Juan 2 - Biblia Pume

Jechu judi jauëchja cjiari̧ na̧rȩrëremȩdejȩrȩ

¹ Ado Jechu judi Natanera quȩmȩ pio ju̧i̧ nö̧ta ni̧bä chjao ëte, yo̧a̧ri̧ do chjätä ëte, pumȩ no̧i̧dërë a̧doparëreji̧ri̧dirȩ Cana quȩmȩ bë ma̧ri̧räpȩ ju̧ri̧, Garirea quȩmȩ chiriräpȩ cjiamȩ bë ma̧ri̧räpȩ ju̧ri̧. Jabechji̧ üi̧ judi jibëa̧ iei̧ ji̧ ëba̧ oaiä a̧doparëreji̧ri̧dirȩ, airi̧ cjia ëba juraji̧ri̧rȩ. Ado Jechu ju̧i̧ arayi̧ pio jini̧borë a̧doparëreyi̧nȩ.

² Ado Jechu judi peaja̧di cjiarëremȩde, jibëa̧ jadüborë. Jabechji̧ pio jibë jätä yabëa̧ oaiä peaja̧di järëreji̧ri̧dirȩ.

³ Jabo judiro̧ juraji̧ri̧rȩ a̧dopea̧ ji̧, chjaodëri̧ goarijärëremȩde bino quȩmȩ ërü üdë. Ado pio ju̧i̧iä Jechu arayi̧ pio jini̧ yo̧a̧nȩjȩ joja oa: —Danȩ, bino decjiapea̧de.

⁴ Ado Jechu judi dëbë yo̧a̧dejȩ: —Aja̧ ai̧, dabaquë. ¿Jabo tjana̧ ju̧i̧iä na̧ea̧ ma̧na̧ri̧ jo̧rȩtayi̧rȩ yo̧mȩcoa? Jabëquë. Ca̧ jauëchjarea̧ pio ju̧i̧ na̧rȩpea̧ do üdë jabë ma̧na̧dëa̧di —yo̧a̧dejȩ.

⁵ Jabo jibëa̧ ai̧ jini̧ cjiadiädëyi̧rȩ yo̧a̧nȩjȩrȩ jurarea̧ra̧ a̧doji̧ri̧ pio ji̧ri̧iäpȩmo̧: —Jechu pio judi yo̧emȩ jirodidibe. Ado judi yo̧a̧mi̧ jabechji̧ japachji̧vä —yo̧a̧nȩjȩrȩ.

⁶ Ado ju̧ri̧pȩ charëreji̧ri̧dirȩ dabu yocodëmi̧ da üdë, 6rë. Tjaoërä jiro yocodërä uira̧ are cjaräa̧diro̧jo̧ȩ Judio judiro̧. Jabechji̧ tüdüa̧mi̧ darä cjo̧ro̧ji̧ri̧rȩ are cjarä ëte joa chjaorëreji̧ri̧dirȩ chjai̧dë gȩrȩ chiadëji̧ri̧mi̧ dari̧ cjiadiäpea̧ oa Ütë tjamo̧ pio ju̧i̧iä. Ado pio ju̧i̧iä jachidëräpȩ charëreji̧ri̧dirȩ, ta̧dëra̧ chjuroa̧ oa cjiamȩ yocodërë, bori̧dërë. Orë 50 litro ui oa mitërëremȩde. Ado orë, 70 litro ui oa mitërëremȩde.

⁷ Ado Jechu judi yo̧a̧dejȩrȩ a̧doji̧ri̧ pio ji̧ri̧: —Danȩrȩ, pio jiro yocodërä tjuriri̧ cjiari̧ are cjarächji̧vä uira̧. Ado Jechu judi yo̧a̧mi̧ chö̧ra̧dirȩ tjuriri̧ cjiari̧.

⁸ Ja̧dëa ji̧ Jechu judi yo̧a̧dejȩrȩ: —Danȩrȩ, jabëtari̧mi̧ oa ae ëte a̧de jächji̧jo̧ȩ tjamo̧ a̧dopamȩ pio ju̧i̧iäpȩ, judi jarapea̧ oa. Ado Jechu judi yo̧a̧mi̧ japea̧dirȩ.

⁹ Ado pio jiro uiremȩ üdë chjaodëri̧ ërüpea̧de. Bino quȩmȩ ërüpea̧de. Ado tjamo̧ a̧dopamȩ judi jarë tara̧ ji̧, ‘Aja̧, pio judiri mu̧i̧ ma̧na̧diro̧coada’ quëna̧ dabadërëremȩde. Jurarea̧ra̧ a̧doji̧ri̧ mu̧i̧tjoi̧ pio judiro̧ dabarëreji̧ri̧dirȩ jabo judi dabadëa̧de. Pio ju̧i̧iä ëna̧diärëremȩdejȩ üi̧ ju̧i̧, jibëa̧ iei̧ pea ëbamȩ pio ju̧i̧.

¹⁰ Ado yo̧a̧dejȩ: —Danȩ, o judiro̧ airi̧ cjia airi̧ cjia a̧doparä, jabechji̧ bino goae tjamo̧ oa yabochja ëba jaradiro̧jȩrȩ pumȩ ji̧ri̧. Ado ja̧dëa ji̧ japamitë chjätä ëte pumȩ judiro̧ ji̧ra̧ri̧ jara̧rä, jabechji̧ bino goae tjamo̧dë oa ano̧ mire ëba jaradiro̧jȩrȩ. Jabo ja̧di dari̧ japadëa̧renȩ. Jabechji̧ pearä yürüa̧ bino pio judi goarijäa̧rä, pio yoa ano̧ mire yürüa̧renȩibe ji̧dë u̧i̧ goae oa —yo̧a̧dejȩ.

¹¹ Ado Jechu judi jauëchja cjiari̧ japadërëremȩrȩ ja̧di dari̧ japamȩpea̧de Cana quȩmȩ bë ma̧ri̧räpȩ ju̧ri̧, Garirea quȩmȩ chiriräpȩ ju̧ri̧. Ado ja̧di dari̧ japamȩrȩ na̧rȩrëremȩde pio jȩa chjiari. ‘Aja̧, Ütë tjamo̧ ja̧ Jojadida’ daba quëna̧rea̧mi̧ dari̧ na̧rȩrëremȩde. Ado pio ju̧i̧iä jibëa̧ jadü judiro̧ quëna̧ji̧ri̧pea̧diro̧jo̧ȩ.

¹² Ja̧dëa ji̧ ja̧di dari̧ japa ëte Jechu judi järëremȩde Capanau̧ quȩmȩ bë ma̧ri̧räpȩ. Jibëa̧ ai̧ pio ji̧ nö̧ta, jibëa̧ oti̧ pio ji̧ri̧ nö̧ta järëremȩde, jibëa̧ jadü pio ji̧ri̧ nö̧ta. Ado ju̧ri̧pȩ cjiadiärëreji̧ri̧dirȩ do ji̧ra̧dëri̧.

Jechu judi jaepe ma̧ȩrëremȩdejȩrȩ gatë tänȩji̧ri̧ pio ji̧ri̧

¹³ Ado uëmo̧ a̧dë chjätärea̧ do üdë queri̧na̧ra̧ oaiä, jabechji̧ järëremȩde Jechu judi Jerucharȩräpȩ.

¹⁴ Ado Ütë tjamo̧ ja̧ bëräpȩ jämȩrȩ dadärärëremȩdejȩrȩ gatë tänȩji̧ri̧ pio ji̧ri̧, pumȩ judiro̧ goe gu̧rori̧ cäë yürüpea̧ oa gatë tänȩji̧ri̧ pio ji̧ri̧. Ji̧ra̧ tjamo̧ oa daea̧dejȩrȩ. Baca oa gatë tänȩji̧ri̧ pio ji̧ri̧, oveja oa gatë tänȩji̧ri̧ pio ji̧ri̧, ado jotoco pua oa gatë tänȩji̧ri̧ pio ji̧ri̧ daea̧dejȩrȩ. Ado chëre oa ano̧ mire yürüji̧ri̧ pio ji̧ri̧bo daea̧dejȩrȩ jibëa̧ mechjaräpȩ chaji̧ri̧ oa. Ütë tjamo̧ ja̧ bëräpȩji̧ri̧ oa darëremȩdejȩrȩ gatë tänȩ chjaoji̧ri̧ oa. Ado Jechu judi, ‘Jabo cjäri̧ madiro̧da, Ütë tjamo̧ ja̧ bërä ja̧di dari̧ japarea̧mi̧dëdida, ca̧ Amai̧ pio ju̧i̧iäbo goae tjamo̧dëdiji̧da’ quëna̧ jo̧rȩtamȩrȩ darëremȩdejȩrȩ.

¹⁵ Ado pio ju̧i̧iä chjaodëri̧ jëdano̧a̧dejȩ biderea̧ ca̧i̧ oa. Ado ja̧dëa ji̧ biderea̧ ca̧i̧ra̧ pio ju̧ri̧ra̧ oë ja̧bo tänȩmȩrȩ jaepe ma̧ȩrëremȩdejȩrȩ baca oa gatë tänȩji̧ri̧ pio ji̧ri̧, oveja oa gatë tänȩji̧ri̧ pio ji̧ri̧bo. Aja̧, baca oa ma̧ȩa̧dejȩrȩ, ovejabo. Dairäpȩmo̧ go̧dürea̧mi̧ dari̧ jaepe ma̧ȩa̧dejȩrȩ. Ado chëre chiaremȩ mechja pio ju̧i̧ ara ara cjareno̧a̧dejȩrȩ, chëre üdë oëra̧ti̧ oa cha̧oë china̧däräri̧.

¹⁶ Ado jotoco pua oa gatë tänȩji̧ri̧ pio ji̧ri̧iäpȩmo̧ to̧bari̧ yo̧a̧dejȩrȩ: —Danȩrȩ, godü tänȩchji̧jo̧ȩ pua oa. Jabechji̧ ca̧ Amai̧ ja̧ bë üdë gatë tänȩrea̧ bëdëde, jabo gatë tänȩrea̧ bëmi̧ dari̧ japea̧renȩro̧jo̧ȩ. Jabechji̧ go̧düchji̧vä —yo̧a̧dejȩrȩ.

¹⁷ Ado Jechu ja̧ jadü judiro̧ ja̧di dari̧ japamȩ oa daea̧ oaiä, jo̧rȩtarëreji̧ri̧dirȩ Davirea̧ pio judi jabërä go̧ȩparërea̧ ma̧ȩ pio ju̧i̧. Ja̧di ta̧rëri̧ go̧ȩpea̧ oa cjiamȩ ma̧ȩ oa jo̧rȩtarëreji̧ri̧diro̧jo̧ȩ: “Aja̧, järi tjamo̧requede na̧ bë oa chjadëri̧ jidapea̧ oa, ado pio ju̧i̧iä ja̧bo tänȩpadiro̧coe” yo̧mȩ ma̧ȩ pio ju̧i̧ jo̧rȩtarëreji̧ri̧diro̧jo̧ȩ Jechu ja̧ jadü judiro̧. Jabechji̧ Jechu pio ju̧i̧ ja̧di dari̧ japamȩ oa irä daea̧ oaiä, pio jiro ma̧ȩ oa jo̧rȩtarëreji̧ri̧diro̧jo̧ȩ.

¹⁸ Ja̧dëa ji̧ Jechu judi ja̧di dari̧ japea̧ oaiä, judio tjamo̧ yo̧ji̧ri̧ pio judiro̧ ana̧ tjamo̧ri̧ jo̧rȩtaji̧ri̧rȩ iëno̧ë ta̧rëa̧diro̧jo̧ȩ: —¿Jabo tjana̧ ju̧i̧iä ja̧di dari̧ japea̧renȩ? ¿Chjia ja̧ ma̧ȩrä ja̧di dari̧ japarea̧ daea̧renȩ? Mȩnȩ Ütë tjamo̧ ja̧ ma̧ȩrä tjamo̧ri̧ japea̧rä judi, jabechji̧ chjadëri̧ na̧rȩibe jauëchja cjiari̧ japea̧ oaiä —yo̧a̧diro̧jo̧ȩ.

¹⁹ Ja̧dëa ji̧ Jechu judi dëbë yo̧mȩrȩ yo̧a̧dejȩrȩ: —Dëdë, na̧rȩparequededibe. Jabechji̧ Ütë tjamo̧ ja̧ bë pio yoa iëchäeno̧ ëte, jabechji̧ ado chjereno̧ cji̧dëno̧pareconȩ tjarari̧ do chjätä ëte. Aja̧, ja̧di dari̧ japamȩrȩ na̧rȩparequededibe —yo̧mȩrȩ yo̧a̧dejȩrȩ.

²⁰ —Jabo cjäri̧ marenȩ —dëbë yo̧a̧diro̧jo̧ȩ—. Ütë tjamo̧ ja̧ bë pio judi chjao tjamo̧rëremȩde. Pumȩ no̧i̧dë tjamo̧rȩ ana̧ri̧ ja̧bepe cjiarëreji̧ri̧diro̧jo̧ȩ 46 ui nö̧ta. Chjao tjamo̧ri̧ ja̧beparëreji̧ri̧diro̧jo̧ȩ japadäräpea̧ ji̧. Ado mȩnȩ, Ütë tjamo̧ ja̧ bë oa, tjarari̧ do chjätä ëte cji̧dädärärea̧ dapaquëda’ ¿quëna̧renȩ mȩnȩ? Cjäri̧ marenȩ, ja̧di dari̧ japëno̧rea̧mi̧dërenȩ —yo̧ji̧ri̧rȩ yo̧a̧diro̧jo̧ȩ, dacho bëremi̧ cjiari̧ jo̧rȩtaji̧ri̧rȩ.

²¹ Jabo Jechu judi Ütë tjamo̧ ja̧ bë pio ju̧i̧ chjiari yo̧a̧ ji̧, Ütë tjamo̧ ja̧ bë oa jo̧rȩtamȩrȩ yo̧dëa̧dejȩrȩ jabo jibëa̧ icjara pio ju̧i̧ chjiari yo̧rëremȩdejȩrȩ.

²² Ado pio ju̧i̧iä japamitë chjätä ëte Jechu judi ja̧boa̧remȩrȩ bëdüa̧rä, jabechji̧ jibëa̧ jadü judiro̧ jo̧rȩtarëreji̧ri̧dirȩ Jechurë yo̧a̧ pio ju̧i̧. ‘Aja̧, bëdüa̧dida, ado judio pio ji̧ri̧iäpȩmo̧ no̧mȩ yo̧rërea̧ ji̧, jibëa̧ icjara pio ju̧i̧ chjiari yo̧rëremȩdida, ado dëdë, tjarari̧ do chjätä ëte cji̧dëno̧mi̧ dari̧ bëdüa̧dida, tjamo̧ri̧ yo̧a̧diji̧ri̧da’ quëna̧ jo̧rȩtarëreji̧ri̧dirȩ. Aja̧, pio ju̧i̧iä quëna̧rëreji̧ri̧dirȩ Ütë tjamo̧ ja̧ ma̧ȩ oa, Jechurë yo̧a̧ pio ju̧i̧.

Pumȩ ja̧ chji̧ oa cjacjarë daba damȩde Jechu judi

²³ Jechu judi Jerucharȩräpȩ ju̧ri̧ cjiadiärëremȩde uëmo̧ a̧dë chjätärea̧ do üdë chjätäa̧rä yuro. Ado ju̧ri̧pȩ cjiadiäa̧ nö̧ta noi̧dërë quëna̧ji̧ri̧pea̧diro̧jo̧ȩ quëna̧dërërea̧ ji̧. Jabechji̧ jauëchja cjiari̧ japamȩ oa dae chjaoa̧ oaiä, jabechji̧ quëna̧mi̧ dari̧ japarëreji̧ri̧diro̧jo̧ȩ.

²⁴ Jabo pio jȩaiäpȩmo̧ quëna̧mi̧ dari̧ japaji̧ri̧pea̧räbo, 'jabechji̧ tjamo̧ri̧ quëna̧ji̧ri̧pea̧diro̧coada' quëna̧ jo̧rȩtamȩrȩ dadëa̧dejȩrȩ jibëa̧ chji̧räpȩmo̧ cjacjarë damȩ tara.

²⁵ Jabechji̧ pio ji̧ri̧ chjiari chjö̧na̧i̧däräti̧ oa daba darëremȩde, pumȩ pio ji̧ri̧iä ta̧rëdëmȩborë. 'Jabechji̧ pio jiro pumȩ üdë ja̧di dari̧ cjo̧ro̧dida, ja̧di dari̧ jo̧rȩtadida, ja̧di dari̧ quëna̧mȩcji̧ quëna̧ japamȩdida’ quëna̧ daba marëremȩdejȩrȩ, pumȩ ja̧ chji̧ pio ju̧i̧ chjiari tjamo̧ri̧ dabamȩrȩ.