Juan 20 - Biblia Pume

Ja̧boa̧remȩrȩ bëdüa̧de Jechu judi

¹ Ado yabo baämȩ doro, domingo doro jabë gȩnȩrä, Maria Madarena pio jini̧ järëreyi̧nȩ ta̧dë cjararäpȩ. Ado ta̧dë chachara̧ tutia̧ oa cjiaremȩ jo̧ë ya pio ju̧i̧ daea̧nȩjȩ arë goëa̧ oa cjiamȩ oa, ta̧dë decjia oa.

² Ado pio ju̧i̧ dayi̧rȩ chjaodëri̧ bagureno̧a̧nȩ Chimo̧ Pedro pio ju̧i̧iäpȩ, Jechurë ea̧ jadü pio ju̧i̧iäpȩ. Ado pio ji̧ri̧iäpȩ go̧düdäräa̧rä, yo̧a̧nȩjȩrȩ: —Danȩrȩ, baë mitëa̧diro̧jo̧ȩ ibëa̧ Ano̧mȩ ja̧ icjara oa. Ta̧dë cjarari pio judiri go̧dü tänȩa̧diro̧jo̧ȩ ado ‘pio ju̧ri̧pȩ ano̧ mire arë a̧ra̧ oa cjia jirodida yaba̧’ quëna̧ dabadërequede —yo̧a̧nȩjȩrȩ.

³ Pio ju̧i̧ ta̧rëa̧ oaiä, Pedro judi jä cjiëno̧a̧de ta̧dë cjararäpȩ. Ado cja̧rȩmo̧ jadü üdë, peaja̧di Jechu ja̧ jadü üdë, peaja̧di jäcjiëno̧a̧de pio ju̧ri̧pȩ.

⁴ Goae tarari̧ baguraji̧ri̧rȩ jäeno̧a̧dirȩ. Jabo ado cja̧rȩmo̧ jadü üdë ji̧dë u̧i̧ goae tarari̧ baguramȩrȩ Pedro ja̧ yaboi̧ go̧düdärärëremȩde.

⁵ Jabo yu̧a̧dëa̧de, jabo dairäpȩ uëdai̧ garë dae cjiamȩrȩ daea̧dejȩ puria̧rea̧ chjibo coto oa, Jechu pio ju̧i̧ puria̧rea̧ chjibo coto oa.

⁶ Jabo Pedro judi duri oa go̧düdäräremȩrȩ chjaodëri̧ yu̧a̧dejȩ ta̧dë cjararäpȩ. Ado pio judiborë daea̧dejȩ puria̧rea̧ chjibo coto oa a̧rȩmȩ oa.

⁷ Ado cja̧rȩmo̧ chjibo coto oa peaja̧di daea̧dejȩ, Jechu ja̧ tjübë oa puria̧rea̧ chjibo coto pio ju̧i̧. Chjibo coto orë a̧rȩmȩräpȩ a̧rȩdërëremȩde, jabo chjadëri̧ puria̧ oa cjiarëremȩde ado cja̧rȩmo̧ro.

⁸ Ja̧dëa ji̧ ado cja̧rȩmo̧ jadü üdë, ta̧dë cjararäpȩ yaboi̧ go̧düdäräa̧mȩ pio judiborë yu̧a̧de. Ado pio ju̧i̧ daea̧ oaiä, ‘Aja̧ Jechu judi bëdüa̧dida’ quëna̧mȩpea̧de ja̧di dari̧ quëna̧dërea̧ ji̧.

⁹ Jabechji̧ pearä judi na̧e chiadërëreji̧ri̧dirȩ pio jiro jadü judiro̧. Ütë tjamo̧ ja̧ ma̧ȩ üdë go̧ȩpea̧ oa cjiaräbo, Jechu judi ja̧boa̧remȩrȩ bëdüpea̧ pio ju̧i̧ chjiari ma̧ȩ üdë jabërä go̧ȩpea̧ oa cjiaräbo, jabechji̧ na̧e chia tjamo̧dërëreji̧ri̧dirȩ.

¹⁰ Ado ja̧dëa ji̧ jibëa̧ bëräpȩ ado chjereno̧ baäa̧dirȩ pio jiro jadü judiro̧.

Jechu judi pio jȩaiäpȩmo̧ da tänȩrëremȩdejȩ Maria Madarena ji̧

¹¹ Jabo Maria Madarena ji̧ni̧ jadü pio ji̧ri̧ nö̧ta baädëa̧nȩ, jabo ta̧dë cjara dairäpȩ cjiadiäa̧nȩ ejaro cjiayi̧rȩ. Ado jabë ejaro cjia̧ nö̧ta, uëdai̧ cjiayi̧rȩ garë daea̧nȩ ta̧dë cjara tjoräpȩmo̧.

¹² Ado yo̧a̧ri̧ oa, a̧dëriji̧ri̧ mu̧i̧tjoi̧ pio ji̧ri̧ daea̧nȩjȩrȩ bërebëreara̧ ina̧ oa cjiaji̧ri̧ oa. Jechu ja̧ icjara oa arë a̧ra̧rërea̧räpȩ charëreji̧ri̧dirȩ. Cja̧rȩmȩ üdë charëremȩde jibëa̧ tarë a̧rȩrërea̧räpȩmo̧. Ado cja̧rȩmo̧ üdë charëremȩde jibëa̧ tjübërë a̧rȩrërea̧räpȩmo̧.

¹³ Ado Maria pio ji̧ iëno̧ë ta̧rëa̧diro̧jȩ: —Damȩ iei̧, ¿tjana̧ japayi̧rȩ ejaro cjiamȩ? Ado dëbë yo̧a̧nȩjȩrȩ: —Danȩrȩ, o judiro̧ baë goa baäa̧diro̧jo̧ȩ ca̧ Ano̧mȩ pio ju̧i̧ ja̧ icjararemȩ oa —yo̧a̧nȩjȩrȩ—. ‘Ado pio ju̧ri̧pȩ ano̧ mire arë a̧ra̧ jirodiro̧ju̧i̧da’ quëna̧ dabadërequede. Pio ju̧i̧iä ejaro cjiarequede —yo̧a̧nȩjȩrȩ.

¹⁴ Ja̧dëa ji̧ jibëa̧ duriräpȩmo̧ ano̧ mire daea̧nȩ Maria jini̧. Ado Jechu pio ju̧i̧ daea̧nȩjȩ. Jabo ‘judidida’ quëna̧ dadëa̧nȩjȩ.

¹⁵ Ado Jechu judi iëno̧ë ta̧rëa̧dejȩ: —Iei̧, ¿tjana̧ ju̧i̧iä ejaro cjiamȩ? ¿Chjia oa na̧tamȩ? —iëno̧ë ta̧rëa̧dejȩ. Jabo Jechu ja̧ ma̧ȩ pio ju̧i̧ ta̧rëa̧räbo, ‘tjado jidamȩ pio judi jirodida’ quëna̧ jo̧rȩtayi̧rȩ daea̧nȩjȩ. Ado pio ju̧i̧iä dëbë yo̧a̧nȩjȩ: —Danȩ, mȩnȩ Jechu ja̧ icjara oa baë goa baäa̧rä judi, chjadëri̧ yo̧coe —yo̧a̧nȩjȩ—. Jabechji̧ goëdepareconȩ ado chjereno̧ goa ma̧na̧pea̧ oa —yo̧a̧nȩjȩ.

¹⁶ Ja̧dëa ji̧ Jechu judi yo̧a̧dejȩ: —Maria. Ado judi jibëa̧ quȩ oa yo̧a̧ oaiä, chjaodëri̧ poë cürë jo̧rȩtayi̧pea̧nȩ, ‘Jechu pio judidida’ quëna̧ jo̧rȩtayi̧rȩ. Ado chjaodëri̧ mȩmȩrȩpë cjiadiäa̧yi̧rȩ yo̧a̧nȩjȩ Jechu ju̧i̧: —Daboni. Ado ja̧di tarëri̧ yo̧a̧ üdë, jabechji̧ "a̧ra̧ano̧mȩ" yo̧rea̧de Ebereo ma̧ȩra̧. Ado chjaodëri̧ ida̧nȩjȩ.

¹⁷ Jabo Maria jini̧ Jechu ju̧i̧ ida chjaoa̧ oaiä yo̧a̧dejȩ: —Ji̧dë ma chjuari̧ acji idadëcoa —yoa̧dejȩ—. Damȩ, cüdë ca̧ Ama̧i̧ pio ju̧i̧iäpȩ jabë baädëa̧ oaiä, ji̧dë ma ida chjaodëcoa. Jabo damȩ, cuchupë jäeno̧je ca̧ oti̧ pio ji̧ri̧iäpȩmo̧ ta̧rë tänȩpea̧ oa. Cüdë ca̧ Ama̧i̧ pio ju̧i̧iäpȩ ado chjereno̧ baäpea̧ pio ju̧i̧ chjiari, cüdë pio ji̧ri̧ ja̧ Ama̧i̧ ju̧i̧iäpȩ baäpea̧ pio ju̧i̧ chjiari, yo̧ji̧ri̧. Tjamo̧ davä. Cüdë ca̧ Ütë pio ju̧i̧iäpȩ baäpea̧ ju̧i̧ chjiari yo̧ji̧ri̧, cüdë pio ji̧ri̧ ja̧ Ütë pio ju̧i̧iäpȩ baäpea̧ ju̧i̧ chjiari. Jäje —yo̧a̧dejȩ Jechu judi.

¹⁸ Ado pio ju̧i̧ ta̧rëa̧ oaiä, jäeno̧rëreyi̧nȩ Maria Madarena jini̧ Jechu ja̧ jadü pio ji̧ri̧iäpȩmo̧ ta̧rë tänȩpea̧ oa. Jënȩ Ano̧mȩ pio ju̧i̧ daea̧ ju̧i̧ ni̧bä chjaopea̧ oa, Jechu judi pio jȩaiäpȩmo̧ ni̧bä chjaoa̧ pio ju̧i̧ ni̧bä chjaopea̧ oa, cuchupë jäeno̧a̧nȩ.

Jechu judi pio jȩaiäpȩmo̧ da tänȩrëremȩdejȩrȩ jibëa̧ jadü ji̧ri̧

¹⁹ Ado jabë Domingo doro gȩnȩpea̧ duri oa, Jechu ja̧ jadü pio judiro̧ chjuari̧ tutia̧rä goadi a̧dopea̧ oa cjiarëreji̧ri̧dirȩ. Jabechji̧ judio tjamo̧ yo̧ji̧ri̧ pio ji̧ri̧ uapa tjamo̧ oaiä, ja̧di dari̧ goadi a̧doparëreji̧ri̧dirȩ, ado cja̧rȩmo̧rȩ yu̧a̧rea̧mi̧dëräpȩ. Jabo ja̧dëa ji̧ Jechu judi chjaodëri̧ idëpea̧de jibëa̧ chjarerä. Ado yo̧a̧dejȩrȩ: —Chji̧ goaera̧ jo̧rȩtachji̧vä, ma̧ chjupi̧ cjiari̧ jo̧rȩtarea̧mi̧ dari̧.

²⁰ Ado pio ju̧i̧mo̧i̧ yo̧ ëte, na̧rȩa̧dejȩrȩ jibëa̧ ichi coremȩ oa, jibëa̧ pjatëtu ju chjia yuroi̧rä coremȩ oa. Ado jadü judiro̧ Ano̧mȩ pio ju̧i̧ daea̧ oaiä, a̧dë chjäte ma̧ chiadëri̧ cjiapea̧dirȩ.

²¹ Ja̧dëa ji̧ Jechu judi ado yo̧a̧dejȩrȩ: —Chji̧ goaera̧ jo̧rȩtachji̧vä ma̧ chupi̧ cjiari̧ jo̧rȩtarea̧mi̧ dari̧. Ado danȩrȩ, Ama̧i̧ tjamo̧ judi pio coa chjadürërea̧mi̧ ano̧ mire chjadürequededibe peaja̧di —yo̧a̧dejȩrȩ.

²² Ja̧dëa ji̧ pio ji̧ri̧iäpȩmo̧ pjuramȩrȩ yo̧a̧dejȩrȩ: —Dibëa̧ icjararä bëparea̧ yürüchji̧jo̧ȩ Tjo tjamo̧ pio ju̧i̧.

²³ Ado mȩnȩro̧ eami̧ pumȩ ju̧i̧iäpȩmo̧ yo̧rä judi, “Aja̧, mȩnȩ chjai̧dëri̧ japea̧ üdë duridëparȩa̧ oa cjiade” yo̧rä judi, jabechji̧ duridëparȩa̧ oa cjiapade. Ado mȩnȩro̧ eami̧ pumȩ ju̧i̧iäpȩmo̧ yo̧rä judi, “Aja̧, mȩnȩ chjai̧dëri̧ japea̧ üdë duridëparȩa̧ oa cjiadëde” yo̧rä judi, peaja̧di duridëparȩa̧ oa cjiadëpade —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧, tutia̧räpȩ goadi a̧dopë cjiaji̧ri̧ oa.

Toma judi Jechu ju̧i̧ irä daea̧rämo̧ quëna̧rëremȩde

²⁴ Pearä judi Jechu ja̧ jadü judiro̧, 12rëreji̧ri̧dirȩ. Ado ju̧i̧ ja̧ jadü üdë cja̧rȩmȩrȩ Toma quȩmȩrëremȩde. Peaja̧di "Chjara" yo̧rëreji̧ri̧diro̧jo̧ȩ ju̧i̧. Ado Jechu judi jibëa̧ jadü ja̧ chjarerä chjaodëri̧ idëpea̧rä, pio judiborë a̧dopadërëremȩde.

²⁵ Ado pio ju̧i̧iä o judiro̧ yo̧a̧diro̧jo̧ȩ. —Ano̧mȩ pio ju̧i̧ irä daea̧rea̧ro̧jo̧ȩ —yo̧a̧diro̧jo̧ȩ. Jabo Toma judi yo̧a̧dejȩrȩ: —Cjäri̧ marequede, cüdë irä daea̧rämo̧ quëna̧pareconȩ. Jabechji̧ irä dadërä judi, judiro̧ chjipararira̧ cjacjarë gu̧na̧ coremȩ pio ju̧i̧ irä dadërä judi, ju̧i̧ ja̧ ichi coremȩ pio ju̧i̧ ca̧ ichira̧ ga̧re taradërä judi, jabechji̧ quëna̧dëpareconȩ. Tjamo̧ davä. Cüdë guadiarë jibëa̧ pjatëtu ju chjia yuroi̧rä gua̧ duri pio ju̧i̧ dadërä judi, ca̧ ichira̧ pio ju̧i̧ ga̧re taradërä judi, jabechji̧ quëna̧dëpareconȩ —yo̧a̧de.

²⁶ Ja̧dëa ji̧ cja̧rȩmȩ chemana chjätä ëte, Jechu ja̧ jadü pio judiro̧ ado chjereno̧ goadi a̧dopea̧ oa cjiarëreji̧ri̧dirȩ jo̧ tjoräpȩ chjuari̧ tutia̧rä, ado cja̧rȩmo̧rȩ yu̧a̧rea̧mi̧dëräpȩ. Ado Toma pio judiborë a̧doparëremȩde. Jabo yu̧a̧rea̧mi̧dëräbo, chjaodëri̧ idëpea̧de Jechu judi jibëa̧ chjarerä. Ado yo̧a̧dejȩrȩ: —Chji̧ goaera̧ jo̧rȩtachji̧vä ma̧ chjupi̧ cjiari̧ jo̧rȩtarea̧mi̧ dari̧.

²⁷ Ado ja̧dëa ji̧ Jechu judi yo̧a̧dejȩ Toma ju̧i̧: —Jana̧vä. Davä ca̧ ichi oa. Ca̧ ichirä coremȩ pio ju̧i̧ ga̧re taravä na̧ ichira̧. Ado peaja̧di ca̧ pjatëtu ju chjia yuroi̧rä coremȩ pio ju̧i̧bo ga̧re taravä. Jabechji̧ na̧e chia cjiari̧ jo̧rȩtavä. Quëna̧dëmȩrȩ cjo̧ro̧dëvä, jabo quëna̧coe —yo̧a̧dejȩ.

²⁸ Ado Toma judi irä daea̧ oaiä, yo̧a̧dejȩ: —Ca̧ Ano̧mȩrenȩ. Ca̧ Ütërenȩ.

²⁹ Ado Jechu judi yo̧a̧dejȩ: —¿Mȩnȩ coa irä daea̧rämo̧ quëna̧mȩpea̧renȩ? —yo̧a̧dejȩ—. Jabo danȩ, chjadëri̧ cjiadiätädirȩ coa irä dadëräbo quëna̧ji̧ri̧ pio judiro̧. Aja̧, pio coa irä dadëräbo quëna̧ji̧ri̧ pio judiro̧ a̧dë chjäte ma̧ chiadëri̧ cjia jo̧rȩtarea̧ datädirȩ —yo̧mȩrȩ yo̧rëremȩdejȩ Toma ju̧i̧ Jechu judi.

Pio yoa ma̧ȩ oa go̧ȩparëremȩ pio judi ni̧bädiibe Juan pio judi

³⁰ Cüdë pio yoa ma̧ȩ oa, Jechu pio ju̧i̧ chjiari ma̧ȩ oa go̧ȩparërea̧ ji̧, jabechji̧ ütëbodärä oa go̧ȩparea̧ dadëa̧requede. Jabechji̧ orë go̧ȩpea̧ oa cjiadëde. Jechu judi jibëa̧ jadü pio ji̧ri̧ ja̧ dachoro jauëchja cjiari̧ jape chjaoa̧ üdë orë, cjäri̧ made, pio yoa go̧ȩ irä go̧ȩpea̧ oa cjiadëde.

³¹ Jabo danȩrȩ, cüdë go̧ȩpea̧ ma̧ȩ üdë, jabechji̧ mȩnȩro̧ chjadëri̧ quëna̧pea̧ oa go̧ȩpea̧ oa cjiade. ‘Aja̧, Jechu judi Ütërë mitëa̧ Chjätä Tänȩmȩ pio judidida, Ütë tjamo̧ ja̧ Joja pio judi tjamo̧dida’ quëna̧ dabapea̧ oa go̧ȩpea̧ oa cjiade pio mȩnȩro̧ Jechu pio ju̧i̧ quëna̧ oaiä bucho ana̧ cjo̧ro̧rea̧ dapea̧ oa.