Juan 9 - Biblia Pume

Jechu judi arari ja̧ da cotomȩ pio ju̧i̧ chjaparȩrëremȩdejȩ

¹ Ado Jechu judi tai̧mȩrȩ darëremȩdejȩ üi̧ oa, arari ja̧ da cotomȩ ju̧i̧.

² Ado jibëa̧ jadü judiro̧ iëno̧ë ta̧rëa̧diro̧jo̧ȩ: —Danȩ A̧ra̧ano̧mȩ, ¿tjana̧ japatä da cotomȩrȩ ara̧ oa cjiarëremȩde pio jiro üi̧ üdë? ¿Pio judi chjai̧dëri̧ japea̧ oaiä da cotomȩde? ¿Jabo ju̧i̧ nö̧riji̧ri̧ pio judiro̧ chjai̧dëri̧ japea̧ oaiä da cotomȩrȩ cjo̧ro̧de? ¿Tjana̧ ju̧i̧iä ja̧di dari̧ ara̧ oa cjiade? Chjadëri̧ yo̧ibe —yo̧a̧diro̧jo̧ȩ.

³ Ado Jechu judi dëbë yo̧a̧dejȩrȩ: —Cjäri̧ made, jënȩ chjai̧dëri̧ japea̧ pio ju̧i̧iä da cotomȩrȩ cjiadiädërëremȩde. Ado jȩa nö̧riji̧ri̧ pio judiro̧ chjai̧dëri̧ japea̧ pio ju̧i̧iä peaja̧di da cotomȩrȩ cjiadiädëa̧de. Jabechji̧ da cotomȩrȩ ara̧ oa cjiarëremȩde Ütë tjamo̧ ja̧ jauëchja üdë pio jiro üi̧ pio ju̧i̧iä chjadëri̧ na̧rȩa̧ oa cjiapea̧ oa.

⁴ Danȩrȩ ca̧ jadü, do üdë jabë biradëa̧rä, chjadëri̧ ja̧bepë yürütäreji̧ri̧rea̧ro̧jo̧ȩ Ütë tjamo̧ ja̧ oa, coa chjadüa̧mȩ pio ju̧i̧ ja̧ oa. 'Jabechji̧ ado cja̧rȩmo̧ doro japaemȩ jiroquëda’ quëna̧rea̧ decjiari̧ jabërä chjadëri̧ ja̧bepadärätäreji̧ri̧rea̧rȩ, ibëa̧ Ama̧i̧ judi ibë yürüa̧ ja̧beparea̧ pio ju̧i̧. Jabechji̧ gȩnȩpea̧rä ja̧beparea̧mi̧dëde. Pio ju̧i̧iä jabechji̧, doro chjadëri̧ ja̧bepapea̧ chiarea̧rȩ ibë chjadüa̧mȩ pio ju̧i̧ ja̧ oa.

⁵ Ado pio ju̧i̧iä cüdë pio yoa chirirä cjo̧ro̧a̧ nö̧ta, jabechji̧ chiri nö̧tai̧ oa cjo̧ro̧ji̧ri̧ pio ji̧ri̧ tatami̧ darä jo̧rȩtarea̧ yürürequedejȩrȩ —dëbë yo̧a̧dejȩrȩ.

⁶ Ado Jechu judi ja̧di ta̧rëri̧ ni̧bä ëte, pju̧i̧noa̧de daburäpȩmo̧. Ado jënȩ pju̧i̧no̧a̧ ya ui oa mirea̧dejȩ dabu pjo̧no̧i̧ra̧ cjara mape bagari̧. Ado pio jiro cjarara̧ pio ju̧ri̧ra̧ joa̧dejȩ pumȩ ja̧ dacho oa.

⁷ Ado ja̧dëa ji̧ yo̧a̧dejȩ: —Jävä. Chiroe quȩmȩ tjaräpȩ jätä earequedemȩ na̧ dacho pio ju̧i̧ joapea̧ oa. Ado ‘Chiroȩ’ quȩmȩ yo̧a̧ ji̧, ‘chjadüa̧’ yo̧rea̧de. Ado Jechu judi yo̧a̧ oaiä, järëremȩde dacho oa chjadëri̧ joapea̧ oa. Ado tjaräpȩ joa̧ oaiä jabechji̧ chjaodëri̧ damȩpea̧de dadërërea̧ ji̧. Ado chjadëri̧ damȩrȩ go̧düna̧ra̧de ado chjereno̧ Jechu pio ju̧i̧iäpȩ.

⁸ Ado ju̧i̧ ja̧ bë queri̧räpȩ cjo̧ro̧ji̧ri̧ judiro̧ pio ju̧i̧ daea̧ ji̧, pio jibëiä cjo̧dë chjaotaremȩ pio ju̧i̧ daea̧ ji̧, jibëa̧ dëbëti̧ra̧ chia iëno̧ë ta̧rëji̧ri̧rȩ ni̧bä chjaoji̧ri̧pea̧dirȩ. —Pio jiro üi̧ üdë pearä judi chamȩrȩ cjo̧dë chjaoremȩ ¿pio judidëde? —iëno̧ë ta̧rëa̧dirȩ.

⁹ —Aja̧ pio judide —yo̧a̧dirȩ o judiro̧. Jabo o judiro̧ ja̧di dari̧ jo̧rȩtadëa̧dirȩ. —Cjäri̧ made, judidëde —yo̧a̧—. Ado cja̧rȩmo̧de. Jabo dëdë, chjapea̧ oa cjiamȩ pio judimi̧ dade —yo̧a̧dirȩ. Ado chjapea̧ oa cjiamȩ üi̧ üdë jibëa̧ dëbëtira̧ chjia ni̧bä chjaoji̧ri̧ pio ji̧ri̧ ta̧rëa̧ oaiä, irä yo̧a̧dejȩrȩ: —Danȩrȩ, pio judirequede davä. Pio dibëiä da cotomȩrȩ cjo̧dë charërea̧ ji̧, jabechji̧ chjapea̧ oa cjiarequede yaba̧. Ado cja̧rȩmo̧dërequede, jabo pio judirequede —yo̧a̧dejȩrȩ.

¹⁰ —Jabo chjadëri̧ yo̧ibe. ¿Yö̧ta dari̧ chjapea̧ oa cjiarenȩ yaba̧ da cotomȩrȩ cjo̧ro̧rërea̧ ji̧? —iëno̧ë ta̧rëa̧diro̧jo̧ȩ.

¹¹ Ado dëbë yo̧mȩrȩ yo̧a̧dejȩrȩ: —Yö̧ta dari̧dë, jabechji̧ Jechu quȩmȩ pio judi chjaparȩa̧dique —yo̧a̧dejȩrȩ—. Cjarara̧ japa ëte, joa̧dique ca̧ dacho oa. Ado ja̧di dari̧ japa ëte, ca̧ dacho oa joe jätä yo̧a̧dique Chiroȩ quȩmȩ tjaräpȩ. Ado joa̧ ji̧, jabechji̧ chjaodëri̧ damȩpea̧requede dadërërea̧ ji̧. Chjaodëri̧ chjapea̧ oa cjiadiäa̧requede —yo̧a̧dejȩrȩ.

¹² Ado jiro üi̧ üdë, pio mȩa̧ chjaparȩa̧mȩ pio judi, ¿tjana̧räpȩde? —iëno̧ë ta̧rëa̧diro̧jo̧ȩ. —Dabadëde —dëbë yo̧a̧dejȩrȩ.

Pjaricheo judiro̧ iëno̧ iëno̧ cjiarëreji̧ri̧diro̧jo̧ȩ da cotoremȩ ju̧i̧

¹³ Ja̧dëa ji̧ da cotoremȩ pio ju̧i̧ nö̧ta ni̧bä chjaoreji̧ri̧ pio judiro̧ ëba järëreji̧ri̧diro̧jo̧ȩ pjaricheo pio ji̧ri̧iäpȩ.

¹⁴ Jabechji̧ Jechu judi da cotoremȩ pio ju̧i̧ chjaparea̧ do üdë, cjarara̧ jo̧a̧ do üdë, järätä chjaparea̧ dorëremȩde.

¹⁵ Ado go̧düdärämȩ oa pjaricheo pio judiro̧borë iëno̧ë iëno̧ë ta̧rëa̧diro̧jo̧ȩ jënȩ chjapea̧ pio ju̧i̧ chjiari. Ado da cotoremȩ üdë o ji̧ri̧ dëbë yo̧a̧mi̧ yo̧rëremȩdejȩrȩ peaja̧di. —Danȩrȩ, cjarara̧ japa ëte, joa̧dejȩ ca̧ dacho oa. Ado ca̧ dacho oa joa ëte, jabechji̧ chjaodëri̧ damȩpea̧requede da cotorërea̧ ji̧ —yo̧a̧dejȩrȩ.

¹⁶ Ado pjaricheo judiro̧ orë yo̧a̧dirȩ: —Jabo cjäri̧ made —yo̧a̧dirȩ—. Ja̧di dari̧ japea̧mȩ üi̧ üdë Ütë tjamo̧ pio judiri ma̧na̧dëa̧de. Jabechji̧ pio judiri ma̧na̧rä judi, järätä chjaparea̧ doro ja̧di dari̧ chjaparȩdëa̧täremȩdejȩ, jabo chjadëri̧ cjo̧ro̧a̧täremȩde tüdüa̧mi̧ darä —yo̧a̧dirȩ. Jabo o judiro̧ yo̧a̧dirȩ: —Jabo danȩrȩ, chjaparȩa̧mȩ judi pumȩ chjai̧dërä judi, Ütë tjamo̧ ja̧ jauëchjara̧ ja̧di dari̧ na̧rȩrea̧ dadëa̧täremȩde —yo̧a̧dirȩ. Ado pio ju̧i̧iä yo̧a̧ri̧ bubami̧ dari̧ cjiadiäa̧dirȩ Jechu pio ju̧i̧ chjiari, cja̧rȩmȩ coëma cjiari̧ jo̧rȩtadëji̧ri̧rȩ.

¹⁷ Ado ja̧dëa ji̧ pjaricheo judiro̧ ado iëno̧ë ta̧rëa̧diro̧jo̧ȩ da cotoremȩ ju̧i̧. —Danȩ, yo̧ibe ado. Pio jiro üi̧ üdë mȩa chjaparȩa̧ pio ju̧i̧ chjiari pea yo̧a̧räbo, jabechji̧ ado chjereno̧ yo̧ibe. Da cotoremȩ oa chjaparȩa̧ pio ju̧i̧ chjari ado yo̧ibe chjadëri̧. ¿Yö̧ta dari̧ jo̧rȩtanȩ mȩa chjaparȩa̧mȩ pio ju̧i̧ chjiari? —yo̧a̧diro̧jo̧ȩ. Ado da cotoremȩ üdë: —Yö̧ta dari̧ jo̧rȩtadë, ‘jabechji̧ Ütërë ea jana̧ chjadüa̧ oa ni̧bämȩ pio judidida’ quëna̧ jo̧rȩtareconȩ —dëbë yo̧a̧dejȩrȩ.

¹⁸ Jabo tjamo̧ yo̧ji̧ri̧ judio judiro̧ quëna̧dëri̧ cjiarëreji̧ri̧diro̧jo̧ȩ. ‘Tjamo̧ri̧ da cotomȩrȩ ara̧ oa cjiadiädëa̧ jirodida, tjamo̧ri̧ chjapea̧ oa cjiadë jirodida’ quëna̧ jo̧rȩta̧ oaiä, jabechji̧ ma̧ȩ chjadürëreji̧ri̧diro̧jȩrȩ ju̧i̧ nö̧riji̧ri̧ pio ji̧ri̧iäpȩmo̧, pio ji̧ri̧iä chjadëri̧ ta̧rëpea̧ oa.

¹⁹ Ja̧dëa ji̧ nö̧riji̧ri̧ pio judiro̧ go̧düdäräa̧rä, iëno̧ë iëno̧ ta̧rëa̧diro̧jȩrȩ peaja̧di: —Danȩrȩ, ¿pio yüdëje dibëa̧ jadëde? ¿Ado tjamo̧ri̧ da cotomȩ oa ara̧ oa cjiarëremȩde? Ado tjamo̧ri̧ da cotomȩ oa ara̧ oa cjia̧rä judi, ¿yö̧ta dari̧ damȩpea̧de yaba̧? —iëno̧ë ta̧rë chjaoa̧diro̧jȩrȩ.

²⁰ Ja̧dëa ji̧ nö̧riji̧ri̧ judiro̧ dëbë yo̧a̧diro̧jȩrȩ: —Danȩrȩ, tjamo̧ri̧ yo̧nȩrȩ. Pio yodëje ibëa̧ jade —yo̧a̧diro̧jȩrȩ—. Ado da cotomȩrȩ ara̧ oa cjo̧ro̧rëremȩde.

²¹ Jabo pio a̧ro̧rȩborë tjamo̧ri̧ dabadërea̧rȩ. ‘¿Yö̧ta dari̧ chjapea̧ oa cjiadida, da cotomȩrȩ cjo̧ro̧rërea̧ ji̧, ¿yö̧ta dari̧ chjapea̧ oa cjiadida yaba̧, ¿chjiarë chjaparȩa̧diji̧da’ quëna̧ jo̧rȩtadërea̧rȩ peaja̧di —yo̧a̧diro̧jȩrȩ—. Jabo jabechji̧, pio ju̧i̧ irä iëno̧ë ta̧rëchji̧jo̧ȩ. Chji̧ chiade. Dëbë yo̧rea̧ chiade. Boi̧chji̧ ma ja̧didëde —dëbë yo̧a̧diro̧jo̧ȩ.

²² Aja̧, ja̧di ta̧rëri̧ yo̧ji̧ri̧rȩ dëbë yo̧rëreji̧ri̧diro̧jȩrȩ pjaricheo pio ji̧ri̧iäpȩmo̧. Jabechji̧ tjamo̧ yo̧ji̧ri̧ judio pio ji̧ri̧ uapea̧ oaiä ja̧di ta̧rëri̧ dëbë yo̧rëreji̧ri̧diro̧jȩrȩ, chjö̧na̧i̧ oa yo̧tärea̧ ji̧. Jabechji̧ peadë ta̧rërëreji̧ri̧dirȩ davä judiro̧ ma̧ȩ yürüa̧ pio ju̧i̧ chjiari, Jechu ju̧i̧iäpȩmo̧ quëna̧ji̧ri̧ yo̧a̧ pio ji̧ri̧ chjiari. "'Aja̧, Jechu judi Ütërë mitëa̧ Chjätä Tänȩmȩ pio judidida’ quëna̧ji̧ri̧ pio judiro̧, jabechji̧ dairäpȩ tutia̧ oa cjiami̧ dari̧ cjiapadirȩ, judiorë a̧doparea̧ bëräpȩ a̧doparea̧mi̧dëri̧” yo̧a̧ pio ju̧i̧ peadë ta̧rëa̧dirȩ.

²³ Ado pio ju̧i̧iä nö̧riji̧ri̧ judiro̧ ütëbo oa chjadëri̧ yo̧tärea̧ ji̧, jabechji̧ joja pio ju̧i̧, üi̧padäräa̧mȩ pio ju̧i̧ chjadëri̧ iëno̧ë ta̧rëtä yo̧a̧diro̧jȩrȩ tjamo̧ yo̧ji̧ri̧ judio pio ji̧ri̧.

²⁴ Ado pio ju̧i̧iä ado iëno̧ë ta̧rëa̧diro̧jo̧ȩ da cotoremȩ ju̧i̧. —Danȩ, Ütë tjamo̧ pio ju̧i̧iäpȩmo̧ ba chia jo̧rȩtamȩrȩ chjadëri̧ yo̧ibe yaba̧, ma̧ȩ chjádë yürürea̧ decjiari̧ —yo̧a̧diro̧jo̧ȩ—. Danȩ, pio jiro üi̧ üdë mȩa chjaparȩa̧mȩ pio ju̧i̧ chjiari tjamo̧ri̧ dabarea̧ro̧jo̧ȩ chjai̧dëri̧ japea̧mȩ oa. Pio ju̧i̧iä chjadëri̧ yo̧ibe yaba̧ —yo̧a̧diro̧jo̧ȩ.

²⁵ Judiro̧ ado chjereno̧ iëno̧ë ta̧rëa̧ oaiä, ado dëbë yo̧a̧dejȩrȩ da cotoremȩ üdë: —Danȩrȩ, cüdë jiro üi̧ pio ju̧i̧ chjiari tjamo̧ri̧ dabadëreconȩ —yo̧a̧dejȩrȩ—. ‘Judi pumȩ chjai̧dëdida’ quëna̧ dabadërequede, jabo pio ju̧i̧mo̧i̧ dabamȩrȩ yo̧requededibe jabo. Cüdë da cotomȩrȩ cjo̧ro̧rërea̧ ji̧, jabechji̧ damȩpea̧requede yaba̧ chjadëri̧ —yo̧a̧dejȩrȩ.

²⁶ —Jabo ¿tjana̧ japea̧dimȩ —iëno̧ë ta̧rëa̧diro̧jo̧ȩ ado—. ¿Yö̧ta dari̧ chjaparȩa̧dimȩ mȩnȩ da cotomȩrȩ cjo̧ro̧rërea̧ ji̧?

²⁷ Ado da cotoremȩ üdë ado dëbë yo̧a̧dejȩrȩ: —Jaboti̧ri̧ japarenȩro̧coe. ¿Tjana̧ japatä ji̧dë ma iëno̧ iëno̧ ta̧rë cjiarenȩro̧coe? Peadë yo̧a̧requededibe, jabo ta̧rëdëa̧renȩro̧coe. Jabechji̧ ta̧ra̧ cotomi̧ dari̧ cjianȩrȩ —yo̧a̧dejȩrȩ—. ¿Tjana̧ ju̧i̧iä ado chjereno̧ ta̧rëtämi̧ cjianȩrȩ? ¿Pio mȩnȩro̧borë cho̧rë jätämi̧ cjiarenȩro̧jo̧ȩ jiro chjaparȩmȩ ju̧i̧? ¿Pio mȩnȩro̧borë pio ju̧i̧ ja̧ jadütämi̧ cjianȩrȩ? —yo̧mȩrȩ bapë iëno̧ë ta̧rëa̧dejȩrȩ da cotoremȩ üdë, chjaoriä iëno̧ë ta̧rëmȩrȩ.

²⁸ Pio ju̧i̧ ta̧rëa̧ oaiä ja̧di ta̧rëri̧ yo̧ji̧ri̧rȩ ya̧ea̧diro̧jo̧ȩ: —Aja̧, mȩnȩ pio ju̧i̧ ja̧ jadü jirorenȩ, jabo ja̧didërea̧rȩ. Moiche pio ju̧i̧ ja̧ jadümi̧ dari̧ cjiarea̧rȩ.

²⁹ Ado a̧ro̧rȩ Moiche pio ju̧i̧ chjiari, jabechji̧ tjamo̧ri̧ dabarea̧rȩ. ‘Ütë tjamo̧ judi Moiche pio ju̧i̧iäpȩmo̧ ma tjamo̧ri̧ ni̧bäa̧diji̧da’ quëna̧ dabarea̧rȩ. Jabo mȩnȩ yo̧a̧ üi̧ pio ju̧i̧ chjiari dabadë marea̧rȩ. ‘Pio judiri ma̧na̧ tjamo̧diibëda’ quëna̧ dabadë marea̧ro̧jo̧ȩ —yo̧a̧diro̧jo̧ȩ.

³⁰ Jabo da cotoremȩ üdë dëbë yo̧a̧dejȩrȩ: —¿Tjamo̧ri̧ yo̧nȩrȩ? ¿Pio judiri ma̧na̧diibëda tjamo̧ri̧ quëna̧ dabadënȩrȩ? ¿Ca dacho oa chjaparȩa̧räbo, jabë dabadënȩrȩ? Chia chia. Tjamo̧ri̧ dabaji̧ri̧rämi̧ cjiatea̧requededibe —yo̧a̧dejȩrȩ—.

³¹ Danȩrȩ, Utë tjamo̧ judi ta̧rë ja̧bodëdejȩrȩ pumȩ chjai̧dë pio ji̧ri̧. Pio ji̧ri̧ ta̧rë ja̧bodëdejȩrȩ, jabo pio jȩaiäpȩmo̧ ba chia jo̧rȩtaji̧ri̧ pio ji̧ri̧mo̧i̧ ta̧rë ja̧bodejȩrȩ, jȩa ta̧rëdiäji̧ri̧ pio ji̧ri̧mo̧i̧. Pio ju̧i̧ dabarea̧rȩ peadë.

³² Ado danȩrȩ, dabu oa pareapea̧ pio judiri yurori chjaparȩa̧ oa cjiadërëremȩde da cotomȩ üdë. Jabechji̧ cja̧rȩmȩ co japea̧ oa cjiadërëremȩde. Ado pio ju̧i̧iä pio ju̧i̧ chjiari dabadë marea̧rȩ. Pumȩ üdë da cotomȩ pio ju̧i̧ cja̧rȩmȩ co chjaparȩpea̧ ji̧ ta̧rëdëa̧rea̧rȩ. ‘Aja̧, pio jiro pumȩ üdë da cotoremȩ pio ju̧i̧ chjaparȩa̧diji̧da, jȩa ara̧ri ja̧ da cotoremȩ pio ju̧i̧ chjaparea̧diji̧da’ quëna̧ ta̧rëdë marea̧rȩ.

³³ Ado pio ju̧i̧iä yo̧requededibe. Danȩrȩ, pio coa chjaparȩa̧mȩ pio judi Ütë tjamo̧ pio judiri ma̧na̧dëa̧rä judi, jabechji̧ ja̧di dari̧ na̧rȩrea̧ dadëa̧täremȩdiibe —yo̧mȩrȩ dëbë yo̧a̧dejȩrȩ da cotoremȩ üdë, tjamo̧ yo̧ji̧ri̧ judio pio ji̧ri̧iäpȩmo̧.

³⁴ Ado ju̧i̧ ta̧rëa̧ oaiä, goëdëri̧ cjiape bagaji̧ri̧rȩ yo̧a̧diro̧jo̧ȩ: —Mȩnȩ jabë ara̧ oa cjiadëa̧rä chjai̧dë tjamo̧rëremȩrenȩ —yo̧a̧diro̧jo̧ȩ—. Ado chjai̧dë ja̧ chja̧oerämo̧ cjiamȩrȩ ütëparëremȩrenȩ. Ado ja̧di dari̧ cjo̧ro̧mȩborë ¿a̧ra̧ano̧tarenȩibe? Cjäri̧ marenȩ, ibë a̧ra̧ano̧rea̧mi̧dërenȩ —ya̧ji̧ri̧rȩ dëbë yo̧a̧diro̧jo̧ȩ. Ado chjaodëri̧ go̧dü tänȩrëreji̧ri̧diro̧jo̧ȩ dairäpȩmo̧, judiorë a̧doparea̧ bëräpȩ a̧doparea̧mi̧dëri̧.

Da cotomi̧ dari̧ cjiadirȩ o judiro̧

³⁵ Paricheo judiro̧ da cotoremȩ pio ju̧i̧ ma̧i̧ dari̧ japea̧ pio ju̧i̧ chjiari ta̧rëa̧ oaiä Jechu judi goëdepea̧dejȩ, jënȩ chjaparȩa̧ pio ju̧i̧. Ado pio ju̧i̧iäpȩ go̧düdäräa̧mȩrȩ iëno̧ë ta̧rëa̧dejȩ: —Danȩ, ¿Pumȩrȩ Ara̧ Tjamo̧ pio ju̧i̧ quëna̧dënȩ? —iëno̧ë ta̧rëa̧dejȩ.

³⁶ Ado üi̧ üdë dëbë yo̧a̧dejȩ: —Danȩ, ‘pio judidida’ quëna̧ dabadërequede —yo̧a̧dejȩ—. Chjadëri̧ yo̧coe cüdë pio ju̧i̧iäpȩmo̧ quëna̧pea̧ oa —yo̧a̧dejȩ.

³⁷ Ado Jechu judi yo̧a̧dejȩ: —Pea daea̧renȩjo̧ȩ —yo̧a̧dejȩ—. Ado yaba̧ mȩa nö̧ta ni̧bämȩ pio judide —yo̧a̧dejȩ.

³⁸ Ado pio ju̧i̧ ta̧rëa̧ oaiä, ja̧di ta̧rëri̧ yo̧a̧dejȩ da cotoremȩ üdë: —Aja̧, quëna̧requedemȩ Ano̧mȩ —yo̧a̧dejȩ. Ado chjaodëri̧ ju chatura̧ cjiadiäa̧de Jechu ja̧ dëbëräpȩ.

³⁹ Ado yo̧a̧dejȩ Jechu judi: —Danȩ, a̧dëri pio judiri bira̧requede chiri nö̧tai̧ oa cjo̧ro̧ji̧ri̧ pumȩ pio ji̧ri̧ ütaramȩrȩ tutipea̧ oa —yo̧a̧dejȩ—. Jabechji̧ da cotomi̧ dari̧ cjiaji̧ri̧ pio ji̧ri̧ jibëa̧ buba tutia̧ oa cjiapadirȩ. Ado dadiäji̧ri̧mi̧ dari̧ cjiaji̧ri̧ pio ji̧ri̧ peaja̧di jibëa̧ buba tutia̧ oa cjiapadirȩ. Jabechji̧ da cotomi̧ dari̧ cjiaji̧ri̧ pio ji̧ri̧ dadiäji̧ri̧mi̧ dari̧ cjiadiä tänȩparequedejȩrȩ. Ado dadiäji̧ri̧mi̧ da pio ji̧ri̧ da cotomi̧ dari̧ cjiadiä tänȩparequedejȩrȩ. Pio ju̧i̧ japapea̧ oa bira̧requede —yo̧a̧dejȩ.

⁴⁰ Ado Jechu judi da cotoremȩ pio ju̧i̧ ja̧di ta̧rëri̧ ni̧bä chjaomȩ oa ta̧rëa̧diro̧jo̧ȩ pjaricheo judiro̧ orë. Ado iëno̧ë ta̧rëa̧diro̧jo̧ȩ: —¿Pio ibë chjiari yo̧dënȩ? ‘Pio judiro̧ da cotomi̧ dari̧ cjiadiro̧da’ quëna̧mȩrȩ ¿yo̧dënȩ? —yo̧ë ta̧rëa̧diro̧jo̧ȩ.

⁴¹ Ado Jechu judi dëbë yo̧a̧dejȩrȩ: —Danȩrȩ, mȩnȩro̧ da cotomi̧ dari̧ cjiadiäa̧rä judi, dibëa̧ chjai̧dë üdë cjiadiädëa̧täremȩde Ütë tjamo̧ pio ju̧i̧iä. Jabechji̧ duridëparȩa̧ oa cjiatäremȩde. Jabo mȩnȩro̧ oëra̧ quëna̧ oaiä, ‘Aja̧, jabechji̧a̧ro̧da, da cotomi̧ dari̧ cjiadëa̧ro̧da’ quëna̧ jo̧rȩta̧ oaiä, jabechji̧ dibëa̧ chjai̧dë üdë cjiadiäa̧de. Ado aeno̧pea̧ maearë cjianȩrȩ —yo̧mȩrȩ dëbë yo̧rëremȩdejȩrȩ Jechu judi, pjaricheo pio ji̧ri̧iäpȩmo̧.