Juan Ma̧ȩ 1 1 - Biblia Pume

Ma̧ȩ quȩmȩ pio ju̧i̧ chjiari, bucho ana̧ cjo̧ro̧rea̧ yürümȩ pio ju̧i̧ chjiari go̧ȩparëremȩde Juan judi.

¹ Pio yoa ma̧ȩ oa go̧ȩpamȩrȩ Ma̧ȩ quȩmȩ pio ju̧i̧ chjiari go̧ȩpe chjadütämi̧ cjiarequededibe. Jabechji̧ jabë dabu decjiarä cjiarëremȩ pio ju̧i̧ chjiari go̧ȩpe chjadürequededibe ca̧ oti̧, Jechu Quiricho pio ju̧i̧ chjiari. Tjamo̧ davä. Bucho ana̧ cjo̧ro̧rea̧ yürümȩ pio ju̧i̧ chjiari, Ma̧ȩ quȩmȩ pio ju̧i̧ chjiari go̧ȩpe chjadütämi̧ cjiarequededibe. Jabechji̧ pio ju̧i̧ irä darëreji̧ri̧rea̧ro̧jo̧ȩ ibëa̧ dachora̧. Pio ju̧i̧ irä ta̧rërëreji̧ri̧rea̧ro̧jo̧ȩ ibëa̧ ta̧ra̧ puëra̧. Ado pio ju̧i̧ irä ga̧re tararëreji̧ri̧rea̧ro̧jo̧ȩ peaja̧di ibëa̧ ichira̧. Aja̧ ca̧ oti̧, cjo̧ro̧rea̧ yürümȩ pio ju̧i̧ irä darëreji̧ri̧rea̧ro̧jo̧ȩ, ado pio ju̧i̧iä go̧ȩpe chjadürequededibe pio ju̧i̧ chjiari.

² Ado cjo̧ro̧rea̧ yürümȩ pio judi na̧rȩa̧ oa cjiarëremȩde a̧ro̧rȩ pio ju̧i̧ irä darea̧mi̧ dari̧. Ado pio ju̧i̧iä a̧ro̧rȩ irä darërea̧ pio ju̧i̧ chjiari go̧ȩpe chjadürea̧ro̧dibe ca̧ oti̧, ‘pio judi tjamo̧dida’ quëna̧ji̧ri̧rȩ. Pio ju̧i̧ chjiari a̧ra̧ano̧rea̧ro̧dibe bucho ana̧ cjo̧ro̧rea̧ yürümȩ pio ju̧i̧ chjiari. Jabechji̧ pearäri ja̧ ëba cjiarëremȩde Ama̧i̧ tjamo̧ pio ju̧i̧ nö̧ta. Ado ja̧dëa ji̧ ji̧dë duri oa na̧rȩa̧ oa cjiarëremȩdiibe pio a̧ro̧rȩ irä darea̧mi̧ dari̧.

³ Tjamo̧ davä. A̧ro̧rȩ irä darërea̧ pio ju̧i̧ chjiari, a̧ro̧rȩ irä ta̧rërërea̧ pio ju̧i̧ chjiari a̧ra̧ano̧rea̧ro̧dibe ca̧ oti̧, mȩnȩro̧ pio ibë nö̧ta ori̧ bagari̧ ëba cjiarea̧ dapea̧ oa. Jabo danȩrȩ, pio ibë nö̧tamo̧dë, jabo Ama̧i̧ tjamo̧ pio ju̧i̧ nö̧ta ori̧ bagari̧ ëba cjiarea̧ dapanȩrȩ peaja̧di. Ado jibëa̧ Ja pio ju̧i̧ nö̧ta ori̧ bagari̧ ëba cjiarea̧ dapanȩrȩ peaja̧di, Jechu Quiricho pio ju̧i̧ nö̧ta.

⁴ ¿Jabo tjana̧ ju̧i̧iä ja̧di dari̧ go̧ȩpe chjadürequededibe ca̧ oti̧? Tjana̧ ju̧i̧iädë, jabechji̧ mȩnȩro̧ Ama̧i̧ tjamo̧ pio ju̧i̧ nö̧ta ori̧ bagari̧ ëba cjiarea̧ dapea̧ oa go̧ȩpe chjadürequededibe, pio ju̧i̧ ja̧ Ja pio ju̧i̧ nö̧tabo. Ado mȩnȩro̧ jadi dari̧ japarä judi, jabechji̧ jabëdiärea̧ decjiari̧ ma̧ chiadëri̧ cjiari̧ jo̧rȩtaparea̧rȩ. Ado pio ju̧i̧iä go̧ȩpe chjadürequededibe.

Tatarea̧mi̧ dade Ütë tjamo̧ judi.

⁵ Aja̧ ca̧ oti̧, Jechu judi ibë ni̧bä chjaoa̧ ma̧ȩ pio ju̧i̧ ni̧bä chjaomi̧ dari̧ go̧ȩpe chjadürea̧ro̧dibe. Danȩrȩ, Ütë tjamo̧ judi tatarea̧mi̧ dade ado bagönȩrea̧ chiadë maeade. ¿Jabo tjana̧ yo̧rea̧de? Tjana̧ yo̧rea̧dë, ‘jabechji̧ chjadë tjamo̧de ado chjai̧dë chiadë maeade’ yo̧rea̧de.

⁶ Ado pio ju̧i̧iä a̧ro̧rȩ eami̧ oa yo̧rä judi, “Aja̧, Ütë tjamo̧ pio ju̧i̧ nö̧ta ori̧ bagari̧ ëba cjiarea̧ darequede” yo̧rä judi, jabo a̧ro̧rȩ chjai̧dë oa japaji̧ri̧rȩ cjo̧ro̧rä judi, cjäri̧ marea̧rȩ ca̧ oti̧, pio ju̧i̧ nö̧ta tjamo̧ri̧ ori̧ bagari̧ ëba cjiarea̧mi̧dërea̧rȩ, jabo bagönȩmi̧ daräpȩ cjo̧ro̧rea̧rȩ a̧ro̧rȩ tjamo̧i̧ cjiari̧ baämȩ ma̧ȩrä cjo̧ro̧dë tara. Jabechji̧ a̧ro̧rȩ tjamo̧i̧ cjiari̧ baämȩ ma̧ȩrä cjo̧ro̧tärea̧ ji̧, ma̧ȩ chjádë yürürea̧ro̧jo̧ȩ.

⁷ Jabo danȩrȩ, a̧ro̧rȩ tatami̧ darä cjo̧ro̧rä judi, Ütë tjamo̧ pio judimi̧ dari̧ tatami̧ darä cjo̧ro̧rä judi, jabechji̧ ori̧ bagari̧ ëba cjiarea̧ darea̧rȩ ibëa̧ dëbëti̧ra̧ chia. Ado Ütë ja̧ Joja pio ju̧i̧ ja̧ goe üdë, jabechji̧ ji̧dë ma joami̧ dari̧ japadiibe chjai̧dë üdë cjiadiärea̧ decjiari̧.

⁸ Jabo danȩrȩ ca̧ oti̧, a̧ro̧rȩ yo̧rä judi, “Cjäri̧ marequede, chjai̧dë chiadërequede” yo̧rä judi, cjäri̧ marea̧rȩ, tjamo̧i̧ cjiari̧ baämȩ ma̧ȩ üdë ibëa̧ chji̧rä jabë tjamo̧ri̧ chadëde jabo ji̧dëri̧ u̧i̧pea̧ oa cjiarea̧rȩ ibëa̧ ma̧na̧ri̧ japea̧ oaiä.

⁹ Jabo a̧ro̧rȩ chjai̧dëri̧ japea̧ pio ju̧i̧ chjiari goadidëji̧ri̧rȩ ni̧bärä judi, “Aja̧, cüdë chjai̧dëri̧ japamȩ pio judirequede” yo̧rä judi, jabechji̧ Ütë tjamo̧ pio judi duridëparȩpadiibe a̧ro̧rȩ chjai̧dëri̧ japea̧ chjö̧na̧i̧ oa. Ado chjai̧dë chiadëji̧ri̧mi̧ dari̧ cjiadiäparea̧rȩ, chjadëri̧ joa̧ oa cjiami̧ dari̧.

¹⁰ Jabo a̧ro̧rȩ yo̧rä judi, “Cjäri marequede, chjai̧dëri̧ japadëmȩrȩ cjo̧ro̧requede” yo̧rä judi, cjäri̧ marea̧rȩ ca̧ oti̧, a̧ro̧rȩ ja̧di ta̧rëri̧ yo̧a̧ oaiä, jabechji̧ ma̧ȩ chjádë yürümȩmi̧ dari̧ cjiadiä tänȩrea̧ro̧jo̧ȩ Ütë tjamo̧ pio ju̧i̧. “Jabechji̧ pumȩ ütëbodärärë chjai̧dëri̧ japea̧ maeadirȩ” yo̧rëremȩdiibe Ütë tjamo̧ judi. Ado pio ju̧i̧iä a̧ro̧rȩ, “Cjäri̧ marequede, chjai̧dëri̧ japadëmȩrȩ cjo̧ro̧requede” yo̧rä judi, ma̧ȩ chjádë yürümȩmi̧ dari̧ cjiadiä tänȩrea̧ro̧jo̧ȩ Ütë tjamo̧ ju̧i̧. Ado ¿yö̧ta dari̧ jo̧rȩtaji̧ri̧rȩ ja̧di ta̧rëri̧ yo̧täreji̧ri̧rea̧rȩ? Yö̧ta dari̧dë, jabechji̧ Ütë tjamo̧ ja̧ ma̧ȩ üdë ibëa̧ chji̧rä jabë chjadëri̧ boea̧ oa cjiami̧ dari̧ cjiadë tara ja̧di ta̧rëri̧ yo̧rea̧rȩ. Ado pio ju̧i̧iä ja̧di ta̧rëri̧ ni̧bärea̧rȩ, oëra̧ jo̧rȩtaji̧ri̧rȩ.