cüdë yo̧rä judi, “Aja̧, Ütë tjamo̧ pio ju̧i̧ ea tjamo̧reconȩ” yo̧rä judi, ¿tjana̧ yo̧rea̧de? ¿Tjana̧ yo̧rea̧dë, jabechji̧ cüdë Ütë tjamo̧ judi yo̧a̧ pio ju̧i̧ tjamo̧ri̧ earä judi, pio ju̧i̧ ja̧ ma̧ȩ oa ta̧rëdiämȩrȩ cjo̧ro̧parequede. Aja̧, pio ju̧i̧ yo̧rea̧de. Ado danȩrȩ ca̧ oti̧, judi ibë yo̧a̧ ma̧ȩ pio ju̧i̧ ta̧rëdiäpea̧ üdë, jabechji̧ chjao tjamo̧dëde. Chachami̧ dari̧ cjiadëde jabo ta̧rëdiärea̧mi̧ dade.

⁴ Jabechji̧ eami̧ pumȩ üdë, Ütë tjamo̧ pio ju̧i̧iä ado nö̧ria̧ oa cjiamȩ pio judi, jabechji̧ boadärämi̧ dari̧ jiadapadejȩ dai chirirä ja̧ jo̧rȩtarea̧ pio ju̧i̧. Jabechji̧ a̧ro̧rȩ Jechu pio ju̧i̧iäpȩmo̧ chjuari̧ quëna̧ pio oaiä, jabechji̧ ju chiarea̧ darea̧rȩ boadärämi̧ dari̧ cjo̧ro̧pea̧ ji̧.

⁵ Danȩrȩ ca̧ oti̧, ¿chjia tjamo̧de dai chirirä ja̧ jo̧rȩtarea̧ pio ju̧i̧ boadärämi̧ dari̧ cjo̧ro̧mȩ judi? Chjia tjamo̧dëde, jabechji̧ Jechu pio ju̧i̧ chjiari coëma cjiari̧ quëna̧mȩ pio judide. ‘Jechu judi Ütë tjamo̧ pio ju̧i̧ ja̧ Jojadida’ quëna̧mȩ pio judide boadärämȩmi̧ dari̧ jo̧rȩtamȩ judi.

Jechu pio ju̧i̧ chjiari na̧rȩrea̧ üdë tjarari̧de.

^6-8 Jechu Quiricho judi pio yoa chiri oa birë ma̧na̧rëremȩde. Ado pio ju̧i̧ chjiari na̧rȩrea̧ üdë tjarari̧de. Danȩrȩ, ui üdë na̧rȩrea̧de. Jabechji̧ uirä go̧ȩ cjaeä chuda̧ oa cjiarëremȩde. Pio jiro na̧rȩrea̧ üdë na̧rȩde judi birë ma̧na̧ pio ju̧i̧ chjiari. Jabo pio judimo̧dëde. Ado cja̧rȩmo̧de peaja̧di. Jabechji̧ goe üdë peaja̧di na̧rȩrea̧de. Jabechji̧ pio ju̧i̧ ja̧ goe üdë gu̧roa̧ oa cjiarëremȩde pio ibë chjiari. Peaja̧di na̧rȩrea̧de. Peaja̧di na̧rȩde judi birë ma̧na̧ pio ju̧i̧ chjiari. Jabo pio judimo̧dëde. Danȩrȩ, Tjo tjamo̧ pio judiborë na̧rȩrea̧de. Jabechji̧ Jechu pio ju̧i̧ chjiari tjamo̧i̧ cjiari̧ baämȩ dabarea̧ yürümȩde Tjo tjamo̧ judi. Aja̧ ca̧ oti̧, Jechu pio ju̧i̧ chjiari na̧rȩrea̧de. Ado ji̧mo̧ baädirȩ pio jiro na̧rȩrea̧ tjarari̧rȩ. Cja̧rȩmȩ na̧rȩrea̧ chia maeadirȩ. Cja̧rȩmȩ jo̧rȩtarea̧ chia maeadirȩ. ‘Aja̧, Jechu judi Ütë tjamo̧ pio ju̧i̧ ja̧ Joja tjamo̧dida’ quëna̧rea̧mi̧ dari̧ na̧rȩdiibe a̧ro̧rȩ quëna̧pea̧ oa.

⁹ Danȩrȩ ca̧ oti̧, eami̧ pumȩ üdë jënȩ irä daea̧ pio ju̧i̧ chjiari ni̧bä chjaorä judi, jabechji̧ chjaodëri̧ quëna̧rea̧ro̧jo̧ȩ. ‘Aja̧, coëma cjiari̧ yo̧dida’ quëna̧ jo̧rȩtaji̧ri̧rȩ ta̧rë ja̧borea̧ro̧jo̧ȩ chjaodëri̧. Ado danȩrȩ ca̧ oti̧, a̧ro̧rȩ eami̧ pumȩ judi yo̧a̧ pio ju̧i̧ chjaodëri̧ quëna̧rä judi, ji̧dë u̧i̧ chjaodëri̧ quëna̧täreji̧ri̧rea̧ro̧jo̧ȩ Ütë tjamo̧ ju̧i̧, ji̧dë u̧i̧ ba chia tara. Aja̧, Ütë tjamo̧ judi jibëa̧ Ja pio ju̧i̧ chjiari ma̧ȩ yürürërea̧ pio ju̧i̧ chjaodëri̧ quëna̧täreji̧ri̧rea̧ro̧jo̧ȩ.

¹⁰ Eami̧ pumȩ üdë Ütë tjamo̧ ja̧ Joja pio ju̧i̧ quëna̧rä judi, jabechji̧ ‘tjamo̧i̧ cjiari̧ dabaquëda’ quëna̧ jo̧rȩtapade. Tjamo̧ davä. 'Ütë tjamo̧ judi yo̧a̧ üdë ba chia tjamo̧dida’ quëna̧ jo̧rȩtamȩrȩ chjuari̧ quëna̧de jibëa̧ chji̧ra̧, jaejaeami̧ dari̧ jo̧rȩtarea̧ decjiari̧. Jabo eami̧ pumȩ üdë Ütë tjamo̧ judi yo̧a̧ pio ju̧i̧ quëna̧dërä judi, cjäri̧ madejȩ, ma̧ȩ chjádë yürümȩmi̧ dari̧ cjiadiä tänȩdejȩ Ütë tjamo̧ pio ju̧i̧. Tjamo̧ davä. Eami̧ pumȩ üdë Ütë tjamo̧ judi jibëa̧ Ja pio ju̧i̧ chjiari yo̧a̧ pio ju̧i̧ quëna̧dërä judi, jabechji̧ “Ütë tjamo̧ judi ma̧ȩ chjádë yürümȩde” yo̧mi̧ dari̧ japamȩde.

¹¹ Danȩrȩ, Ütë tjamo̧ judi jibëa̧ Joja pio ju̧i̧ chjiari ma̧ȩ yürürëremȩde, ado ja̧di ta̧rëri̧ ni̧bärëremȩde: "Aja̧, bucho ana̧ cjo̧ro̧rea̧ yürürequededibe ca̧ Ja pio ju̧i̧iä." Aja̧, ja̧di ta̧rëri̧ yo̧rëremȩde. Ado jibëa̧ Ja pio judiri ma̧na̧mȩ cjo̧ro̧rea̧ pio ju̧i̧ yürüa̧diibe, bucho ana̧ cjo̧ro̧rea̧ pio ju̧i̧.

¹² Ado eami̧ pumȩ üdë Ütë tjamo̧ ja̧ Joja pio judiri ja̧rä judi bucho ana̧ cjo̧ro̧rea̧ chiade. Jabo eami̧ pumȩ üdë pio judiri ja̧dërä judi, cjäri̧ made, bucho ana̧ cjo̧ro̧rea̧ chiadëde.

Ütë tjamo̧ ju̧i̧iä cjo̧dërea̧ darea̧rȩ.

¹³ Jabechji̧ pio yoa ma̧ȩ oa go̧ȩpe chjadürequededibe quëna̧ji̧ri̧ pio ji̧ri̧, Ütë tjamo̧ ja̧ Joja pio ju̧i̧iäpȩmo̧ quëna̧ji̧ri̧ pio ji̧ri̧. Jabechji̧ mȩnȩro̧ chjadëri̧ quëna̧pea̧ oa, 'Aja̧, cüdë bucho ana̧ cjo̧ro̧rea̧ pio ju̧i̧ tjamo̧ri̧ chiaquëda’ quëna̧pea̧ oa go̧ȩpe chjadürequededibe ca̧ oti̧, pio mȩnȩro̧ ju baebaeami̧ dari̧ jo̧rȩtachea oa.

¹⁴ Danȩrȩ, a̧ro̧rȩ bucho ana̧ cjo̧ro̧rea̧ chia tara, jabechji̧ uapadërea̧rȩ ibëa̧ Ama̧i̧ pio ju̧i̧iä goë cjo̧dëpea̧ ji̧. Tjamo̧ davä. Uapadërea̧rȩ jabo ‘tjamo̧ri̧ ta̧rë ja̧bopadiibëda, a̧ro̧rȩ cjo̧dëa̧mi̧ japapadida’ quëna̧ jo̧rȩtaji̧ri̧rȩ goë cjo̧dërea̧rȩ pio ju̧i̧iä. Tjamo̧ davä. A̧ro̧rȩ cjo̧dërä, judi ea̧ pio ju̧i̧ goë cjo̧dërä, 'jabechji̧ a̧ro̧rȩ cjo̧dëa̧mi̧ japapadida’ quëna̧ jo̧rȩtarea̧rȩ, jaejaeami̧ dari̧ jo̧rȩtarea̧ decjiari̧.

¹⁵ ‘Jabechji̧ ibë ta̧rë ja̧bo tjamo̧diibëda’ quëna̧ jo̧rȩta̧ oaiä, ‘a̧ro̧rȩ cjo̧dëa̧mi̧ tjamo̧ri̧ japapadida’ quëna̧ jo̧rȩta̧ oaiä, jabechji̧ peadë japea̧ oa cjiami̧ dari̧ cjiade davä a̧ro̧rȩ goë cjo̧dëa̧ pio judi.

¹⁶ Danȩrȩ ca̧ oti̧, mȩnȩro̧ dibëa̧ omȩ pio ju̧i̧ darä judi, chjai̧dë oa japamȩ oa darä judi, jabechji̧ Ütë tjamo̧ pio ju̧i̧iä goë cjo̧dëtäreji̧ri̧nȩrȩ pio ju̧i̧ chjiari. Tjamo̧ davä. Dibëa̧ omȩ oa chjai̧dë oa japamȩ pio ju̧i̧ darä judi, ja̧bo tänȩrea̧mi̧dëmȩ chjai̧dë oa japamȩ oa darä judi, jabechji̧ pio ju̧i̧ chjiari goë cjo̧dëchji̧vä judi ado chjereno̧ no̧räpȩmo̧diämi̧ dari̧ japapea̧ oa, Ütë tjamo̧ judi pio ju̧i̧iäpȩmo̧ cjo̧ro̧rea̧ yürüpea̧ oa. Jabo danȩrȩ ca̧ oti̧, judi ja̧bo tänȩrea̧mi̧ damȩ chjai̧dë pio ju̧i̧ japarä judi, jabechji̧ pio ju̧i̧ chjiari Ütë tjamo̧ pio ju̧i̧iä goë cjo̧dëtä yo̧dërequededibe.

¹⁷ Danȩrȩ, a̧ro̧rȩ oëra̧ japarä judi, a̧ro̧rȩ coëma cjiari̧ japadëji̧ri̧rȩ japarä judi, jabechji̧ chjai̧dë oa japarea̧rȩ. Ado a̧ro̧rȩ eami̧ oa chjai̧dë oa japarä judi, jabechji̧ chjai̧dë tjamo̧de. Jabo chjai̧dë üdë orë, a̧dë chjäte uapai̧ da tjamo̧de. Jabechji̧ ja̧bo tänȩrea̧mi̧ damȩde. Jabo chjai̧dë üdë orë, cjäri̧ made, ja̧bo tänȩrea̧mi̧dëmȩde. Ado pio ju̧i̧iä yo̧requededibe. Ja̧bo tänȩrea̧mi̧ damȩ chjai̧dë pio ju̧i̧ chjiari goë cjo̧dëdëpea̧de.

¹⁸ Danȩrȩ ca̧ oti̧, tjamo̧ri̧ dabarea̧rȩ Ütë tjamo̧ pio ju̧i̧iä ado nö̧ria̧ oa cjiamȩ pio ju̧i̧ chjiari. Jabechji̧ chjai̧dëri̧ japadëmȩde. Ado peaja̧di chjadëri̧ jida̧ oa cjiade Quiricho pio ju̧i̧iä. Tjamo̧ davä. Chjadëri̧ jida̧ oa cjiade Ichiae pio judi eami̧ oa japarea̧mi̧dëri̧.

¹⁹ 'Jabechji̧ Ütë tjamo̧ ja̧ u̧ri̧ tjamo̧pea̧a̧ro̧da’ quëna̧ dabarea̧rȩ. Ado peaja̧di dabarea̧rȩ dai chirirä ja̧ jo̧rȩtaji̧ri̧ pio ji̧ri̧ chjiari. 'Aja̧, judiro̧ ütëborë Ichiae ja̧ chja̧oerämo̧ cjo̧ro̧ baädiro̧da' quëna̧ dabarea̧rȩ peaja̧di.

²⁰ Ado peaja̧di dabarea̧rȩ Ütë tjamo̧ ja̧ Joja judi birë ma̧na̧pea̧ pio ju̧i̧ chjiari. Aja̧, ma̧na̧rëremȩde, ado yürürëremȩdiibe dabarea̧ oa, a̧ro̧rȩ 'Ütë tjamo̧ pio judidida' quëna̧ dabarea̧ dapea̧ oa. Ado yaba̧, a̧ro̧rȩ Ütë tjamo̧ pio ju̧i̧ tjamo̧ri̧ dabaji̧ri̧pea̧ tara, jabechji̧ pio ju̧i̧ nö̧ta ori̧ bagari̧ ëba cjiarea̧ daea̧rea̧rȩ a̧ro̧rȩ Jechu Quiricho pio judiri ja̧ mapea̧ tara, a̧ro̧rȩ Ütë tjamo̧ ja̧ Joja pio judiri ja̧ mapea̧ tara. Jabechji̧ Jechu Quiricho judi Ütë tjamo̧ pio judide. Ado pio judi tjamo̧de pio ibëiäpȩmo̧ bucho ana̧ cjo̧ro̧rea̧ yürümȩ judi.

Cjiadiärea̧ Ma̧ȩ

²¹ Danȩrȩ ca̧ u̧ri̧, na̧e chiachji̧vä. Teracaba ütë oa chjacjiamȩri̧ jo̧rȩtadë machji̧vä, jabo jo̧ȩra̧pe a̧dë jachipadärämi̧ dari̧ japachji̧jo̧ȩ, dibë oëra̧diä tänȩpai̧ damȩ pio ju̧i̧. Aja̧, ma̧ȩ ba chia tjamo̧ oa go̧ȩpe chjadürequededibe ca̧ oti̧. Pio ju̧i̧mo̧i̧ ma̧ȩ oa go̧ȩpe chjadürequededibe. Cjo̧ro̧ cjiachji̧ibe. Dibëa̧ omȩ.