Juan Ma̧ȩ 1 3 - Biblia Pume

Ütë tjamo̧ judi ibë ütararea̧mi̧dëri̧ ea tara, 'ca̧ u̧ri̧diro̧ca̧da' quëna̧ jo̧rȩtamȩrȩ dadiibe.

¹ Ütärë jo̧rȩtachji̧vä Ütë tjamo̧ judi ibë ana̧ri̧ eapea̧ pio ju̧i̧ chjiari ca̧ oti̧. Jabechji̧ judi ibë ütararea̧mi̧dëri̧ a̧dë chjäte ji̧ra̧ri̧ eapea̧ pio ju̧i̧ chjiari ütarë jo̧rȩtachji̧vä. Jabechji̧ judi ibë ja̧di dari̧ ea tara, ‘ca̧ u̧ri̧diro̧ca̧da’ quëna̧ jo̧rȩtamȩrȩ dadiibe. Tjamo̧ davä ca̧ oti̧, Ütë tjamo̧ pio ju̧i̧ ja̧ u̧ri̧ tjamo̧rea̧rȩ. Jabo quëna̧dëji̧ri̧ pio judiro̧, cjäri̧ madiro̧ibe, ‘Ütë tjamo̧ ja̧ u̧ri̧diro̧da’ quëna̧ jo̧rȩtaji̧ri̧rȩ dadë madiro̧ibe. Tjamo̧ davä. Judiro̧ ibëa̧ Ama̧i̧ Ütë pio ju̧i̧ dabadë tara, ‘Ütë tjamo̧ ja̧ u̧ri̧diro̧da’ quëna̧ jo̧rȩtaji̧ri̧rȩ dadëdiro̧ibe.

² Danȩrȩ ca̧ oti̧ ba chia oa, a̧ro̧rȩ Ütë tjamo̧ pio ju̧i̧ ja̧ u̧ri̧ tjamo̧pea̧rea̧rȩ. ‘Jabechji̧ pio ju̧i̧ ja̧ u̧ri̧ tjamo̧dëa̧ro̧da’ quëna̧rea̧mi̧dëde. Jabo danȩrȩ, jabë tjamo̧ri̧ dabadërea̧rȩ. Tjamo̧ davä. Ibëa̧ icjara pio ju̧i̧ chjiari jabë tjamo̧ri̧ dabadërea̧rȩ. Jabechji̧ a̧ro̧rȩ a̧dëräpȩ ano̧ mire cjo̧ro̧ji̧ri̧pea̧rä, ‘Aja̧, ja̧di dari̧ cjo̧ro̧paa̧ro̧da, ja̧di da cjiapaa̧ro̧da, ca̧ icjara üdë ja̧di da cjiapadida’ quëna̧ dabarea̧mi̧dëde. Jabo danȩrȩ ca̧ oti̧, pio yoamo̧i̧ tjamo̧ri̧ dabarea̧rȩ jabo. Jechu Quiricho pio judi ado jana̧rä, jabechji̧ pio judimi̧ dari̧ cjiadiäparea̧rȩ. Pio ju̧i̧ tjamo̧ri̧ dabarea̧rȩ. Pio judimi̧ dari̧ cjiadiäparea̧rȩ. Ado pio judimi̧ dari̧ cjiadiäji̧ri̧rȩ chjadë maeari̧ daparea̧ro̧jo̧ȩ Jechu pio ju̧i̧. Tjamo̧ davä. Judi jana̧rä, jabechji̧ chjadë maeari̧ daparea̧ro̧jo̧ȩ. ‘Jabechji̧ Jechu judi jadi da cjiadida’ quëna̧dërërea̧ ji̧, jabechji̧ irä daparea̧ro̧jo̧ȩ.

³ Ja̧di tara eami̧ pumȩ üdë pio jiro ma̧ȩ oa chjuari̧ quëna̧mȩrȩ jidatarä judi, ‘Aja̧, Jechu pio judimi̧ dari̧ cjiadiäpaquëda, pio ju̧i̧ irä dapacuni̧da’ quëna̧ jo̧rȩtamȩrȩ jidatarä judi, jabechji̧ ji̧dë ma järimȩrȩ cjo̧ro̧de co chjami̧ dari̧ cjo̧ro̧pea̧ oa, Jechu pio judimi̧ dari̧ cjo̧ro̧pea̧ oa.

⁴ Eami̧ pumȩ üdë chjai̧dëri̧ japarä judi, jabechji̧ Ütë tjamo̧ ja̧ ma̧ȩ pio ju̧i̧ jiadadejȩ, tüdüa̧mi̧ darä cjo̧ro̧pea̧ ma̧ȩ pio ju̧i̧. Jabechji̧ chjai̧dë oa japea̧ üdë Ütë tjamo̧ ja̧ ma̧ȩ pio ju̧i̧ jiadarea̧de. Tüdüa̧mi̧ darä cjo̧ro̧pea̧ ma̧ȩ pio ju̧i̧ jiadarea̧de chjai̧dë üdë.

⁵ Danȩrȩ ca̧ oti̧, peadë dabanȩrȩ Quiricho judi tuti japarërea̧ pio ju̧i̧ chjiari. Jabechji̧ pumȩ judiro̧ chjai̧dëri̧ japea̧ pio ju̧i̧ duridëparȩpea̧ oa birë ma̧na̧rëremȩdiibe. Jabechji̧ ja̧di dari̧ tuti japarea̧ darëremȩde judi chjai̧dë oa chiadë tara.

⁶ Ado eami̧ pumȩ üdë, Quiricho pio judiri ja̧ a̧mi̧ dari̧ cjo̧ro̧mȩ pio judi, peaja̧di chjai̧dëri̧ japadëmȩde. Jabo chjai̧dëri̧ japamȩ judi, cjäri̧ madejȩ, Quiricho pio ju̧i̧ dabadë madejȩ. ‘Jabechji̧ pio judi tjamo̧dida, ja̧di dari̧ tuti japamȩdida’ quëna̧ dabadëde Jechu pio ju̧i̧ chjiari.

⁷ Danȩrȩ ca̧ u̧ri̧, ui̧pea̧ oa cjiadëchji̧vä oëra̧ a̧ra̧ano̧ji̧ri̧ pio ji̧ri̧iä. Jabechji̧ coëma cjiari̧ japamȩ pio judi coëma cjiari̧ cjiade. Jabechji̧ Jechu pio judimi̧ dari̧ coëma cjiari̧ cjiade.

⁸ Jabo chjai̧dë oa japamȩ pio judi, jabechji̧ Ichiae pio ju̧i̧ ja̧ jadümi̧ dade. Pio ju̧i̧ ja̧ chja̧oerä cjo̧ro̧de. Jabechji̧ pearä judiräri ja̧ ji̧dë ma chjai̧dë oa jape chjaomȩrȩ cjiarëremȩde Ichiae judi. Jabo judi teracabari̧ japarërea̧ pio ju̧i̧ goarijä tänȩra̧pea̧dejȩ Ütë tjamo̧ ja̧ Joja pio judi. Tjamo̧ davä. Ütë tjamo̧ ja̧ Joja pio judi yuropaera̧pea̧dejȩ.

⁹ Ütë tjamo̧ pio ju̧i̧iä ado nö̧ria̧ oa cjiamȩ judi chjai̧dë oa japadëmȩde. Jabechji̧ Ütë tjamo̧ pio judiri ma̧na̧mȩ cjo̧ro̧rea̧ peaja̧ pio ju̧i̧ chiamepea̧ oaiä, Ütë pio judiri ma̧na̧mȩ jo̧rȩtarea̧ pio ju̧i̧ chiamȩpea̧ oaiä, jabechji̧ chjai̧dë oa japarea̧mi̧dëde. Jabechji̧ judi Ütë tjamo̧ pio ju̧i̧iä jauëchja cjiari̧ ado nö̧ria̧ oa cjia tara, pio ju̧i̧ ja̧ joja tjamo̧pe baga̧ tara, jabechji̧ chjai̧dë oa japarea̧mi̧dëde.

¹⁰ Ado pio ju̧i̧iä chjaodëri̧ dabarea̧mi̧ dade ca̧ oti̧. Tjamo̧ davä. Ütë tjamo̧ ja̧ u̧ri̧ pio ji̧ri̧ chjiari, Ichiae ja̧ pumȩ pio ji̧ri̧ chjiari, chjaodëri̧ dabarea̧mi̧ dade. Chjaodëri̧ ütarë darea̧mi̧ dade. Jabechji̧ coëma cjiari̧ cjo̧ro̧dëji̧ri̧ pio judiro̧, jibëa̧ pumȩ pio ji̧ri̧ ea tjamo̧dëji̧ri̧ pio judiro̧, jabechji̧ Ütë tjamo̧ ja̧ u̧ri̧ tjamo̧dëdiro̧da’ quëna̧ dabarea̧mi̧ dari̧ ütarë darea̧ro̧jȩrȩ.

Ütë tjamo̧ ja̧ u̧ri̧ judiro̧ jabechji̧ jibëa̧ dëbëti̧ra̧ chia ea tjamo̧dirȩ.

¹¹ Danȩrȩ ca̧ oti̧, pio yoa ma̧ȩ oa ji̧dë ma ta̧rërëreji̧ri̧nȩrȩ mȩnȩro̧ pea quëna̧ji̧ri̧pea̧ri ja̧. Tjamo̧ davä. “Dibëa̧ dëbëti̧ra̧ chia eachji̧vä” yo̧mȩ ma̧ȩ pio ju̧i̧ ta̧rërëreji̧ri̧nȩrȩ peadëri ja̧.

¹² Cai̧ pio judimi̧ dari̧ cjo̧ro̧dë matäreji̧ri̧rea̧rȩ. Ichiae ja̧ pumȩ pio judimi̧ dari̧ japadë matäreji̧ri̧rea̧rȩ. Danȩrȩ, ju̧i̧di ja̧mȩ pio ju̧i̧ ja̧bo tänȩrëremȩdejȩ Cai̧ judi. ¿Ado tjana̧ ju̧i̧iä ja̧bo tänȩrëremȩdejȩ ca̧ oti̧? Tjana̧ ju̧i̧iädë, jabechji̧ judi chjai̧dëri̧ cjo̧ro̧rërea̧ oaiä, ado ju̧i̧di ja̧mȩ pio judi coëma cjiari̧ cjo̧ro̧rërea̧ oaiä, jabechji̧ ja̧bo tänȩrëremȩdejȩ. Aja̧ ca oti̧, pio ju̧i̧iä gu̧na̧rëremȩdejȩ.

¹³ Ado pio ju̧i̧iä ana̧ri̧ jo̧rȩtadëtäreji̧ri̧nȩrȩ ca̧ oti̧, quëna̧dëji̧ri̧ pio judiro̧ dibë goëdëri̧ cjiaji̧ri̧rȩ darä judi. Jabechji̧ dai chirirä ja̧ jo̧rȩtaji̧ri̧ pio judiro̧, dëdë, pio dibë eadë eadë dapai̧ dadiro̧dibe. Cai̧ pio judimi̧ dari̧ jo̧rȩtaji̧ri̧rȩ dapai̧ dadiro̧dibe.

¹⁴ Jabo ja̧di dari̧ dapai̧ daräbo, jabechji̧ pio ibë chjiari tjamo̧ri̧ dabaji̧ri̧pea̧rea̧rȩ ca̧ oti̧. ‘Aja̧, bucho ana̧ ja̧bopea̧ chja̧oeri pio judiri go̧düa̧a̧ro̧da, ado bucho ana̧ cjo̧ro̧rea̧ chiaji̧ri̧pea̧a̧ro̧da’ quëna̧ dabaji̧ri̧pea̧rea̧rȩ. Ado pio ju̧i̧ chjiari chjadëri̧ na̧rȩrea̧rȩ ca̧ oti̧, a̧ro̧rȩ ibëdi ja̧ji̧ri̧ pio ji̧ri̧ tjamo̧ri̧ ea̧ pio oaiä, Quiricho pio ju̧i̧iäpȩmo̧ quëna̧ji̧ri̧pea̧ pio ji̧ri̧ tjamo̧ri̧ ea̧ pio ju̧i̧iä. Jabo cjäri̧ made, eami̧ pumȩ üdë Quiricho pio ju̧i̧iäpȩmo̧ quëna̧ji̧ri̧ pio ji̧ri̧ tjamo̧ri̧ eadërä judi, jabechji̧ bucho ana̧ ja̧bopea̧ chja̧oerä tutia̧ oa cjiami̧ dari̧ cjiade, jabë ja̧boa̧mȩmi̧ dari̧ cjiamȩrȩ.

¹⁵ Jabechji̧ eami̧ pumȩ üdë quëna̧ji̧ri̧ pio ji̧ri̧iäpȩmo̧ ji̧dë ma goëdëri̧ cjiamȩrȩ cjo̧ro̧rä judi, jabechji̧ ja̧bo tänȩpai̧ dadejȩrȩ. Ado pio jiro pumȩ pio ju̧i̧ chjiari tjamo̧ri̧ dabarea̧rȩ ca̧ oti̧. Jabechji̧ judi bucho ana̧ cjo̧ro̧rea̧ chiatärea̧ ji̧, jabë chiadë madejȩ.

¹⁶ Jechu judi jibëa̧ icjara oa pio ibë chjiari tuti yürürërea̧ oaiä, jabechji̧ a̧dë chjäte chjadëri̧ na̧rȩrëremȩdiibe a̧ro̧rȩ o ji̧ri̧ chjadëri̧ eapea̧ pio ju̧i̧ chjiari. Jabechji̧ a̧dodëri̧ cjiamȩdërë yürürëremȩde pio ibë chjiari ano̧ mire ja̧bopea̧ oa. Ado peaja̧dimi̧ dari̧ yürütäreji̧ri̧rea̧rȩ o ji̧ri̧iäpȩmo̧ a̧dopea̧ oa. Tjamo̧ davä. Ibëa̧ icjara oa nȩmȩpami̧ dari̧ japadë matäreji̧ri̧rea̧rȩ, jabo ji̧dëri̧ yürütäreji̧ri̧rea̧ro̧jo̧ȩ ibëa̧ oti̧ pio ji̧ri̧ chjadëri̧ a̧dopea̧ oa, Jechu pio judi yürürërea̧mi̧.

¹⁷ Jabo a̧ro̧rȩ ibëa̧ pumȩ pio ji̧ri̧ a̧dodërä judi, a̧ro̧rȩ goaji̧ri̧borë a̧dodërä judi, a̧ro̧rȩ cjäri̧ ja̧bomȩ pio ju̧i̧ a̧dorea̧ goaji̧ri̧borë eami̧ra̧ a̧dodërä judi, ¿tjana̧ na̧rȩrea̧de? Tjana̧ na̧rȩrea̧dë, jabechji̧ a̧ro̧rȩ Ütë tjamo̧ pio ju̧i̧ tjamo̧ri̧ eadëa̧ pio ju̧i̧ chjiari na̧rȩrea̧de. Tjamo̧ davä. Eami̧ pumȩ judi chjadëri̧ a̧dorea̧ chiamȩborë a̧dodërä judi, jabechji̧ jënȩ Ütë tjamo̧ pio ju̧i̧ tjamo̧ri̧ eadëa̧ pio ju̧i̧ chjiari na̧rȩrea̧de.

¹⁸ Danȩrȩ ca̧ u̧ri̧, jabomo̧ ya maeara̧ cjo̧ro̧dëpea̧de jabo a̧ro̧rȩ yo̧a̧mi̧ japapea̧de. Jabechji̧ a̧ro̧rȩ ibëa̧ yara̧ yo̧rä judi, “Aja̧, quëna̧ji̧ri̧ pio ji̧ri̧ tjamo̧ri̧ earequedejȩrȩ” yo̧rä judi, jabechji̧ a̧ro̧rȩ yo̧a̧mi̧ chjadëri̧ a̧dotäreji̧ri̧rea̧ro̧jȩrȩ ibëa̧ ma̧ȩ üdë coëma cjiari̧ cjiadiärea̧mi̧ dari̧.

¹⁹ Ado danȩrȩ ca̧ oti̧, a̧ro̧rȩ tjamo̧i̧ cjiari̧ baämȩ ma̧ȩrä cjo̧ro̧a̧ oaiä, a̧ro̧rȩ ibëa̧ oti̧ pio ji̧ri̧ tjamo̧ri̧ eaji̧ri̧rȩ cjo̧ro̧a̧ oaiä, ‘jabechji̧ Ütë tjamo̧ ja̧ ma̧ȩrä tjamo̧ri̧ cjo̧ro̧quëda’ quëna̧ jo̧rȩtarea̧ daparea̧rȩ. Ado pio ju̧i̧iä a̧ro̧rȩ ibëa̧ Ütë oa ni̧bärä, jabechji̧ pio ju̧i̧iä idëri̧ cjiadëparea̧rȩ, jabo chji̧ goaera̧ jo̧rȩtaji̧ri̧rȩ ni̧bäparea̧ro̧jo̧ȩ.

²⁰ Jabo ibëa̧ chji̧ üdë ibë japaräbo, a̧ro̧rȩ Ütë oa ni̧bärä ibëa̧ chji̧ üdë pio ibëiäpȩmo̧ aechide ni̧bämi̧ dari̧ japaräbo, a̧ro̧rȩ chjai̧dëri̧ japea̧ pio ju̧i̧ chjiari aechide ni̧bämi̧ dari̧ japaräbo, jabechji̧ ana̧ri̧ jo̧rȩtadëtäreji̧ri̧rea̧rȩ, Ütë tjamo̧ pio judi dibë aechide yo̧mi̧ dari̧ japadë tara. Jabechji̧ a̧ro̧rȩ ibëa̧ chji̧rä jo̧rȩta̧ pio ju̧i̧ u̧i̧ dabade Ütë tjamo̧ judi, ibë chjiari chjö̧na̧i̧ oa dabamȩrȩ. Ado pio ju̧i̧iä bücjüri̧ cjiadëtäreji̧ri̧rea̧rȩ.

²¹ Danȩrȩ ca̧ jadü, a̧ro̧rȩ Ütë tjamo̧ ja̧ ma̧ȩrä cjo̧ro̧rä judi, jabechji̧ aechide yo̧mi̧ tarari̧ japadëpadiibe ibëa̧ chji̧ üdë, jabo chji̧ goaera̧ jo̧rȩtaji̧ri̧rȩ cjo̧ro̧parea̧rȩ, Ütë tjamo̧ pio ju̧i̧iä uapadëji̧ri̧rȩ.

²² Ado a̧ro̧rȩ ja̧di dari̧ cjo̧ro̧rä judi, ado pio ju̧i̧iä eami̧ oa cjo̧dërä judi, jabechji̧ yürüpadiibe. Tjamo̧ davä. A̧ro̧rȩ Ütë tjamo̧ judi yo̧a̧ pio ju̧i̧ ta̧rëdiäji̧ri̧rȩ cjo̧ro̧rä judi, a̧ro̧rȩ pio ju̧i̧ ma̧ chiadëri̧ cjiaparȩji̧ri̧rȩ cjo̧ro̧rä judi, jabechji̧ a̧ro̧rȩ cjo̧dëa̧mi̧ yürüpadiibe.

²³ Danȩrȩ ca̧ oti̧, ¿tjana̧ oa japariä cjo̧ro̧tä eadiibe Ütë tjamo̧ judi? Tjana̧dë, jabechji̧ Joja pio ju̧i̧, Jechu Quiricho pio ju̧i̧ quëna̧riä dopatä eadiibe. Ado Jechu Quiricho judi yo̧a̧mi̧ eaji̧ri̧rȩ cjo̧ro̧tä eadiibe peaja̧di, ibëa̧ dëbëti̧ra̧ chia ea tjamo̧ji̧ri̧rȩ. Aja̧ ca̧ oti̧, ja̧di dari̧ japatä eadiibe Ütë tjamo̧ judi.

²⁴ Ado Ütë tjamo̧ ja̧ ma̧ȩrä cjo̧ro̧ji̧ri̧ pio judiro̧, jabechji̧ pio judiri ja̧ a̧mi̧ dari̧ cjiadirȩ, pio ju̧i̧ nö̧ta cja̧rȩmȩpe bagami̧ dari̧. Ado jibëa̧ dëbëti̧ra̧ chia ori̧ bagari̧ ëba cjiarea̧ dapadirȩ. Jabechji̧ Ütë tjamo̧ judi pio ibëiäpȩmo̧ Tjo tjamo̧ pio ju̧i̧ yürüa̧ oaiä, tjamo̧ri̧ dabarea̧rȩ judi ibëa̧ icjararä bëpaera̧pea̧ pio ju̧i̧ chjiari.