Juan Ma̧ȩ 1 2 - Biblia Pume

Quiricho pio judide pio ibë chjiari goë tuti ni̧bämȩ judi.

¹ Danȩrȩ ca̧ oti̧, ca̧ u̧ri̧mi̧ danȩrȩ. Ado pio dibëiäpȩmo̧ go̧ȩpe chjadürequededibe mȩnȩro̧ chjai̧dëri̧ japadëtä. Jabo danȩrȩ, eami̧ pumȩ üdë chjai̧dëri̧ japarä judi, jabechji̧ pio ibë chjiari goë tuti ni̧bämȩ pio ju̧i̧ ëbarea̧ro̧jo̧ȩ. Tjamo̧ davä. Ama̧i̧ tjamo̧ pio ju̧i̧iäpȩmo̧ goë tuti ni̧bämȩ pio ju̧i̧, pio ibë chjiari Ama̧i̧ tjamo̧ pio ju̧i̧iäpȩmo̧ goë tuti ni̧bämȩ pio ju̧i̧ ëbarea̧ro̧jo̧ȩ. Ado pio jiro goë tuti ni̧bämȩ judi, jabechji̧ Jechu Quiricho pio judide. A̧dë chjäte coëma cjiari̧ cjiamȩ pio judide.

² Jabechji̧ pio judide ibë chjiari goe gu̧rori̧ yürüa̧ oa cjiarëremȩ üdë Ütë tjamo̧ ja̧ ërecjia̧ üdë pio ibëiäpȩmo̧ acji cjatächea oa, judi ba ano̧rea̧ daea̧ oaiä cjatäcjie jo̧rȩtarea̧ dapea̧ oa. Tjamo̧ davä. A̧ro̧rȩ chjai̧dëri̧ japea̧ pio ju̧i̧ chjiari ano̧ mire ja̧boa̧ oa cjiarëremȩde Jechu judi a̧ro̧rȩ ütëbodärärë duridëparȩrea̧ dapea̧ oa, chiriräpȩti̧ oa cjo̧ro̧ji̧ri̧ pio judiro̧borë.

³ Danȩrȩ ca̧ oti̧, a̧ro̧rȩ Ütë tjamo̧ judi yo̧a̧ pio ju̧i̧ ta̧rëdiäa̧ oaiä, ‘jabechji̧ tjamo̧ri̧ dabacuni̧da’ quëna̧rea̧ darea̧rȩ. Tjamo̧ davä. A̧ro̧rȩ Ütërë yo̧rërea̧ ma̧ȩ pio ju̧i̧ ta̧rëdiäji̧ri̧rȩ cjo̧ro̧a̧ oaiä, ‘jabechji̧ tjamo̧ri̧ dabacuni̧da, Ütë tjamo̧ pio ju̧i̧ tjamo̧ri̧ dacuni̧da’ quëna̧ jo̧rȩtarea̧ darea̧rȩ ca̧ oti̧.

⁴ Jabo eami̧ pumȩ üdë yo̧rä judi, “Aja̧, Ütë tjamo̧ pio ju̧i̧ tjamo̧ri̧ dabareconȩ” yo̧rä judi, jabo Ütë tjamo̧ judi yo̧rërea̧ ma̧ȩ pio ju̧i̧ ta̧rëdiädë maearë cjo̧ro̧rä judi, cjäri̧ made, tjamo̧ri̧ dabadëde, jabomo̧ ma̧ȩ chjádë yürümȩrȩ ni̧bäde. Jabechji̧ Ütë tjamo̧ ja̧ ma̧ȩ üdë jibëa̧ chji̧rä chadë oaiä jabomo̧ ya maeara̧ yo̧de.

⁵ Jabo eami̧ pumȩ üdë Ütë tjamo̧ judi yo̧a̧ pio ju̧i̧ ta̧rëdiämȩrȩ cjo̧ro̧rä judi, jabechji̧ chjadëri̧ na̧rȩde jënȩ Ütë tjamo̧ pio ju̧i̧ eapea̧ ji̧. Jabechji̧ tjamo̧ri̧ eadejȩ jabëdiärea̧ decjiari̧. Ado a̧ro̧rȩ ja̧di dari̧ ta̧rëdiäji̧ri̧rȩ cjo̧ro̧a̧ oaiä, jabechji̧ tjamo̧ri̧ dabarea̧rȩ pio ibë chjiari. Jabechji̧ a̧ro̧rȩ ta̧rëdiäji̧ri̧rȩ cjo̧ro̧a̧ oaiä, ‘Aja̧, Ütë tjamo̧ pio ju̧i̧ nö̧ta ori̧ bagari̧ ëba cjiarea̧ daea̧quëda, pio ju̧i̧ nö̧ta cja̧rȩmȩpe baga̧quëda’ quëna̧ dabarea̧rȩ, tjamo̧ri̧ dabaji̧ri̧rȩ.

⁶ Ado pio ju̧i̧iä eami̧ pumȩ üdë yo̧rä judi, 'Aja̧, Jechu Quiricho pio ju̧i̧ nö̧ta cja̧rȩmȩpe baga̧quëda, pio judiri ja̧ a̧mi̧ dari̧ cjiaquëda’ quëna̧ jo̧rȩtamȩrȩ yo̧rä judi, jabechji̧ Jechu pio judi pio yoa chirirä cjo̧ro̧rërea̧mi̧ cjo̧ro̧täremȩde peaja̧di.

No̧mȩ ja̧rëremȩ ma̧ȩ üdë peaja̧mi̧ dari̧ cjiadiämȩpea̧de Quiricho pio ju̧i̧iä, pio a̧ro̧rȩborë ta̧rëdiärea̧mi̧ dari̧.

⁷ Danȩrȩ ca̧ pumȩ, ea tjamo̧requededibe. Ado pio yoa ma̧ȩ oa go̧ȩpe chjadürequededibe ma̧ȩ peaja̧dë oa, mȩnȩro̧ ta̧rërërea̧ ma̧ȩ oa, pearä yürürërea̧ ma̧ȩ oa. Jabechji̧ “dibëa̧ dëbëti̧ra̧ chia ba chia dachji̧vä” yo̧mȩ ma̧ȩ pio ju̧i̧ chjiari go̧ȩpe chjadürequededibe.

⁸ Jabo pio jiro ma̧ȩ üdë no̧mȩ tjamo̧ri ja̧räbo, jabechji̧ ma̧ȩ peaja̧mi̧ dade Quiricho pio ju̧i̧iä. Jabechji̧ eami̧ pumȩ üdë pio jiro ma̧ȩ oa nö̧tadäräri̧ ta̧rëdiädërërea̧ ji̧, jabechji̧ Quiricho pio judimo̧rȩ nö̧tadäräri̧ ta̧rëdiämȩpea̧dejȩ yaba̧. Ado pio mȩnȩro̧borë pio jiro ma̧ȩrä cjo̧ro̧ji̧ri̧pea̧nȩrȩ yaba̧ Quiricho pio ju̧i̧iä. Pio ju̧i̧iä no̧mȩ ja̧rërea̧ ma̧ȩ üdë, jabechji̧ ma̧ȩ peaja̧mi̧ dapea̧de. Tjamo̧ davä. Mȩnȩro̧ pio jiro ma̧ȩ peaja̧rä cjo̧ro̧dërërea̧ ji̧, jabechji̧ goae tarari̧ ano̧ mire cjo̧ro̧ji̧ri̧pea̧nȩrȩ yaba̧ Quiricho pio ju̧i̧iä, ji̧dë u̧i̧ ta̧rëdiäji̧ri̧rȩ. Jabechji̧ mȩnȩro̧ bagönȩmi̧ darä cjo̧ro̧dëji̧ri̧pea̧nȩrȩ, jabo goae tarari̧ cjo̧ro̧ji̧ri̧pe jänȩrȩ dopadäräri̧ tatami̧ darä.

⁹ Eami̧ pumȩ üdë yo̧rä judi, “Aja̧, tatami̧ darä cjo̧ro̧requede” yo̧rä judi, jabo jibëa̧ omȩ pio ju̧i̧ goëdëri̧ cjiamȩrȩ darä judi, cjäri̧ made, tatami̧ darä cjo̧ro̧dëde jabo bagönȩmi̧ darä cjo̧ro̧de.

¹⁰ Jabo jibëa̧ omȩ pio ju̧i̧ eamȩ judi, jabechji̧ tatami̧ darä cjo̧ro̧de. Ado tatami̧ darä cjo̧ro̧mȩ pio judi, jabechji̧ coëma cjiari̧ cjo̧ro̧de, jibëa̧ omȩ oa ta anȩ cjiatä tänȩmi̧ dari̧ japarea̧ decjiari̧.

¹¹ Jabo eami̧ pumȩ üdë jibëa̧ pumȩ pio ji̧ri̧ goëdëri̧ cjiamȩrȩ cjo̧ro̧rä judi, jabechji̧ bagönȩmi̧ darä cjo̧ro̧de. Ado judi bagönȩmi̧ darä cjo̧ro̧a̧ oaiä, jabechji̧ da cotomi̧ dari̧ cjiadiäde. Ado pio ju̧i̧iä coëma cjiari̧ baämȩ no̧mi̧ da pio ju̧i̧ dabadëmȩrȩ cjo̧ro̧de.

¹² Danȩrȩ, pumȩ bori̧mi̧ da pio ji̧ri̧ go̧ȩpe chjadürequededibe mȩnȩro̧ jo̧rȩtadëpe bagachea oa. Jabechji̧ Jechu judi pio dibë chjiari tuti japea̧ oaiä, jabechji̧ tjamo̧ri̧ duridëparȩa̧ oa cjiarëreji̧ri̧nȩrȩ, 'duridëparȩa̧ oa cjiaemȩ jiroquëda' quëna̧rea̧ decjiari̧.

¹³ Ado danȩrȩ, pea ütëpea̧mi̧ daji̧ri̧ pio ji̧ri̧bo go̧ȩpe chjadürequededibe mȩnȩro̧ jo̧rȩtadëpe bagachea oa. Jabechji̧ mȩnȩro̧ Ichiae pio ju̧i̧ boadärärea̧ tjamo̧ri̧ daea̧ tara go̧ȩpe chjadürequededibe, 'tjamo̧ri̧ boadärärea̧ dadëa̧ jiroquëda' quëna̧chea oa. Ado go̧ȩpe chjadürequededibe ütama̧i̧mi̧ dape jäji̧ri̧ pio ji̧ri̧ peaja̧di. Jabechji̧ mȩnȩro̧ Quiricho pio ju̧i̧ peadëri ja̧ tjamo̧ri̧ dabaji̧ri̧pea̧ tara, mȩnȩro̧ pearä judiräri ja̧mȩ pio ju̧i̧ peadë dabaji̧ri̧pea̧ tara, jabechji̧ go̧ȩpe chjadürequededibe, 'tjamo̧ri̧ dabadë jirocuni̧da' quëna̧chea oa.

¹⁴ Aja̧, pio dibë ütëbo oa pio yabo go̧ȩparemȩrȩ ado chjereno̧ go̧ȩparequededibe mȩnȩro̧ Ama̧i̧ tjamo̧ pio ju̧i̧ tjamo̧ri̧ dabaji̧ri̧pea̧ tara, mȩnȩro̧ jo̧rȩtadëpe bagachea oa. Aja̧, ütama̧i̧pe jäji̧ri̧ pio ji̧ri̧ pio yabo go̧ȩparemȩrȩ go̧ȩpe chjadürequededibe ado chjereno̧, mȩnȩro̧ tjamo̧ri̧ dabaji̧ri̧pea̧ tara, mȩnȩro̧ pearä judiräri ja̧mȩ pio ju̧i̧ tjamo̧ri̧ dabaji̧ri̧pea̧ tara. Aja̧, peaja̧di mȩnȩro̧ jo̧rȩtadëpe bagachea oa jo̧rȩta tänȩrequededibe. Ado pio yabo go̧ȩparemȩrȩ ado chjereno̧ go̧ȩparequedibe peaja̧di pea ütëpe jäji̧ri̧ pio ji̧ri̧. Jabechji̧ mȩnȩro̧ Ütë tjamo̧ pio ju̧i̧iäpȩmo̧ chjuari̧ quëna̧ji̧ri̧pea̧ji̧ri̧ oa go̧ȩpe chjadürequededibe, Ütë tjamo̧ ja̧ ma̧ȩ üdë dibëa̧ chji̧rä chjadëri̧ boea̧ oa cjiami̧ dari̧ cjia tara. Ado mȩnȩro̧ a̧dë chjäte chjadëdëmȩ pio ju̧i̧ tjamo̧ri̧ boadärärea̧ daea̧ tara, mȩnȩro̧ Ichiae pio ju̧i̧ chjadëri̧ boadärärea̧ daea̧ tara go̧ȩpe chjadürequededibe oti̧, mȩnȩro̧ peaja̧di jo̧rȩtadëpe bagachea oa.

Dai chirirä ja̧ pio ju̧i̧ dae ja̧bo dadëchji̧vä.

¹⁵ Dai chirirä ja̧ chjai̧dë pio ju̧i̧ dae ja̧bo dadë machji̧vä ca̧ oti̧. Ba chia dadëchji̧jo̧ȩ. Jabechji̧ eami̧ jo̧rȩtarea̧ oa, eami̧ cjo̧ro̧rea̧ oa, Ütë tjamo̧ pio ju̧i̧ dëbëpe chjaomȩ jo̧rȩtarea̧ oa, dae ja̧bo dae ja̧bo dami̧ dari̧ jo̧rȩtadëchji̧vä. Jabechji̧ dai chirirä ja̧ pio ju̧i̧ dae ja̧bo dae ja̧bo dami̧ dari̧ jo̧rȩtamȩ pio judi, tjamo̧ri̧ eadëdejȩ Ama̧i̧ tjamo̧ pio ju̧i̧.

¹⁶ Jabechji̧ dai chirirä ja̧ chjai̧dë üdë, Ütë tjamo̧ pio judiri ma̧na̧dë maeade, jabo ibëa̧ icjarari ja̧ maeade. Tjamo̧ davä. Ibëa̧ icjarari pio judiri ji̧dë ma cjitëmȩ chjai̧dë oa earea̧ üdë, a̧ro̧rȩ ibëa̧ dachora̧ pio ju̧ri̧ra̧ dae ja̧bo dae ja̧bo darea̧ üdë, jabechji̧ Ütë tjamo̧ pio judiri ja̧dëde jabo dai chirirä ja̧ maeade. Aja̧, a̧ro̧rȩ pio ibë chjiari goaeri̧ jo̧rȩtarea̧ üdë, ‘Aja̧, ba chia tjamo̧a̧ro̧da’ quëna̧ jo̧rȩtarea̧ üdë, cjäri̧ made ca̧ oti̧, Ütë tjamo̧ pio judiri ja̧dëde jabo dai chirirä ja̧ maeade. Ado ja̧di dari̧ japapea̧ üdë ibëa̧ Ama̧i̧ pio ju̧i̧iä tarupadë maeade. Ibëa̧ Ama̧i̧ pio judiri ma̧na̧dë maeade jabo dai chirirä ja̧ maeade.

¹⁷ Ado pio yoa chiri üdë, dai chirirä ja̧ üdë, jabechji̧ yuropapade. Tjamo̧ davä. Dai chirirä ja̧ jo̧rȩtaji̧ri̧ pio judiro̧ dae ja̧bo dae ja̧bo darea̧ üdë, jabechji̧ yuropapade, jabo Ütë tjamo̧ ja̧ ma̧ȩrä ta̧rëdiämȩrȩ cjo̧ro̧mȩ pio judi, jabechji̧ bucho ana̧ cjo̧ro̧rea̧ dapade.

Quiricho pio ju̧i̧ tjamo̧ri̧ dëbëpe chjaomȩ pio judi ma̧na̧pade.

¹⁸ Danȩrȩ ca̧ u̧ri̧, pio yoa chiri üdë yuropapea̧ ji̧ querediäde yaba̧. Ado peadë ta̧rërëreji̧ri̧nȩrȩ cja̧rȩmȩ pumȩ pio ju̧i̧ chjiari, Quiricho pio ju̧i̧ tjamo̧ dëbëpe chjaopamȩ pio ju̧i̧ chjiari. Pio judi tjamo̧de cjiadiäa̧ japamitërä ma̧na̧pamȩ judi. Jabo danȩrȩ ca̧ oti̧, peadëri ja̧ ji̧ra̧pea̧dirȩ davä Quiricho pio ju̧i̧ goae tarari̧ dëbëpe chjaoji̧ri̧ judiro̧. Ado pio judiro̧ ji̧ra̧pea̧ oai, tjamo̧ri̧ dabarea̧rȩ. Tjamo̧ davä. Pio ju̧i̧iä tjamo̧ri̧ dabarea̧rȩ cjiadiäa̧ japamitë üdë ma̧na̧pea̧ ji̧.

¹⁹ Ado pio jiro pumȩ judiro̧, Quiricho pio ju̧i̧ dëbëpe chjaoji̧ri̧ pio judiro̧, jabechji̧ pio ibë nö̧ta a̧doparëreji̧ri̧dirȩ pearä judi. Jabo pio ibë nö̧ta ëba a̧dopea̧räbo, jabechji̧ pio ibë nö̧ta tjamo̧ri̧ cara̧ oa cjiami̧ dari̧ cjiadërëreji̧ri̧dirȩ. Jabechji̧ judiro̧ pio ibë nö̧ta tjamo̧ri̧ cara̧ oa cjiami̧ dari̧ cjiadiäa̧rä judi, dëdë, cjiadiäa̧täreji̧ri̧dirȩ pio ibë nö̧ta jadü cjiarea̧mi̧ dari̧ ëba a̧dopapea̧ oa. Jabo cjäri̧ madiro̧ibe, pio ibë nö̧ta tjamo̧ri̧ a̧doparea̧mi̧dë tara a̧dë baärëreji̧ri̧diro̧ibe, ibëa̧ pumȩ tjamo̧dë maearë.

²⁰ Jabo ja̧didënȩrȩ ca̧ oti̧. Jabechji̧ Quiricho pio judi yürürëremȩdidibe jibëa̧ Tjo pio ju̧i̧. Ado pio ju̧i̧iä tjamo̧i̧ cjiari̧ baämȩ ma̧ȩ pio ju̧i̧ tjamo̧ri̧ dabanȩrȩ. Jabechji̧ coëma cjiari̧ ütarapea̧ oa ütararea̧ chianȩrȩ tjamo̧i̧ cjiari̧ baämȩ ma̧ȩ pio ju̧i̧ chjiari, coëma cjiari̧ baädëmȩ ma̧ȩ pio ju̧i̧ chjiari.

²¹ Ado pio ju̧i̧iä mȩnȩro̧ tjamo̧ri̧ dabaji̧ri̧pea̧ tara, Quiricho pio ju̧i̧ chjiari tjamo̧i̧ cjiari̧ baämȩ ma̧ȩ pio ju̧i̧ tjamo̧ri̧ dabaji̧ri̧pea̧ tara, jabechji̧ go̧ȩpe chjadürequededibe ca̧ oti̧. Jabechji̧ dabadëji̧ri̧ oa go̧ȩpadërequededibe jabo mȩnȩro̧ tjamo̧ri̧ dabaji̧ri̧pea̧ji̧ri̧ oa go̧ȩpe chjadürequededibe. Jabechji̧ ütarë ta̧rërea̧ chianȩrȩ. Ado pio ju̧i̧iä eami̧ üdë teracaba ma̧ȩ oa a̧ra̧ano̧rä, jabechji̧ coëma cjiari̧ ütarapai̧ danȩrȩ pio ju̧i̧ chjiari. Jabechji̧ oëra̧ a̧ra̧ano̧rea̧ üdë coëma cjiari̧ baämȩ ma̧ȩ pio ju̧i̧ nö̧ta ji̧mo̧ baädë tara, jabechji̧ tjamo̧i̧ cjiari̧ ütararea̧ danȩrȩ oëra̧ a̧ra̧ano̧mȩ pio ju̧i̧ chjiari. Ado mȩnȩro̧ pio ju̧i̧bo dabaji̧ri̧pea̧ tara, jabechji̧ go̧ȩpe chjadürequededibe.

²² Ado oëra̧ a̧ra̧ano̧mȩ judi, ¿chjia tjamo̧de? Chjia tjamo̧dëde, jabechji̧ Jechu pio ju̧i̧ chjiari oëra̧ a̧ra̧ano̧mȩ pio judide. Jechu pio ju̧i̧ chjiari ma̧ȩ chjádë yürümȩ pio judide. ‘Aja̧, Jechu judi Ütërë mitëa̧ chjätä tänȩmȩ pio judi tjamo̧dëdida, jabo teracabadida’ quëna̧ yo̧mȩ pio judi tjamo̧de ma̧ȩ chjádë yürümȩ pio judi. Jabechji̧ Quiricho pio ju̧i̧ dëbëpe chjaomȩ pio judide. Jabechji̧ judi Ama̧i̧ tjamo̧ pio ju̧i̧ jiada̧ oaiä, Jechu Quiricho pio ju̧i̧bo jiada̧ oaiä, jabechji̧ Quiricho pio ju̧i̧ eadëmȩrȩ dëbëpe chjaodejȩ.

²³ Jabechji̧ eami̧ pumȩ üdë, ‘Aja̧, Jechu judi Ütërë mitëa̧ chjätä tänȩmȩ pio judidida’ quëna̧dërä judi, ‘jabechji̧dida’ quëna̧ dadëpadejȩ Ama̧i̧ tjamo̧ judi. Jabo eami̧ pumȩ üdë, ‘Aja̧, Jechu judi Ütë tjamo̧ ja̧ Joja pio judidida, Ütë tjamo̧ pio judi chjadüa̧ oa pio ibë chjiari birë ma̧na̧diibëda’ quëna̧mȩrȩ ni̧bä chjaorä judi, jabechji̧ ori̧ bagari̧ ëba cjiarea̧ dapade Ama̧i̧ tjamo̧ pio ju̧i̧ nö̧ta.

²⁴ Mȩnȩro̧ Jechu pio ju̧i̧ pearä quëna̧rërea̧ ma̧ȩ pio ju̧i̧ chjadëri̧ jidachji̧vä, dibëa̧ chji̧rä chadëri̧ charea̧mi̧ dari̧. Ado mȩnȩro̧ pio jiro ma̧ȩ oa quëna̧ oaiä, jabechji̧ Joja pio judiri ja̧ a̧ji̧ri̧mi̧ dari̧ cjo̧ro̧panȩrȩ, pio ju̧i̧ nö̧ta ori̧ bagari̧ ëba cjiarea̧mi̧ dari̧. Ado peaja̧dimi̧ dari̧ cjo̧ro̧panȩrȩ Ama̧i̧ tjamo̧ pio judiri ja̧ aji̧ri̧mi̧ dari̧.

²⁵ Jabechji̧ Ütë tjamo̧ pio judi ibë yo̧ë cji̧därërea̧mi̧ ori̧ bagari̧ ëba cjo̧ro̧rea̧ daea̧rea̧rȩ, bucho ana̧ cjo̧ro̧rea̧ chiaji̧ri̧rȩ.

²⁶ Danȩrȩ ca̧ oti̧, o judiro̧ dibë oëra̧diä tänȩtämi̧ cjia tara, pio yoa ma̧ȩ oa go̧ȩpe chjadürequededibe mȩnȩro̧ dabadëchea oa.

²⁷ Jabo danȩrȩ, Quiricho pio judi yürüa̧ oaiä, Tjo tjamo̧ pio ju̧i̧ chiaji̧ri̧pea̧nȩrȩ. Ado pio ju̧i̧iä dai chirirä ja̧ jo̧rȩtaji̧ri̧ pio judiro̧ dibë a̧ra̧ano̧rea̧mi̧dëdirȩ. Jabechji̧ Tjo tjamo̧ pio judi tjamo̧de dibë tjamo̧ a̧ra̧ano̧mȩ judi. Ado mȩnȩro̧ jabë dabapadëa̧ ma̧ȩ pio ju̧i̧ bapë ta̧rërea̧mi̧ dari̧ a̧ra̧ano̧didibe jabëdiärea̧ decjiari̧. Jabechji̧ teracaba ma̧ȩ oa a̧ra̧ano̧dë madidibe jabo tjamo̧i̧ cjiari̧ baämȩ ma̧ȩ maea oa a̧ra̧ano̧didibe. Ado judi dibë a̧ra̧ano̧a̧ ma̧ȩrä, jabechji̧ chjadëri̧ cjo̧ro̧chji̧vä, Quiricho pio judiri ja̧ a̧ji̧ri̧mi̧ dari̧, pio ju̧i̧ nö̧ta ori̧ bagari̧ ëba cjiarea̧mi̧ dari̧.

²⁸ Danȩrȩ ca̧ u̧ri̧, Quiricho pio judiri ja̧ a̧ji̧ri̧mi̧ dari̧ ji̧dë ma cjo̧ro̧chji̧vä, pio ju̧i̧ nö̧ta ori̧ bagari̧ ëba cjiarea̧mi̧ dari̧. Jabechji̧ mȩnȩro̧ idëri̧ cjiaji̧ri̧rȩ cjiadiächea oa, Jechu judi jana̧rä idëri̧ cjiaji̧ri̧rȩ cjiadiächea oa, mȩnȩro̧ pio ju̧i̧ ja̧ dëbëräpȩ cjiadäräa̧rä uapaji̧ri̧rȩ cjiadiächea oa, jabechji̧ pio judiri ja̧ a̧ji̧ri̧mi̧ dari̧ ji̧dë ma cjo̧ro̧chi̧vä.

²⁹ Jabechji̧ Quiricho pio ju̧i̧ chjiari, jënȩ a̧dë chjäte coëma cjiari̧ cjiapea̧ pio ju̧i̧ chjiari tjamo̧ri̧ dabanȩrȩ ca̧ oti̧. Ado peaja̧di dabanȩrȩ pumȩ pio ji̧ri̧ chjiari. Jabechji̧ eami̧ pumȩ üdë coëma cjiari̧ cjo̧ro̧rä judi, eami̧ üdë Quiricho pio judimi̧ dari̧ cjo̧ro̧rä judi, jabechji̧ judi jauëchja cjiari̧ ado nö̧ria̧ oa cjiade. Pio ju̧i̧ tjamo̧ri̧ dabarea̧rȩ.